‘Aumai Tou Mainaga e te Atua’

“Aumai tou mainaga mo tau muna tonu; ke takitaki ki a au.”​—⁠SALAMO 43:⁠3.

1. E fakaasi mai pefea ne Ieova ana fuafuaga?

E ATAFAI mai eiloa a Ieova me e fakailoa mai ne ia ana fuafuaga ki ana tavini. E se faka‵pula fakavave mai ne ia te munatonu kātoa i te taimi e tasi me e faka‵segi fua ei a tino. Kae e fakamaina malielie mai ne ia te mainaga ki a tatou. Kāti e mafai o fakatusa te ‵tou malaga i te olaga nei ki se tino telā e sasale atu i se auala loa. E kamata a ia i te vaveao, kae e se uke a mea e matea ne ia. Ko gasolo o fanaka te la, kae ko kamata o mate mai ne te tino sasale a nisi mea i ana tafa. Kae e tai ‵kefu a nisi mea. Kae koi fanaka eiloa te la, e momea aka foki te ‵mao e mafai o matea ei ne ia a mea. E penā foki loa te mainaga faka-te-agaga telā e tuku mai ne te Atua. E talia sāle ne ia ke maina tatou i nāi mea i se taimi e tasi. Ne tuku mai foki ne te Tama a te Atua, ko Iesu Keliso, a mainaga faka-te-agaga i se auala eiloa penā. Ke na mafau‵fau malie tatou ki te auala ne fai ei ne Ieova ke maina ana tino i aso mua, mo tena faiga foki i aso nei.

2. Ne tuku mai pefea ne Ieova a mainaga i te vaitaimi mai mua o te kau Kelisiano?

² Kāti ne ‵fatu ne tama a Kola a te mataupu e 43 o te Salamo. Me i a latou ne tino Levi, ne taulia latou ke akoako atu te Tulafono a te Atua ki tino. (Malaki 2:⁠7) E tonu, a Ieova ko te lotou Faiakoga Tafasili i te Maluga, kae ne fakalago‵lago atu latou ki a ia e pelā me ko te Māfuaga o poto katoa. (Isaia 30:20) Ne ‵talo atu penei te faisalamo: “Te Atua, . . . aumai tou mainaga mo tau muna tonu; ke takitaki ki a au.” (Salamo 43:​1, 3) A koi fakamaoni te kau Isalaelu ki a Ieova, kae ne akoako atu a ia ki a latou e uiga ki ana auala. I te fia selau tausaga mai tua ifo i ei, ne talia ne Ieova ke maua ne latou se mainaga fakaofoofogia o te munatonu. Ne fai penā i te taimi ne uga mai ei ne te Atua a tena Tama, ki te lalolagi nei.

3. Ne tofotofogina pefea te kau Iutaia ona ko akoakoga a Iesu?

³ I te taimi ne fai ei a Iesu Keliso, te Tama a te Atua, mo fai se tino, ne fai foki a ia mo fai “te mainaga o te lalolagi.” (Ioane 8:12) “E uke a mea ne fai atu ne ia ki a latou i tala fakatusa”​—⁠ko mea ‵fou. (Maleko 4:⁠2) Ne fai atu a ia penei ki a Ponitio Pilato: “E se mai te lalolagi nei a toku malo.” (Ioane 18:36) A te mea tenā se manatu fou ki se tino Loma, penā foki loa mo tino Iutaia loto fenua kolā ne tali‵tonu me ka fakatakavale ne te Mesia a te Emupaea o Loma kae toe fakafoki atu Isalaelu ki tena ‵malu mua. Ne fakaasi mai ne Iesu te mainaga mai i tena Tamana, kae ne seki fia‵fia a takitaki Iutaia ki ana pati, me i a “latou . . . e ma‵nako ki tavaega mai tino, i lo tavaega mai te Atua.” (Ioane 12:​42, 43) Ne filifili ne te tokoukega o tino ke puke mautakitaki ki tuu a tino i lō te talia mai ne latou te mainaga faka-te-agaga mo munatonu mai te Atua.​—⁠Salamo 43:3; Mataio 13:⁠15.

4. E iloa pefea ne tatou me ka tupu‵tupu aka faeloa a soko o Iesu i te malamalama?

⁴ Kae e isi ne nāi tāgata mo fāfine loto fakamaoni kolā ne talia ne latou mo te fiafia te munatonu telā ne akoako atu ne Iesu. Ne gasolo o malamalama latou i fuafuaga a te Atua. I te taimi ko pili ei o palele atu te olaga o te lotou Faiakoga i te lalolagi nei, koi uke a mea seki iloa ne latou. Muna a Iesu ki a latou: “E uke a mea koi fia faipati ne au ki a koutou, kae se mafai nei ne koutou o tauloto i otou mafaufau.” (Ioane 16:12) E tonu, ne ‵tau o tuputupu aka faeloa te kau soko i te malamalama e uiga ki te munatonu a te Atua.

E Fakamaina Mai Faeloa te Mainaga

5. Se a te fesili telā ne sae mai i te senitenali muamua, kae ko oi ne pānaki mo latou te tiute ke tali aka te fesili tenā?

⁵ Ko oti ne mate a Iesu kae ne toetu mai, kae ne momea aka te fakamaina mai o te mainaga. I se fakaasiga telā ne avatu ki a Petelu, ne fakaasi atu ne Ieova me mai i te taimi tenā e mafai ei o fai a tino mai fenua fakaa‵tea kolā ne seki pilitome mo fai ne soko o Keliso. (Galuega 10:​9-17) Mā‵faga o fakaasiga! Kae ne sae aka fakamuli se fesili: E mata, ne manako a Ieova ke pilitome a tino konā mai fenua fakaa‵tea māfai ko oti ne fai latou mo fai ne Kelisiano? Ne seki tali mai te fesili tenā i te fakaasiga tenā, kae ne kamata o kinau sāle a Kelisiano e uiga ki te mataupu tenā. Ne fakaiku aka te mea tenā, i te mea ma fakamakosu ei te lotou loto tasi telā e tāua ‵ki. I Ielusalema “ne fono fakatasi [ei] apositolo mo toeaina o mafaufau ki te mataupu tena.”​—⁠Galuega 15:​1, 2, 6.

6. Se a te faiga telā ne fai ne te kau apositolo mo toeaina i te taimi ne mafau‵fau ei latou ki te fesili e uiga ki te pilitome?

⁶ Ne mafai pefea ne tino kolā ne ‵nofo atu i te maopoopoga tenā o iloa te loto o te Atua e uiga ki tino tali‵tonu mai fenua fakaa‵tea? Ne seki uga atu ne Ieova se agelu ke takitaki ne ia te faiga o te sautalaga, kae ne seki avatu foki ne ia se fakaasiga ki a latou. Ne seki fai pelā me ne tuku tiaki fua a apositolo mo toeaina konā e aunoa mo se takitakiga. Ne fakalogo‵logo latou ki tala a nisi Kelisiano Iutaia kolā ne matea tonu atu ne latou a faifaiga a te Atua ki tino o fenua fakaa‵tea, i te ‵ligiifoga ne ia o te agaga tapu ki luga i tino o fenua fakaa‵tea kolā ne seki pilitome. Ne suke‵suke foki latou ki te Tusi Tapu ke maua ei se takitakiga. Ona ko te mea tenā, ne avatu ei se manatu ne fakavae ki se tusi siki telā e maua i ei se mainaga. A koi mafau‵fau latou ki fakamaoniga konā, kae ne gasolo o manino ‵lei te loto o te Atua. Ne seki ‵tau o pilitome a tino o fenua fakaa‵tea ke fiafia ei a Ieova ki a latou. Ne tusi fakavave ki lalo ne apositolo mo toeaina a te fakaikuga tenā ko te mea ke tau‵tali atu ki ei olotou taina Kelisiano.​—⁠Galuega 15:​12-29; 16:⁠4.

7. Ne gasolo atu pefea ki mua te kau Kelisiano i te senitenali muamua?

⁷ E se pelā mo takitaki lotu Iutaia kolā ne ‵piki mau ki tuu mo aganuu a olotou tamana mua, ne fia‵fia eiloa te tokoukega o Kelisiano Iutaia ke maua ne latou te mainaga fou kae fakaofoofogia tenā e uiga ki fuafuaga a te Atua ki tino o fenua fakaa‵tea, faitalia me ne ‵tau o ‵fuli i ei olotou kilokiloga ki tino valevale mai fenua fakaa‵tea. Ne fakamanuia atu a Ieova ki te lotou loto maulalo. “Tela la, ko ‵tupu ake o ma‵losi a ekalesia i te fakatuanaki, ka ko tokouke foki tino ko fakaopoopo ki ei i aso takitasi.”​—⁠Galuega 15:31; 16:⁠5.

8. (a) E iloa pefea ne tatou me e ‵tau o maua a nisi mainaga ‵fou mai tua ifo o te fakaotiga o te senitenali muamua? (e) Ne a fesili aogā ka mafau‵fau tatou ki ei?

⁸ Ne maina mai faeloa te mainaga faka-te-agaga i te senitenali muamua. Kae ne seki fakaasi faka‵sau atu ne Ieova a vaega katoa o ana fuafuaga ki Kelisiano mua konā. Ne fai atu penei te apositolo ko Paulo ki ana taina tali‵tonu: “Kafai e ‵kilo tatou ki te kilo, e matea ne tatou me ‵kefu o‵tou foliga. . . . E se lava te tou iloa o mea katoa.” (1 Kolinito 13:12) Ne seki manino ‵lei a foliga o tino i vaegā kilo konā. Tela la, i te kamataga ne seki manino ‵lei te malamalama e uiga ki te mainaga faka-te-agaga. Ko oti ne ‵mate atu te kau apositolo, kae ne gasolo o sē maina ‵lei te mainaga i se taimi, kae i tausaga fakamuli nei ko lausa valevale te iloaga e uiga ki te Tusi Tapu. (Tanielu 12:⁠4) E fakamaina atu pefea a Ieova ki ana tino i aso nei? Kae ne a ‵tou mea e ‵tau o fai māfai ko fakalauefa atu ne ia te ‵tou malamalama e uiga ki te Tusi Tapu?

Ko Gasolo o Maina Malosi Mai te Mainaga

9. Se a te faiga ‵kese kae aogā telā ne fakaaogā ne Tino A‵koga mua i te Tusi Tapu i olotou sukesukega ki te Tusi Tapu?

⁹ I aso nei, a te tamā mainaga muamua ne kamata o fakamaina mai i te vaitaimi tenei i te ‵toe vaega o te 19 senitenali i te taimi ne kamata ei se potukau o tāgata mo fāfine Kelisiano o suke‵suke malosi ki te Tusi Tapu. Ne fai ne latou se faiga aogā i olotou sukesukega ki te Tusi Tapu. Ne fakasae sāle aka ne se tino se fesili; kae ne suke‵suke te potukau tenā ki tusi siki katoa kolā e faipati e uiga ki te mataupu tenā. Kafai ne foliga mai pelā me e se fetaui ‵lei te suā fuaiupu mo te suā fuaiupu, ne taumafai eiloa a Kelisiano fakamaoni konā o fakafetaui aka te avā fuaiupu. E se pelā mo takitaki lotu i aso konā, a te Kau A‵koga i te Tusi Tapu (ko te igoa o Molimau a Ieova i aso konā) ne fatuaki olotou loto ke takitaki latou ne te Tusi Tapu kae e se ko tuu mo aganuu, penā foki loa mo akoakoga a tino. Kafai ko oti ne suke‵suke latou ki fakamaoniga katoa kolā e mafai o maua mai te Tusi Tapu, ne tusi ne latou ki lalo a mea kolā ne fakaiku aka ne latou i ei. I te auala eiloa tenā ne fakamanino aka ei te lotou malamalama e uiga ki akoakoga fakavae e uke i te Tusi Tapu.

10. Ne a tusi aogā kolā e fakamatala ei te Tusi Tapu kae ne tusi ne Siale Tase Lasalo?

¹⁰ Ne tu ‵kese te tino Akoga i te Tusi Tapu ko Siale Tase Lasalo. Ne tusi ne ia se fakasologa o tusi e ono ke fesoasoani atu ki te sukesukega ki te Tusi Tapu ko te Studies in the Scriptures. Ne fakamoemoe te taina ko Lasalo ke tusi ne ia te fitu o tusi, ke fakamatala mai ei te tusi ko Esekielu mo te Fakaasiga. Ana muna: “Kafai ko maua ne au te kī, ka tusi ei ne au te Fitu o Tusi.” Kae ne toe fai mai foki a ia: “Kafai e avatu ne te Aliki te kī tenā ki se isi tino, ka tusi ne ia te tusi tenā.”

11. E pefea te tāua o taimi ki te ‵tou malamalama i fuafuaga a te Atua?

¹¹ A te fakamatalaga tenā a S. T. Lasalo e fakaasi mai i ei se manatu tāua e uiga ki te ‵tou malamalama i nisi vaega o te Tusi Tapu​—⁠ ko te taimi tonu e ‵tau ei o malamalama. Ne iloa ne te taina ko Lasalo me e se mafai ne ia o faimālō te mainaga ke fakamaina mai e uiga ki te tusi ko Fakaasiga e pelā mo te sē mafai ne se tino sasale o fakasae aka te mata o te la a koi tuai o oko atu ki tena taimi tonu.

E Fakaasi Mai​—⁠I te Taimi Tonu o te Atua

12. (a) Se a te ‵toe taimi ‵lei ke maina ei i se valoaga i te Tusi Tapu? (e) Se a te tala telā e fakaasi mai i ei me e fakalagolago atu te ‵tou malamalama i valoaga a te Tusi Tapu ki te fakasologa o taimi o te Atua? (Ke onoono ki te fakamatalaga i lalo.)

¹² E pelā mo te fatoā malamalama o te kau apositolo i te lasiga o valoaga e uiga ki te Mesia i te taimi ko oti ei ne mate kae ne toetu aka a Iesu, e fatoā maina katoatoa a Kelisiano i aso nei i valoaga a te Tusi Tapu māfai ko oti ne fakataunu mai a mea konā. (Luka 24:​15, 27; Galuega 1:​15-21; 4:​26, 27) A te Fakaasiga se tusi o valoaga, telā e ‵tau ei o maina ‵lei tatou i ei māfai ko oti ne ‵tupu a mea kolā e fakamatala mai i ei. E pelā me se mea e tasi, e se mafai o maina ‵lei a S. T. Lasalo i te uiga tonu o te manu fekai lanu ‵kula telā e fakamatala mai i te Fakaasiga 17:​9-11, me ne fatoā ‵sae aka a fakapotopotoga kolā ne fakaatagina ne te manu tenā, ko Malo Kau Fakatasi mo Malo ‵Soko, i te taimi ko oti ei ne mate a ia.a

13. Se a te mea e tupu sāle māfai e maua se mainaga fou e uiga ki se mataupu i te Tusi Tapu?

¹³ I te taimi ne iloa ei ne Kelisiano mua me e mafai ne tino sē pilitome mai fenua fakaa‵tea o fai mo fai ne olotou taina tali‵tonu, ne sae mai i ei se fesili ona ko te ‵fuliga tenā me e ‵tau o pilitome a tino o fenua konā me ikai. Ne toe suke‵suke i ei a apositolo mo toeaina ki te fakamatalaga kātoa e uiga ki te pilitome. Tenā loa te ata e tau‵tali tatou ki ei i aso nei. Kafai e faka‵pula malosi mai te mainaga e uiga ki se mataupu e tasi i te Tusi Tapu, i nisi taimi e toe suke‵suke ei a tavini fakaekegina a te Atua, ko “te tavini fakamaoni kae poto,” ki nisi mataupu kolā e fetaui mo te mataupu tenā, e pelā mo mea kolā ne ‵tupu fakamuli nei.​—⁠Mataio 24:⁠45.

14-16. Ne aofia pefea te ‵tou mainaga e uiga ki te Esekielu mataupu e 40 ki te 48 ona ko te ‵fuliga o te ‵tou malamalama e uiga ki te faletapu faka-te-agaga?

¹⁴ I te 1971 ne ‵lomi mai ei se fakamatalaga e uiga ki te valoaga a Esekielu i te tusi ko te “Nations Shall Know That I Am Jehovah”​—⁠How? E tasi te mataupu i te tusi ne fakamatala mai i ei te fakaasiga a Esekielu e uiga ki te faletapu. (Esekielu, mataupu e 40-48) I te taimi tenā, ne faka‵mafa malosi mai i ei te fakataunuga o te fakaasiga a Esekielu e uiga ki te faletapu i te lalolagi fou.​—⁠2 Petelu 3:⁠13.

¹⁵ Kae ne ‵fuli te ‵tou malamalama e uiga ki te fakaasiga tenā a Esekielu ona ko te avā mataupu kolā ne ‵lomi mai i te Watchtower i a Tesema 1, 1972. Ne fakamatala mai i ei te faletapu faka-te-agaga lasi telā ne faipati ki ei te apositolo ko Paulo i te Epelu mataupu e 10. Ne fakamatala mai i te Watchtower tenā me i te Potu Tapu mo te koga ateatea i loto i te faletapu faka-te-agaga e fakauiga i ei ki te tulaga o te kau fakaekegina a koi ‵nofo mai latou i te lalolagi nei. I te taimi ne toe iloilo faka‵lei ei ki te Esekielu mataupu e 40 ki te 48 i te fia o tausaga mai tua ifo i ei, ne maina tatou me ko tu mai nei te faletapu faka-te-agaga i aso nei. Tela la, e ‵tau o fai pelā me ko tu mai foki i aso nei a te faletapu telā ne matea atu ne Esekielu i te fakaasiga. E pefea la?

¹⁶ I te fakaasiga a Esekielu, ne matea atu ne ia a faitaulaga kolā ne ga‵lue i koga ateatea o te faletapu i te lotou taviniatuga ki matakāiga kolā e se ne faitaulaga. E manino mai i ei me e fakauiga a faitaulaga konā ki “faitaulaga a te Tupu,” ko tavini fakaekegina a Ieova. (1 Petelu 2:⁠9) Kae ka se tavini atu latou i te koga ateatea o te faletapu i te lalolagi nei i te taimi o te Pulega a Keliso i te afe tausaga. (Fakaasiga 20:⁠4) I te lasiga o te vaitaimi tenā, io me ko te kātoaga o te vaitaimi tenā, ka tavini atu te kau fakaekegina ki te Atua i te Potu faka-te-agaga telā e Tafasili i te Tapu, ko “te lagi.” (Epelu 9:24) Me e matea atu i te kau faitaulaga e liva‵liva i koga ateatea o te faletapu telā ne matea ne Esekielu, e ‵tau o isi se fakataunuga o te fakaasiga tenā i aso nei, a koi ‵nofo mai a nisi tino o te kau fakaekegina i te lalolagi nei. Tela la, e fakaasi mai ne te mekesini tenei i a Mati 1, 1999, a te kilokiloga fou tenā e uiga ki te mataupu tenei. Tela la, ke oko eiloa ki te fakaotiga o te 20 o senitenali ne fakamaina mai faeloa te mainaga faka-te-agaga e uiga ki te valoaga a Esekielu.

Ke Loto Malie Koe o ‵Fuli Ou Manatu

17. Ne a ‵fuliga ko oti ne fai ne koe ki ou manatu totino talu mai te taimi ko iloa ei ne koe te munatonu, kae ne aogā pefea a mea konā ki a koe?

¹⁷ E ‵tau o loto malie so se tino telā e fia iloa ne ia te munatonu ke “fakatakavale katoa mafaufauga se ‵lei ke faka‵logo ki a Keliso.” (2 Kolinito 10:⁠5) E se faigofie faeloa ke fai penā, kae maise eiloa māfai ko leva ne tali‵tonu tatou ki se manatu. E pelā mo te mea tenei, a koi tuai o iloa ne koe te munatonu a te Atua, kāti ne fiafia malosi koe ke fakamanatu sāle a nisi aso malōlō faka-te-lotu fakatasi mo tou kāiga. I te taimi ne sukesuke ei koe ki te Tusi Tapu, ne maina koe me ne māfua tonu mai a fakamanatuga konā i mea fāpaupau. Muamua la, kāti ne seki fia talia ne koe a mea kolā ne tauloto koe ki ei. Kae fakamuli ifo, ne sili atu tou alofa ki te Atua i lō ou lagonaga mua e uiga ki mea faka-te-lotu, kae ne seki toe kau atu koe ki fakamanatuga kolā e se fiafia ki ei te Atua. Ko oti ne fakamanuia mai a Ieova ki tau fakaikuga tenā, i ne?​—⁠Fakatusa ki te Epelu 11:⁠25.

18. Ne a ‵tou mea e ‵tau o fai māfai ko momea aka te manino o te ‵tou malamalama e uiga ki te munatonu i te Tusi Tapu?

¹⁸ E aogā mai faeloa ki a tatou māfai e fai ne tatou a mea kolā e fakatonu mai ne te Atua. (Isaia 48:​17, 18) Tela la, kafai ko momea aka te manino o se vaega o te Tusi Tapu ki a tatou, e fia‵fia eiloa tatou me ko gasolo ki mua te munatonu! A te tonuga loa, ona ko te mea e momea aka faeloa te mainaga, e fakamaoni mai i ei me e sa‵sale atu tatou i te auala tonu. Ko “te auala tela e sasale i ei a tino amiotonu” kae e fai “pela mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.” (Faataoto 4:18) E tonu, i te vaitaimi nei ko tai “‵kefu” malie te ‵tou ‵kilo atu ki nisi vaega o te fuafuaga a te Atua. Kae kafai e oko mai te taimi tonu o te Atua, ka matea atu ne tatou te munatonu i ana vaega tauleka‵leka katoa, māfai e ‵tu mautakitaki tatou i “te auala” tenei. A koi tuai o fai penā, ke na fia‵fia tatou ki munatonu kolā ko oti ne fakamanino mai ne Ieova, kae koi fakatali‵tali eiloa tatou ke maua se mainaga e uiga ki mea kolā e se maina ‵lei tatou i ei.

19. Se a te auala e tasi e mafai ei ne tatou o fakaasi atu te ‵tou fiafia ki te munatonu?

¹⁹ E mafai pefea ne tatou o fakaasi atu te ‵tou fiafia ki te mainaga i se auala aogā? E tasi te auala ko te faitau sāle ki te Muna a te Atua​—⁠i aso katoa māfai e mafai. E mata, e tautali sāle koe ki te polokalame o faitauga o te Tusi Tapu? E tuku mai foki ne te avā mekesini ko Te Faleleoleo Maluga mo te Awake! te fia o meakai faka-te-agaga kolā e mafai o fia‵fia tatou ki ei. Ke na mafaufau foki ki tusi, polosiua, mo nisi tusi aka kolā ne fakatoka mō te ‵tou ‵lei. Kae e a a lipoti fakamalosi loto e uiga ki te galuega talai o te Malo telā e ‵lomi sāle i tusi tausaga ko te Yearbook of Jehovah’s Witnesses?

20. E pefea te tāua o te ‵tou ‵kau sāle atu ki fakatasiga a Kelisiano ki te mauaga o te mainaga mo muna‵tonu mai i a Ieova?

²⁰ E tonu, ne tali mai ne Ieova i se auala fakaofoofogia a te ‵talo telā ne fakaasi mai i te Salamo 43:⁠3. E fai‵tau tatou penei i te fakaotiga o te fuaiupu tenā: “Kae fakafoki atu [ne tou mainaga mo tau munatonu] au ki Siona, tou mauga tapu, ke fakafoki atu foki ki tou Faletapu, tela e nofo koe i ei.” E mata, e fakamoemoe koe ke tapuaki atu ki a Ieova fakatasi mo nisi tino e tokouke? A akoakoga faka-te-agaga kolā e tuku sāle mai i ‵tou fakatasiga se auala tāua ‵ki telā e tuku mai ei ne Ieova te mainaga i aso nei. Ne a ‵tou mea e mafai o fai ke momea aka te fakatāua ne tatou o fakatasiga Kelisiano? E ‵kami mai ne matou koe ke mafaufau kae ‵talo e uiga ki te mataupu tenei i te faiga o te mataupu telā e ‵soko mai.

[Fakamatalaga fakaopoopo]

E Mafai ne Koe o Tali Mai?

• Kaia e fakaasi malielie mai ne Ieova ana fuafuaga?

• Ne fakaiku aka pefea ne te kau apositolo mo toeaina i Ielusalema a te kinauga e uiga ki te pilitome?

• Se a te faiga o sukesukega ki te Tusi Tapu telā ne fakaaogā ne Tino Akoga mua i te Tusi Tapu, kae kaia ne ‵kese ei te faiga tenā?

• Ke fakaasi mai me e fakamaina mai pefea te mainaga faka-te-agaga i te taimi tonu o te Atua.

[Ata i te itulau e 14]

Ne iloa ne Siale Tase Lasalo me ka maua te mainaga fou e uiga ki te tusi ko te Fakaasiga i te taimi tonu o te Atua