Ne Fakafesagai Atu Latou ki te Logo‵mae o te Foitino

“Ko tuku mai ki a au; a te logo‵mae o te foitino, ko te avefekau a Satani tena ko vau o kini au.”​—⁠2 KOLINITO 12:⁠7.

E MATA, e fe‵paki koe mo nisi tofotofoga kolā e tumau? Kafai e penā loa, e se ko koe fua tokotasi. I “taimi faiga‵ta i aso fakaoti” konei, e fakafesagai atu a Kelisiano fakamaoni mo ‵tekemaiga ‵lasi, fakalavelave i te kāiga, masaki, fakalavelave i mea tau tupe, lagonaga māfatia, te mate o se tino pele, mo nisi mea faiga‵ta aka. (2 Timoteo 3:​1-5) I nisi fenua, e ‵mate atu a tino e tokouke ona ko te sē lava o mea‵kai mo taua.

² E mafai o fai ne vaegā fakalavelave penā ke loto vāivāi se tino, kae maise eiloa māfai e oko atu a fakalavelave e uke i te taimi e tasi. Masaua a pati i te Faataoto 24:​10, penei: “Kafai koe e vaivai i te taimi e tupu ei se fakalavelave, ko tena uiga a koe e vaivai eiloa.” E tonu, a te loto vāivāi ona ko ‵tou tofotofoga, e mafai o ave keatea a te malosi e manakogina kae e mafai o fakavāivāi ei ‵tou fakaikuga ke kufaki ke oko eiloa ki te gataga. E pefea la?

³ Ia, e mafai ne te loto vāivāi o fakagata a te kausaki ki ‵tou fakamoemoega. E pelā mo te faigofie ke fakalasilasi aka ‵tou fakalavelave kae oti aka ko ma‵natu aka tatou me ko tō faigata katoa ke fa‵ki i ‵tou fakalavelave konā. Kāti e ‵tagi atu a nisi tino ki te Atua penei, “Kaia e talia ei ne koe ke tupu te mea tenei ki a au?” Kafai ko kamata o ‵mau a aka o se vaegā kilokiloga ‵se penā i te loto o se tino, e mafai ei o fakamasei tena fiafia mo tena loto talitonu. E mafai o loto vāivāi ‵ki se tavini a te Atua telā e mafai o fakagata aka ei tena taua atu i te taua ‵lei “o te fakatuanaki.”​​—⁠1 Timoteo 6:⁠12.

⁴ E se māfua mai i a Ieova te Atua ‵tou tofotofoga. (Iakopo 1:13) E oko mai fua a nisi tofotofoga ki a tatou ona ko tatou e taumafai ke fakamaoni ki a ia. A te ‵tonuga loa, a tino kolā e tavini atu ki a Ieova e fai ei ke saga atu ki a latou tena fili sili, ko Satani te Tiapolo. I te taimi toetoe tenei e maua ne ia, e taumafai a te “atua masei o te lalolagi nei” o fai so se tino telā e alofa ki a Ieova ke fakagata te faiga o Tena loto. (2 Kolinito 4:⁠4) E tuku mai ne Satani a logo‵maega e uke ‵ki ki ‵tou kautaina mo tuagane i te lalolagi kātoa. (1 Petelu 5:⁠9) E tonu, e se māfua mai i a Satani ‵tou fakalavelave katoa, kae e mafai fua ne ia o fakaaogā a fakalavelave kolā e fe‵paki mo tatou, ke fakavāivāi malosi mai ki a tatou.

⁵ Faitalia te malosi o Satani io me ko ana meatau, e mafai eiloa o fakatakavale ne tatou a ia! E mafai pefea o mautinoa i a tatou te mea tenā? Me e taua atu a Ieova te Atua mō tatou. Ko oti ne fakamautinoa mai ne ia me ka se tuku tiaki atu ana tavini ki togafiti a Satani. (2 Kolinito 2:11) A te ‵tonuga loa, e taku mai ne te Muna a te Atua a mea e uke e uiga ki tofotofoga kolā ne oko atu ki Kelisiano ‵tonu. Ne fakaaogā i te Tusi Tapu a te tugāpati ko “te logo‵mae o te foitino” ke fakauiga ki te apositolo ko Paulo. Kaia? Ke na onoono aka tatou ki te auala e fakamatala mai ei ne te Muna a te Atua a te fuaiupu tenā. I konā ka lavea aka ei ne tatou me e se ko tatou fua e ma‵nako ki te fesoasoani o Ieova ke manumalo i tofotofoga.

Te Pogai e Fai ei a Tofotofoga e Pelā me ne Mea Fakalogo‵mae

⁶ Ne fakaosofia a Paulo, telā ne tofotofogina i se auala lasi, ke tusi mai, penei: “Ko tuku mai ki a au; a te logo‵mae o te foitino, ko te avefekau a Satani tena ko vau o kini au, kae taofi ne ia au ke mo a ma fakamatamata.” (2 Kolinito 12:⁠7) Se a te mea ne fakalogo‵mae ki te foitino o Paulo? Ia, kafai e sulufia te pakili i se mea makaikai, ka logo‵mae ‵ki eiloa. Tela la, e fakaasi mai ne te fuaiupu tenā me e isi se mea telā e fai ne ia ke logo‵mae a Paulo​​—⁠faitalia me ko te feitu faka-te-foitino, feitu tau lagonaga, io me ko te avā mea konā. Kāti ne isi se fakalavelave i mata o Paulo io me ko nisi masaki faka-te-foitino aka. Io me kāti e aofia i te mea fakalogo‵mae ko tino kolā ne fakafaigatā ne latou te tofiga o Paulo e pelā me se apositolo kae ne fakalotolotolua latou ki te tāua o tena galuega talai mo te galuega ko te akoako atu. (2 Kolinito 10:​10-12; 11:​5, 6, 13) Faitalia me se a te mea tenā, ne tumau eiloa te logo‵mae tenā i a Paulo kae ne seki mafai o ave keatea.

⁷ Masaua me ne tumau eiloa a Paulo i te logo‵mae. Ne māfua mai te veape Eleni telā ne fakaaogā ne Paulo i konei mai te pati ko te “fusu malosi atu.” Ne ‵fuli te pati tenā ki te “laupapa” mo te “kini” i te Mataio 26:67 mo te 1 Kolinito 4:11. I fuaiupu konā i te ‵gana Eleni e fakauiga te pati tenā ki te fusu. Ona ko te takalialia malosi o Satani ki a Ieova mo Ana tavini, e mafai o fakamautinoa aka ne tatou me ne fiafia a te Tiapolo i a Paulo ne logo‵mae faeloa. I aso nei, e fiafia foki a Satani māfai e logo‵mae tatou.

⁸ Tela la, e pelā mo Paulo, e ‵tau o iloa ne tatou a te auala ke fakafesagai atu ei ki vaegā logo‵maega penā. E fakalagolago eiloa ‵tou ola ki te faiga o tatou penā! Masaua, me e manako a Ieova ke ola tatou ki te se-gata-mai i tena lalolagi fou, telā ka se toe maua ne tatou a fakalavelave kolā e fakalogo‵mae mai. Ke fesoasoani mai ke maua ne tatou a te meaalofa gali tenei, ko oti ne tuku mai ne Ieova a fakaakoakoga e uke i tena Muna tapu, ko te Tusi Tapu, telā e fakaasi mai i ei me ne fakafesagai atu mo te manuia ana tavini fakamaoni ki mea kolā e logo‵mae ei olotou foitino. A latou ne tino sē ‵lei kātoatoa e pelā foki eiloa mo tatou. A te mafaufau ki nisi “tino talitonu fakamaoni” konei, ka fesoasoani mai “ke ‵tele tatou mo te loto fai ki mua ke maua te manumalo i te fakatau‵telega tenei e takato mai i mua o tatou.” (Epelu 12:⁠1) A te mafaufau ‵loto ki mea ne kufaki ei latou, e mafai o fakamalosi aka ei ‵tou loto tali‵tonu me e mafai ne tatou o fakafesagai atu ki so se auala e fakalogo‵mae ei ne Satani a tatou.

Te Mea Telā ne Logo‵mae ei a Mefiposeta

⁹ Mafaufau ki a Mefiposeta, te tama tagata a te taugasoa o Tavita, ko Ionatana. I te taimi ko lima ei a tausaga o Mefiposeta, ne oko mai te tala me i tena tamana, ko Ionatana, mo tena tupuna, ko te Tupu ko Saulo, ko oti ne tamate. Ne polepole i te mataku a te tausi o te tamaliki tenā. “Ne puke aka a ia ne [tou] fafine, te mea eiloa ko tele; ka ko te fafine tena ko oko eiloa i ana fakavavave, tela ne to ei a Mefiposeta, tena ne pili ei a ia.” (2 Samuelu 4:⁠4) Ne fai tena ‵pili mo fai se mea fakalogo‵mae ki a ia kae ne ‵tau o kufaki a Mefiposeta i ei i te taimi ne tupu aka ei a ia.

¹⁰ I te fia o tausaga mai tua ifo i ei, ona ko te lasi o tena alofa mō Ionatana, ne fakaasi atu ne te Tupu ko Tavita a te alofa atafai ki a Mefiposeta. Ne tuku atu ne Tavita a mea katoa a Saulo ki a ia kae ‵tofi aka ne ia a te tino fesoasoani a Saulo, ko Sipa ke tausi ne ia te laumanafa tenei. Ne fai atu foki a Tavita ki a Mefiposeta me e ‵tau o kai faeloa a ia i te fale o Tavita. (2 Samuelu 9:​6-10) E seai se fakalotolotolua me i te alofa atafai o Tavita ne fakamafanafana atu ki a Mefiposeta kae ne fesoasoani atu ke fakafeoloolo aka ei te logo‵mae ona ko tena ‵pili. Ko tafaga la te gali o te fakaakoakoga tenei! E ‵tau foki mo tatou o fakaasi atu te atafai ki tino kolā e logo‵mae olotou foitino.

¹¹ Fakamuli ifo, ne ‵tau o fakafesagai a Mefiposeta ki te suā logo‵maega o tena foitino. Ne fatufatu ne tena tavini ko Sipa a ia i mua o te Tupu ko Tavita, i te taimi ne tele keatea ei Tavita mai Ielusalema ona ko te ‵teke atu o Apisaloma, te tama a Tavita. Ne fai atu a Sipa me ne seki fakamaoni a Mefiposeta kae ne nofo atu ei a ia i Ielusalema ona ko te fakamoemoega ke maua ne ia te tulaga fakatupu.a Ne talitonu a Tavita ki pati fatufatu a Sipa kae ne tuku atu ne ia a mea katoa a Mefiposeta ki te tino loi tenā!​​—⁠2 Samuelu 16:​1-4.

¹² Kae i te taimi ne fetaui fakamuli ei a Mefiposeta mo Tavita, ne fai atu ne ia ki te tupu a te mea tonu telā ne tupu. Ne fakatoka a ia ke kau atu ki a Tavita i te taimi ne fakatogafiti ei ne Sipa a ia mai te ofo atu ke sui ne ia a ia. E mata, ne faka‵tonu aka ne Tavita te mea ‵se tenei? Ne isi eiloa ne ana mea ne fai ki ei. Ne ‵vae aka ne ia te laumanafa i te va o tāgata konā e tokolua. Tenei foki loa a te suā mea ne fakalogo‵mae atu ki te foitino o Mefiposeta. E mata, ne fanoanoa malosi a ia? E mata, ne ‵teke atu a ia ki te fakaikuga a Tavita, kae fāmeo atu me e se ‵lei te faifaiga tenā? Ikai, ne talia ne ia mo te loto maulalo a te manakoga o te tupu. Ne mafaufau a ia ki feitu ‵lei, mai te fiafia me ko toe foki mai te tupu o Isalaelu mo te saogālēmū ki te tulaga tonu. Ne tuku tonu mai ne Mefiposeta se fakaakoakoga ‵lei ‵ki mai te tumau i te kufaki i tena ‵pili, i pati fatufatu mo te fanoanoa.​​—⁠2 Samuelu 19:​24-30.

Ne Fakafesagai Atu a Neemia ki Ana Tofotofoga

¹³ Mafaufau ki logo‵maega fakatusa kolā ne ‵tau o kufaki i ei a Neemia i te taimi ne toe foki atu ei a ia ki te fa‵kai o Ielusalema kae e seai ne ana pui, i te lima senitenali T.L.M. Ne maua atu ne ia a te fa‵kai ko maofaofa valevale, kae ko tino Iutaia i ei, ne fai valevale, ne loto vāi‵vāi, kae ne seki ‵mā foki i te kilokiloga a Ieova. E tiga eiloa ne talia ne te Tupu ko Aletaseta ke toe faite aka a ‵pui o Ielusalema, e seki leva kae ne iloa ne Neemia me ne takalia‵lia a kovana o fenua ‵pili mai ki tena galuega tenā. “Ko oko eiloa i te se fia‵fia i te logoga me e isi se tino ka vau o galue mō te lei o tino Isalaelu.”​​—⁠Neemia 2:⁠10.

¹⁴ A tino ‵teke konā mai fenua fakaa‵tea ne fai ne latou a mea katoa i te lotou malosi ke fakagata ei te galuega a Neemia. Olotou fakasauāga, olotou pati ‵loi, pati fatufatu, mo olotou fakamatakutakuga​—⁠ne fai faeloa mo fai ne logo‵maega ki tena foitino. E mata, ne takavale a ia i togafiti ma‵sei o ana fili konā? Ikai! Ne talitonu katoatoa a ia ki te Atua, kae ne seki fakavāivāi a ia. Tela la, i te taimi ne palele atu ei te faitega o ‵pui o Ielusalema, ne tuku atu ei ne latou a fakamaoniga tumau ki te ‵lago atu o Ieova mo te alofa ki a Neemia.​​—⁠Neemia 4:​1-12; 6:​1-19.

¹⁵ E pelā me ko te kovana, ne ‵tau foki o fe‵paki a Neemia mo fakalavelave e uke mai i tino o te Atua. Ne fai a fakalavelave konei e pelā me ne logo‵maega kolā ne fakalavelave malosi atu ki a ia ona ko te mea ne aofia foki i ei a te fesokotakiga o tino o te Atua mo Ieova. Ne fakamaluga aka ne tino mau‵mea a te pasene o kaitalafu, kae ko olotou taina ma‵tiva, ne ‵tau o ‵togi atu olotou manafa mo olotou tama‵liki ke fai mo pologa, ko te mea ke ‵togi atu ei olotou kaitalafu mo lafoga ki te malo o Pelesia. (Neemia 5:​1-10) Ne soli ne tino Iutaia e tokouke a te Sapati kae ne fakata‵mala latou o ‵lago atu ki te kau Levi mo te faletapu. E isi foki ne tino ko a‵vaga ki “fafine Asetota, Amoni, mo Moapi.” Ko oko eiloa i te fakalogo‵mae atu o te mea tenei ki a Neemia! Kae e seai eiloa se logo‵maega i mea konei ne faka‵tuka atu ki a ia. I taimi e uke ne tu mautakitaki ei a ia e pela me se tino loto finafinau i te fakamuamua o auala amio‵tonu a te Atua. E pelā mo Neemia, ke na ita fitifiti tatou ma talia so se faifaiga sē fakamaoni a nisi tino ke fulitua atu ei tatou ki te tavini atu mo te alofa fakamaoni ki a Ieova.​​—⁠Neemia 13:​10-13, 23-27.

Ne Fakafesagai Atu Foki a Nisi Tino Fakamaoni ki Logo‵maega

¹⁶ E aofia i te Tusi Tapu a nisi fakaakoakoga e uke o tino kolā ne fakafesagai atu ki tulaga faiga‵ta kolā ne fai pelā me ne mea fakalogo‵mae. E tasi te māfuaga o vaegā logo‵maega penā ko fakalavelave faka-te-kāiga. “Ne puapuaga te olaga o Isaako mo Lepeka,” ko mātua o Esau, i avaga tokolua a Esau. Ne fai mai foki a Lepeka me ne ‵fiu kae fi‵ta a ia i avaga konā a Esau. (Kenese 26:​34, 35; 27:46) Mafaufau foki ki a Hana mo te auala ne “fakalili” sāle ne te suā avaga a Elekana ko Penina, ona ko te seai o se tamaliki a Hana. Kāti ne logo‵mae a Hana i te faifaiga matagā tenei i te lotou fale eiloa. Ne fakaitaita foki ne Penina tou fafine i mua o tino​​—⁠ kāti i mua o kāiga mo taugasoa​​—⁠i te taimi ne ‵kau atu ei te kāiga ki te ‵kaiga fakamanatu i Sailo. Ne ‵pau a te mea tenei e pelā mo te ‵suki atu o se mea makaikai ki te foitino o Hana.​​—⁠1 Samuelu 1:​4-7.

¹⁷ Mafaufau la ki te kufaki o Tavita ona ko te loto masei o te tamana o tena avaga, ko te Tupu ko Saulo, ki a ia. Ko te mea ke sao a ia, ne faimālō a Tavita ke nofo atu i ana i te togāvao o En-gedi, telā ne ‵tau o kake aka i koga ma‵luga kae fakama‵taku. A te faiga sē fakamaoni tenā se mea fakafanoanoa ki a ia me ne seki fai ne ia se mea masei ki a Saulo. Ne ola fakaeteete faeloa a Tavita i se fia tausaga​​—⁠ona fua ko te loto masei o Saulo.​​—⁠1 Samuelu 24:​14, 15; Faataoto 27:⁠4.

¹⁸ Mafaufau ki te fakalavelave faka-te-kāiga telā ne oko atu ki te pelofeta ko Hosea. Ne mulilua tena avaga. Ne fai tena finalalolagi mo fai se mea fakalogo‵mae ki tena loto. Kae ne sili atu tena logo‵mae i te taimi ne fanau mai ei ne tou fafine a tamaliki fua‵taka e tokolua ona ko tena finalalolagi!​​—⁠Hosea 1:​2-9.

¹⁹ A te suā mea fakalogo‵mae ki te foitino ko fakasauāga. Mafaufau ki te mea ne tupu ki te pelofeta ko Mikaio. A te lavea atu o te Tupu masei ko Aapo ko fakatamilogina ne pelofeta ‵loi kae ne talitonu foki a Aapo ki olotou ‵loi, ne fakalogo‵mae atu ki a Mikaio, telā ne amiotonu. Kae i te taimi ne fai atu ei a Mikaio ki a Aapo me i pelofeta katoa konā e “‵loi” atu ki a ia, ne a mea ne fai ne te takitaki o tino faitogafiti konā? Ne “fanatu ki a Mikaio o ‵pa ona mata”! E sili atu i te matagā, ko faifaiga a Aapo i te taimi ne fakailoa mai ne Ieova me ka malaia eiloa te lotou taumafaiga ke taua atu ki Lamota. Ne fakatonu atu a Aapo ke ‵pei atu a Mikaio ki te falepuipui kae ke fakamu‵tana ifo ana meakai. (1 Tupu 22:​6, 9, 15-17, 23-28) Masaua foki la te mea ne tupu ki a Ielemia mo faifaiga ne fai atu ne tino tatino kae fakasauā ki a ia.​​—⁠Ielemia 20:​1-9.

²⁰ A te galo atu o se tino pele ko te suā tulaga fakafanoanoa telā e mafai o fakalogo‵mae atu ki se tino. Ne ‵tau o kufaki a Naomi i te galo atu o tena avaga mo ana tama tāgata e tokolua i te mate. E tiga eiloa koi logo‵mae a ia i tulaga fakafanoanoa konā, ne toe foki atu tou fafine ki Peteleema. Ne fai atu a ia ki ana taugasoa, ke se toe ka‵laga atu ki tena igoa, ko Naomi, kae ko Mala, se igoa telā e fakaasi atu ei tena tulaga fakafanoanoa. Fakamuli loa, ne fakamanuia ne Ieova tena kufaki ki se mokopuna tagata telā ne vau i ei te gafa o te Mesia.​​—⁠Luta 1:​3-5, 19-​21; 4:​13-​17; Mataio 1:​1, 5.

²¹ Mafaufau foki ki te poi o Iopu i te taimi ne logo ei a ia i te ‵mate fakapoi o ana tama pele e toko sefulu, e pelā foki mo te galo atu o ana manu katoa mo ana tavini. Ne galo fakavave atu ei ana mea kātoa! Kae i te taimi koi māfatia ei a Iopu i tulaga fakafanoanoa konei, ne fakaoko atu ne Satani se masaki ki a ia. Kāti ne mafaufau a Iopu me ka mate a ia ona ko te masaki fakatakalialia tenei. Ne logo‵mae malosi a ia telā ne fia mate ei ke maua ne ia se fakatapūga ki ei.​​—⁠Iopu 1:​13-20; 2:​7, 8.

²² E se gata fua i mea katoa konei, ne fanatu tena avaga i tena fanoanoa mo te kaitaua, kae tagi atu, penei: “Ai a se na muna masei ei ne koe te Atua ko mate ei koe?” Ko oko eiloa i te fakalogo‵mae atu o te mea tenei ki tena foitino ‵mae! I tafa i ei, i lō te fakamafanafana atu ki a ia, ne taku fakamasei ne taugasoa e tokotolu o Iopu a ia ki fakamasakoga ‵se, kae ‵losi atu me ne fai ne ia se agasala ‵funa kae tenā te pogai o tena malaia. Ne momea aka te fakalogo‵mae atu o olotou fakamatalaga ‵se ki a ia. Masaua foki, me ne seki iloa ne Iopu te pogai ne ‵tupu ei a mea konei ki a ia; kae ne seki iloa foki ne ia me ka tumau a ia i te ola. Kae “e ui eiloa i mea katoa kola ne tupu, ka ko Iopu e seki agasala eiloa o lou me ko te Aliki e pogai ei a mea kona ne tupu.” (Iopu 1:22; 2:​9, 10; 3:3; 14:13; 30:17) E tiga eiloa ne oko atu a mea fakalogo‵mae e uke ki a ia i te taimi e tasi, ne seki fakagata aka ne tou tagata tena fakamaoni. Ko tafaga la te fakamalosi mai!

²³ E uke atu a nisi fakaakoakoga ‵lei i tafa o fakaakoakoga konei mai mua. E uke atu a nisi tala i te Tusi Tapu. Ne ‵tau o fakafesagai atu a tavini fakamaoni katoa konei ki mea kolā ne fakalogo‵mae atu ki a latou. Kae ko oko eiloa i te uke o vaegā fakalavelave kese‵kese ne fe‵paki mo latou! Kae ne isi eiloa se mea ne ‵pau ei latou katoa. E seai eiloa se tino ne fakagata tena taviniga ki a Ieova. Faitalia olotou tofotofoga fakafi‵ta, ne manumalo latou i a Satani ona ko te malosi ne tuku atu ne Ieova ki a latou. E pefea la? Ka tali mai ne te suā mataupu a te fesili tenei kae ka fakaasi mai ei te auala e mafai o fakafesagai atu tatou ki so se mea fakalogo‵mae ki ‵tou foitino.

[Fakamatalaga mai lalo]

Ka Tali Mai Pefea ne Koe?

• Kaia e mafai ei o faka‵pau a fakalavelave e fe‵paki mo tatou ki te logo‵mae o te foitino?

• Ne a nisi logo‵maega kolā ne ‵tau o kufaki i ei a Mefiposeta mo Neemia?

• Mai i fakaakoakoga i te Tusi Tapu o tāgata mo fāfine kolā ne kufaki i logo‵maega kese‵kese o te foitino, i ai a tala e otia malosi tou loto i ei, kae kaia?

[Fesili mo te Sukesukega]

1. Ne a nisi fakalavelave e fe‵paki mo tino i aso nei?

2, 3. Se a te kilokiloga sē aogā e mafai o iku mai ona ko fakalavelave kolā e fakalogo‵mae atu ki tino, kae e fakamataku pefea te kilokiloga tenā?

4, 5. I nisi taimi, e aofia pefea a Satani i ‵tou fakalavelave, kae se a te mea telā e ‵tau o tali‵tonu tatou ki ei?

6. Se a te mea ne fakauiga ki ei a Paulo i ana pati e uiga ki “te logo‵mae o te foitino,” kae se a te mea fakalogo‵mae tenā ki a ia?

7, 8. (a) Se a te mea e fakaasi mai ne te tugāpati ko te “kini”? (e) Kaia e tāua ei ke fakafesagai atu tatou ki so se mea telā e fakalogo‵mae mai ki a tatou nei?

9, 10. (a) Ne logo‵mae pefea te foitino o Mefiposeta? (e) Se a te uiga atafai ne fakaasi atu ne te Tupu ko Tavita ki a Mefiposeta, kae e fakaakoako atu pefea tatou ki a Tavita?

11. Se a te losiga ‵se ne fai atu ne Sipa e uiga ki a Mefiposeta, kae e iloa pefea ne tatou me ne loi a ia? (Onoono ki te fakamatalaga mai lalo i te palakalafa.)

12. Ne pefea a faifaiga a Mefiposeta ki te tulaga tenā, kae e fai pefea a ia mo fai se fakaakoakoga ‵lei ki a tatou?

13, 14. Ne a logo‵maega ne ‵tau o kufaki i ei a Neemia i te taimi ne foki atu ei a ia o toe ati aka a ‵pui o Ielusalema?

15. Ne a fakalavelave i va o tino Iutaia ne fakalogo‵mae malosi atu ki a Neemia?

16-18. Ne fakalogo‵mae atu pefea a fakalavelave faka-te-kāiga ki a Isaako mo Lepeka, Hana, Tavita, mo Hosea?

19. Se a te fakasauāga ne fakalogo‵mae atu ki te pelofeta ko Mikaio?

20. Ne a logo‵maega ne ‵tau o kufaki i ei a Naomi, kae ne taui atu pefea ki tou fafine?

21, 22. Ne logo‵mae pefea a Iopu i te ‵galo atu o ana mea, kae ne saga atu pefea a ia ki ei?

23. Kaia ne mafai ei ne tino fakamaoni kolā ne sau‵tala tatou ki ei o kufaki i logo‵maega kese‵kese o te foitino?

[Ata i te itulau e 7]

Ne ‵tau o fakafesagai atu a Mefiposeta ki tena masaki, pati fatufatu mo te fanoanoa

[Ata i te itulau e 8]

Ne tumau a Neemia faitalia a ‵tekemaiga