Ke ‵Viki Atu ki a Ieova Ona ko Ana Galuega Fakaofoofogia!

“Ko tavae atu toku loto ki te Aliki [ko Ieova] . . . ona ko mea lasi ne fai ne te Atua.” ​—Luka 1:​46-​49.

E ‵TAU o tavaegina a Ieova ona ko mea fakaofoofogia ne fai ne ia. I te taimi ne toe faipati mai ei a te pelofeta ko Mose ki te faka‵saoga o te kau Isalaelu mai Aikupito, ne fai mai a ia: “E tonu eiloa me ko koutou konei . . . ko oti ne lavea ne koutou a mea fakaofoofogia kolā ne fai ne te Aliki.” (Teutelonome 11:​1-7) I se auala tai ‵pau, i te taimi ne folafola atu ei ne te agelu ko Kapilielu a te fanaumaiga o Iesu mai te taupou fafine ko Malia, ne fai mai tou fafine: “Ko fiafia foki toku agaga ki te Atua toku Fakaola . . . ona ko mea ‵lasi ne fai ne te Atua Malosi mo oku.” (Luka 1:​46-​49) E tavae atu tatou, Molimau a Ieova, ki te Atua ona ko ana galuega fakaofoofogia ne fai, e pelā mo te fakasaolotomaiga o te kau Isalaelu mai te ‵nofo pologa ki te kau Aikupito mo te fanaumaiga fakavavega o tena Tama pele.

² E fetaui ‵tonu eiloa a galuega fakaofoofogia a Ieova mo tena “fuafuaga se gata mai” ke fakamanuia atu ki ana tino faka‵logo e auala i te Mesia mo tena Malo telā ka pule mai. (Efeso 3:​8-​13) Ne gasolo eiloa ki mua te fuafuaga a Ieova tenā ke oko loa ki te taimi ne mafai ei o kilo atu a te apositolo ko Ioane ki te fakaasiga o te mataloa telā ne matala i te lagi. Ne lagona ne ia se leo e tagi e pelā me se pū e fai mai penei: “Vau ki luga nei, ke fakaasi atu ne au a mea e ‵tau o tupu mai tua o te mea nei.” (Fakaasiga 4:1) I te taimi ne ave keatea ei ne te Malo o Loma a ia ki te motu ko Patamo ‘i te mea ne folafola ne ia a te muna a te Atua mo mea tonu ne fakaasi ne Iesu,’ ne lavea ne Ioane “a mea kolā ne fakaasi ne Iesu Keliso.” Ne fakaasi mai ne mea kolā ne lavea kae lagona ne te apositolo me ko fakataunu eiloa a te fuafuaga se gata mai a te Atua, kae tuku mai foki i ei se mainaga i te feitu faka-te-agaga mo fakamalosiga i taimi katoa mō Kelisiano ‵tonu. ​—Fakaasiga 1:​1, 9, 10.

³ Ne lavea ne Ioane i te mataloa telā ne matala i te lagi a toeaina e toko 24 e saga‵saga i nofogaaliki mo olotou pulou e pelā me ne pulou o tupu. Ne to‵tuli ifo a latou i mua o te Atua kae fai atu penei: “Te motou Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.” (Fakaasiga 4:​11) E fakasino atu a toeaina konei ki te kau fakaekegina katoa kolā ka toe faka‵tu aka ki olotou tulaga maluga kolā ne folafola mai ne te Atua. E fakaosofia latou ke tavae atu ki a Ieova ona ko ana galuega fakaofoofogia. E ofo foki tatou i fakamaoniga o “tona mana [ko Ieova] mo tona uiga fakaatua.” (Loma 1:​20) Kae ko te lasi o te taimi e tau‵loto tatou ki a Ieova ko te uke foki o pogai e maua ei ne tatou ke tavae atu ki a ia ona ko ana galuega fakaofoofogia ne fai.

Ke Taku Atu a Galuega Kolā e Viki Atu i ei ki a Ieova!

⁴ Ne tavae atu a te fai salamo ko Tavita ki te Atua ona ko Ana galuega fakaofoofogia ne fai. E pelā me se fakaakoakoga ne usu atu a Tavita penei: “Viki atu ki te Aliki telā e pule i Siona! Fakailoa atu ki malo katoa ana mea ne fai! Te Aliki, a koe ke alofa mai ki a au! Ko matea mai ne koe toku fi‵ta ona ko latou kolā e ita mai ki a au! Te Aliki, fakasao mai au mai te mate, ke mafai ne au o tu atu i mua o tino Ielusalema, kae taku atu ki a latou a mea katoa kolā e ‵viki atu ei au ki a koe.” (Salamo 9:​11, 13, 14) I te otiga ne tuku atu ki tena tama ko Solomona a te ata o te faletapu, ne tavae kae viki atu a Tavita ki a Ieova penei: “A koe e tafasili i te maluga kae mana, e malu kae sili . . . a koe se tupu, e pule katoatoa i tino katoa. . . . . Te motou Atua, i te taimi nei, ko tuku atu ne matou te fakafetai ki a koe, kae tavae ne matou tou igoa malu.”​—1 Nofoaiga Tupu 29:10-​13.

⁵ E ‵kami fakafia mai ne te Tusi Tapu​—e tonu, e fakamalosi mai ​—ki a tatou ke ‵viki atu ki te Atua e pelā eiloa mo te mea ne fai ne Tavita. E aofia i loto i te tusi ko Salamo a fakamunaga e uke e uiga ki tavaega ki te Atua kae ko te āfa o pese konei ne ‵fatu eiloa ne Tavita. Ne tumau eiloa a ia i te ‵viki kae fakafetai atu ki a Ieova. (Salamo 69:30) E se gata i ei, mai i aso mua loa, ne fakaaogā a muna fakaosofia a Tavita mo nisi tino aka ke tavae atu ki a Ieova.

⁶ E pefea te aogā o pati i te Salamo ki tino o Ieova! Kafai e ma‵nako tatou o tavae atu ki a Ieova i a tatou eiloa, e mafai o tuku ‵tonu atu ‵tou mafau‵fau ki pati gali i te tusi ko Salamo. Kafai ko oko atu tatou ki se aso fou, e mafai o fakaosofiagina tatou ke fai ne pati e tai ‵pau mo pati konei: “Te Aliki, se mea sili i te ‵lei o avatu a fakafetai ki a koe, o usu atu a pese o tavaega ki tou malu, ko te Atua Tafasili i te Maluga. Ko folafola atu a tou alofa tumau i taeao katoa, mo tou fakamaoni foki i po katoa, au ko fiafia ona ko au galuega ‵mana; ko usu pese ei au mo te fiafia ona ko au mea ne fai.” (Salamo 92:​1-4) Kafai ko oti ne manumalo tatou i se fakalavelave io me ko gasolo atu tatou ki mua i te feitu faka-te-agaga, e mafai ne tatou o fakaasi atu te ‵tou fia‵fia mo te ‵tou loto fakafetai e auala i te faiga o ‵talo e pelā eiloa mo te pese a te fai salamo ne usu: “O‵mai ke tavae ne tatou te Aliki! Ke ka‵laga fiafia tatou ki te Atua tela e tausi ne ia tatou! Tou olo atu ki ona mua mo te fakafetai, kae usu mo te fiafia a pese o tavaega ki a ia.” ​—Salamo 95:​1, 2.

⁷ E masani sāle o usu tatou ki luga māfai ko usu atu ne tatou a vikiga o Ieova i fakatasiga a te fakapotopotoga, fono foliki, mo fono lasi. Se mea tāua me i pese konei e fakavae katoa mai luga i manatu kolā ne fakaosofia mai te tusi o Salamo. E pefea te fakafiafia mai ki a tatou ke mafai o maua aka se tusi fou i ‵tou aso nei telā e maua aka i ei a pese ‵gali o vikiga ki a Ieova! Te usuatuga o pese o tavaega ki a Ieova se pogai e tasi e ‵tau o taumafai tatou ke oko muamua atu ki te fakatasiga kae ke ‵kau atu ki ei ke oko ki te fakaotiga fakatasi mo nisi tino tapuaki i te tavae atu ki a Ieova i te usuga o pese mo te faiga o ‵talo.

“Ke Viki Atu Koutou ki te Aliki!”

⁸ A te viki atu ki a Ieova e aofia i loto i te pati Epelu tenei “Aleluia” telā e tai ‵pau tena uiga mo te pati “Ke viki atu koutou ki te Aliki (Ioa).” E pelā mo te Salamo 135:​1-3 e maua ne tatou se ‵kamiga gali penei: “Ke viki atu koutou ki te Aliki! Viki atu ki tena igoa, a koutou tavini a te Aliki kolā e ‵tu i te fale o te Aliki, i te faletapu o te tou Atua. Ke vikia te Aliki, me ‵lei a ia; viki atu ki tena igoa i pese, me aga‵lei a ia.”

⁹ Kafai e mafau‵fau tatou ki mea a te Atua ne faite mo ana galuega fakaofoofogia ne fai mō tatou, e fai ne te loto fakafetai ke avatu ne tatou a tavaega ki a ia. Kafai e kilo‵kilo tatou ki vavega fakaofoofogia ne fai ne Ieova ki ana tino i aso mua, e fai ne ‵tou loto ke fia tavae atu tatou ki a ia. Kae kafai e mafaufau ‵loto tatou ki fuafuaga ‵gali a Ieova ka fai mō tatou, ka ‵sala atu tatou ki auala ke avatu i ei ona vikiga kae ke fakaasi atu i ei te tou loto fakafetai.

¹⁰ A te ‵tou ola mai ki te vaitaimi nei e tuku mai i ei a pogai tāua ke ‵viki atu ki a Ioa. Ne usu ne Tavita tena pese penei: “Ko tavae koe ne au, me tau o ma‵taku ki a koe a tino; e iloa ne au mo toku loto katoa, i au mea katoa e fai e fakaofoofogina kae gali.” (Salamo 139:14) E tonu, e gali ‵ki te auala ne faite i ei tatou kae maua foki ne tatou a meaalofa tāua ke mafai o kilo, fakalogo, kae ke mafai foki o mafau‵fau. E ‵tau la mo tatou o faka‵tonu aka tou auala ke mafai o viki atu tatou ki te Atua telā ne faite ne ia tatou, i ne? Ne fakaasi mai ne Paulo ona mafaufauga tai ‵pau i tena tusi: “Tela la, me ne a otou mea e fai, me ‵kai io me inu, e fai katoa ne koutou mō te vikiga o te Atua.” ​—1 Kolinito 10:31.

¹¹ Kafai e a‵lofa tonu tatou ki a Ieova ka fai ne tatou a mea katoa ke tavae atu i ei ki a ia. Ne fai mai a Iesu me i te tulafono muamua ko te: “E ‵tau mo koe o alofa ki te Aliki tou Atua mo tou loto katoa, mo tou agaga katoa, mo tou mafaufau katoa, mo tou malosi katoa.” (Maleko 12:30; Teutelonome 6:5) E ‵tau mo tatou o a‵lofa ki a Ieova kae viki atu ki a ia e pelā me ko te ‵tou Mafuaga mo te tino telā ne Tuku mai ne ia “a mea ‵lei katoa kolā e maua fua mo meaalofa katoatoa takitasi.” (Iakopo 1:​17; Isaia 51:13; Galuega 17:28) Se mea tonu me ne tuku mai ne Ieova ‵tou mafaufau, ‵tou malosi i te feitu faka-te-agaga mo te feitu faka-te-foitino​—‵tou uiga mo atamai katoa. Me ne faite ne te Atua tatou e ‵tau mo tatou o a‵lofa ki a ia kae tavae atu foki ki a ia.

¹² A faifaiga fakaofoofogia a Ieova e tuku mai i ei a pogai e uke ke a‵lofa kae viki atu ki a ia! Ne usu mai a Tavita penei: “Te Aliki te motou Atua, ko oti ne fai ne koe mea e uke mō matou, e seai se tino e pau mō koe! Ko oti ne fai ne koe a fuafuaga gali mo matou. E se mafai ne au o fakalaulau atu katoa me ko to uke!” (Salamo 40:5) Ne seki mafai ne Tavita o fakalaulau atu a galuega fakaofoofogia a Ieova ne fai, kae penā foki loa tatou. Ke na tavae atu ne tatou a te Atua māfai ko lavea ne tatou ana galuega ‵gali ne fai.

Galuega a te Atua Kolā e Fetaui ‵Tonu mo Tena Fuafuaga Se-Gata-Mai

¹³ A te fakamoemoega mō tatou i aso mai mua nei e aofia malosi i ei a galuega fakaofoofogia a te Atua kolā e fetaui ‵tonu eiloa mo tena fuafuaga se-gata-mai. Mai tua malie loa o te tekeatuga i Etena ne avatu ne Ieova te avanoaga ke maua se fakamoemoega i te valoaga loa muamua. Ne fakasala ne te Atua a te gata i ana pati konei: “Ka fai ne au a koulua mo te fafine ke fai fili; a tau fanau mo tena fanau ka fai fili faeloa. Ka tuki pala ne te fanau a te fafine a tou ulu, kae ka u ne koe olotou vae.” (Kenese 3:​15) Ne tumau te fakamoemoega ki te Fanau a te fafine tenei ne folafola mai, i loto o tagata fakamaoni ke oko foki eiloa ki te taimi ne fai ne Ieova se galuega fakaofoofogia i te faka‵saoga ne Ia a Noa mo tena kāiga i te Lolo telā ne ‵ta fakapalele i ei a tino ma‵sei katoa i te lalolagi. (2 Petelu 2:5) Ne tuku mai foki ne valoaga faka-pelofeta a Ieova kolā ne fai atu ki nisi tino fakamaoni e pelā mo Apelamo mo Tavita, a te loto talitonu me ka fakataunu eiloa ne Ieova ana fuafuaga e auala i te Fanau tenā. ​—Kenese 22:15-​18; 2 Samuelu 7:​12.

¹⁴ A te ‵toe fakamaoniga sili loa ne fai ne Ieova mō tatou ko te taimi ne fai ei ne ia te ‵toe mea fakaofoofogia i te tukumaiga ne ia o tena Tama tokotasi​—ko te Fanau ne folafolagina, ko Iesu Keliso​—e pelā me se taulaga togiola. (Ioane 3:​16; Galuega 2:​29-​36) Ne tuku mai ne te taulaga togiola se faka‵leiga o tatou mo te Atua. (Mataio 20:28; Loma 5:​11) Ne fakaopoopo mai ne Ieova a tino muamua kolā ne faka‵lei aka mo ia i te Fakapotopotoga Kelisiano i te Penitekoso i te 33  T.A. Fakatasi mo te fesoasoani o te agaga tapu ne talai atu ne latou te tala ‵lei ki koga valevale ke fakaasi atu i ei te auala e fai ei ne te mate mo te toetu o Iesu ke maua ne tino faka‵logo a fakamanuiaga se-gata-mai mai lalo i te pulega a te Atua mai tena Malo faka-te- lagi.

¹⁵ I ‵tou aso nei ko oti ne galue malosi a Ieova i se auala ‵lei ke fakamaopoopo mai a Kelisiano fakaekegina. Ko oti ne taofi malie aka te fakaseaiga o te lalolagi ke mafai o fai a te toe fakamailogaga o te toega o te toko 144,000 kolā ka pule fakatasi mo Iesu i te lagi. (Fakaasiga 7:​1-4; 20:6) Ko oti ne fakamautinoa aka ne Ieova me ko oti ne aumai keatea ne ia a Kelisiano fakaekegina mai te ‵nofo pologa ki mea faka-te-agaga a “Papelonia Takutakua” te emupaea o lotu ‵se i te lalolagi kātoa. (Fakaasiga 17:​1-5) A te faka‵saoga telā ne fai i te 1919 mo te puipuiga ne maua ne latou mai te Atua ne ‵tala atu i ei te avanoaga ki te ‵toega o te kau fakaekegina ke fai ne latou te ā? Ke fakamaina atu ne latou e auala i te faiga o te toe talaiga a koi tuai o fakaseai ne Ieova a te fakanofonofoga masei a Satani tenei i te toe “fakasauaga lasi.” ​—Mataio 24:21; Tanielu 12:3; Fakaasiga 7:​14.

¹⁶ Ko takitaki ne Molimau fakaekegina a Ieova a te galuega talai o te Malo mo te loto finafinau. E pelā me se ikuga ko oti ne fanaka ki luga te aofaki o “nisi mamoe” kolā ko fai pelā me ne tino tapuaki ki a Ieova. (Ioane 10:16) Ke fia‵fia tatou me koi maua loa nei ne tino loto fia‵fia i te lalolagi nei a te avanoaga ke ‵kau mai i te avatuga o vikiga ki a Ieova. Ko tino kolā e talia ne latou te ‵kamiga tenei ke “vau!” e fakamoe‵moe latou ke ‵sao atu i te fakalavelave lasi, kae ke ‵viki atu foki i ei ki a Ieova ki te se-gata-mai.​—Fakaasiga 22:17.

Ko Maopoopo Atu Nei te Fia Afe o Tino ki te Tapuakiga Tonu

¹⁷ E fai nei ne Ieova ana galuega fakaofoofogia ke avatu i ei ana vikiga kae ke fetaui foki mo te talaiga o te tala ‵lei. (Maleko 13:10) I tausaga fakamuli nei ko oti ne ‵tala mai ne ia a ‘avanoaga konei mō te galuega.’ (1 Kolinito 16:9) Ne fai ne te mea tenei ke faigofie te talaiatuga o te tala ‵lei ki nisi koga talai kolā e isi faeloa i ei ne fili o te munatonu. E tokouke a tino kolā ne ‵nofo muamua i te pouliga i te feitu faka-te-agaga ko ‵saga tonu mai nei ki te kamiga tenei ke tapuaki atu ki a Ieova. Ko fakataunu nei ne latou a pati fakapelofeta konei: “I aso kona, ka o‵mai a tino o fenua fakaatea e tokosefulu ki se Iutaia e tokotasi, kae fai atu ki a ia penei, ‘Matou e ma‵nako o kau mo koe, me ne lagona ne matou me i te Atua e fakatasi mo koe.’ ” (Sakalia 8:​23) E fakauiga te pati “koe” ki tino Iutaia faka-te-agaga, ko te toega o Kelisiano fakaekegina i aso nei. Ona la e masani o fakauiga te sefulu ki te fakakatoaga o mea i te lalolagi nei, a te “tokosefulu” tagata konā e fakatusa ki te “vaitino tokouke” kolā ne aumai ke fakatasi atu ki te “Isalaelu a te Atua” ke fai latou pelā me se “lafu e tasi.” (Fakaasiga 7:​9, 10; Kalatia 6:​16) Ma‵faga o mea fakafiafia ke lavea atu a tino e tokouke kolā e fai fakatasi te lotou taviniga tapu, e pelā me ne tino tapuaki ki a Ieova te Atua!

¹⁸ Se mea fakafiafia loto me e lau i sefulu afe​—io me ne selau afe ​—a tino ko ‵kau fakatasi mai nei ki te tapuakiga tonu i fenua kolā ne ‵fonu eiloa i lotu ‵se kae ne foliga muamua mai ei me ka seai ne tino ka talia ne latou te tala ‵lei. Ke onoono ki te Yearbook of Jehovah’s Witnesses fakamuli nei ki fenua kolā e lipoti mai ei a tino talai mai te toko 100,000 kae ko tai katoa foki nei te toko 1,000,000. Te mea tenei se tinā fakamaoniga tonu eiloa me i te galuega tenei e fakamanuia mai eiloa ne Ieova.​—Faataoto 10:22.

¹⁹ E pelā me ne tino o Ieova, e avatu ne tatou te fakafetai mo te vikiga ki te ‵tou Tamana faka-te-lagi mō te tukumaiga ne ia a te pogai tonu o te olaga, te galuega a ia telā e isi sena taui, mo te kilokiloga gali mō aso mai mua. E ‵nofo atu nei tatou mo te fakamoemoega maluga ki te fakataunuga ne te Atua ana fuafuaga kae ke tumau eiloa tatou ‘kae tausi tatou i te alofa o te Atua, ka koi fakatalitali tatou ki te ‵tou Aliki ko Iesu Keliso, ke tuku atu ne ia a te ola se gata mai i tona alofa ‵nau.’ (Iuta 20, 21) E pefea te fia‵fia o tatou ke lavea atu te aofaki o te vaitino kolā e tapuaki atu nei ki te Atua ko siliga atu mo te toko 6,000,000! Ona ko fakamanuiaga mautinoa mai i a Ieova ko ‵nofo atu nei a te ‵toega o te kau fakaekegina fakatasi mo nisi mamoe i fakapotopotoga e 91,000 i fenua e 235. E fagai faka‵lei tatou e auala i “te tavini fakamaoni kae poto,” ko te potukau telā e se mapu eiloa i te faiga o olotou galuega. (Mataio 24:45) E loto fakafetai tatou ki a Ieova me ne fakagalue ne ia a loto o ana tino ke ‘avatu ki te Aliki te fua tafasili i te ‵lei.’ (Faataoto 3:​9, 10) E iku atu i ei ki te tumau eiloa o te galuega talai i te lalolagi katoa, fakatasi mo te fakatuga o ofisa ‵lomi tusi, Peteli mo fale misionale, Kingdom Halls mo Assembly Halls māfai ko manakogina.

²⁰ E se mafai ne tatou o laulau katoa a galuega gali kae fakaofoofogia a te tou Tamana faka-te-lagi. E se mafai o taofi aka ne se tino telā e maua ne ia te loto talitonu, tena ‵kau fakatasi atu ki te maopoopoga o tino kolā e tavae atu ki a Ieova, i ne? Ikai, e se mafai! Tela la, ke na ka‵laga atu mo te fiafia a tino kolā e a‵lofa ki te Atua penei: “Viki atu koutou ki te Aliki! Viki atu ki te Aliki mai te lagi, a koutou katoa kolā e nofo i koga maluga. Viki atu ki a ia ana agelu katoa . . . , tamataene mo tamafine, tino matua mo tamaliki foki. Ke viki atu katoa latou ki te igoa o te Aliki [ko Ieova]! Ko tena igoa e tafasili i igoa katoa; tena ‵malu e maluga atu i te lagi mo te lalolagi.” (Salamo 148:​1, 2, 12, 13) E tonu, nei ke oko foki eiloa ki te se-gata-mai, ke na ‵viki atu tatou ki a Ieova mo ana galuega fakaofoofogia!

Ka Tali Mai Pefea ne Koe?

• Ne a nisi galuega fakaofoofogia a Ieova?

• Kaia e fia tavae atu i ei koe ki a Ieova?

• E fetaui pefea te ‵tou fakamoemoega mō galuega fakaofoofogia a te Atua?

• E fetaui pefea a galuega fakaofoofogia a Ieova mo te talaiatuga e uiga ki te Malo?

[Fesili mo te Sukesukega]

1. Ne a galuega fakaofoofogia kolā e ‵tau i ei o viki atu ki a Ieova?

2. (a) Se a te uiga o te “fuafuaga se gata mai” a te Atua mō tino faka‵logo? (e) Ne a mea ne oko atu ki a Ioane i te motu o Patamo?

3. Ko oi e sui ne latou a toeaina e toko 24 kolā ne lavea ne Ioane i te fakaasiga?

4, 5. Ke fakamatala mai a fakaakoakoga ne fai ne Tavita ke tavae atu i ei ki a Ieova.

6. E aogā pefea a te tusi fakaosofia ko Salamo ki a tatou?

7. (a) Se a te mea tāua e uiga ki pese kolā e usu sāle ne Kelisiano? (e) Se a te pogai e tasi e tāua ei ke oko vave atu ki te fakatasiga kae nofo foki loa i ei ke oti?

8. Se a te uiga o te pati “Aleluia”?

9. Se a te mea e fakaosofia i ei tatou ke tavae atu ki a Ieova?

10, 11. E tavae atu pefea tatou ki a Ieova ona ko te ola mai o tatou ki te vaitaimi nei?

12. E pefea ou lagonaga ki galuega fakaofoofogia a Ieova mo pati i te Salamo 40:5?

13. E fetaui pefea ‵tou fakamoemoega mo galuega fakaofoofogia a te Atua?

14. Se a te ‵toe fakaakoakoga sili e uiga ki galuega fakaofoofogia a Ieova mō tatou?

15. Ne gasuesue pefea a Ieova i se auala gali i ‵tou aso nei?

16. Se a nei te mea ka tupu e pelā me se ikuga o te talaiatuga e uiga ki te Malo i ‵tou aso nei i te lalolagi kātoa?

17. (a) E fai pefea ne Ieova ana galuega fakaofoofogia ke fetaui mo ‵tou galuega talai? (e) E fakataunu mai pefea a te tusi ko Sakalia 8:23?

18, 19. Ne a fakamaoniga e fakaasi mai ei me e fakamanuia mai ne Ieova te galuega talai?

20. Ka fesoasoani mai pefea ki a tatou te mafaufau ki galuega fakaofoofogia a Ieova?

[Ata i te itulau e 8]

E mata, e kau katoatoa atu koe ki te usuga o pese o vikiga ki a Ieova mo tou loto kātoa?

[Ata i te itulau e 9]

E fia‵fia tatou me koi maua eiloa nei te avanoaga mō tino loto talitonu ke ‵kau fakatasi mai i te avatuga o tavaega ki a Ieova