Fakalagolago ki te Agaga o te Atua i te Fakafesagai Atu ki Mafulifuliga o te Olaga

“Taumafai malosi o tuku atu koe ki te Aliki e pelā mo se tino ko fakamaonia me ko ‵tau.”​—2 TIMOTEO 2:15.

1. Ne a fakamafulifuliga e mafai o fakalavelave mai ki ‵tou malosi faka-te-agaga?

E MAFULIFULI faeloa a te tulaga o te lalolagi nei. Ko lavea atu ne tatou te fakaofoofogia o poto fakasaienitisi mo mea kolā e faite mai i ei kae e olo fakatasi eiloa mo te pa‵kūga ki lalo o amioga ‵lei. E pelā mo mea ne sau‵tala ki ei i te mataupu muamua, e ‵tau mo Kelisiano o ‵teke atu faeloa ki te agaga o te lalolagi. Kae e mafulifuli te lalolagi, e mafuli‵fuli foki tatou i auala e uke. E gasolo aka o ma‵tua tatou talu mai te ‵tou folikiga. Kāti e gasolo o mau‵mea io me ma‵tiva tatou, e ­ma‵losi io me vāi‵vāi ‵tou foitino, io me ­‵mate ‵tou tino pele. E se mafai o pule atu tatou ki mafulifuliga penei, kae e mafai o fai mo fakalavelave ‵lasi ki ‵tou malosi faka-te-agaga.

2. Ne mafulifuli pefea te olaga o Tavita?

² E mu‵tana a tino ne oko atu ki ei a fakamafulifuliga ‵lasi i olotou olaga e pelā mo Tavita, te tama a Iese. Ne ‵fuli fakavave te olaga o Tavita mai te tausi mamoe fatauvā ki se toa lauiloa i te fenua. Ne fai fakamuli a ia pelā me se manu telā ne afuli ke tamate ne se tupu loto masei. Mai tua i ei ne fai a ia mo tupu telā ne manumalo faeloa i taua. Ne kufaki a ia i ikuga fakalogo‵mae o ana agasala matagā ne fai. Ne logo‵mae a ia i fakalavelave mo mavae‵vaega i loto i tena kāiga. Ne maumea, ne gasolo o matua kae ne oko atu foki ki a ia a tulaga faigata o te olaga matua. Kae e ui eiloa a mafulifuliga e uke ne oko ki tena olaga, ne fakaasi mai ne Tavita a tena talitonu katoatoa ki a Ieova mo Tena agaga i tena olaga kātoa. Ne taumafai malosi a ia ke fai pelā me se “tino ko fakamaonia me ko ‵tau,” kae ne fakamanuia a ia ne te Atua. (2 Timoteo 2:15) E ui eiloa e ‵kese ‵tou fakanofonofoga mo Tavita, e mafai o tauloto ne tatou a mea e uke mai te auala ne fakafesagai atu ei a ia ki fakalavelave i tena olaga. E fesoasoani mai foki tena fakaakoakoga ke maua faeloa ne tatou a te fesoasoani o te agaga o te Atua i te fakafesagai atu ki mafulifuliga o te olaga.

Te Loto Maulalo o Tavita​—Se Fakaakoakoga ‵Lei

3, 4. Ne gasolo aka pefea a Tavita mai se tausi mamoe fatauvā ki se tino lauiloa i te fenua kātoa?

³ Ne seki lauiloa a Tavita a koi talavou i ei, ke oko foki loa ki tena kāiga. I te taimi ne fanatu ei a te pelofeta ko Samuelu ki Peteleema, ne fakaasi atu ne te tamana o Tavita ana tama‵liki tā‵gata e tokofitu. Kae ne taofi aka a Tavita, te ‵toe tamaliki tagata foliki, ke tausi a mamoe. Kae ko oti ne filifili ne Ieova a Tavita ke fai mo tupu o Isalaelu i aso fakamuli. Ne avatu a Tavita ki te fale. E fai mai te Tusi Tapu: “Ne puke aka ne Samuelu te sinu olive, fauu eiloa ne ia a Tavita i mua o ona taina. I konā foki eiloa, ko Tavita eiloa ko ulufia ne te agaga o te Aliki, kae ne nofo eiloa i a Tavita mai te aso tenā o fano ki mua.” (1 Samuelu 16:​12, 13) Ne fakalagolago eiloa a Tavita ki te agaga tenā i tena olaga kātoa.

⁴ Fakamuli ifo ne lauiloa a te tausi mamoe tenei i te fenua kātoa. Ne ‵kami a ia ke tavini atu ki te tupu kae ke tātā lakau mō ia. Ne tamate ne ia te toa ko Koliata, se toa mafi ‵ki telā ne ma‵taku foki ki ei a sotia lauiloa o Isalaelu. E pelā me se takitaki o te kautau, ne fakatakavale ne Tavita a te kau Filisitia. Ne fia‵fia malosi a tino ki a ia. Ne ‵fatu ne latou a pese ke tavae atu ki a ia. Mai mua atu i ei, ne fai atu se tino fakatonutonu a te Tupu ko Saulo me i a Tavita e se se tino “poto” fua i te tātā kitala kae se “tagata toa kae taulekaleka foki, se sotia ‵lei kae poto foki i te faipati.”​—1 Samuelu 16:18; 17:​23, 24, 45-​51; 18:​5-7.

5. Ne a mea ne mafai o fakamatamata a Tavita ki ei, kae e iloa pefea ne tatou me e seki fai a ia penā?

⁵ Ne lauiloa, matagali, tinogali, poto i te faipati mo te tātā kitala, se toa i taua kae maua foki ne Tavita te taliaga a te Atua. Ne mafai fua o fakamatamata a Tavita i se mea e tasi i mea katoa konei, kae ne seki fai eiloa penā a ia. Ke onoono ki te tali a Tavita ki te tupu ko Saulo, telā ne ofo atu ne ia tena tama fafine ke avaga mo Tavita. Ne fai atu a Tavita mo te loto maulalo tonu: “Ko oi au, kae ko oi foki oku kāiga, ke avaga atu au ki te tama fafine a te tupu?” (1 Samuelu 18:18) Ona ko ana pati konā, ne fai mai ei se tagata poto: “Ne fakauiga a pati a Tavita me e se ona ko ana taleni, io me ko te tulaga o tena kāiga, io me ko tena gafa ka mafai ei o fai a ia mo fai te avaga a te tama fafine a te tupu.”

6. Kaia e ‵tau ei o maua ne tatou te loto maulalo?

⁶ Ne fakavae te loto maulalo o Tavita ki tena iloa me e sili fakafia atu a Ieova i tino sē ‵lei katoatoa. Ne ofo foki a Tavita me e saga tonu atu a te Atua ki te tagata. (Salamo 144:3) Ne iloa foki ne Tavita me ona ko te loto maulalo o Ieova o fakamalalo ifo ke tausi, puipui kae atafai atu ki a ia, ne lauiloa ei a ia. (Salamo 18:35) Ma‵faga o akoakoga gali mō tatou! E se ‵tau eiloa o fakamata‵mata tatou i ‵tou taleni, ‵tou galuega mo ‵tou tauliaga. Ne tusi mai te apositolo ko Paulo: “Ne seki tuku atu ne te Atua a mea katoa konā e i a koe? Kafai la ko maua ne koe, ai a la ne fakamatamata ei koe?” (1 Kolinito 4:7) Ko te mea ke maua ne tatou te agaga tapu o te Atua kae ke talia foki ne ia tatou, e ‵tau o ‵toki ne tatou te loto maulalo i loto i a tatou.​—Iakopo 4:6.

“Sa Taui ma Sui”

7. Se a te avanoaga ne maua ne Tavita ke tamate te tupu ko Saulo?

⁷ E ui eiloa e seki fakamatamata a Tavita ona ko tena takutakua, ne tupu aka i ei te loto masei kae fia tamate tino i te tupu ko Saulo, telā ne tiakina ne te agaga o te Atua. E tiga eiloa e seai se mea ‵se ne fai ne Tavita ne ‵tau o sola a ia keatea kae ne nofo atu i se koga lavaki. I te taimi e tasi, i te afuliga o Tavita, ne ulu atu ei a te tupu ko Saulo ki se ana, e aunoa mo te iloa me i a Tavita mo tena kau e ‵muni i ei. Ne fakamalosi atu a te kau a Tavita ke fakaaogā te avanoaga telā e foliga mai me ne tuku atu ne te Atua ke tamate a Saulo. E fakaataata ne tatou a te lotou musu‵musu atu ki a Tavita i te pouliga: “Tenei te taimi! A te Aliki ko oti ne fai atu ki a koe me ka tuku atu ne ia tou fili ki ou lima, kae ka mafai ne koe o fai so se mea e loto koe o fai ki ei.”​—1 Samuelu 24:​2-6.

8. Kaia ne onosai ei a Tavita ke mo a ma taui ma sui?

⁸ Ne ita fitifiti a Tavita ma fakapakia atu ki a Saulo. Ona ko te fakatuanaki mo te kufaki, ne lotomalie a ia ke tuku atu a mea katoa ki a Ieova. I te taimi ne tiakina ei ne te tupu a te ana, ne kalaga atu a Tavita ki a ia: “A te Aliki ke fakamasino ne ia tāua me ko oi te tino e ‵se! Ke fakasala koe ne ia e ‵tusa mo au faiga ki a au, me e se mafai eiloa ne au o fai se mea ki a koe.” (1 Samuelu 24:12) E tiga eiloa ne iloa ne ia me ne ‵se a Saulo, ne seki taui atu eiloa ne Tavita a te mea tenā, io me ne pati ‵toko ne ia a Saulo. Ne onosai foki a Tavita ke mo a ma taui ma sui i nisi taimi. I lō te fai penā, ne fakalagolago a ia ki a Ieova ke faka‵tonu ne ia a mea.​—1 Samuelu 25:​32-​34; 26:​10, 11.

9. Kaia e se ‵tau ei o taui ma sui tatou māfai e fe‵paki mo ‵tekemaiga mo fakasauāga?

⁹ E pelā mo Tavita, kāti ka oko atu koe ki nisi tulaga faiga‵ta. E se taumate e ‵teke atu io me fakasauā atu a tama‵liki i te akoga, i te galuega, ou kāiga io me ko nisi tino kolā e se ‵lotu tasi koutou. Ke mo a e taui atu ne koe olotou mea ne fai. Ke faka‵tali ki a Ieova kae akai atu ki tena agaga tapu ke fesoasoani atu ki a koe. E se taumate ka ofo a tino sē tali‵tonu konā ona ko ou uiga ‵gali kae ka fai ei latou pelā me ne tino tali‵tonu. (1 Petelu 3:1) Faitalia me se a te mea e tupu, e lavea eiloa ne Ieova tou tulaga kae ka fai eiloa ne ia se mea ki ei i tena taimi tonu. Ne tusi mai te apositolo ko Paulo: “Aku fagasele, sa taui ma sui, kae tuku eiloa ki te taui ma sui a te Atua, me ne fai mai te Tusi, ‘Muna a te Aliki, e a aku te taui ma sui, kae e a aku foki e toe ‵togi atu.’”​—Loma 12:19.

“Faka‵logo ki Mea ne Akoako Atu”

10. Ne oko atu pefea te agasala ki a Tavita, kae ne taumafai pefea a ia o ‵funa aka te agasala tenā?

¹⁰ Ne ‵teka atu a tausaga. Ne fai a Tavita mo tupu takutakua kae a‵lofa ki ei a tino. Kāti ka faigofie o fakaasi mai i te lasi o tena fakamaoni, fakatasi mo ana salamo ‵gali ne ‵fatu ke ‵viki atu ei ki a Ieova me e faigata o fai ne ia se agasala matagā. Kae ui i ei ne fai eiloa ne ia se matugā agasala matagā. I te aso e tasi ne kilokilo ifo a te tupu mai te tuafale o tena fale ki se fafine matagali e koukou. Ne fia iloa ne ia a te fafine tenā. I te iloaga ne ia me i te fafine tenā ko Patisepa kae ko tena avaga ko Ulia e galo ki te taua, ne avatu te fekau a Tavita ki te fafine tenā ke vau ki a ia kae ne ‵moe ei laua. Fakamuli ifo, ne iloa ne ia me ko faitama tou fafine. Ka fakamasiasi ‵ki te tala tenā māfai e ‵logo a tino i ei! Kae mai lalo i Tulafono ne tuku ki a Mose, a te mulilua se agasala telā e fakasala ki te mate. Ne mafaufau ifo te tupu me kāti e isi se auala ke ‵funa ei te agasala tenā. Telā ne uga atu ei tena fekau ki te kautau ke faka‵moli mai a Ulia ki Ielusalema. Ne fakamoemoe a Tavita ke ‵moe a Ulia mo Patisepa, kae ne seki tupu te mea tenā. Ona ko tena manavase, ne toe uga ne Tavita a Ulia ki te taua mo tena tusi ki a Ioapo te takitaki o te kautau. Ne fakatonu atu a ia i te tusi ke tuku a Ulia i se koga telā e mafai ei o mate a ia i te taua. Ne fakalogo a Ioapo kae ne mate i ei a Ulia. I te otiga ne kau atu a Patisepa ki faigā mea o te fanoanoa o Ulia kolā e ‵tau o fai, ne puke ei ne Tavita tou fafine mo fai tena avaga.​—2 Samuelu 11:​1-​27.

11. Se a te tala ne fai atu ne Natano ki a Tavita, kae ne saga atu pefea a ia ki ei?

¹¹ Ne foliga mai me ne ‵lei eiloa te aofaga tenā, kae ne ‵tau o iloa ne Tavita me ne tuku faka‵sau atu a mea katoa konā ki a Ieova. (Epelu 4:13) Ne ‵teka atu a masina e uke, kae ne fanau mai ei te tamaliki. Kae ne fakatonu atu te Atua ke fanatu te pelofeta ko Natano ki a Tavita. Ne fai atu ne te pelofeta ki te tupu te tala e uiga ki se tagata maumea telā e uke ana mamoe kae ne tamate ne ia te mamoe e tasi aka loa kae fakapelepele a se tagata mativa. Ne kaitaua a Tavita ona ko tena amiotonu kae e se iloa eiloa ne ia te uiga ‵funa o te tala tenā. Ne fakaiku fakavave aka ne Tavita a te fakasalaga o te tino maumea tenā. Ona ko tena kaitaua, ne fai atu a ia ki a Natano: “Te tagata tenā ne fai ne ia te mea tenā, e ‵tau o tamate!”​—2 Samuelu 12:​1-6.

12. Se a te fakasalaga ne tuku atu ne Ieova ki a Tavita?

¹² “Ko koe ko te tagata tenā”! ko te tali a te pelofeta. Ko oti ne fakamasino aka ne Tavita a ia eiloa. E mautinoa eiloa me ne ‵fuli fakavave te kaitaua o Tavita ki te mā mo te mafatia. Ona ko te poi, ne fakalogologo a ia ki te fakamasinoga a Ieova ne fai atu ne Natano. Ne seki ai eiloa ne pati fakamafanafana i ei. Ne fakasēaogā ne Tavita te muna a Ieova mai te faiga o te mea masei. E mata, e seki tamate ne ia a Ulia ki te pelu a te fili? Ka sē mafai o galo a te pelu mai te kāiga o Tavita. E mata, ne seki puke ‵funa ne ia te avaga a Ulia? Ka sē oko atu eiloa a mea ma‵sei penā ki a ia i se auala ‵funa kae i mua o tino katoa.​—2 Samuelu 12:​7-​12.

13. Ne saga atu pefea a Tavita ki pati polopoloki a Ieova?

¹³ Mō tena ‵lei eiloa, ne taku tonu atu ne Tavita a tena mea ‵se ne fai. Ne seki kaitaua a ia ki te pelofeta ko Natano. Ne seki ‵losi atu foki ki nisi tino io me fai ne ana fakamasakoga ki te mea ne fai ne ia. I te fakaasiatuga o ana agasala, ne talia ne Tavita a ‵losiga konā kae fai atu: “Au ko agasala ki te Aliki.” (2 Samuelu 12:13) E fakaasi mai i te Salamo 51 a te lasi o tena mafatia i tena agasala mo te ‵poko o tena loto salamo. Ne fakamolemole atu a ia ki a Ieova: “Sa ave keatea au mai ou mua; sa ave keatea foki a tou agaga tapu mai i a au.” Ne talitonu a ia, me ona ko te alofa fakamagalo o Ieova ka sē takalialia eiloa a ia ki “tino loto maulalo io me loto mafatia kae loto salamo” ona ko te agasala. (Salamo 51:​11, 17) Ne tumau a Tavita i te fakalagolago ki te agaga tapu o te Atua. E tiga eiloa e seki puipui ne Ieova a ia mai ikuga ma‵sei o tena agasala, ne fakamagalo eiloa ne ia a Tavita.

14. E ‵tau o ‵saga atu pefea tatou ki pati polopoloki a Ieova?

¹⁴ A tatou ne tino sē ‵lei katoatoa kae agasala foki. (Loma 3:23) I nisi taimi e fai ne tatou se agasala matagā e pelā mo Tavita. E pelā eiloa mo te polopoloki ne se tamana alofa ana tama‵liki, e fakatonutonu foki ne Ieova a tino kolā e fia tavini atu ki a ia. E ui eiloa e aogā a pati polopoloki, e se se mea faigofie ke talia a pati konā. A te tonuga loa, “se mea e fai ne ia ke fanoa‵noa tatou” i nisi taimi. (Epelu 12:​6, 11) Kae kafai tatou e “faka‵logo ki mea ne akoako” mai, e mafai o toe ‵lei ‵tou va mo Ieova. (Faataoto 8:33) Ko te mea ke maua faeloa a fakamanuiaga mai te agaga o Ieova, e ‵tau o talia ne tatou a pati polopoloki kae gasue‵sue ke talia tatou ne te Atua.

Sa Fakamoe‵moe ki Mea e Gata i Lalo Nei

15. (a) E fakaaogā pefea ne nisi tino olotou koloa? (e) I te auala fea ne manako ei a Tavita o fakaaogā ana koloa?

¹⁵ E seai se fakamaoniga me ne vau a Tavita mai se matakāiga lauiloa io me ne maumea tena kāiga. I te taimi o tena pulega fakatupu, ne maumea malosi a Tavita. E pelā mo te mea e iloa ne tatou, e ‵funa aka ne tino e tokouke olotou koloa, kae e fakauke aka faeloa mo te matakano‵kano io me fakamāumāu valevale fua ne latou. E fakaaogā ne nisi tino olotou tupe ke maua ei ne latou a tavaega. (Mataio 6:2) Ne fakaaogā ne Tavita a tena maumea i se auala fakaatea. Ne manako malosi a ia ke tavae atu ki a Ieova. Ne fakaasi atu ne Tavita ki a Natano a tena manakoga ke faite aka te faletapu o Ieova kae ke tuku ki ei te pusa o te feagaiga, telā ne tuku atu i te taimi tenā i Ielusalema kae “tausi fua i te faleie!” Ne fiafia a Ieova ki te mea ne manako ki ei a Tavita kae ne fai atu e auala i a Natano me i te faitega o te faletapu ka fai ne tena tama ko Solomona.​—2 Samuelu 7:​1, 2, 12, 13.

16. Ne a fakatokaga ne fai ne Tavita mō te faitega o te faletapu?

¹⁶ Ne fakaputu ne Tavita a mea e manakogina ke fakaaogā i te faitega o te faletapu. Muna a Tavita ki a Solomona: “Ka ko te Faletapu, ko oti ne taumafai au o fakaputu e tusa mo te 3,400 taleni o te aulo, kae e silia atu i te 34,000 taleni o te siliva ke fakaaogā i te faitega o te Faletapu. A te palasi mo te fiti e toka foki; sē maua o fai i te uke. E toka foki te fatu mo te lakau, kae e ‵tau o toe ‵sala mai ne koe me e se lava.” Ne tuku atu ne ia mai ana koloa totino e 3,000 tani o te tinā aulo kae 7,000 tani o te tinā siliva.a (1 Nofoaiga Tupu 22:14; 29:​3, 4) E seki fai pelā me ne fakamatamata a Tavita i te tukuatuga o mea konā kae ne fai mo fakaasiga tonu o tena fakatuanaki mo tena tuku katoatoa atu ki a Ieova te Atua. E iloa ne ia te Mafuaga o tena maumea, i ana pati ki a Ieova: “I mea katoa e maua ne matou, ne meaalofa mai i a koe, tela la, a mea ne avatu ne matou, ko mea foki eiloa a koe ko toe fakafoki atu.” (1 Nofoaiga Tupu 29:14) Ne fakamalosi aka a Tavita ne tena loto kaimalie ke fai ne ia so se mea e fakamalosi aka ei te tapuakiga tonu.

17. E aogā pefea a pati polopoloki i te 1 Timoteo 6:​17-​19 ki tino mau‵mea mo tino ma‵tiva?

¹⁷ E penā foki tatou, e mafai o fakaaogā ne tatou a ‵tou kope totino mō fai a mea ‵lei. I lō te ‵sala ki se olaga maumea, e ‵lei atu ke ‵sala ki te taliaga a te Atua​—ko te auala tenā ke maua ei te poto mo te fiafia tonu. Ne tusi mai a Paulo: “Fakatonu ki tino kolā e mauko‵loa i mea o te olaga nei ke se fakamata‵mata, ka ke se tuku atu foki olotou fakamoemoega ki mea e gata i lalo nei te lotou aogā, ka ke tuku atu olotou fakamoemoega ki te Atua, telā e alofa o tuku mai ne ia a mea katoa e manuia ei tatou. Fakatonu atu ke fai ne latou te ‵lei, ke mauko‵loa foki latou i galuega ‵lei, ke kaima‵lie ka ke fia‵fia foki o fetufaaki olotou mea mo nisi tino. Kafai e fai ne latou te faiga tenei, ka fakatupu ne latou a koloa kolā ka fai mo olotou fakavae ‵mautakitaki mō aso fakamuli. Tela la, ka mafai o maua ne latou te ola telā ko te ola tonu.” (1 Timoteo 6:​17-19) Faitalia ‵tou tulaga i mea tau tupe, ke na fakalago‵lago tatou ki te agaga o te Atua kae ke ‵sala atu ki se olaga telā ka fai ne ia tatou ke “mauko‵loa . . . i mua o te Atua.” (Luka 12:21) E seai se isi mea e tāua atu i tafa o te mauaga o se tulaga taulia i mua o te ‵tou Tamana alofa i te lagi.

Fai ke Talia Koe ne te Atua

18. I te auala fea ne tuku mai ei ne Tavita se fakaakoakoga gali mō Kelisiano?

¹⁸ Ne ‵sala atu a Tavita ki te taliaga a Ieova i tena olaga kātoa. E auala i tena pese, ne kalaga atu a ia: “Te Atua, a koe ke alofa mai ki a au, a koe ke alofa, i a au e fanatu ki a koe e sao ei au.” (Salamo 57:1) Ne seki mavale eiloa a ia ona ko tena talitonu ki a Ieova. Ne gasolo a Tavita o matua kae ne “fiafia ki tena olaga.” (1 Nofoaiga Tupu 23:1) E ui eiloa ne fai ne Tavita a agasala matagā, e masaua faeloa a ia e pelā me se tokotasi o molimau e tokouke a te Atua telā ne fakaasi atu ne ia te lasi o tena fakatuanaki.​—Epelu 11:32.

19. E mafai pefea o talia tatou ne te Atua?

¹⁹ I tou fepaki mo mafulifuliga kese‵kese o te olaga, ke masaua me e pelā eiloa mo te tausi atu, fakamalosi kae fakatonutonu atu o Ieova ki a Tavita, e mafai foki o fai ne ia penā ki a koe. Ne fepaki foki a Paulo mo fakamafulifuliga e uke o te olaga e pelā eiloa mo Tavita. Kae ne tumau eiloa a ia i te fakamaoni mai te fakalagolago atu ki te agaga o te Atua. Ana muna: “E mafai ne au o fai a mea katoa konā, ona ko te fakamalosi mai o Keliso ki a au.” (Filipi 4:​12, 13) Kafai e fakalago‵lago tatou ki a Ieova, ka fesoasoani mai a ia ke manumalo tatou. E manako a ia ke sē taka‵vale tatou. Kafai e faka‵logo tatou ki a ia kae fakapili‵pili atu ki a ia, ka tuku mai ne ia te malosi ke fai ne tatou tena loto. Kae kafai e tumau eiloa tatou i te fakalago‵lago ki tena agaga, ka maua ei ne tatou ‘te fakamaoniga’ o te taliaga a te Atua i te taimi nei ke oko atu eiloa ki te se-gata-mai.​—2 Timoteo 2:15.

[Fakamatalaga mai lalo]

Ka Tali Mai Koe Pefea?

• E mafai pefea o puipui tatou mai te fakamatamata?

• Kaia e se ‵tau ei o taui ma sui tatou?

• E ‵tau o ‵kilo atu pefea tatou ki pati polopoloki?

• Kaia e ‵tau ei o tali‵tonu ki te Atua kae e se ki koloa?

[Ata i te itulau e 28, 29]

Ne fakalagolago a Tavita ki te agaga o te Atua kae ‵sala atu foki ki te taliaga a te Atua. E mata, e fai foki koe penā?

[Ata i te itulau e 30]

“I mea katoa e maua ne matou, ne meaalofa mai i a koe, tela la, a mea ne avatu ne matou, ko mea foki eiloa a koe ko toe fakafoki atu”