Mataupu e 88

Te Tagata Maukoloa mo Lasalo

KO OTI ne kamata o faipati atu Iesu ki ana soko e uiga ki te fakaaogāga faka‵lei o koloa, kae ne fakamatala atu ne ia me e se mafai o pologa tatou ki mea konā kae pologa foki tatou ki te Atua. Ne fakalogo‵logo foki te kau Falesaio ki a ia, kae ne kamata o fakatauemu atu latou ki a Iesu ona ko te mea ne fia‵fai latou ki tupe. Tela la, ne fai atu a ia penei ki a latou: “A koutou ko tino kolā e fia amio‵tonu i mua o tino, ka ko te Atua e iloa ne ia otou loto; me ko te mea e sili i te ‵lei i te tino se mea sē aogā tenā i te kilokiloga a te Atua.”

Ne oko atu ki te taimi telā ne ‵tau ei o ‵fuli a tulaga o tino kolā ne mauko‵loa i mea faka-te-lalolagi, malosi fakapolitiki, pulega faka-lotu mo tulaga taulia. Ne ‵tau o fakapa‵kū latou ki lalo, kae ko latou kolā e iloa ne latou olotou manakoga faka-te-agaga e ‵tau o fakama‵luga aka. Ne fakasino atu a Iesu ki te ‵fuliga tenā i ana pati konei ki te kau Falesaio:

“A Tulafono a Mose mo tusitusiga a Pelofeta ne oko eiloa te lotou aogā ki a Ioane te Papatiso; mai i te taimi tenā, a te tala ‵lei o te Malo o te Atua ko folafola atu, a tino katoa foki ko ulu atu mo te fakamalosi ki ei. E faigofie atu o gata te lagi mo te lalolagi, i lō te fakasēaogā o se mataimanu foliki e tasi o te Tulafono.”

Ne fakamata‵mata a faiakoga o te Tulafono mo Falesaio ona ko te lotou manatu me ne tausi ne latou te Tulafono a Mose. Masaua te taimi telā ne faka‵pula fakavavega ei a mata o se tagata i Ielusalema, kae ne fai atu latou penei mo te fakamata‵mata: “Matou ko soko o Mose. E iloa ne matou me i te Atua ne faipati ki a Mose.” Kae ko oti ne fakataunu ne te Tulafono a Mose a tena fuafuaga me ne takitaki atu a tino loto mau‵lalo ki te tupu telā ne filifili ne te Atua, ko Iesu Keliso. Tela la, i te kamataga o te galuega a Ioane, ne kamata ne tino kese‵kese, kae maise eiloa ko tino loto mau‵lalo kae ma‵tiva, o taumafai malosi ke fai latou mo fai ne tino o te Malo o te Atua.

Ona ko te mea ko oti ne fakataunu te Tulafono a Mose, ne ave keatea ei te tiute ke tausi ki ei. Ne talia ne te Tulafono ke ‵tala te avaga ona ko pogai kese‵kese, kae ne fai atu Iesu penei: “So se tagata e tuli keatea tena avaga kae avaga ki te suā fafine, ko mulilua; so se tagata foki e avaga ki te fafine ko māvae mo tena avaga, ko mulilua foki a ia.” Ne pefea te fakaitaita atu o vaegā pati konā ki te kau Falesaio, kae maise eiloa me ne talia ne latou te ‵talaga o avaga ona ko pogai kese‵kese!

I te faiga o ana pati ki te kau Falesaio, ne taku atu ei ne Iesu se tala fakatusa telā ne fakamatala mai i ei a tāgata e tokolua kolā ne ‵fuli malosi lā tulaga. E mata, e mafai o mate mai ne koe me ko oi e fakauiga ki ei a tāgata konā, penā foki loa mo te ‵fuliga o lā tulaga?

Ne fakamatala mai penei ne Iesu, “E isi se tagata maukoloa telā ne pei ki gatu tafasili i te ‵togi­‵mafa, kae ne ola i te olaga sili i te fiafia i aso katoa. Kae e isi foki se tagata mativa e igoa ki a Lasalo e takato i tena mataloa, kae soko eiloa tena foitino i matākili, telā ne manako o kai ki ma‵tutuga o meakai kolā ne ma‵tutu ifo i te laulau a te tagata maukoloa; a kulī foki ne o‵mai o seposepo ana matākili.”

I konā loa ne fakaaogā ei ne Iesu te tagata maukoloa ke fakauiga ki takitaki lotu o te lotu Iutaia, e aofia i ei te kau Falesaio, faiakoga o te Tulafono, penā foki loa mo Satukaio mo faitaulaga pule. Ne mauko‵loa latou i te feitu faka-te-agaga ona ko olotou tulaga taulia mo olotou avanoaga, kae ne amio foki latou pelā mo te tagata maukoloa. A olotou gatu ‵togi ‵mafa ne fakauiga ki te tulaga taulia o latou, kae ko te gatu lino ‵kena ne ­fakauiga ki te fia amio‵tonu o latou.

Ne manatu māmā te potukau o tino fakamata‵mata kolā e fai pelā mo te tagata maukoloa ki tino ma‵tiva, kae ne taku latou ko ‛am ha·’aʹrets, io me ko tino o te fenua. Tela la, ne fakauiga te tino mativa ko Lasalo ki tino kolā ne seki talia ne takitaki lotu ke maua ne latou a meakai ‵lei mo tulaga taulia i te feitu faka-te-agaga. Tela la, e pelā mo Lasalo ne ‵fonu katoa loa i matākili, ne ‵kilo atu a takitaki lotu ki tino valevale pelā me e ma‵saki i te feitu faka-te-agaga kae e ‵tau fua o ‵kau atu ki kulī. Kae e tiga eiloa te feitu tenā, a tino o te potukau pelā mo Lasalo ne fia ‵kai kae ne fia inu ki fakama‵losiga faka-te-agaga kae ne ‵nofo atu foki latou i te mataloa ke taumafai o maua a ma‵tutuga o meakai faka-te-agaga kolā ka ta‵tela ifo mai te laulau io me ko te taipola a te tino maukoloa.

I konā loa ne fakamatala mai ei ne Iesu a te ‵fuliga o tulaga o te tagata maukoloa mo Lasalo. Ne a ‵fuliga konā kae ne a mea e fakauiga ki ei?

Ne Oko Atu te Tagata Maukoloa mo Lasalo ki se Fakamafuliga Lasi

Ne taku mai ne Iesu se tala fakatusa e uiga ki te tagata maukoloa mo te tino mativa ko Lasalo. Ne fakauiga te tagata maukoloa ki takitaki lotu kolā ne taulia ona ko olotou tulaga mo olotou avanoaga i mea faka-te-agaga, kae ne fakauiga a Lasalo ki tino valevale kolā ne fia‵kai ki meakai faka-te-agaga. Ne toe fai mai foki ne Iesu i tena tala e uiga ki te matugā fakamafuliga lasi i tulaga o te avā tāgata konā.

Muna a Iesu: “Ne mate te tagata mativa kae ne ave ne agelu ki te fatafata o Apelaamo. Ne mate foki te tagata maukoloa, kae ne tanu; ne nofo atu foki a ia i seoli, ko fakapuapuagātia, ne kilo aka ana mata kae ne lavea ne ia a Lasalo i te fatafata o Apelaamo e tai ‵mao mo ia.”

Me i te tagata maukoloa mo Lasalo e se ne tino ‵tonu kae e fakauiga fua ki potukau o tino, se mea ‵lei ke fakauiga foki te ‵mate o laua ki se mea fakatusa. Se a te mea e fakauiga ki ei io me e fakaata mai i ei te ‵mate o laua?

Ne fatoā fakasino atu a Iesu ki te fakama‵fuliga tenā o tulaga i ana muna me “ne oko atu eiloa te aogā o te Tulafono a Mose mo tusitusiga a Pelofeta ki a Ioane te Papatiso; mai i te taimi tenā, a te tala ‵lei o te Malo o te Atua ko folafola atu.” Tela la, ona ko te talaiga a Ioane mo Iesu Keliso ne ‵mate i ei te tagata mau­koloa mo Lasalo ki lā tulaga mo lā foliga mua.

E pelā me ne ‵mate atu te potukau o tino loto mau‵lalo kolā ne sala‵mō pelā mo Lasalo ki te lotou tulaga mua telā ne ma‵tiva ei latou i te feitu faka-te-agaga kae ne oko atu foki latou ki se tulaga telā e fiafia ki ei te Atua. Muamua la, ne ‵saga atu latou ki takitaki lotu ke maua ei ne latou a nai mea kolā ne tatela‵tela ifo mai te taipola faka-te-agaga, kae nei la ko ma‵kona latou ona ko muna‵tonu mai te Tusi Tapu kolā ne tuku atu ne Iesu ki a latou. Tela la, ko oko atu latou ki te fatafata, io me ko te tulaga taulia, i tafa o te Apelaamo Sili, ko Ieova te Atua.

Kae i te suā feitu la, a tino o te potukau pelā mo te tagata maukoloa ne oko atu ki te sē fiafia o te Atua me ne ita faeloa latou ma talia te fekau o te Malo telā ne akoako atu ne Iesu. Tela la, ne ‵mate latou e uiga ki te lotou tulaga taulia mua. A te tonuga loa, e mafai o faipati e uiga ki a latou i se auala fakatusa pelā me e fakapuapuagātia. Fakalogo mai ki pati konei a te tagata maukoloa:

“Tamana Apelaamo, a koe ke alofa mai ki a au, uga mai Lasalo ke faka‵siu tena maikao ki te vai, e faka‵moko ei toku alelo: me ko oko eiloa toku fi‵ta i te ‵vela o te afi nei.” A fekau o te fakamasinoga a te Atua kolā ne folafola atu ne soko o Iesu ne fai pelā me se afi ke fakapuapuagā ei a tino o te potukau pelā mo te tagata maukoloa. Ne ma‵nako latou ke taofi aka ne te kau soko te folafolaatuga o fekau konā, kae ke maua mai i ei se fakatapūga ki olotou puapuagā.

“Kae ne fai mai a Apelaamo, ‘Taku tama, masaua me ne maua ne koe au mea ‵lei i tou olaga, kae ko Lasalo ne maua ne ia a mea ma‵sei; kae nei ko manuia a Lasalo kae ko fi‵ta koe. E se gata foki i mea konā, e isi se vanu lasi i te va o tatou, e se mafai ne se tino mai i konei o sopo atu ki konā, e se mafai foki ne se tino mai i konā o sopo mai ki konei.’”

E pefea te ‵lei mo te ‵tonu ke fai se vaegā fakamafuliga lasi penā i te va o tino pelā mo Lasalo mo te potukau pelā mo te tagata maukoloa! Ne taunu tonu te fakamafuliga tenā i ne nai masina mai tua ifo i ei i te Penitekoso i te 33 T.A., i te taimi ne sui ei te feagaiga mua o tulafono ki te feagaiga fou. I konā loa ne manino ‵lei eiloa me ne talia ne te Atua te kau soko, kae ne seki talia ne ia te kau Falesaio mo nisi takitaki lotu. A “te vanu lasi” telā ne ‵vae ei te tagata maukoloa fakatusa mai soko o Iesu ne fakauiga eiloa ki te fakamasinoga amiotonu a te Atua telā e se mafai o toe ‵fuli.

Ne toe fakamolemole atu te tagata maukoloa ki ‘te Tamana ko Apelaamo’ ke uga mai ne ia a Lasalo “ki te kāiga o toku tamana me e tokolima oku taina.” Tela la, ne taku tonu atu ne te tagata maukoloa me e ‵lei atu te va o laua mo te suā tamana, ko Satani te Tiapolo. Ne fakamolemole atu te tagata maukoloa ki a Lasalo ke fakavāivāi ne ia a fekau o fakamasinoga a te Atua ko te mea ke se oko atu ana taugasoa fakalotu, ko ‘ana taina e tokolima,’ ki “te koga tenā o puapuagā.”

“Kae ne fai atu penei a Apelaamo, ‘E maua i a latou a Mose mo Pelofeta, ke faka‵logo la latou ki ei.’” E tonu, kafai e fia ‵sao atu a “taina e tokolima” i logo‵maega, e ‵tau fua o faka‵logo latou ki tusitusiga a Mose mo te kau Pelofeta ko te mea ke iloa ei ne latou a Iesu pelā me ko te Mesia kae ke fai foki latou mo fai ne ana soko. Kae ne seki loto malie te tagata maukoloa ki ei ana muna: “‘Ikai a toku tamana ko Apelaamo; kafai e fanatu ki a latou se tino mai i tino ‵mate, ka sala‵mo eiloa latou ki olotou agasala.’

Kae ne fai atu a ia, ‘Kafai e se faka‵logo latou ki a Mose mo Pelofeta, e se tali‵tonu foki latou manafai e toetu mai se tino mai i tino ‵mate.’” Ne seki avatu ne te Atua a fakailoga fakapito io me ne vavega ke fakatali‵tonu atu ei ki vaegā tino penā. Ne ‵tau o fai‵tau kae fakaaogā foki ne tino konā a te Tusi Tapu ko te mea ke maua ei ne latou a tena taliaga. Luka 16:14-31; Ioane 9:28, 29; Mataio 19:3-9; Kalatia 3:24; Kolose 2:14; Ioane 8:44.

▪ Kaia e ‵tau ei o fai te mate o te tagata maukoloa mo Lasalo pelā me se mea fakatusa, kae se a te mea ne fakauiga ki ei te ‵mate o laua?

▪ I te kamataga o te galuega a Ioane, se a te ‵fuliga ne tupu telā ne fakaasi mai ne Iesu?

▪ Se a te mea ne ave keatea mai tua ifo o te mate o Iesu, kae ka ‵fuli pefea ne te mea tenā a te ‵talaga o avaga?

▪ I te tala fakatusa a Iesu, ko oi ne fakauiga ki ei te tagata maukoloa mo Lasalo?

▪ Ne a logo‵maega ne oko atu ki te tagata maukoloa, kae se a te mea ne fakamolemole atu ei a ia ke maua se fakatapūga ki ei?

▪ Se a te mea e fakauiga ki ei te “vanu lasi”?

▪ Ko oi te tamana tonu o te tagata maukoloa, kae ko oi foki ana taina e tokolima?