Ke Fakaavanoa te Taimi mō Faitauga mo Sukesukega

“Fakaaoga faka‵lei so se avanoa e maua ne koutou, i te mea ko aso masei a aso nei.”​—⁠EFESO 5:⁠16.

1. Kaia e ‵lei ei ke na fakaeteete tatou i te auala e fakaaogā ei ne tatou ‵tou taimi, kae ne a mea e fakaasi mai e uiga ki a tatou i te auala e fakaaogā ei ne tatou ‵tou taimi?

E ISI se tugāpati penei: “Kafai e filifili faka‵lei a taimi, ko se sōna māumāu i ei a taimi.” E uke atu a mea e fai ne se tino māfai e fakatoka faka‵lei ne ia ana taimi. Ne tusi mai penei te tupu poto ko Solomona: “E isi se itula telā ne fakatoka mō mea katoa, e isi foki se taimi mō mea katoa mai lalo i te lagi.” (Failauga 3:​1, Moffatt) E ‵pau katoa tatou i te uke o taimi e mafai o fakaaogā ne tatou; kae i a tatou loa te auala e fakaaogā ei ne tatou a taimi konā. A mea kolā e fakamuamua ne tatou kae e fakaaogā foki ki ei ‵tou taimi e fakaasi malosi mai i ei a mea kolā e pele i ‵tou loto.​—⁠Mataio 6:⁠21.

2. (a) I tena Lauga i luga i te Mauga, ne a muna a Iesu e uiga ki ‵tou manakoga faka-te-agaga? (e) Se a te iloiloga e ‵tau o fai ne tatou?

² E ‵tau o fakamāumāu sāle ne tatou a taimi i te kai mo te moe me konā loa a manakoga masani o ‵tou foitino. Kae e a ‵tou manakoga faka-te-agaga? E iloa ne tatou me e ‵tau foki o fakamalie aka a manakoga konā. Muna a Iesu i tena Lauga i luga i te Mauga: “Amutia a latou kola e iloa ne latou i a latou e ma‵tiva faka te Agaga.” (Mataio 5:⁠3) Tenā loa te pogai e fakamasaua mai sāle ne “te tavini fakamaoni kae poto” e uiga ki te tāua o te fakaaogāga o ‵tou taimi i te faitauga ki te Tusi Tapu mo te faiga o sukesukega. (Mataio 24:45) Kāti e iloa ‵lei ne koe te tāua o te mea tenā, kae e manatu aka koe me e se lava ou taimi ke sukesuke io me ke faitau ki te Tusi Tapu. Kafai e penā loa, ke na onoono aka tatou ki auala e mafai ei o momea aka te fakaavanoa ne tatou a taimi i ‵tou olaga mō te faitauga ki te Muna a te Atua, te faiga o sukesukega totino, penā foki loa mo avanoaga ke mafaufau faka‵lei ki ei.

Ke Maua a Taimi ke Faitau Kae Sukesuke ki te Tusi Tapu

3, 4. (a) Ne a muna fesoasoani a te apositolo ko Paulo e uiga ki te fakaaogāga o ‵tou taimi, kae ne a mea e aofia i ei? (e) Se a te uiga o pati konei a Paulo “ke fakaaoga faka‵lei so se avanoa”?

³ Ona ko te vaitaimi telā ko ‵nofo nei tatou i ei, e ‵tau mo tatou taki tokotasi o ‵saga atu ki pati konei a te apositolo ko Paulo: “Mafaufau faka‵lei ki auala e ‵tau o ola koutou i ei. Sa ola e pela mo ne tino va‵lea, kae ke pela mo tino ‵poto. Fakaaoga faka‵lei so se avanoa e maua ne koutou, i te mea ko aso masei a aso nei. Sa fakavale‵vale, kae taumafai o salasala ake, me se a te mea e loto ki ei te Aliki ke fai ne koutou.” (Efeso 5:​15-17) E tonu, e aogā a pati konā ki vaega katoa o ‵tou olaga e pelā me ne Kelisiano tukugina atu, kae e aofia foki i ei te fakaavanoaga o taimi mō te faiga o ‵talo, sukesukega, fakatasiga, penā foki loa mo te kau malosi atu ki te talaiga o “te Tala ‵Lei e uiga ki te Malo.”​—⁠Mataio 24:14; 28:​19, 20.

⁴ E foliga mai pelā me e faigata ki tavini e tokouke a Ieova i aso nei ke fakaavanoa i olotou olaga a taimi mō te faitauga ki te Tusi Tapu mo te faiga o sukesukega ki mea ‵loto. E mautinoa eiloa, me e se mafai ne tatou o fakaopoopo atu se itula e tasi ki te leva o te aso. Tela la, e se fakauiga a pati a Paulo ke fai se mea penā. I te ‵gana Eleni, e fakauiga te tugāpati ke “fakaaoga faka‵lei so se avanoa” e pelā me e se ‵togi se mea e tasi ko te mea ke mafai o ‵togi te suā mea. I tena tusi ko te Expository Dictionary, ne fai mai a W. E. Vine me e fakauiga te pati tenā pelā me “e fakaaogā katoatoa so se avanoaga, ke fakagalue faka‵lei a avanoaga konā me e se mafai o toe maua mai a avanoaga kolā ko ‵galo atu.” Kae ne a mea e mafai o tiaki ko te mea ke fakaavanoa a taimi ke faitau kae sukesuke ki te Tusi Tapu?

E ‵Tau o Filifili Aka a Mea Tāua

5. Kaia e ‵tau ei mo tatou o iloa o “filifili a te mea e sili atu i te ‵lei,” kae e mafai pefea o fai ne tatou te mea tenā?

⁵ E se gata i ‵tou tiute masani i te olaga nei, e uke foki a mea faka-te-agaga kolā e ‵tau o ‵saga atu tatou ki ei. E pelā me ne tavini a Ieova kolā ne tukugina atu ki a ia, ‘e ga‵lue malosi tatou i te galuega a te Aliki.’ (1 Kolinito 15:58) Ona ko te pogai tenā, ne fakatonu atu a Paulo ki te kau Kelisiano i Filipi ‘ke iloa ne latou o filifili a te mea e sili atu i te ‵lei.’ (Filipi 1:10) Ko tena uiga e ‵tau o filifili aka me ne a mea e tāua. E ‵tau o fakamuamua faeloa a mea faka-te-agaga i lō mea faka-te-foitino. (Mataio 6:​31-33) Kae e ‵tau o fuafua faka‵lei aka te tausiga o ‵tou tiute faka-te-agaga. E vaevae aka pefea ne tatou ‵tou taimi i vaega kese‵kese o te ‵tou olaga faka‵Kelisiano? E lipoti mai ne ovasia faima‵laga me e fakata‵mala sāle a nisi Kelisiano ki “mea e sili atu i te ‵lei” e ‵tau o saga ki ei, e pelā mo te faiga o sukesukega totino mo te faitauga ki te Tusi Tapu.

6. Ne a mea kāti e aofia i ei te fakaaogāga faka‵lei ne tatou o so se avanoa i te feitu e uiga ki ‵tou galuega ‵togi mo ‵tou galuega i te fale?

⁶ E pelā mo mea ko oti ne fai‵pati tatou ki ei, e aofia sāle i te fakaavanoaga o taimi ‵lei a te ‘fakaaogā katoatoa o so se avanoaga,’ mo te ‘fakagalue faka‵lei o avanoaga konā.’ Tela la, kafai e se ‵lei sāle ‵tou faifaiga i te faitauga ki te Tusi Tapu mo te faiga o sukesukega, kāti se mea ‵lei ke na iloilo faka‵lei aka ne tatou te auala e fakaaogā ei ne tatou ‵tou taimi. Kafai ko tō uke a mea e ‵tau o fai ne tatou i ‵tou galuega ‵togi, ko tō lasi te taimi mo fi‵taga e fai i ei, e ‵tau mo tatou o ‵talo atu ki a Ieova e uiga ki te mea tenā. (Salamo 55:22) Kāti e mafai ne tatou o fai a nisi ‵fuliga ki ‵tou mea e fai ko te mea ke avanoa ei a taimi mō mea kolā e sili atu i te tāua i te faiga o te tapuakiga ki a Ieova, e aofia i ei ko te sukesuke mo te faitau ki te Tusi Tapu. E tonu te tugāpati me e se ti palele a galuega a fāfine. Tela la, e ‵tau eiloa mo tuagane Kelisiano o filifili aka a mea kolā e tāua kae ke fakaavanoa sāle ne latou a taimi mautinoa ke fai‵tau ei latou ki te Tusi Tapu kae ke sukesuke faka‵lei ki ei.

7, 8. (a) E mafai o maua sāle mai fea a avanoaga ke faitau kae sukesuke ki tusi? (e) Se a te pogai e fai ei a fakafiafiaga, kae kafai e masaua ne tatou te pogai tenā ka fesoasoani mai pefea te mea tenā ke filifili aka ne tatou a mea tāua?

⁷ E mafai sāle ne te tokoukega o tatou o taofi aka te faiga o mea kolā e se na lō ko tāua ko te mea ke maua se taimi mo te faiga o sukesukega. Kāti ke fesili ifo tatou penei, ‘E pefea te uke o taimi e fakamaumau ne au ki te faitauga ki mekesini mo nusipepa faka-te-lalolagi, te onoono ki tala i te TV, te fakalogologo ki pese, io me ko te tafao i tafaoga i te vitiō? E mata, e uke atu a taimi e fakamāumāu sāle ne au i te komupiuta i lō te faitau ki te Tusi Tapu?’ Muna a Paulo: “Sa fakavale‵vale, kae taumafai o salasala ake, me se a te mea e loto ki ei te Aliki ke fai ne koutou.” (Efeso 5:17) E foliga mai me i te sōna fakaaogāga o te TV ko te pogai sili e se ti lava sāle ei a taimi e fakamāumāu ne nisi Molimau e tokouke ki te faiga o sukesukega mo te faitauga ki te Tusi Tapu.​—⁠Salamo 101:3; 119:​37, 47, 48.

⁸ Kāti ka fai mai a nisi tino me e se mafai ne latou o fai faeloa a sukesukega i taimi katoa, me e ‵tau foki o malolo malie aka latou. E tiga eiloa kāti e tonu te manatu tenā, se mea ‵lei ke na mafaufau tatou ki te uke o taimi e malolo ei tatou kae ke fakatusa aka te aofaki tenā mo te uke o taimi e fakamāumāu sāle ne tatou ki te sukesuke mo te faitau ki te Tusi Tapu. Kāti ka ‵poi tatou i ei. E tiga eiloa e tāua a fakafiafiaga mo malologa, e ‵tau o fakaeteete ke mo a ma sōnafai valevale a mea konā. E ‵tau o fai a mea konā ke toe ma‵losi tatou o ‵kau atu ki mea faka-te-agaga. E fita fua se tino māfai e onoono a ia ki nisi tala i te TV io me e tafao a ia i nisi tafaoga i vitiō. Kae ko te faitau mo te sukesuke ki te Muna a te Atua e fakamalosi sāle mai ki a tatou kae e fakafou aka i ei te ‵tou malosi.​—⁠Salamo 19:​7, 8.

Te Auala e Fakaavanoa Sāle ei ne Nisi Tino a Taimi mō te Faiga o Sukesukega

9. E aogā pefea te tautali atu ki pati i te tamā tusi ko te Ke Sukesuke ki te Tusi Tapu i Aso Katoa​—⁠1999?

⁹ Ne fai mai penei a pati fakatomua i te tamā tusi ko te Ke Sukesuke ki te Tusi Tapu i Aso Katoa i te 1999: “Se mea tafasili i te aogā ke mafaufau ki te tusi siki mō te aso mo te fakamatalaga mai te tamā tusi tenei i te taeao. Ka lagona ne koe e pelā me ko Ieova, telā ko te Faiakoga Sili, e fakaaogā ana fakatonuga ke ‵fagu aka ei koe. Ne fakamatala fakavaloaga mai e uiga ki a Iesu Keliso e pelā me e maua ne ia te aogā o fakatonuga mai i a Ieova i taeao katoa: “I taeao katoa, e fai ne [Ieova] toku loto ke fiafia o fakalogo ki ana akoakoga.” Ona ko fakatonuga konā, ne iloa ne Iesu a “muna e tau o fai ne [ia], ko te mea ke mafai ne [ia] o fakamalosi a loto o tino loto vaivai.” (Isa. 30:​20, NW; 50:4; Mata. 11:​28-30) A te ‵fagu aka i taeao katoa ki polopolokiga mai te Muna a te Atua kolā e aogā mō te vaitaimi nei ka fesoasoani atu ki a koe ke fakafesagai atu ki ou fakalavelave kae ka fakatoka ei koe ke iloa ne koe a “muna e tau o fai” atu ke fesoasoani atu ki nisi tino.”a

10. E fakaavanoa pefea ne nisi tino a taimi mō te faitau mo te sukesuke ki te Tusi Tapu, kae ne a mea aogā e maua i ei?

¹⁰ E tau‵tali atu a Kelisiano e tokouke ki pati konā mai i te fai‵tau sāle ki tusi siki mo tena fakamatalaga i aso katoa, mo te fai‵tau foki ki te Tusi Tapu mo te faiga o sukesukega i tafataeao katoa. I Falani, e alausu sāle te paenia fakamaoni e tokotasi kae e fakamāumāu ne ia se 30 minute ki te faitauga ki te Tusi Tapu. Ne mafai pefea ne ia o fai penā i te fia o tausaga? Ana muna: “E fakatāua malosi ne au te faiga tenā, kae e faitau faeloa au ki ei faitalia me ne a mea e ‵tupu!” Faitalia me se a te taimi i te aso telā e filifili aka ne tatou ke fai a faitauga konā, a te mea tāua ko te fakamaoni ki ei. Ne fai mai penei a René Mica, telā ne galue pelā me se paenia i tausaga e 40 i Eulopa mo Afelika ki Mātū: “Talu mai te 1950 ne kausaki faeloa au ke faitau ki te Tusi Tapu kātoa i tausaga katoa. Kae ko oti ne faitau au ki ei e faka-49 taimi. I taku faka‵tau e ‵tau o fai ne au te mea tenā ke tumau ei te ‵lei o te va o maua mo toku Atua. Kafai e mafaufau ‵loto au ki te Muna a te Atua e fesoasoani mai i ei ke momea aka toku maina i faifaiga fakamaoni a Ieova penā foki loa mo nisi uiga o ia, kae e uke ‵ki a fakamalosiga e maua sāle ne au i ei.”b

“Olotou Meakai i Taimi e ‵Kai ei Latou”

11, 12. (a) Ne a “meakai” faka-te-agaga e fakasoa sāle mai ne “te tavini fakamaoni kae poto”? (e) Ne fakasoa mai pefea a “meakai” konā i te taimi tonu?

¹¹ E pelā mo te fesoasoani atu o te kai sāle ki te malosi ‵lei o te foitino, a te sukesuke mo te faitau sāle o se tino ki te Tusi Tapu i se fakasologa masani ka fesoasoani atu i ei ke malosi a ia i te feitu faka-te-agaga. E fai‵tau tatou ki pati konei a Iesu i te Evagelia a Luka: “Ko oi la te tavini fakamaoni kae poto, tela ka ‵tofi ne tona pule ke fai mo ulu o te fale katoa, kae ka fakasoa atu foki ne ia ki nisi tavini olotou meakai, i taimi e ‵kai ei latou?” (Luka 12:42) Ko 120 tupu tausaga nei, ne fakasoa mai faeloa ne Te Faleleoleo Maluga, penā foki loa a nisi tusi kolā e fakamatala mai te Tusi Tapu a “meakai i te taimi tonu.”

¹² Ke onoono aka ki te tugāpati tenei “i te taimi tonu.” E alatu i tena Tama mo te potukau e pelā me se tavini, e takitaki ne te tino telā e “akoako” ne ia tatou, ko Ieova, ana tino e uiga ki akoakoga mo amioga. E fai pelā me ne lagona ne tatou katoa a te leo telā ne fai mai penei: “Kafai ko se te auala o koutou ki te feitu fakaatamai io me ko te feitu fakamaui, kae ka lagona ne koutou tena leo i otou tua e fai penei, ‘Tenei te auala. Tautali i ei.’ ” (Isaia 30:​20, 21) Kafai e fai‵tau faka‵lei a tino ki te Tusi Tapu mo tusi faka-te-Tusi Tapu katoa, e ma‵natu sāle aka latou me e fakauiga eiloa a manatu i ei ki a latou. E tonu, ka oko mai a pati fesoasoani mai te Atua ki a tatou i te taimi tonu, kae ka fai ei ke mafai ne tatou o ‵teke atu ki fakaosoosoga io me ke fai se filifiliga poto.

Ke Fakamasani Koe ki te Kai Faka‵lei

13. Ne a mea e fakaasi mai i ei me e se ‵lei te kai o se tino ki mea faka-te-agaga?

¹³ E ‵tau o iloa ne tatou o ‵kai faka‵lei ko te mea ke maua ne tatou a mea aogā mai i vaegā “meakai” kolā e tuku mai i te taimi tonu. Se mea tāua ‵ki ke fakatoka se fakasologa masani mō faitauga ki te Tusi Tapu mo te faiga o sukesukega, kae e ‵tau eiloa o tu mautakitaki i ei. E mata, e ‵lei tau kai ki meakai faka-te-agaga kae e isi foki ne taimi e fakatoka sāle ne koe ke sukesuke ki fakamatalaga kolā e tai ‵loto? Io me e faitau fakavave fua koe ki fakamatalaga kolā ne fakatoka faka‵lei mō tatou, e pelā me e folo fakavave fua ne koe a meakai konā, io me e se ti kai sāle koe ki ei? Ona ko te sē kai faka‵lei ko gasolo ei o vāivāi te fakatuanaki o nisi tino​—⁠kae ko olo keatea foki latou.​—⁠1 Timoteo 1:19; 4:​15, 16.

14. Kaia e aogā ei ke onoono faka‵lei ki fakamatalaga kolā kāti e foliga mai pelā me ko oti ne iloa ne tatou?

¹⁴ E ma‵natu aka a nisi tino me ko iloa ne latou a akoakoga fakavae kae e se maua foki a fakamatalaga ‵fou i mataupu katoa i ‵tou mekesini. Telā kāti ko se tāua ei te faiga o sukesukega ‵lei mo te ‵kauatuga foki ki fakatasiga. Kae e fakaasi mai ne te Tusi Tapu me e ‵tau o fakamasaua mai ki a tatou e uiga ki mea kolā ko oti ne tau‵loto ne tatou. (Salamo 119:​95, 99; 2 Petelu 3:1; Iuta 5) E pelā mo te tino poto i te kuka e fakatoka sāle ne ia a meakai masani i auala ‵gali kesekese, e fakatoka foki ne te potukau pelā me se tavini a meakai ‵lei i te feitu faka-te-agaga i auala kese‵kese e uke. Ke oko foki loa ki nisi mataupu kolā e faipati ki mea kolā ko oti ne fai‵pati fakafia tatou ki ei, e isi ne tamā manatu i ei kolā e se ‵tau o ‵galo i a tatou. A te ‵tonuga loa, ko te uke o taimi mo taumafaiga kolā e fakamāumāu ne tatou ki te faiga o sukesukega, ko te uke foki o mea aogā kolā ka maua ne tatou mai i tusi kolā e fai‵tau tatou ki ei.

Mea Aogā i te Feitu Faka-te-Agaga Kolā e Maua Mai i te Faitau mo te Sukesuke

15. E fesoasoani mai pefea te faitau mo te sukesuke ki te Tusi Tapu ke momea aka te ‵lei o tatou e pelā me ne faifeau o te Muna a te Atua?

¹⁵ E se lausia te fia o mea aogā kolā e maua ne tatou mai i te faitau mo te sukesuke ki te Tusi Tapu. E fesoasoani mai i ei ki a tatou ke fai te tiute e tasi telā e panaki tonu mo Kelisiano, ko te “taumafai malosi o tuku atu koe ki te Aliki e pela mo . . . se tino galue tela e se ‵tau mo ia o taema ki se mea, kae se tino e akoako tonu eiloa ne ia a te munatonu a te Atua.” (2 Timoteo 2:15) Ko te uke o taimi e faitau kae sukesuke tatou ki te Tusi Tapu, ko te uke foki o taimi e faka‵fonu ei ‵tou mafaufau ki manatu o te Atua. Kafai e fai penā, ka mafai ei ne tatou o fai pelā mo Paulo kae “fakamatala kae fakapatonu atu” mai i te Tusi Tapu ki tino a te munatonu fakaofoofogia e uiga ki fuafuaga a Ieova. (Galuega 17:​2, 3) Ka momea aka te ‵tou atamai i te faiga o akoakoga, kae ka momea aka foki te fakamalosi loto o ‵tou sautalaga, ‵tou lauga, mo ‵tou pati fakatonutonu i te feitu faka-te-agaga.​—⁠Faataoto 1:⁠5.

16. Ne a aogā totino e maua sāle ne tatou māfai e fai‵tau kae sukesuke ki te Muna a te Atua?

¹⁶ E se gata fua i konā, kafai e fakamāumāu ne tatou a taimi ke sukesuke ki te Muna a te Atua, ka mafai ei ne tatou o momea aka te fakafetaui aka o ‵tou olaga ki auala o Ieova. (Salamo 25:4; 119:​9, 10; Faataoto 6:​20-23) Ka fakamalosigina i ei ‵tou uiga faka-te-agaga, e pelā mo te loto maulalo, te fakamaoni, mo te fiafia. (Teutelonome 17:​19, 20; Fakaasiga 1:⁠3) Kafai e fakagalue aka ne tatou a te iloaga telā e maua ne tatou māfai e fai‵tau kae sukesuke tatou ki te Tusi Tapu, e se ‵lave i ei te galuega a te agaga o te Atua i ‵tou olaga, kae ka iku atu i ei ki te ‵fua malosi mai o fuataga o te agaga tenā i mea katoa kolā e fai ne tatou.​—⁠Kalatia 5:​22, 23.

17. E pefea te tāua o te uke mo te ‵lei o ‵tou faitauga mo ‵tou sukesukega ki te Tusi Tapu ki te va o tatou mo Ieova?

¹⁷ Kae ko te ‵toe mea tāua, kafai e fakaavanoa ne tatou a taimi mai i nisi faifaiga ko te mea ke fai‵tau kae sukesuke tatou ki te Muna a te Atua, ka maua ne tatou i ei te fia o taui ‵lei e uiga ki te va o tatou mo te Atua. Ne ‵talo atu a Paulo ke ‘faka‵fonu ana taina Kelisiano i te iloa o te loto o te Atua, i poto katoa mo te iloa faka-te-agaga, ke takitaki ei se olaga e aoga mō te Aliki, e fonu i mea e fakafiafia ki a ia.’ (Kolose 1:​9, 10) Kafai e fia maua ne tatou ‘se olaga e aoga mō Ieova,’ e ‵tau foki o ‘faka‵fonu tatou i te iloa o te loto o te Atua, i poto katoa mo te iloa faka-te-agaga.’ E manino ‵lei i ei, me e fakalagolago malosi atu te ‵tou mauaga o fakamanuiaga mo te taliaga mai i a Ieova ki te uke mo te ‵lei foki o ‵tou faitauga mo ‵tou sukesukega ki te Tusi Tapu.

18. Ne a fakamanuiaga e mafai ne tatou o maua māfai e tau‵tali atu tatou ki muna a Iesu kolā ne tusi ki lalo i te Ioane 17:⁠3?

¹⁸ “Kae tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:⁠3) Tenā loa te tusi siki e tasi e fakaaogā sāle ne Molimau a Ieova ke fesoasoani atu ki nisi tino ke iloa ne latou te tāua o te sukesuke ki te Muna a te Atua. E ‵pau eiloa te tāua ke na fai foki ne tatou taki tokotasi a te mea tenā. E fakalagolago atu eiloa te ‵tou fakamoemoega ke ola ki te se-gata-mai, ki luga i te ‵tou gasolo atu ki mua i te iloaga e uiga ki a Ieova, penā foki loa mo tena Tama, ko Iesu Keliso. Kae ke na mafaufau ki tena uiga. Ka seai se gatamaiga o mea kolā ka tauloto ne tatou e uiga ki a Ieova​—⁠kae ka tau‵loto tatou e uiga ki a ia ke oko eiloa ki te se-gata-mai!​—⁠Failauga 3:11; Loma 11:⁠33.

[Fakamatalaga fakaopoopo]

Fesili ke Toe Mafaufau ki ei

• Ne a mea e fakaasi mai i te auala e fakaaogā ei ne tatou ‵tou taimi?

• Ne a avanoaga e mafai o maua mai i nisi faifaiga ko te mea ke fai‵tau kae suke‵suke tatou ki te Tusi Tapu?

• Kaia e ‵tau ei o fakaeteete tatou i te auala e ‵kai ei tatou ki meakai faka-te-agaga?

• Ne a mea aogā e mafai o maua ne tatou mai i te faitau mo te sukesuke ki te Tusi Tapu?