Fakaakoakoga ‵Lei​—E Mata, e Aogā ki a Koe?

“NEI la, ko fai koutou mo fakaakoakoga ki tino talitonu katoa i Maketonia mo Eleni.” Ne tusi atu ne te apositolo ko Paulo a pati konā ki Kelisiano fakamaoni kolā ne ‵nofo atu i Tesalonia. Ne ‵lei ‵ki te fakaakoakoga telā ne fai ne latou mō olotou taina tali‵tonu. Kae ne fakaakoako atu eiloa te kau Tesalonia ki te fakaakoakoga telā ne fai ne Paulo mo ana taugasoa. Muna a Paulo: “Me i te avatuga ne matou a te Tala ‵Lei ki a koutou, ne seki avatu fua ne matou na ko muna, kae ne avatu i te mana mo te Agaga Tapu, mo te loto talitonu fakamaoni ki tena tonu katoatoa. E iloa ne koutou omotou faiga, i aso ne fakatasi ei tatou, a omotou faiga kona mō te ‵lei o koutou. Ne fakaakoako mai koutou ki omotou faiga e pela foki a faiga a te Aliki.”​—⁠1 Tesalonia 1:​5-7.

E tonu, ne seki fai fua ne Paulo a lauga. Ne fai eiloa tena olaga kātoa e pelā me se lauga​—⁠se fakaakoakoga e uiga ki te fakatuanaki, te kufaki, mo te olaga fia fai taulaga. Ona ko te mea tenā, ne fai ei a Paulo mo ana taugasoa mo fai se mea ne ‵fuli malosi ei a olaga o tino Tesalonia, kae ne talia ei ne latou te munatonu “e ui eiloa i te puapuagatia masei” o latou. Kae e se ko Paulo fua mo ana taugasoa ga‵lue kolā ne fakamalosi atu ki tino tali‵tonu konā. E maua foki ne latou a fakamalosiga mai i te fakaakoakoga a nisi tino kolā ne kufaki i logo‵maega. Ne tusi atu penei a Paulo ki te kau Tesalonia: “Oku taina, e pau faeloa a te mea ne tupu ki a koutou mo te mea ne tupu ki ekalesia a te Atua i Iutaia, ki tino kola e o Keliso Iesu. E pau eiloa te puapuaga ne oko ki a koutou mai tino o te otou fenua, mo te puapuaga ne fakapuapuagatia ei foki latou ne tino Iutaia.”​—⁠1 Tesalonia 2:⁠14.

Keliso Iesu ​—⁠Te Fakaakoakoga Sili

E tiga eiloa ne fai a Paulo mo fai se fakaakoakoga telā e ‵tau o fakaakoako ki ei, ne seki fakatamala a ia o fakasino atu ki a Iesu Keliso e pelā me ko te ‵toe fakaakoakoga tāua e ‵tau o tau‵tali atu ki ei a Kelisiano. (1 Tesalonia 1:⁠6) E fai eiloa a Keliso mo fai te ‵tou Fakaakoakoga sili. Ne tusi mai penei te apositolo ko Petelu: “Tenei te pogai ne kalagagina ei koutou ne te Atua; i te mea i a Keliso ne puapuagatia mo koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.”​—⁠1 Petelu 2:⁠21.

Kae ne oti atu te olaga o Iesu e pelā me se tagata i te 2,000 tausaga ko ‵teka. Ko nofo nei a ia i “te mainaga tela e se mafai o oko ki ei se tino,” e pelā me se tino faka-te-agaga telā e se mafai o toe mate. “E seai foki eiloa se tino e mafai o matea ne ia a ia,” i te tulaga tenā. (1 Timoteo 6:16) E mafai pefea ne tatou o fakaakoako atu ki a ia? E tasi te auala ko te sukesuke ki tala e fa i te Tusi Tapu e uiga ki te olaga o Iesu. E tuku mai ne Evagelia konā se mainaga e uiga ki ana uiga masani, tena olaga, mo ana “faifaiga.” (Filipi 2:​5-8) E mafai o maua a nisi mainaga e uiga ki ei i te sukesuke faka‵lei ki te tusi ko Te ‵Toe Tagata Sili Telā ne Ola, telā e fakamatala fakamāea mai i ei a mea kolā ne ‵tupu i te olaga o Iesu i se fakasologa e ‵tusa loa mo te taimi ne ‵tupu ei a mea konā.a

A te fakaakoakoga fia fai taulaga o Iesu ne ‵fuli malosi ei te olaga o te apositolo ko Paulo. Ne fai atu a ia penei ki Kelisiano i Kolinito: “Ka sili toku fiafia o fakamaumau aku mea fakatasi mo toku ola mō otou agaga.” (2 Kolinito 12:15) Mā‵faga uiga gali pelā mo Keliso! Kafai e mafau‵fau tatou ki te fakaakoakoga ‵lei katoatoa a Keliso, e ‵tau foki o fakamalosigina tatou ke fakaakoako atu ki a ia i ‵tou olaga.

E pelā mo te akoako mai ne Iesu me e ‵tau o fakalagolago atu tatou ki te folafolaga a te Atua me ka tuku mai ne ia a mea faka-te-foitino. Kae e uke atu a mea ne fai ne ia. Ne fakaasi atu ne ia te vaegā fakatuanaki mo te fakatuaga tenā ki a Ieova i aso katoa. Ana muna: “E isi ne lua o alope, mo manu eva e isi foki ne olotou ofaga, ka ko te Tama a te Tagata, e seai se koga mo ona fakatapū.” (Mataio 6:25; 8:20) E mata, e pule malosi atu te manavase ki mea faka-te-foitino ki ou manatu mo au faifaiga? Io me e fakamaoni mai i tou olaga me e ‵sala muamua ne koe te Malo? Kae e a tau kilokiloga ki te taviniga ki a Ieova? E mata, e ‵pau mo te kilokiloga a te ‵tou Fakaakoakoga, ko Iesu? E fakaasi mai ne te Tusi Tapu me ne seki gata fua i te lauga atu o Iesu e uiga ki te loto finafinau, kae ne fakaasi atu eiloa ne ia me ne safe malosi tena matagi i te fia o taimi. (Ioane 2:​14-17) Ko tafaga la te gali o te fakaakoakoga ‵lei a Iesu e uiga ki te alofa! Me ne tuku atu ne ia tena olaga e pelā me se taulaga mō ana soko! (Ioane 15:13) E mata, e fakaakoako atu koe ki a Iesu mai i te fakaasiatuga o te alofa ki ou taina Kelisiano? Io me e talia ne koe ke ‵lave tou alofa ki a latou ona ko uiga vāivāi o nisi tino i a latou?

E ‵se sāle tatou i te ‵tou taumafai ke tau‵tali atu ki te fakaakoakoga a Keliso. Kae e fiafia eiloa a Ieova ona ko ‵tou taumafaiga ‘ke fakaeke ki luga i a tatou a te Aliki ko Iesu Keliso.’​—⁠Loma 13:⁠14.

“Ke Fai Koutou mo Fakaakoakoga ki te Lafu Mamoe”

E mata, e isi ne tino i te fakapotopotoga i aso nei e mafai o fai e pelā me ne fakaakoakoga mō tatou? E isi eiloa! E ‵tau mo taina kolā e isi ne olotou tofiga o fai mo fai se fakaakoakoga ‵lei. Ne fai atu a Paulo ki a Tito, telā ne tavini atu ki fakapotopotoga i Keleta mo olotou ovasia kolā ne ‵tofi aka i ei, me e ‵tau “o amio ‵lei” a toeaina taki tokotasi kolā e ‵tofi aka. (Tito 1:​5, 6) Ne fakatonu atu foki te apositolo ko Petelu ki “toeaina” “ke fai . . . mo fakaakoakoga ki te lafu mamoe.” (1 Petelu 5:​1-3) Kae e a latou kolā e tavini atu e pelā me ne tavini fakafaifeau? E ‵tau foki mo latou o fai mo “tino kola e fai ne latou a galuega ‵lei.”​—⁠1 Timoteo 3:⁠13.

E tonu, e se ‵lei te fakamoemoe ke āpo ‵ki a toeaina mo tavini fakafaifeau katoa i vaega katoa o te galuega faka-Kelisiano. Ne fai atu penei a Paulo ki te kau Kelisiano i Loma: “Ke fakaaoga ne tatou meaalofa kesekese kola ne tuku mai, e tusa mo tona alofa tauanoa ne aumai ki a tatou.” (Loma 12:⁠6) E kese‵kese a feitu e ‵lei atu ei a nisi taina. E se ‵lei ke fakamoe‵moe tatou ke ‵lei katoatoa a faiga mo pati katoa a toeaina. E fai mai penei te Tusi Tapu i te Iakopo 3:2: “A tatou katoa e masani o fai mea ‵se. Kafai se tino e seki fai eiloa ne ia se mea ‵se i ana pati, a ia se tino e katoatoa i te ‵lei, ko mafai foki ne ia o pulea tona foitino katoa.” Kae faitalia olotou vāivāiga, e mafai eiloa ne toeaina o fai pelā mo Timoteo kae fai ‘mo fakaakoakoga ki tino fakatuanaki, i olotou faipati, i olotou amio, i olotou alofa, i olotou fakatuanaki, mo olotou loto ‵ma.’ (1 Timoteo 4:12) Kafai e penā a amioga a toeaina, ka faigofie ki te lafu mamoe ke faka‵logo ki te fakamalosiga tenei i te Epelu 13:7: “Masaua ne koutou otou takitaki muamua [“tino kolā e fai ne latou te takitakiga,” NW] . . . Mafaufau me ne ola pefea [latou], . . . fakaakoako la ki te lotou fakatuanaki.”

Nisi Fakaakoakoga i Aso Nei

I tausaga fatoā ‵teka atu nei, e tokouke ‵ki a tino ne fai foki mo fai ne fakaakoakoga ‵lei. E a te fia afe o misionale kolā ne fia fai taulaga kae ‘ne tiakina olotou fale, taina, tuagane, tamana mo matua, fanau, mo manafa’ ke fakataunu olotou tofiga i fenua ‵mao? (Mataio 19:29) Ke masaua foki a toeaina asiasi mo olotou avaga, tāgata mo fāfine kolā e ga‵lue fakagāmua i ofisa o te Sosaiete o te Faleleoleo Maluga, penā foki loa mo paenia kolā e tavini atu i olotou fakapotopotoga. E mata, e mafai o fakamalosi atu ki nisi tino a fakaakoakoga a tino konā? E masaua ne te tino e tokotasi i Asia a te misionale tokotasi mai i te valu o vasega o te Akoga a te Faleleoleo Maluga mo te Tusi Tapu i Kiliata. Ana muna me i te taina fakamaoni tenā “ne loto malie eiloa ke fa‵ki i te lafu namu mo te tau ‵vela . . . Kae ne sili atu te fakaofoofogia ko tena apo i te faiga o fakamatalaga i te ‵gana Saina mo te ‵gana Melai, faitalia me i a ia se Egelani.” Se a te aogā o tena fakaakoakoga? Muna a te taina tenā: “Ona ko ana uiga filemu mo tena loto talitonu ne fakamalosi mai ei ki a au ke fai foki mo fai se misionale i te taimi ne matua ei au.” E se tioa eiloa o fai te taina tenā mo fai se misionale.

E laulau mai ne te tusi ko te Watch Tower Publications Index a te fia o tala o tino kolā ne ‵lomi mai i te avā mekesini ko Te Faleleoleo Maluga mo te Ala Mai! E taku mai i ei a tala o tino kolā ne tiakina a galuega mo fakamoemoega faka-te-lalolagi, ne manumalo i vāivāiga, ne ‵fuli malosi olotou uiga, ne tumau i te fiafia faitalia a fakalavelave faiga‵ta, kae ne fakaasi atu foki te kālevaleva, te kufaki, te fakamaoni, te loto maulalo, mo te uiga fia fai taulaga. Ne tusi mai penei se tino e tokotasi telā ne faitau ki tala konā: “E sili atu toku loto maulalo mo toku fakafetai pelā me se Kelisiano māfai e faitau au ki mea kolā ne fa‵ki a nisi tino i ei, kae ne fesoasoani mai ki a au ke se tō mafaufau malosi ki a au eiloa io me ke manatu fakapito ki a au eiloa.”

E atea mo mea konā, ke se puli i a koe a fakaakoakoga ‵lei i te otou fakapotopotoga: ko ulu o kāiga kolā e tausi faeloa ki manakoga faka-te-foitino mo manakoga faka-te-agaga o olotou kāiga; tuagane​—⁠e aofia i ei a mātua kolā e seai ne olotou avaga​—⁠kolā e fa‵ki i mea faiga‵ta kae tausi faka‵lei olotou tama kae e ‵kau faka‵lei atu foki latou ki te galuega talai; tino ma‵tua mo tino ma‵saki kolā e tumau i te fakamaoni faitalia me ko gasolo o vāi‵vāi kae ma‵saki malosi latou. E a, e se fakamalosi mai a fakaakoakoga konā ki a koe?

E tonu, ko ‵fonu te lalolagi nei i fakaakoakoga ma‵sei. (2 Timoteo 3:13) Kae ke masaua ne koe te fakamalosiga a Paulo ki Kelisiano kolā ne ‵nofo atu i Iutaia. Ko oti ne taku atu ne te apositolo ko Paulo amioga ‵lei a nisi tāgata mo fāfine fakatuanaki e tokouke i aso mua, kae ne fakamalosi atu penei a ia: “Kae penei mo tatou, ko sio fakatamilo ne akoakoga ‵lei a tino talitonu fakamaoni i aso ko teka. . . . ke ‵tele tatou mo te loto fai ki mua ke maua te manumalo i te fakatau‵telega tenei e takato mai i mua o tatou. Ke tumau te tou ‵kilo atu ki a Iesu, tela e fakavae ki ei te tou fakatuanaki mai te kamataga ki te gataga.” (Epelu 12:​1, 2) E sikomia fakatamilo foki a Kelisiano i aso nei ne “akoakoga ‵lei” e uke​—⁠mai aso mua, e penā foki loa mo aso nei. E mata, e aogā ‵tonu a mea konā ki a koe? E mafai, māfai e fakaiku aka ne koe ke se “fakaakoako ki te masei, kae fakaakoako ki te ‵lei.”​—⁠3 Ioane 11.

[Fakamatalaga fakaopoopo]

[Ata i te itulau e 31]

E tonu, e se ‵lei te fakamoemoe ke āpo ‵ki a toeaina mo tavini fakafaifeau katoa i vaega katoa o galuega faka-Kelisiano