Te ‵Fuliga o Tulaga o te Tagata Maumea mo Lasalo

Ko oti ne kamata o tuku atu ne Iesu ki ana soko a pati fakatonutonu e uiga ki te fakaaoga faka‵lei o koloa. Kae e se ko ana soko fua ne fakalogo‵logo atu. Ne ‵nofo atu foki i konā a te kau Falesaio, kae ne ‵tau o talia ne latou a pati fakatonutonu a Iesu. Kaia? Ona ko te lotou “matatupe.” I te lagonaga ne latou a pati a Iesu, ne “kamata o fakatauemu atu latou ki a ia.”—Luka 15:2; 16:13, 14.

Ne seki mataku a Iesu i ei. Ne fai atu a ia ki a latou: “A koutou ko tino kolā e fia amio‵tonu i mua o tino, kae e iloa ne te Atua a mea i otou loto. Me i te mea telā e fakatāua malosi ne tino se mea fakatakalialia i te kilokiloga a te Atua.”—Luka 16:15.

Ko leva ne “fakatāua malosi ne tino” a te kau Falesaio, kae ko oko eiloa ki te taimi ko ‵tau ei o fai se ‵fuliga. Ne ‵tau o tuku ifo ki lalo a tino ma‵luga kolā e mau‵mea i mea faka-te-lalolagi, malosi fakapolitiki, mo tulaga fakalotu. Ne ‵tau eiloa o fakamaluga aka a tino masani kolā e iloa ne latou olotou manakoga faka-te-agaga. Ne fakamautinoa mai eiloa ne Iesu me ka isi se ‵fuliga lasi, i ana muna:

“Ne fakagalue eiloa te Tulafono mo tusitusiga a Pelofeta ke oko ki a Ioane. Mai te taimi tenā o fano ki mua ne folafola atu i ei a te tala ‵lei o te Malo o te Atua, kae ne kausaki malosi ki ei a tino kese‵kese katoa. E tonu, e faigofie ke ‵galo atu te lagi mo te lalolagi i lō te galo atu o se mataimanu e tasi o te Tulafono kae seki fakataunu.” (Luka 3:18; 16:16, 17) Ne fakaasi mai pefea ne pati a Iesu me ka tupu se ‵fuliga?

Ne fai atu mo te fakamata‵mata a takitaki lotu Iutaia ki te Tulafono a Mose. Masaua te taimi telā ne faka‵lei fakavavega ei ne Iesu a mata o se tagata i Ielusalema, ne fai atu a Falesaio mo te fakamata‵mata: “Matou ko soko o Mose. E iloa ne matou i te Atua ne faipati ki a Mose.” (Ioane 9:13, 28, 29) A te pogai e tasi o te Tulafono ne tuku atu e auala i a Mose, ko te takitaki atu o tino loto mau‵lalo ki te Mesia, telā ko Iesu. Ne fakasino atu eiloa a Ioane te Papatiso ki a Iesu e pelā me ko te Tamā Mamoe a te Atua. (Ioane 1:29-34) E kamata mai i te galuega a Ioane, ne lagona ne tino Iutaia loto mau‵lalo, maise eiloa a tino ma‵tiva, a mea e uiga ki te “Malo o te Atua.” Ao, e isi eiloa se “tala ‵lei” mō tino katoa kolā e fia ‵nofo mai lalo i te Malo o te Atua kae maua a mea aoga mai i ei.

E se mafai eiloa o se taunu te Tulafono a Mose; i lō te fai penā, ko oti eiloa ne iku atu ki te Mesia. Tela la, ne gata atu ei a te tiute ke tausi ki ei. E pelā mo te talia ne te Tulafono ke ‵tala te avaga i pogai kese‵kese, kae nei la, ne fai atu a Iesu me i “so se tagata e ‵tala tena avaga kae e avaga ki se isi fafine e mulilua a ia, kae ko so se tagata e avaga ki se fafine telā ne ‵tala tena avaga e mulilua foki a ia.” (Luka 16:18) Ne pefea te fakaitaita atu o vaegā pati konā ki te kau Falesaio fai tulafono fakaopoopo!

Ko fai atu nei ne Iesu se tala fakatusa telā ne fakamatala mai i ei a te ‵fuliga telā ka tupu. E aofia i ei a tāgata e tokolua—kolā ne ‵fuli malosi lā tulaga, io me ko fakanofonofoga. I te mafaufau atu ki te tala fakatusa, ke masaua me ne aofia i tino fakalogo‵logo a Falesaio matatupe kolā ne fakamaluga aka ne tino.

Ne fai mai a Iesu: “E isi se tagata maumea ne pei sāle ki gatu violeta mo gatu lino, kae ne fiafia tou tagata i aso takitasi i se olaga gali. E isi foki se tagata akai mea e igoa ki a Lasalo ne avatu sāle o tuku i te mataloa o te ‵pui o tena fale, kae ko ‵fonu eiloa i mea ‵pala kae e manako o kai ki mea e matutu ifo mai te taipola a te tagata maumea. E tonu, ne olo atu foki a kuli o aleale ana mea ‵pala.”—Luka 16:19-21.

A te kau Falesaio ne tino matatupe, tela la, e seai eiloa se fakalotolotolua me ko oi ne fakasino atu ki ei a Iesu i te “tagata maumea” tenei? Ne ma‵nako foki a takitaki lotu Iutaia konei, ke pei ki gatu ‵gali kae ‵togi ‵mafa. Kae i tafa o te tulaga maumea, e foliga mai me e mau‵mea latou ona ko tulaga taulia mo avanoaga e maua ne latou. Ao, a te fakatusaga o latou ki se tagata telā e pei ki gatu violeta, e fakasino atu eiloa ki te lotou tulaga taulia kae e fakaata atu te lotou fia amio‵tonu i te gatu lino ‵kena.—Tanielu 5:7.

Se a te kilokiloga a takitaki mau‵mea kae fakamata‵mata konei ki tino ma‵tiva, ko tino masani? Ne ‵kilo fakatakalia‵lia atu latou ki ei e pelā me ko ‛am ha·’aʹrets, io me ko tino o te fenua (te lalolagi), kolā e se iloa ne latou te Tulafono io me e ‵tau o akoako atu ne latou. (Ioane 7:49) E fakaata mai latou i te tulaga o “te tagata akai mea e igoa ki a Lasalo,” telā e fiakai kae manako o kai “ki mea e matutu ifo mai te taipola a te tagata maumea.” E pelā eiloa mo Lasalo telā ne ‵fonu katoa loa i mea ‵pala, ne ‵kilo atu ki tino valevale pelā me e ma‵saki i te feitu faka-te-agaga.

Ne tumau eiloa te tulaga fakaalofa tenā mō se vaitaimi leva, kae ne iloa ne Iesu me ko pili mai te ‵fuliga lasi ki te tulaga o latou kolā e fai pelā mo te tagata maumea mo latou kolā e fai pelā mo Lasalo. Se a te ‵fuliga?

TE ‵FULIGA O TULAGA O TE TAGATA MAUMEA MO LASALO

Ne toe fakamatala mai ne Iesu a te matugā ‵fuliga lasi tenei o tulaga. “Fakamuli ifo,” ne fai mai a ia, “ne mate a te tagata akai mea kae ne ave a ia ne agelu ke nofo i fatafata o Apelaamo. Ne mate foki te tagata maumea kae ne tanu a ia. Kae ne ‵ti aka ana mata ki luga mai te Tanuga, a ia ko puapuaga, kae ne lavea ne ia Apelaamo i se koga ‵mao mo Lasalo e nofo i ana fatafata.”—Luka 16:22, 23.

A tino kolā ne fakalogo‵logo ki a Iesu, ne iloa ‵lei ne latou me ko leva loa ne mate a Apelaamo i te Tanuga. Ne fakaasi manino atu te Tusi Tapu me e seai se tino i te Tanuga, io me ko Seoli, e mafai o lavea io me faipati, e aofia i ei a Apelaamo. (Failauga 9:5, 10) Se a te mea ne mafau‵fau a takitaki lotu konei me ne fakauiga ki ei a Iesu i te tala fakatusa tenei? Se a te mea kāti ne fakaasi mai ne ia e uiga ki tino masani mo takitaki lotu matatupe?

Ne fatoa fakasino atu a Iesu ki se ‵fuliga mai i te fai atu me ne aoga eiloa ‘te Tulafono mo tusitusiga a Pelofeta ke oko eiloa ki a Ioane te Papatiso, kae mai i te taimi tenā, ne folafola atu ei te Malo o te Atua e pelā me ko te tala ‵lei.’ Tela la, ona ko te talaiga a Ioane mo Iesu Keliso ne fai ei ke ‵mate atu a te tagata maumea mo Lasalo ki lā fakanofonofoga io me ko tulaga mua, kae ko maua nei ne lāua a tulaga ‵fou i mua o te Atua.

A te ‵tonuga loa, ko leva ne ma‵tiva i te feitu faka-te-agaga a tino loto mau‵lalo io me ma‵tiva. Ne fesoasoani atu ki a latou kae ne talia ne latou te fekau e uiga ki te Malo, telā ne taku atu muamua ne Ioane te Papatiso kae fakamuli ifo ko Iesu. Muamua la, ne maua fua ne latou a mea kolā e ‵pau mo nai ‘mea e matutu ifo mai te taipola faka-te-agaga’ a takitaki lotu. Nei la, ko fagai eiloa latou ki muna‵tonu tāua mai te Tusi Tapu, maise eiloa a mea ‵gali ne fakamatala atu ne Iesu. Ne fai eiloa latou e pelā me e ‵tu atu i se tulaga taulia i te kilokiloga a Ieova te Atua.

E ‵kese mai i ei, a tino i te potukau ma‵luga o takitaki lotu e pelā mo te tagata maumea, ne ita fitifiti ke talia te fekau o te Malo telā ne folafola atu ne Ioane kae talai atu foki ne Iesu i te fenua kātoa. (Mataio 3:1, 2; 4:17) A te ‵tonuga loa, ne kaitaua io me ne fakapuapuagatia latou ki te fekau tenā, telā ne fakaata mai i te fakamasinoga a te Atua telā e ‵ka pelā me se afi. (Mataio 3:7-12) Ne fai mo fai se fakatapūga ki takitaki lotu matatupe moi ne taofi aka ne Iesu mo ana soko a te folafolaatuga o te fekau a te Atua. E fai eiloa a takitaki lotu konā e pelā mo te tagata maumea i te tala fakatusa, telā ne fai mai: “Toku tamana ko Apelaamo, alofa mai ki a au, kae uga mai a Lasalo ke ufi te mata o tena matikaolima ki te vai ke faka‵moko aka toku alelo, i a au ko tigaina i te ‵vela o te afi tenei.”—Luka 16:24.

Kae e se mafai eiloa o tupu te mea tenā. Ka se ‵fuli eiloa a te tokoukega o takitaki lotu. Ne ita fitifiti ke “faka‵logo latou ki a Mose mo te kau Pelofeta,” kolā ne ‵tau o takitaki atu ne olotou tusitusiga a latou ki a Iesu e pelā me ko te Mesia mo te Tupu a te Atua. (Luka 16:29, 31; Kalatia 3:24) E se mafai foki o talia ne latou mo te loto maulalo a tino ma‵tiva kolā ko talia ne Iesu kae ko maua foki ne latou te taliaga a te Atua. Ne seki mafai eiloa o gutugutulua a soko o Iesu io me ke fakaasi atu te munatonu, ko te mea ke fakama‵lie ki ei a takitaki lotu io me ke maua ne latou se fakatapūga. I tena tala fakatusa, ne fakamatala faka‵lei mai ne Iesu a te tulaga tenei i pati ne fai atu ne te “Tamana ko Apelaamo” ki te tagata maumea:

“Taku tama, ke masaua me ne maua ne koe a mea ‵lei katoa i tou olaga kātoa, kae ne maua ne Lasalo a mea ma‵sei. Kae nei la, ko maua ne ia se olaga fakamafanafana i konei kae ko koe ko tigaina. Kae i tafa o mea katoa konei, ko oti ne fakatu se vanu lasi i te va o māua mo koutou, ko te mea ke se mafai o olo atu a tino kolā e fia olo atu mai konei ki a koutou, kae e se mafai foki o ‵mai a tino mai konā ki a māua.”—Luka 16:25, 26.

E pefea te ‵lei mo te ‵tonu ke tupu se matugā ‵fuliga lasi penā! Ne fetaui ‵lei a te ‵fuliga tenei o tulaga i te va o takitaki lotu fakamata‵mata mo tino loto maulalo kolā ne talia ne latou te amo a Iesu kae maua te malosi fou kae fagai faka‵lei i te feitu faka-te-agaga. (Mataio 11:28-30) Ne momea aka te lasi o te ‵fuliga tenei i nai masina mai tua ifo i ei, i te taimi ne sui ei te feagaiga o te Tulafono ki te feagaiga fou. (Ielemia 31:31-33; Kolose 2:14; Epelu 8:7-13) I te taimi ne ‵ligi ifo ei ne te Atua a te agaga tapu i te aso o te Penitekoso 33 T.A., ne manino ‵lei eiloa me ne talia ne te Atua a soko o Iesu i lō te kau Falesaio mo nisi takitaki lotu.