Talavou, ‵Viki Atu ki a Ieova!

“‵Viki atu koutou ki te Aliki [ko Ieova] mai te lalolagi, . . . tamataene mo tamāfine.”​—SALAMO 148:​7, 12.

1, 2. (a) Ne a fakataputapuga e iloa ‵lei ne talavou e tokouke? (e) Kaia e se ‵tau ei o fanoa‵noa a talavou i fakataputapuga kolā e tuku atu ne olotou mātua?

E ILOA ‵lei ne talavou i te ukega o taimi a mea kolā e se talia ke fai ne latou. E mafai o taku ‵tonu mai ne te tokoukega o latou a te taimi e mafai ei o olo atu latou i a latou eiloa ki te suā feitu o te auala io me ko te taimi e ‵tau o ‵moe latou i ei io me ko te taimi e ‵tau ei o fakatele ne latou se motokā. I nisi taimi, kāti e mafaufau se talavou me ko tō uke ana fakamolemole kolā e tasi eiloa te tali ki ei, “Faka‵tali ke matua koe.”

² E iloa ne koutou, talavou, me se mea ‵lei ke fai ne otou mātua ne vaegā tapulā penā, kāti mō te ‵lei eiloa o koutou. E iloa ‵lei foki ne koutou, me se mea fakafiafia ki a Ieova māfai e faka‵logo koutou ki otou mātua. (Kolose 3:​20) Kae e mata, e mafaufau koe me e seki kamata faka‵lei tou olaga ona ko fakataputapuga penā? E mata, ko mea tāua katoa e fakatapu ei koe ke oko ki te taimi ko matua ei koe? Ikai loa! E isi se galuega e fai i aso nei telā e sili fakafia atu tena tāua i lō so se isi mea kāti koi faka‵tali koe ki ei. E mata, e saoloto koutou, talavou, ke ‵kau atu ki te galuega tenei? E se saoloto fua koutou o ‵kau ki ei​​—kae e ‵kami eiloa koutou ne te Atua Tafasili i te Maluga ke ‵kau atu ki ei!

3. Se a te tauliaga telā e ‵kami atu ne Ieova a talavou ke ‵kau ki ei, kae ne a fesili ka mafau‵fau nei tatou ki ei?

³ Se a la te galuega e fai‵pati tatou ki ei? Ke onoono ki pati o te tusi siki fakavae mō te mataupu tenei: “‵Viki atu ki te Aliki [ko Ieova] mai te lalolagi, . . . tamataene mo tamāfine, tino ma‵tua mo tama‵liki foki.” (Salamo 148:​7, 12) Tenei eiloa te otou tauliaga sili: Ko te ‵viki atu ki a Ieova. E pelā me se talavou, e mata, e fiafia koe o kau atu ki te galuega tenā? E penā eiloa a talavou e tokouke. Ko te mea ke matea atu te pogai e tāua ei ke maua se lagonaga penā, ke na mafau‵fau nei tatou ki fesili e tolu konei. Muamua la, kaia e ‵tau ei o ‵viki atu koutou ki a Ieova? A te lua, e mafai pefea o ‵viki atu koe ki a ia i se auala magoi? A ko te tolu, ko te taimi fea e ‵lei ei ke kamata o ‵viki atu ki a Ieova?

Kaia e ‵Viki Atu ei ki a Ieova?

4, 5. (a) E ‵tusa mo te Salamo mataupu e 148, se a te tulaga fakaofoofogia ko ‵tu atu nei tatou i ei? (e) E ‵viki atu pefea ki a Ieova a mea kolā ne faite kae e se mafai o fai‵pati?

⁴ E tasi te pogai tāua e ‵viki atu ei ki a Ieova me i a ia ko te Atua telā ne faite ne ia a mea katoa. E fesoasoani mai te Salamo mataupu e 148 ke matea atu te mea tonu tenei. Mafaufau la: Kafai ko pili atu koe ki se potukau o tino e tokouke kolā e ‵kau fakatasi i te usuatuga o se pese gali kae fakaalofalofa, ka pefea ou lagonaga e uiga ki ei? E a māfai e iloa ne koe a kupu o te pese tenā e pelā me ne pati ‵tonu, e fakaasi atu i ei a manatu kolā e iloa ne koe me e tāua ‵ki, e fakafiafia kae fakamalosi loto? E mata, ka fia tauloto koe ki pati o te pese kae kau atu foki ki tena usuga? E penā eiloa te tokoukega o tatou. Ia, e fakaasi mai i te Salamo mataupu e 148, me e nofo atu eiloa koe i se tulaga penā kae e sili fakafia atu tena gali. E fakamatala mai ne te salamo tenā se ma‵tugā potukau lasi telā e ‵viki fakatasi atu katoa ki a Ieova. Kae kafai e faitau koe ki te salamo tenā, kāti ka lavea atu ne koe se mea telā e tu ‵kese. Se a te mea tenā?

⁵ E uke a mea e ‵viki atu i te Salamo mataupu e 148, kolā e se mafai o fai‵pati io me e fakasako‵sako mai. E pelā mo te la, te masina, fetu, kiona, te matagi, mo mauga e ‵viki atu katoa ki a Ieova. E mafai pefea o fai ne mea sē ola konei se vaegā mea penei? (Fuaiupu e 3, 8, 9) E tonu, e ‵pau eiloa mo mea e fai ne lakau, mea ola i te tai, mo manu. (Fuaiupu e 7, 9, 10) Kai lavea aka eiloa ne koe te matālagi i te taimi ko pili ei o tō te mata o te la io me ko te masina sulu e folau i luga i te lagi telā e ‵fonu i fetu io me e ‵mae tou tinae i te kataga i tafaoga a manu io me e ofo koe i se kogā koga tafasili i te gali? Ko “ lagona” atu ei ne koe se pese o vikiga mai mea kolā ne faite. A mea katoa kolā ne fai ne Ieova, e fakamasaua mai ki a tatou me i a ia ko te Atua Malosi Katoatoa, kae e seai se tino i te lagi mo te lalolagi kātoa e ‵pau tena malosi, tena poto, mo tena alofa, e pelā mo te Atua.​​—Loma 1:​20; Fakaasiga 4:​11.

6, 7. (a) Ne a mea ola kae ‵poto kolā ne faite e fakamatala mai i te Salamo mataupu e 148, me e ‵viki atu ki a Ieova? (e) Kaia e mafai ei o fakaosofia ‵tou loto ke ‵viki atu ki a Ieova? Fakamatala mai.

⁶ E fakamatala mai foki i te mataupu e 148 o te Salamo a tino kolā e ‵viki atu ki a Ieova. I te fuaiupu e 2, e lavea atu i ei a te “kautau o te lagi” a Ieova, ko agelu, e ‵viki atu ki te Atua. I te fuaiupu e 11, e ‵kami atu foki a tino ma‵luga kae ma‵losi olotou pulega, e pelā mo tupu mo fāmasino, ke ‵kau atu ki te avatuga o vikiga konei. Kafai e fia‵fia a agelu ma‵losi o ‵viki atu ki a Ieova, e mafai la pefea o fai mai a tino sē ma‵losi i a latou ko tō takutakua ke fai foki penā? Kae i te fuaiupu e 12 mo te 13, e ‵kami atu foki koutou, e talavou, ke ‵kau atu ki te avatuga o vikiga ki a Ieova. E mata, e fia fai foki koe penā?

⁷ Mafaufau ki se tala fakatusa. Kafai e isi sou taugasoa pili telā e apo malosi i se mea​​—kāti i tafaoga, te ‵lomi ata, io me ko mea tau pese​​—e mata, ka faipati koe e uiga ki a ia ki tou kāiga mo nisi taugasoa? E mautinoa eiloa me ka fai ne koe te mea tenā. E ‵pau eiloa mo mea ka fai ne tatou māfai ko iloa ne tatou a mea katoa kolā ko oti ne fai ne Ieova. E pelā mo pati i te Salamo 19:​1, 2, e fai mai me e fai ne te lagi telā e ‵fonu i fetu ke “fakailoa atu . . . te ‵malu o te Atua.” Kae e pelā mo tatou, kafai e mafau‵fau tatou ki mea fakaofoofogia kolā ko oti ne fai ne Ieova, e faigata eiloa o taofi aka ne tatou te ‵tou fai‵pati atu ki nisi tino e uiga ki te ‵tou Atua.

8, 9. Ne a pogai e manako ei Ieova ke ‵viki atu tatou ki a ia?

⁸ A te suā pogai tāua e ‵viki atu ei tatou ki a Ieova, me e manako a ia ke fai ne tatou te mea tenā. Kaia? E mata, e fakalagolago a ia ki vikiga mai tino? Ikai. Kāti e ma‵nako loa tatou i nisi taimi ki vikiga, kae e maluga fakafia atu a Ieova i lō tatou. (Isaia 55:8) E seai eiloa sena fakalotolotolua e uiga ki a ia io me ko ana uiga. (Isaia 45:5) Kae e manako a ia ke ‵viki atu tatou ki a ia kae e fiafia eiloa a ia māfai e fai ne tatou te mea tenā. Kaia? Mafaufau ki pogai e lua konei. Muamua la, e iloa ne ia me e ‵tau eiloa o ‵viki atu tatou ki a ia. Ne faite ne ia tatou mo te manakoga faka-te-agaga, ko te manakoga ke tapuaki atu. (Mataio 5:3) E fiafia lasi a Ieova ke matea ne ia me e fakataunu ne tatou te manakoga tenā, e pelā eiloa mo te fia‵fia o ou mātua ke lavea ne laua me e kai koe ki meakai kolā e iloa ne laua me e aogā ki a koe.​​—Ioane 4:​34.

⁹ A te lua o pogai, e iloa ne Ieova me e ‵tau o lagona ne nisi tino a ‵tou vikiga kolā e fai atu ki a ia. Ne tusi atu ne te apositolo ko Paulo a pati konei ki te tamataene ko Timoteo: “Ke matapula koe, kae tausi faka‵lei ki au akoakoga, kae fai eiloa ne koe i taimi katoa, me kafai e fai ne koe, ka fakasao ne koe a koe eiloa, pelā foki mo latou kolā e faka‵logo mai ki a koe.” (1 Timoteo 4:​16) E tonu, kafai e akoako atu ne koe a nisi tino e uiga ki a Ieova te Atua, mai te ‵viki atu ki a ia, ka mafai foki ei o iloa ne latou a Ieova. E mafai o takitaki atu latou ne te vaegā iloaga tenā ki te fakaolataga se-gata-mai!​​—Ioane 17:3.

10. Kaia e ma‵nako ei tatou o ‵viki atu ki ‵tou Atua?

¹⁰ E isi aka foki se pogai e ‵viki atu ei ki a Ieova. Masaua la te tala fakatusa e uiga ki tou taugasoa apo. Kafai e lagona ne koe a nisi tino e taku faka‵pelo ne latou a ia, e fakamasei ne latou tena igoa ‵lei, e mata, ka se momea aka ei tou fia tavae atu ki a ia? Ia, ko oti ne fakamaseigina a Ieova i te lalolagi kātoa tenei. (Ioane 8:​44; Fakaasiga 12:9) Telā la, a tino kolā e a‵lofa ki a ia e fakapalele olotou mafi o taku ‵tonu atu te mea tonu e uiga ki a ia, ke faka‵tonu aka ei a tala ‵loi e uiga ki ei. E mata, e manako foki koe ke fakaasi atu tou alofa mo tou loto fakafetai ki a Ieova kae fakaasi atu me e manako koe ke fai a ia mo fai tou Pule i lō tena fili sili, ko Satani? E mafai o fai ne koe a mea katoa konā mai te ‵viki atu ki a Ieova. A te suā fesili la, e fai pefea te mea tenā?

Te Auala e ‵Viki Atu ei a Nisi Talavou ki a Ieova

11. Ne a tala i te Tusi Tapu e fakaasi mai me e mafai o ma‵goi a talavou i te lotou ‵viki atu ki a Ieova?

¹¹ E fakaasi mai i te Tusi Tapu me e ma‵goi sāle a taumafaiga a talavou i te ‵viki atu ki a Ieova. E pelā mo te tamaliki fafine Isalaelu telā ne ave fakapagota ne te kau Sulia. Ne talai atu tou fafine mo te loto toa ki tena pule fafine e uiga ki te pelofeta a Ieova ko Elisaia. Ne iku atu ana pati ne fai ki te faiga o se vavega, kae ne tuku atu i ei se molimau lasi ‵ki kae ‵lei. (2 Tupu 5:​1-​17) Ne talai atu foki a Iesu mo te loto toa i te taimi koi foliki ei a ia. Mai mea katoa kolā ne fai ne ia i te taimi koi talavou ei tou tagata kae kolā ne mafai foki o fakamau ki lalo i te Tusi Tapu, ne filifili ne Ieova te taimi ne fakafesilisili ei mo te loto toa ne Iesu telā ko 12 ana tausaga a takitaki lotu i te faletapu i Ielusalema kae ne ofo masei latou i tena malamalama i auala o Ieova.​​—Luka 2:​46-​49.

12, 13. (a) Ne a mea ne fai ne Iesu i te faletapu mai mua faeloa o tena mate, kae ne pokotia pefea a tino kolā ne ‵nofo atu i konā i ei? (e) Ne a lagonaga o Iesu e uiga ki vikiga kolā ne tuku atu ne tama‵liki?

¹² I te taimi ko matua ei tou tagata, ne fakamalosi atu foki a Iesu ki tama‵liki ke ‵viki atu ki a Ieova. E pelā mo nāi aso mai mua o tena mate, ne fakamāumāu ne Iesu a taimi i te faletapu i Ielusalema. E fai mai te Tusi Tapu me ne fai ne ia a “galuega fakaofoofogina” i konā. Ne ‵tuli ne ia ki tua a tino kolā ne fai ne latou te koga ‵malu tenā mo fai te ana o tino kaisoa. Ne faka‵lei foki ne ia a tino ‵kivi mo tino ‵pili. Ne ‵tau eiloa o otia a tino katoa i konā, maise eiloa a takitaki lotu, ke ‵viki atu ei ki a Ieova, mo tena Tama, telā ko te Mesia. E fakafanoanoa me ne seki tuku atu eiloa ne tino e tokouke i aso konā a vaegā vikiga penā. Ne iloa ne latou me ne uga mai Iesu ne te Atua, kae ne ma‵taku latou i takitaki lotu. Kae ne fai‵pati aka mo te loto ‵toa se potukau e tasi i konā. E iloa ne koe me ko oi latou? E fai mai te Tusi Tapu, penei: “Ne ita a faitaulaga sili mo faiakoga o te Tulafono i te laveaga ne latou ana galuega fakaofoofogina ne fai. Ne ka‵laga foki a tama‵liki i loto i te Fale Tapu, kae fai ake olotou pati penei, ‘Ke vikia te Tama a Tavita!’ Telā, fai mai ei latou ki a Iesu, ‘E lagona ne koe olotou pati ne fai?’ ”​—Mataio 21:​15, 16; Ioane 12:42.

¹³ Ne fakamoe‵moe a faitaulaga me ka ‵liko ne Iesu a tama‵liki kolā e ‵viki atu ki a ia. E mata, ne fai ne Iesu te mea tenā? Ikai loa! Ne tali atu Iesu ki faitaulaga: “Ao, e lagona ne au. Kae e seki fai‵tau eiloa koutou i muna kolā ne tusi i tusi, ‘Ko oti ne akoako ne koe a tama‵liki mo pepe ke tuku atu ne latou a vikiga tonu ki a koe’?” E manino ‵lei i ei me ne fia‵fia eiloa Iesu mo tena Tamana ki vikiga mai tama‵liki. Ne fai eiloa ne tama‵liki a mea kolā ne ‵tau o fai ne tino ma‵tua katoa kolā ne ‵nofo atu i konā. Ne manino ‵lei eiloa i olotou mafaufau a mea kolā ne ‵tupu. Ne lavea ne latou a mea fakaofoofogia ne fai ne te tagata tenei, ne faipati atu mo te loto toa mo te fakatuanaki, kae fakaasi atu foki tena alofa lasi ki te Atua mo ana tino. Ko ia telā ne fai mai i a ia​— ko te “Tama a Tavita,” ko te Mesia telā ne folafola mai. I te taui atu ki te lotou fakatuanaki, ne maua foki ne tama‵liki konei a te tauliaga ke fakataunu ne latou se valoaga.​​—Salamo 8:2.

14. E mafai pefea o ‵viki atu a talavou ki te Atua ona ko meaalofa kolā e maua ne latou?

¹⁴ Ne a mea e tauloto ne tatou mai vaegā tala penā? Me e mafai eiloa o ma‵goi a taumafaiga a tama‵liki i te ‵viki atu ki a Ieova. E maua sāle ne latou te meaalofa ko te mateagofie ne latou te munatonu, kae fakaasi manino mai te lotou fakatuanaki mo te loto finafinau. E maua foki ne latou te meaalofa telā e taku mai i te Faataoto 20:29: “E tavae ne tatou te malosi o talavou.” E tonu, e fakamanuiagina koutou, e tama‵liki, ke maua ne koutou te malosi​—se mea tāua ‵ki i te ‵viki atu ki a Ieova. E fakaaogā la pefea ne koutou a meaalofa konā?

E Mafai Pefea o ‵Viki Atu Koe ki a Ieova?

15. Ko te mea ke ‵viki atu ki a Ieova i se auala magoi, se a te lagonaga telā e ‵tau o maua?

¹⁵ E kamata mai eiloa i te loto a faiga ma‵goi i te feitu tenei. E se mafai o magoi tou ‵viki atu ki a Ieova māfai e fai fua ne koe ona ko te mea e ma‵nako a nisi tino ke fai koe penā. Ke masaua te tulafono tafasili i te tāua i tulafono katoa: “E ‵tau mo koe o alofa ki te Aliki [ko Ieova] tou Atua mo tou loto kātoa, mo tou agaga kātoa, mo tou mafaufau kātoa.” (Mataio 22:37) E mata, ko oti ne iloa ‵lei ne koe a Ieova e auala i au sukesukega totino ki tena Muna? A te mauaga o ikuga ‵lei o vaegā sukesukega penā ko te alofa tonu o koe ki a Ieova. A te auala masani ke fakaasi atu te vaegā alofa tenā ko te ‵viki atu ki a ia. Kafai ko manino ‵lei kae ma‵losi ou lagonaga i te feitu tenei, ko toka ‵lei ei koe o ‵viki atu ki a Ieova mo te loto finafinau.

16, 17. Se a te aogā o amioga ‵lei i te avatuga o vikiga ki a Ieova? Fakamatala mai.

¹⁶ Nei la, a koi tuai o mafaufau koe ki au pati ka fai mai, ke na mafaufau mua ki te auala ka fai ei ne koe. Se a tau faka‵tau, moi fai ne sē āva, io me ne amio kaisoa te tamaliki fafine Isalaelu i aso o Elisaia, e mata, ne fia fakalogo tena pule fafine mai Sulia ki ana pati e uiga ki te pelofeta a Ieova? Ailoga. E penā foki koutou, kāti ka fia fakalogo‵logo atu a tino ki a koutou māfai e lavea ne latou i a koutou e āva, e fakamaoni, kae ‵lei foki otou amioga. (Loma 2:​21) Mafaufau ki se fakaakoakoga.

¹⁷ Ne faimālō atu ki se tamaliki fafine ko 11 ana tausaga i te akoga i Potukale ke kau atu ki te fakamanatuga o aso malōlō kolā ne fakamasei atu ki tena loto lagona. Ne fakamatala atu ne ia mo te āva ki tena faiakoga te pogai e ‵tau ei o se kau a ia ki ei, kae ne fakatauemu atu tena faiakoga ki a ia. Ne taumafai faeloa te faiakoga i taimi katoa o fakamā tou fafine, kae fakatauemu atu ki tena lotu. Kae ne tumau eiloa te tamaliki fafine tenā i te āva. I te fia o tausaga mai tua ifo i ei, ne tavini atu te tuagane tenā e pelā me se paenia tumau. I se fono lasi e tasi, ne kilokilo atu tou fafine ki tino kolā ne papatiso kae ne iloa ne ia se tino e tokotasi mai i ei. Ko tena faiakoga mua tenā! Ne fakatau ‵sai kae fakatau ‵tagi laua, kae ne fai atu te faiakoga me ne seki puli lele eiloa i a ia ana uiga āva. Ne āsi atu se Molimau ki te faiakoga tenā, kae ne tavae ne ia tena tamaliki akoga ki ei. Ne iku atu i ei ki te kamataga o se akoga faka-te-Tusi Tapu, kae ne puke ‵mau ei te fafine tenei ki te munatonu mai te Tusi Tapu. E tonu, e mafai eiloa o fai au amioga ‵lei mo fai se auala lasi ‵ki e ‵viki atu i ei ki a Ieova!

18. Ne a mea e mafai o fai ne se talavou māfai e se mafai ne ia o kamata ne sautalaga e uiga ki te Tusi Tapu mo Ieova te Atua?

¹⁸ E mata, e faigata ke kamata ne koe a sau‵talaga i te akoga e uiga ki tou talitonuga? E se ko koe fua tokotasi e fai penā. Kae e mafai ne koe o fai se faiga ko te mea ke mafai o fesili atu a nisi tino e uiga ki tou talitonuga. E pelā mo te ave ne koe o tusi faka-te-Tusi Tapu kae faitau ki ei i taimi malō‵lō io me ko nisi taimi kolā e saoloto ei ke fai penā. E mafai o fesili atu a tama‵liki i tou vasega ki mea kolā e faitau ne koe. Mai te tali mo te fakaasi atu ki a latou e uiga ki au mea ‵gali kolā e faitau, e mafai ei o iku atu ki te faiga o se sau‵talaga gali. Ke masaua o fesili atu e uiga ki mea kolā e talitonu ki ei te tamaliki akoga tenā. Ke fakalogologo atu mo te āva, kae fakaasi atu a mea kolā ne tauloto ne koe mai te Tusi Tapu. Ko tokouke eiloa a talavou e ‵viki atu nei ki te Atua i te akoga. E maua ne latou i ei te fiafia lasi kae e fesoasoani atu foki ke iloa ne tino e tokouke a Ieova.

19. E mafai pefea o momea aka te ma‵goi o talavou i te galuega mai fale ki fale?

¹⁹ A te galuega mai fale ki fale se auala tafasili i te magoi ke ‵viki atu ei ki a Ieova. Kafai e seki kau atu koe ki ei, kaia e se na taumafai nei koe ki ei? Kafai ko kau atu nei koe ki ei, e a, e isi foki ne nisi mea e fakamoemoe koe ki ei? E pelā mo te mea tenei, i lō te fai atu o se fakamatalaga e tasi fua i fale katoa, taumafai o onoono ki nisi auala ke momea aka ei te ‵lei o au pati, kae fesili atu foki ki ou mātua io me ko nisi tino apo mō manatu fesoasoani. Taumafai ke momea aka te fakaaogāga o tau Tusi Tapu, te faiga o toe āsiga ma‵goi, mo te kamataga o se akoga faka-te-Tusi Tapu. (1 Timoteo 4:​15) Ko te uke o taimi e ‵viki atu ei koe ki a Ieova i auala konei, ko te gasolo foki o magoi tau galuega, kae ka gasolo foki koe o fiafia ki ei.

Ko te Taimi Fea e ‵Tau ei o Kamata Tou ‵Viki Atu ki a Ieova?

20. Kaia e se ‵tau ei o mafau‵fau a talavou me i a latou ko tō fo‵liki ke ‵viki atu ei ki a Ieova?

²⁰ Mai fesili konei e tolu i te mataupu tenei, ko te tali ki te ‵toe fesili tenei ko te ‵toe tali faigofie eiloa. Onoono ki te tali telā e fai ‵tonu mai i te Tusi Tapu: “Ke masaua ne koutou a te Atua telā ne faite ne ia koutou, i aso konei koi ‵tupu ake ei koutou.” (Failauga 12:1) E tonu, tenei eiloa te taimi ke kamata ei o ‵viki atu ki a Ieova. E faigofie ke fai mai koe: “Au ko tō foliki ke ‵viki atu ki a Ieova. E se lava toku poto. E ‵tau o faka‵tali ke tai matua aka au.” E se ko koe te tino muamua ke mafaufau penā. E pelā mo te talavou ko Ielemia, ne fai atu a ia ki a Ieova: “Te Aliki Sili, e se iloa ne au o faipati, au koi foliki.” Ne fakatalitonu atu a Ieova me e seai eiloa se pogai ‵lei ke mataku ei tou tagata. (Ielemia 1:​6, 7) E penā foki tatou, e seai se pogai e ‵tau o ma‵taku ei i te ‵viki atu ki a Ieova. E seai se logo‵maega telā e mafai o oko mai ki a tatou telā e se mafai o faka‵lei aka ne Ieova.​​—Salamo 118:6.

21, 22. Kaia e faka‵tusa ei a talavou kolā e ‵viki atu ki a Ieova ki motigāvai o te ‵sau o te vaveao, kae kaia e fakamalosi loto ei te fakatusa tenā?

²¹ Telā la, e fakamalosi atu eiloa matou ki a koutou, e talavou: Ke mo a ma fakatalave koutou o ‵viki atu ki a Ieova! Tenei eiloa te ‵toe taimi ‵lei ke ‵kau atu ki te ‵toe galuega tāua tenei e fai i te lalolagi i aso nei a koi talavou koe. Kafai e fai ne koe te mea tenā, ka fai eiloa koe mo fai se vaega o se mea tafasili i te gali​—ko te kāiga o tino i te lagi mo te lalolagi kātoa kolā e ‵viki atu ki a Ieova. E fiafia lasi a Ieova me ko aofia koe i te kāiga tenei. Onoono ki pati kolā ne fakamalosi atu ki te faisalamo ke fai atu ki a Ieova: “A te aso e taua ei koe mo ou fili, ka ‵kau fakatasi mai ou tino ki a koe. Ka olo atu foki au tamataene ki a koe i luga i mauga tapu, e pelā mo te ‵sau i te vaveao.”​​—Salamo 110:3.

²² E lavea atu eiloa te gali o te malipo‵lipo mai o motigāvai o te ‵sau mai te mainaga o te vaveao, i ne? E ‵gali, e malipo‵lipo, kae e se mafai foki o lau te lotou aofaki. E penā eiloa te kilokiloga a Ieova ki a koutou e talavou kolā e ‵viki atu mo te fakamaoni ki a ia i taimi faiga‵ta konei. E manino ‵lei me i tau filifiliga ke ‵viki atu ki a Ieova e fai ei tena loto ke ‵fonu i te fiafia. (Faataoto 27:11) Telā la, ke na ‵viki atu ki a Ieova, koutou katoa e talavou!

Ka Tali Mai Pefea ne Koe?

• Ne a nisi pogai tāua e ‵viki atu ei tatou ki a Ieova?

• Ne a tala i te Tusi Tapu e fakaasi mai i ei me e mafai o ma‵goi a talavou i te lotou ‵viki atu ki a Ieova?

• E mafai pefea o ‵viki atu a talavou ki a Ieova i aso nei?

• Ko te taimi fea e ‵tau ei o kamata o ‵viki atu a talavou ki a Ieova, kae kaia?

[Ata i te itulau e 15]

Kafai e maua ne sou taugasoa se atamai fakaofoofogia, e mata, ka se taku atu ne koe te mea tenei ki nisi tino?

[Ata i te itulau e 16]

Kafai e manako koe ke momea aka te ‵lei o tau galuega talai, ke na fakamolemole atu ki se Molimau atamai mō manatu fesoasoani

[Ata i te itulau e 17]

E mafai o fia iloa ne tama‵liki i tau vasega ou talitonuga