Ke Tumau “i te Alofa o te Atua”

“Kae tausi [“tumau,” NW] koutou i te alofa o te Atua, ka koi fakatalitali koutou ki te ‵tou Aliki ko Iesu Keliso, ke tuku atu ne ia a te ola se gata mai i tona alofa ‵nau.”—IUTA 21.

1, 2. Ne fakaasi mai pefea ne Ieova tena alofa ki a tatou, kae e iloa pefea ne tatou me e se tausi faeloa ne ia tatou i tena alofa?

KO OTI ne fakaasi mai ne Ieova te Atua a tena alofa ki a tatou i auala e uke. Kae e aunoa mo te fakalotolotolua, a te ‵toe fakamaoniga sili o te alofa o Ieova ko te fakatokaga o te taulaga togiola. Ko oko eiloa i te lasi o tena alofa ki tino telā ne uga mai ei ne ia tena Tama fagasele ki te lalolagi ke mate mō tatou. (Ioane 3:16) Ne fai ne Ieova te mea tenei me e manako a ia ke ola tatou ki te se-gata-mai, kae e manako foki ke maua ne tatou a mea aoga mai tena alofa ki te se-gata-mai!

² Kae e mata, e mafai o tali‵tonu tatou me ka tausi faeloa tatou ne Ieova i tena alofa faitalia a filifiliga e fai ne tatou? Ikai. Me i te Iuta, fuaiupu e 21, e fai‵tau tatou ki te fakamalosiga tenei: “Tausi [“tumau,” NW] koutou i te alofa o te Atua, ka koi fakatalitali koutou ki te ‵tou Aliki ko Iesu Keliso, ke tuku atu ne ia a te ola se gata mai i tona alofa ‵nau.” A te tugapati ko te “tumau koutou i te alofa o te Atua” e fakauiga me e isi ne mea e ‵tau o fai ne tatou. Ne a la mea e ‵tau o fai ko te mea ke tumau tatou i te alofa o te Atua?

E Mafai Pefea o Tumau Tatou i te Alofa o te Atua?

3. Ne a pati a Iesu e uiga ki te mea telā e tāua ke tumau ei a ia i te alofa o tena Tamana?

³ E maua ne tatou a te tali ki te fesili tenā i pati eiloa a Iesu, kolā ne fai atu ne ia i te ‵toe po o tena olaga i te lalolagi. Ana muna: “Kafai e tausi ne koutou aku poloakiga, ka tumau koutou i toku alofa, e pelā mo au ko oti ne tausi a poloakiga a toku Tamana, kae tumau i tena alofa.” (Ioane 15:10) E manino ‵lei, me ne iloa ne Iesu me i te tausi ki fakatonuga a Ieova e tāua ki te tumau i se tulaga ‵lei i mua o tena Tamana. Ia, kafai e tonu te mea tenā ki te Tama ‵lei katoatoa a te Atua, e a, e se tonu foki te mea tenā ki a tatou?

4, 5. (a) Se a te auala tāua e mafai ei ne tatou o fakaasi atu me e a‵lofa tatou ki a Ieova? (e) Kaia e seai ei se pogai e ‵tau ei o ‵teke atu tatou ki te manatu e uiga ki te fakalogo ki fakatonuga a Ieova?

⁴ Muamua la, e fakaasi atu ne tatou me e a‵lofa tatou ki a Ieova mai i te faka‵logo ki a ia. Ne fakaasi mai ne te apositolo ko Ioane a te mea tenā i te auala tenei: “Me e tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mō tatou.” (1 Ioane 5:3) E tonu, a te akoakoga e uiga ki te fakalogo e sē se mea telā e lauiloa i te lalolagi i aso nei. Mafaufau la ki te fuaiupu tenei: “Ka ko ana fakatonuga e se na ‵mafa foki.” E se fakamolemole mai a Ieova ke fai ne tatou se mea telā ko tō ‵mafa ki a tatou.

⁵ Ke fai se fakatusaga: E mata, ka fakamolemole atu koe ki sou taugasoa pele ke sau ne ia se mea telā e iloa ne koe me ko tō ‵mafa ki a ia? Ikai, e se penā loa! E sili fakafia atu te atafai o Ieova i lō tatou kae e sili atu foki tena malamalama i ‵tou vāivāiga. E fakatalitonu mai te Tusi Tapu ki a tatou me i a Ieova “e manatua foki ne ia i a tatou ne pefu.” (Salamo 103:14) E se mafai eiloa o fai mai a Ieova ke fai ne tatou a mea kolā e se mafai ne tatou o fai. Tela la, e seai eiloa se pogai e ‵tau ei o ‵teke atu tatou ki te manatu e uiga ki te fakalogo ki fakatonuga a Ieova. E ‵kese mai i ei, e iloa ne tatou me i te fakalogo ki a Ieova e tuku mai i ei—se avanoaga tāua ke fakaasi atu ki ‵tou Tamana faka-te-lagi me e a‵lofa tonu tatou ki a ia kae e fia tumau foki tatou i tena alofa.

Se Meaalofa Fakapito Mai i a Ieova

6, 7. (a) Se a te loto lagona? (e) Fakamatala mai te auala e mafai ei o fesoasoani mai te loto lagona ke tumau tatou i te alofa o te Atua.

⁶ I te lalolagi faigata telā e ola nei tatou i ei, e uke a fakaikuga e ‵tau o fai kae e aofia i ei te ‵tou faka‵logo ki te Atua. E mafai pefea o fakamautinoa aka ne tatou me i fakaikuga konei e fetaui ‵lei mo te loto o te Atua? Ne tuku mai ne Ieova se meaalofa telā e mafai o fesoasoani mai i se auala lasi ‵ki i te mataupu tenei e uiga ki te fakalogo. Ko te loto lagona. Se a te loto lagona? Se atamai fakapito telā e iloilo aka i ei a ‵tou mea e fai. E fai pelā me se famasino i loto i a tatou, telā e fai ei ke ‵kilo atu ki filifiliga kolā e fe‵paki mo tatou i te olaga io me ke mafaufau ki mea ko oti ne fai ne tatou kae iloilo aka me e ‵lei io me ma‵sei, e ‵tonu io me e ‵se.—Faitau te Loma 2:14, 15.

⁷ E mafai pefea o fakaaoga faka‵lei ne tatou a te loto lagona? Mafaufau ki se tala fakatusa. Ko sasale atu se tino i loto i se togavao matolu. E seai ne auala, e seai foki ne fakailoga. Kae e tumau eiloa a ia i te fanatu ki te koga telā e fia fano a ia ki ei. E pefea la? E isi sena kamupasi. E foliga mai e pelā me se itula mo se nila telā e isi se maneta i ei kae fakasino atu faeloa ki mātū. E aunoa mo tena kamupasi, e mafai eiloa o galo atu te tino tenei e aunoa mo se fakamoemoega. I se auala tai ‵pau, a te tino telā e seai sena loto lagona e mafai o seai sena fakamoemoega māfai e taumafai o fai a filifiliga ki amioga ‵lei kae amio‵tonu i te olaga.

8, 9. (a) Ne a tapula o ‵tou loto lagona e ‵tau o masaua ne tatou? (e) Ne a mea e mafai o fai ne tatou ke fakamautinoa aka ei me e aoga tonu eiloa ki a tatou ‵tou loto lagona?

⁸ Kae e pelā me se kamupasi, e isi ne tapula o te loto lagona. Kafai e tuku atu ne te tino sasale se maneta ki tafa o tena kamupasi, e mafai o se fakasino tonu atu te nila ki mātū. E penā foki loa, kafai e fakatāua malosi ne tatou a manakoga o ‵tou loto, ne a mea e mafai o ‵tupu? E mafai eiloa o faka‵se a te loto lagona ne ‵tou manakoga kaima‵nako. E fakailoa mai a te Tusi Tapu ki a tatou me i te loto “ko te ‵toe mea tafasili foki eiloa i te faka‵se tino.” (Ielemia 17:9; Faataoto 4:23) E se gata i ei, kafai e se tonu kae e se fakatalitonugina te mape a te tino sasale tenā, ka se lasi io me e seai eiloa se aoga o tena kamupasi ki a ia. E penā foki loa, kafai e se fakalago‵lago tatou ki te takitakiga mautinoa i te Muna a te Atua, ko te Tusi Tapu, e mafai eiloa o seai se aoga o ‵tou loto lagona. (Salamo 119:105) Se mea fakafanoanoa me ko tō ‵saga atu a tino e tokouke i te lalolagi tenei ki manakoga o te loto kae e se ‵saga lele eiloa latou ki tulafono i te Muna a te Atua. (Faitau te Efeso 4:17-19.) Tenā eiloa te pogai e tokouke ei a tino e fai ne latou a mea ma‵sei, faitalia me e isi ne olotou loto lagona.—1 Timoteo 4:2.

⁹ E ‵tau eiloa o fakaiku aka ne tatou ke mo a ma fai tatou penā! I lō te fai penā, ke tumau tatou i te talia o te Muna a te Atua ke akoako kae fakamasani aka ei ‵tou loto lagona ko te mea ke mafai o aoga tonu ki a tatou. E ‵tau o fakalogo‵logo tatou ki ‵tou loto lagona telā ko oti ne akoakogina ki mea faka-te-Tusi Tapu i lō te taliaga o ‵tou manakoga kaima‵nako ke pule mai ki a tatou. I tafa i ei, e ‵tau o taumafai malosi tatou ke fakaasi atu a te āva ki loto lagona o ‵tou taina mo tuagane pele i te feitu faka-te-agaga. E taumafai malosi eiloa tatou ke ‵kalo keatea mai te fakavāivāi atu ki a latou, kae ke masaua faeloa me e kese‵kese a loto lagona o ‵tou taina.—1 Kolinito 8:12; 2 Kolinito 4:2; 1 Petelu 3:16.

10. Ne a feitu e tolu o te olaga ka sau‵tala nei tatou ki ei?

¹⁰ Ke na mafaufau nei tatou ki feitu e tolu o te olaga kolā e mafai ei o fakaasi atu ne tatou te ‵tou a‵lofa ki a Ieova e auala i te fakalogo. E tonu, e aoga eiloa te loto lagona i taimi takitasi konā, kae e ‵tau eiloa o takitakigina ne tulafono fakaosofia i te Tusi Tapu i mea tau amioga. Konei a auala e tolu kolā e mafai ei o faka‵logo tatou mo te a‵lofa ki a Ieova: (1) E a‵lofa tatou ki tino kolā e alofa ki ei a Ieova, (2) e fakaasi atu ne tatou a te āva ki pulega, a ko te (3) e taumafai tatou ke tumau i te ‵ma i te kilokiloga a te Atua.

A‵lofa ki Tino Kolā e Alofa ki ei a Ieova

11. Kaia e ‵tau ei o a‵lofa tatou ki tino kolā e a‵lofa ki ei a Ieova?

¹¹ Muamua la, e ‵tau o a‵lofa tatou ki tino kolā e alofa ki ei a Ieova. Kafai e mafau‵fau tatou ki te fai taugasoa, e fai eiloa a tino e pelā me ne omomi. E ‵miti ne tatou so se mea i ‵tou tafa. E iloa ‵lei ne te ‵tou Mafuaga a te fakamataku—mo te fesoasoani—o taugasoa ki tino sē ‵lei katoatoa. Tela la, e tuku mai ne ia ki a tatou a te fakatakitakiga poto tenei: “Kauga ki tino ‵poto kae ka poto foki koe. Kafai e kauga koe ki tino va‵lea kae ka se aoga koe.” (Faataoto13:20; 1 Kolinito 15:33) E seai eiloa se tino i a tatou e manako ke ‘seai sena aoga.’ E ma‵nako eiloa tatou taki tokotasi ke “‵poto.” E fai eiloa a Ieova mo fai te ‵toe tino poto, kae e se mafai foki o fakaloiloi a ia ne so se tino. Kae e tuku mai ne ia se fakaakoakoga gali ki a tatou e uiga loa ki te fai taugasoa. Mafaufau la ki te mea tenei—ko oi a tino sē ‵lei katoatoa e filifili ne Ieova mo fai ana taugasoa?

12. Ne a vaegā taugasoa e filifili aka ne Ieova?

¹² Ne fakasino atu a Ieova ki te toeaina ko Apelaamo e pelā me ko “toku taugasoa.” (Isaia 41:8) E tu ‵kese eiloa te tagata tenei i tena fakamaoni, amiotonu, mo te fakalogo—se tagata fakatuanaki. (Iakopo 2:21-23) Tenā eiloa te vaegā taugasoa e filifili ne Ieova. E fai taugasoa a ia ki vaegā tino penā i aso nei. Kafai e filifili aka ne Ieova a vaegā taugasoa penā, e mata, e se tāua ke fai foki tatou penā, ke sa‵sale fakatasi tatou mo tino ‵poto kae ke ‵poto foki tatou?

13. Kafai ko filifili aka ou taugasoa, ne a mea e mafai o fesoasoani atu ki a koe ke fai a filifiliga ‵lei?

¹³ Ne a mea e mafai o fesoasoani atu ki a koe ke fai a filifiliga ‵lei i te feitu tenei? A te sukesuke ki fakaakoakoga i te Tusi Tapu e mafai o fai e pelā me se fakamalosiga. Mafaufau la ki te va fakataugasoa o Luta mo te matua o tena avaga ko Naomi, ko Tavita mo Ionatana, mo Timoteo mo Paulo. (Luta 1:16, 17; 1 Samuelu 23:16-18; Filipi 2:19-22) Ne ‵pili ‵ki a va fakataugasoa konei ona ko te ‵toe pogai tāua tenei: Ne fakavae te lotou va fakataugasoa ki te alofa tonu ki a Ieova. E mata, e mafai o maua ne koe a taugasoa kolā e ‵pau te lotou a‵lofa mo koe ki a Ieova? Ke na talitonu me e mafai o maua ne koe a vaegā taugasoa penā i loto i te fakapotopotoga Kelisiano. Ka se fakamalosi atu eiloa a vaegā taugasoa penā ke fai ne koe se mea telā e se fakafiafia atu ki a Ieova. I lō te fai penā, ka fesoasoani atu latou ke fakalogo koe ki a Ieova, ke momea aka tou malosi faka-te-agaga, kae ke ‵toki ne tatou a mea mo se kilokiloga faka-te-agaga. (Faitau te Kalatia 6:7, 8.) Ka fesoasoani atu latou ke tumau koe i te alofa o te Atua.

Ke Fakaasi Atu a te Āva ki Pulega

14. Ne a pogai e faigata sāle ei ki a tatou ke fakaasi atu te āva ki pulega?

¹⁴ A te lua o auala e fakaasi atu ei te ‵tou a‵lofa ki a Ieova e aofia i ei a pulega. E ‵tau o fakaasi atu ne tatou a te āva ki pulega. Kaia e faigata ei a te mea tenei ki a tatou i nisi taimi? E tasi te pogai, me i tino kolā e maua ne latou a tulaga pule e se ‵lei katoatoa. E se gata i ei, a tatou foki e se ‵lei katoatoa. E fakatau‵fai tatou mo se manakoga telā ne fa‵nau mai mo tatou ke ‵teke atu.

15, 16. (a) Kaia e tāua ke fakaasi atu ne tatou te āva ki tino kolā ne ‵tofi aka ne Ieova ke tausi atu ki ana tino? (e) Se a te akoakoga tāua e tauloto ne tatou i te auala ne kilo atu ei a Ieova ki te ‵tekeatuga o te kau Isalaelu ki a Mose?

¹⁵ Kāti ko mafaufau koe, penei, ‘Kafai e faigata ki a tatou ke fakaasi atu te āva ki pulega, kaia e ‵tau ei o fai ne tatou a te mea tenā?’ A te tali e aofia eiloa i ei a te kinauga e uiga ki te pulega sili. Ko oi ka filifili aka ne koe mo fai tou pule sili? Kafai e filifili aka ne tatou a Ieova e pelā me ko ‵tou Pule Sili, e ‵tau o āva tatou ki tena pulega. Kafai e se fai tatou penā, e mata, e mafai eiloa o fai ‵tonu ne tatou a ia mo fai ‵tou Pule? E se gata i ei, e masani o fakagalue aka ne Ieova tena pulega e auala i tino sē ‵lei katoatoa kolā e ‵tofi aka ne ia ke tausi atu ki ana tino. Kafai e ‵teke atu tatou ki tino konā, ka kilo mai pefea a Ieova ki ‵tou faifaiga?—Faitau te 1 Tesalonia 5:12, 13.

¹⁶ E pelā mo te taimi ne mui‵mui kae ‵teke atu ei te kau Isalaelu ki a Mose, ne kilo atu a Ieova ki olotou faifaiga me e ‵teke atu latou ki a ia. (Numela 14:26, 27) E seki ‵fuli eiloa a te Atua. Kafai e ‵teke atu tatou ki tino kolā ne ‵tofi aka ki tulaga pule, ka ‵teke atu eiloa tatou ki te Atua!

17. Se a te kilokiloga tonu e ‵tau o taumafai tatou o fakamalosi aka ki tino kolā e maua ne latou a tulaga taulia i te fakapotopotoga?

¹⁷ E fakaasi mai ne te apositolo ko Paulo a te kilokiloga tonu ke fakamalosi aka ki tino kolā e maua ne latou a tulaga taulia i te fakapotopotoga Kelisiano. Ne tusi mai a ia: “Faka‵logo ki otou takitaki kae sa‵sale foki i olotou fakatonuga. E se mapu eiloa latou i te tausiga o otou agaga, me ‵tau mo latou o avatu se tala a olotou galuega ki te Atua. Kafai e faka‵logo koutou ki ei, e fai olotou galuega mo te fiafia, kae masei te sē faka‵logo ki ei, ko fai ei olotou galuega mo te sē fia‵fia, ko maumau ei olotou galuega mō koutou.” (Epelu 13:17) E tonu, e manakogina ke taumafai malosi ke ati aka ne tatou se vaegā uiga fakalogo penā. Masaua la, me e ga‵lue tatou ke tumau i te alofa o te Atua. E a, e se tāua ke kausaki atu tatou ki te fakamoemoega tenā?

Ke Tumau i te ‵Ma i te Kilokiloga a Ieova

18. Kaia e manako ei a Ieova ke tumau tatou i te ‵ma?

¹⁸ A te tolu o auala e fakaasi atu ei te ‵tou a‵lofa ki a Ieova ko te ‵tou taumafai ke tumau i te ‵ma i tena kilokiloga. E masani eiloa o ga‵lue malosi a mātua ke fakamautinoa aka me e ‵ma olotou tama‵liki. Kaia? A te pogai e tasi, me i te ‵ma e fesoasoani atu ki te malosi mo te ola ‵lei o te tamaliki. E se gata i ei, a te tamaliki ‵ma e fakaasi atu i ei se ata ‵lei o te kāiga, telā e fakamaoni atu ei te a‵lofa mo te ‵saga tonu atu o mātua. Ona ko pogai tai ‵pau, e manako foki a Ieova ke ‵ma tatou. E iloa ne ia me i te ‵ma e aoga ki ‵tou ola ‵lei. E iloa foki ne ia me e fakaasi atu ne te ‵tou ‵ma se ata ‵lei e uiga ki a ia, te ‵tou Tamana faka-te-lagi. E tāua ‵ki eiloa te mea tenā, me e mafai ei o tosina atu a loto o tino ki te Atua telā e tavini atu tatou ki ei ona ko te mea e lavea ne latou a te ‵tu ‵kese o tatou mai i tino o te lalolagi sē ‵ma tenei.

19. E iloa pefea ne tatou me i te ‵ma i te feitu faka-te-foitino e tāua?

¹⁹ Ne a auala e ‵tau ei o tumau tatou i te ‵ma? E tonu, i auala katoa. I Isalaelu mua, ne fakaasi faka‵lei atu ne Ieova ki ana tino me e tāua ‵ki te ‵ma i te feitu faka-te-foitino. (Levitiko 15:31) Ne aofia foki i te Tulafono a Mose a vaegā mea pelā mo te ‵tanuga o fekau, te ‵fuluga o mea tuku meakai, te ‵fuluga o lima, vae, mo te ‵taga o gatu. (Esoto 30:17-21; Levitiko 11:32; Numela 19:17-20; Teutelonome 23:13, 14) Ne fakamasaua atu ki te kau Isalaelu me i te lotou Atua, ko Ieova, e tapu—telā e fakauiga ki te “‵ma,” “seai se masei i ei,” kae e “‵malu.” E ‵tau foki mo tavini a te Atua tapu o tapu.—Faitau te Levitiko 11:44, 45.

20. Ne a auala e ‵tau ei o tumau tatou i te ‵ma?

²⁰ E ‵tau foki mo tatou o ‵ma i loto mo tua. E taumafai tatou ke tumau ‵tou mafaufauga i te ‵ma. E tau‵tali atu tatou mo te fakamaoni ki tulaga ‵ma o Ieova i mea tau amioga, faitalia te lailai o te lalolagi i ‵tou tafa i amioga finalalolagi. A ko te ‵toe mea tāua, e fakatumau ne tatou te ‵tou tapuakiga ke ‵ma, i te ‵kalo keatea mai i so se fakamaseiga mai i lotu ‵se. E se mafai eiloa o puli i a tatou a te fakailoaga mai te Atua ke fakaeteete i te Isaia 52:11: “Sa puke se mea telā e fakalailai ne ia koutou i feitu fakatapuakiga; tausi otou foitino ke ‵malu, kae na olo keatea mai i Papelonia.” I aso nei, e tumau tatou i te ‵ma i te feitu faka-te-agaga mai i te ‵kalo keatea mai i so se mea telā e kilo atu ki ei te ‵tou Tamana faka-te-lagi e pelā me e lailai i mea fakalotu. Tenā eiloa te pogai e ‵tau ei o ‵kalo keatea tatou kae fakaeteete mai i fakamanatuga mo aso malōlō ‵se fakalotu kolā e lauiloa malosi i te lalolagi i aso nei. E tonu, se mea faigata ke tumau tatou i te ‵ma. Kae e taumafai malosi a tino o Ieova ke fai penā me e fesoasoani atu te mea tenei ke tumau latou i te alofa o te Atua.

21. E mafai pefea o fakamautinoa aka ne tatou me ka tumau eiloa tatou i te alofa o te Atua?

²¹ E manako a Ieova ke tumau tatou i tena alofa ki te se-gata-mai. Kae e ‵tau o fakamautinoa aka ne tatou katoa me e fai ne tatou te ‵toe mea ‵lei ke tumau i te alofa o te Atua. E mafai ne tatou o fai te mea tenei mai i te tau‵tali atu ki te fakaakoakoga a Iesu kae fakamaoni atu te ‵tou a‵lofa ki a Ieova mai i te faka‵logo ki Ana fakatonuga. Kafai e fai tatou penā, ka fakamautinoa aka ei me e seai eiloa se mea ka mafai ne ia o “‵vae tatou mai i te alofa o te Atua i a Keliso Iesu te ‵tou Aliki.”—Loma 8:38, 39.

E Masaua ne Koe?

• E mafai pefea o fesoasoani mai ‵tou loto lagona ke tumau tatou i te alofa o te Atua?

• Kaia e ‵tau ei o a‵lofa tatou ki tino kolā e alofa ki ei a Ieova?

• Kaia e tāua ei ke fakaasi atu te āva ki pulega?

• E pefea te tāua o te ‵ma ki tino o te Atua?

[Pokisi/​Ata i te itulau e 25]

Se Tusi Telā E Fakamalosi Aka Ei A Amioga ‵Lei

I te polokalame o te fono i te atufenua i te 2008/2009, ne ‵tala mai i ei a te tusi telā e 224 a itulau kae e fakaulutala penei “Keep Yourselves in God’s Love.” Se a te pogai o te tusi fou tenei? Ne fakatoka ke fesoasoani atu ki Kelisiano ke iloa kae a‵lofa latou ki tulaga o Ieova, mai i te ‵saga tonu atu muamua ki amioga faka-Kelisiano. A te sukesuke faka‵lei ki te tusi ko te “Keep Yourselves in God’s Love” ka fakamalosi aka ei ‵tou loto tali‵tonu me i te ola e ‵tusa mo tulaga o Ieova ko te ‵toe auala ‵lei ke ola i ei nei kae e iku atu ki te ola se-gata-mai i aso mai mua.

E sili atu i ei, ne fakatoka te tusi tenei ke fesoasoani mai ke iloa ne tatou me i te fakalogo ki a Ieova e sē se amoga ‵mafa. E ‵kese mai i ei, a te mea tenā se auala ke fakaasi atu ei ki a Ieova a te lasi o ‵tou a‵lofa ki a ia. Tela la, ka fakamalosi mai a te tusi tenei ke fesili ifo tatou ki a tatou eiloa, ‘Kaia e fakalogo ei au ki a Ieova?’

Kafai ko fai ne nisi tino se mea fakafanoanoa ke fulitua atu ki te alofa o Ieova, a te fakalavelave e masani eiloa o aofia i ei a amioga, kae e se ko akoakoga. E ‵tāua ‵ki eiloa ke fakamalosi aka te ‵tou a‵lofa mo te loto fakafetai ki tulafono mo akoakoga fakavae a Ieova kolā e takitaki ei tatou i aso katoa! E tali‵tonu tatou me ka fesoasoani atu te tusi tenei ki mamoe a Ieova i te lalolagi kātoa ke ‵tu ‵mautakitaki mō te mea tonu, ke fakamaoni atu me i a Satani se tino loi, kae e sili i mea katoa ke tumau i te alofa o te Atua!—Iuta 21.

[Fakamatalaga o te Ata i te itulau e 23]

“Kafai e tausi ne koutou aku poloakiga, ka tumau koutou i toku alofa, e pelā mo au ko oti ne tausi a poloakiga a toku Tamana, kae tumau i tena alofa”