Te Alofa o te Atua e Tumau ki te Se-Gata-Mai

1, 2. Kaia e alofa ei koe ki a Ieova te Atua?

E MATA, e alofa koe ki te Atua? Kāti ne tuku atu ne koe tou ola mō ia ona ko te lasi o tou alofa ki a ia. E mafai o isi se lagonaga o koe me i a ia ko tou Taugasoa pele. Kae koi tuai o alofa koe ki a Ieova, ne alofa a ia ki a koe. E fai‵tau tatou penei i te Tusi Tapu: “A tatou e a‵lofa, me ne alofa muamua mai a ia ki a tatou.”—1 Ioane 4:19.

² Ke mafaufau ki auala katoa ne fakaasi mai ei ne Ieova tena alofa ki a tatou. Ne tuku mai ne ia a te lalolagi e pelā me se fale gali o tatou mo mea valevale katoa kolā e manakogina ne tatou ke fia‵fia i te olaga. (Mataio 5:43-48; Fakaasiga 4:11) E manako a ia ke maua ne tatou se fesokotakiga ‵lei mo ia, kae ko oti ne fai ne ia se auala ke mafai o tauloto tatou e uiga ki a ia. Kafai ko fai‵tau tatou ki te Tusi Tapu, ko fakalogo‵logo tatou ki a Ieova. Kae kafai ko ‵talo tatou ko fakalogologo mai a ia ki a tatou. (Salamo 65:2) E takitaki kae fakamalosi ne ia tatou ki tena agaga tapu. (Luka 11:13) Ne uga mai foki ne ia tena Tama fagasele ki te lalolagi ke fakasaoloto tatou mai te agasala mo te mate.—Faitau te Ioane 3:16; Loma 5:8.

3. E fakatumau pefea ne tatou a ‵tou fesokotakiga ‵lei mo Ieova?

³ Ke mafaufau malie ki sou taugasoa pili, se tino telā ne ‵nofo fakatasi faeloa mo koe i taimi fakafiafia mo taimi fakafanoanoa. E uke taumafaiga e manakogina ke fakatumau ei te malosi o te va fakataugasoa. E penā foki eiloa ‵tou va fakataugasoa mo Ieova, ko te ‵toe Taugasoa pili eiloa e mafai o maua ne koe. ‵Tou va fakataugasoa mo ia e mafai o tumau ki te se-gata-mai. Tela la, e fai mai te Tusi Tapu: “Ke tumau koutou i loto i te alofa o te Atua.” (Iuta 21) E fai pefea ne tatou a te mea tenei? E tali mai te Tusi Tapu: “Tenei te uiga o te alofa ki te Atua, ko te fakalogo ki ana fakatonuga; kae ko ana fakatonuga e se ‵mafa.”—1 Ioane 5:3.

“TENEI TE UIGA O TE ALOFA KI TE ATUA”

4, 5. (a) Se a te mea e fakauiga ki ei “te alofa ki te Atua”? (e) Ne gasolo aka pefea tou alofa ki a Ieova?

⁴ Se a te mea e fakauiga ki ei te Tusi Tapu i te faimaiga “te alofa ki te Atua”? E se fakauiga te mea tenei ki te alofa o te Atua mō tatou kae e fakauiga eiloa ki ‵tou a‵lofa ki a ia. Koi masaua i a koe te taimi ne kamata ei koe o alofa ki a Ieova?

⁵ Mafaufau ki ou lagonaga i te taimi muamua ne tauloto ei koe me manako a Ieova ke ola koe ki te se-gata-mai i tena lalolagi fou. Ko oti ne tauloto koe ki mea katoa ne fai ne ia ke taunu a te mea tenā, kae ne iloa foki ne koe te tāua o te meaalofa ne tuku mai ne Ieova ki a tatou i te ugamaiga o tena Tama fagsele ki te lalolagi. (Mataio 20:28; Ioane 8:29; Loma 5:12, 18) I te taimi ne tauloto koe ki te lasi o te alofa o Ieova mō koe, ne otia i ei tou loto, kae ko kamata o alofa foki koe ki a ia.—Faitau te 1 Ioane 4:9, 10.

6. Ne a mea e aofia i te alofa ki se tino? Ne a mea ka fai ne koe ona ko tou alofa ki te Atua?

⁶ Kae ko te lagonaga tenā o te alofa ki te Atua ko te kamataga fua. E pelā me se fakaakoakoga, kafai e alofa koe ki se tino, e fai ne tatou a mea e uke atu i lō te fai atu “Au e alofa ki a koe.” Ko te alofa e fai ne ia tatou ke ma‵nako o fai a mea kolā e fakafiafia atu ki te tino tenā. I se auala tai ‵pau, a tou alofa ki a Ieova e fai ei ke manako koe o ola i te auala telā e fakafiafia atu ki a ia. Kafai ko gasolo aka te alofa tenā, ka fai ei ke tuku atu koe ki a ia kae papatiso. A te faiga tenā, ko tauto koe ke tavini atu ki a Ieova ki te se-gata-mai. (Faitau te Loma 14:7, 8.) Ka tausi pefea ne koe a te tautoga tenā?

“FAKALOGO KI ANA FAKATONUGA”

7. Kafai e a‵lofa tatou ki a Ieova, se a ‵tou mea e ‵tau o fai? Ne a ana nisi fakatonuga?

⁷ Ona ko ‵tou a‵lofa ki a Ieova, e ‘faka‵logo tatou ki ana fakatonuga.’ E fai pefea ne tatou a te mea tenei? Mai te ‵tou faka‵logo ki a ia. E tauloto ne tatou i te Tusi Tapu a te auala e manako a Ieova ke ola tatou i ei. E pelā me se fakaakoakoga, e fakaasi mai ne ia me e masei a te konā, te kaisoa io me ko te loi, te ‵moe fakatauavaga mo te tino telā e se ko tau avaga, io me ko te tapuaki ki se tino io me se mea i lō ia.—1 Kolinito 5:11; 6:18; 10:14; Efeso 4:28; Kolose 3:9.

8, 9. E iloa pefea ne tatou a te mea e manako a Ieova ke fai ne tatou i tulaga kolā e seai se tulafono ki ei i te Tusi Tapu? Taku mai se fakaakoakoga.

⁸ Kae ke fakafiafia atu ki a Ieova, e uke atu a mea e ‵tau o fai ne tatou i lō te faka‵logo fua ki ana fakatonuga. E seki tuku mai ne ia se fakasologa o tulafono telā e aofia i ei a mea katoa i ‵tou olaga. Tela la, i nisi taimi e se taku ‵tonu mai i loto i te Tusi Tapu a mea e ‵tau o fai ne tatou. E fai pefea ne tatou a fakaikuga ‵poto? (Efeso 5:17) E maua ne tatou i te Tusi Tapu a fakatakitakiga fakavae, kolā ko muna‵tonu fakavae kolā e akoako mai ki a tatou a te kilokiloga a Ieova ki mea. I te taimi e fai‵tau tatou ki te Tusi Tapu, ka mafai o iloa ne tatou a Ieova e pelā me se Tino. Ka tauloto ne tatou ana mafaufauga, e penā foki mo mea e fiafia kae takalialia a ia ki ei.—Faitau te Salamo 97:10; Faataoto 6:16-19; onoono ki te Fakamatalaga Fakaopoopo 1.

⁹ E pelā me se fakaakoakoga, e fakaiku aka pefea ne tatou a mea e onoono tatou ki ei i te TV io me ko te Itaneti? E se taku ‵tonu mai ne Ieova a mea e ‵tau o fai ne tatou. Kae ko fakatakitakiga fakavae kolā ne tuku mai ne ia ka fesoasoani mai ke fai ne tatou a fakaikuga ‵poto. E ‵fonu a fakafiafiaga e uke i aso nei i amioga fakasaua mo amioga fakatauavaga sē ‵tau. I te Tusi Tapu, ne taku mai ne Ieova me “takalialia a ia ki so se tino telā e fiafia ki amioga fakasaua” kae “ka fakamasino ne [ia] a tino e fina ki amioga fakatauavaga sē ‵tau.” (Salamo 11:5; Epelu 13:4) E fesoasoani mai pefea a fakatakitakiga fakavae konei ke fai ne tatou a fakaikuga ‵poto? I te taimi e iloa ei ne tatou a mea e takalialia ki ei a Ieova io me matagā i tena kilokiloga, ka ‵kalo eiloa kea‵tea tatou mai i ei.

10, 11. Kaia e faka‵logo ei tatou ki a Ieova?

¹⁰ Kaia e faka‵logo ei tatou ki a Ieova? E fai penā ona fua ke se fakasala io me ke ‵kalo kea‵tea tatou mai i ikuga ma‵sei o fakaikuga va‵lea. (Kalatia 6:7) Ikai, e faka‵logo tatou ki a Ieova me a‵lofa tatou ki a ia. E pelā eiloa mo tama‵liki kolā e ma‵nako o fakafiafia atu ki te lotou tamana, e ma‵nako foki tatou o fai ‵tou Tamana faka-te-lagi ke fiafia. E seai se mea e sili atu i te gali i te iloa atu me i a Ieova e fiafia ki a tatou!—Salamo 5:12; Faataoto 12:2; onoono ki te Fakamatalaga Fakaopoopo i te 2.

¹¹ E se ma‵nako tatou o faka‵logo ki a Ieova ona fua me faigofie ke fai penā io me ko seai loa se suā filifiliga e mafai o fai. Kae e se filifili foki ne tatou me ne a ana tulafono io me ko ana tulaga e fia tau‵tali io me e se fia tau‵tali tatou ki ei. (Teutelonome 12:32) I lō te fai penā, e faka‵logo katoatoa tatou ki a ia, e pelā mo pati a te faisalamo: “Au e fiafia malosi ki au fakatonuga, ao, au e fiafia ki ei.” (Salamo 119:47; Loma 6:17) E ma‵nako tatou ke fai pelā mo Noa, telā ne fakaasi atu tena alofa ki a Ieova mai te fai o mea katoa kolā ne fakatonu atu ne Ieova ke fai ne ia. E fai mai te Tusi Tapu me i a Noa “ne fai eiloa ne ia a mea katoa.” (Kenese 6:22) E manako koe ke faipati a Ieova penā e uiga ki a koe?

12. E fakafiafia pefea ne tatou a Ieova?

¹² Ne a lagonaga o Ieova māfai ko faka‵logo tatou ki a ia? E fai eiloa ne tatou a tena “loto ke fiafia.” (Faataoto 11:20; 27:11) Mafaufau aka eiloa ki te mea tenā! E fakafiafia ne tatou a te Mafuaga o te lalolagi māfai e faka‵logo tatou ki a ia. Kae e se faimālō ne ia tatou ke faka‵logo ki a ia. I lō te fai penā, ne tuku mai ne ia ki a tatou te saolotoga. E fakauiga te mea tenei me isi se ‵tou saolotoga ke filifili ke fai te mea tonu io me ko te mea ‵se. E manako a Ieova ke fakagasue tatou ne te ‵tou alofa ki a ia ke fai a fakaikuga ‵poto ko te mea ke maua ne tatou se olaga tafasili i te ‵lei.—Teutelonome 30:15, 16, 19, 20; onoono ki te Fakamatalaga Fakaopoopo i te 3.

“ANA FAKATONUGA E SE ‵MAFA”

13, 14. E iloa pefea ne tatou me e se faigata a te fakalogo ki fakatonuga a te Atua? Fakamatala mai.

¹³ Kae e a māfai e mafau‵fau tatou me ko tō ‵mafa ke fakalogo ki fakatonuga a Ieova io me ka fakaseai ne ana fakatonuga a ‵tou saolotoga? E fai ‵tonu mai i te Tusi Tapu: “Ana fakatonuga e se ‵mafa.” (1 Ioane 5:3) I nisi tusi fai‵tau i te Tusi Tapu, e fakaaoga te pati tenei ke fakamatala i ei a tulafono sē ‵tonu io me ko tino kolā e taumafai o pule atu io me fakalogo‵mae atu ki nisi tino. (Mataio 23:4; Galuega 20:29, 30) E fai mai penei te ‵fuliga i te New English Translation: “Ana fakatonuga e se faka‵mafa mai ki a tatou.” A fakatonuga a Ieova e se “‵mafa,” ko tena uiga e se faigata ke faka‵logo tatou ki ei. E malamalama a ia i mea kolā e se mafai ne tatou o fai.

¹⁴ E pelā mo se fakaakoakoga, mafaufau me ko fesoasoani atu koe ki sou taugasoa e fanatu ki se fale fou. Ko oti ne fakatoka ana kope ki loto i pokisi. E isi ne pokisi e faigofie i te sau, kae ko nisi mea ko tō ‵mafa telā ko manakogina ke tokolua a tino e sau i ei. E mata, ka fai atu tou taugasoa ke sau tokotasi ne koe te pokisi ‵mafa tenā? Ikai! Kaia? E se manako a ia ke pakia koe. E penā mo tou taugasoa, e se mafai o fakamolemole mai a Ieova ke fai ne tatou a mea kolā ko tō faiga‵ta. (Teutelonome 30:11-14) E malamalama eiloa a Ieova i a tatou ne tino pefea. E “iloa ‵lei ne ia a te auala ne faite ei tatou, e masaua ne ia i a tatou ne ‵pefu.”—Salamo 103:14.

15. Kaia e mautinoa ei i a tatou me i fakatonuga a Ieova e fai mō te ‵lei o tatou?

¹⁵ Ne fai atu a Mose ki te fenua o Isalaelu me i tulafono a Ieova ne fai mō te “‵lei” o latou kae ko te faka‵logo o latou ka fai ei ko latou ke ‘tumau i te ola.’ (Teutelonome 5:28-33; 6:24) E penā foki eiloa i ‵tou aso nei. So se mea e fai mai ne Ieova ke fai ne tatou e fai mō te ‵lei o ‵tou olaga. (Faitau te Isaia 48:17.) A ‵tou Tamana ko Ieova, e iloa faeloa ne ia te ‵toe mea ‵lei mō tatou. (Loma 11:33) E fai mai te Tusi Tapu: “Te Atua ko te alofa eiloa a ia.” (1 Ioane 4:8) E fakaasi mai i ei me i so se pati io me se mea e fai ne Ieova e fai katoa mo te alofa.

16. E iloa pefea ne tatou me mafai eiloa tatou o faka‵logo faitalia ‵tou tulaga sē ‵lei katoatoa mo te ola i te lalolagi masei tenei?

¹⁶ E se faigofie faeloa ki a tatou a te faka‵logo ki te Atua. A tatou e ‵nofo i te lalolagi masei tenei e pule ne te Tiapolo. E taumafai a ia o fakaosooso a tino ke fai a te mea masei. (1 Ioane 5:19) E ‵tau foki o taua atu tatou ki ‵tou mafaufauga mo lagonaga sē ‵lei katoatoa, me e mafai o takitaki ei tatou ke ‵teke atu ki te Atua. (Loma 7:21-25) Kae ko ‵tou alofa ki a Ieova e maua ei ne tatou a te malosi ke fai te mea tonu. E lavea ne ia ‵tou taumafaiga ke faka‵logo ki a ia, kae e fesoasoani mai a ia e auala i te tukumaiga o tena agaga tapu. (1 Samuelu 15:22, 23; Galuega 5:32)E fesoasoani mai a te agaga tapu ke ati aka ne tatou a uiga kolā e fai ei ke faigofie te fakalogo ki a ia.—Kalatia 5:22, 23.

17, 18. (a) Ne a mea ka tauloto ne tatou i te tusi tenei? (e) Se a te mea ka sau‵tala tatou ki ei i te suā mataupu?

¹⁷ I te tusi tenei, ka tauloto eiloa tatou ke ola i te auala telā e fakafiafia atu ei ki a Ieova. Ka tauloto tatou ki te auala e fakagalue ei ne tatou i ‵tou olaga ana fakatakitakiga fakavae mo ana tulaga i mea tau amioga. Masaua me e se faimālō ne Ieova tatou ke faka‵logo ki a ia. Kafai ko filifili ne tatou ke faka‵logo, ka momea aka te ‵lei o ‵tou olaga maise eiloa i aso mai mua. Kae ko te ‵toe mea tāua, a te ‵tou faka‵logo ka fakaasi atu ei ki te Atua a te lasi o te ‵tou a‵lofa ki a ia.—Onoono ki te Fakamatalaga Fakaopoopo i te 4.

¹⁸ Ke feasoasoani mai ki a tatou ke iloa te mea tonu mo te mea ‵se, ne tuku mai ne Ieova ki a tatou taki tokotasi a te loto lagona. Kafai e akoako ne tatou a ‵tou loto lagona, ka fesoasoani mai ei ke “fakalogo ki ana fakatonuga.” Tela la, se a te ‵tou loto lagona, kae e akoako pefea ne tatou? Ke onoono aka tatou.