MATAUPU 52
Te Pogai e Tāua ei a ‵Tou Gatu mo Foliga
E tofu eiloa tatou mo gatu mo teuga kolā e fia‵fia tatou ki ei. Kafai e tau‵tali ki nai akoakoga fakavae mai te Tusi Tapu, ka mafai eiloa o ‵pei tatou ki gatu e ma‵nako tatou ki ei kae fakafiafia atu foki ki a Ieova. Ke na mafau‵fau tatou ki nai akoakoga konā.
1. Ne a akoakoga ka fesoasoani mai ke iloa o filifili faka‵lei ‵tou gatu mo teuga?
E ‵tau mo tatou o “‵pei ki gatu mata ‵lei, i te agamalu mo te mafaufau ‵lei,” kae ke fakatumau a te ‵ma o ‵tou foliga kolā e fakaasi atu a te ‵tou “tavini atu mo te fakamaoni ki te Atua.” (1 Timoteo 2:9, 10) Mafaufau ki akoakoga e fa konei: (1) E ‵tau o “mata ‵lei” ‵tou gatu. E pelā mo mea ne lavea ne koe i fakatasiga a te fakapotopotoga, e kese‵kese a mea e ‵gali ki tino o Ieova, kae ko ‵tou gatu mo teuga o ‵tou ulu e fakaasi atu ei a te āva ki te Atua e tapuaki tatou ki ei. (2) A te faiga o ‵tou gatu “i te agamalu,” ko tena uiga e se ‵tau o fakamalosi aka ei a mafaufauga ma‵sei, io me ko te fia lavea. (3) E fakaasi atu ne tatou a “te mafaufau ‵lei” māfai e se taumafai tatou ke maua so se gatu mo teuga ‵fou. (4) E ‵tau o fakaata atu faeloa i ‵tou foliga a te ‵tou “tavini atu mo te fakamaoni ki te Atua,” telā e iloa ei ne nisi tino me e tapuaki tatou ki te Atua tonu.—1 Kolinito 10:31.
2. E mafai pefea o pokotia ‵tou taina tali‵tonu i ‵tou teuga?
E tiga eiloa e maua ne tatou te saolotoga ki gatu e fia ‵pei tatou ki ei, e ‵tau o mafau‵fau tatou ki lagonaga o nisi tino. E taumafai malosi tatou ke mo a ma fakavāivāi atu ki se tino kae ke “fakafiafia ne tatou taki tokotasi a ‵tou tuakoi mō tena ‵lei, ke fakamalosi aka ei a ia.”—Faitau te Loma 15:1, 2.
3. E fai pefea ne ‵tou teuga ke tosina mai a nisi tino ki te tapuakiga tonu?
E tiga eiloa e fai faka‵lei ‵tou gatu i so se taimi, kae e ‵tau o ‵saga malosi atu tatou ki ‵tou teuga māfai ko ‵kau atu ki fakatasiga a te fakapotopotoga mo te galuega talai. E se ma‵nako tatou ke se fia ‵saga mai a tino ki te fekau tāua e avatu ne tatou ona ko ‵tou gatu. I lō te fai penā e mafai o fai ne ‵tou foliga ke fia‵fia a tino ki te munatonu kae “fakagaligali ne latou i feitu katoa a akoakoga a te ‵tou Fakaola.”—Tito 2:10.
KELI MALOSI IFO
Mafaufau ki auala ke fakamautinoa aka ei me i ‵tou gatu mo teuga e lavea atu me i a tatou ne Kelisiano.
E mafai o fakaasi atu i ‵tou teuga me e āva tatou ki tino pule io me ikai. E tiga eiloa e lavea ne Ieova a mea i ‵tou loto, e ‵tau foki o fakaasi atu i ‵tou teuga a te āva o tatou ki a ia
4. A teuga ‵lei e fakaasi atu ei a te āva ki a Ieova
Se a te ‵toe pogai tāua e ‵tau ei mo tatou o ‵saga tonu atu ki ‵tou teuga? Faitau te Salamo 47:2, ko sau‵tala ei ki fesili konei:
Ne a fakaikuga ki ‵tou gatu e ‵tau o fai māfai e masaua ne tatou me e pokotia i ei a te kilokiloga a nisi tino e uiga ki a Ieova?
Se a tau faka‵tau, e mata, se mea ‵lei ke mafau‵fau faka‵lei tatou ki ‵tou teuga māfai ko ‵kau atu ki fakatasiga mo te galuega talai? Kaia?
5. Auala ke filifili faka‵lei aka a gatu mo teuga
Faitalia me e ‵togi ‵mafa io me ‵togi mā‵ma ‵tou gatu, e ‵tau eiloa o ‵ma kae fetaui ‵lei ki tulaga kese‵kese. Faitau te 1 Kolinito 10:24 mo te 1 Timoteo 2:9, 10. Ka oti, ko sau‵tala ei ki pogai e ma‵nako tatou o ‵kalo keatea mai te ‵pei ki gatu . . .
palau‵lau io me se mata ‵lei
sai‵tia, āta, io me fakamalosi aka ei a mafaufauga ma‵sei
E tiga eiloa ko se ‵nofo a Kelisiano mai lalo i te Tulafono faka-Mose, kae e fakaasi mai i ei a mafaufauga o Ieova. Faitau te Teutelonome 22:5, ko sau‵tala ei ki te fesili tenei:
Kaia e se ‵tau ei mo tāgata o ‵pei ki gatu fā‵fine io me ko fāfine ke ‵pei ki gatu tā‵gata?
Faitau te 1 Kolinito 10:32, 33, mo te 1 Ioane 2:15, 16, ko sau‵tala ei ki fesili konei:
Kaia e ‵tau ei o mafau‵fau faka‵lei tatou ki lagonaga o nisi tino i te fenua io me ko te fakapotopotoga i ‵tou teuga?
Ne a vaegā gatu mo teuga masani i te koga e nofo koe i ei?
Se a tau faka‵tau, e isi ne teuga kolā e se fetaui mo se Kelisiano? Kaia?
E mafai o fakaaoga ne tatou a gatu mo teuga kese‵kese kae koi fakafiafia atu foki ki a Ieova
MEA E FAI MAI NE NISI TINO: “E pule au i te gatu e fia pei au ki ei.”
E a, e lotomalie koe ki ei? Kaia?
MANATU AOGA
Kafai e filifili faka‵lei ‵tou teuga, e fakaasi atu ei te āva o tatou ki a Ieova mo nisi tino.
Fesili
Kaia e tāua ei ki a Ieova a ‵tou gatu mo teuga?
Ne a nisi akoakoga e ‵tau o fesoasoani mai ki te faiga o ‵tou fakaikuga ki ‵tou teuga?
E pokotia pefea te kilokiloga a nisi tino ki te tapuakiga tonu i ‵tou teuga?
NISI FAKAMATALAGA
Mafaufau ki te kilokiloga a nisi tino e uiga ki a koe ona ko ou gatu.
Tauloto ki te pogai e ‵tau ei o mafaufau faka‵lei koe a koi tuai o tā tou tā‵tau.
“Ne a Pati i te Tusi Tapu e Uiga ki Tā‵tau?” (Mataupu i te neti)
Mafaufau ki nisi akoakoga kolā e mafai o fesoasoani mai ki te faiga o ‵tou fakaikuga.
Ne ati aka pefea ne se fafine loto fakamaoni se kilokiloga paleni ki filifiliga a nisi tino e uiga ki olotou teuga?
“Ne Fakavāivāi Mai ki a Au a Gatu mo Teuga” (Ala Mai!, Tesema 22, 2003)