E Aogā a Tulafono a te Atua mō Tatou

“Au ko oko eiloa i te fiafia ki au tulafono!”​—SALAMO 119:⁠97.

KO SE fakatāua malosi ne tino a te fakalogo ki tulafono a te Atua i aso nei. E foliga mai ki tino e tokouke, me e seai se aogā o te fakalogo ki se tino maluga telā e se matea ki mata. E ola tatou i se vaitaimi telā e mafuli‵fuli ei a kilokiloga a tino ki amioga ‵mā, te ‵fuli fakakōtua o te mea tonu mo te mea ‵se, mo te fakalotolotolua ki tulaga ‵lei mo tulaga ma‵sei. (Faataoto 17:15; Isaia 5:20) Ne fakaasi mai ne se sukesukega fakamuli nei, se mafaufauga e tasi telā e masani ki ei a fenua mau‵mea e uke me i te “tokoukega o tino Amelika e ma‵nako o fakaiku aka ne latou i a latou eiloa a te mea tonu, te mea ‵lei, mo te mea aogā.” E fakaiku aka ne latou me “e se fakasala ne te Atua a tino. E seai ne tulafono mautinoa. E se ma‵nako latou ki tino pule ma‵luga kolā e fakatāua ne latou a amioga ‵lei io me ko nisi mea aka foki penā.” Ne fai mai se tagata poto e tokotasi me “e ‵tau mo tino o fakaiku aka ne latou eiloa a mea kolā e iku atu ki se olaga ‵lei kae ‵mā.” Ne toe fai mai a ia, penei: “So se vaegā pulega maluga e ‵tau o fakafetaui aka ana fakatonuga ki manakoga o ana tino.”

² Ona ko te tokouke o tino e fakafesili aka ne latou te tāua o tulafono a Ieova, e ‵tau o fakamalosi aka ne tatou ‵tou loto tali‵tonu me e aogā a tulafono a te Atua ki a tatou. Se mea gali ke mafaufau ki te tala i te Tusi Tapu telā ne taku muamua mai i ei a te pati ko te tulafono. I te Kenese 26:​5, ne folafola mai a te Atua, penei: “Apelaamo ne fakalogo kae tausi ki aku tulafono mo fakatonuga katoa.” Ne fai a pati konā i te fia o senitenali ko ‵teka a koi tuai o tuku atu ne Ieova se fakasologa likiliki o tulafono ki te fanauga a Apelaamo. Ne taui atu pefea ne te Atua a te fakalogo o Apelaamo, e aofia i ei te fakalogo ki Ana tulafono? Ne folafola atu a Ieova te Atua ki a ia, penei: “Ke fakamanuia atu a latou [“ko atufenua katoa i te lalolagi,” NW] e pela mo te fakamanuiaga ne au a tou gafa.” (Kenese 22:18) E iku atu a te fakalogo ki tulafono a te Atua ki te mauaga o te fakamanuiaga mo te taliaga a te Atua.

³ E tokotasi te faisalamo​​—⁠kāti se pelenise o Iuta mo se tino telā ka fai mo tupu i aso mai mua​​—⁠ne fakaasi mai ana lagonaga e uiga ki te tulafono, kae ne taku ‵tonu atu a ia ki te Atua, penei: “Au ko oko eiloa i te fiafia ki au tulafono!” (Salamo 119:97) A te mea tenei e seai se lagonaga fua kae se fakaasiga o te fiafia ki te faiga o te loto o te Atua telā e fakaasi mai i tena tulafono. Ne penā foki a lagonaga o Iesu Keliso, te Tama ‵lei katoatoa a te Atua. Ne fakamatala mai ne te valoaga a pati a Iesu konei: “Toku Atua, e fiafia au o fai tou loto! E tausi ne au au akoakoga i toku loto.” (Salamo 40:8; Epelu 10:⁠9) Kae e a tatou? E mata, e fia‵fia tatou o fai te loto o te Atua? E mata, e tali‵tonu tatou ki te aogā mo te tāua o tulafono a Ieova? Se a te tulaga o te fakalogo ki tulafono a te Atua i te ‵tou tapuakiga, i ‵tou olaga i aso katoa, i ‵tou fakaikuga, mo ‵tou fesokotakiga mo nisi tino? Ke fia‵fia tatou ki tulafono a te Atua, se mea ‵lei ke malamalama tatou i te pogai e ‵tau ei o fai ne te Atua a tulafono kae fakasala a tino kolā e se faka‵logo ki ei.

E ‵Tau o Fai ne Ieova a Tulafono

⁴ Ko Ieova fua tokotasi i te lagi mo te lalolagi e ‵tau o tuku mai ne ia a Tulafono ona ko te mea ne faite ne Ia tatou. (Fakaasiga 4:11) Ne fai mai a te pelofeta ko Isaia, penei: ‘A Ieova ko te ‵tou Pule,’ telā e tuku mai ne ia a tulafono. (Isaia 33:22) Ne tuku mai ne ia a tulafono ke takitaki ei a mea ola mo mea sē ola kolā ne faite ne ia. (Iopu 38:​4-38; 39:​1-12; Salamo 104:​5-19) Ona ko te mea ne faite ne te Atua a tino, e ‵tau o faka‵logo latou ki tulafono a Ieova. E tiga eiloa ne faite a tino mo te saolotoga ke fai a filifiliga, kae e ‵kafi foki ne latou o fai a mea i se auala tonu kae aogā, e mafai fua o fia‵fia latou māfai e faka‵logo latou ki tulafono ‵ma kae aogā mō te tapuakiga.​​—⁠Loma 12:1; 1 Kolinito 2:​14-16.

⁵ E iloa ne tatou me e se ‵tau o sōna ofa valevale ne tatou a tulafono a Ieova e uiga ki te lalolagi. (Ielemia 33:​20, 21) Kafai e se tautali tonu se tino ki nisi tulafono e uiga ki te lalolagi, e pelā mo te eva ifo ki lalo mai se koga maluga, ka pakia a ia i ei. E se mafai o ‵fuli a tulafono a te Atua e uiga ki amioga ‵mā, kae e se mafai foki o fakasekeseke io me ofa ana tulafono e aunoa mo se fakasalaga. E tiga eiloa e se maua vave a ikuga ma‵sei, e isi eiloa ne ikuga ma‵sei e mafai o oko atu ki se tino māfai e se fakalogo ki tulafono i mea tau amioga e pelā mo tulafono e uiga ki te lalolagi. “E seai se tino e mafai ne ia o fakavalea a te Atua. E tau ne te tino a te fuaga ne toki ne ia.”​​—⁠Kalatia 6:7; 1 Timoteo 5:⁠24.

Mea Kolā e Aofia i Tulafono a Ieova

⁶ E fakaasi mai i se auala gali a tulafono a te Atua i te Tulafono a Mose. (Loma 7:12) Fakamuli ifo, ne sui ne Ieova te Atua a te Tulafono a Mose ki “te tulafono a Keliso.”a (Kalatia 6:2; 1 Kolinito 9:21) E pelā me ne Kelisiano kolā e ‵nofo mai lalo i “te tulafono o te saolotoga,” e malamalama tatou me e se fai fua ne te Atua a tulafono e uiga ki nisi vaega o ‵tou olaga, e pelā mo talitonuga fakavae mo faifaiga faka-te-lotu. E aogā ana tulafono ki feitu katoa o te olaga, telā e aofia i ei te olaga faka-te-kāiga, faifaiga fakapisinisi, amioga i va o tāgata mo fāfine, kilokiloga ki taina Kelisiano, mo te kau atu ki te tapuakiga tonu.​​—⁠Iakopo 1:​25, 27.

⁷ E pelā me se fakaakoakoga, e fai mai te Tusi Tapu, penei: “A latou kola e amio masei; io me kola e tapuaki ki tupua, io me kola e mulilua, io me kola e amio fakasotoma, io me kola e faomea, io me kola e kaiu, io me kola e ko‵na sale, io me kola e fatufatu tino, io me kola e ofa tulafono; e seai eiloa se tino o latou e talia ne ia te Atua ke fai mo olotou tupu.” (1 Kolinito 6:​9, 10) E tonu, a te mulilua mo te finalalolagi e se ko “te fia‵fai” fua. A faifaiga fakasotoma e se ko te “isi auala ‵lei fua ke ola ei a tino.” A mea konei e ‵teke atu ki te tulafono a Ieova. Kae e penā foki loa mo te kaisoa, te pati loi, mo te gutu fatufatu. (Salamo 101:5; Kolose 3:9; 1 Petelu 4:15) Ne taku fakamasei ne Iakopo a te fakamatamata, kae ne fakamalosi mai a Paulo ki a tatou ke ‵kalo keatea mai pati va‵lea mo pati ma‵sei. (Efeso 5:4; Iakopo 4:16) E ‵kilo atu a Kelisiano ki tulafono katoa konei i mea tau amioga e pelā me ne vaega katoa o te tulafono ‵lei katoatoa a te Atua.​​—⁠Salamo 19:⁠7.

⁸ A vaegā tulafono fakavae penā i te Muna a Ieova e fakaasi mai i ei me i ana tulafono e sili atu i lō so se fakasologa o tulafono likiliki kae ‵mautakitaki. E maua i ei te fakavae mō se olaga paleni kae aogā me e fakamalosi aka i ei te faiga o amioga ‵mā katoa kolā e aogā. A tulafono a te Atua e fakamalosi mai, e ‵lei, kae aogā foki. (Salamo 119:72) A te pati “tulafono” telā ne fakaaogā ne te faisalamo ne ‵fuli mai te pati Epelu ko te toh·rahʹ. E fai mai se tino poto e tokotasi i te Tusi Tapu, penei: “E māfua mai te pati tenei i te veape telā e fakauiga ke takitaki, ke puipui, ke fakamoemoe, ke kilo tonu atu ki mua. E fakauiga i ei ki se tulafono i mea tau amioga.” E fai a te tulafono pelā me se meaalofa mai te Atua ki te faisalamo. E mata, e se ‵tau o fakatāua ne tatou a te tulafono tenā i se auala tai ‵pau, mai te taliaga ke pule mai te tulafono tenā ki ‵tou olaga?

⁹ E manakogina ne mea katoa ne faite a takitakiga ‵lei mo te puipuiga telā e fakatalitonugina. E penā foki a Iesu mo nisi agelu kolā e ma‵luga atu i tino. (Salamo 8:5; Ioane 5:30; 6:38; Epelu 2:7; Fakaasiga 22:​8, 9) Kafai e mafai o maua ne agelu ‵lei katoatoa konei a mea aogā mai te puipuiga a te Atua, ko sili fakafia atu ei te aogā o te mea tenā mō tino sē ‵lei katoatoa! Ko oti ne fakamaoni mai ne tala fakasolopito mo mea ne ‵tupu ki a tatou a te ‵tonu o te kilokiloga a te pelofeta ko Ielemia: “Te Aliki [ko Ieova], e iloa ne au me e seai se tino e pule i tena ikuga; e seai se tino e pule i tena ola.”​—⁠Ielemia 10:⁠23.

¹⁰ Kafai e ma‵nako tatou ke maua se olaga fakafiafia kae manuia, e ‵tau o fakalago‵lago tatou ki te takitakiga a te Atua. Ne iloa ne te Tupu ko Solomona a te fakamataku o te faiga o tulafono totino ko te mea ke ola i se olaga telā e tu tokotasi mai te takitakiga a te Atua: “A te auala tela ne mafaufau koe pela me ko te auala tonu, e mafai o faka‵se ne ia koe kae taki ne ia koe ki te mate.”​​—⁠Faataoto 14:⁠12.

Pogai ke Fakatāua ei a te Tulafono a Ieova

¹¹ Se mea ‵lei ke fakamalosi aka ne tatou se manakoga ‵loto ke malamalama i tulafono a Ieova. Ne fakaasi mai ne te faisalamo se vaegā manakoga penā i te taimi ne fai mai tou tagata penei: “Faka‵pula aka oku mata, ko te mea ke iloa ne au te tonu mo te fakaofoofogina o au tulafono.” (Salamo 119:18) Ko te momea aka o ‵tou iloaga e uiga ki te Atua mo ana auala, ko te momea aka foki o ‵tou malamalama i te munatonu e uiga ki pati a Isaia, konei: “Au ko [Ieova] te otou Atua, tela e manako o akoako koutou ke lei koutou kae fakatonutonu foki koutou i te auala e tau o olo koutou i ei. Moi ne fakalogo mai eiloa koutou ki aku fakatonuga.” (Isaia 48:​17, 18) E manako eiloa a Ieova ke ‵kalo keatea ana tino mai fakalavelave kae ke maua se olaga fakafiafia mai te faka‵logo ki ana fakatonuga. Ke na iloilo aka ne tatou a nisi pogai tāua e ‵tau ei o fakatāua ne tatou a te tulafono a te Atua.

¹² E aumai te tulafono mai te Atua telā e iloa ‵lei ne ia tatou. Se mea tonu me e masani faka‵lei a Ieova mo tino ona ko te mea ne faite ne Ia tatou. (Salamo 139:​1, 2; Galuega 17:​24-28) E se mafai o iloa ‵lei ne taugasoa ‵pili, kāiga, ke oko foki eiloa ki mātua a tatou e pelā mo te mea e iloa ne Ieova e uiga ki a tatou. E uke atu a mea e iloa ne te Atua e uiga ki a tatou i lō tatou! E seai se tino e ‵pau tena iloa mo te iloa o te Atua e uiga ki ‵tou manakoga i te feitu faka-te-agaga, te feitu tau lagonaga, feitu faka-te-mafaufau, mo te feitu faka-te-foitino. Kafai e saga mai a ia ki a tatou, e fakaasi mai ne ia se loto malamalama ki ‵tou uiga totino, ‵tou manakoga, mo ‵tou fakamoemoega. E malamalama a Ieova i mea kolā e se mafai ne tatou o fai, kae e iloa foki ne ia a mea ‵lei kolā e ‵kafi ne tatou o fai. E fai mai te faisalamo, penei: “E iloa ne ia a te mea ne faite ki ei tatou, e manatua foki ne ia i a tatou ne pefu.” (Salamo 103:14) Tela la, e mafai eiloa o tokagamalie tatou i te feitu faka-te-agaga māfai e sa‵sale tatou i ana auala, mai te faka‵logo mo te fia‵fia ki te takitakiga a te Atua.​​—⁠Faataoto 3:​19-26.

¹³ E aumai te tulafono mai te Atua telā e alofa mai ki a tatou. E manako malosi te Atua ke maua ne tatou se olaga ‵lei ki te se-gata-mai. E mata, e se faigata ki a ia ke tuku mai tena Tama ‘e pelā me se taulaga mō tino e tokouke’? (Mataio 20:28) E mata, e seki tauto mai a Ieova me ka ‘se mafai foki o talia ne ia ke fakaosoosogina tatou ke sili atu i te ‵tou malosi o ‵teke te fakaosoosoga’? (1 Kolinito 10:13) E mata, e se fakatalitonu mai te Tusi Tapu me ‘e atafai mai a ia ki a tatou’? (1 Petelu 5:⁠7) E seai eiloa se tino e sili atu tena saga mai mo te alofa i te tukumaiga o fakatakitakiga aogā mō tino i lō Ieova. E iloa ne ia te mea ‵lei mō tatou mo te ‵kese foki o mea kolā e aumai ei te fiafia mo mea kolā e aumai ei te fanoanoa. E tiga eiloa e se ‵lei katoatoa tatou kae fai foki a mea ‵se, kafai e kausaki tatou ki te amiotonu, e fakaasi mai eiloa tena alofa mō tatou i auala kolā ka iku atu i ei ki te ola mo fakamanuiaga.​​—⁠Esekielu 33:⁠11.

¹⁴ E se mafulifuli a te tulafono a te Atua. I taimi o fakalavelave kolā e ola i ei tatou, a Ieova e tumau kae ‵mautakitaki, me e ola a ia mai te se-gata-mai ki te se-gata-mai. (Salamo 90:⁠2) Ne fai mai a ia e uiga ki a ia eiloa: “Au ko [Ieova], kae e se mafai eiloa au o mafuli.” (Malaki 3:⁠6) E fakatuagagina katoatoa a fakatakitakiga a te Atua kolā e fakamau i loto i te Tusi Tapu​​—⁠e se pelā mo manatu o tino kolā e mafuli‵fuli vave. (Iakopo 1:17) Ne fakamalosi aka ne tokitā o te mafaufau i te fia o tausaga a te manatu ke se ‵kini a tama‵liki, kae fakamuli ifo, ne ‵fuli ne nisi tokitā olotou mafaufau kae taku ‵tonu mai me i te lotou fautuaga mua se mea ‵se fua. Ne fai valevale fua a fakatakitakiga mo fakatonutonuga a te lalolagi e pelā me e agiagi fua ne te matagi. Kae e se mafai o ‵fuli a te Muna a Ieova. Ko oti ne tuku mai ne te Tusi Tapu a pati fakatonutonu ki te putiakaga o tama‵liki mo te alofa. Ne tusi mai a te apositolo ko Paulo, penei: “A koutou e tamana, sa fakaitaitagina otou tamaliki, kae ke puti ake i te olaga ‵lei mo akoakoga faka-Kelisiano.” (Efeso 6:⁠4) Ko oko eiloa i te fakamafanafana mai ke iloa atu me e mafai o fakalago‵lago atu tatou ki fakatakitakiga a Ieova; me ka se mafai eiloa o ‵fuli!

Fakamanuiaga mō Tino Kolā e Faka‵logo ki Tulafono a te Atua

¹⁵ E auala i tena pelofeta ko Isaia, ne fai mai te Atua, penei: “E pena foki te muna tela e faipati ne au . . . e fai eiloa ne ia a mea kola ne fai ne au ki ei ke fano o fai.” (Isaia 55:11) Kafai e taumafai tatou mo te loto finafinau ke tau‵tali atu ki fakatakitakiga kolā e maua i tena Muna, ka manuia tatou, ka fai a mea aogā, kae ka maua foki ne tatou te fiafia.

¹⁶ Mafaufau ki te ‵lei o tulafono a te Atua i te faiga o se kāiga ke fia‵fia. “E ‵tau o faka‵malu ne tino katoa a te fakaipoipoga,” ne tusi mai a Paulo, “ka ko tauavaga e ‵tau o fakatau a‵lofa. E fakamasino ne te Atua a latou kola e fina lalolagi, pela foki mo latou kola e mulilua.” (Epelu 13:⁠4) E ‵tau o fakatau āva kae fakatau a‵lofa te tauavaga: “E ‵tau mo tagata katoa o a‵lofa ki olotou avaga, e pela eiloa mo te lotou a‵lofa ki a latou eiloa, kae e ‵tau foki i fafine o ava ki olotou avaga.” (Efeso 5:33) A te vaegā alofa telā e manakogina e fakamatala mai i te 1 Kolinito 13:​4-8: “A te alofa, e kufaki kae kaimalie; e se kaisano io me fakamatamata; e se amio masei io me se ava. A te alofa e se ‵sala ana mea i a ia eiloa; e se kaitaua vave io me e fakamasausau ne ia a mea ‵se a se tino; e se fiafia ki mea masei kae fiafia ki te mea ‵lei. A te alofa e fakamalosi ne ia mea katoa, e talitonu ki mea katoa, e fakamoemoe ki mea katoa, e kufaki ki mea katoa. E se mafai o gata a te alofa.” A te fakaipoipoga telā e fakavae ki luga i te vaegā alofa tenei ka se mafai eiloa o fakamaofagina.

¹⁷ A te suā fakamaoniga me e aogā a fakatakitakiga a Ieova, ko te manatu me e taku fakamasei ne ia a te konā. E se talia foki ne ia a te “inu malosi ki uaina.” (1 Timoteo 3:​3, 8; Loma 13:13) E tokouke a tino kolā e se fia ‵saga atu ki fakatakitakiga a te Atua e logo‵mae i masaki kolā ne māfua mai i te inu malosi ki uaina. A te sē fia saga atu ki pati fakatonutonu a te Tusi Tapu e uiga ki te inu malie, ne iku atu ei a nisi tino ki te manatu me e ‵lei ke inu malosi ko te mea “ke fesoasoani atu ki a latou ke malō‵lō faka‵lei.” E uke ‵ki eiloa a fakalavelave kolā e iku mai i te inu malosi, e aofia i ei a te sē āva o tino ki a koe, fakamasei ei a fesokotakiga i te kāiga io me e fakamavae‵vae ei a kāiga, e fakamāumāu tupe, kae e mafai o galo atu i ei se galuega. (Faataoto 23:​19-21, 29-35) E mata, e se fai a fakatakitakiga a Ieova e uiga ki te fakaaogāga o meainu ma‵losi mo fai se puipuiga?

¹⁸ Ko oti foki ne fakamaoni aka te aogā o fakatakitakiga a te Atua i mea tau tupe. E fakamalosi mai te Tusi Tapu ki Kelisiano ke fakamaoni kae ke ga‵lue malosi foki. (Luka 16:10; Efeso 4:28; Kolose 3:23) Ona ko te mea e tau‵tali atu latou ki fakatonutonuga konei, ko oti ne siki aka a Kelisiano e tokouke ki tulaga tai ma‵luga atu io me ne tumau i olotou galuega i taimi ne faka‵tea ei a nisi tino. E mafai o ‵teu a tupe māfai e ‵kalo keatea se tino mai faifaiga kolā e ‵teke atu ki ei te Tusi Tapu mo mea kolā e fakavale‵vale ki ei e pelā mo te kemupolo, te ‵pusi, mo te fakaaogāga o vailakau tapu. E seai se fakalotolotolua me e mafai eiloa o mafaufau koe ki nisi fakaakoakoga o fakatakitakiga a te Atua kolā e iku atu ki te sē fakamāumāu o tupe.

¹⁹ E faigofie fua ki tino sē ‵lei katoatoa ke se faka‵logo ki tulafono mo fakatakitakiga a te Atua. Mafaufau ki te kau Isalaelu i te Mauga o Sinai. Ne fai atu te Atua ki a latou: “Kafai e faka‵logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi katoa e o oku, ka ko koutou ko oku tino filifilia.” Ne tali atu latou, penei: “Ka fai ne matou a mea katoa kola ne faipati mai ei te Aliki [ko Ieova].” Kae e ‵kese ‵ki te auala ne filifili aka ne latou ke tau‵tali atu ki ei! (Esoto 19:​5, 8; Salamo 106:​12-43) I lō te fai penā, ke na talia kae puke ‵mau tatou ki fakatakitakiga a te Atua.

²⁰ A te auala ke maua ei te poto mo te fiafia ko te puke ‵mau ki tulafono tafasili i te tāua kolā ne tuku mai ne Ieova ke takitaki ‵tou olaga. (Salamo 19:​7-11) Ko te mea ke manuia te faiga o te mea tenei, e ‵tau foki o malamalama tatou i te tāua o fakatakitakiga mai te Atua. Tenei eiloa te mataupu ka fai i te suā mataupu.

[Fakamatalaga mai lalo]

E Masaua ne Koe?

• Kaia e mafai ei o tali‵tonu tatou me i tulafono a te Atua e aogā ki a tatou?

• Ne a pogai e ‵tau ei o fakatāua ne tatou a tulafono a Ieova?

• E aogā pefea a tulafono a te Atua?

[Fesili mo te Sukesukega]

1. Se a te kilokiloga masani a tino ki te fakalogo ki tulafono a te Atua?

2. E fetaui pefea te ‵takumaiga muamua o te pati ko te tulafono i te Tusi Tapu mo fakamanuiaga mo te taliaga mai te Atua?

3. (a) Se a te lagonaga ne fakaasi mai ne te faisalamo ki te tulafono a Ieova? (e) Ne a fesili e ‵tau o ‵saga atu tatou ki ei?

4. Kaia e ‵tau ei o tuku mai ne Ieova a Tulafono?

5. E pefea te ‵tonu o te akoakoga fakavae i te Kalatia 6:7 e uiga ki tulafono a te Atua?

6. Ne a mea e aofia i tulafono a te Atua?

7. Tuku mai ne fakaakoakoga e uiga ki tulafono tāua a te Atua.

8. (a) A tulafono a Ieova ne vaegā tulafono pefea? (e) Se a te uiga fakavae o te pati Epelu mō te “tulafono”?

9, 10. (a) Kaia e ‵tau ei o maua ne tatou a te takitakiga telā e fakatalitonugina? (e) E mafai pefea o maua ne tatou se olaga fakafiafia kae manuia?

11. Kaia e ‵tau ei o fia malamalama tatou i tulafono a te Atua?

12. Kaia e fai ei a Ieova mo fai te ‵toe Tino ‵lei ke tuku mai ne ia te tulafono ona ko tena iloaga e uiga ki a tatou?

13. Kaia e mafai ei o tali‵tonu tatou me e manako a Ieova ke maua ne tatou se olaga ‵lei?

14. Se a te auala tāua telā e ‵kese ei a te tulafono a te Atua mai manatu o tino?

15, 16. (a) Ne a mea ka iku mai māfai e fakagalue aka ne tatou a fakatakitakiga a Ieova? (e) E mafai pefea o aogā a tulafono a te Atua ki te fakaipoipoga?

17. Ne a mea aogā e maua mai te fakagaluegāga o fakatakitakiga a Ieova ki te fakaaogāga o meainu ma‵losi?

18. E mata, e aogā a tulafono a te Atua i mea tau tupe? Ke fakamatala mai.

19, 20. Kaia e ‵lei ei ke talia kae puke ‵mautakitaki ki tulafono a te Atua?

[Ata i te itulau e 9]

Ne fakamanuia malosi a Apelaamo me ne fakalogo a ia ki tulafono a Ieova

[Ata i te itulau e 11]

A te manavase ki fakalavelave o te olaga i aso nei e fai ei a tino ke se ‵saga atu ki tulafono a te Atua

[Ata i te itulau e 13]

E tumau a te tulafono a te Atua kae e se mafulifuli e pelā me se fale i luga i te kaupapa telā e maina atu i ei te moli