Mataupu e 48

Ne Tiakina ne Ia te Fale o Iailo​—Kae ne Toe Āsi Atu ki Nasaleta

E UKE a mea ne fai ne Iesu i te aso tenā​—ne faimalaga atu a ia mai Tekapoli i te namo, ne faka‵lei aka ne ia te fafine telā ne tafe tena sua, kae ne toe fakatu aka ne ia te tama fafine a Iailo. Kae ne seki palele te aso. I te taimi ne tiakina ei ne Iesu te fale o Iailo, kāti ne tau‵tali atu a tāgata ‵kivi e tokolua ki a ia, kae ne ka‵laga atu penei: “Te Tama a Tavita, alofa mai ki a maua.”

Mai te faiatuga me i a Iesu ko te “Tama a Tavita,” ne taku atu ei ne tāgata konā te lā talitonuga me i a Iesu ko te sui telā e ‵tau o maua ne ia te nofogaaliki o Tavita, ko tena uiga ko ia ko te Mesia telā ne folafola mai. Kae ne foliga mai pelā me ne seki saga atu a Iesu ki lā kalagaga mō se fesoasoani. Kāti ne fia tofotofo aka ne ia te lā loto ‵mau. Kae ne seki gata te lā taumafaiga. Ne tau‵tali atu laua ki a Iesu ki te fale telā ne nofo a ia i ei. Kae i tena ulu­atuga ki loto i te fale, ne tau‵tali atu foki laua ki a ia.

I konā loa ne fesili atu a Iesu penei: “E tali‵tonu koulua me e mafai ne au o fai a te mea nei?”

“Ao, e te Aliki!” ko te lā tali mautinoa.

Telā, ne fakapatele atu ei a Iesu ki lā mata, ana muna: “E pelā eiloa mo te mea e tali‵tonu koulua ki ei, ke fai eiloa penā!” Se mea vave o ‵pula lā mata! Kae ne fakatonu malosi atu a Iesu ki a laua, penei: “Sa taku atu ne koulua a te mea nei ki so se tino!” Kae ona ko te lasi o te lā fia‵fia, ne seki faka‵logo laua ki te fakatonuga a Iesu kae ne fai‵pati atu laua e uiga ki a ia i kogā koga katoa i konā.

Ne fatoā olo keatea a tāgata konā, kae ne aumai ne tino se tagata telā ne ulufia ne te temoni telā ne fai ei a ia ke se faipati. Ne tuli keatea ne Iesu a te temoni, kae ne kamata fakavave ei o faipati te tagata tenā. Ne ofo malosi te vaitino i vavega konā, olotou muna: “E seki lavea eiloa ne tatou se mea penei i Isalaelu.”

Ne ‵nofo atu foki i konā a nisi Falesaio. E se mafai ne latou o fakafiti atu ki vavega konā, kae ona ko te sē tali‵tonu mo te loto masei, ne toe taku atu ei ne latou te ‵losiga e uiga ki te pogai ne fai ei ne Iesu ana galuega ‵mana, olotou muna: “Ko te pule sili o temoni ne tuku atu ne ia ki a ia a te ‵mana o afuli keatea a temoni.”

Ne fatoā oti atu a mea konā, kae ne toe foki atu a Iesu ki tena fakai ko Nasaleta, kae ne olo fakatasi atu latou mo ana soko i te taimi tenā. Kāti ko tai kātoa te tausaga e tasi talu mai te taimi ne āsi atu ei a ia ki te sunako kae ne akoako atu i konā. E tiga eiloa ne ofo malosi muamua a tino i ana pati logo‵tonu, fakamuli ifo ne ita latou ki ana akoakoga kae ne taumafai o tamate ne latou a ia. I konā loa, ona ko te alofa, ne toe taumafai a Iesu o fesoasoani atu ki ana tuakoi mua.

E tiga eiloa ne ua‵lolo sāle atu a tino ki a Iesu i nisi koga, e ­foliga mai me ne seki fai penā i konā. Tela la, i te Sapati ne fanatu ei a ia ki te sunako ke akoako atu i ei. Ne ofo malosi a te tokoukega o tino kolā ne fakalogo‵logo ki a ia. “Ne maua pefea ne ia te poto tenei, mo te faiga o vavega?” ko te lotou fesili. “E se ko ia tenā ko te tama a te kamuta? E se ko Malia tena mātua? E se ko ia tenā ko te taina o Iakopo, Iosefa, Simeona, mo Iuta? Ana ­tuagane konei katoa eiloa e ‵nofo mo tatou i konei? Ne maua pefea ne ia a mea katoa konei?”

Ne ma‵natu aka latou penei: ‘A Iesu se tino fua pelā mo tatou. Ne matea atu ne tatou a tena tupuakaga, e iloa foki ne tatou tena kāiga. E mafai pefea o fai a ia mo fai te Mesia?’ Tela la, faitalia a fakamaoniga katoa​—ko tena poto lasi mo ana vavega​—ne ‵teke atu latou ki a ia. Ona ko te mea ko tō masani latou, ne seki tali‵tonu foki ana kāiga ki a ia. Telā ne fai atu ei a Iesu penei: “E ‵malu te pelofeta i koga katoa kae na ko tena fenua tonu fua mo tena kāiga, e se ‵malu a ia i ei.”

A te tonuga loa, ne ofo a Iesu i te sē lava o te lotou fakatuanaki. Tela la, ne seki fai ne ia se vavega i konā kae na ko te fakaeke atu o ana lima ki ne nāi tino kae ne faka‵lei aka ne ia olotou masaki. Mataio 9:27-34; 13:54-58; Maleko 6:1-6; Isaia 9:7.

▪ I te faiatuga me i a Iesu ko te “Tama a Tavita,” ne a mea ne fakaasi atu ne tāgata ‵kivi konā me ne tali‵tonu laua ki ei?

▪ Se a te fakamatalaga ne talia ne te kau Falesaio e uiga ki vavega a Iesu?

▪ Kaia ne fai ei pelā me ne fakaasi atu ne Iesu te alofa me ne toe foki atu a ia ke fesoasoani atu ki tino i Nasaleta?

▪ Ne a mea ne fai ne tino ki a Iesu i Nasaleta, kae kaia?