Te Faitau ki te Tusi Tapu​—E Aogā Kae Gali

“Masaua ke faitau faeloa te tusi . . . i ao mo po.”​—⁠IOSUA 1:⁠8.

1. Ne a mea aogā e maua sāle i te faitau ki tusi, kae maise eiloa i te faitau ki te Tusi Tapu?

E AOGĀ ‵ki te faitau ki tusi ‵lei. Ne tusi mai penei te tino Falani fai manatu fakapolitiki ko Montesquieu (Charles-Louis de Secondat): “E pelā mo kita nei, a te ‵toe faka‵leiga ki te fita masani o te olaga nei ko te faitau malosi ki tusi. E seai se fakalavelave ne oko mai ki a au telā e se mafai o fakagalo aka mai i te faitau ki se tusi i se itula e tasi.” E sili atu te ‵tonu o te manatu tenā, māfai e faitau se tino ki te Tusi Tapu. Ne fai mai penei te tino faisalamo telā ne fakaosofia: “E tonu katoatoa te tulafono a te Aliki, e maua mai i ei te malosi fou. A fakatonuga foki a te Aliki e fakatuagagina, e aumai ne ia te poto ki a latou kola e valea. E tonu faeloa tulafono a te Aliki e fia‵fia faeloa a latou kola e tausi ki ei. A fakatonuga a te Aliki e ‵tonu katoatoa, kae fakamaina ne ia te mafaufau.”​—⁠Salamo 19:​7, 8.

2. Kaia ne tausi ei ne Ieova te Tusi Tapu i te fia o tausaga, kae se a te mea telā e fakamoemoe a ia ke fai ne ana tino ki te Tusi Tapu?

² Me ne māfua mai te Tusi Tapu i a Ieova te Atua, ne tausi faka‵lei ne ia te tusi tenā i te fia o senitenali kolā ne ‵teke atu ki ei ana fili, ko fili faka-te-lotu, penā foki loa mo fili faka-te lalolagi. Me “e manako a ia ke ola tino katoa, ka ke iloa foki ne latou te munatonu,” ne fakaavanoa ne ia tena Muna ki tino katoa. (1 Timoteo 2:⁠4) Ko oti ne fakatautau aka pelā me e maina te 80 pasene o tino i te lalolagi nei i ‵gana e 100. Ko avanoa nei te Tusi Tapu kātoa i ‵gana e 370, kae e mafai foki o fai‵tau a tino ki nisi vaega o te Tusi Tapu i nisi ‵gana e 1,860. E manako eiloa a Ieova ke na fai‵tau ana tino ki tena Muna. E fakamanuia atu eiloa a ia ki ana tavini kolā e ‵saga tonu atu ki tena Muna, ko latou eiloa kolā e fai‵tau ki ei i aso katoa.​—⁠Salamo 1:​1, 2.

E ‵Tau mo Ovasia o Fai‵tau Sāle ki te Tusi Tapu

3, 4. Se a te mea telā ne fakatonu atu ne Ieova ki tupu o Isalaelu, kae ne a pogai o te fakatonuga tenā e fakauiga foki ki toeaina Kelisiano i aso nei?

³ Ne faipati atu a Ieova e uiga ki te taimi ka isi ei se tagata telā ka fai mo fai te tupu o te fenua ko Isalaelu, ana muna: “Kafai ko fai a ia mo tupu, e tau o maua sena kopi o te tusi e tusi ei a tulafono mo akoakoga a te Atua, tela ne laga mai i te tusi a faitaulaga sa Levi. E tau o tuku te tusi tenei i ana tafa, kae ke faitau sale a ia ki ei i tena olaga katoa, ko te mea ke iloa ne ia o fakaaloalo te Aliki kae tausi fakamaoni ki mea katoa e fakatonu mai ne ia. Ko te faiga tena e fakamao ei a ia mai te manatu pela i a ia e sili atu i tino Isalaelu katoa, e mao foki a ia mai te teke atu ki fakatonuga kona a te Aliki.”​—⁠Teutelonome 17:​18-20.

⁴ Onoono aka ki pogai ne fakatonu atu ei a Ieova ki tupu katoa o Isalaelu ke fai‵tau sāle latou ki te tusi o tulafono a te Atua i aso katoa: (1) “ke iloa ne ia o fakaaloalo [“ki a Ieova”] kae tausi fakamaoni ki mea katoa e fakatonu mai ne ia”; (2) “ke fakamao ei a ia mai te manatu pela i a ia e sili atu i tino Isalaelu katoa”; (3) “ke mao foki a ia mai te teke atu ki fakatonuga kona a te Aliki.” E ‵tau foki mo ovasia Kelisiano i aso nei o ma‵taku ki a Ieova, faka‵logo ki ana tulafono, ke se fakama‵luga aka a latou eiloa i olotou taina, kae ke mo a ma ‵teke atu latou ki fakatonuga a Ieova, i ne? E ‵pau eiloa te tāua ki a latou o te faitau sāle ki te Tusi Tapu i aso katoa mo te tāua o te mea tenā ki tupu o Isalaelu.

5. Ne a mea ne tusi atu fakamuli nei ne te Potukau Pule ki Komiti o Ofisa Lagolago e uiga ki te faitau ki te Tusi Tapu, kae kaia e ‵lei ei ke faka‵logo a toeaina Kelisiano katoa ki pati fesoasoani konā?

⁵ E fakalavelave malosi a toeaina Kelisiano i aso nei, kae kāti e faiga‵ta ki a latou ke fai‵tau ki te Tusi Tapu i aso katoa. E pelā mo tino i te Potukau Pule o Molimau a Ieova, penā foki loa mo tino o Komiti o Ofisa Lagolago i te lalolagi kātoa, konā eiloa a tāgata kolā e fakalavelave malosi. Kae fakamuli nei, ne faka‵mafa malosi ne se tusi mai te Potukau Pule ki Komiti o Ofisa Lagolago katoa a te tāua o te faitau sāle ki te Tusi Tapu i aso katoa, penā foki loa mo te sukesuke faka‵lei ki ei. Ne fakaasi atu i te tusi tenā me kafai e fai penā ka fakamalosi aka i ei te ‵tou a‵lofa ki a Ieova mo te ‵tou fia‵fia ki te munatonu, kae “ka fesoasoani mai i ei ke tu ‵mautakitaki te ‵tou fakatuanaki, te ‵tou fiafia, mo te ‵tou loto ‵mau ke oko eiloa ki te ‵malu i te fakaotiga.” E ‵pau eiloa a manatu o toeaina katoa i fakapotopotoga o Molimau a Ieova. Kafai e fai‵tau sāle latou ki te Tusi Tapu i aso katoa ka fesoasoani i ei ke “manuia” latou. (Iosua 1:​7, 8) E aogā malosi ki a latou ke fai‵tau sāle ki te Tusi Tapu i “te akoakoga o te mea tonu, ki te polopoloki, ki te fakatonu o te mea ‵se, mo te akoako atu ki te olaga ‵lei.”​—⁠2 Timoteo 3:⁠16.

Se Mea e ‵Tau o Fai ne Tama‵liki mo Tino Mā‵tua

6. Kaia ne faitau atu ei ne Iosua a pati katoa i te tulafono a Ieova ki matakāiga katoa o Isalaelu penā foki loa mo tino fakaa‵lofa kolā ne maopoopo mai?

⁶ I aso mua eiloa, ne seki maua ne tino taki tokotasi olotou kopi totino o te Tusi Tapu. Tela la, ne fai‵tau sāle atu te Tusi Tapu ki tino kolā ne maopoopo fakatasi. I te taimi ko oti ei ne avatu ne Ieova a te manumaloga ki a Iosua i te fakai ko Ai, kae ne fakamaopoopo ne ia a matakāiga o Isalaelu i mua o te avā mauga ko Epalu mo Kelisima. Kae e fai mai penei te tala tenā: “Tena ne faitau ei ne Iosua te Tulafono katoa, e aofia ei a fakamanuiaga mo fakamalaiaga, e pela eiloa mo te mea e tusi i te tusi o te Tulafono. A tulafono katoa a Mose ne faitau ne Iosua ki te fenua katoa, e aofia ei fafine mo tamaliki, pela foki a tino fakaalofa kola e nofo tasi latou.” (Iosua 8:​34, 35) Ne fai pelā me ne ‵tau o faka‵mau aka i loto mo mafaufau o tama‵liki mo tino mā‵tua, tino Isalaelu mo tino fakaa‵lofa a amioga kolā ka fakamanuia ne Ieova mo amioga kolā ka se fiafia a ia ki ei. Kafai e fai‵tau faeloa tatou ki te Tusi Tapu ka fesoasoani mai foki i ei ki a tatou i te feitu tenā.

7, 8. (a) Ko oi e fai pelā me ne “tino fakaalofa” i aso nei, kae kaia e ‵tau ei o fai‵tau latou ki te Tusi Tapu i aso katoa? (e) I auala fea e mafai ei ne “tamaliki” i tino o Ieova o fakaakoako atu ki a Iesu?

⁷ E lau i miliona a tavini a Ieova ko fai nei mo fai ne “tino fakaalofa” i te feitu faka-te-agaga. Ne ola muamua latou i amioga a te lalolagi, kae ko ‵fuli nei ne latou olotou olaga. (Efeso 4:​22-24; Kolose 3:​7, 8) E ‵tau o fakamasaua atu faeloa ki a latou eiloa e uiga ki tulafono a Ieova ki mea ‵lei mo mea ma‵sei. (Amosa 5:​14, 15) A te faitau sāle ki te Muna a te Atua i aso katoa e fesoasoani atu i ei ki a latou ke fai penā.​—⁠Epelu 4:12; Iakopo 1:⁠25.

⁸ E tokouke foki a “tama‵liki” i tino o Ieova kolā ne akoako atu ne olotou mātua e uiga ki tulafono a Ieova kae nei la e ‵tau eiloa o fakamaoni aka ne latou i a latou eiloa me e tonu te loto o te Atua. (Loma 12:​1, 2) E mafai pefea ne latou o fai penā? Ne fakatonu atu penei ki faitaulaga mo toeaina i Isalaelu: “Faitau atu ki tino Isalaelu, i te taimi e o‵mai ei o tapuaki ki te Aliki te otou Atua i te koga tapuaki ki te Aliki tenei e tasi. Kalaga atu ki tagata, fafine mo tamaliki katoa mo tino fakaatea kona e nofo i otou fa‵kai, ko te mea ke lagona ne tino katoa kae ke iloa foki ne latou o fakaaloalo ki te Aliki te otou Atua kae fakalogo mo te fakamaoni ki ana akoakoga. I te faiga tena, ka lagona ei te Tulafono a te Aliki te otou Atua ne otou tino kola e seki lagona eiloa ne latou.” (Teutelonome 31:​11-13) Ne ‵tau o fakalogo Iesu ki te Tulafono, kae i te taimi ko 12 fua ei ana tausaga ne fakaasi atu ne ia me e fia malamalama a ia i tulafono a tena Tamana. (Luka 2:​41-49) Fakamuli loa, ne masani sāle o fakalogologo kae kau atu foki ki faitauga o te Tusi Tapu i te sunako. (Luka 4:16; Galuega 15:21) Se mea ‵lei foki mō talavou i aso nei ke tau‵tali atu ki te fakaakoakoga a Iesu mai i te fai‵tau sāle ki te Muna a te Atua i aso katoa, mo te ‵kau sāle atu foki ki fakatasiga kolā e fai‵tau kae suke‵suke i ei ki te Tusi Tapu.

Te Faitau ki te Tusi Tapu​—⁠Se Mea Tāua ‵Ki

9. (a) Kaia e ‵tau ei o kai filifili e uiga ki mea kolā e fai‵tau tatou ki ei? (e) Ne a muna a te tino telā ne kamata ne ia te mekesini tenei e uiga ki tusi kolā e fakamatala mai ei te Tusi Tapu?

⁹ Ne tusi mai penei te tupu poto ko Solomona: “E seai se gatamaiga o te tusitusiga o tusi, kae kafai ko to tauloto malosi koe, ka fi‵ta foki koe.” (Failauga 12:12) Kae e mafai foki o fai atu me e se gata fua i te fi‵ta o se tino māfai e faitau ne ia a te lasiga o tusi kolā e ‵lomi i aso nei, kae ko te ‵tonuga loa e fakamataku foki ke fai penā. Tela la, e tāua ‵ki te kai filifili filifili faka‵lei ki ei. E se gata fua i te fai‵tau sāle ki tusi kolā e fakamatala mai te Tusi Tapu, kae e ‵tau foki o fai‵tau eiloa tatou ki te Tusi Tapu. Ne tusi atu penei te tino telā ne kamata ne ia te mekesini tenei ki tino kolā ne fai‵tau sāle ki ei: “Ke mo a ma puli i a koutou me i te Tusi Tapu ko te ‵tou Fakavae, kae faitalia me e pefea te aogā o ‵tou tusi fesoasoani kolā ne maua ne tatou mai te Atua, e fai fua a tusi konā mo fai ne ‘fesoasoani’ kae e se ‵tau o sui i ei te Tusi Tapu.”a Tela la, e tiga eiloa e se fakata‵mala tatou ki te faitauga o tusi kolā e fakavae ki te Tusi Tapu, e ‵tau foki o fai‵tau sāle tatou ki te Tusi Tapu.

10. Ne faka‵mafa mai pefea ne “te tavini fakamaoni kae poto” a te tāua o te faitau sāle ki te Tusi Tapu?

¹⁰ Ona ko te iloa ‵lei o te tāua o te mea tenā, ko oti ne fakatoka sāle ne “te tavini fakamaoni kae poto” i te fia o tausaga a te faitauga ki te Tusi Tapu e pelā me se vaega o te polokalame o te Akoga Seokalatika mō te Galuega Fakafaifeau i fakapotopotoga takitasi. (Mataio 24:45) A te fakasologa telā e fakaaogā nei mō te faitauga ki te Tusi Tapu e fakaoti sāle ei te Tusi Tapu kātoa i taki fitu tausaga. E aogā te fakasologa tenā ki tino katoa kae maise eiloa ko tino ‵fou kolā ne seki fai‵tau ki te Tusi Tapu kātoa. E ‵tau mo tino kolā e a‵koga i te Akoga Faka-te-Tusi Tapu a te Faleleoleo Maluga ko Kiliata, mo te Akoga Telā e Fakamasani ei a Faifeau, penā foki loa mo tino ‵fou i te Peteli o fai‵tau ki te Tusi Tapu kātoa i se tausaga e tasi. Faitalia me se a te fakasologa telā e tautali atu koe ki ei, ko koe io me ko tou kāiga, e ‵tau eiloa o fakatāua malosi ne koe te faitauga ki te Tusi Tapu ko te mea ke tautali faka‵lei atu ki te fakasologa tenā.

Ne a Mea e Fakaasi Mai i Tau Faitau Sāle?

11. E mafai pefea ne tatou o ‵kai ki muna a Ieova i aso katoa, kae kaia e ‵tau ei o fai penā?

¹¹ Kafai e faigata ki a koe ke tautali faka‵lei atu ki se fakasologa o faitauga ki te Tusi Tapu, kāti e ‵lei ke fesili ifo koe penei: ‘E a, e fakalavelave mai a tusi kolā e faitau sāle au ki ei mo toku onoono sāle ki te TV ki taku faitau sāle ki te Muna a Ieova?’ Ke masaua a mea kolā ne tusi ne Mose​—⁠kae ne toe siki mai ne Iesu​—⁠me “e se na ko meakai fua e ola ei te tino, ka ko muna katoa kola e ‵to mai i te gutu o te Atua.” (Mataio 4:4; Teutelonome 8:⁠3) E pelā mo te ‵kai sāle o tatou ki meakai i aso katoa ko te mea ke tumau te malosi o ‵tou foitino, e ‵tau foki o mafau‵fau sāle tatou ki manatu o Ieova i aso katoa ko te mea ke tumau tatou i te malosi i te feitu faka-te-agaga. E mafai o mafau‵fau tatou ki manatu o te Atua i aso katoa māfai e fai‵tau tatou ki te Tusi Tapu.

12, 13. (a) Se a te tala fakatusa telā ne fakaaogā ne te apositolo ko Petelu e uiga ki te fakamalosiga ke maua te fiafia ki te Muna a te Atua? (e) Ne ‵kese pefea te auala ne fakaaogā ei ne Paulo a te tala fakatusa ki te susu i lō Petelu?

¹² Kafai e iloa tonu ne tatou me i te Tusi Tapu “e se ko pati a tāgata, kae ko te tonuga loa, ko te muna eiloa a te Atua,” ka fia‵fia malosi tatou ki ei e pelā eiloa mo te fia inu o se pepe ki te susu o tena mātua. (1 Tesalonia 2:13) Tenā loa te tala fakatusa telā ne fakaaogā ne te apositolo ko Petelu i tena tusi, penei: “Ke fai koutou e pela mo ne tamaliki fatoa fa‵nau, kola ka ‵mate i te fia inu ki te tinā susu faka te Agaga, me kafai e inu koutou ki ei, e ‵tupu ake koutou i ei, kae ola foki i ei. E pela mo muna a te Tusi, ‘Ko oti ne iloa ne koutou a te alofa kaimalie o te Aliki.’ ” (1 Petelu 2:​2, 3) Kafai ko iloa tonu ne tatou i ‵tou olaga totino “te alofa kaimalie o te Aliki,” ka tupu aka i ei te ‵tou fia faitau ki te Tusi Tapu.

¹³ Ke masaua foki me ne ‵kese te auala ne fakaaogā ei ne Petelu a te tala fakatusa ki susu, i lō te apositolo ko Paulo. E kātoa ‵lei a mea kolā e ‵tau o maua ne te pepe fou i te susu. E fakaasi mai ne te tala fakatusa a Petelu me e maua ne tatou i te Muna a te Atua a mea katoa kolā e ‵tau o maua ne tatou ke “‵tupu ake” kae “ke ola foki i ei.” Kae ne ‵kese te tala fakatusa a Paulo, me ne fakaaogā ne ia te susu ke fakauiga ki te sē ‵lei o mea kolā ne ‵kai sāle ki ei a tino kolā ne fai mai me i a latou e ma‵tua ‵lei i te feitu faka-te-agaga. Ne tusi atu penei a Paulo i tena tusi ki Kelisiano Epelu: “Ne lava ‵lei eiloa a te taimi ne ‵tau ei koutou o fai mo faiakoga, kae nei koi ma‵nako eiloa koutou ki se tino ke akoako atu ne ia ki a koutou a akoakoga kamata o te muna a te Atua. Ko tona uiga, ko ‵tau koutou o ‵kai ki meakai ma‵keke, kae nei koi ma‵nako eiloa koutou o inu susu. So se tino koi inu susu, koi tamaliki eiloa a ia, e se iloa foki ne ia a te ‵lei mo te masei. A meakai ma‵keke e mo tino ma‵tua fua, kola ko oti ne akoako ke iloa ne latou o tami ki te kesekesega o te ‵lei mo te masei.” (Epelu 5:​12-14) Kafai e fai‵tau faka‵lei tatou ki te Tusi Tapu, ka fesoasoani malosi mai i ei ki a tatou ke fakamalosi aka te ‵tou atamai penā foki loa mo te ‵tou fia‵kai ki mea faka-te-agaga.

Te Auala ke Faitau ei ki te Tusi Tapu

14, 15. (a) Se a te tauliaga telā e tuku mai ne te Tino telā ne māfua mai i ei te Tusi Tapu? (e) Ne a mea aogā e mafai o maua ne tatou i te poto mai te Atua? (Ke taku mai ne tala.)

¹⁴ E se kamata te ‵toe faitauga aogā ki te Tusi Tapu mai i te faitau ki ei, kae e kamata eiloa ki te ‵talo. A te faiga o ‵talo se tauliaga fakaofoofogia eiloa. E fai pelā me koi tuai o faitau koe ki se tusi e uiga ki se mataupu ‵loto ko fesili atu muamua koe ki te tino telā ne tusi ne ia te tusi tenā ke fesoasoani atu ki a koe ke maina ‵lei i mea kolā ka faitau koe ki ei. E pefea te aogā o te faiga tenā! E fai mai te tino telā ne tusi ne ia te Tusi Tapu, ko Ieova, me e mafai o taulia koe penā. Ne tusi atu penei se tino o te potukau pule i te senitenali muamua ki ana taina: “Kafai se tino o koutou e se maua ne ia te poto, e ‵tau mo ia o ‵talo ki te Atua, me ko ia tena ka tuku mai ne ia ki a ia; me i te Atua e tuku mai fua ne ia te poto ki tino katoa i te agaga alofa mo te kaimalie. E ‵tau mo koutou o ‵talo mo te fakatuanaki, kae sa fakalotoloto lua.” (Iakopo 1:​5, 6) E fakamalosi mai faeloa foki te Potukau Pule i aso nei ke fai‵tau tatou ki te Tusi Tapu fakatasi mo te faiga o ‵talo.

¹⁵ A te poto ko te fakagalue faka‵lei aka o mea kolā e iloa ne se tino. Tela la, a koi tuai o ‵suke koe ki tau Tusi Tapu, ke fakamolemole atu muamua koe ki a Ieova ke fesoasoani atu ki a koe ke mate mai ne koe a manatu i mea kolā e faitau koe ki ei kae e ‵tau o fakaaogā ne koe i tou olaga. Ke fakafetaui aka a mea ‵fou kolā e tauloto koe ki ei mo mea kolā ko oti ne iloa ne koe. Ke fakafetaui aka a mea konā “ki faifaiga o muna ‵lei” kolā ko iloa ne koe. (2 Timoteo 1:13) Ke na mafaufau ‵mafa ki mea kolā ne ‵tupu i olaga o tavini a Ieova i aso ko ‵teka, kae ke fesili ifo koe me ne a mea ka fai ne koe moi ne tupu se vaegā mea penā ki a koe.​—⁠Kenese 39:​7-9; Tanielu 3:​3-6, 16-18; Galuega 4:​18-20.

16. Ne a manatu aogā e fesoasoani mai ke momea aka te aogā o te ‵tou faitauga ki te Tusi Tapu?

¹⁶ Sa faitau fua ke fakaoti ne koe se aofaki o itulau. Sa fakavavave. Ke mafaufau malie aka ki mea kolā e faitau koe ki ei. Kafai e fia maina koe i se manatu e tasi, ke na onoono ki nisi tusi siki kolā e tusi i tafa i ei māfai e isi ne vaegā mea penā i tau Tusi Tapu. Kafai koi se maina ‵lei koe i ei, ke na tusi ki lalo te fesili tenā ko te mea ke sukesuke fakamuli koe ki ei. Kafai e faitau koe ki ei, ke na fakamailoga ne koe a tusi siki kolā e fia masaua ne koe io me ke laga aka a tusi siki konā. Kāti ke tusi foki ne koe ne manatu io me ne tusi siki fakaopoopo i koga i tafa i ei. Kafai e isi ne tusi siki kolā e manatu aka koe me ka fakaaogā fakamuli ne koe i te galuega talai mo te faiga o akoga, ke onoono aka ki pati tāua i te tusi siki tenā kae ‵suke ki te fakasologa o pati i te vaega fakaoti o tau Tusi Tapu me maua i ei me ikai.b

Ke na Fiafia Koe ki te Faitauga ki te Tusi Tapu

17. Kaia e ‵tau ei o fia‵fia tatou ki te ‵tou faitauga ki te Tusi Tapu?

¹⁷ Ne faipati te faisalamo e uiga ki te tagata fiafia telā ne “fia‵fia o fai‵tau ki Tulafono a te Aliki, kae mafaufau ‵loto foki ki ei i te ao mo te po.” (Salamo 1:⁠2) E se ‵tau o fai fitoi fua te ‵tou faitauga ki te Tusi Tapu i aso katoa, kae e ‵tau o fia‵fia malosi tatou ki ei. E tasi te auala e fai ei ke fia‵fia tatou ki ei ko te masaua faeloa o te aogā o mea kolā e tau‵loto tatou ki ei. Ne tusi mai penei te tupu poto ko Solomona: “Amutia te tagata e maua ne ia te poto mo te malamalama. . . . A te poto e mafai o fai ne ia tou olaga ke tokagamalie, kae saogalemu. A latou kola e maua ne latou te poto e fiafia; kae maua foki ne latou te ola.” (Faataoto 3:​13, 17, 18) E aogā so se taumafaiga ke maua te poto, me e maua i ei te tokagamalie, te filemu, te fiafia, kae fakamuli loa e maua i ei te ola.

18. Ne a nisi mea e ‵tau o fai, kae e se ko te faitau fua ki te Tusi Tapu, kae ne a mea ka mafau‵fau tatou ki ei i te suā mataupu?

¹⁸ E tonu, e aogā kae gali te faitau ki te Tusi Tapu. Kae e mata, ko lava loa i konā? Ko oti ne fai‵tau sāle a tino i lotu Kelisiano ‵se ki te Tusi Tapu i te fia selau tausaga, kae “e taumafai ke iloa ne latou a te mea tonu, kae se mafai eiloa.” (2 Timoteo 3:⁠7) Ka fatoā aogā te faitau ki te Tusi Tapu, māfai e fai‵tau tatou ki ei kae e mafau‵fau faeloa me e ‵tau o fakagalue aka a mea kolā e iloa i ei i ‵tou olaga totino, penā foki loa mo te galuega talai mo te faiga o akoga. (Mataio 24:14; 28:​19, 20) E manakogina i ei a taumafaiga mo sukesukega ‵lei, kolā e mafai o aogā kae ‵gali foki, e pelā mo te mea telā ka matea atu ne tatou i te suā mataupu.

[Fakamatalaga fakaopoopo]

Fesili ke Toe Mafaufau ki ei

• Se a te fakatonuga ki tupu o Isalaelu kolā e aogā foki ki ovasia i aso nei, kae kaia?

• Ko oi e fai pelā me ne “tino fakaalofa” mo “tamaliki” i aso nei, kae kaia e ‵tau ei o fai‵tau latou ki te Tusi Tapu i aso nei?

• Ne a auala aogā ne fesoasoani mai ei “te tavini fakamaoni kae poto” ki a tatou ke fai‵tau sāle ki te Tusi Tapu?

• E mafai pefea o aogā kae gali ki a tatou te ‵tou fai‵tau sāle ki te Tusi Tapu?

[Ata i te itulau e 19]

E ‵tau eiloa mo toeaina o fai‵tau ki te Tusi Tapu i aso katoa

[Ata i te itulau e 20]

Ne faitau sāle ne Iesu te Tusi Tapu i te sunako