MANATU I TE 4

Fakatomua Faka‵lei a Tusi Fai‵tau

Mataio 22:41-45

MEA E ‵TAU O FAI: Fakatoka a mafaufau o au tino fakalogo‵logo mai mua o faitau se tusi faitau.

Fai ke iloa ne koe te pogai e faitau ei se tusi faitau. Fakatomua a tusi fai‵tau takitasi i se auala telā e fai ei ke fia fakalogo‵logo mai a tino ki te manatu tāua telā ka sae aka i te fuaiupu tenā.

Ke onoono ki te mataupu kātoa o te tusi faitau. Kafai e fakatomua ne koe se tusi faitau kae taku atu ne koe me i a ai a pati io me ko te tino ne tusi ne ia te tusi tenā, fakamautinoa aka me ‵tonu au tino konā.
Fakavae tau mataupu ki te Tusi Tapu. Kafai e faipati koe ki tino kolā e tali‵tonu ki te Atua, fai ke ‵saga tonu latou ki te Tusi Tapu me ko te Muna a te Atua, ke fakaasi atu ei me tenei eiloa te mafuaga sili o te poto.
Fakamalosi aka te fia‵fia o tino ki te tusi faitau. Fai atu se fesili telā ka tali aka i te tusi faitau, fakasae aka se fakalavelave telā ka maua te faka‵leiga ki ei i te tusi faitau, io me fai atu se fakatakitakiga telā ka fakamatala mai i se tala i te Tusi Tapu.

Mafaufau ki mea kolā ko oti ne iloa ne au tino fakalogo‵logo e uiga ki te mataupu mo te tusi faitau. Ke fakatomua se tusi faitau masani i se auala gali, ko te mea ke ‵kilo atu au tino fakalogo‵logo ki ei i se auala fakaa‵tea kae fou.