E Mafai o ‵Mā Faeloa Au Amioga
“Me e tenei te uiga o te alofa ki te Atua: ko te fakalogo ki ana fakatonuga.”—1 IOANE 5:3.
1. Se a te ‵kese i amioga kolā e matea atu i tino i aso nei?
KO LEVA ne fakaosofia ne te Atua te pelofeta ko Malaki ke ‵valo mai te taimi ka ‵tu ‵kese ei a amioga a tino o te Atua mai i tino kolā e se tavini atu ki te Atua i se auala e mateagofie. Ne tusi mai penei te pelofeta tenā: “Ka toe kilokilo a mata o oku tino ki te mea ka tupu ki tino amio tonu mo te mea ka tupu ki tino ma‵sei; pela foki ki te tino e tavini mai ki a au mo te tino e se fia tavini mai ki a au.” (Malaki 3:18) Ko fakataunu mai te valoaga tenā i aso nei. E poto kae e tonu foki te fakalogo ki fakatonuga a te Atua, e aofia i ei ko ana fakatonuga e uiga ki amioga ‵lei. Kae e se faigofie faeloa ke fai penā. E se tioa eiloa o fai mai a Iesu me i Kelisiano e ‵tau eiloa o kausaki atu ke maua te fakaolataga. —Luka 13:23, 24, NW.
2. Ne a fakaosoosoga e fai ei ke faiga‵ta ki nisi tino ke tumau i amioga ‵ma?
2 Kaia e faigata ei ke tumau i amioga ‵ma? E tasi te pogai ko te uke o fakaosoosoga. E fakafoliga mai ne pisinisi kolā e fai ei ke fakafiafia atu ki tino a te moe valevale e pelā me se mea gali, e fakamalie loto, kae se faiga masani foki a tino ma‵tua. Kae e se ‵saga atu foki latou ki mea ma‵sei kolā e mafai o iku mai i ei. (Efeso 4:17-19) A te lasiga o tala e fakaasi mai i ei a tino kolā e ‵moe fakatasi kae e se avaga. E fakaasi sāle mai ne tamunei mo TV a tala o tino kolā e ‵moe fakatasi e pelā me se tafaoga, kae e se fai olotou avaga. E se ti fakatau a‵lofa io me fakatau āva sāle latou. E kilo‵kilo sāle atu a nisi tino e tokouke ki vaegā tala penā talu mai te lotou fo‵likiga. Kae e uke a fakamalosiga e maua sāle mai nisi tino ke tau‵tali atu tatou ki amioga fai valevale i aso nei. Kae kafai e se tautali atu se tino ki ei e fakatauemu kae fakalili sāle atu ki a ia.—1 Petelu 4:4.
3. Ne a nisi pogai e amio ma‵sei sāle ei a tino e tokouke i te lalolagi?
3 E faigata foki ke tumau tatou i amioga ‵mā ona ko vāivāiga o ‵tou loto. Ne faite ne Ieova a manakoga fakatauavaga i loto i tino, kae e mafai o malosi ‵ki a manakoga konā. E mafua sāle ‵tou manakoga i mea kolā e mafau‵fau tatou ki ei, kae e mafua mai a amioga sē ‵tau i mafaufauga kolā e se fetaui tonu mo manatu o Ieova. (Iakopo 1:14, 15) E pelā mo te sukesukega telā ne fai fakamuli nei kae ne fakamatala mai i te tusi ko te British Medical Journal, a te tokoukega o tino kolā ne ‵moe fakatasi mo te suā tino i te taimi muamua, ne fai penā ona ko te fia tofotofo aka ki ei. Ne tali‵tonu a nisi tino me ko oti ne ‵moe tasi te tokoukega o tino i te lotou kautama mo se isi tino, telā ne seki fia tumau ei latou i amioga ‵mā. Kae ne fai mai a nisi tino me ne taka‵vale latou i olotou manakoga io me ne “konā malie i te taimi ne tupu ei te mea tenā.” Kafai e ma‵nako tatou ke fakafiafia atu ki te Atua, e ‵tau o ‵kese ‵tou manatu mai i manatu konā. Ne a vaegā manatu ka fesoasoani mai ki a tatou ke tumau i amioga ‵mā?
Ke Fakamalosi Aka ‵Tou Talitonuga
4. Ne a mea e ‵tau mo tatou o fai ko te mea ke tumau tatou i amioga ‵lei?
4 Ke tumau tatou i amioga ‵lei, e ‵tau o iloa tonu ne tatou me e aogā a vaegā amioga penā ki a tatou. E fetaui ‵lei te manatu tenā mo pati kolā ne tusi atu ne te apositolo ko Paulo ki te kau Kelisiano i Loma: “Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” (Loma 12:2) E se gata fua i te iloa me e taku fakamasei ne te Muna a te Atua a amioga sē ‵lei kae e ‵tau o maina foki tatou me e aogā a amioga ‵mā. E aofia foki i ei te malamalama i pogai e taku fakamasei ei a amioga sē ‵mā, penā foki loa mo te auala e maua ei ne tatou a mea aogā māfai e ‵kalo keatea tatou mai i ei. Ko oti ne mafau‵fau tatou ki nisi pogai konā i te suā mataupu.
5. Se a te ‵toe pogai tāua e ‵tau ei o tumau a Kelisiano i amioga ‵mā?
5 A te ‵tonuga loa, e maua ne Kelisiano a toe pogai tāua ke ‵kalo keatea mai i te finalalolagi ona ko te ‵tou fesokotakiga mo te Atua. Ko iloa ne tatou me e iloa ‵lei ne ia a mea kolā e ‵lei mō tatou. Ka fesoasoani mai te ‵tou a‵lofa ki a ia ke takalia‵lia tatou ki amioga ma‵sei. (Salamo 97:10) “A mea ‵lei katoa kola e maua fua mo meaalofa katoatoa takitasi, e mai te Atua.” (Iakopo 1:17) E alofa mai a ia. Kafai e faka‵logo tatou ki a ia, e fakaasi atu i ei me e a‵lofa tatou ki a ia kae e loto fakafetai foki tatou ki mea kolā ko oti ne fai ne ia mō tatou. (1 Ioane 5:3) E se ma‵nako lele eiloa tatou ke fakafanoanoa kae faka‵mae atu ki a Ieova ona ko te solitulafono ki ana fakatonuga amio‵tonu. (Salamo 78:41) E se ma‵nako foki tatou ke amio i se vaegā auala telā ka taku fakamaseigina i ei tena tapuakiga tapu kae amiotonu. (Tito 2:5; 2 Petelu 2:2) Kafai e tumau tatou i ‵tou amioga ‵lei, ka fakafiafia atu i ei ki te Atua Tafasili i te Maluga. —Faataoto 27:11.
6. Kaia e aogā ei ke na fakailoa atu ki nisi tino me ko oti ne fakaiku aka ne tatou ke ‵lei ‵tou amioga?
6 Kafai ko oti ne fatuaki ‵tou loto ke ‵lei faeloa ‵tou amioga, e maua foki te suā puipuiga māfai e fakailoa atu te mea tenā ki nisi tino. Ke na fakailoa atu ki nisi tino i a koe se tavini a Ieova te Atua kae ko oti ne fakaiku faka‵lei aka ne koe ke fakalogo ki ana tulafono ma‵luga. E pule loa koe i tou ola, tou foitino, mo te faiga o au filifiliga. Se a te mea e mafai o galo atu i ei? Ko te fesokotakiga tāua i te va o koulua mo tou Tamana faka-te-lagi. Tela la, ke na fakailoa atu me e se mafai lele eiloa o ‵fuli ne koe au amioga. Ke fiafia faeloa koe o fakaasi atu me e taulia malosi koe ke fai koe mo fai se sui o te Atua kae ke fakalogo ki ana tonu. (Salamo 64:10) Ke mo a ma ma koe o taku atu ki nisi tino ou talitonuga e uiga ki amioga. Kafai e faipati atu koe, ka fakamalosi mai i ei ki a koe, ka puipui ei koe, kae ka fakamalosi atu foki ki nisi tino ke tau‵tali atu ki tau fakaakoakoga ‵lei.—1 Timoteo 4:12.
7. E mafai pefea ne tatou o ‵tu mautakitaki i te ‵tou fakaikuga ke amio ‵mā tatou?
7 E ‵soko atu ki ei, kafai ko oti ne fakaiku aka ne tatou ke tumau i amioga ‵lei kae ne fakailoa atu foki ne tatou te mea tenā ki nisi tino, ke na fakatokatoka faka‵lei tatou ke ‵tu mautakitaki i te ‵tou fakaikuga tenā. E tasi te auala ko te fakaeteete i filifiliga o ‵tou taugasoa. Muna a te Tusi Tapu: “Kauga ki tino poto kae ka poto foki koe.” Ke na kau atu koe ki tino kolā e ‵pau olotou kilokiloga ki amioga ‵lei, kae ka fakamalosi atu latou ki a koe. E toe fai mai foki te tusi siki tenā: “Kafai e kauga koe ki tino valea kae ka se aoga koe.” (Faataoto 13:20) E tusa loa mo te mea e mafai ne koe o fai, ke na ‵kalo keatea koe mai i tino kolā ka fakavāivāi atu ki tou loto taumafai.—1 Kolinito 15:33.
8. (a) Kaia e ‵tau ei o fāulu ne tatou ki ‵tou mafaufau a mea ‵lei? (e) Ne a mea e ‵tau o ‵kalo keatea tatou mai i ei?
8 E se gata i ei, e ‵tau foki o fāulu ki ‵tou mafaufau a mea ‵tonu, mea tāua, mea ‵lei, mea ‵ma, mea ‵gali mo mea ‵malu. (Filipi 4:8) E fai ne koe penā mai i te fakaeteete malosi i mea kolā e onoono kae fai‵tau tatou ki ei, penā foki loa mo pese kolā e fakalogo‵logo tatou ki ei. Kafai e manatu aka se tino me e se mafai o fakavāivāi mai ki a ia a te faitau ki tusi masei, e a, e manatu aka foki a ia me e se mafai o fakamalosi atu ki a ia a te faitau ki tusi ‵lei? Masaua la, se mea faigofie fua ke fai ne tino sē ‵lei katoatoa a amioga ma‵sei. Tela la, a tusi, mekesini, tamunei, mo pese kolā e fakamalosi aka ei a lagonaga kae fia fai a amioga fakatauavaga ka fai ei se tino ke maua a manakoga ma‵sei, kae e oko atu fakamuli a manakoga konā ki te agasala. E ‵tau o faka‵fonu ne tatou ‵tou mafaufau ki te poto mai te Atua, ko te mea ke tumau ei tatou i amioga ‵lei.—Iakopo 3:17.
Faiga Kolā e Iku Atu ki Amioga Ma‵sei
9-11. E pelā mo te tala a Solomona, ne a faifaiga ne takitaki atu ei se tamataene ke amio masei a ia?
9 I nisi taimi e mafai o iloa tonu a faiga kolā e iku atu ki amioga ma‵sei. Kafai e fai ne se tino a faiga takitasi konā, ko momea aka i ei te faigata ke toe ‵kalo keatea mai i ei. Ke onoono ki te fakamatalaga i te Faataoto 7:6-23. Ne matea atu ne Solomona se tamataene “valea,” telā e se ‵lei ana manakoga. “A ia tena e sasale i te auala i tafa o te matulimanu tela e tu ei te fale o te fafine [talitāgata] e tokotasi. A te tamataene tena e fakasili aka i tafa o te fale o te fafine tena, i te afiafi ka ko pouli eiloa.” Tenā loa te mea ‵se muamua ne fai ne ia. I te afiafi ne takitaki atu ei ne ana manakoga ke sasale atu i te auala eiloa telā e iloa ne ia me e maua sāle i ei se fafine talitāgata.
10 E ‵soko atu ki ei a pati konei: “Ne fakafetaui atu te fafine tena ki te tamataene, kae e pei ki gatu pela mo gatu o fafine tali tagata kae fai togafiti.” I konā loa ne matea ne ia te fafine. E mafai o fuli tua a ia ki ei kae foki atu ki tena fale, kae e sili atu nei te faigata ke fai penā, kae maise eiloa me e se ‵lei ana manakoga. E ‵sai atu a lima o te fafine ki a ia kae ne sogi atu ki a ia. Ne talia ne te tamataene te sogi tenā, kae ne fakalogologo eiloa a ia ki ana pati fakafāfine konei: “Ne fai aku taulaga i te aso nei.” Ne aofia sāle a meafasi, falaoa, sinu, mo uaina i vaegā taulaga penā. (Levitiko 19:5, 6; 22:21; Numela 15:8-10) I ana pati ki mea konā, kāti ne fakauiga i ei me i a ia se tino lotu, kae ne fakailoa atu foki i ei me e malaku eiloa a mea ‵lei e mafai o kai kae inu ki ei i tena fale. Ne fakakolekole atu a ia penei: “Vau! Taua ka olo o moe i te po katoa tenei. Ka fiafia taua o moe fakatasi.”
11 E iloa ‵lei ne tatou te mea telā ne tupu i ei. “Tena, ne takolekole eiloa ne ia te tamataene . . . i te taimi tena a te tamataene ko fanatu i te fafine tena e pela me se pulumakau ko ave o ta, pela me se tia ko fano ki loto i te malei.” Ne fakaoti a pati a Solomona ki pati tāua konei: E se iloa ne ia i tena ola ko pili o galo atu.” E aofia i ei tena ola me “e fakamasino ne te Atua a latou kola e fina lalolagi, pela foki mo latou kola e mulilua.” (Epelu 13:4) Mā‵faga o akoakoga aogā mō tāgata penā foki loa mo fāfine! E ‵tau o fakaeteete tatou ke mo a ma kamata o sa‵sale atu i te auala telā e iku atu ki te sē fiafia mai o te Atua ki a tatou.
12. (a) Se a te uiga o te tugāpati ko te “valea”? (e) E mafai pefea ne tatou o fakamalosi aka ‵tou loto?
12 Ke onoono me e fai mai te tala i te tamataene tenā “e valea.” E fakaasi mai i te tugāpati tenā me ne seki fetaui ana manatu, ana manakoga, tena loto, ana lagonaga, mo ana fakamoemoega mo mea kolā e talia ne te Atua. Ona ko tena vāivāi ne malaia ei a ia. I “taimi faigata” konei i “aso fakaoti,” e ‵tau o fakamalosi aka ‵tou loto. (2 Timoteo 3:1) E isi ne fakatokaga a te Atua e fesoasoani mai. E fakatoka ne ia a fakatasiga i te fakapotopotoga Kelisiano ke fakamalosi mai ki a tatou ke sa‵sale atu i te auala tonu kae ke fai ei ke fetaui tatou mo nisi tino kolā e ‵pau olotou fakamoemoega mo ‵tou fakamoemoega. (Epelu 10:24, 25) E isi foki ne toeaina i te fakapotopotoga kolā e mafai o tausi mai ki a tatou kae akoako mai e uiga ki auala o te amiotonu. (Efeso 4:11, 12) Ko maua ne tatou te Muna a te Atua, te Tusi Tapu, ke takitaki mai ki a tatou. (2 Timoteo 3:16) Kae e maua faeloa ne tatou te avanoaga ke ‵talo atu ke fesoasoani mai te agaga tapu o te Atua ki a tatou. —Mataio 26:41.
Ke Iloa a Mea Tāua Mai i Agasala a Tavita
13, 14. Ne ‵lave pefea a te tupu ko Tavita i se agasala matagā?
13 Se mea fakafanoanoa, me ko oti ne oko atu a nisi tavini lauiloa a te Atua ki te faiga o amioga ma‵sei. E tokotasi te tino, ko te tupu ko Tavita, telā ne tavini atu ki a Ieova i te fia o tausaga. E mautinoa eiloa me ne alofa malosi atu a ia ki te Atua. Kae ne pakiakia valevale a ia i te faiga o se agasala. E pelā mo te tamataene telā ne fakamatala mai ne Solomona, e isi foki ne faiga kolā ne iku atu ki te agasala a Tavita, kae ne ‵numi malosi a ia i ei.
14 I te vaitaimi tenā kāti ko 50 tupu tausaga o Tavita. Mai luga i tena fale, ne matea atu ei ne ia te fafine taulekaleka ko Patisepa e koukou. Ne fai ana fesili e uiga ki a ia kae ne iloa aka i ei ne ia me ko oi te fafine tenā. Ne iloa ne ia i ei me i tena avaga, ko Ulia, ne kau atu ki te taua i te fakai o te kau Amoni ko Lāpa. Ne fai ne Tavita te tonu ke aumai te fafine tenā ki tena palesi. Telā ne ‵moe fakatasi ei laua. Kae fakamuli ifo i ei ne sae aka se fakalavelave—ko iloa aka ne Patisepa i a ia ko faitama i a Tavita. Ne fakatonu atu a Tavita ki a Ulia ke foki mai mai te taua, kae ne fakamoemoe tou tagata me ka ‵moe Ulia mo tena avaga i te po tenā. Moi fai penā, ko foliga mai i ei me i ā Ulia te tamaliki a Patisepa. Kae ne ita Ulia ma toe foki ki tena fale. Ne manako malosi a Tavita ke na ‵funa aka tena agasala, telā ne toe uga atu ei ne ia Ulia ki Lāpa kae ne avatu se tusi ki te takitaki o tena kautau kae ne fakatonu atu i ei ke na uga atu a Ulia ki se koga telā ka mate a ia i ei. Ne mate i ei a Ulia, kae ne avaga a Tavita mo te fafine telā ne mate tena avaga a koi tuai o iloa ne tino valevale me i a ia ko faitama.—2 Samuelu 11:1-27.
15. (a) Ne fakaasi faka‵sau atu pefea te agasala a Tavita? (e) Ne a mea ne fai ne Tavita ki polopolokiga kolā ne fai atu ne Natano mo te atamai?
15 Ne foliga mai pelā me ne magoi te aofaga a Tavita ke ‵funa aka tena agasala. Ne ‵teka atu ne nāi masina. Kae ne fanau mai se tamaliki tagata. Kafai ne mafaufau Tavita ki te tala tenā i te taimi ne ‵fatu aka ei ne ia te mataupu e 32 o te Salamo, e manino i ei me ne logosala malosi a ia i ei. (Salamo 32:3-5) Kae ne seki ‵funa tena agasala mai te Atua. Muna a te Tusi Tapu: “Ka ko [Ieova] te Aliki e se fiafia ki te mea a Tavita tena ne fai.” (2 Samuelu 11:27) Ne uga atu ne Ieova te pelofeta ko Natano, telā ne faipati atu mo te atamai ki a Tavita e uiga ki mea kolā ne fai ne ia. Se mea vave o taku ‵tonu atu ne Tavita tena agasala kae ne akai atu tou tagata ke fakamagalo ne Ieova a ia. Ona ko tena salamō tonu, ne toe ‵lei ei te va o laua mo te Atua. (2 Samuelu 12:1-13) Ne seki ita Tavita i pati polopoloki konā. Kae ne fakaasi ‵tonu atu ne ia te manatu telā e fakamatala mai i te Salamo 141:5, penei: “A te tino lei e mafai o fakasala kae fakatonu malosi ki a au mo te alofa.”
16. Ne a pati fakatonutonu ne tuku mai ne Solomona ke fesoasoani mai ki a tatou māfai ko agasala tatou?
16 A Solomona ko te tokolua o tamaliki tāgata a Tavita mo Patisepa, kae kāti ne mafaufau aka a ia ki te tala fakafanoanoa tenā i te olaga o tena tamana. Ne tusi mai fakamuli tou tagata penei: “E se mafai koe o manuia i te olaga nei manafai e taumafai faeloa koe o funa au agasala. Fakaasi au agasala, kae sa toe fai, kae ka alofa atu te Atua ki a koe.” (Faataoto 28:13) Kafai e fai ne tatou se agasala matagā, ke na faka‵logo tatou ki pati konā mai te Atua, kolā e fesoasoani mai kae e fakailoa mai foki ke fakaeteete tatou i ei. E ‵tau o taku ‵tonu atu ne tatou ‵tou agasala ki a Ieova, kae ke olo atu foki tatou ki toeaina i te fakapotopotoga ke maua se fesoasoani. A te tiute tāua o toeaina ko te fesoasoani atu ki tino kolā ne fai a mea ‵se, ke toe ‵lei olotou amioga.—Iakopo 5:14, 15.
Ke Fa‵ki i Mea Kolā e Oko Mai Ona ko te Agasala
17. E tiga eiloa e fakamagalo sāle ne Ieova a agasala, ne a mea e se puipui ne ia a tatou mai i ei?
17 Ne fakamagalo ne Ieova a Tavita. Kaia? Me i a Tavita se tagata fakamaoni, ne fakaasi atu ne ia te alofa fakamagalo ki nisi tino, kae ne salamō tonu foki a ia. E ui i ei, ne seki puipuigina Tavita mai i mea fakama‵taku kolā ne iku mai i ei. (2 Samuelu 12:9-14) E penā foki loa i aso nei. E tiga eiloa e se fakaoko atu ne Ieova a mea ma‵sei ki tino salamō, e se puipui ne ia latou mai i fakalavelave kolā e ‵tupu sāle ona ko olotou agasala. (Kalatia 6:7) E aofia i mea kolā e oko sāle mai i amioga ma‵sei ko te ‵talaga o avaga, tama‵liki tosala, te polokī, mo te sē toe talitonu kae fakatau āva.
18. (a) Se a te mea telā ne fakatonu atu ne Paulo ki te fakapotopotoga i Kolinito ke fai ki te tino telā ne matagā ana amioga? (e) E fakaasi atu pefea ne Ieova te atafai mo te alofa fakamagalo ki tino agasala?
18 Kafai e isi ne ‵tou agasala matagā ne fai, se mea faigofie ke loto vāivāi māfai e logo‵mae tatou i mea kolā e oko mai ona ko ‵tou faiga ‵se. Kae e se ‵tau lele eiloa o talia ne tatou so se mea ke taofi aka ei tatou mai i te salamō mo te faiga ke toe ‵lei te va o tatou mo te Atua. I te senitenali muamua, ne tusi atu Paulo ki te kau Kolinito ke na ave keatea ne latou se tagata mai i te fakapotopotoga telā ne mataifale. (1 Kolinito 5:1, 13) Ko oti ne salamo te tagata tenā, kae ne fakatonu atu penei Paulo ki te fakapotopotoga: “Kae e ‵tau mo koutou o fakamagalo atu a ia, kae fakamalosi atu tona loto. . . . [kae] ke a‵lofa tonu koutou ki a ia.” (2 Kolinito 2:5-8) I pati konā mai te Atua, e maina ei tatou i te atafai mo te alofa fakamagalo o Ieova ki tino agasala kolā e salamō. E fia‵fia sāle a agelu i te lagi māfai ko salamō se tino agasala.—Luka 15:10.
19. Ne a mea aogā kāti ka maua ne se tino ona ko tena salamō tonu i ana faiga ‵se?
19 E tiga eiloa ko fanoa‵noa tatou i se faiga ‵se, kāti ka fesoasoani mai te fanoanoa tenā ke “masaua o sa toe fuli ki te masei.” (Iopu 36:21) A te ‵tonuga loa, ona ko te logo‵sala malosi o tatou i mea kolā e oko mai i te faiga o agasala, e ‵tau o fakamalosi mai ki a tatou ke se toe fai te mea ‵se tenā. Kae ne fakaaogā foki ne Tavita a mea fakafanoa‵noa kolā ne ‵tupu ona ko tena agasala, ke polopoloki atu ki nisi tino. Ana muna: “Kae ka akoako ne au a tino agasala ki au fakatonuga, kae ka fuli mai ei latou ki a koe.”—Salamo 51:13.
E Maua te Fiafia Mai i te Tavini Atu ki a Ieova
20. Ne a mea aogā e maua sāle ona ko te faka‵logo ki tulafono amio‵tonu a te Atua?
20 Muna a Iesu: “E sili atu te manuia [“te fiafia,” NW] o tino kola e faka‵logo ki te muna a te Atua, kae tausi ki ei.” (Luka 11:28) Kafai e faka‵logo tatou ki fakatonuga amio‵tonu a te Atua ka maua ei ne tatou te fiafia i te vaitaimi tenei kae ke oko foki eiloa ki te se-gata-mai. Kafai ko ‵lei faeloa ‵tou amioga ke oko ki te taimi nei, ke na tumau tatou i ei mai i te fakaaogā katoatoa o fakatokaga a Ieova ke fesoasoani mai ke fai penā. Kafai ko pa‵ku atu tatou ki te faiga o amioga masei, ke na ‵teu aka ne tatou i ‵tou loto me ko toka Ieova o fakamagalo atu ki tino kolā e salamō tonu, kae ke na fatuaki ‵tou loto ke mo a ma toe fai ne tatou te agasala tenā. —Isaia 55:7.
21. Se a te fakamalosiga mai i te apositolo ko Petelu telā e mafai o fakaaogā ne tatou ke fesoasoani mai ke tumau tatou i amioga ‵mā?
21 Ko pili o palele atu te lalolagi sē ‵lei tenei, fakatasi mo ana manatu lai‵lai mo ana faifaiga lai‵lai. Kafai e amio ‵ma faeloa tatou, ka maua ne tatou a mea aogā i te taimi nei, kae ke oko foki eiloa ki te se-gata-mai. Ne tusi mai penei te apositolo ko Petelu: “Tela la e oku taugasoa, ka koi fakatalitali koutou ki te Aso tena, taumafai malosi eiloa ke ‵ma kae ‵lei koutou i mua o te Atua, ka ke ola filemu foki koutou mo ia. . . . Ko leva eiloa ne iloa ne koutou a te mea nei. Tela la, ke matapula koutou, ke mo a e takitaki ‵se koutou ne te ‵se o tino ofa tulafono kae pa‵ku ei koutou mai otou tulaga mautakitaki.”—2 Petelu 3:14, 17.
E Mafai ne Koe o Fakamatala Mai?
• Kaia kāti e faigata ei ke tumau se tino i amioga ‵mā?
• Ne a nisi auala e mafai ei o fakamalosi aka ne tatou te ‵tou fakaikuga ke amio ‵mā faeloa tatou?
• Ne a mea aogā e iloa ne tatou mai i agasala kolā ne fai ne te tamataene telā ne fakamatala mai ne Solomona?
• Ne a mea e akoako mai ne te fakaakoakoga a Tavita e uiga ki te salamō?
[Ata i te itulau e 25]
A te fakailoa atu ki nisi tino o ‵tou talitonuga e uiga ki amioga se puipuiga mō tatou
[Ata i te itulau e 29]
Ne fakamagalo atu a Ieova ki a Tavita me ne salamō tonu a ia