Fakatakitakiga Mai te Atua e Uiga ki te Filiga o Sau Avaga
“Ka akoako atu ne au ki a koe te auala e ‵tau o fano koe i ei; ka fakatonutonu kae akoako ne au a koe.”—SALAMO 32:8.
NE KAMATA o kini ne tino a kāpa. Ne kamata o usu aka ne te fafine i tena leo ‵tagi gali a se pese ki te miusika tenā. E iku atu i ei ki se pese telā e logo tonu. Ne sau ifo ne tāgata e tokolua a pokisi ‵mafa mai i se motokā lasi. E ‵pei atu ne te tagata e tokotasi a te pokisi ki te suā tino telā e sapo ne ia te pokisi e aunoa mo se fakalavelave kae e faka‵tali ke ‵pei mai te suā pokisi ki a ia. E foliga mai me e se faigata a faifaiga e lua konā. Kae e seai se tino e taumafai o fai ne ia a vaegā mea penā seiloga ko oti ne fakaakoako faka‵lei a ia ki ei, ko maua ne ia se soa atamai e pelā foki mo vaegā fakatakitakiga mo fakatonutonuga kolā e mafai o fakatalitonugina? Kāti i se auala foki penā, e foliga mai me e maua fakafuasei te fiafia i te fakaipoipoga. Kae e fakalagolago te fakaipoipoga fiafia ki se soa ‵lei, te ga‵lue fakatasi, kae maise eiloa ko fakatakitakiga aogā. E tonu, e tāua ‵ki eiloa a fakatakitakiga ‵lei.
2 Se mea masani ke mafaufau se fafine io me se tagata taka ki te tino telā ka avaga a ia ki ei—se tino telā ka ‵nofo fakatasi laua i te olaga kātoa. Talu mai te taimi ne kamata ne Ieova te Atua te faiga o te fakaipoipoga, se mea masani ke a‵vaga a fafine mo tagata i te olaga nei. Kae ne seki filifili ne Atamu, te tagata muamua, tena avaga. Ne tuku atu ne Ieova tena avaga ki a ia ona ko Tena alofa. (Kenese 2:18-24) Ne fai ne ia te fuafuaga ke fanafanau te tauavaga muamua ko te mea ke ‵fonu fakamuli te lalolagi kātoa i tino. Mai tua ifo o te faiga o te fakaipoipoga muamua, ne filifili sāle ne mātua a avaga o olotou tama‵liki. Kae ko nisi taimi ne fanoi atu muamua ki a laua tokolua kolā ka avaga me fia‵fia laua ki ei me ikai. (Kenese 21:21; 24:2-4, 58; 38:6; Iosua 15:16, 17) E tiga eiloa e filifili sāle ne mātua a avaga o olotou tama‵liki i nisi fenua, e tusa loa mo nisi tuu mo aganuu, e filifili aka ne tino e tokouke olotou avaga.
3 E fili aka pefea ne se tino tena avaga? Nisi tino e ‵kilo atu fua ki foliga o tino—e fiafai ki nisi tino ona ko olotou foitino ‵gali. Nisi tino e ‵kilo atu fua ki mea aogā i te feitu faka-te-foitino kolā ka maua ne latou, ki tino kolā ka tausi faka‵lei ki a latou kae ka tuku atu ki a latou so se mea e ma‵nako latou ki ei. Kae e mata, ka maua aka i ei ne tino tokolua se fesokotakiga fiafia telā ka loto ma‵lie laua ki ei māfai e fakavae te la filifiliga ki mea konā? E fai mai te Faataoto 31:30 penei: “A te gali e faka‵se tino, pela foki te matagali e mafai fua o matafi, ka ko te fafine tela e fakaava ki te Aliki [ko Ieova] e tau o tavaegina.” Kae ko maua ne tatou i ei se manatu tāua ‵ki: Ke na mafaufau tatou ki mea kolā e manako Ieova ki ei māfai ko fili aka ne koe sau avaga.
Fakatakitakiga A‵lofa Mai te Atua
4 Ne tuku mai ne te ‵tou Tamana faka-te-lagi ko Ieova a tena Muna telā ko oti ne tusi ki lalo ke takitaki ei tatou i mea katoa. Ne fai mai a ia penei: “Au ko te Aliki te otou Atua, tela e manako o akoako koutou ke lei koutou kae fakatonutonu foki koutou i te auala e tau o olo koutou i ei.” (Isaia 48:17) E se tioa eiloa ko maua ne tatou a fakatakitakiga i te Tusi Tapu kolā ko oti ne fakamaoni aka olotou aogā i se taimi tai mata leva e uiga ki te filiga o avaga. E manako Ieova ke tumau ‵tou fakaipoipoga kae maua i ei te fiafia. Tenā te pogai ko oti ne tuku mai ne ia te fesoasoani ki a tatou ke malamalama kae fakaaogā foki a fakatakitakiga konā i ‵tou olaga. E fakamoe‵moe tatou ke maua ne tatou a vaegā fesoasoani penā mai te Atua telā ne faite ne ia tatou, i ne?—Salamo 19:8.
5 I te taimi ne kamata ei o fai ne Ieova te faiga o te fakaipoipoga ne manatu aka a ia me ka tumau te fesokotakiga tenā. (Maleko 10:6-12; 1 Kolinito 7:10, 11) Tenā te pogai ‘e se fiafia a ia ki te avaga mavae’ kae e talia fua ne ia te ‵talaga o avaga māfai ko “mulilua” se tino i ei. (Malaki 2:13-16; Mataio 19:9) Tela la, a te filiga o se avaga a se tino e aofia i toe filifiliga tāua kae e se ‵tau o manatu māmā tatou ki ei. E se uke a filifiliga e mafai o iku atu ki te fiafia io me ko te fanoanoa e pelā mo te filifiliga tenā. E mafai ne se filifiliga ‵lei o aumai te fiafia ki te olaga o se tino kae e fai ei a ia ke loto malie ki ei kae ko te filifiliga sē ‵lei e mafai o aumai ei te fanoanoa tumau. (Faataoto 21:19; 26:21) Ke tumau koe i te fiafia, se mea tāua ‵ki ke fai ne koe se filifiliga ‵lei kae ke fai foki ne koe se feagaiga i ei me ne kamata ne te Atua te faiga o te fakaipoipoga e pelā me se fakatokaga telā e ga‵lue tasi i ei a tino mo te loto tasi.—Mataio 19:6.
6 Se mea tāua foki ke fakaeteete malosi a tamataene mo tamāfine i a latou ma faka‵segina ne te gali o tino io me ko te lotou fia‵fai malosi ki ei kae ko se ‵lei ei te filifiliga o olotou avaga. Se mea tonu, me ko te vaegā fesokotakiga telā ne fakavae fua ki mea konā e mafai o oko fakamuli ki te takalialia o te suā tino ki te suā tino. (2 Samuelu 13:15) Kae ko te suā feitu, e mafai o fakamalosi aka ne te alofa telā e seai sena gatamaiga ke mafai o fakamasani aka tatou mo ‵tou avaga kae ke maina foki tatou i ‵tou uiga totino. E ‵tau foki o malamalama tatou me e pelā mo te masani, a te ‵toe mea ‵lei mō tatou e se ko te mea muamua telā e ma‵nako ‵tou loto ki ei. (Ielemia 17:9) Tenā eiloa te pogai e tāua ‵ki ei a fakatakitakiga mai te Atua kolā e maua i te Tusi Tapu. E fesoasoani mai ei ke iloa ne tatou o fai a filifiliga aogā i te olaga. Ne sui ne te fai salamo a Ieova i ana pati konei: “Ka akoako atu ne au ki a koe te auala e ‵tau o fano koe i ei; ka fakatonutonu kae akoako ne au a koe.” (Salamo 32:8; Epelu 4:12) E tiga eiloa e mafai ne te fakaipoipoga o fakama‵lie aka ‵tou manakoga ke alofagina tatou kae ke maua foki ‵tou soa, e isi foki ne mea faiga‵ta e fe‵paki mo tatou kae e manakomia i ei te fakaasiatuga o uiga ‵lei mo te atamai.
7 E ‵poto tatou mafai e faka‵logo tatou ki mea kolā e fakamatala mai ne te Atua telā ne kamata ne ia te faiga o te fakaipoipoga e uiga ki te filifiliga o se avaga. Kāti ka ita tatou ma talia a fakatonuga mai te Tusi Tapu kolā e fakamatala mai ne ‵tou mātua io me ko toeaina Kelisiano. Kāti e ma‵natu aka tatou me e se katoatoa te lotou malamalama e uiga ki ‵tou loto lagona kae ko manakoga o te loto kolā e malosi ‵ki, e mafai o fai ei tatou ke fai fua te mea telā e ma‵nako tatou ki ei. Kae fakamuli ka fanoa‵noa tatou me ne seki talia ne tatou a fakatonuga aogā kolā ne tuku mai ke fesoasoani mai ki a tatou māfai ko fe‵paki tatou mo faifaiga masani i aso takitasi o te olaga. (Faataoto 23:19; 28:26) Kāti ka iku atu tau filifiliga ki te avaga mo se tino telā e se alofa mai, ki te mauaga o tama‵liki kolā e se mafai o tausi faka‵lei ki ei io me ko te avaga ki se tino telā e se talitonu. E pefea te fakafanoanoa māfai ko iku atu te fakatokaga o te fakaipoipoga telā e ‵tau o maua mai i ei te fiafia lasi ki fakalavelave e uke!
Te Tapuakiga ki te Atua—Se Mea Tāua ‵Ki
8 E tonu te fiafai o te suā tino ki te suā tino e mafai o fesoasoani atu ki te faiga o se fakaipoipoga tumau. Kae e sili atu i te tāua ko talitonuga kolā e ‵pau, me ka fai i ei te fakaipoipoga ke tumau kae fakafiafia atu. E fakamalosi aka ne te tapuakiga a se tauavaga ki a Ieova te Atua se fesokotakiga tumau kae e fakamalosi foki i ei te lā loto ‵kau fakatasi i se auala telā e se mafai o fai ne se isi mea aka. (Failauga 4:12) Kafai e fakavae ne se tauavaga Kelisiano te lā olaga ki te tapuakiga tonu ki a Ieova, ka maua ne laua te loto tasi i te feitu faka-te-agaga, faka-te-mafaufau pelā foki mo lā amioga. E suke‵suke fakatasi laua ki te Muna a te Atua. E ‵talo fakatasi laua ko te mea ke maua ne laua te loto ‵kau fakatasi i ei. E olo tasi laua ki fakatasiga faka-Kelisiano kae ga‵lue fakatasi i te galuega talai. E fesoasoani mai a mea katoa konā ke fakamalosi aka se fesokotakiga faka-te-agaga telā e fai ei ke sili atu te lā fakatau a‵lofa. Kae e sili atu i tāua, e iku atu te faiga o mea konā ki fakamanuiaga mai i a Ieova.
9 Ne fia fakafiafia atu te toeaina Epelu fakamaoni ko Apelaamo ki te Atua i te taimi ne fili aka ne ia se avaga mō tena tama ko Isaako ke fetaui ‵lei mo tena tapuakiga. Ne fai atu a Apelaamo ki tena tavini fakamaoni penei: “Au e manako ke tauto koe i te igoa o te Aliki, te Atua o te lagi mo te lalolagi, ke mo a e sala ne koe se avaga ma taku tama tagata tenei mai fafine o te fenua tenei ko Kanana. E tau eiloa mo koe o foki ki te fenua ne fanau ei au, o sala se avaga ma taku tama ko Isaako mai oku kaiga. . . . Ka uga ne ia [ko Ieova] tena agelu i ou mua, ko te mea ke maua ne koe se fafine i kona mo fai te avaga a taku tama.” Ne fai a Lepeka mo fai se avaga tu ‵kese telā ne alofa malosi a Isaako ki ei.—Kenese 24:3, 4, 7, 14-21, 67.
10 Kafai e fai tatou e pelā me ne Kelisiano kolā koi nofo taka, ka aogā ki a tatou a te tapuaki atu ki te Atua me ka ati aka i ei a uiga kolā ka fai ei tatou ke fakafetaui aka ‵tou olaga mo fakatakitakiga faka-te-Tusi Tapu. E aofia i tiute o tauavaga ko mea kolā ne taku mai ne te apositolo ko Paulo: “A koutou e fafine, ke faka‵logo koutou ki otou avaga, e pela eiloa mo te otou faka‵logo ki te Aliki. . . . A koutou e tagata, ke a‵lofa koutou ki otou avaga, e pela eiloa mo Keliso ne alofa ki te ekalesia, kae tuku atu foki tona ola mō te ekalesia . . . A tagata e ‵tau o a‵lofa ki olotou avaga e pela eiloa mo te lotou atafai ki olotou foitino tonu. . . . E ‵tau mo tagata katoa o a‵lofa ki olotou avaga, e pela eiloa mo te lotou a‵lofa ki a latou eiloa, kae e ‵tau foki i fafine o ava ki olotou avaga.” (Efeso 5:22-33) E pelā mo te mea ko iloa ne tatou i te fakamatalaga tenā, ne fakamafa mai ne pati a Paulo mai te Atua, te tāua ke fakaasi atu te alofa mo te āva. Kafai e fia ola tatou e ‵tusa loa mo te fakatonuga tenā e ‵tau mo tatou o ma‵taku kae fakaaloalo ki a Ieova. E manakomia i ei te fakamaoni mo te loto kātoa faitalia me e maua ne tatou a fakamanuiaga io me e fe‵paki mo taimi faiga‵ta. E ‵tau mo Kelisiano kolā e mafau‵fau ke fakaipoipo latou o fakataunu ne latou a te tiute tauave tenā.
Ke Filifili Aka te Taimi e ‵Lei ei ke Avaga
11 E tāua ‵ki ke iloa ne tatou te taimi ‵lei ke a‵vaga ei tatou. E se fakasino atu te Tusi Tapu ki te matua o te tino kae fatoā avaga a ia me e kese‵kese a tino katoa. Kae e fakaasi mai ne nisi tusi siki me e ‵lei atu mafai e faka‵tali tatou ki te taimi telā ko “se ma‵losi ‵ki eiloa ‵tou manakoga fakatauavaga,” me kafai e se penā e mafai ei o fai se filifiliga se ‵lei ona ko te ma‵losi o manakoga fakatauavaga. (1 Kolinito 7:36, NW) Ne fai mai Miseli penei: “I te taimi ne lavea ei ne au oku taugasoa kolā koi talavou ko fai olotou famau kae a‵vaga foki latou, se mea faigata ki a au i nisi taimi ke ola e ‵tusa mo te fakatonuga tenā. Kae ne iloa aka ne au me ne aumai ne Ieova te fakatonuga tenā, kae e fakatonu mai fua ne ia a mea kolā e aogā ki a tatou. I te taimi ne fakatali ei au a koi tuai o fai saku avaga, ne mafai ne au o saga tonu atu ki toku fesokotakiga mo Ieova kae maua te atamai i te olaga nei telā e se mafai ne se talavou o maua. I tausaga mai tua ifo i ei, ne sili atu toku atamai ke mafai ne au o fakataunu oku tiute kae ke faka‵lei aka foki a fakalavelave kolā ne ‵sae mai i te fakaipoipoga.”
12 E maua aka fakamuli ne tino kolā e a‵vaga fo‵liki me e ‵fuli fakamuli olotou manakoga māfai ko matua latou. E fatoā iloa aka ne latou fakamuli me e se tāua malosi a mea kolā ne ma‵nako malosi latou ki ei muamua. E tokotasi te talavou Kelisiano ne fatuaki ne ia tena loto ke fai ne ia tena fakaipoipoga māfai ko 16 ona tausaga. Ne fai te fakaipoipoga o tena tupuna e pelā foki loa mo tena mātua i te taimi ko taki 16 i ei lā tausaga. I te taimi eiloa tenā ne seki fia avaga tena famau ki a ia, kae ne fili aka ne ia se isi tino telā ne fiafai ki a ia ke avaga ki ei. Kae fakamuli loa, ne salamo valevale tou fafine i ei.
13 Kafai ko mafaufau se tino ke fai sena avaga, se mea tāua ke malamalama i mea katoa kolā e aofia i ei. Kafai e avaga se tokolua a koi fo‵liki laua e mafai o aumai ei a fakalavelave kolā e se iloa ne laua o faka‵lei aka. Kāti e se lava te lā poto mo te lā atamai ke fakafesagai atu ki fakalavelave i te fakaipoipoga mo te tausiga o tama‵liki. Se ‵tau o a‵vaga tatou seiloga ko toka tatou i te feitu faka-te-foitino, faka-te-mafaufau mo te feitu faka-te-agaga ko te mea ke tumau i te fesokotakiga tenā.
14 Ne tusi mai penei a Paulo e uiga ki tino kolā e avaga me “ka maua ne latou a fakalavelave faka te lalolagi.” (1 Kolinito 7:28) Ka ‵sae mai i ei a fakalavelave me e kese‵kese a uiga totino o se tauavaga kae e ‵kese foki lā manatu. Kāti e faigata ki a tatou ke fakataunu ‵tou tiute i te fakaipoipoga kolā e fakamatala mai i te Tusi Tapu ona ko te mea e se ‵lei katoatoa tatou. (1 Kolinito 11:3; Kolose 3:18, 19; Tito 2:4, 5; 1 Petelu 3:1, 2, 7) E manakomia te atamai mo te malosi faka-te-agaga ke ‵sala aka kae tau‵tali atu foki tatou ki fakatakitakiga mai te Atua ko te mea ke faka‵lei aka a fakalavelave i te alofa.
15 E mafai ne mātua o fakaakoako olotou tama‵liki ke toka latou mō te fakaipoipoga i te fesoasoani atu ki a latou ke malamalama i te tāua o te tautali atu ki fakatakitakiga mai te Atua. E mafai ne mātua o fesoasoani atu ki olotou tama‵liki ke fuafua aka me ko toka latou io me ko toka te tino telā e fia avaga latou ki ei ke fai se feagaiga o te fakaipoipoga i te fakaaogāga faka‵lei o te Tusi Tapu mo nisi tusi mō Kelisiano.a Ne fiafai malosi Fualosa telā ko 18 ana tausaga ki se tamataene i tena fakapotopotoga. Ne fai te tamataene tenā mo fai se paenia tumau kae ne fia avaga laua. Kae ne fakamolemole atu ana mātua ki a ia ke fakatali mō se tausaga e tasi me ne ma‵natu aka laua me ko tō foliki a ia ke fai tena avaga. Ne tusi mai fakamuli a Fualosa penei: “E lasi toku fakafetai me ne fakalogo au ki te fakatakitakiga tenā. Seki oti te tausaga tenā kae ne sili atu toku atamai kae ne kamata o lavea ne au i ei me ne seki maua ne te tamatane tenā a uiga kolā ka fai ei a ia mo fai se avaga ‵lei. Fakamuli loa, ne tiaki ne ia te fakapotopotoga, kae ne fakaseke keatea au mai i te mea telā ne mafai o fai pelā me se fakalavelave lasi i toku olaga. E pefea te gali ke maua aka a mātua kolā e mafai o fakatalitonugina olotou fakatakitakiga!”
‘Ke Avaga Fua i te Aliki’
16 E manino eiloa te fakatonuga a Ieova mō Kelisiano penei: ‘Ke avaga fua i te Aliki.’ (1 Kolinito 7:39, NW) Kāti e fai a te fakatonuga tenā e pelā me se tofotofoga ki mātua Kelisiano mo olotou tama‵liki. E pefea la? Kati e fia a‵vaga a nisi talavou, kae e seai ne tino e avanoa ke a‵vaga latou ki ei i te lotou fakapotopotoga. Io me kāti e foliga mai penā. E se taumate, e se tokouke a tāgata ke avaga a fāfine ki ei i nisi kogā koga, io me e seai se tino ‵lei i te kilokiloga o mātua i te fenua eiloa tenā. Kāti e isi se tamataene i te fakapotopotoga telā ne seki tukugina atu kae e fia fai ki se tamāfine Kelisiano (io me se tamāfine seki tukugina atu e fia fai ki se tamataene), kae ona ko te tulaga tenā e fakamalosigina ei latou ke se toe ‵saga atu ki fakatakitakiga a Ieova. Kafai e tupu se mea penā, se mea ‵lei ke mafaufau ki te fakaakoakoga a Apelaamo. E tasi te auala ne fakatumau ne ia tena fesokotakiga ‵lei mo te Atua ko te fakamautinoa aka ke avaga tena tama ko Isaako mo se tino telā e tapuaki ‵tonu atu ki a Ieova. Ne fai foki ne Isaako te mea tenā ki tena tama ko Iakopo. E tiga eiloa e faigata te faifaiga tenā, ne fakafiafia atu i ei ki te Atua kae ne maua foki i ei a fakamanuiaga mai i a ia.—Kenese 28:1-4.
17 I nisi taimi e fai fakamuli a te tino se talitonu mo fai se Kelisiano. Kae i te ukega o taimi e uke a fakalavelave e iku mai māfai e avaga se tino ki se tino sē talitonu. E se ‵pau a talitonuga, fakatakitakiga io me ko fakamoemoega o tino kolā e avaga kae e ‵kese lā lotu. (2 Kolinito 6:14) E mafai o fakamasei i ei te lā fesokotakiga mo te lā fia‵fia i te fakaipoipoga. E pelā mo te fafine Kelisiano e tasi telā ne fanoanoa malosi, ne seki mafai ne ia o toe foki ki tena fale kae ke sau‵tala fakatasi mo tena avaga ki mea faka-te-agaga māfai ko oti te fakatasiga fakamalosi loto. Kae e sili atu i mea katoa, te uiga tonu o te ‘avaga i te Aliki’ ko te fakamaoni eiloa tenā ki a Ieova. Kafai e tau‵tali atu tatou ki te Muna a te Atua e se logosala tatou, me e fai ne tatou “a te mea e fiafia a ia ki ei.”—1 Ioane 3:21, 22.
18 Kafai e mafaufau se tino ke fai tena avaga, e ‵tau mo ia o saga malosi atu ki uiga totino mo te malosi o te tino telā e fia avaga a ia ki ei i te feitu faka-te-agaga. E sili atu te tāua o uiga Kelisiano fakatasi mo te alofa ki te Atua mo te tapuaki atu foki ki a Ia mo te loto katoa i lō te taulekaleka. E fiafia te Atua ki tino kolā e maina i olotou tiute kae fakataunu foki ne latou olotou tiute ke fai latou mo fai ne avaga kolā e ma‵losi i te feitu faka-te-agaga. E mafai o maua ne se tauavaga se malosi tu ‵kese māfai e tapuaki atu laua tokolua ki te Atua telā ne faite ne ia tatou kae talia katoatoa ne laua ana fakatakitakiga. I te auala eiloa tenā e fakaaloalo atu i ei ki a Ieova, kae e isi se fakavae malosi i te feitu faka-te-agaga i te kamataga o te fakaipoipoga telā ka fesoasoani atu ke fakatumau ei te fesokotakiga tenā.
[Fakamatalaga mai lalo]
a Onoono ki te Watchtower i a Fepuali 15, 1999, te itulau 4-8.
E Tali Mai Pefea ne Koe?
• Kaia e ‵tau ei o maua a fakatakitakiga mai te Atua ke fili aka se avaga ‵lei?
• Ka fesoasoani atu pefea te tapuaki atu ki te Atua ke fakamalosi aka ei te fesokotakiga i te fakaipoipoga?
• E mafai pefea ne mātua o fakaakoako olotou tama‵liki ke toka latou mo te fakaipoipoga?
• Kaia e tāua ei ke ‘avaga fua i te Aliki’?
[Fesili mo te Sukesukega]
1. Ne a mea e fakavae ki ei te fakaipoipoga fiafia?
2. (a) Ko oi ne kamata ne ia te faiga o te fakaipoipoga, kae se a te pogai? (e) Ne fili aka pefea ne nisi tino olotou avaga?
3. E ‵tau o fili aka pefea ne se tino tena avaga?
4. Se a te fesoasoani e tuku mai ne te Atua ke mafai ne se tino o fili aka tena avaga?
5. Se a te mea tāua e ‵tau o fai ko te mea ke tumau te fiafia i te fakaipoipoga?
6. Kaia e tāua ei ke fakaeteete malosi a tamataene mo tamāfine māfai ko fili aka olotou avaga, kae e mafai pefea ne latou o fai te ‵toe filifiliga ‵lei?
7. Kaia e se talia ei ne nisi tino a fakatonuga kolā e fakavae ki te Tusi Tapu e uiga ki te filifiliga o olotou avaga, kae se a te mea e mafai o iku atu ki ei?
8. E fesoasoani mai pefea te tapuaki atu ki te Atua ke fakatumau te fakaipoipoga kae aumai ei te fiafia?
9. Se a te mea ne fai ne Apelaamo ke maua ne ia se avaga mō Isaako, kae se a te ikuga?
10. Ne a tiute tauave e fakaasi mai ne te Tusi Tapu kae e ‵tau o fakataunu ne se tauavaga?
11. (a) Se a te fakatonuga i te Tusi Tapu e uiga ki te taimi e ‵lei ei ke avaga se tino? (e) Se a te tala e tasi telā e fakaasi mai i ei te aogā o te fakalogo ki te fakatonuga a te Tusi Tapu i te 1 Kolinito 7:36?
12. Kaia e ‵lei ei ke se avaga fakavave se tino a koi foliki a ia?
13. Se a te mea e galo sāle i tino kolā e avaga fo‵liki?
14. Ne a mea e manakomia ke faka‵lei aka a fakalavelave i te fakaipoipoga?
15. E mafai pefea ne mātua o fakaakoako olotou tama‵liki ke toka latou mō te fakaipoipoga? Ke fai sau tala e uiga ki ei.
16. (a) E mafai pefea o fai te fakatonuga ke ‘avaga fua i te Aliki’ mo fai se tofotofoga ki Kelisiano? (e) Kafai e fia avaga se tino ki te tino telā e se talitonu, se a te mea e ‵tau o mafau‵fau a Kelisiano ki ei?
17. Kaia e mafai ei o iku atu ki fakalavelave e uke māfai e avaga se tino ki se tino sē talitonu, kae se a te pogai e tafasili i te tāua ke ‘avaga fua i te Aliki’?
18. Kafai e mafaufau se tino ke fai tena avaga, ne a mea e ‵tau o saga malosi atu a ia ki ei, kae kaia?
[Ata i te itulau e 13]
Ka fiafia malosi koe māfai e fakalogo koe ki fakatakitakiga a te Atua e uiga ki te filiga o sau avaga
[Ata i te itulau e 14]
E maua a fakamanuiaga e uke māfai e ‘avaga fua i te Aliki’