Ne Fakamalosigina Ona ko “Galuega Fakaofoofogia a te Atua”

“Ne mafai ne latou o fai‵pati ki o‵tou gana takitokotasi, ki galuega fakaofoofogia a te Atua.”​​—⁠GALUEGA 2:​11.

I TE taeao e tasi o te muākiga, i te tausaga ko te 33 T.A., ne tupu se mea fakaofoofogia ki se potukau o tāgata mo fāfine, ko soko o Iesu Keliso kolā ne maopoopo i se fale o se tino i Ielusalema. “I mo taimi foki eiloa kona, ne lagona ne latou te ‵gulu mai luga i te lagi e pela eiloa mo se afa ko agi, tofu katoa ei te fale i te laumatagi tena. Tela, lavea ei ne latou a ulaga afi e foliga mai e pela mo ne alelo e patele mai ki a latou . . . , ‵fonu latou katoa i te Agaga Tapu, kamata eiloa latou o fai‵pati ki ‵gana valevale.”​​—⁠Galuega 2:​2-4, 15.

² Ne maopoopo se vaitino mai mua o te fale tenā. Ne aofia i ei a tino Iutaia kolā ne fa‵nau i nisi fenua mo “tino lotu” kolā ne ‵mai ki Ielusalema ke fakamanatu te aso o te Penitekoso. Ne ofo a latou katoa me ne fai‵pati eiloa a soko ki olotou ‵gana e uiga ki “galuega fakaofoofogia a te Atua.” Ne mafai pefea o tupu te mea tenā me i tino kolā e fai‵pati ne tino Kalilaia katoa?​​—⁠Galuega 2:​5-8, 11.

³ E tokotasi mai i tino Kalilaia konā ko te apositolo ko Petelu. Ne fakamatala atu ne ia me i nāi vaiaso mai mua atu i ei, ne tamate a Iesu Keliso ne tāgata sē amio‵tonu. Kae ko oti ne fakatu aka ne te Atua tena Tama mai te mate. Mai tua ifo i konā, ne fakasae atu a Iesu ki ana soko e tokouke, e aofia i ei a Petelu mo nisi tino kolā ne ‵nofo atu i konā. I aso e sefulu mai mua atu i te Penitekoso, ne fanatu a Iesu ki te lagi. Ko ia ko te tino telā ne ‵ligi ifo ne ia te agaga tapu ki luga i ana soko. E mata, e isi se uiga o te mea tenei ki tino kolā ne fakamanatu ne latou te aso o te Penitekoso? Ao, e isi. Ne fakatoka ne te mate o Iesu a te auala mō latou ke fakamagalo ei olotou agasala kae ke maua foki a “te meaalofa a te Atua ko te Agaga Tapu” māfai e fakatuanaki latou ki a ia. (Galuega 2:​22-​24, 32, 33, 38) Tela la, ne ‵saga atu pefea a tino maimoa konā ki “galuega fakaofoofogia a te Atua” kolā ne lagona ne latou? Kae e mafai pefea o fesoasoani mai te tala tenei ke iloilo aka ne tatou ‵tou taviniga ki a Ieova?

Ne Fakamalosigina ke Gasue‵sue!

⁴ I te mauaga ne soko i Ielusalema a te agaga tapu, ne kamata fakavave eiloa o takutaku atu ne latou te tala ‵lei o te fakaolataga ki nisi tino, kae ne mua o talai atu ki te vaitino telā ne maopoopo atu i te taeao tenā. Ne fakataunu mai ne te lotou galuega talai se valoaga gali, telā ne tusi ki lalo ne Ioelu, te tama tagata a Petueli, i te valu o senitenali mai mua atu o te taimi tenā: “Ka tuku atu ne au toku agaga ki a koutou katoa; a otou tama tagata mo tama fā‵fine ka takutaku atu ne latou taku fekau; a otou toeaina ka fai moemiti, ka ko otou tamataene ka oko ki a latou a fakaasiga. I te taimi tena, ka tuku atu foki ne au a toku agaga ki luga i tavini tagata mo tavini fafine . . . i mua o te taimi e oko mai ei te aso fakamataku o te Aliki.”​—⁠Ioelu 1:1; 2:​28, 29, 31; Galuega 2:​17, 18, 20.

⁵ E mata, e fakauiga i ei me ne fakatu aka ne te Atua se potukau o pelofeta, tāgata mo fāfine, ke ‵pau eiloa mo Tavita, Ioelu, mo Tepola, kae fakaaogā ne ia a latou ke ‵valo mai a mea kolā ka ‵tupu i aso mai mua? Ikai. Ka ‵valo atu a ‘tama tagata mo tama fāfine, tavini tāgata mo tavini fāfine’ me ka fakamalosi aka latou ne te agaga o Ieova ke folafola atu a “galuega fakaofoofogia a te Atua” kolā ko oti ne fai ne Ieova mo mea kolā koi fai ne ia. Tela la, e tavini atu latou e pelā me ne tino fakaoko muna mō te ‵Toe Tino Tafasili i te Maluga.a Ne pefea te kilokiloga a te vaitino ki ei?​​—⁠Epelu 1:​1, 2.

⁶ Mai tua o te lagonaga ne te vaitino a te fakamatalaga a Petelu, ne fakamalosi aka ei a te tokoukega o tino ke fai a ‵fuliga. “A te tokoukega o latou ne talitonu ki tena lauga, tela papatiso ei latou; kati e tusa mo te tolu afe a tino ne fakaopoopo ki te lotou aofaki i te aso tena.” (Galuega 2:41) Ona ko latou ne tino Iutaia mo tino mai fenua fakaa‵tea kolā ne ‵fuli ki te lotu Iutaia, ko leva ne maua ne latou se iloaga fakavae o te Tusi Tapu. Ne tuku mai ne te iloaga tenā fakatasi mo mea ne tauloto ne latou mai i a Petelu, a te fakavae mō latou ke papatiso “i te igoa o te Tamana, te Tama mo te Agaga Tapu.” (Mataio 28:19) Mai tua o te lotou papatisoga, “ne fakaaoga ne latou olotou taimi o tauloto mai i apositolo.” I konā foki eiloa, ne kamata ei o takutaku atu ne latou te lotou talitonuga fou ki nisi tino. A te ‵tonuga loa, “e potopoto sale eiloa i te Fale Tapu, . . . kae fai vikiga foki ki te Atua. Se gata foki i kona kae fakatau fia‵fia foki i te a‵lofa atu o tino ki a latou.” Ona ko te molimauatuga tenei, “e fakaopoopo faeloa ne te Aliki ki te lotou potukau ne tino fou kola ko fakaolagina.” (Galuega 2:​42, 46, 47) Ne faka‵tu fakavave aka a fakapotopotoga Kelisiano i fenua e uke kolā ne ‵nofo i ei a tino tali‵tonu ‵fou konei. E seai se fakalotolotolua me ne gasolo aka te aofaki tenei ona ko olotou taumafaiga loto finafinau ke talai atu te “tala ‵lei” i te taimi ne ‵foki atu ei ki olotou fenua.​​—⁠Kolose 1:​23.

E ‵Mana te Muna a te Atua

⁷ Ne a mea e ‵tau o fai ne tino kolā e ma‵nako ke fai latou mo fai ne tavini a te Atua i aso nei? E ‵tau foki o sukesuke faka‵lei latou ki te Muna a te Atua. Kafai e fai latou penā, ko kamata ei o iloa ne latou a Ieova e pelā me ko te Atua telā e “fonu i te alofa mo te kaimalie, e tuai o ita kae lasi tena alofa mo tena fakamaoni.” (Esoto 34;6; Galuega 13:48) Ne iloa foki ne latou a te fakatokaga alofa a Ieova, ko te taulaga e auala i a Iesu Keliso, telā e mafai ei ne tena toto telā ne fakamaligi o faka‵mā latou mai i agasala katoa. (1 Ioane 1:⁠7) Ne fia‵fia foki latou ke iloa atu te fuafuaga a te Atua ke ‘faka‵tu mai katoa mai te mate a tino ‵lei mo tino se ‵lei.’ (Galuega 24:15) A te alofa ki te Māfuaga o “galuega fakaofoofogia” konei e fakafiafia kae e fakamalosi aka foki ei latou ke talai atu a muna‵tonu tāua konei. Ko fai ei latou mo fai ne tavini tukugina atu kae papatiso a te Atua kae tumau i te “‵tupu ake foki . . . i te iloa ‵lei o te Atua.”b​​—⁠Kolose 1:​10e; 2 Kolinito 5:​14.

⁸ A te iloaga telā e maua ne tavini a te Atua mai te faiga o se akoga faka-te-Tusi Tapu e se gata fua i te mauaga o te poto. E fakamalosi aka ne te vaegā iloaga penā olotou loto, e ‵fuli ei olotou vaegā mafaufauga, kae e fai foki pelā me se vaega o olotou olaga. (Epelu 4:12) E pelā mo te fafine e igoa ki a Kemila, ne galue i te tausiga o tino ma‵tua. E tokotasi mai i tino kolā ne tausi ne ia, ko Maleta, se Molimau a Ieova. Ona ko te mea ne pokotia malosi a Maleta i te valevale matua, ne ‵tau o onoono faka‵lei atu faeloa ki a ia. Ne ‵tau o fakamasaua atu ki a ia ke kai, ke oko foki eiloa ki te fologa o ana meakai. Kae nei la ka fakamatala atu te mea e tasi e se mafai o puli i a Maleta.

⁹ I te aso e tasi, ne lavea ne Maleta a Kemila e tagi ona ko te loto māfatia i nisi o ana fakalavelave totino. Ne ‵sai atu a Maleta ki a Kemila kae ne ‵kami atu tou fafine ke suke‵suke fakatasi laua ki te Tusi Tapu. Kae e mata, ne mafai ne Maleta o fai se akoga faka-te-Tusi Tapu? Ao, ne mafai ne ia! E tiga eiloa ko puli sāle i a ia a nisi mea, ne seki puli i a Maleta a galuega fakaofoofogia a te Atua mo muna‵tonu tāua kolā ne tauloto ne ia mai te Tusi Tapu. I te faiga o te akoga, ne fakatonu atu a Maleta ki a Kemila ke faitau ki palakalafa takitasi, ke ‵suke ki tusi siki kolā e se siki mai a pati i ei, ke faitau ki te fesili i te fakaotiga o te itulau, kae ke tali mai foki ne ia. Ne tai leva eiloa te taimi ne fai sāle ei a te faifaiga tenei, kae faitalia eiloa te masaki o Maleta, ne gasolo atu ki mua te iloaga o Kemila i te Tusi Tapu. Ne iloa ne Maleta me e ‵tau o kau atu a Kemila ki nisi tino kolā ne fia‵fia o tavini atu ki te Atua. Ona ko te mea tenā, ne tuku atu ei ne tou fafine se gatu mo ne taka ke fakaaogā ne Kemila māfai e kau atu a ia ki te fakatasiga muamua eiloa i te Kingdom Hall.

¹⁰ Ne fakamalosigina a Kemila ne te fiafia, te fakaakoakoga, mo te loto talitonu o Maleta. Ne taku ‵tonu mai tou fafine me i mea kolā ne taumafai a Maleta o akoako atu ki a ia mai te Tusi Tapu ne tāua ‵ki eiloa, ona ko te mea toeitiiti ko puli atu i a Maleta a mea katoa, kae vaganā ko mea kolā ne tauloto ne ia mai te Tusi Tapu. Fakamuli ifo, i te taimi ne fano ei a Kemila o galue i te suā koga, ne iloa aka ei ne tou fafine me ko oko atu ki te taimi e ‵tau ei o gasuesue a ia. I te avanoaga muamua loa, ne fanatu tou fafine ki te Kingdom Hall, kae ne pei a ia ki te gatu mo taka kolā ne tuku atu ne Maleta ki a ia, kae fakamolemole atu ke fai sena akoga faka-te-Tusi Tapu. Ne gasolo atu ki mua a Kemila kae ne papatiso ei a ia.

Ne Fakamalosigina ke Tau‵tali ki Tulafono a Ieova

¹¹ I aso nei, e silia atu i te ono miliona o Molimau a Ieova kolā e talai atu te “Tala ‵Lei e uiga ki te Malo” i te lalolagi kātoa, e pelā mo Maleta mo Kemila. (Mataio 24:14; 28:​19, 20) Ne fakamalosigina latou ne “galuega fakaofoofogia a te Atua,” e pelā mo Kelisiano i aso o te kau apositolo. Ko oko eiloa te lotou fia‵fia me ne taulia latou ke tauave te igoa o Ieova kae ne ‵ligi atu foki tena agaga ki luga i a latou. Tela la, ne taumafai malosi latou “ke takitaki se olaga e aoga mō te Aliki, e fonu i mea e fakafiafia ki a ia,” mai te fakagaluegāga o ana tulafono i feitu katoa o olotou olaga. E aofia i nisi tulafono konā ko te fakalogo ki tulafono a te Atua i mea tau gatu mo teuga.​​—⁠Kolose 1:​10a; Titus 2:​10.

¹² E tonu, ko oti ne tuku mai ne Ieova a tulafono e uiga ki ‵tou teuga. Ne fakaasi mai ne te apositolo ko Paulo a nisi mea kolā e ‵tau o fai i te feitu tenei. “Au e manako foki ki fafine ke teuteu faka‵lei, kae ke mafaufau faka‵lei ki feitu e uiga ki gatu e pei ei latou, ka ke fai faka‵lei eiloa olotou gatu. Ke se teu fakagaligali olotou ulu, io me fakamau ne teuga aulo, io me ne teuga penina, io me fakaaoga ne gatu ‵togi ‵mafa, ka ke teu olotou foitino ki te amio ‵lei, tena te teuga tonu tela e mafai o takua ei latou me ne fafine ‵lotu.”c Ne a mea e tau‵loto ne tatou mai i pati konei?​​—⁠1 Timoteo 2:​9, 10.

¹³ E fakaasi mai ne pati a Paulo me e ‵tau o “teuteu faka‵lei” a Kelisiano. E se ‵tau o mata pulai‵lai kae fulula‵lala latou. E mafai ne tino katoa, ke oko foki eiloa ki tino ma‵tiva o fakafetaui aka ki tulafono ‵lei penā mai te faiga ke ‵mā kae ‵lei olotou gatu. I tausaga katoa, e sa‵sale atu a nisi Molimau i te fenua e tasi o Amelika ki Saute i se fia o maila i te togāvao kae faima‵laga atu i te fia o itula i paopao ko te mea ke ‵kau atu ki te lotou fono lasi. E masani sāle o tō atu se tino ki loto i te vaitafe io me e masae‵sae ana gatu māfai ko faimalaga atu i loto i te togāvao. Tela la, kafai ko oko atu latou ki te koga e fai ei te fono, ko mata pulai‵lai aka eiloa latou. I konā, e fakaaogā faka‵lei ne latou a te taimi ke faka‵mau faka‵lei a pate, fai faka‵lei a sipi, ‵ta kae auli faka‵lei a gatu kolā ka ‵pei ei latou ki te fono. E fakatāua ne latou te lotou ‵kamiga ke ‵kai i te taipola a Ieova, kae e ma‵nako foki ke fai faka‵lei olotou gatu.

¹⁴ Ne toe taku mai ne Paulo me e ‵tau o “mafaufau faka‵lei ki feitu e uiga ki gatu e ‵pei ei” tatou. E fakauiga i ei me e se ‵tau o fakaaogā ne tatou a vaegā teuga fakapogi‵pogi, teuga fai fakaa‵tea, teuga kolā e fakamalosi aka ei a manakoga ma‵sei, teuga kolā e tuku faka‵sau atu ei a vaega o ‵tou foitino, io me ko teuga kolā e fakaakoako atu ei ki tino o te lalolagi. E se gata i ei, e ‵tau o fai ‵tou teuga i se auala telā e takua ei tatou e pelā me ne tino ‘‵lotu.’ E tuku mai i ei se mea ke mafaufau faka‵lei tatou ki ei, i ne? E se ko te faiga fua ke fai faka‵lei ‵tou gatu māfai ko ‵kau atu tatou ki fakatasiga a te fakapotopotoga kae e se ‵saga atu ki ei i nisi taimi. E ‵tau faeloa o mata ‵malu kae fakaaloalogina ‵tou teuga, ona ko te mea e fai tatou mo fai ne Kelisiano mo faifeau i te 24 itula i te aso. E malama‵lama tatou me e ‵tau o fetaui ‵lei ‵tou gatu ga‵lue mo gatu a‵koga mō te galuega telā ka fai ne tatou. E tiga eiloa te feitu tenā, e ‵tau o fai ‵tou teuga ke fakaasi atu i ei te loto maulalo mo te āva ki nisi tino. Kafai e fakaasi atu faeloa i ‵tou gatu me e tali‵tonu tatou ki te Atua, ka se mafai lele eiloa o ‵kalo keatea tatou mai te talai atu i so se taimi ona ko te mā i ‵tou teuga.​​—⁠1 Petelu 3:​15.

“Sa Tuku Otou Loto ki te Lalolagi”

¹⁵ E tuku mai ne pati fakatonutonu i te 1 Ioane 2:⁠15, a fakatakitakiga i te faiga o ‵tou filifiliga ki gatu mo teuga. E fai‵tau tatou, penei: “Sa tuku otou loto ki te lalolagi io me ko so se mea faka te lalolagi. Kafai e a‵lofa koutou ki te lalolagi, ko tona uiga e se a‵lofa koutou ki te Tamana tela e i loto i a koutou. Konei katoa a mea e taku ko mea faka te lalolagi: ko manakoga agasala, ko mea e matea ne tino kae ma‵nako ki ei, mo mea katoa i te lalolagi nei kola e fakamata‵mata ki ei a tino. E seai eiloa se mea o mea konei e mafua mai i te Tamana; e mafua katoa mai i te lalolagi.”

¹⁶ Ko oko eiloa i te fetaui ‵lei o pati fakatonutonu konā! I se vaitaimi telā ko silia valevale ei a fakamalosiga ma‵sei mai taugasoa, e se ‵tau lele eiloa o talia ne tatou te lalolagi ke takitaki tatou i te faiga o ‵tou filifiliga ki gatu. Ko gasolo eiloa o matagā a gatu mo teuga i tausaga fakamuli nei. Ke oko foki ki tino faipisinisi ko se fai sāle ne latou olotou teuga kolā e fetaui ‵lei mo te tulaga o Kelisiano. Tenei eiloa te suā pogai e ‵tau mo tatou o masaua faeloa te manatu ke “se amio fakatasi mo te lalolagi nei” māfai e fia ola tatou e ‵tusa mo tulaga o te Atua kae ke “tavaea akoakoga a te Atua te tou Fakaola i [‵tou] mea katoa e fai.”​​—⁠Loma 12:2; Tito 2:⁠10.

¹⁷ A koi tuai o ‵togi ne koe se gatu, se mea ‵lei ke fesili ifo ki a koe eiloa, penei: ‘Kaia e gali ei ki a au te gatu tenei? E mata, e isi se tino lauiloa i mea tau fakafiafiaga e pei sāle ki vaegā gatu penei—⁠se tino telā e gali ki a au? E mata, e isi se potukau masei telā e fakamalosi aka ne latou a te uiga fia tu tokotasi mo te ‵teke atu kae ‵pei sāle ki vaegā gatu penei?’ E ‵tau foki o onoono faka‵lei koe ki te gatu e fia ‵togi ne koe. Kafai se gatu io me se laulavalava, e a, e ‵lei te ‵loa? E a, e ofi ‵lei? E mata, e ‵lei, e fetaui ‵lei, kae mata ‵malu te gatu tenā, io me ko tō mata sai‵tia kae fakamalosi aka ei a manakoga ma‵sei io me e seki fai faka‵lei? Fesili ifo ki a koe eiloa, penei, ‘E mata, ka fakavāivāi ne au a nisi tino ona ko toku pei ki te gatu tenei?’ (2 Kolinito 6:​3, 4) Kaia e ‵tau ei o mafaufau ‵mafa tatou ki te mea tenā? Me e fai mai te Tusi Tapu, penei: “Me i a Keliso e seki fakafiafia ki a ia eiloa.” (Loma 15:⁠3) E ‵tau o onoono faka‵lei a ulu o kāiga ki teuga o tino taki tokotasi i olotou kāiga. Ona ko te āva ki te Atua ‵malu telā e tapuaki atu latou ki ei, e ‵tau o tuku fakavave atu ne ulu o kāiga a polopolokiga ‵lei kae a‵lofa māfai ko ‵tau o fai penā.​​—⁠Iakopo 3:​13.

¹⁸ A te fekau telā e tauave ne tatou ne maua mai i a Ieova, ko te ‵toe tino maluga eiloa kae tapu. (Isaia 6:⁠3) E fakamalosi mai foki te Tusi Tapu ki a tatou ke fakaakoako atu ki a ia e pelā me ko ana “fanau atafai.” (Efeso 5:⁠1) E mafai o taku ‵lei io me taku fakamasei ‵tou Tamana faka-te-lagi ne ‵tou gatu mo teuga. E mautinoa eiloa me e ma‵nako tatou o fakafiafia tena loto!​​—⁠Faataoto 27:⁠11.

¹⁹ E pefea ou lagonaga ki “galuega fakaofoofogia a te Atua” kolā ko oti ne tauloto ne koe? Ko oko eiloa te ‵tou manuia me ne tauloto tatou ki te munatonu! Ona ko te ‵tou fakatuanaki ki te toto telā ne fakamaligi ne Iesu Keliso, e fakamagalogina ei ‵tou agasala. (Galuega 2:​38) Ne iku atu ei ki te mauaga ne tatou o se tulaga ‵mā i mua o te Atua. Ko se ma‵taku tatou ki te mate e pelā mo tino kolā e seai se lotou fakamoemoega. I lō te fai penā, e fakatalitonu mai a Iesu me i se aso e tasi, ka “lagona ei a tena leo ne latou katoa kola e i loto i tanuga, kae ka ulu mai ei latou ki tua.” (Ioane 5:​28, 29) Ko oko eiloa i te atafai o Ieova ke fakaasi mai ne ia a mea katoa konei ki a tatou. E se gata i ei, ko oti ne ‵ligi mai ne ia tena agaga ki luga i a tatou. Tela la, e ‵tau o fakamalosi aka tatou ne te loto fakafetai ki meaalofa ‵lei katoa konei ke āva tatou ki ana tulafono ma‵luga kae tavae atu ki a ia mo te loto finafinau, mai te folafolaatuga o “galuega fakaofoofogia” konei ki nisi tino.

[Fakamatalaga mai lalo]

Ka Tali Mai Pefea ne Koe?

• Ne a “galuega fakaofoofogia” ne lagona ne tino i te aso o te Penitekoso i te 33 T.A., kae ne ‵saga atu pefea a latou ki ei?

• E fai pefea se tino mo fai se soko o Iesu Keliso, kae ne a mea e aofia i te faiga e pelā me se soko?

• Kaia e tāua ei ke onoono faka‵lei ki ‵tou gatu mo teuga?

• Ne a mea e ‵tau o mafau‵fau faka‵lei ki ei i te filifiliga o se gatu io me se vaegā teuga telā e fetaui ‵lei?

[Fesili mo te Sukesukega]

1, 2. Se a te mea fakaofoofogia ne tupu i Ielusalema i te Penitekoso i te 33 T.A.?

3. Se a te fekau telā ne fakaasi atu ne te apositolo ko Petelu ki te vaitino i te Penitekoso?

4. Se a te valoaga a Ioelu telā ne fakataunu i te aso o te Penitekoso i te 33 T.A.?

5. Se a te auala ne ‵valo atu ei a Kelisiano i aso o te kau apositolo? (Ke onoono ki te fakamatalaga mai lalo o te palakalafa tenei.)

6. Ona ko te lagonaga ne latou a te lauga a Petelu, ne a mea ne fakamalosi aka ei a tino e tokouke i te vaitino ke fai?

7. (a) Ne a mea e fai ei a tino mai fenua katoa ke ua‵lolo atu ki te fakapotopotoga a Ieova i aso nei? (e) Se a tau fakatau e uiga ki te fakamoemoega ke fakaopoopo mai a nisi tino ki te fakapotopotoga a Ieova i te lalolagi kātoa mo te ‵tou atufenua eiloa? (Ke onoono ki te fakamatalaga mai lalo o te palakalafa tenei.)

8-10. (a) Ne fakamaoni mai pefea ne te tala o se fafine Kelisiano e tokotasi me e “‵mana” te Muna a te Atua? (e) Se a te mea e fakaasi mai ne te tala tenei e uiga ki a Ieova mo ana faifaiga ki ana tavini? (Esoto 4:​12)

11. I tafa o te loto finafinau i te galuega talai, e mafai pefea o fakaasi atu me e fakamalosigina tatou ne te fekau o te Malo?

12. Ne a nisi pati fakatonutonu e uiga ki gatu mo teuga e maua ne tatou i te 1 Timoteo 2:​9, 10?

13. (a) Se a te uiga ke “teuteu faka‵lei”? (e) Kaia e mafai ei o fai atu tatou me e se tō faiga‵ta a tulafono a Ieova ke tau‵tali atu ki ei?

14. (a) Se a te uiga ke “mafaufau faka‵lei ki feitu e uiga ki gatu e ‵pei ei”? (e) Ne a mea e aofia i te faiga o ‵tou gatu e pelā me ne “tino lotu”?

15, 16. (a) Kaia e tāua ei ke ‵kalo keatea mai te fakaakoako atu ki gatu mo teuga o te lalolagi? (1 Ioane 5:19) (e) Se a te pogai aogā e ‵tau ei o ‵kalo keatea mai vaegā gatu mo teuga fai fakaa‵tea?

17. (a) Ne a fesili e ‵tau o ‵sili ifo ne tatou māfai ko ‵togi a laugatu io me ko filifili aka ki se teuga? (e) Kaia e ‵tau ei o onoono faka‵lei a ulu o kāiga ki teuga o tino i te kāiga?

18. Ne a kilokiloga e ‵tau o onoono faka‵lei koe ki ei i ou gatu mo ou teuga?

19. Ne a mea aogā e maua mai te fakasalalauatuga o “galuega fakaofoofogia a te Atua” ki nisi tino?

[Ata i te itulau e 31]

E mata, e taku‵leia ne ou teuga totino a te Atua telā e tapuaki atu koe ki ei?

[Ata i te itulau e 32]

E ‵tau o onoono faka‵lei a mātua Kelisiano ki teuga o tino taki tokotasi i te kāiga