E Mafai Pefea o Fai Koe mo Taugasoa o te Atua?

1, 2. Ko oi a nisi taugasoa o Ieova?

KO OI e manako koe ke fai mo fai tou taugasoa? Se tino telā e fiafia koe ki ei. Se tino telā e ‵pau a mea e fia‵fia koulua ki ei. Se tino telā e alofa kae maua ne ia a uiga kolā e fiafia koe ki ei.

² E filifili ne Ieova te Atua a nisi tino ke fai mo ana taugasoa. E pelā mo Apelaamo, a ia se tokotasi o taugasoa o Ieova. (Isaia 41:8; Iakopo 2:23) Ne fiafia foki a Ieova ki a Tavita. Ne fai mai a ia me i a Tavita ‘se tagata e loto a ia ki ei.’ (Galuega 13:22) Kae ko te pelofeta ko Tanielu “se tino telā e tāua ‵ki” ki a Ieova.—Tanielu 9:23.

3. Kaia ne fai ei a Apelaamo, Tavita mo Tanielu mo fai a taugasoa o Ieova?

³ Kaia ne fai ei a Apelaamo, Tavita mo Tanielu mo fai a taugasoa o Ieova? Muna a Ieova ki a Apelaamo: “Koe ne fakalogo ki toku leo.” (Kenese 22:18) E fai a Ieova mo fai se taugasoa o tino kolā e faka‵logo mo te loto maulalo ki a ia. E mafai foki o fai se atufenua o tino mo fai ana taugasoa. Ne fai atu a Ieova ki te atufenua o Isalaelu: “Faka‵logo mai ki toku leo, kae ka fai au mo fai te otou Atua, kae ka fai koutou mo fai oku tino.” (Ielemia 7:23) Tela la, e ‵tau foki mo koe o fakalogo ki a Ieova māfai e manako tonu koe ke fai mo fai tena taugasoa.

E PUIPUI NE IEOVA ANA TAUGASOA

4, 5. E puipui pefea ne Ieova ana taugasoa?

⁴ E fai mai te Tusi Tapu me e salasala a Ieova ki auala ke “fakaasi atu tena malosi ona ko latou kolā e tuku katoatoa atu olotou loto ki a ia.” (2 Nofoaiga Tupu 16:9) I te Salamo 32:8, ne tauto atu a Ieova ki ana taugasoa: “Ka tuku atu ne au ki a koe a te ‵loto o te malamalama kae akoako koe i te auala e ‵tau o fano koe i ei. Ka tuku atu ne au a pati fakatonutonu mo oku mata e kilo ki a koe.”

⁵ E isi se fili malosi telā e taumafai o taofi aka tatou mai te fai taugasoa mo te Atua. Kae e manako a Ieova o puipui tatou. (Faitau te Salamo 55:22.) E pelā me ne taugasoa o Ieova, e tavini tatou ki a ia mo ‵tou loto kātoa. E fakamaoni tatou ki a ia faitalia a tulaga faiga‵ta. Kae e maua foki ne tatou te loto talitonu telā ne maua ne te faisalamo. Ne tusi mai a ia e uiga ki a Ieova: “Me i a ia e nofo i toku feitu fakaatamai, ka se mafai eiloa au o malaia.” (Salamo 16:8; 63:8) I auala fea e taumafai ei Satani o taofi aka tatou mai te fai taugasoa mo te Atua?

‵LOSIGA A SATANI

6. Ne a ‵losiga ne fai ne Satani ki tino?

⁶ I te Mataupu e 11 ne tauloto tatou i a Satani ne toa ki a Ieova kae ‵losi atu me i a ia se tino loi kae masei me ne seki talia ne ia a Atamu mo Eva ke fai ne lāua a lā filifiliga e uiga ki te mea tonu mo te mea sē tonu. E akoako mai te tusi ko Iopu i te Tusi Tapu ki a tatou me ne fai foki ne Satani te ‵losiga tenā ki tino kolā e ma‵nako o fai taugasoa mo te Atua. E ‵losi atu a Satani me e tavini atu latou ki te Atua ona ko mea kolā e maua ne latou mai i a Ia, kae e se ona ko te lotou a‵lofa ki a Ia. E ‵losi mai foki a Satani me e mafai ne ia o ‵fuli so se tino ke ‵teke atu ki te Atua. Ke onoono nei tatou ki mea e mafai o tauloto ne tatou mai i a Iopu mo te auala ne puipui ei ne Ieova a ia.

7, 8. (a) E pefea lagonaga o Ieova ki a Iopu? (e) Ne a pati a Satani ne fai e uiga ki a Iopu?

⁷ Ko oi a Iopu? A ia se tagata ‵lei telā ne ola i se 3,600 tausaga ko ‵teka. Ne fai mai a Ieova me i te taimi tenā e seai se tino i te lalolagi nei ne ‵pau mo ia. Ne āva malosi a Iopu ki te Atua kae ne takalialia a ia ki mea ma‵sei. (Iopu 1:8) Ao, a Iopu se taugasoa tonu o Ieova.

⁸ Ne ‵losi atu a Satani me ne tavini atu a Iopu ki te Atua ona ko ana manakoga kaimanako. Muna a Satani ki a Ieova: “E a, e seki fakatu fakatamilo ne koe se ‵pui lakau ke puipui ei a ia mo tena kāiga mo ana mea katoa? Ko oti ne fakamanuia ne koe a galuega o ana lima, kae ko salalau ana lafu manu ki te fenua kātoa. Kae nei la, ‵kapa atu tou lima kae fakaseai ana mea katoa, e mautinoa eiloa me ka muna masei a ia ki ou mata.”—Iopu 1:10, 11.

9. Se a te mea ne talia ne Ieova ke fai ne Satani?

⁹ Ne ‵losi atu a Satani me i a Iopu e tavini atu fua ki a Ieova ona ko mea e maua ne ia mai i a Ia. Ne ‵losi atu foki Satani me e mafai ne ia o taofi aka a Iopu mai te tavini atu ki a Ieova. Ne seki lotomalie a Ieova ki a Satani, kae ne tuku atu ne Ia te taliaga ki a Satani ke tofotofo aka me e mata, e fai a Iopu mo taugasoa o Ieova ona ko tena alofa ki a Ia io me ikai.

KO TAUA ATU A SATANI KI A IOPU

10. Ne taua atu pefea a Satani ki a Iopu, kae ne saga atu pefea a Iopu ki ei?

¹⁰ Muamua la, ne kaisoa io me ne tamate ne Satani a manu katoa a Iopu. Oti aka, tamate ei ne Satani a te tokoukega o tavini a Iopu. Ne ‵galo a mea katoa a Iopu. I tena osoatuga fakaoti, ne tamate ne Satani a tama‵liki e tokosefulu a Iopu i se matagi malosi. Kae ne tumau eiloa a Iopu i te fakamaoni ki a Ieova. “I mea katoa konei, e seki agasala eiloa a Iopu io me ‵losi atu me ko te Atua ne fai ne ia mea konei.”—Iopu 1:12-19, 22.

11. (a) Ne a nisi mea ne fai ne Satani ki a Iopu? (e) Ne saga atu pefea a Iopu ki ei?

¹¹ Ne seki ‵fiu eiloa a Satani. Ne toa atu a ia ki te Atua i ana pati: “Fakapakia atu tena ivi mo tena foitino, e mautinoa eiloa me ka muna masei a ia ki ou mata.” Tenā ne ta ei ne Satani a Iopu ki se masaki fakalogomae ‵ki. (Iopu 2:5, 7) Kae ne tumau eiloa a Iopu i te fakamaoni ki a Ieova. Ana muna: “Ke oko ki te taimi e mate ei au, ka se tiaki eiloa ne au toku fakamaoni!”—Iopu 27:5.

12. Ne fakamaoni atu pefea ne Iopu me i a Satani se tino loi?

¹² E seai se mea a Iopu e iloa e uiga ki ‵losiga a Satani io me kaia e logo‵mae malosi ei a ia. Ne mafaufau a ia me ne māfua mai i a Ieova ana fakalavelave. (Iopu 6:4; 16:11-14) Kae ui eiloa a mea konā, ne tumau a Iopu i te fakamaoni ki a Ieova. Nei la, ko mautinoa a mea katoa. Ne seki fakatāua ne Iopu a ia eiloa. Ne fai a ia mo taugasoa o te Atua me ne alofa a ia ki te Atua. A ‵losiga kolā ne fai ne Satani ne mea ‵loi katoa!

13. Ne a ikuga ne maua mai ona ko te fakamaoni o Iopu?

¹³ E ui eiloa e se iloa ne Iopu a mea kolā e ‵tupu i te lagi, ne fakamaoni eiloa a ia ki te Atua kae ne fakamaoni atu i ei i a Satani se tino masei. Ne maua ne Iopu te taui mai i a Ieova ona ko tena fakamaoni ki te lā va fakataugasoa.—Iopu 42:12-17.

‵LOSIGA E FAI NE SATANI KI A KOE

14, 15. Se a te ‵losiga a Satani ki tāgata mo fāfine katoa?

¹⁴ E uke a akoakoga tāua e mafai o tauloto ne koe mai i mea ne ‵tupu ki a Iopu. I aso nei, e ‵losi mai Satani me tavini tatou ki a Ieova ona ko mea e maua ne tatou mai i a Ia. I te Iopu 2:4, ne ‵losi mai a Satani: “A te tagata ka tuku atu ne ia ana mea katoa ke tumau a ia i te ola.” Tela la, e ‵losi atu a Satani me e se ko Iopu fua e uiga kaimanako, kae penā foki a tāgata mo fāfine katoa. I se fia selau tausaga mai tua o te mateatuga a Iopu, koi tumau eiloa a Satani i te taku fakamasei ne ia a Ieova kae fai ana ‵losiga ki ana tavini. E pelā mo te Faataoto 27:11, e fai‵tau tatou penei: “Ke poto koe, e taku tama, kae fai toku loto ke fiafia, ko te mea ke mafai o fai atu ne au se tali ki a ia telā e fakaitaita [io me, taku fakamasei] mai ki a au.”

¹⁵ E mafai ne koe o filifili aka ke fakalogo ki a Ieova kae fai a Ia mo fai tou taugasoa fakamaoni, ko te mea ke fakamaoni atu ei i a Satani se tino loi. A te fai o koe mo fai se taugasoa o te Atua, ko te ‵toe fakaikuga tafasili i te ‵lei e mafai o fai ne koe, faitalia me manakogina ke fai ne koe ne fakama‵fuliga ‵lasi i tou olaga! A te fakaikuga tenei se mea tāua ‵ki. E ‵losi mai Satani me e se mafai eiloa koe o fakamaoni ki te Atua māfai e fepaki koe mo fakalavelave. E taumafai a ia o fakatogafiti tatou ko te mea ke se fakamaoni tatou ki te Atua. E pefea la?

16. (a) Ne a auala e fakaaoga ne Satani ke taumafai o taofi aka a tino mai te tavini atu ki a Ieova? (e) E taumafai pefea te Tiapolo o taofi aka koe mai te tavini atu ki a Ieova?

¹⁶ E fakaaoga ne Satani a auala kese‵kese e uke i ana taumafaiga ke se fai tatou mo taugasoa o te Atua. E oso atu a ia e pelā me se “leona fekai, o salasala ke folo ne ia se tino.” (1 Petelu 5:8) Ke mo a koe e poi māfai e taumafai ou taugasoa, kāiga io me ko nisi tino o taofi aka koe mai te sukesuke ki te Tusi Tapu mo te faiga o te mea tonu. Kāti ka oko atu ki a koe a lagonaga me ko taua atu a tino ki a koe.a (Ioane 15:19, 20) E ‵fuli foki ne Satani a ia ke fai pelā “me se agelu o te mainaga.” Tela la, e mafai o fakatogafiti ne ia tatou ke se faka‵logo ki a Ieova. (2 Kolinito 11:14) A te suā auala e fakaaoga ne Satani ke taofi aka tatou mai te tavini atu ki a Ieova ko te faiga ke ma‵natu aka tatou i a tatou ko tō ma‵sei ke tavini atu ki te Atua.—Faataoto 24:10..

FAKALOGO KI FAKATONUGA A IEOVA

17. Kaia e faka‵logo ei tatou ki a Ieova?

¹⁷ Kafai e faka‵logo tatou ki a Ieova, e fakamaoni atu i ei ne tatou me i a Satani se tino loi. Se a te mea ka fesoasoani mai ki a tatou ke faka‵logo? E fai mai te Tusi Tapu: “E ‵tau mo koe o alofa ki a Ieova tou Atua mo tou loto kātoa mo tou ola kātoa mo tou malosi kātoa.” (Teutelonome 6:5) A tatou e faka‵logo ki a Ieova me a‵lofa tatou ki a ia. Kafai e gasolo aka o malosi te ‵tou a‵lofa ki a Ieova, ka ma‵nako tatou o fai so se mea e fakamolemole mai a ia ke fai ne tatou. Ne tusi mai te apositolo ko Ioane: “Tenei te uiga o te alofa ki te Atua, ko te fakalogo ki ana fakatonuga; kae ko ana fakatonuga e se ‵mafa.”—1 Ioane 5:3.

18, 19. (a) Ne a nisi mea kolā e fai mai a Ieova me e ma‵sei? (e) E iloa pefea ne tatou me e se mafai ne Ieova o fai mai ke fai ne tatou se mea telā e se mafai ne tatou o fai?

¹⁸ Kae ne a nisi mea e fai mai ne Ieova me e ma‵sei? E isi ne fakaakoakoga i te pokisi ko te “Takalialia ki Mea e Takalialia ki ei a Ieova.” Muamua la, kāti ka mafaufau koe me e se ma‵sei malosi a nisi mea konei. Kae kafai e faitau koe ki tusi siki mai te Tusi Tapu kae mafaufau faka‵lei ki ei, ka maina koe me se mea poto eiloa a te fakalogo ki tulafono a Ieova. Kāti ka oko mai te lagonaga me e ‵tau eiloa o fai ne koe ne ‵fuliga ki tou olaga. E ui eiloa e mafai o faigata te mea tenei i nisi taimi, kae kafai e fai ne koe a ‵fuliga konā, ka maua ei ne koe te filemu mo te fiafia telā e maua mai te fai pelā me se taugasoa fakamaoni o te Atua. (Isaia 48:17, 18) E iloa pefea ne tatou me e mafai eiloa o fai a ‵fuliga konei?

¹⁹ E se mafai o fai mai a Ieova ke fai se mea telā e se mafai ne tatou o fai. (Teutelonome 30:11-14) E pelā me se Taugasoa tonu, e iloa faka‵lei atu ne ia tatou i lō tatou eiloa. E iloa ne ia a mea e ma‵losi ei tatou mo ‵tou vāivāiga. (Salamo 103:14) E fakamalosi mai te apositolo ko Paulo ki a tatou: “Te Atua e fakamaoni, kae ka se talia ne ia ke tofotofogina koutou ke silia atu i te mea telā e mafai o fa‵ki ne koutou, kae kafai ko oko mai a tofotofoga ka tuku mai ne ia a te auala e ‵sao ei koutou ko te mea ke mafai ne koutou o kufaki.” (1 Kolinito 10:13) E mafai o loto talitonu tatou me ka tuku mai faeloa ne Ieova a te malosi ke fai te mea tonu. Ka tuku atu ne ia ki a koe a “te malosi telā e sili atu i te malosi masani” ke fesoasoani atu ki a koe ke kufaki i tulaga faiga‵ta. (2 Kolinito 4:7) I te laveaga ne ia te fesoasoani o Ieova i vaegā taimi penā, ne mafai ei o fai mai a Paulo: “E maua ne au a te malosi i mea katoa e auala i a ia telā ne tuku mai ne ia te ‵mana ki a au.”—Filipi 4:13..

FIAFIA KI MEA E FIAFIA KI EI A TE ATUA

20. Ne a uiga e ‵tau o fakaakoako koe ki ei, kae kaia?

²⁰ Kafai e ma‵nako tatou ke fai mo taugasoa o Ieova, e ‵tau o fakagata ne tatou te faiga o mea kolā e fai mai a Ieova me e ma‵sei, kae e ‵tau o fai ne tatou a nisi mea e uke atu. (Loma 12:9) E fia‵fia a taugasoa o te Atua ki mea kolā e fiafia a ia ki ei. E fakamatala mai a mea konā i te Salamo 15:1-5. (Faitau.) E fakaakoako a taugasoa o Ieova ki ana uiga kae fakaasi atu “te alofa, te fiafia, te filemu, te kufaki, te atafai, te aga‵lei, te fakatuanaki, te agamalu, te loto pulea.”—Kalatia 5:22, 23.

21. E mafai pefea o fakaasi atu ne koe a uiga kolā e fiafia ki ei te Atua?

²¹ E mafai pefea ne koe o fakaasi atu a uiga ‵gali konā? E ‵tau o tauloto koe ki mea kolā e fiafia ki ei a Ieova mai te faitau mo te sukesuke faeloa ki te Tusi Tapu. (Isaia 30:20, 21) Kafai e fai ne koe te mea tenei, ka gasolo aka o malosi tou alofa ki a Ieova, kae i te taimi e gasolo aka ei o malosi tou alofa mō ia, ka manako foki koe o fakalogo ki a ia.

22. Se a te mea ka iku mai i tou fakalogo ki a Ieova?

²² A ‵fuliga kolā e ‵tau o fai ne koe i tou olaga e mafai o fakatusa ki te tapalega o gatu mua kae pei ki gatu ‵fou. E fai mai te Tusi Tapu me e ‵tau mo koe o “‵pei kea‵tea a uiga mua” kae fakapei ki luga i a koe “a uiga ‵fou.” (Kolose 3:9, 10) E ui eiloa e se faigofie te mea tenā, kae kafai e fai ne tatou a ‵fuliga kae faka‵logo ki a Ieova, e tauto mai a ia me ka tuku mai ne ia ki a tatou “se taui lasi.” (Salamo 19:11) Ao, filifili ke fakalogo ki a Ieova kae fakamaoni atu i a Satani se tino loi. Tavini ki a Ieova ona ko tou alofa kaimalie kae e se ko te mea fua ke maua se taui i aso mai mua. Tenā ko fai ei koe mo fai se taugasoa tonu o te Atua!