Ne Fai ne Ia a Vavega, Kae ne ‵Teke Atu ki ei i Nasaleta

E uke ‵ki a mea ne fai ne Iesu i te aso kātoa tenā. Mai tua o tena malaga mai i kogā koga o Tekapoli, ne faka‵lei aka ne ia te fafine telā ne ‵tafe tena sua, kae fakatu aka foki ne ia te tama fafine a Iailo. Kae ne seki gata atu i konā ana mea ne fai i te aso tenā. I te taimi ne tiakina ei ne Iesu te fale o Iailo, ne tau‵tali atu a tāgata ‵kivi e tokolua i a ia, kae ne ka‵laga atu: “Te Tama a Tavita, a koe ke alofa mai ki a māua.”—Mataio 9:27.

Mai te ka‵laga atu ki a Iesu me ko te “Tama a Tavita,” ne fakaasi atu ei ne tāgata konā te lā tali‵tonu me i a Iesu ko te sui telā e ‵tau o maua ne ia te nofogaaliki o Tavita, kae ko te Mesia foki. Ne foliga mai me ne seki fia saga muamua atu a Iesu ki te lā ka‵laga, kāti ke iloa aka me ka pefea te lā tumau i te ka‵laga atu, kae tenā eiloa te lā mea ne fai. I te taimi ne ulu atu ei a Iesu ki loto i te fale, ne tau‵tali atu foki lāua i a ia. Ne fesili atu a Iesu ki a lāua: “E mata, e tali‵tonu koulua me e mafai ne au o fai te mea tenei?” Ne tali atu lāua mo te mautinoa: “Ao, e te Aliki.” Telā, ne fakapatele atu ei a Iesu ki lā mata, kae fai atu: “Ke fai eiloa penā, e ‵tusa mo te mea e tali‵tonu koulua ki ei.”—Mataio 9:28, 29.

Se mea vave eiloa o ‵kite lā mata! E pelā eiloa mo ana fakatonuga ki nisi tino mai mua atu, ne fakatonu faka‵lei atu a Iesu ki a lāua ke se fakasalalau atu ki tino tena mea ne fai. Kae ona ko te lā fia‵fia, ne fai‵pati atu ei lāua e uiga ki a ia i kogā koga katoa i konā.

I te ologa a tāgata konā, ne aumai ne tino se tagata telā ko se faipati ona ko te mea ne ulufia ne te temoni. Ne ‵tuli keatea ne Iesu a te temoni, kae ne kamata ei o faipati te tagata tenā. Ne ōfo malosi te vaitino i te mea tenei, kae fai atu: “E seki ai eiloa se mea penei kai lavea atu i Isalaelu.” Ne ‵nofo atu foki i konā a Falesaio. E se mafai ne latou o fakafiti a vavega konā, telā ne toe taku atu ei ne latou te lotou ‵losiga e uiga ki te pogai o galuega a Iesu: “E afuli ne ia a temoni mai te malosi o te pule o temoni.”—Mataio 9:33, 34.

Mai tua malie ifo, ne foki atu a Iesu ki tena fa‵kai ko Nasaleta, kae i te taimi tenei ne olo fakatasi atu a ia mo ana soko. Kāti se tausaga mai mua o te taimi tenei, ne akoako atu ei a ia i te sunako i konā. Ne ōfo muamua a tino i ana pati ne fai, kae fakamuli ifo ne kaitaua latou ki ana akoakoga kae ne taumafai ke tamate ne latou a ia. Nei la, ko toe taumafai a Iesu o fesoasoani atu ki ana tuakoi mua.

I te Sapati, ne foki atu a ia ki te sunako ke akoako i ei. Ne ōfo malosi a tino e tokouke, kae ne fai olotou fesili: “Ne maua i fea ne te tagata tenei a te poto mo galuega ‵mana konei?” Ne fai mai latou: “E se ko ia tenei te tama a te kamuta? E se ko Malia tena mātua, kae ko ana taina ko Iakopo mo Iosefa mo Simona mo Iuta? E se ko ana tuagane katoa konei e ‵nofo mo tatou? Tela la, tefea te koga ne maua ei ne te tagata tenei a mea katoa konei?”—Mataio 13:54-56.

Ne ma‵natu aka a tino me i a Iesu se tino fua i te fa‵kai. ‘Ne matea atu ne tatou tena tupuakaga,’ ko olotou mafaufauga, ‘tela la, e mafai pefea o fai a ia mo fai te Mesia?’ Tela la, faitalia a fakamaoniga katoa—e aofia i ei a te lasi o te poto o Iesu mo ana vavega—ne ‵teke atu latou ki a ia. Ona ko te lotou masani ‵lei mo Iesu, ke oko ki ana kāiga ne seki tali‵tonu foki ki a ia, telā ne fai atu ei ki a ia: “A te pelofeta e se ‵malu i tena fenua tonu mo tena fale.”—Mataio 13:57.

A te ‵tonuga loa, ne ofo a Iesu i te sē lava o te lotou fakatuanaki. Tela la, ne seki fai ne ia se vavega “kae na ko te fakaeke atu fua o ana lima ki nai tino ma‵saki o faka‵lei latou.”—Maleko 6:5, 6.