Te Tusi Tapu​—Se Tusi mō te Olaga

“ME I te muna a te Atua e ola kae galue mo te mana. E sili atu foki tona ‵kai i se pelu e ‵kai matalua . . . e fakamasino foki ne ia a manako mo mafaufauga o loto o tino.” (Epelu 4:12) A te fakamatalaga tenei e uiga ki mea e mafai o fai ne te Muna a te Atua ko fakamautinoa mai i ei me e sili atu te Tusi Tapu i lō te fai fua mo fai se tusi lotu.

“E tāua ‵ki te fekau i ei ki ‵tou olaga e pelā eiloa mo ‵tou manava,” ne fakamatala fakatoetoe mai ne se tino tusitala lotu e tokotasi. Kae ne fakaopoopo mai a ia penei: “Kafai e mafaufau se tino ki ‵tou manakoga mō se faka‵leiga i aso nei kae faitau ki te Tusi Tapu fakatasi mo te kilokiloga tenā, ka fakaofoofogia ‵ki eiloa a mea kolā ka iku mai i ei.” E pelā eiloa me se molī telā e kā malosi, e fakamaina mai ne te Tusi Tapu a te mainaga ki fesili mo fakalavelave e uke o te olaga i aso nei.​—Salamo 119:105.

E tonu, a te poto telā ne fakaasi mai i te Tusi Tapu, e isi sena ‵mana ke ‵fuli ei ‵tou mafaufauga, e fesoasoani mai ke faka‵lei aka ‵tou fakalavelave, e faka‵lei aka ‵tou olaga, kae e maua i ei a atamai kolā e fai ei tatou ke toka o fakafesagai atu ki tulaga e se mafai o ‵fuli ne tatou. Kae e sili atu i te tāua, e fesoasoani mai te Tusi Tapu ke iloa kae ke a‵lofa foki tatou ki te Atua.

Se Tusi Telā e Tuku Mai i ei se Fakamoemoega

A te Tino telā ne tusi ne ia te Tusi Tapu, ko Ieova te Atua, e ‘masani ‵lei a ia mo ‵tou auala katoa.’ E uke atu ana mea e iloa e uiga ki ‵tou manakoga i te feitu faka-te-foitino, i mea tau lagonaga, mo ‵tou manakoga i te feitu faka-te-agaga i lō mea kolā e iloa ne tatou. (Salamo 139:​1-3) Ona ko ana mafaufauga ma‵luga, e tuku mai ne ia a tapulā mō amioga a tino. (Mika 6:8) Se mea ‵lei ke taumafai o malamalama i tapulā mo akoakoga fakavae konā kae ke fakamasani o ola e ‵tusa mo mea konā. E fiafia a te tagata telā e “fia‵fia o fai‵tau ki Tulafono a te Aliki [ko Ieova],” ko pati a te faisalamo. “E manuia foki i mea katoa e fai ne [ia].” (Salamo 1:​1-3) E ‵tau o sukesuke faka‵lei ifo tatou ona ko te vaegā fakamoemoega tenā.

A Maurice, se faiakoga ko litāea, ne talitonu faeloa me e isi ne mea aogā i tala fakasolopito mo tusitusiga i te Tusi Tapu. Kae ne fakalotolotolua a ia e uiga ki te fakaosofia o te tusi tenā ne te Atua. I te taimi ne logo ei a ia i se fakamatalaga e uiga ki te pogai ne tuku mai ei ne te Atua tena Muna tusia ki tino, ne sukesuke a Maurice ki valoaga kese‵kese i te Tusi Tapu. A koi talavou a ia, ne tauloto a ia ki tala mua, tusi, mea fakasaienitisi, mo kogā koga o te lalolagi. Ne taku ‵tonu mai me ne tō fia poto a ia telā ne seki lavea atu ei ne ia a fakaakoakoga e uke kolā e ‵lago atu ki te ‵tonu o te Tusi Tapu. “Au ne kausaki faeloa ki se olaga faigofie, maumea, kae e uke a fakafiafiaga i ei. Kae se mea fakafanoanoa me ne tumau eiloa i toku sē talitonu mo te sē fia saga atu ki te gali mo te ‵tonu o te ‵toe tusi sili telā ne tusi.”

Nei la, ko 70 tausaga o Maurice, ne tusi mai a ia mo te loto fakafetai kae na fakasino atu a ia ki te tala e uiga ki te fakasae atuga o Iesu ki te apositolo ko Toma: “Ko oti ne tuku atu toku lima ki ‘koga pa‵kia’ telā ko talitonu katoatoa ei au me i te Tusi Tapu ko te munatonu eiloa.” (Ioane 20:​24-29) E pelā mo muna ‵tonu kolā ne fai mai ne te apositolo ko Paulo, e fakaasi faka‵sau mai ne te Tusi Tapu a manakoga o te loto, kae e tuku mai i ei ne mea aogā ki te olaga. Se tusi tonu eiloa mō te olaga.

E Fesoasoani Mai ke ‵Mautakitaki i se Olaga e ‵Fonu i Fakalavelave

E tuku mai foki ne te Tusi Tapu a pati fakatonutonu kolā e fesoasoani mai ki tino ke ave kea‵tea a faifaiga ma‵sei. Ne mafai o manumalo a Tanielu i te faifaiga sē ‵mā ko te ‵pusi, e pelā foki mo te kau ki pātī fai valevale mo te fakaaogāga ‵se o meainu ma‵losi. (Loma 13:13; 2 Kolinito 7:1; Kalatia 5:​19-21) Ke ave ‵tonu eiloa keatea a vaegā faifaiga penā kae ke ‵pei ki “te foitino fou,” e manakogina i ei a taumafaiga loto ‵toa. (Efeso 4:​22-24) E fai mai penei a Tanielu: “Se mea faigata me i a tatou e se ‵lei katoatoa.” E tiga eiloa te feitu tenā, ne manumalo a ia. Ko faitau nei a Tanielu ki te Muna a te Atua i aso katoa, kae e fai ei ke pili atu a ia ki a Ieova.

I te taimi ko matua ei a ia, ne āva malosi faeloa a Tanielu ki te Tusi Tapu​—faitalia me ne seki faitau aka eiloa a ia ki ei​—kae ne ‵talo atu foki a ia ki te Atua i po katoa. Kae e isi se mea ne fakatamala a ia i ei. Ne seki fiafia a ia. Ne ‵fuli te olaga o tou tagata i te taimi ne fatoā lavea ei ne ia te igoa o te Atua i te Tusi Tapu. (Esoto 6:3; Salamo 83:18) Mai tua ifo i konā, ne fakaaogā ne ia te igoa o Ieova māfai ko ‵talo a ia, kae ne momea aka te ‵lei o ana ‵talo. “Ne fai a Ieova mo fai te ‵toe tino pili mai ki a au, kae koi fai eiloa a ia mo oku taugasoa pili.”

Mai mua o tena sukesukega ki te Tusi Tapu, ne seai se fakamoemoega ‵lei o Tanielu. “E se fai pelā me e ‵tau o poto ‵ki se tino ke lavea atu ei a mea kolā e ‵tupu i te lalolagi,” e fai mai tou tagata. “Au ne mataku, kae ne taumafai au ke fakalavelave faeloa ko te mea ke se mafaufau au e uiga ki ei.” Kae oti aka, ne iloa ne ia me ka ati aka ne te Atua a te fakamaoni mō tino katoa i se lalolagi ‵mā, telā e mafai o maua ne tino faka‵logo a te filemu mo te fiafia ki te se-gata-mai. (Salamo 37:​10, 11; Tanielu 2:44; Fakaasiga 21:​3, 4) Nei la, ko maua ne Tanielu se fakamoemoega mautinoa. A te fakamalosiga mautakitaki tenei a te Tusi Tapu e fesoasoani atu ki a ia ke tumau i se kilokiloga aogā e uiga ki te olaga.

Fesoasoani ke Manumalo i Fakalavelave Tau te Lagonaga

Ko fitu fua tausaga o Siaosi i te taimi ne mate ei tena mātua. Ne manavase a ia māfai ko moe i te po, me e se iloa ne ia me ka toe ala aka a ia i te suā aso me ikai. Fakamuli, ne fatoā faitau a ia ki pati a Iesu e uiga ki te mate mo te toetuga: “Sa ofo koutou i te mea tenei, me ko oko mai eiloa te taimi e lagona ei a tena leo ne latou katoa kola e i loto i tanuga, kae ka ulu mai ei latou ki tua.” Ne otia foki tena loto i pati konei a Iesu: “Au ko te toetu mo te ola; so se tino e fakatuanaki ki a au, e tusa eiloa me mate; kae ola eiloa a ia.” (Ioane 5:​28, 29; 11:25) Ne ‵lei, ‵tonu, kae fakamafanafana mai a vaegā mafaufauga penā. E fai mai penei a Siaosi: “A te munatonu tenei e se fakafiafia fua ki te mafaufau kae e oko ‵tonu foki ki te loto.”

Ne mataku foki a Tanielu, telā ne taku atu muamua. Ne seki mafai ne tena mātua o tausi tokotasi atu ki a ia, telā ne uga atu ei a ia ke nofo i fale tausi tamaliki e uke. Ne mafaufau faeloa a ia pelā me se tino fakaatea kae ne manako a ia ki te tokagamalie i se kāiga alofa. Fakamuli ifo, ne maua aka ne ia a te mea telā ne manako a ia ki ei e auala i tena sukesukega ki te Tusi Tapu. Ne kau mai a Tanielu ki te fakapotopotoga Kelisiano a Molimau a Ieova kae ne fai mo fai se vaega o se kāiga faka-te-agaga, telā ne maua ne ia a lagonaga ‵lei kae ne alofagina ne nisi tino. E tonu, e aogā te Tusi Tapu i se auala tāua kae fakamalie loto.

Masaua, me e lavea ne Ieova a mea i ‵tou loto kae e iloa foki ne ia a mea kolā e ma‵nako tatou ki ei. A te Atua ‘e sukesuke ne [ia] . . . a loto o tino,’ kae e ‘fakamasino ne ia a mafaufauga.’​—Faataoto 21:2; Ielemia 17:10.

Pati Fakatonutonu Aogā e Uiga ki te Olaga Faka-te-Kāiga

E tuku mai ne te Tusi Tapu a pati fakatonutonu aogā e uiga ki fesokotakiga o tino. E fai mai penei a Siaosi: “A te fe‵paki o uiga o tino io me ko te sē lotoma‵lie ko te ‵toe tulaga faigata eiloa i te olaga.” E pefea ana faifaiga ki mea konā? “Kafai ko iloa ne au me e isi se mea e se fiafia mai ei se tino ki a au, e tautali au ki te manatu fakatonutonu telā e taku ‵tonu mai i te Mataio 5:​23, 24: ‘Fano mua koe o faka‵lei mo te tino tena.’ Kae se mea tonu me e uke a mea aogā ne maua mai i toku faipati atu e uiga ki tamā fakalavelave penā. E lagona ne au te filemu o te Atua telā e faipati ki ei te Tusi Tapu. E aogā ‵ki a pati fakatonutonu i ei. E aogā ‵ki foki eiloa.”​—Filipi 4:​6, 7.

Kafai ko se lotoma‵lie se tauavaga ki se mea, e ‵tau mo laua tokolua o “vave o faka‵logo, kae ke fakatuatuai o fai‵pati, ke se vave foki o kaitaua.” (Iakopo 1:19) E momea aka te ‵lei o fesokotakiga i vaegā fakatakitakiga penā. E fakaopoopo mai penei a Siaosi: “I te taimi ne fakaaogā ei ne au a pati fakatonutonu ke alofa kae fai faka‵lei ki taku avaga e pelā mo aku mea e fai ki a au eiloa, ne lavea ne au a ikuga ‵lei. Ko momea aka te faigofie ki tou fafine ke āva mai ki a au.” (Efeso 5:​28-33) E tonu, e akoako mai te Tusi Tapu ki a tatou ke talia kae ‵saga atu ki ‵tou tulaga sē ‵lei katoatoa mo te auala ke manumalo i vāivāiga o nisi tino.

Pati Fakatonutonu Kolā e Tumau

Ne fai mai penei a te tupu poto ko Solomona: “Talitonu ki te Aliki [ko Ieova] mo tou loto katoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto 3:​5, 6) Ko tafaga la te manino mo te ‵loto o pati konā!

A te Tusi Tapu e mafai o fakamalosi atu ki tino ke fai a mea ‵lei. E fai ei a tino kolā e a‵lofa ki te Atua ke ola latou e ‵tusa mo tena loto kae ke maua te fiafia i te “ola i te olaga pela eiloa mo tulafono a te Aliki [ko Ieova].” (Salamo 119:1) Faitalia ‵tou tulaga, e maua a fakatakitakiga mo pati fakatonutonu kolā e ma‵nako tatou ki ei i te Tusi Tapu. (Isaia 48:​17, 18) Faitau ki ei i aso katoa, mafaufau ‵loto ki mea kolā e faitau koe ki ei, kae ke fai ne koe. Ka fai ei tou mafaufau ke se ‵numi kae ke kilo tonu atu ki mea kolā e ‵mā kae ‵lei. (Filipi 4:​8, 9) Ka se gata fua i te iloa ne koe te auala ke ola i ei kae ke fiafia foki ki te ola, kae ka iloa foki ne koe te auala ke alofa atu ki te Atua, telā ne māfua mai i ei te ola.

Mai i te tau‵tali atu ki se vaegā auala penā, ka aogā ei te Tusi Tapu ki a koe​—e pelā mo tena aogā ki te fia miliona o nisi tino​—e sili atu i lō te faiga fua mo fai se tusi lotu. Ka fakamaoni ‵tonu atu eiloa e pelā me se tusi telā e aogā mō te olaga!

[Ata i te itulau e 6]

E mafai ne te Tusi Tapu o fakamalosi aka tou manakoga ke manumalo i faifaiga fakama‵taku

[Ata i te itulau e 7]

E akoako mai ne te Tusi Tapu ki a koe a te auala e fakapilipili atu ei ki te Atua