Tumau i te Ola e Pelā mo Iesu Keliso
“A ia telā e fai mai me ola i te Atua, e ‵tau eiloa o ola e pelā eiloa mo te olaga o Iesu Keliso.”—1 IOANE 2:6.
1, 2. Ne a mea e aofia i te kilo atu faeloa ki a Iesu?
“KE ‵TELE tatou mo te loto kufaki i te fakatau‵telega i ‵tou mua,” ko pati a te apositolo ko Paulo, “kae ‵kilo atu ki te Takitaki Sili mō te fakakatoatoaga o ‵tou fakatuanaki, ko Iesu.” (Epelu 12:1, 2, NW) A te ola faeloa i te fakatuanaki e manakogina i ei a te kilo ‵tonu atu ki a Iesu Keliso.
2 A te pati mua mō te “kilo atu,” telā e fakaaogā i Tusitusiga Faka-Kelisiano i te ‵gana Eleni, e fakauiga ki te “faiga ke saga tonu atu ki se mea e aunoa mo se mea e fakalavelave atu ki ei,” “ko te saga fakaatea mai se mea e tasi ko te mea ke saga atu ki se isi mea,” “ko te tio io me faka‵toka atu ki se mea.” E fai mai se tusi, penei: “Ko te taimi eiloa e saga fakaatea ei se tino Eleni telā e tele i se fakatau‵telega mai te mea telā e fakamoemoe a ia ki ei, ke saga atu ki tino maimoa, ko te taimi foki eiloa tenā e tatō ei tena makini. E penā foki eiloa a Kelisiano.” E mafai o fakalavelave mai a te se saga tonu atu, ki ‵tou ga‵solo ki mua i te feitu faka-te-agaga. E ‵tau o ‵kilo atu faeloa tatou ki a Iesu Keliso. Kae ne a la a mea e ‵sala tatou ki ei i te Takitaki Sili? A te pati Eleni telā ne ‵fuli ki te “takitaki sili” e fakauiga loa ki se “pule, se tino telā e takitaki ne ia a mea katoa kae tuku atu ne ia se fakaakoakoga ‵lei ki tino.” A te kilo mo te faka‵toka atu ki a Iesu e manakogina i ei ke tau‵tali atu ki tena fakaakoakoga.
3, 4. (a) Se a te mea e manakogina ke fai ne tatou i te ‵tou ola e pelā mo auala ne ola ei a Iesu Keliso? (e) Ne a fesili e ‵tau o ‵saga atu tatou ki ei?
3 “A ia telā e fai mai me ola i te Atua, e ‵tau eiloa o ola e pelā eiloa mo te olaga o Iesu Keliso,” ko pati i te Tusi Tapu. (1 Ioane 2:6) E ‵tau o tumau tatou i te ola mō te Atua mai te faka‵logo ki fakatonuga a Iesu kolā ne aumai i tena Tamana kae ne tausi foki ki ei.—Ioane 15:10.
4 Telā la, a te ola i te auala ne ola ei a Iesu e manakogina i ei te faka‵logo katoatoa ki a ia e pelā me ko te Pule kae tautali atu faeloa i ana kalafaga. Konei la fesili tāua ke mafaufau ki ei i te feitu tenei: E takitaki pefea ne Keliso a tatou i aso nei? E pokotia pefea tatou mai te fakaakoako atu ki te auala ne ola ei a ia? Ne a mea aogā e maua mai te tau‵tali katoatoa atu ki te fakaakoakoga a Iesu Keliso?
Te Auala e Takitaki ei ne Keliso Ana Soko
5. Mai mua o tena fanakaga ki te lagi, se a te tautoga ne fai atu ne Iesu ki ana soko?
5 Mai mua o fanaka ki te lagi, ne fakasae atu a Iesu Keliso, telā ko oti ne fakatu aka, ki ana soko kae tuku atu ki a latou se galuega tāua ‵ki ke fai ne latou. Ne fai atu a ia: “Telā la, olo atu koutou ki fenua katoa ke fai a tino i ei mo oku soko.” I te taimi tenā, ne tauto atu a te Takitaki Sili me ka fakatasi a ia mo latou i te faiga o te galuega tenā, i ana pati: “Kiloke! Au e fakatasi faeloa mo koutou, ke oko eiloa ki te gataga o te lalolagi.” (Mataio 28:19, 20) E fakatasi pefea a Iesu Keliso mo ana soko i te taimi tenei o te gataga o te lalolagi?
6, 7. E takitaki pefea ne Iesu tatou e auala i te agaga tapu?
6 “Ka ko te Fesoasoani, ko te Agaga Tapu tenā, ka uga mai ne te Tamana e alatu mai i toku igoa,” ko pati a Iesu, “o akoako atu ki a koutou i mea katoa; e fakamasaua atu foki a mea katoa kolā ko oti ne fai atu ne au ki a koutou.” (Ioane 14:26) A te agaga tapu, telā ne uga mai i te igoa o Iesu, e takitaki kae fakamalosi ne ia tatou i aso nei. E fakamaina mai ne ia ki a tatou a mea faka-te-agaga kae fesoasoani mai ke malamalama tatou i “fuafuaga ‵loto a te Atua.” (1 Kolinito 2:10) E se gata i ei, a uiga o te Atua e pelā mo “te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea” ne ‘fuataga o te Agaga.’ (Kalatia 5:22, 23) Mai te fesoasoani o te agaga tapu, e mafai ei o maua ne tatou a uiga konei.
7 I te taimi e tauloto ei tatou ki te Tusi Tapu kae taumafai o fakagalue aka a mea ko iloa ne tatou, e fesoasoani mai eiloa te agaga o Ieova ke momea aka te ‵tou poto, atamai, te malamalama, faka‵tauga mo te mafaufau ‵lei. (Faataoto 2:1-11) E fesoasoani mai foki te agaga tapu ke kufaki tatou i fakaosoosoga mo tofotofoga. (1 Kolinito 10:13; 2 Kolinito 4:7; Filipi 4:13) E fakamalosi mai ki Kelisiano ke ‘faka‵ma latou mai feitu kolā e fakamasei ne latou te foitino mo te agaga, ka ke ola i te olaga tapu katoatoa.’ (2 Kolinito 7:1) E mata, e mafai o ‵pau tatou mo te Atua i te tapu io me ko te ‵ma, e aunoa mo te fesoasoani o te agaga tapu? A te auala e tasi e fakaaogā ne Iesu ke takitaki ei tatou i aso nei, ko te agaga tapu, telā ne tuku atu ne Ieova te Atua ke fakagalue ne tena Tama.—Mataio 28:18.
8, 9. E fakaaogā pefea ne Keliso a “te tavini fakamaoni kae poto” ke tuku mai ne ia te takitakiga?
8 Ke mafaufau ki te suā auala e takitaki ei ne Keliso te fakapotopotoga i aso nei. E uiga ki tena fakatasi mai mo te gataga o te olaga nei, ne fai mai a Iesu: “Ko oi te tavini fakamaoni kae poto? Ko ia telā ko oti ne fili ne tona pule ke pule i isi tavini, kae fakasoa atu foki ne ia olotou meakai i te taimi tonu. Amutia a te tavini tenā, manafai e foki mai tena pule e galue faeloa a ia. Au e fai tonu atu ki a koutou, a te pule e fili ne ia a te tavini tenā, ke pule i ana mea katoa.”—Mataio 24:3, 45-47.
9 A te “pule” ko Iesu Keliso. A te “tavini” ko te potukau o Kelisiano fakaekegina i te lalolagi. Ne tuku atu ki te tavini tenei a te tiute ke tausi atu ki mea a Iesu i te lalolagi e pelā foki mo te fakatokaga o meakai faka-te-agaga i te taimi tonu. E aofia i te Potukau Pule, telā e sui ne ia te tavini tenei, se tamā potukau o tāgata atamai mai tino katoa kolā e aofia i te “tavini fakamaoni kae poto.” E takitaki ne latou te galuega ko te talaiatuga o te Malo i te lalolagi kātoa e pelā foki mo te tukuatuga o meakai faka-te-agaga i te taimi tonu. Telā la, e takitaki ne Keliso a te fakapotopotoga e auala i te “tavini fakamaoni kae poto,” kolā ko oti ne fakaekegina ki tena agaga tapu, mo tena Potukau Pule.
10. E ‵tau o pefea a ‵tou faifaiga ki toeaina, kae kaia?
10 A te suā mea e lavea atu i ei te takitakiga a Keliso, e auala i ‘meaalofa tino’—ko toeaina Kelisiano, io me ko ovasia. Ne tuku atu ki a latou a te tiute ke “fakatoka a tino o te Atua, mō te galuega faka-Kelisiano, o ati ake a te foitino o Keliso.” (Efeso 4:8, 11, 12) E uiga ki a latou, e fai mai te Epelu 13:7: “Masaua ne koutou otou takitaki muamua, kolā ne taku atu ne latou a te muna a te Atua. Mafaufau me ne ola pefea, kae ne ‵mate foki pefea; fakaakoako la ki te lotou fakatuanaki.” E fai ne toeaina a te fakatakitakiga i te fakapotopotoga. Me ne fakaakoako latou ki a Keliso Iesu, e aogā ‵ki ke tautali atu i te lotou fakaakoakoga. (1 Kolinito 11:1) E mafai o fakaasi atu ne tatou a ‵tou loto fakafetai ki te fakatokaga tenei e uiga ki toeaina mai te faka‵logo ki ‘meaalofa tino’ konei.—Epelu 13:17.
11. I auala fea e takitaki ei ne Keliso ana soko i aso nei, kae ne a mea e aofia i te ola i te auala ne ola ei a ia?
11 Ao, e takitaki ne Iesu Keliso ana soko i aso nei e auala i te agaga tapu, “te tavini fakamaoni kae poto,” mo toeaina i te fakapotopotoga. A te ‵tou ola e ‵tusa mo te auala ne ola ei a Keliso e aofia i ei a te malamalama i te auala e fai ei tena takitakiga mo te fakalogo ki ei. E aofia foki i ei a te fakaakoako atu ki te auala ne ola ei a ia. “Tenei te pogai ne kalagagina ei koutou ne te Atua,” ko pati a te apositolo ko Petelu, “i te mea i a Keliso ne puapuagātia mō koutou, kae tuku atu foki ne ia ki a koutou te fakaakoakoga, ke tau‵tali ei koutou i ona kalafaga.” (1 Petelu 2:21) I te auala fea e pokotia ei tatou māfai e tau‵tali atu i te fakaakoakoga ‵lei katoatoa a Iesu?
Ke Maua se Tulaga Paleni i te Faiga o Pulepulega
12. Ne a vaega o te fakaakoakoga a Keliso e ‵tau o ‵saga malosi atu ki ei a toeaina i te fakapotopotoga?
12 E ui eiloa ko oti ne maua ne Iesu a te pulega sili mai tena Tamana, ne paleni ‵lei a ia i te faiga o tena pulega. E ‵tau mo tino katoa i te fakapotopotoga—maise ko ovasia—o ‘fakaasi atu te uiga alofa io me ko te loto malamalama ki tino katoa.’ (Filipi 4:5; 1 Timoteo 3:2, 3) Ona ko te mea e maua ne toeaina se vaega o pulepulega i te fakapotopotoga, se mea tāua ke tau‵tali atu latou i kalafaga o Keliso i te faiga o te mea tenā.
13, 14. I auala fea e mafai ei o fakaakoako a toeaina ki a Keliso māfai ko fakamalosi ne latou a nisi tino ke tavini atu ki te Atua?
13 Ne masaua faeloa ne Iesu a vāivāiga o ana soko. Ne tuku faka‵tau atu ne ia ana fakatonuga e ‵tusa mo te mea e mafai ne latou o fai. (Ioane 16:12) I lō te faimālō atu ki a latou, ne fakamalosi atu a Iesu ki ana soko ke ‘fai te mea e mafai ne latou o fai’ i te faiga o te loto o te Atua. (Luka 13:24) Ne fai ne ia te mea tenei mai te tukuatuga o se fakaakoakoga ‵lei mo te fakamalosi atu ki a latou. E penā foki i aso nei, e se fakamatakutaku ne toeaina Kelisiano a nisi tino ke tavini atu ki te Atua ona ko te mā. I lō te fai penā, e fakamalosi atu ki a latou ke tavini atu ki a Ieova ona ko te lotou a‵lofa ki a ia mo Iesu, e pelā foki mo nisi tino.—Mataio 22:37-39.
14 Ne seki sōnafai ne Iesu a te pulega telā ne tuku atu ki a ia mai te pule atu ki olaga o tino. Ne seki tuku atu ne ia ne tapulā kolā ne seki ‵kafi o fai io me se fakasologa o tulafono e uke ke tausi ki ei. A te mea telā ne fai ne ia ko te fakamalosi atu ki nisi tino mai te taumafai ke oko atu ki olotou loto a fakatakitakiga fakavae kolā ne tuku mai e auala i a Mose. (Mataio 5:27, 28) I te fakaakoako atu ki a Iesu Keliso, e ‵kalo keatea a toeaina mai te tukuatuga o tulafono kolā e fakavae ki olotou manakoga mo olotou kilokiloga totino. E uiga ki gatu mo teuga io me ko fakafiafiaga mo nisi faigāmea, e taumafai a toeaina ke oko atu ki loto o tino mai te fakaaogāga o fakatakitakiga i te Muna a te Atua, e pelā mo mea e fakaasi mai i te Mika 6:8; 1 Kolinito 10:31-33; mo te 1 Timoteo 2:9, 10.
Fakaasi Atu te Loto Alofa mo te Loto Fakamagalo
15. Ne saga atu pefea a Iesu ki mea ‵se a ana soko?
15 Ne tuku mai ne Keliso se fakaakoakoga ke tautali ki ei i ana faifaiga ne fai e uiga ki mea ‵se a ana soko. Ke mafaufau ki mea e lua ne ‵tupu i tena toe po i te lalolagi e pelā me se tino. I te lotou okoatuga ki Ketesemane, ne puke ne Iesu “a Petelu, Iakopo mo Ioane ke olo latou” kae fai atu “ke matapula‵pula.” Kae, “ne momea atu ke tai ‵mao malie mo latou, fakasiga ifo ei a ia ki lalo o ‵talo.” I tena fokiatuga, “ne maua atu ne ia a te tokotolu soko e ‵moe.” Ne a mea ne fai ne Iesu? Ne fai atu a ia: “E malosi te agaga, ka ko vāivāi te foitino.” (Maleko 14:32-38) I lō te pati ‵toko atu ki a Petelu, Iakopo mo Ioane, ne fakaasi atu ne ia a te loto alofa! I te po eiloa tenā, ne fakafiti ne Petelu a Iesu fakatolu taimi. (Maleko 14:66-72) Ne a mea ne fai ne Iesu ki a Petelu mai tua ifo i ei? “Ko toetu eiloa te Aliki, me ne fakaasi foki a ia ki a Simona [Petelu].” (Luka 24:34) “Ne fakaasi atu ki a Petelu,” ko pati i te Tusi Tapu, “e pelā foki ki te tinoagafulu mo te tokolua.” (1 Kolinito 15:5) I lō te ita fakamoemoe, ne fakamagalo ne Iesu a te apositolo loto salamo kae fakamalosi atu ki a ia. Fakamuli ifo, ne tuku atu ne Iesu ki a Petelu a nisi tiute ‵mafa e uke ke fai ne ia.—Galuega 2:14; 8:14-17; 10:44, 45.
16. E mafai pefea o ola tatou e pelā mo te auala ne ola ei a Iesu māfai e fai ne ‵tou taina a mea ‵se ki a tatou i nisi auala?
16 Kafai e ‵se mai a ‵tou taina tali‵tonu ki a tatou i nisi taimi ona ko ‵tou tulaga se ‵lei katoatoa, e mata, e se ‵tau mo tatou o fakaasi atu te loto alofa mo te loto fakamagalo e pelā mo Iesu? Ne fakamalosi atu a Petelu ki ana taina tali‵tonu: “E ‵tau o tasi katoa otou mafaufauga pelā foki mo otou lagona; ke fakatau a‵lofa koutou e pelā mo ne tautaina, ke fakatau atafai kae loto ma‵lalo foki koutou. Sa taui te masei ki te masei, io me taui atu te muna fetu ki te muna fetu; e ‵tau mo koutou o taui atu ki te fakaamutia atu.” (1 Petelu 3:8, 9) Kae pefea la māfai e se fakaasi mai ne se tino a te mea telā ne fai ne Iesu, e se loto alofa io me loto fakamagalo? I konā foki loa, e maua ne tatou te tiute ke fakaakoako ki a Iesu kae tali atu foki e pelā mo ana faifaiga.—1 Ioane 3:16.
Ke Fakamuamua a Manakoga o te Malo
17. Se a te mea e fakaasi mai me ne fakamuamua ne Iesu a te faiga o te loto o te Atua i tena olaga?
17 E ‵tau foki o ola tatou e pelā mo te auala ne ola ei a Iesu i se isi mea aka. A te folafolaatuga o te tala ‵lei o te Malo o te Atua ko te ‵toe mea tāua eiloa i te olaga o Iesu. Mai tua o te talaiatuga ki te fafine Samalia i tafa o te fa‵kai o Sukala i Samalia, ne fai atu a Iesu ki ana soko: “A taku meakai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.” (Ioane 4:34) Ne fakatumau te malosi o Iesu ne te faiga o te loto o tena Tamana; e pelā eiloa me ne meakai aogā, ‵gali kae fakafou malosi. E mata, a te fakaakoako atu ki a Iesu mai te tumau i te faiga o te loto o te Atua ka takitaki atu ei tatou ki se olaga aogā kae fakalotomalie?
18. Ne a fakamanuiaga e maua mai te fakamalosi atu ki tama‵liki ke kausaki atu ki te taviniga tumau?
18 Kafai e fakamalosi aka ne mātua olotou tama‵liki ke ga‵lue i te taviniga tumau, ka maua eiloa ne latou mo olotou tama‵liki a fakamanuiaga e uke. Ne fakamalosi ne se tamana tena masaga tāgata, a koi fo‵liki ‵ki laua ke taumafai o paenia. I te otiga o lā akoakoga, ne paenia ei a te masaga tenei. E uiga ki te fiafia telā ko maua ne ia, ne tusi mai te tamana tenei: “Ne seki fakafanoanoa eiloa ne mā tama‵liki tāgata a māua. E fia‵fia lasi māua o fai atu, ‘A tama‵liki ne meaalofa mai te Aliki.’ ” (Salamo 127:3) Kae e aogā pefea ki tama‵liki a te kausaki atu ki te taviniga tumau? Ne fai mai se mātua telā e tokolima ana tama‵liki: “Ne fesoasoani malosi a te galuega paenia ke ati aka ne aku tama‵liki katoa se vā pili mo Ieova, ke momea aka te magoi o olotou sukesukega ki te Tusi Tapu, fesoasoani atu ke iloa ne latou o fakasoa faka‵lei olotou taimi, kae ke iloa foki ne latou o fakamuamua a mea faka-te-agaga i olotou olaga. E ui eiloa e ‵tau o fai ne latou katoa a fakamafulifuliga e uke, e seai eiloa se tino i a latou ne salamo e uiga ki olotou fakaikuga ne fai.”
19. Ne a fuafuaga mō aso mai mua e ‵tau o mafau‵fau faka‵lei ki ei a talavou?
19 Talavou, ne a otou fuafuaga mō aso mai mua? E mata, e ‵sala atu koe ki tofi ma‵luga? Io me taumafai ke galue koe i te taviniga tumau? Ne fakamalosi mai a Paulo, “Sa ola e pelā mo ne tino va‵lea, kae ke pelā mo tino ‵poto. Fakaaogā faka‵lei so se avanoa e maua ne koutou, i te mea ko aso ma‵sei a aso nei.” Ne toe fai mai a ia: “Sa fakavale‵vale, kae taumafai o salasala ake, me se a te mea e loto ki ei te Aliki ke fai ne koutou.”—Efeso 5:15-17.
Tumau i te Alofa Fakamaoni
20, 21. I auala fea ne alofa fakamaoni ei a Iesu, kae e mafai pefea o fakaakoako atu tatou ki tena alofa fakamaoni?
20 Ko te mea ke ola tatou e pelā mo Iesu, e ‵tau o fakaakoako tatou ki tena alofa fakamaoni. E uiga ki te alofa fakamaoni o Iesu, e fai mai te Tusi Tapu: “I tena nofoga i te lagi, ne iai mo ia a te ‵malu faka-Atua, kae ne pukemau ne ia te ‵malu fakaatua tenei. Mai luga i tona loto malie, ne tiakina katoatoa ne ia tona ‵malu faka-Atua, kae fai mo tavini. Ne liu tino a ia, ne fanau foki a ia i foliga faka te foitino. Ne loto malalo a ia kae ne sasale foki i te auala o te fakalogo muna, ke oko eiloa ki tona mate, telā ko tena mate i luga i te sataulo.” Ne fakamaoni eiloa a Iesu o ‵lagomālō atu ki te pulega a Ieova mai te fakalogo ki te mea telā ne manako te Atua ke fai ne ia. Ne fakalogo eiloa a ia ke oko ki tena mate i te sataulo. E ‵tau o tumau tatou i “faifaiga” konei kae faka‵logo mo te fakamaoni ki te faiga o te loto o te Atua.—Filipi 2:5-8.
21 Ne alofa fakamaoni foki a Iesu ki ana apositolo fakamaoni. Faitalia olotou vāivāiga mo te lotou se ‵lei katoatoa, ne alofa eiloa a Iesu ki a latou “ke oko ki te fakaotiga.” (Ioane 13:1) Telā la, e se ‵tau foki o talia ne tatou a vāivāiga o ‵tou taina ke maua ei ne tatou te uiga ko te fāmeo.
Tau‵tali i te Fakaakoakoga Tutumau a Iesu
22, 23. Ne a mea aogā e maua mai te tau‵tali atu faeloa ki te fakaakoakoga a Iesu?
22 E tonu, e pelā me ne tino sē ‵lei katoatoa, e se mafai o tau‵tali katoatoa atu tatou i kalafaga o te ‵tou Fakaakoakoga Sili telā e ‵lei katoatoa. Kae, e mafai o taumafai tatou o tau‵tali fakapili‵pili atu ki ei. I te fai penā, e manakogina ke malamalama kae ke faka‵logo tatou ki te takitakiga a Keliso kae ke ‵piki ‵mau ki tena fakaakoakoga.
23 A te fakaakoako atu ki a Keliso e iku atu ei ki te mauaga o fakamanuiaga e uke. E fai i ei ke aogā a ‵tou olaga kae fakalotomalie foki ona ko te ‵tou ‵saga katoatoa atu o fai te loto o te Atua i lō ‵tou manakoga. (Ioane 5:30; 6:38) Ka ‵lei foki ‵tou loto lagonaga. Ka fai te auala e ola ei tatou e pelā me ne fakaakoakoga ‵lei. Ne ‵kami ne Iesu a tino kolā e fi‵ta i te ‵mafa o olotou amoga ke olo atu ki a ia ke maua ne latou i ei se malōlōga mo te fakafouga o olotou malosi. (Mataio 11:28-30) Kafai e tau‵tali tatou ki te fakaakoakoga a Keliso, e mafai foki o fakafou ne tatou te malosi o nisi tino e auala i ‵tou fesokotakiga. Telā la, ke na tumau eiloa tatou i te ola i te auala ne ola ei a Iesu.
E Masaua ne Koe?
• E takitaki pefea ne Keliso ana soko i aso nei?
• E tau‵tali atu pefea a toeaina ki te fakatakitakiga a Keliso i te faiga o olotou tiute i mea tau pulepulega kolā ne tuku mai ne te Atua?
• E fakaakoako pefea tatou ki a Iesu i te fakafesagai atu ki vāivāiga o nisi tino?
• E mafai pefea o fakamuamua ne talavou a manakoga o te Malo?
[Ata i te itulau e 19]
E fesoasoani mai a toeaina Kelisiano ke tau‵tali tatou i te takitakiga a Keliso
[Ata i te itulau e 20]
Talavou, ne a fuafuaga e fakatoka nei ne koutou ke maua ei se olaga aogā faka-Kelisiano?