Auala ke ‵Vae Kea‵tea Mai te Lalolagi

1. Se a te mea ne manavase ki ei a Iesu i te po mai mua o tena mate?

KO TE po eiloa mai mua o te mate o Iesu. Ne iloa ‵lei ne ia me ko pili o tiakina ne ia ana soko, kae ne manavase eiloa a ia ki mea ka ‵tupu ki a latou i aso mai mua. Ne fai atu a ia ki a latou: “Koutou e se ne vaega o te lalolagi.” (Ioane 15:19) Fakamuli ifo, ne ‵talo atu a ia ki tena Tamana e uiga mō latou, penei: “A latou e se ne vaega o te lalolagi, e pelā eiloa mo au e sē se vaega o te lalolagi.” (Ioane 17:15, 16) Se a te mea ne fakauiga ki ei a Iesu?

2. Se a “te lalolagi” telā ne faipati ki ei a Iesu?

² A “te lalolagi” i konei e fakasino atu ki tino kolā e se iloa ne latou a te Atua kae e ‵nofo mai lalo i te pulega a Satani. (Ioane 14:30; Efeso 2:2; Iakopo 4:4; 1 Ioane 5:19) E mafai pefea o fai tatou e pelā me “e se ne vaega o te lalolagi”? I te mataupu tenei, ka sau‵tala tatou ki nai auala: E tumau tatou i te fakamaoni ki te Malo o te Atua kae e se ‵kau atu ki se feitu, telā ko te sē ‵kau ki se feitu i mea fakapolitiki. E ‵teke tatou ki te agaga o te lalolagi. E mata ‵lei ‵tou gatu mo teuga, kae maua ne tatou se kilokiloga paleni ki tupe. E ‵pei foki tatou ki te gatu tau telā ne tuku mai ne te Atua mō tatou.—Onoono ki te Fakamatalaga Fakaopoopo i te 16.

FAKAMAONI KI TE MALO O TE ATUA

3. Se a te kilokiloga a Iesu ki mea fakapolitiki?

³ I te taimi ne nofo ei a Iesu i te lalolagi, ne lavea ne ia te uke o fakalavelave o tino kae ne faigata foki olotou olaga. Ne alofa eiloa a ia ki a latou kae ne manako o fesoasoani ki a latou. E mata, ne fai a ia e pelā me se takitaki fakapolitiki? Ikai. Ne iloa ne ia me manakogina ne tino a te Malo o te Atua. Ka fai a Iesu mo fai te Tupu i te Malo tenā, kae ko te Malo tenā ko te matua tāua eiloa o tena talaiga. (Tanielu 7:13, 14; Luka 4:43; 17:20, 21) E seki aofia a Iesu i mea fakapolitiki, kae ne tumau eiloa a ia i te sē kau atu ki se feitu. I te taimi ne tu atu ei a Iesu i mua o te Kovana Loma ko Ponitio Pilato, ne fai atu tou tagata: “A toku Malo e sē se vaega o te lalolagi tenei.” (Ioane 18:36) Ne seki ‵kau foki ana soko ki se feitu. E fai mai te tusi ko te On the Road to Civilization me i Kelisiano i aso mua “ne seki ga‵lue latou i galuega fakapolitiki.” E penā foki a Kelisiano ‵tonu i aso nei. E ‵lago atu tatou mo te fakamaoni ki te Malo o te Atua, kae e se ‵kau ki se feitu i mea fakapolitiki o te lalolagi nei.—Mataio 24:14.

4. E ‵lago atu pefea a Kelisiano ‵tonu ki te Malo o te Atua?

⁴ A sui o te malo kolā e olo o ga‵lue i nisi atufenua e se ‵kau atu ki mea fakapolitiki o te fenua tenā. E penā foki eiloa a te kau fakaekegina, ko latou kolā e maua a te fakamoemoega ke pule fakatasi mo Keliso i te lagi. Ne tusi atu a Paulo ki Kelisiano fakaekegina: “A matou ko sui kolā e sui ne matou a Keliso.” (2 Kolinito 5:20) A te kau fakaekegina e sui mai ne latou te pulega a te Atua. E se ‵kau atu latou ki mea fakapolitiki mo fakalavelave o malo o te lalolagi nei. (Filipi 3:20) I lō te fai penā, ko oti ne fesoasoani atu te kau fakaekegina ki te fia miliona o tino ke iloa ne latou a te pulega a te Atua. A “nisi mamoe,” kolā e maua ne latou te fakamoemoega ke ola ki te se-gata-mai i te lalolagi fou a te Atua, e ‵lago latou ki te kau fakaekegina. E se ‵kau foki latou ki se feitu. (Ioane 10:16; Mataio 25:31-40) E mautinoa eiloa me seai eiloa se Kelisiano tonu e ‵tau o aofia i mea fakapolitiki o te lalolagi nei.—Faitau te Isaia 2:2-4.

5. Se a te pogai e tasi e se ‵kau ei a Kelisiano ki taua?

⁵ E ‵kilo atu a Kelisiano ‵tonu ki olotou taina tali‵tonu e pelā me ne kāiga kae e ‵kau fakatasi latou faitalia te kese‵kese o fenua mo ‵tupuakaga o latou. (1 Kolinito 1:10) Moi fai e ‵kau atu tatou ki taua, ka mafai o taua atu tatou ki ‵tou kāiga ‵tonu, ‵tou taina tali‵tonu, ko latou kolā ne fakatonu mai a Iesu ke a‵lofa tatou ki ei. (Ioane 13:34, 35; 1 Ioane 3:10-12) E sili atu i ei, ne fai atu a Iesu ki ana soko ke a‵lofa foki ki lotou fili.—Mataio 5:44; 26:52.

6. Se a te kilokiloga a tavini tukugina atu a Ieova ki malo?

⁶ Faitalia me e se ‵kau atu tatou ki se feitu, e pelā me ne Kelisiano, e taumafai eiloa tatou o ola e pelā me ne tino ‵lei o te fenua. E pelā mo te āva o tatou ki te malo mai te faka‵logo ki ana tulafono mo te ‵togiga o ‵tou lafoga. Kae e fakamautinoa faeloa ne tatou ke tuku atu a “mea a te Atua ki te Atua.” (Maleko 12:17; Loma 13:1-7; 1 Kolinito 6:19, 20) A “mea a te Atua” e aofia i ei te ‵tou alofa ki a ia, te ‵tou faka‵logo, mo te ‵tou tapuakiga. E lotoma‵lie eiloa tatou ke ‵mate i lō te sē faka‵logo ki a Ieova.—Luka 4:8; 10:27; faitau te Galuega 5:29; Loma 14:8.

‵TEKE ATU “TE AGAGA O TE LALOLAGI”

7, 8. Se a “te agaga o te lalolagi” kae pokotia pefea a tino i ei?

⁷ Ke ‵vae kea‵tea mai te lalolagi a Satani, e fakauiga i ei me e se ‵tau o talia ne tatou a “te agaga o te lalolagi” ke pule mai ki a tatou. A te agaga tenā e maua i ei a mafaufauga mo amioga kolā e maua mai i a Satani, kae e pule atu ki a latou kolā e se tavini ki a Ieova. Kae ko Kelisiano e ‵teke atu ki uiga penā. E pelā eiloa mo pati a Paulo, “ko maua ne tatou te agaga mai te Atua, kae e se ko te agaga o te lalolagi.”—1 Kolinito 2:12; Efeso 2:2, 3; onoono ki te Fakamatalaga Fakaopoopo i te 17.

⁸ A te agaga o te lalolagi e fai ne ia a tino ke kaima‵nako, fakamata‵mata, kae uiga ‵teke. E fai foki ei ke mafau‵fau latou me e se ‵tau o faka‵logo latou ki te Atua. E manako a Satani ke fai ne tino a mea e ma‵nako latou ki ei e aunoa mo te mafau‵fau ki mea e iku mai ei. E manako a ia ko tino ke tali‵tonu me i “manakoga o te foitino mo manakoga o mata” ko toe mea tāua eiloa i te olaga. (1 Ioane 2:16; 1 Timoteo 6:9, 10) E taumafai malosi eiloa a te Tiapolo ke takitaki ‵se ne ia a tavini a Ieova kae fakatogafiti ne ia tatou ke mafau‵fau e pelā eiloa mo ia.—Ioane 8:44; Galuega 13:10; 1 Ioane 3:8.

9. E mafai pefea o pokotia tatou i te agaga o te lalolagi?

⁹ E pelā loa mo te ea e mānava ne tatou, e sikomia tatou ne te agaga o te lalolagi. Kafai e se ga‵lue malosi tatou o ‵teke atu ki te agaga tenei, ka pokotia tatou i ei. (Faitau te Faataoto 4:23.) E mafai o kamata a te mea tenei i se auala ‵lei, e pelā mo te talia ne tatou a mafaufauga mo faifaiga a tino kolā e se tapuaki ki a Ieova. (Faataoto 13:20; 1 Kolinito 15:33) Io me e mafai o pokotia tatou i mea pelā mo ata ma‵sei, aposetasi, io me ko fakataufaiga ‵lasi i mea tau tafaoga.—Onoono ki te Fakamatalaga Fakaopoopo i te 18.

10. E mafai pefea ne tatou o ‵teke a te agaga o te lalolagi?

¹⁰ Se a la te auala e mafai ei o ‵kalo kea‵tea tatou mai te pulega a te agaga o te lalolagi? E ‵tau mo tatou o fakapili‵pili faeloa ki a Ieova kae ke takitaki tatou ne tena poto. E ‵tau mo tatou o ‵talo faeloa mō tena agaga tapu kae ke tumau i te fakalavelave faeloa i tena taviniga. A Ieova ko te ‵toe Tino malosi eiloa i te iunivesi kātoa. E tali‵tonu tatou me mafai o fesoasoani mai a ia ke ‵teke ne tatou a te agaga o te lalolagi.—1 Ioane 4:4.

KE FAKA‵MALU ATU OU TEUGA KI TE ATUA

11. Ne fakamalosi aka pefea ne te agaga o te lalolagi a te auala e teu ei a tino?

¹¹ E fakaasi atu foki ne tatou i a tatou e se ne vaega o te lalolagi e auala i ‵tou gatu mo teuga. E tokouke a tino i te lalolagi e ‵pei ki gatu ‵gali ona ko te fia lavea, gatu kolā e faka‵tupu aka ei a mafaufauga ma‵sei i nisi tino, ke fakaasi atu te ‵teke ki tuu a fenua, io me ko te fakamatamata me uke olotou sene. Nisi tino e se fia ‵saga ki olotou teuga. E mafai o filifili ne latou ke foliga lai‵lai latou. E se ‵tau eiloa mo tatou o talia ke fakamasei ‵tou filifiliga ki gatu mo teuga ne uiga penei.

12, 13. Ne a fakatakitakiga fakavae ka fesoasoani mai ki te fakaikuga o ‵tou gatu ke ‵pei?

¹² E pelā me ne tavini a Ieova, e ma‵nako tatou ke teu i se auala telā e mata ‵lei, ‵ma, mata ‵tau, kae mata onomea ki se faiga mea. E teu eiloa tatou “i te agamalu mo te mafaufau ‵lei,” ko te mea ke fakaasi atu ei i a tatou e “tavini atu mo te fakamaoni ki te Atua.”—1 Timoteo 2:9, 10; Iuta 21.

¹³ A ‵tou teuga e mafai o pokotia i ei a kilokiloga a nisi tino ki a Ieova mo ana tino. E ma‵nako eiloa tatou “ke fai a mea katoa mō te vikiga o te Atua.” (1 Kolinito 10:31) E aofia i te agamalu ko te āva ki lagonaga mo mafaufauga o nisi tino. Tela la, kafai ko filifili ne tatou a ‵tou gatu io me ko ‵tou teuga, ke masaua me i ‵tou filifiliga e pokotia i ei a nisi tino.—1 Kolinito 4:9; 2 Kolinito 6:3, 4; 7:1.

14. Ne a mea e ‵tau o mafau‵fau tatou ki ei i te filifiliga o ‵tou gatu ki fakatasiga faka-Kelisiano mo te galuega talai?

¹⁴ Se a te auala e teu ei tatou ki fakatasiga io me ko te galuega talai? E a, e fai ne tatou ke ‵saga mai a tino ki a tatou ona fua ko ‵tou teuga? E mata, e fakamasiasi ne au a nisi tino ona ko oku teuga? E mata, e mafau‵fau tatou me e seai se pisinisi a te suā tino i ‵tou teuga? (Filipi 4:5; 1 Petelu 5:6) E tonu, e ma‵nako eiloa tatou ke mata ‵lei, kae ko mea kolā e fai ke taulekaleka tatou ko uiga Kelisiano. Konei a uiga e lavea ne Ieova māfai ko kilo mai a ia ki a tatou. E fakaasi mai i ei a te tinā “tino sē lavea ko te loto . . . , telā e sili tena tāua i te kilokiloga a te Atua.”—1 Petelu 3:3, 4.

15. Kaia e se fakaasi ‵tonu mai ei ne Ieova ki a tatou a vaegā gatu e ‵pei tatou ki ei mo ‵tou teuga?

¹⁵ E seki tuku mai ne Ieova se fakasologa o tulafono ki gatu e ‵tau io me se ‵tau o pei. I lō te fai penā ne tuku mai ne ia ki a tatou a fakatakitakiga fakavae i te Tusi Tapu, kolā e mafai o fesoasoani mai ke fai a filifiliga ‵lei. (Epelu 5:14) E manako a ia ke fakavae a ‵tou fakaikuga, faitalia me ne fakaikuga ‵lasi io me fo‵liki, ki ‵tou alofa ki a ia mo nisi tino. (Faitau te Maleko 12:30, 31.) I te lalolagi kātoa, a tino o Ieova e teu i auala kese‵kese ona ko olotou tuu mo aganuu mo mea kolā e fia‵fia latou ki ei. Se mea e gali kae fakafiafia a te mea tenei.

SE KILOKILOGA PALENI KI TUPE

16. E ‵kese pefea a te kilokiloga a te lalolagi ki tupe mai te mea ne akoako mai ne Iesu? Ne a fesili e ‵tau o fesili ifo ne tatou?

¹⁶ E manako a Satani ke mafau‵fau a tino me maua ne latou te fiafia mai tupe mo kope, kae ko tavini a Ieova e iloa ne latou me e se tonu te manatu tenā. E tali‵tonu tatou ki pati a Iesu: “Faitalia te uke o mea a se tino kae e se maua mai i ei ne ia a te ola.” (Luka 12:15) A tupe e se tuku mai ne ia te fiafia tonu. E se tuku mai ne ia a taugasoa ‵tonu, te filemu tonu o te mafaufau, io me ko te ola se-gata-mai. E tonu, e manakogina ne tatou ne kope faka-te-foitino, kae e ma‵nako tatou ke fia‵fia i te olaga. Kae ne akoako mai a Iesu me ka maua ne tatou a te fiafia māfai e ‵lei te ‵tou fesokotakiga mo te Atua kae fai ne tatou a te ‵tou tapuakiga e pelā me ko te ‵toe mea tāua i ‵tou olaga. (Mataio 5:3; 6:22, fakamatalaga mai lalo) Ke fesili ifo: ‘E mata, ko maua ne au te kilokiloga a te lalolagi ki mea tau tupe? E mata, e mafaufau io me faipati faeloa au ki tupe i taimi katoa?’—Luka 6:45; 21:34-36; 2 Ioane 6.

17. Ka momea aka pefea a te ‵lei o tou olaga māfai e ‵teke atu koe ki te kilokiloga a te lalolagi ki tupe?

¹⁷ Kafai e fakatāua ne tatou a ‵tou taviniga ki a Ieova kae ‵teke atu ki te kilokiloga a te lalolagi ki tupe, ka aoga eiloa a ‵tou olaga. (Mataio 11:29, 30) Ka maua ne tatou te lagonaga lotomalie mo te filemu i te mafaufau mo te loto. (Mataio 6:31, 32; Loma 15:13) Ka se manava‵se malosi tatou ki mea faka-te-foitino. (Faitau te 1 Timoteo 6:9, 10.) Ka maua foki ne tatou a te fiafia i te tuku atu o mea ki tino. (Galuega 20:35) Kae ko te auala e ola ei tatou ka fai ei ke maua ne tatou a taimi e uke mo tino kolā e a‵lofa tatou ki ei. Ka moe ‵lei foki tatou.—Failauga 5:12.

“VAEGA KATOA O TE GATU TAU”

18. Ne a mea e taumafai a Satani o fai ki a tatou?

¹⁸ E taumafai a Satani o fakamasei a ‵tou fesokotakiga mo Ieova, tela la, e ‵tau mo tatou o fai te ‵toe mea e mafai o fai ke puipui te fesokotakiga tenā. E taua eiloa tatou ki “agaga ma‵sei.” (Efeso 6:12) E se ma‵nako a Satani mo ana temoni ke maua ne tatou a te fiafia io me ko te ola se-gata-mai. (1 Petelu 5:8) E taua mai eiloa a fili ma‵losi konei ki a tatou, kae fakatasi mo te fesoasoani o Ieova e mafai o manumalo tatou i te taua!

19. E fakamatala mai pefea i te Efeso 6:14-18 a te “gatu tau” faka-Kelisiano?

¹⁹ I aso mua, e ‵pei a sotia ki gatu tau ke puipui latou i te taua. I se auala tai ‵pau, e ‵tau o ‵pei tatou ki te “gatu tau” telā ne tuku mai ne Ieova. (Efeso 6:13) Ka puipui i ei tatou. E fai‵tau tatou ki te gatu tau tenei i te Efeso 6:14-18: “Tela la, ke tu ‵mautakitaki koutou mo te fusi o te munatonu e ‵sai i otou taugasulu, kae ‵pei ki te ufi fatafata o te amiotonu, kae pei a taka i otou vae ke toka o folafola atu te tala ‵lei o te filemu. I tafa o mea katoa konei, puke ki te talita lasi o te fakatuanaki, telā ka mafai o tamate ne koutou ki ei a matasana ‵ka a te tino masei. Ke talia foki a te puloutau o te fakaolataga, mo te pelu o te agaga, telā ko te muna a te Atua, kae mai te fakaaogaga o vaegā ‵talo mo fakatagi katoa, ke ‵talo faeloa koutou i taimi katoa i te agaga.”

20. Ne a ‵tou mea e ‵tau o fai ko te mea ke aoga te ‵tou “gatu tau” ki a tatou?

²⁰ Kafai e puli i te sotia se vaega o tena gatu tau, ka tuku faka‵sau atu i ei se vaega o tena foitino, kae tenā eiloa te koga ka taua ki ei a te fili. Kafai e ma‵nako tatou ke puipui tatou ne te ‵tou “gatu tau,” e se ‵tau eiloa o puli i a tatou se vaega e tasi o te gatu tau. E ‵tau o ‵pei faeloa tatou ki ei i taimi katoa kae ke fakatumau te ‵lei o ia. Ka tumau eiloa te ‵tou taua tenei ke oko ki te taimi ka fakaseai ei te lalolagi a Satani kae tapale kea‵tea a Satani mo ana temoni mai te lalolagi nei. (Fakaasiga 12:17; 20:1-3) Tela la, kafai ko taua atu tatou ki manakoga sē ‵lei io me ko nisi vāivāiga o tatou, ke se ‵fiu eiloa tatou!—1 Kolinito 9:27.

21. E mafai pefea o manumalo tatou i te ‵tou taua?

²¹ E se mafai o ‵teke atu tatou ki te Tiapolo i a tatou eiloa. Kae fakatasi mo te fesoasoani o Ieova, ko mafai ei ne tatou! Ko te mea ke tumau i te fakamaoni, e ‵tau o ‵talo atu tatou ki a Ieova, suke‵suke ki tena Muna, kae ‵kau fakatasi mo ‵tou taina mo tuagane. (Epelu 10:24, 25) Ka fesoasoani mai eiloa a mea konei ke tumau tatou i te fakamaoni ki te Atua kae ke toka o ‵pulu ‵tou fakatuanaki.

KE TOKA O ‵PULU TOU FAKATUANAKI

22, 23. (a) E mafai pefea o toka faeloa tatou o ‵pulu te ‵tou fakatuanaki? (e) Se a te mea ka sau‵tala tatou ki ei i te suā mataupu?

²² E ‵tau o toka tatou i taimi katoa o ‵pulu te ‵tou fakatuanaki. (Ioane 15:19) I nisi taimi, e ‵kese ‵ki eiloa te tulaga o Molimau a Ieova mai te tokoukega o tino. Ke fesili ifo ki a koe eiloa: ‘E mata, e malamalama au me kaia e ‵kese ei te motou tulaga i te mea tenei? E mata, e talitonu au me e ‵tonu eiloa a mea kolā e fai mai i te Tusi Tapu mo te tavini fakamaoni kae poto? E mata, e fakamatamata au ke fai pelā me se tokotasi o Molimau a Ieova? (Salamo 34:2; Mataio 10:32, 33) E mata, e mafai ne au o fakamatala atu oku talitonuga ki nisi tino?’—Mataio 24:45; Ioane 17:17; faitau te 1 Petelu 3:15.

²³ I taimi e uke, e manino ‵lei i a tatou a te mea e ‵tau o fai ko te mea ke ‵vae kea‵tea tatou mai te lalolagi. Kae i nisi taimi, e mafai o se mautinoa ‵lei i a tatou. E taumafai eiloa a Satani ke ‵poa ne ia tatou i auala kese‵kese. A te auala e tasi e fakaaoga ne ia ko fakafiafiaga. E mafai pefea o filifili faka‵lei ne tatou a fakafiafiaga? Ka iloilo aka ne tatou i te suā mataupu.