Ne Faka‵mā a Tino ke Fai ne Latou a Mea ‵Lei
“Ke faka‵ma la tatou mai feitu kola e fakamasei ne latou te foitino mo te agaga, ka ke ola tatou i te olaga tapu katoatoa mo te mataku ki te Atua.”—2 KOLINITO 7:1.
“KO OI te tino e tau o fanatu ki te mauga o te Aliki [ko Ieova]? Ko oi te tino e taga o ulu ki tena Faletapu?” Ne fakasae aka ne te tupu o Isalaelu mua ko Tavita a te fesili gali tenā e uiga ki te tapuakiga telā e talia ne Ieova. Ne toe tuku mai fakamuli ne ia te tali, penei: “Ko latou kola e loto ‵ma kae fai mea tonu; e se tapuaki ki tupua, e se tau‵to fakaloiloi foki.” (Salamo 24:3, 4) Ke talia ne Ieova, telā e ‵malu, se tino, e ‵tau mo te tino o ‵mā kae ‵malu. A koi tuai o fai atu ne Tavita a pati mai luga nei, ne fakamasaua atu a Ieova ki te fakapotopotoga o Isalaelu, penei: “Faka‵malu ki otou foitino, me i a au, te Aliki te otou Atua e malu.”—Levitiko 11:44, 45; 19:2.
2 I te fia selau tausaga fakamuli ifo, ne tusi atu ei a te apositolo ko Paulo ki taina Kelisiano i te fa‵kai fai amioga matagā o Kolinito, penei: “Taina fagasele, ona ko te mea ko maua ne tatou a folafolaga a te Atua, ke faka‵ma la tatou mai feitu kola e fakamasei ne latou te foitino mo te agaga, ka ke ola tatou i te olaga tapu katoatoa mo te mataku ki te Atua.” (2 Kolinito 7:1) E toe faka‵mafa mai ne te mea tenei a te manatu me e ‵tau mo te tino o ‵mā kae se lailai kae fakamao keatea mai mea kolā e fakamasei ei te foitino mo te agaga ke maua ei se fesokotakiga ‵lei mo te Atua kae ke maua foki ana fakamanuiaga kolā ne folafola mai. Ne fai mai a te soko ko Iakopo i tena tusiatuga e uiga ki te tapuakiga telā e talia ne te Atua, penei: “Tenei te mea e taku ko te lotu mo te ‵lei i mua o te Atua te Tamana: ko te tausi koutou ki tamaliki ko ‵mate olotou matua, mo fafine ko ‵mate olotou avaga i olotou puapuaga, ke mo a foki ma pisia se tino i amioga se ‵lei faka te lalolagi.”—Iakopo 1:27.
3 Ona ko te tāua o te ‵mā, te tapu mo te se lailai i te tapuakiga tonu, so se tino telā e fia maua ne ia te taliaga a te Atua, e ‵tau o mafaufau ‵mafa ki te fakafetauiga o tena olaga ki mea konei. E ‵kese malosi a tulaga mo manatu o tino i aso nei e uiga ki te tu ma, kae e ‵tau eiloa o maina kae ‵fuli foki ‵tou olaga ke fetaui mo mea kolā e ‵mā kae talia ne Ieova. E ‵tau o ‵sala aka ne tatou a mea kolā e manako te Atua ke fai ne ana tino tapuaki i te feitu tenei mo mea ko oti ne fai ne ia ke fesoasoani atu ki a latou ke tumau i te ‵mā kae talia foki ne ia.—Salamo 119:9; Tanielu 12:10.
E Faka‵mā a Tino mō te Tapuakiga Tonu
4 E fakauiga ne te tokoukega o tino a te ‵mā ki te sē lailai. E fakaaogā ne te Tusi Tapu, a pati Epelu mo pati Eleni e uke kolā e fakamatala mai i ei a te ‵mā, telā e se fakauiga fua ki te ‵mā faka-te-foitino, kae aofia foki ei te ‵mā i mea tau amioga mo te ‵mā faka-te-agaga. Tela la, e fai mai se tusi telā e fakamatala i ei a te Tusi Tapu, penei: “A te ‘‵mā’ mo te ‘lailai’ ne tugāpati kolā e se fakauiga fua ki te ‵tu ‵mā, kae i te ukega o taimi e fakauiga ki manatu faka-te-lotu. E ‵tusa mo te fakamatalaga tenei, a te fakatakitakiga e uiga ki te ‘‵mā’ toeitiiti ko aogā ki feitu katoa o te olaga.”
5 A te ‵tonuga loa, ne aofia i te Tulafono faka-Mose a tulafono mo fakatonuga e uiga ki feitu katoa o te olaga o te kau Isalaelu, mea kolā ne ‵mā kae talia mo mea kolā ne seki fai penā. E pelā mo te Levitiko mataupu e 11 ki te 15, e maua ne tatou a fakatonuga liki‵liki e uiga ki te ‵mā mo te lailai. A nisi manu ne se ‵mā, kae ne seki ‵tau o ‵kai te kau Isalaelu ki ei. A te fanauga o se tamaliki ne fai ei se fafine ke se ‵mā mō se vaitaimi mautinoa. E fai foki ne masaki o te pakili, maise eiloa ko te lepela, mo sua kolā e ‵sali ifo mai foitino o te tagata mo te fafine, se tino ke se ‵mā. E taku ‵tonu mai foki ne te Tulafono a mea kolā e ‵tau o fai māfai ko lailai se tino. E pelā mo te Numela 5:2, e fai‵tau tatou, penei: “Fakatonu atu ki tino Isalaelu ke ave keatea mai loto i te fa‵kai a tino kola e maua ne te lepela, mo tino kola e isi se sua e vau mai loto i olotou foitino, pela foki mo tino ne pa‵tele ki foitino o tino mate.”
6 E seai se fakalotolotolua me i tulafono konei mo nisi tulafono mai i a Ieova, ko leva ne fakaasi mai i ei a poto fakatokitā mo poto e uiga ki te foitino. Kae ne seki tuku mai fua a tulafono konei e pelā me se fakasologa o tulafono e uiga ki te ‵tu ‵mā io me ne fakatakitakiga fakatokitā. A mea konā ne vaega foki o te tapuakiga tonu. A te ‵tonuga loa, ne aofia a te olaga o tino i aso katoa i tulafono konā—e pelā mo te ‵kai, te fanaumaiga o se tamaliki, fesokotakiga i te fakaipoipoga, mo nisi mea aka foki penā—kae ne faka‵mafa mai i ei te manatu, me i a Ieova te lotou Atua, e isi sena malosi ke fakaiku aka me ne a mea ‵lei mo mea sē ‵lei i feitu katoa o olotou olaga kolā ko oti ne tuku katoatoa atu ne latou ki a Ieova.—Teutelonome 7:6; Salamo 135:4.
7 Ne puipui foki ne te feagaiga o te Tulafono a tino Isalaelu mai faifaiga matagā o atufenua i olotou tafa. Mai te faka‵logo mo te fakamaoni ki te Tulafono, e aofia i ei a mea katoa kolā e manakogina ke tumau i te ‵mā i mua o Ieova, ne talia ei te kau Isalaelu ke tavini atu ki te lotou Atua kae ke maua ana fakamanuiaga. Ne fai atu a Ieova ki te atufenua tenā e uiga ki te mea tenei: “Kafai e faka‵logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi katoa e o oku, ka ko koutou ko oku tino filifilia, ko tino kola ko tuku katoatoa mai olotou olaga ki a au, kae ka tavini mai koutou ki a au e pela mo ne faitaulaga.”—Esoto 19:5, 6; Teutelonome 26:19.
8 Ona ko te mea ne fakaasi mai ne Ieova a vaegā fakamatalaga penā i te Tulafono ke akoako ei te kau Isalaelu ki auala e ‵mā, e tapu, kae talia ei latou ne ia, se mea ‵lei mo Kelisiano i aso nei ke mafau‵fau faka‵lei ki te auala e fai ei ne latou a mea kolā e manakogina, i ne? E tiga eiloa e se ‵nofo a Kelisiano mai lalo i te Tulafono, e ‵tau o masaua ne latou a te fakamatalaga a Paulo me i mea katoa kolā ne fakaasi mai i te Tulafono “ne ata fua o mea ka oko mai, ka ko te mea tonu ko Keliso.” (Kolose 2:17; Epelu 10:1) Kafai e fai mai a Ieova me “e se mafai eiloa au o mafuli,” kae kilo atu a ia ki te ‵mā mo te sē lailai e pelā me ne vaega tāua i te tapuakiga tonu i te taimi tenā, e ‵tau foki o mafaufau ‵mafa tatou ki te tumau i te ‵mā faka-te-foitino, te ‵mā i mea tau amioga, mo te ‵mā faka-te-agaga māfai e ma‵nako tatou ki tena taliaga mo tena fakamanuiaga.—Malaki 3:6; Loma 15:4; 1 Kolinito 10:11, 31.
E Fakaasi Atu ne te ‵Mā Faka-te-Foitino me i a Tatou ko Tavini a te Atua
9 E mata, koi fai eiloa a te ‵mā faka-te-foitino mo fai se vaega tāua o te tapuakiga tonu? E tiga eiloa e se fai se tino ne te ‵mā faka-te-foitino mo fai se tino telā e tapuaki tonu ki te Atua, e mautinoa eiloa me se mea ‵lei ke ‵mā te tino tenā telā e tapuaki tonu i te feitu faka-te-foitino e ‵tusa mo ana fakanofonofoga. Kae maise eiloa i ‵tou aso nei, e laveagofie sāle a tino kolā e tausi olotou foitino, gatu io me ko tafāfale ke ‵mā ona ko te tokoukega o tino e se fia fai penā. E mafai o maua i te mea tenei a ikuga ‵lei, e pelā mo te mea ne fai atu ne Paulo ki Kelisiano i Kolinito: “E se loto matou o fai ne mea faigata ki mafaufauga o nisi tino, ke mo a e sae mai ei se mea masei i te motou galuega. Kae i mea katoa e fai ne matou, e fakaasi atu ei i a matou ko tavini a te Atua.”—2 Kolinito 6:3, 4.
10 Ne tavae atu faeloa a tino ma‵luga ki Molimau a Ieova ona ko te lotou tu ‵mā, olotou fakatokatokaga, amioga mo te āva, kolā ne lavea malosi atu i olotou fono ‵lasi. Ne fai mai te nusipepa ko te La Stampa e uiga ki se fono telā ne fai i te fa‵kai o Savona i Italia, penei: “A mea kolā ne fakaofoofogia i te taimi e sasale atu ei se tino i te koga tenā ko te ‵mā mo te tokagamalie o tino kolā e fakaaogā ne latou a fale konā.” Mai tua o te faiga o se fono a Molimau i te koga fai tafaoga i São Paulo, i Pasili, ne fai atu a te pule o te koga tenā ki te ofisa tausi o te kau ‵teu: “Mai te taimi nei o fano ki mua, e ma‵nako matou ke ‵teu te koga fai tafaoga i te auala telā ne fai ne Molimau a Ieova.” Ne fai mai a te suā ofisa i te koga foki tenā, penei: “Kafai e ma‵nako a Molimau a Ieova o fakaaogā te koga fai tafaoga tenei, e manava‵se fua matou ki aso e fai ei te lotou fono. E seai aka foki eiloa se mea e fakamanavase mai ki a matou.”
11 Kafai e māfua mai a tavaega ki te Atua telā e tapuaki atu tatou ki ei, ona ko te ‵mā mo te tokagamalie i te ‵tou koga tapuaki, ko tena uiga, e ‵pau eiloa te tāua ke fakaasi atu foki a uiga konei i ‵tou olaga totino. Kae, kāti e mafau‵fau tatou me e mafai o fai ne tatou so se mea telā e ma‵nako tatou ki ei i ‵tou fale. E isi eiloa se saolotoga o tatou ke filifili aka ki gatu mo teuga kolā e ‵lei kae ‵gali ki a tatou! Kae e se ‵tau o sōnafai valevale a te saolotoga tenei. Masaua te fakamatalaga a Paulo e uiga ki te filifiliga ne se tino a nisi meakai ke kai a ia ki ei, ne fakailoa atu ei ne ia ki ana taina Kelisiano se mea ke fakaeteete i ei, penei: “Ke fakaeteete koutou, ke mo a manafai te otou saolotoga o ‵kai ki so se meakai, mo mea e ‵taki atu ei latou kola e vaivai i te fakatuanaki ke pa‵ku atu ki te agasala.” Kae oti aka, ne taku atu ne ia se fakatakitakiga tāua ‵ki: “Se mea tonu me i Kelisiano e saoloto o ‵kai ki so se meakai ne ofo ki tupua, manafai e fia‵kai ki ei. Se mea ‵lei tena i mua o te Atua. Kae masaua, mo a mana ‵kai koutou ki ei, manafai e iloa ne koutou me masei ki a koutou.” (1 Kolinito 8:9; 10:23) E aogā pefea ki a tatou a pati fakatonutonu konā a Paulo e uiga ki te ‵mā?
12 Se mea ‵lei me e ‵tau mo tino o fakamoe‵moe ke ‵mā kae tokagamalie a te faifeau a te Atua i feitu katoa o tena olaga. Tela la, e ‵tau o fakamautinoa aka ne tatou me e se fakasēaogā ne foliga o ‵tou fale mo tafāfale a ‵tou pati me i a tatou ne faifeau o te Muna a te Atua. Se a te vaegā molimau telā e tuku atu ne ‵tou fale e uiga ki a tatou mo ‵tou talitonuga? E mata, e fakaasi atu ne tatou me e ma‵nako ‵tonu eiloa tatou o ola i se lalolagi fou kae amiotonu, telā e ‵mā kae tokagamalie, kae e fakamalosi atu tatou ki tino ke olioli ki ei? (2 Petelu 3:13) E penā foki ‵tou foliga totino—i taimi ta‵fao io me ko taimi o te galuega talai—e mafai o fai ei ke momea aka io me ke momea ifo ki lalo te gali o te fekau telā e talai atu ne tatou. E pelā mo te fakamatalaga tenei mai i se tino tusitala o se nusipepa i Mekisiko: “Ko oko eiloa te uke o talavou Molimau a Ieova, kae e ‵tu ‵kese latou ona ko te ‵katiga o olotou ulu, te lotou ‵mā, mo gatu ‵lei.” Ko oko eiloa i te fakafiafia ke ‵kau mai ki a tatou a vaegā talavou penā!
13 E tonu, e faigofie fua ke faipati e uiga ki te faiga ke ‵mā kae fakatoka faka‵lei ‵tou foitino, ‵tou kope, mo ‵tou fale i lō te faiga o mea konā. E manakogina fua i ei a fakatokaga ‵lei mo taumafaiga tumau, kae e se ko mea faigaluega e uke kolā e ‵togi ‵mafa. E ‵tau o fakaavanoa a taimi ke koukou, ‵ta gatu, ‵teu te fale, ‵fulu ‵tou motokā, mo nisi mea aka foki penā. E se ‵tau o fai a te ‵kau atu ki te galuega talai, te ‵kau atu ki fakatasiga, mo sukesukega totino—i tafa o nisi tiute i te olaga—mo fai se mea e taofi ei tatou mai te faiga ke tumau tatou i te ‵ma kae taliagina ne te Atua mo tino. A te fakatakitakiga masani ko “mea katoa konei e tupu i te lalolagi nei e tupu katoa i taimi ko oti ne filifili” e aogā foki ki te vaega tenei o ‵tou olaga.—Failauga 3:1.
Te Loto Telā e ‵Mā
14 E tiga eiloa e aogā te ‵mā faka-te-foitino, e sili atu te tāua ke saga tonu atu ki te ‵mā i mea tau amioga mo te feitu faka-te-agaga. E ma‵natu aka tatou penei me ne ‵teke atu a Ieova ki te atufenua o Isalaelu, ona ko te sē ‵mā o latou i feitu tau amioga mo te feitu faka-te-agaga kae e se ko te feitu faka-te-foitino. Ne fai atu a Ieova, e auala i te pelofeta ko Isaia, me ona ko te lotou fai mo fai se “fenua agasala, . . . te fenua se aoga kae amio masei!,” ne fakafi‵ta atu ei ki a ia olotou taulaga, fakamanatuga o te masina fou mo te sapati, ke oko foki eiloa ki olotou ‵talo. Ne a mea e ‵tau o fai ne latou ko te mea ke toe maua te taliaga a te Atua? Ne fai atu a Ieova, penei: “Koukou ke ‵ma otou foitino, kae na fakagata nei otou amioga masei konei e lavea atu ne au e fai ne koutou. Ao, fakagata otou amioga masei.”—Isaia 1:4, 11-16.
15 Ke malamalama tatou i te tāua o te ‵mā i mea tau amioga mo te feitu faka-te-agaga, mafaufau aka ki pati a Iesu ki te kau Falesaio mo te kau Satukaio kolā ne fai mai me ne seki ‵mā ana soko ona ko te mea ne seki ‵fulu olotou lima a koi tuai o ‵kai. Ne faka‵tonu ne Iesu olotou manatu, mai te fai atu, penei: “E se ko te mea e ulu ki te gutu o te tino e fakamasei ei a ia, ka ko te mea tela e vau mai te gutu o te tino, e fakamasei ne ia a te tino.” Ne toe fakamatala atu penei a Iesu: “Ka ko te mea e vau i te gutu, e fanake tonu eiloa mai te loto, tena te mea e fakamasei ne ia a te tino. Me ko te loto e mafua mai ei a mafaufauga ma‵sei: ko te tatino, ko te mulilua, ko te fina lalolagi, ko te kaisoa, ko te faitala ‵loi, mo te fatufatu. A mea konei e fakamasei ne latou a te tino, ka ko te kai mo te lima e se ‵fano, e se fakamasei ei a te tino.”—Mataio 15:11, 18-20.
16 Ne a mea e mafai o tauloto ne tatou mai i pati a Iesu? Ne fakaasi mai ne Iesu me i amioga ma‵sei, amioga matagā, mo faifaiga sē ‵mā e māfua mai i manakoga ma‵sei, matagā kae sē ‵mā o te loto. E pelā mo te mea ne fai mai ne te soko ko Iakopo, a “te tino e fakaosoosogina manafai ko to keatea a ia, kae faka‵segina ne ona manakoga ma‵sei.” (Iakopo 1:14, 15) Tela la, kafai e se ma‵nako tatou ke fai a agasala matagā kolā ne fakamatala mai ne Iesu, e ‵tau o ave katoatoa keatea so se manakoga masei penā mai i ‵tou loto. Ko tena uiga, e ‵tau o fakaeteete tatou i mea kolā e fai‵tau, onoono, kae fakalogo‵logo tatou ki ei. I aso nei, ona ko te tali‵tonu o tino ki te lotou saolotoga, e tuku mai ne fakafiafiaga mo fale fakasalalau a pese, mea fakatagi‵tagi, mo ata e uke kolā e fakamalie a manakoga ma‵sei o tino. E ‵tau o fakaiku aka ne tatou ke mo a ma talia so se vaegā manatu penā ke ‵mautakitaki i ‵tou loto. A te manatu tāua, me kafai e fia fakafiafia kae fia talia tatou ne te Atua, e ‵tau o tumau tatou i te matapula‵pula ko te mea ke ‵mā faeloa ‵tou loto kae se lai‵lai.—Faataoto 4:23.
Ne Faka‵mā mō Galuega ‵Lei
17 E mautinoa eiloa me e maua ne tatou se tauliaga tāua mo se puipuiga, me e mafai o maua ne tatou se tulaga ‵mā i mua o Ieova ona ko tena fesoasoani. (2 Kolinito 6:14-18) Kae e malamalama foki tatou me ne fai ne Ieova ana tino ke oko atu ki se tulaga ‵mā mō se pogai fakapito. Ne fai atu a Paulo ki a Tito me i a Keliso Iesu “ne tuku atu tona foitino mō tatou, o fakaola ei tatou mai amioga ma‵sei katoa, kae fai foki ne ia tatou ne tino fou, kae e a ia ake foki eiloa tatou, kae finafinau foki o fai te ‵lei.” (Tito 2:14) Ne a galuega e ‵tau o loto finafinau tatou o fai e pelā me ne tino ‵mā?
18 A te ‵toe mea tāua, e ‵tau o fakaoti ‵tou mafi i te folafolaatuga o te tala ‵lei o te Malo o te Atua ki tino katoa. (Mataio 24:14) Mai te faiga penā, e tuku atu ei ne tatou ki tino i koga katoa a te fakamoemoega ke ola ki te se-gata-mai i te lalolagi telā ka fakaseai atu ei a fakalailaiga katoa. (2 Petelu 3:13) E aofia foki i ‵tou galuega ‵lei a te fakaasiatuga o fuataga o te agaga i ‵tou olaga i aso katoa, telā e faka‵malu atu ei ki ‵tou Tamana faka-te-lagi. (Kalatia 5:22, 23; 1 Petelu 2:12) Kae e se puli i a tatou a tino mai tua o te munatonu kolā e pokotia malosi i fakalavelave ‵tupu fakafuasei io me ko fakalavelave totino. Ke masaua faeloa ne tatou a pati polopoloki a Paulo, konei: “Tenei la, e ‵tau mo tatou o fai te mea ‵lei ki tino katoa, kae fakasilisili ki a latou kola e i loto i te kaiga Kelisiano.” (Kalatia 6:10) A vaegā galuega penā, kolā e fai ona ko te loto ‵mā mo lagonaga ‵mā, e fakafiafia atu ki te Atua.—1 Timoteo 1:5.
19 E pelā me ne tavini a te Tino Tafasili i te Maluga, e faka‵logo tatou ki pati konei a Paulo: “Taina, au e fakamolemole atu ki a koutou i te alofa ‵nau o te Atua, ke tuku atu otou foitino ki te Atua ke fai mo taulaga ola, taulaga tapu kae logomalie ki a ia, ko te otou tapuakiga tonu eiloa tena.” (Loma 12:1) Ke na tumau i te fakatāua o te tauliaga ke faka‵mā tatou ne Ieova kae fai te ‵toe mea e mafai o fai ke fakatumau se tulaga maluga i te ‵mā faka-te-foitino, te ‵mā i mea tau amioga, mo te ‵mā faka-te-agaga. A te faiga penā ka se maua fua ei ne tatou a te loto talitonu ki a tatou eiloa mo te lotomalie nei, kae e maua foki ei te fakamoemoega ke lavea atu te fakaseaiga o “mea mua,” te olaga masani o tino amio ma‵sei mo te taimi ka ‘faka‵fou ei ne te Atua a mea katoa.’—Fakaasiga 21:4, 5.
E Masaua ne Koe?
• Kaia ne tuku atu ei a tulafono e uke e uiga ki te ‵tu ‵mā ki te kau Isalaelu?
• E fai pefea ne te ‵mā faka-te-foitino ke tosina atu a tino ki te gali o te fekau telā e talai atu ne tatou?
• Kaia e sili atu ei te tāua o te ‵mā i mea tau amioga mo te ‵mā faka-te-agaga i lō te ‵mā faka-te-foitino?
• E mafai pefea o fakaasi atu ne tatou me i a tatou ne tino kolā e “finafinau foki o fai te ‵lei”?
[Fesili mo te Sukesukega]
1. Ne a mea e manako ki ei a Ieova ke fai ne tino kolā e tapuaki atu ki a ia?
2. Ne faka‵mafa mai pefea ne Paulo mo Iakopo a te tāua o te ‵mā i te faiga o te tapuakiga tonu?
3. Ne a mea e ‵tau o ‵saga malosi atu ki ei māfai e ma‵nako tatou ke talia ne te Atua ‵tou tapuakiga?
4. Ke fakamatala mai a te uiga o te ‵mā i te Tusi Tapu.
5. Ne a vaegā mea e aofia i te Tulafono faka-Mose e uiga ki te ‵mā i te olaga o te kau Isalaelu?
6. Se a te pogai ne tuku atu ei a tulafono e uiga ki te ‵tu ‵mā?
7. Se a te fakamanuiaga ne ‵tau o maua ne te atufenua o Isalaelu moi ne faka‵logo latou ki te Tulafono?
8. Kaia e ‵tau ei mo Kelisiano i aso nei o ‵saga tonu atu ki mea kolā e fakaasi mai i te Tulafono e uiga ki te ‵mā?
9, 10. (a) Kaia e tāua ei a te ‵mā faka-te-foitino ki se Kelisiano? (e) Ne a pati e masani sāle o fai e uiga ki fono a Molimau a Ieova?
11, 12. (a) Se a te fakatakitakiga i te Tusi Tapu e ‵tau o masaua ne tatou e uiga ki te ‵mā faka-te-foitino? (e) Ne a fesili e mafai o ‵sili ifo ne tatou e uiga ki ‵tou faifaiga mo ‵tou olaga totino?
13. Ne a mea e mafai o fai ne tatou ke fakamautinoa aka me i mea katoa o ‵tou olaga i aso katoa e ‵mā kae fakatoka faka‵lei foki?
14. Kaia e mafai ei o fai atu me e sili atu te tāua o te ‵mā i mea tau amioga mo te feitu faka-te-agaga i lō te ‵mā faka-te-foitino?
15, 16. Ne a mea kolā ne fai mai ne Iesu me e fakalailai ei se tino, kae ne a mea aogā e mafai o maua ne tatou mai i pati a Iesu?
17. Kaia ne fai ei ne Ieova ke ‵mā ana tino?
18. E mafai pefea o fakaasi atu ne tatou me e loto finafinau tatou o fai a galuega ‵lei?
19. Ne a mea ‵lei e maua ne tatou māfai e fakatāua malosi ne tatou a te ‵mā faka-te-foitino, te ‵mā i mea tau amioga, mo te ‵mā faka-te-agaga?