‘Ke Taofi ‵Mau Koutou ki te Kufaki’

“E ‵tau mo koutou o taofi mau ki te alofa, . . . mo te loto kufaki.”​—KOLOSE 3:⁠12.

A RÉGIS, telā e nofo i te feitu ki saute-togālā o Falani, ne fai mo fai se Molimau papatiso a Ieova i te 1952. Ne taumafai tena avaga i te fia o tausaga ke ‵taofi aka ana taumafaiga ke tavini atu ki a Ieova. Ne taumafai tou fafine o faka‵pū a teka o tena motokā ko te mea ke taofi aka ei a ia mai te kau atu ki fakatasiga, kae i te taimi e tasi, ne tautali atu eiloa tou fafine i te taimi ne fanatu ei tou tagata o talai atu te fekau o te Tusi Tapu mai fale ki fale, kae ne fakatauemu atu ki a ia i te taimi ne faipati ei a ia ki te tino i te fale e uiga ki te tala ‵lei o te Malo. Faitalia eiloa a te tumau i te ‵tekemaiga tenei, ne tumau eiloa a Régis i te kufaki. Tela la, a Régis se fakaakoakoga ‵lei mō Kelisiano katoa, ona ko te mea e manako a Ieova ke kufaki ana tino tapuaki katoa i faifaiga a nisi tino.

² A te pati Eleni mō te “kufaki” e fakauiga tonu eiloa ki te “fa‵ki mō se taimi leva.” E ‵fuli faka-sefulu taimi ne te New World Translation i te ‵gana Peletania a te pati tenei ki te “kufaki,” e fakatolu taimi ki te “onosai,” kae fakatasi ki te “fakaasiatuga o te onosai.” E aofia foki i te pati Epelu mo te pati Eleni telā ne ‵fuli ki te “kufaki” a te onosai, fa‵ki, mo te tuai o ita.

³ Ne seki ‵kilo atu a te kau Eleni i te senitenali muamua ki te kufaki e pelā me se mea ‵lei. Ne seki fakaaogā aka eiloa a te pati tenā ne tino ‵poto o te kau Setoiko. E ‵tusa mo pati a te tagata poto i te Tusi Tapu ko William Barclay, a te kufaki “e ‵kese ‵ki mo uiga ‵lei i te kilokiloga a te kau Eleni,” telā ne fakamatamata ki nisi manatu e pelā mo te “ita fitifiti ma onosai i so se mea ‵se.” E fai mai a ia, penei: “A te ‵toe tagata mafi ki te kau Eleni ko te tagata telā e fai so se mea ke fakaoko atu te taui ma sui. Ki te kau Kelisiano, a te tagata mafi ko te tagata telā e ita fitifiti ma fai penā, faitalia me e faigofie ki a ia ke taui ma sui.” Kāti e mafau‵fau a te kau Eleni me i te kufaki se uiga vāivāi, kae i konei, e pelā mo te ukega o nisi mea, a “te auala o te fakaolataga tela ne fai ne te Atua, se faiga valea ki manatu o tino sē tali‵tonu. A te alofa fakaola foki o te Atua, se faiga vaivai ki manatu o tino se talitonu, ka ko tena malosi tena ki tino talitonu.”​​—⁠1 Kolinito 1:​25.

Te Fakaakoakoga a Iesu e Uiga ki te Kufaki

⁴ E tafa atu ki a Ieova, ne tuku mai ne Keliso Iesu se fakaakoakoga ‵lei o te kufaki. Kafai e oko atu a tulaga faiga‵ta, ne fakaasi atu ne Iesu i se auala fakaofoofogia a te kufaki. Ne ‵valo mai penei e uiga ki a ia: “Ne fai fakamaseigina a ia, kae ne kufaki eiloa ne ia mo te loto malalo; e seai eiloa sena muna ne fai. E seai eiloa sena pati ne fai, e pela me se mamoe tela ka ave o ta, pela me se mamoe tela ka ave o vele ona fulufulu.”​​—⁠Isaia 53:⁠7.

⁵ Ko tafaga la te fakaofoofogia o te kufaki ne fakaasi mai ne Iesu e auala i tena taviniga i te lalolagi! Ne kufaki a ia i fesili faka‵se tino o ana fili mo pati fakatauemu a tino kolā e ‵teke atu ki a ia. (Mataio 22:​15-46; 1 Petelu 2:23) Ne onosai a ia i ana soko, ke oko eiloa ki taimi kolā ne tumau ei te lotou kinau sāle me ko oi te tino e sili. (Maleko 9:​33-37; 10:​35-45; Luka 22:​24-27) Kae ne gali foki te kufaki ne fakaasi mai ne Iesu i te po ne fakalata ei a ia i te taimi ne ‵to ei a ‵moe o Petelu mo Ioane mai tua o te faiatuga o ana pati ki a laua ke ‘se ‵moe’!​​—⁠Mataio 26:​36-​41.

⁶ Mai tua o tena mate mo te toetuga, ne tumau eiloa a Iesu i te kufaki. Ne iloa eiloa ne te apositolo ko Paulo a te mea tenei me ne fakasauā muamua atu a ia ki te kau Kelisiano. Ne tusi mai a Paulo, penei: “Ko te muna tonu eiloa tenei, ke talia mo te loto katoatoa kae ke talitonu foki ki ei: a Keliso Iesu ne vau ki te lalolagi o fakaola a tino agasala, ka ko au te tino tafa sili i te masei i a latou, kae tenei eiloa te pogai tonu ne ‵nau mai ei te alofa o te Atua ki a au, ko te mea ke fakaasi mai ne Keliso Iesu tona kufaki katoatoa i ana faiga ki a au, ko te tino agasala e tafa sili i te masei, ke fai mo fakaakoakoga ki a latou kola ka talitonu fakamuli ki a ia, kae maua ne latou te ola se gata mai.” (1 Timoteo 1:​15, 16) Faitalia ‵tou olaga mua, kafai e fakatuanaki tatou ki a Iesu, ka fakaasi mai ne ia a te kufaki ki a tatou​​—⁠e tonu, kae e fakamoemoe foki a ia ke fai ne tatou a “faiga kola e fakaasi mai me ko oti ne salamo” tatou. (Galuega 26:20; Loma 2:⁠4) E fakaasi mai ne fekau kolā ne fai atu ne Iesu ki fakapotopotoga e fitu i Asia Foliki me e tiga eiloa e kufaki a ia, e fakamoemoe foki a ia ke gasolo atu tatou ki mua.​​—⁠Fakaasiga, mataupu e 2 mo te 3.

Se Fuataga o te Agaga

⁷ I te mataupu e 5 o tena tusi ki te kau Kalatia, ne fakaaasi mai ne Paulo te ‵kese o galuega o te foitino mo fuataga o te agaga. (Kalatia 5:​19-23) Ona ko te kufaki se uiga e tasi o Ieova, e māfua mai i a ia te uiga tenei kae se fuataga foki o tena agaga. (Esoto 34:​6, 7) A te ‵tonuga loa, a te kufaki e tulaga fa i te fakasologa o fuataga o te agaga i te fakamatalaga ne Paulo, fakatasi mo te “alofa, te fiafia, te filemu, . . . te mataalofa, te ‵lei, te fakamaoni, te loto malalo, mo te loto pulea.” (Kalatia 5:​22, 23) Tela la, kafai e fakaasi atu ne tavini a te Atua a te onosai fakaatua, io me ko te kufaki, e fai latou penā ona ko te takitakiga o te malosi o te agaga tapu.

⁸ Kae e se fakauiga a te mea tenei, me e faimālō ne Ieova se tino ke talia tena agaga. E ‵tau o talia ne tatou mo te loto fiafia tena takitakiga. (2 Kolinito 3:17; Efeso 4:30) E talia ne tatou ke galue te agaga i ‵tou olaga mai i te atiakaga o ana fuataga i mea katoa e fai ne tatou. Mai tua o te fakasolomaiga ne ia o galuega o te foitino mo fuataga o te agaga, ne fakaopoopo mai a Paulo, penei: “Ke se fakaloiloigina koutou: e seai se tino e mafai ne ia o fakavalea a te Atua. E tau ne te tino a te fuaga ne toki ne ia. Ko te tino e toki ne ia a mea kola e fiafia ki ei a te foitino, ko te fua e maua ne ia mai i ei, ko te mate; ka ko te tino tela e toki i luga i te Agaga, e maua ne ia mai te Agaga a te ola se gata mai.” (Kalatia 5:25; 6:​7, 8) Kafai e fia manuia tatou i te atiakaga o te kufaki, e ‵tau foki o fakamalosi aka ne tatou a nisi fuataga o te agaga tapu kolā e maua i Kelisiano.

“A te Alofa, e Kufaki”

⁹ Ne fakaasi mai ne Paulo me e isi se fesokotakiga fakapito i te va o te alofa mo te kufaki, i te taimi ne fai mai ei a ia, penei: “A te alofa, e kufaki.” (1 Kolinito 13:⁠4) E fai mai se tagata poto i te Tusi Tapu, ko Albert Barnes, me ne faka‵mafa mai ne Paulo a te mea tenei ona ko fakatau‵faiga mo taua kolā ne maua atu i te fakapotopotoga Kelisiano i Kolinito. (1 Kolinito 1:​11, 12) Ne fai mai a Barnes, penei: “E ‵teke atu a te pati e fakaaogā i konei [mō te kufaki] ki te fakavavave: e ‵kese mai te fakaasi fakavave atu o te kaitaua mo manatu ita, mo te mataitaita vave. E fakamatala mai i ei a te tulaga o te mafaufau telā e mafai o FA‵KI I SE TAIMI LEVA māfai ko fakapuapuagatia, io me e fakaitaitagina.” Koi lasi ‵ki eiloa te fesoasoani o te alofa mo te kufaki ki te mauaga o te filemu i te fakapotopotoga Kelisiano.

¹⁰ “A te alofa, e kufaki kae kaimalie . . . A te alofa e se ‵sala ana mea i a ia eiloa; e se kaitaua vave io me e fakamasausau ne ia a mea ‵se a se tino.” Tela la, e fesoasoani mai a te alofa i auala e uke ke kufaki tatou.a (1 Kolinito 13:​4, 5) E fai ne te alofa ke mafai ne tatou o fakatau onosai kae masaua me e se ‵lei katoatoa a tatou katoa kae e isi ne ‵tou mea ‵se e fai sāle mo vāivāiga foki. E fesoasoani mai ki a tatou ke mafau‵fau faka‵lei kae loto fakamagalo. E fakamalosi mai te apositolo ko Paulo ki a tatou ke “ola i te olaga ne kalagagina ei koutou, i te loto malalo mo te filemu, mo te loto kufaki i taimi katoa. Ke fakatau fesoasoani koutou i te alofa. Ke fia‵fia koutou o fai te loto tasi tela ne tuku atu ne te Agaga, i te filemu tela e fusi tasi ne ia koutou.”​​—⁠Efeso 4:​1-3.

¹¹ A te kufaki o olotou tino e fesoasoani atu ki te filemu mo te fiafia o potukau Kelisiano, faitalia me ko fakapotopotoga, fale Peteli, fale misionale, potukau fakatūtū fale, io me ko akoga. Ona ko te kese‵kese o uiga, mea kolā e fia‵fia ki ei, akoakoga, tu mo aganū io me ko te ‵tu mā, e mafai eiloa o ‵sae aka a tulaga faiga‵ta i nisi taimi. E tonu foki eiloa te mea tenei e uiga ki kāiga. A te tuai o ita e tāua ‵ki. (Faataoto 14:29; 15:18; 19:11) A te kufaki​​—⁠te onosai fakatasi mo te fakamoemoega ke momea aka te ‵lei​​—⁠e manakogina ke maua ne tino katoa.​​—⁠Loma 15:​1-6.

E Fesoasoani Mai te Kufaki ke Tu ‵Mautakitaki Tatou

¹² E fesoasoani mai te kufaki ke tu ‵mautakitaki tatou i tulaga faiga‵ta kolā e foliga mai me ko se toe gata atu io me e seai se faka‵leiga fakavave ki ei. Ne penā eiloa a mea ne ‵tupu ki a Régis, telā ne taku atu i te kamataga. Ne ‵teke atu tena avaga i te fia o tausaga ki ana taumafaiga ke tavini atu ki a Ieova. Kae i te aso e tasi, ne tagi tou fafine kae ne fai atu, penei: “E iloa ne au me i te mea tenei ko te munatonu. Fesoasoani mai ki a au. Au ko manako o fai se akoga faka-te-Tusi Tapu.” Ne papatiso fakamuli tou fafine mo fai se Molimau. E fai mai a Régis, penei: “Ne fakamaoni mai ne te mea tenei me ne fakamanuia ne Ieova aku taumafaiga, toku onosai mo toku kufaki i te fia o tausaga.” Ne taui atu ki tena kufaki.

¹³ I te senitenali muamua T.A., ne fai a te apositolo ko Paulo mo fai se fakaakoakoga ‵lei o te kufaki. (2 Kolinito 6:​3-10; 1 Timoteo 1:16) Ke oko ki te fakaotiga o tena olaga i te taimi ne tuku atu ei ne ia a pati fakatonutonu ki tena taugasoa foliki ko Timoteo, ne fakailoa atu ne Paulo ki a ia me ka fe‵paki a Kelisiano katoa mo mea faiga‵ta. Ne taku atu eiloa ne Paulo tena fakaakoakoga kae fakaasi atu a uiga Kelisiano fakavae kolā e manakogina mō te kufaki. Ne tusi mai a ia, penei: “Ko oti ne tautali koe ki aku akoakoga, ki aku amioga, pela foki mo toku fakamoemoe i te olaga; ko oti foki ne tautali koe i toku fakatuanaki, i toku loto kufaki, i toku alofa, mo toku lotomau, oku fakasauaga, mo oku puapuaga. E iloa katoa ne koe a mea ne ‵tupu ki a au i Anitioka, Ikonia, mo Lusa, i fakasauaga fakama‵taku ne kufaki ne au! Kae ne fakasao au ne te Aliki mai mea katoa kona. Ko latou katoa kola e ma‵nako o ola i te olaga atua i te ‵soko tasi mo Keliso Iesu, ka fakasauagina.” (2 Timoteo 3:​10-12; Galuega 13:​49-51; 14:​19-22) Ko te mea ke tu ‵mautakitaki tatou, e ‵tau mo tatou katoa o fakaasi atu te fakatuanaki, te alofa, mo te kufaki.

Ke Taofi ‵Mau ki te Kufaki

¹⁴ Ne faka‵pau ne te apositolo ko Paulo a te kufaki mo nisi uiga fakaatua ki gatu kolā ne ‵tau o pei ki ei se Kelisiano mai tua o te ave keateaga o faifaiga kolā e iloga ei a ‘uiga mua.’ (Kolose 3:​5-10) Ne tusi mai a ia, penei: “A koutou ne kelisiano kola ne alofagina kae filifilia ne te Atua mō ia, tela la e ‵tau mo koutou o taofi mau ki te alofa, te kaimalie, te loto malalo, te agamalu, mo te loto kufaki. Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te sua tino ki te tino. E pela mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo. Kae sili i mea katoa konei, taofi mau koutou ki te alofa, tela e fusi fakatasi ei ne ia a mea katoa ke ‵lei.”​​—⁠Kolose 3:​12-14.

¹⁵ Kafai ko ‘taofi ‵mau’ a tino i te fakapotopotoga ki te alofa atafai, mataalofa, mafaufau ‵lei, loto maulalo, kufaki mo te alofa, e mafai ei ne latou o faka‵lei aka a fakalavelave kae olo fakatasi atu ki mua i te taviniga a Ieova. Kae maise eiloa ko ovasia Kelisiano, e ‵tau mo latou o kufaki. Kāti e isi ne taimi e ‵tau ei o polopoloki ne latou a te suā Kelisiano, kae e kese‵kese a auala e mafai ei o fai ne latou te mea tenei. Ne fakamatala mai ne Paulo te ‵toe kilokiloga ‵lei, i te taimi ne tusi atu ei a ia ki a Timoteo: ‘Fakatonu atu, akoako atu, fakamalosi atu, akoako atu foki fakatasi mo te kufaki katoatoa.’ (2 Timoteo 4:⁠2) E tonu, e ‵tau faeloa o ‵saga atu ki mamoe a Ieova mo te kufaki, te fakaaloalo, mo te atafai atu.​​—⁠Mataio 7:​12; 11:28; Galuega 20:​28, 29; Loma 12:⁠10.

“Ke Kufaki ki Tino Katoa”

¹⁶ E tuku mai ne te kufaki o Ieova se tiute ‵lei ki a tatou ke “loto kufaki foki ki tino katoa.” (1 Tesalonia 5:14) E fakauiga a te mea tenei ki te fakaasiatuga o te loto kufaki ki tino o kāiga kolā e se ne Molimau, tuakoi, tino e ga‵lue kae a‵koga tasi foki mo tatou. E uke ‵ki a faifaiga fakailoga tino ko oti ne manumalo i ei a Molimau, kolā ne fa‵ki latou i tausaga e uke i fakatauemuga io me ko ‵tekemaiga mai i tino kolā e fesokotaki atu latou ki ei i koga ga‵lue io me i akoga. (Kolose 4:​5, 6) Ne tusi mai a te apositolo ko Petelu, penei: “E ‵tau o ‵lei otou amio i mua o tino pouliuli, i te mea manafai e fakamasei ne latou a koutou e pela me ne tino ma‵sei; kae kafai e ‵kilo ki otou amioga ‵lei, ko ‵viki ei latou ki te Atua i te Aso e vau ei a ia.”​​—⁠1 Petelu 2:⁠12.

¹⁷ Ka iku atu te kufaki o Ieova ki te fakaolataga mō te fia miliona o tino. (2 Petelu 3:​9, 15) Kafai e fakaakoako atu tatou ki te alofa mo te kufaki o Ieova, ka tumau eiloa tatou i te talaiatuga o te tala ‵lei o te Malo o te Atua kae akoako atu a nisi tino ke faka‵logo ki te pulega a te Malo o Keliso. (Mataio 28:​18-20; Maleko 13:10) Kafai ko fakagata ne tatou a te galuega talai, e fai pelā me e ma‵nako tatou ke fakagata aka te kufaki o Ieova kae e foliga mai foki me e se maina tatou i te pogai e kufaki ei a ia, ko te mea ke sala‵mō ei a tino.​​—⁠Loma 2:⁠4.

¹⁸ I tena tusi ki Kelisiano i Kolose, i Asia Foliki, ne tusi mai a Paulo, penei: “Mai i te taimi ne lagona ei ne maua a tala e uiga ki a koutou, ne seki gata eiloa te ma ‵talo mō koutou, e fakatagi atu ei maua ke faka‵fonu koutou i te iloa o te loto o te Atua, i poto katoa mo te iloa faka te Agaga, ke takitaki ei se olaga e aoga mō te Aliki, e fonu i mea e fakafiafia ki a ia, kae fua mai foki i galuega ‵lei katoa, kae ke ‵tupu ake foki koutou i te iloa ‵lei o te Atua. Ke fakamalosia koutou i te malosi katoa e pela eiloa mo te malosi sili, ko te mea ke mafai ne koutou o kufaki a mea katoa mo te kolomaki i te fiafia.”​​—⁠Kolose 1:​9-​11.

¹⁹ A te tumau o te kufaki io me ko te onosai o Ieova, ka se fai pelā me se mea faigata ki a tatou māfai tatou e ‘‵fonu i te iloaga tonu o tena loto,’ telā e “manako a ia ke ola tino katoa, ka ke iloa foki ne latou te munatonu.” (1 Timoteo 2:⁠4) Ka tumau eiloa tatou ‘i te ‵fuamaiga o galuega ‵lei katoa,’ maise eiloa te talaiatuga o “te Tala ‵Lei tenei e uiga ki te Malo.” (Mataio 24:14) Kafai e tumau tatou mo te fakamaoni i te faiga o te mea tenei, ka fai ne Ieova tatou ke ‘ma‵losi atu fakatasi mo malosi katoa,’ mai te faiga ke mafai ne tatou o ‘kufaki i mea katoa mo te kolomaki i te fiafia.’ I te faiga penā, ka ‘takitaki atu ei tatou ki se olaga e aoga mō te aliki,” kae ka maua ne tatou te filemu telā e māfua mai i te iloaga me ‘e fakafiafia katoatoa atu tatou ki a ia.’

²⁰ Ke na tali‵tonu katoatoa tatou ki te ‵tonu o te kufaki o Ieova. E fetaui ‵lei mō te ‵tou fakaolataga mo te fakaolataga foki o tino kolā e faka‵logo ki ‵tou talaiga mo akoakoga. (1 Timoteo 4:16) A te atiakaga o fuataga o te agaga​​—⁠ka mafai ei ne ‵tou a‵lofa, mataalofa, ‵lei, loto maulalo, mo te loto pulea​​—⁠o fai tatou ke kufaki mo te fia‵fia. Ka mafai o ola tatou i te filemu fakatasi mo tino o ‵tou kāiga e pelā foki mo ‵tou taina mo tuagane i loto i te fakapotopotoga. Ka fesoasoani mai foki a te kufaki ki a tatou ke onosai i amioga o tino kolā e ga‵lue kae a‵koga fakatasi tatou. Kae ka aogā ‵tou kufaki, me e faka‵sao i ei a tino fai mea ‵se kae tavae atu ei ki te Atua telā ko leva loa ne kufaki, ko Ieova.

[Fakamatalaga mai lalo]

E Mafai ne Koe o Fakamatala Mai?

• Ne a auala e fai ei a Keliso mo fai se fakaakoakoga fakaofoofogia o te loto kufaki?

• Ne a mea ka fesoasoani mai ke ati aka ne tatou a te kufaki?

• Ne fesoasoani atu pefea a te kufaki ki kāiga, potukau Kelisiano, mo toeaina?

• Ka aumai pefea ne ‵tou kufaki a mea aogā ki a tatou eiloa mo nisi tino?

[Fesili mo te Sukesukega]

1. Fakamatala mai aka se fakaakoakoga ‵lei e tasi o te kufaki.

2. Se a te uiga tonu o te pati Eleni mō te “kufaki” māfai e ‵fuli a te pati ki te pati, kae se a te mea e fakauiga te pati tenā ki ei?

3. E ‵kese pefea te kilokiloga Kelisiano e uiga ki te kufaki mai te kilokiloga a te kau Eleni i te senitenali muamua?

4, 5. Se a te fakaakoakoga fakaofoofogia e uiga ki te kufaki ne tuku mai ne Iesu?

6. Ne maua pefea ne Paulo a mea aogā mai te kufaki o Iesu, kae se a te mea e tau‵loto ne tatou mai te mea tenei?

7. Se a te fesokotakiga i te va o te kufaki mo te agaga tapu?

8. Ne a mea ka fesoasoani mai ke mafai ne tatou o ati aka a fuataga o te agaga, e aofia i ei a te kufaki?

9. Kaia ne mafai ei o fai atu a Paulo ki te kau Kolinito me i te “alofa e kufaki”?

10. (a) Se a te auala e fesoasoani mai ei a te alofa ke kufaki tatou, kae ne a pati fakatonutonu ne tuku mai ne te apositolo ko Paulo e uiga ki te feitu tenei? (e) Se a te fakamatalaga ne fai mai ne se tino poto i te Tusi Tapu e uiga ki te kufaki mo te kaimalie o te Atua? (Ke onoono ki te fakamatalaga mai lalo i te palakalafa.)

11. Kaia e sili atu ei te tāua ke kufaki i potukau Kelisiano?

12. Kaia e tāua ei te kufaki i tulaga faiga‵ta?

13. Se a te mea ne fesoasoani atu ki a Paulo ke tu ‵mautakitaki a ia, kae e fesoasoani mai pefea tena fakaakoakoga ke tu ‵mautakitaki tatou?

14. Se a te mea ne faka‵pau ki ei ne Paulo a vaegā uiga fakaatua e pelā mo te kufaki, kae se a te fakatonutonuga ne tuku atu ne ia ki Kelisiano i Kolose?

15. Ne a ikuga e maua māfai e ‘taofi ‵mau a Kelisiano’ ki te kufaki mo nisi uiga fakaatua?

16. Ne a mea e mafai o iku mai māfai e ‘kufaki foki tatou ki tino katoa’?

17. E mafai pefea o fakaakoako atu tatou ki te alofa mo te kufaki o Ieova, kae kaia e ‵tau ei o fai tatou penā?

18. Se a te ‵talo a Paulo mō te kau Kolose?

19, 20. (a) E mafai pefea o ‵kalo keatea tatou mai te ‵kilo atu ki te leva o te tumau o te kufaki o Ieova e pelā me se mea faigata? (e) Ne a mea aogā ka maua mai te ‵tou kufaki?

[Ata i te itulau e 29]

Ke oko foki eiloa ki taimi ne fepaki ei a ia mo fakalavelave ‵lasi, ne kufaki eiloa a Iesu i amioga o ana soko

[Ata i te itulau e 30]

E fakamalosi atu ki ovasia Kelisiano ke fai ne latou se fakaakoakoga ‵lei o te kufaki i olotou faifaiga ki olotou taina

[Ata i te itulau e 31]

Kafai e fakaakoako atu tatou ki te alofa mo te kufaki o Ieova, ka tumau tatou i te talaiatuga o te tala ‵lei

[Ata i te itulau e 32]

Ne ‵talo atu a Paulo ko te mea ke mafai ne Kelisiano o ‘kufaki mo te fiafia’