Te Fakafesagai Atu Ki “Te Logo‵mae O Te Foitino”

“A toku alofa tauanoa ko lava ‵lei eiloa mo koe.”​—2 KOLINITO 12:⁠9.

“KO LATOU katoa kola e ma‵nako o ola i te olaga atua i te ‵soko tasi mo Keliso Iesu, ka fakasauagina.” (2 Timoteo 3:12) Kaia e fai ei penā? Me e fakasalalau atu ne Satani te manatu me e tavini atu fua a tino ki te Atua ona ko uiga kaiū, kae e taumafai malosi eiloa a ia ke fakatalitonu aka te manatu tenā. Ne fakailoa atu ne Iesu i te taimi e tasi ki ana apositolo fakamaoni, penei: “A Satani ko manako ke lu ne ia a koutou e pela mo saito.” (Luka 22:31) Ne iloa ‵lei ne Iesu me e talia ne te Atua ke tofotofo aka tatou ne Satani e auala i fakalavelave fakalogo‵mae. E tonu, e se fakauiga te mea tenā me e māfua tonu mai eiloa a fakalavelave katoa kolā e fe‵paki mo tatou i te olaga mai i a Satani io me ko ana temoni. (Failauga 9:11) Kae e loto finafinau a Satani o fakaaogā so se auala i tena malosi ke fakamasei ei ‵tou fakamaoni.

² E fai mai te Tusi Tapu me e se ‵tau mo tatou o numi i ‵tou tofotofoga. Faitalia me se a te mea e oko mai ki a tatou, e se fai pelā me se mea fou io me se mea e seki fakamoemoegina. (1 Petelu 4:12) A te ‵tonuga loa, ‵tou “taina kelisiano i te lalolagi katoa, e olo katoa latou i te vaega puapuaga e tasi.” (1 Petelu 5:⁠9) I aso nei, e tuku mai ne Satani a tofotofoga ‵lasi e uke ki tavini katoa a te Atua. E fiafia te Tiapolo māfai ko puapuaga tatou ki fakalavelave fakalogo‵mae e uke. Ke fakataunu te mea tenā, e fakaaogā ne ia tena lalolagi i se vaegā auala telā e fakaopoopo io me e fakamalosi aka ei so se ‘logo‵maega o te foitino.’ (2 Kolinito 12:⁠7) E tiga eiloa te feitu tenā, e se ‵tau o fakamasei ne osomaiga a Satani ‵tou fakamaoni. E pelā eiloa mo Ieova, e tuku mai ne ia “se ala e ‵sao ei” tatou ke kufaki i tofotofoga, ka fai foki penā a ia i taimi e fe‵paki ei tatou mo fakalavelave kolā e fakalogo‵mae mai ki ‵tou foitino.​​—⁠1 Kolinito 10:⁠13.

Te Auala ke Fakafesagai Atu ei ki se Logo‵maega

³ Ne fakamolemole atu a te apositolo ko Paulo ki te Atua ke ave keatea a te logo‵mae mai tena foitino. “Ne fakamolemole fakatolu atu au ki te Aliki e uiga ki te mea nei, kae fakatagi atu ki a ia ke ave ne ia keatea mai i a au.” Se a te tali a Ieova ki te fakamolemole ‵soko a Paulo? “A toku alofa tauanoa ko lava ‵lei eiloa mo koe, me i toku mana e sili atu i tou vaivai.” (2 Kolinito 12:​8, 9) Ke na iloilo aka ne tatou a te tali tenei kae ke onoono ki te auala e mafai o fesoasoani mai ei te manatu tenā ke fakafesagai atu tatou ki so se fakalavelave fakalogo‵mae telā e faka‵mae mai ki a tatou.

⁴ Mafaufau me ne fakamalosi atu a te Atua ki a Paulo ke fakatāua ne ia te alofa tauanoa telā ko oti ne fakaasi atu ki a ia e auala i a Keliso. A te ‵tonuga loa, ne fakamanuiagina malosi a Paulo i auala e uke. E tiga eiloa ne fai a ia mo fai se tino ‵teke malosi ki soko o Iesu, ne tuku atu ne Ieova mo te alofa a te tauliaga ke fai a ia mo fai se soko o Iesu. (Galuega 7:58; 8:3; 9:​1-4) Mai tua ifo i konā, ne tuku atu mo te atafai ne Ieova a tofiga mo tauliaga fakafia‵fia e uke ki a Paulo. E manino ‵lei eiloa te akoakoga i ei mō tatou. Ke oko foki eiloa ki toe taimi faiga‵ta, koi maua eiloa ne tatou a fakamanuiaga e uke kolā e ‵tau o fia‵fia ki ei. E se ‵tau lele eiloa o fai ne ‵tou tofotofoga ke puli i a tatou a te aga‵lei o Ieova.​​—⁠Salamo 31:⁠19.

⁵ Ne lava ‵lei eiloa te alofa tauanoa o Ieova i te suā feitu. E lava ‵lei foki eiloa a te ‵mana o te Atua ke fesoasoani mai ki a tatou ke manumalo i ‵tou tofotofoga. (Efeso 3:20) Ne akoako ne Ieova a Paulo me ko te mana mai te Atua ‘e sili atu i ‵tou vāivāiga.’ E pefea la? Ne tuku atu ne ia mo te alofa ki a Paulo a malosi katoa kolā e ‵tau o maua ko te mea ke fakafesagai atu ki ana tofotofoga. Kae ko te kufaki mo te talitonu katoatoa o Paulo ki a Ieova ne fakaasi atu ei ki Kelisiano katoa me ne ne manumalo te tagata vāivāi kae agasala tenei ona ko te ‵mana o te Atua. Mafaufau nei ki mea ne ‵tupu ki te Tiapolo, telā ne fai mai me e tavini atu fua a tāgata ki te Atua māfai e ‵lei te olaga kae e seai ne fakalavelave i ei. Ne fai a te fakamaoni o Paulo e pelā me ne ‵pa ei a mata o te tino fatufatu tenā!

⁶ A Paulo, se taugasoa mua o Satani i taimi ne taua atu ei a ia ki te Atua, se tino matafatu telā ne fakasauā atu ki Kelisiano, se Falesaio loto finafinau, telā e mautinoa eiloa me ne maua ne ia a mea ‵gali e uke o te olaga ona ko te mea ne fanau mai a ia i se kāiga maumea. Kae fakamuli, ne tavini atu a Paulo ki a Ieova mo Keliso e pelā me “ko te toe apositolo . . . fatauva.” (1 Kolinito 15:⁠9) Ke fai penā, ne fakalogo mo te loto maulalo a ia ki te pulega a te potukau pule o Kelisiano i te senitenali muamua. Kae ne kufaki a ia mo te fakamaoni faitalia te logo‵mae o tena foitino. Ne kaitaua malosi Satani me ne seki fai ne tofotofoga o te olaga ke fakavāivāi te loto finafinau o Paulo. Ne seki galo atu foki i a Paulo tena kilokiloga ki te fakamoemoega me ka kau atu a ia ki te Malo faka-te-lagi o Keliso. (2 Timoteo 2:12; 4:18) E seai ne logo‵maega ne mafai o fakavāivāi atu ki tena loto finafinau faitalia te faigata o tofotofoga konā. Ke na tumau foki ‵tou loto finafinau penā! Mai te fesoasoani mai ki ‵tou tofotofoga, e faka‵malugina ne Ieova tatou ki te tauliaga ke fesoasoani atu ki te fakamaoniga me i a Satani se tino loi.​​—⁠Faataoto 27:⁠11.

E Tāua ‵Ki a Fakatokaga a Ieova

⁷ I aso nei, e fakamalosi atu ne Ieova a Kelisiano fakamaoni e auala i tena agaga tapu, tena Muna, mo ‵tou kautaina Kelisiano. E pelā mo te apositolo ko Paulo, e mafai o tuku atu ki a Ieova a mea kolā e manava‵se tatou ki ei i te faiga o ‵talo. (Salamo 55:22) E tiga eiloa kāti e se ave keatea ne te Atua ‵tou tofotofoga, e mafai o tuku mai ne ia ki a tatou a te poto ke fakafesagai atu tatou ki ei, kae maise eiloa ki tofotofoga kolā e faigata ke kufaki i ei. E mafai foki o tuku mai ne Ieova ki a tatou a te malosi​​—⁠i te tukumaiga o te “malosi e sili atu i te malosi masani”​​—⁠ke fesoasoani mai ke kufaki tatou.​​—⁠2 Kolinito 4:​7, NW.

⁸ E mafai pefea o maua ne tatou se vaegā fesoasoani penā? E ‵tau o suke‵suke tatou mo te loto fia‵fia ki te Muna a te Atua, me ka maua eiloa ne tatou i ei ana fakamafanafanaga ‵tonu. (Salamo 94:19) E fai‵tau ne tatou i te Tusi Tapu a pati fakaosofia e uiga ki tavini a te Atua i te taimi ne fakamolemole atu ei latou mō tena fesoasoani. A te saga atu o Ieova, telā e masani sāle o aofia i ei te fakaaogāga o pati fakamafanafana, ne mea ‵lei ke mafau‵fau ‵mafa tatou ki ei. A te sukesuke ki te Muna a te Atua ka fakamalosi mai ko te mea ke ‘fakaasi i te mana e o te Atua, kae se e o tatou.’ E pelā mo te ‵kai o tatou ki meakai faka-te-foitino i aso katoa ke fia‵fia kae ke maua te malosi, e ‵tau foki o ‵kai faeloa tatou ki te muna a te Atua. E mata, e fai ne tatou te mea tenei? Kafai e fai penā, ka lavea atu i ei ne tatou me i te mauaga o te “malosi telā e sili atu i te malosi masani” e fesoasoani mai ki a tatou ke kufaki i so se logo‵maega telā e mafai o faka‵mae mai nei ki a tatou.

⁹ E mafai o fai a toeaina Kelisiano kolā e ma‵taku ki te Atua e pelā “me ne fale e malu ei a tino mai i te matagi” telā e puipui tatou mai logo‵maega, se “koga e lafi ei a tino mai i se afā” o fakalavelave. A toeaina kolā e ma‵nako ke fetaui ‵lei latou mo te fakamatalaga fakaosofia tenā, e fakamolemole atu i te loto maulalo mo te fakamaoni ki a Ieova ke tuku atu ki a latou a “muna e tau o fai” ko te mea ke iloa ne latou o tali atu i pati ‵lei ki tino kolā e logo‵mae. A pati a te kau toeaina e fai pelā me se afuafugā vaiua telā e faka‵moko kae fakamafanafana mai ki ‵tou mafaufau i taimi faiga‵ta o te olaga. Mai te “fesoasoani ki tino vaivai” i faiga o pati fakamafanafana e ‵lago tonu atu a toeaina ki olotou taina mo tuagane faka-te-agaga kolā e mafai o loto vāivāi io me e fanoa‵noa ona ko te logo‵mae o te foitino.​​—⁠Isaia 32:2; 50:4; 1 Tesalonia 5:⁠14.

¹⁰ E fai a tavini katoa a Ieova mo fai se vaega o tena kāiga Kelisiano telā e ‵kau fakatasi. “E tonu, me e tokouke tatou, kae tasi eiloa tatou i a Keliso,” kae “e ‵tau mo tatou o fakatau a‵lofa.” (Loma 12:5; 1 Ioane 4:11) E fakataunu pefea ne tatou te fakatonuga tenei? E ‵tusa mo te 1 Petelu 3:​8, e fai ne tatou penā mai te “fakatau atafai kae loto ma‵lalo foki” ki tino katoa kolā e kāiga mo tatou i te fakatuanaki. E mafai ne tatou katoa o atafai malosi ki tino kolā e fakafesagai ki logo‵maega faigata o te foitino, faitalia me ko te kau talavou io me ko tino ma‵tua. E pefea la?

¹¹ E ‵tau o taumafai tatou ke malamalama i olotou logo‵maega. Kafai e se atafai, se fia ‵saga atu, io me se loto malamalama tatou, ka fai fua ne tatou e aunoa mo te iloa ke gasolo aka eiloa o ma‵sei atu olotou logo‵maega. A te ‵tou matapula‵pula ki olotou tofotofoga e ‵tau o fakaosofia ei tatou ke fakaeteete i ‵tou pati e fai atu, te auala e fai atu ei, mo te auala e gasue‵sue ei tatou. A ‵tou kilokiloga aogā mo te fakamalosi atu e mafai o fesoasoani ke fakafeoloolo aka ei a nisi logo‵maega tai ‵lasi kolā e fakalogo‵mae atu ki a latou. E mafai ei o fai tatou pelā me ne fesoasoani aogā ki a latou.​​—⁠Kolose 4:⁠11.

Te Auala ne Fakafesagai Atu ei a Nisi Tino mo te Manuia

¹² Ko pili atu nei tatou ki te gataga o aso fakaoti konei, kae ko gasolo aka eiloa o uke a “puapuaga” i aso takitasi. (Mataio 24:⁠8) Tela la, kāti e fakalogo‵mae atu a tofotofoga ki tino katoa i te lalolagi, kae maise ki tavini fakamaoni a Ieova, kolā e taumafai ke fai tena loto. E pelā mo se Kelisiano telā e galue i te taviniga tumau. Ne iloilo aka ne tokitā tou fafine kae ne maua aka me ko kenisa tou fafine kae ne ‵tau o tapale keatea a uaua kolā e aveave ei a suāvale mo te vai i loto i tena foitino. I te taimi ne iloa ei ne tou fafine mo tena avaga me ko maua ne ia te masaki tenei, ne faipati fakavave atu laua ki a Ieova i se ‵talo fakamolemole telā e loa ‵ki. Ne fai fakamuli mai tou fafine me ne oko atu ki a laua se filemu e fui fakatalitonugina. Kae e ui i ei ne isi eiloa ne taimi faigata ‵ki ki a ia, kae maise eiloa ko te fakafesagai atu ki mea ne ‵tupu ki a ia ona ko te ma‵losi o ana vailakau.

¹³ Ke fakafesagai atu ki tena tulaga, ne taumafai te tuagane tenei ke tauloto ki mea e uke atu e mafai o maua ne ia e uiga ki te kenisa. Ne fanatu a ia ki ana tokitā mō se fesoasoani. I Te Faleleoleo Maluga, Awake!, mo tusi faka-Kelisiano tai ‵pau, ne maua aka ne tou fafine a tala o tino kolā e fakaasi mai ei a auala ne fakafesagai atu ei latou ki te masaki tenei. E faitau foki tou fafine ki tala tai ‵pau i te Tusi Tapu kolā e fakaasi mai i ei a te atamai o Ieova ke fesoasoani atu ki ana tino i taimi faiga‵ta, mo nisi fakamatalaga fesoasoani aka foki.

¹⁴ E tasi te mataupu e uiga ki te loto fanoanoa ne siki mai ei a pati ‵poto konei: “A tino kola e se fia nofo fakatasi mo nisi tino e saga fua ki a latou eiloa.” (Faataoto 18:​1, NW) Tela la, ne tuku mai ne te mataupu a te fesoasoani tenei: “Sa nofo tokotasi faeloa.”a E fakamatala mai te tuagane tenā, penei: “Ne fai mai a tino e tokouke ki a au me ne ‵talo latou mō au; ne telefoni mai a nisi tino. Ne telefoni mai faeloa a toeaina e tokolua ke fesili mai me e a toku malosi. Ne maua ne au a meaalofa mo te fia o tusi fakatalofa. Ne fakatoka foki eiloa ne nisi tino a meakai. Ne fia fesoasoani mai foki a nisi tino o ave au ki te fakaimasaki ke maua oku vailakau.

¹⁵ Ne pakia se tino telā ko leva ne tavini atu ki a Ieova i New Mexico, i U.S.A. i fakalavelave ‵tupu fakafuasei e lua i motokā. Ne pakia tena ua mo ana tuāuma, telā ne fakaopoopo ei ki te ‵mae sāle o sokoga o tena foitino telā ne ‵tau o fakafesagai atu a ia ki te tulaga tenā mō tausaga e 25 tupu. Ne fakamatala mai tou fafine, penei: “Ne faigata ‵ki ke fakatu ‵tonu toku ulu io me ke sau so se mea telā e sili atu i te lima pauna te ‵mafa. Kae ko te ‵talo ‵soko atu ki a Ieova ne fesoasoani malosi mai ki a au. Kae penā foki loa a mataupu i Te Faleleoleo Maluga kolā e suke‵suke matou ki ei. E tasi te mataupu penā ne fakamatala mai i ei te Mika 6:​8, telā e fakamasaua mai me i te mauaga o te agamalū i te sa‵sale fakatasi mo te Atua e fakauiga i ei ki te iloaga ne se tino a mea e mafai o fai mo mea e se mafai ne ia o fai. Ne fesoasoani mai te mea tenei ke iloa ne au, me faitalia toku masaki, ne seki ‵tau o loto vāivāi au, faitalia me e mu‵tana ifo a taimi ne fakamāumāu ne au i te galuega i te mea telā ne manako au ki ei. A te tavini atu ki ei mo te loto ‵mā ko te mea muamua telā e fakatāua ne ia.”

¹⁶ E lipoti mai foki tou fafine, penei: “Ne fakamālō mai faeloa a toeaina ki a au mō aku taumafaiga ke kau atu faeloa ki fakatasiga pelā foki mo te galuega talai. Ne fakafetaui mai a tamaliki kae ‵sai mai ki a au. Ne lasi te kufaki o tavini paenia i a au kae ne ‵fuli sāle olotou palani i aso kolā ne masaki malosi ei au. Kafai ko ma‵sei a aso, e ave ne latou au mo te atafai ki olotou toe āsiga io me e ‵kami ne latou a au ke kau atu ki olotou akoga faka-te-Tusi Tapu. Kae ona ko te mea ko se mafai ne au o amo se taga tusi, ne tuku ne nisi tino talai aku tusi i olotou taga i te taimi ne fanatu ei au i te galuega talai.”

¹⁷ Mafaufau la ki auala ne fesoasoani atu ei a toeaina o te fakapotopotoga mo taina tali‵tonu ki tuagane e tokolua konei ke fakafesagai atu ki lā masaki fakalogo‵mae. Ne tuku mai ne latou a fesoasoani aogā kae atafai ke fakataunu ei a manakoga fakapito i te feitu faka-te-agaga, te feitu faka-te-foitino, mo te feitu tau lagonaga. E fakamalosi atu te mea tenā ki a koe ke tuku atu te fesoasoani ki nisi taina mo tuagane kolā e maua foki ne latou a fakalavelave, i ne? E mafai foki o fai koutou, talavou, mo fai ne fesoasoani ki tino i otou fakapotopotoga kolā e fakafesagai atu ki logo‵maega o olotou foitino.​​—⁠Faataoto 20:⁠29.

¹⁸ Ko oti ne ‵lomi ne Te Faleleoleo Maluga mo te Awake! a tala e uke mo mea ne ‵tupu ki Molimau kolā ne fakafesagai atu, kae koi fakafesagai atu foki eiloa mo fakalavelave i te olaga. Kafai e faitau faeloa koe ki vaegā mataupu penā, ka lavea atu ne koe me ne kufaki ou taina mo tuagane faka-te-agaga i te lalolagi kātoa i fakalavelave i mea tau tupe, te mate atu o se tino pele i fakalavelave ‵tupu fakafuasei, mo tulaga fakama‵taku i taimi o taua. E maua ne nisi tino a masaki kolā e se mafai eiloa o gasue‵sue malosi latou. E se mafai ne tino e tokouke o fai a mea māmā i te olaga kolā e faigofie fua ki tino ma‵losi. E tofotofo latou ne olotou ma‵saki, kae maise eiloa māfai ko se mafai ne latou o ‵kau malosi atu ki te galuega talai e pelā mo te mea e ma‵nako latou ki ei! E pefea la te ‵loto o te lotou loto fakafetai ki te fesoasoani mo te ‵lago malosi atu o taina, tuagane, tama‵liki mo tino ma‵tua ki a latou!

E Aumai ne te Kufaki a te Fiafia

¹⁹ Ne fiafia a Paulo ke lavea atu a te auala ne fakamalosi atu ei a te Atua ki a ia. Ne fai mai tou tagata, penei: “Tela la, ka lasi toku fiafia o fakamatamata i oku feitu vaivai, ko te mea ke i luga i a au te mana o Keliso. Ona ko Keliso au ko loto malie o fakafeagai mo uiga vaivai o te foitino, muna masei, puapuaga, fakasauaga mo mala; me kafai ko vaivai au i te feitu faka te foitino ona ko mea konei, kae malosi au i te feitu faka te Agaga i te fesoasoani mai o te Aliki.” (2 Kolinito 12:​9, 10) Ona ko mea kolā ne ‵tupu ki a Paulo ne mafai ei o fai mai a Paulo mo te loto talitonu, penei: “E se faipati atu au penei ona ko au e manako ki ei, i a au ko oti ne akoako ke loto malie ki so se mea e maua ne au. Ko iloa ne au o ola e pela mo se tino mativa, ko iloa foki ne au o ola e pela mo se tino maumea. Ko oti au ne akoako ki mea konei, ke toka au mo se mea o mea konei i so se koga: me ko te makona io me ko te likiliki, me ko te mativa io me ko te maumea, e pau faeloa a mea katoa kona ki a au. E mafai ne au o fai a mea katoa kona, ona ko te fakamalosi mai o Keliso ki a au.”​​—⁠Filipi 4:​11-13.

²⁰ Tela la, mai te kufaki i so se mea fakalogo‵mae ki ‵tou foitino, e mafai o maua ne tatou i ei te fiafia lasi i te fakaasi atu ki tino katoa me i te ‵mana o Ieova ne fai ne ia tatou ke ma‵losi atu i ‵tou vāivāiga. Ne tusi mai a Paulo, penei: “E se mafai o loto vaivai matou . . . Ka ko te motou malosi faka te Agaga e fakafou faeloa i aso takitasi. Ka ko te puapuaga se tumau tenei, e isi eiloa te faigata kae māmā fua ki omotou manatu, kae ka aumai ne ia ki a matou te ‵malu se gata mai, tela e sili atu tona taua i lo te puapuaga tenei. Ko fakamautakitaki omotou mafaufauga ki mea kola e se matea ki mata . . . . ko mea kola e se matea, e tumau eiloa ke oko ki te se gata mai.”​​—⁠2 Kolinito 4:​16-18.

²¹ E fakamoe‵moe a te tokoukega o tino o Ieova i aso nei ke ola latou i tena lalolagi Palataiso kae ke maua a fakamanuiaga ne folafola mai ne ia. Kāti “e se matea” atu ne tatou a vaegā fakamanuiaga penā i aso nei. Kae ko pili o oko fakavave mai te taimi telā ka lavea atu ei ne tatou a fakamanuiaga ki ‵tou mata, e tonu, kae ka tumau ei ki te se-gata-mai. A vaegā fakamanuiaga penā ka fai mo fai se fakatapūga me e se ‵tau o toe fa‵ki tatou i fakalavelave fakalogo‵mae! Ka “fakamalepe a te galuega a te Tiapolo” ne te Tama a te Atua, kae “fakatakavale ne ia a te Tiapolo, tela e isi sena pule i te mate.”​​—⁠1 Ioane 3:8; Epelu 2:⁠14.

²² Tela la, faitalia me se a te mea telā e fakalogo‵mae mai ki ‵tou foitino i aso nei, ke na tumau eiloa tatou i te fakafesagai atu ki ei. E pelā mo Paulo, ka maua ne tatou te malosi ke fai penā mai i a Ieova me e tuku mai ne ia mo te kaimalie a te malosi ki a tatou. Kafai e ‵nofo atu tatou i te Palataiso faka-te-lalolagi, ka tavae ne tatou a Ieova te ‵tou Atua i aso katoa mō ana mea ‵gali katoa ne fai mō tatou.​​—⁠Salamo 103:⁠2.

[Fakamatalaga mai lalo]

Ka Tali Mai Pefea ne Koe?

• Ne taumafai pefea a te Tiapolo o fakatakavale a te fakamaoni o Kelisiano ‵tonu, kae kaia e fai ei penā?

• E sili atu pefea te ‵mana o Ieova ‘i ‵tou vāivāiga’?

• E mafai pefea ne toeaina mo nisi tino o fakamalosi atu ki tino kolā e logo‵mae i fakalavelave?

[Fesili mo te Sukesukega]

1, 2. (a) Kaia e se ‵tau ei o ‵numi tatou māfai ko fe‵paki tatou mo tofotofoga mo fakalavelave? (e) Kaia e ‵tau ei o maua ne tatou te loto talitonu māfai ko fe‵paki tatou mo tofotofoga?

3. Ne tali atu pefea a Ieova i te taimi ne fakamolemole atu ei a Paulo ke ave keatea a te mea logo‵mae i tena foitino?

4. Ne a auala ne maua ei ne Paulo a mea aogā mai te alofa tauanoa o Ieova?

5, 6. (a) Ne akoako atu pefea ne Ieova a Paulo me i te ‵mana mai te Atua ‘e sili atu i ‵tou vāivāiga’? (e) Ne fakamaoni atu pefea ne te fakaakoakoga a Paulo me i a Satani se tino loi?

7, 8. (a) Ne a auala e fakamalosi atu ei a Ieova ki ana tavini i aso nei? (e) Kaia e tāua ‵ki ei a te faitau mo te sukesuke ki te Tusi Tapu ke fakafesagai atu ei ki logo‵maega o te foitino?

9. E mafai pefea o fesoasoani atu a toeaina ki tino kolā e fakafesagai atu ki fakalavelave?

10, 11. E mafai pefea ne tavini a te Atua o fakamalosi atu ki nisi tino kolā e fe‵paki faeloa mo tofotofoga fakama‵taku?

12-14. (a) Se a te mea ne fai ne se Kelisiano e tokotasi ke fakafesagai atu ei ki te masaki ko te kenisa? (e) Ne fesoasoani kae fakamalosi atu pefea a taina mo tuagane faka-te-agaga o te fafine tenei ki a ia?

15-17. (a) Ne fakafesagai atu pefea se Kelisiano e tokotasi ki tulaga faiga‵ta kolā ne iku mai i fakalavelave ‵tupu fakafuasei? (e) Se a te fesoasoani ne tuku atu ne tino i te fakapotopotoga?

18. Ne a fakamalosiga e mafai o maua ne tatou i tala o tino kolā ne ‵lomi i mekesini ko Te Faleleoleo Maluga mo te Awake!?

19. Kaia ne mafai ei o fiafia a Paulo faitalia a tofotofoga fakalogo‵mae mo ana vāivāiga?

20, 21. (a) Kaia e mafai ei o maua ne tatou te fiafia māfai e mafau‵fau tatou ki “mea kola e se matea ki mata”? (e) Ne a nisi “mea kola e se matea ki mata” kae e fakamoemoe koe ke lavea atu i te lalolagi Palataiso?

22. Se a te loto talitonu mo te fakaikuga e ‵tau o fai ne tatou?

[Ata i te itulau e 11]

Ne ‵talo fakatolu atu a Paulo ke ave keatea ne te Atua a te logo‵maega i tena foitino