E Mata, e Magoi Tau Akoako Atu?

E ‵TAU o fai a mātua, toeaina, mo tino talai katoa o te tala ‵lei mo fai ne faiakoga. E akoako ne mātua olotou tama‵liki, e akoako ne toeaina a tino i te fakapotopotoga Kelisiano, kae e akoako ne tino talai o te tala ‵lei a tino fia‵fia. (Teutelonome 6:​6, 7; Mataio 28:​19, 20; 1 Timoteo 4:​13, 16) Ne a mea e mafai o fai ne koe ke momea aka te magoi o tau akoako atu? A te auala e tasi ko te tautali atu ki te fakaakoakoga mo te auala e fakaaogā ne faiakoga apo kolā e taku mai i te Muna a te Atua. A Esela se faiakoga e tokotasi penā.

Ke Fakaakoako ki a Esela

A Esela se faitaulaga mai te matakāiga o Alona telā ne ola i te 2,500 tausaga ko ‵teka i Papelonia. I te tausaga ko te 468 T.L.M., ne fanatu a ia ki Ielusalema ke toe fakamalosi aka te tapuakiga ‵mā a tino Iutaia kolā ne ‵nofo atu i konā. (Esela 7:​1, 6, 12, 13) Ne manakogina i ei ke akoako atu ne ia a tino ki te Tulafono a te Atua. Ne a mea ne fai ne Esela ke fakamautinoa aka i ei me e ma‵goi ana akoakoga? E isi ne mea ‵lei ne fai ne ia. E mafai o maua ne koe a mea konei i te Tusi Tapu faka-Peletania i te Esela 7:​10, NW:

Ne [1] “fakatoka ne Esela tena loto a koi tuai o [2] tauloto a ia ki tulafono a te Aliki, [3] ne fai foki ne ia a mea konā, [4] kae ne akoako atu ne ia a tulafono mo fakatonuga ki tino Isalaelu.” Ke na onoono aka tatou ki mea takitasi kolā ne fai ne Esela, mo mea e tauloto ne tatou mai i ei.

Ne “Fakatoka ne Esela Tena Loto”

E pelā eiloa mo te tino fai fatoaga telā e fakatoka muamua ne ia te laukele a koi tuai o ‵toki a fuaga, ne ‵talo atu muamua a Esela ke fakatoka tena loto ke talia ne ia a te Muna a te Atua. (Esela 10:⁠1) I nisi tugāpati, ne fakatoka tena mafaufau ‘ke malamalama’ i akoakoga a Ieova.​—⁠ Faataoto 2:⁠2.

I se auala tai ‵pau, ne fakatoka ne te Tupu ko Iosefatu tena loto telā ne mafai ei o “tautali [atu a ia] i te loto o te Atua.” (2 Nofoaiga Tupu 19:​3, 4) E ‵kese mai i ei, ne taku a tino Isalaelu kolā ne seki fakatoka olotou loto e pelā me ne “tino ‵teke kae se faka‵logo.” (Salamo 78:⁠8) E lavea ne Ieova a “te tino se lavea ko te loto.” (1 Petelu 3:⁠4) E tonu, ka “akoako foki ne ia a [“tino loto maulalo,” NW] ki tena kanoloto.” (Salamo 25:⁠9) E pefea te tāua ke tau‵tali atu a faiakoga i aso nei ki te fakaakoakoga a Esela i te faiga o se ‵talo ke fakatoka faka‵lei ei olotou loto a koi tuai o tau‵loto latou ki pati a Ieova!

Ke ‘Tauloto ki Tulafono a Ieova’

Ko te mea ke fai a ia e pelā me se faiakoga apo, ne tauloto a Esela ki te Muna a te Atua. Kafai e fanatu koe ki se tokitā, ka fakalogologo faka‵lei eiloa koe ke fakamautinoa aka me e malamalama koe i ana pati mo ana fakamatalaga katoa, i ne? Ka fai eiloa koe penā, me e fakalagolago eiloa tou ola ki ei. Tela la, e ‵tau o ‵saga tonu atu tatou ki pati mo fakamatalaga kolā e tuku mai ne Ieova e auala i tena Muna, ko te Tusi Tapu, mo “te tavini fakamaoni kae poto.” E ‵tau o ‵saga tonu atu tatou ki ana fakatakitakiga me e aofia ‵tou ola i ei! (Mataio 4:4; 24:​45-​47) E tonu, e mafai o ‵se a te tokitā, kae “tonu katoatoa te tulafono a te Aliki.” (Salamo 19:⁠7) E se fia ‵sala tatou ki se isi fakamatalaga aka.

E fakaasi mai ne tusi o te Nofoaiga Tupu i te Tusi Tapu (telā ne tusi eiloa ne Esela pelā me se tusi e tasi) me i a Esela se tino fai sukesukega ‵loto. Ne sukesuke a ia ki nisi tusi ko te mea ke tusi ne ia a tusi konā.a Ne ma‵nako a te kau Iutaia kolā ne fatoā oko atu mai Papelonia ki se tala toetoe e uiga ki te lotou fenua. E se lasi te lotou iloaga e uiga ki fakamanatuga a te lotou lotu, te faiga o tapuakiga i te fale tapuaki, mo galuega a te kau Levi. Ne tāua ‵ki a te fakasologa o gafa ki a latou. Ne saga malosi atu a Esela ki mea katoa konā. Ne ‵tau o tumau te kau Iutaia e pelā me se atufenua telā e isi sena fale tapuaki, se potukau o faitaulaga, mo se kovana foki ke oko ki te taimi e oko mai ei te Mesia. Ona ko fakamatalaga kolā ne maua ne Esela ne mafai ei o fakatumau te fealofani mo te tapuakiga tonu.

E pefea te ‵loto o au sukesukega totino māfai e faka‵tusa ki mea kolā ne fai ne Esela? A te sukesuke faka‵lei ki te Tusi Tapu ka fesoasoani atu ei ke magoi tau akoako atu mai te Tusi Tapu.

Ke Tauloto te Kāiga Kātoa ki Tulafono a Ieova

E se lava fua te faiga o sukesukega totino ke tauloto ei ki tulafono a Ieova. A te faiga o akoga faka-te-Tusi Tapu i te kāiga ko te suā avanoaga ‵lei ke fai penā.

Ne faitau atu faeloa ki luga ne Jan mo Julia, se tauavaga mai te Netherlands, a te Tusi Tapu ki lā tama‵liki tāgata e tokolua talu mai te aso ne fa‵nau mai ei laua. Ko 15 nei a tausaga o Ivo kae ko 14 a tausaga o Edo. Koi fai eiloa te lotou sukesukega faka-te-kāiga fakatasi i te vaiaso. E fai mai a Jan, penei: “A te ‵toe fakamoemoega tāua e se ko te fakaotiga fua o te mataupu kae ko te malamalama o ma tama‵liki tā‵gata i mea kolā ne sau‵tala ki ei.” Ne toe fai mai a ia, penei: “E fai ne ma tama‵liki tā‵gata a sukesukega ‵loto e uke. E suke‵suke laua ki pati ‵mafa mo tino i te Tusi Tapu kolā e se masani laua ki ei​—⁠te taimi ne ola ei latou, olotou uiga, olotou galuega mo nisi fakamatalaga aka foki penā. I te taimi ne iloa ei ne laua o fai‵tau, ne suke‵suke laua ki tusi e pelā mo te Insight on the Scriptures, tikisionale, mo encyclopedia. E fai i ei ke momea aka te fakafiafia te faiga o te akoga faka-te-kaiga. E olioli faeloa a tama‵liki ke na fai te akoga.” A te suā mea aogā i ei, ne tulaga muamua foki a tama‵liki tā‵gata konei i lā vasega i mea tau ‵gana.

Ne fai ne Ioane mo Tini, se tauavaga foki mai te Netherlands, se akoga faka-te-Tusi Tapu mo te lā tamaliki tagata ko Esli (ko 24 nei ana tausaga kae e paenia a ia i te suā fakapotopotoga), mo te lā tamaliki fafine ko Linda (ko 20 nei ana tausaga kae ko oti ne avaga ki se taina ‵lei). I lō te faiga o se akoga masani e pelā mo te faiga o fesili mo tali, ne ‵fuli aka ne laua a te faiga o te akoga ke fetaui ‵lei mo te ma‵tua mo manakoga o tama‵liki. Se a te faifaiga ne fakaaogā ne laua?

E fakamatala mai ne Ioane me ne filifili aka ne ana tama‵liki se mataupu telā e fia‵fia laua ki ei mai i “Fesili Mai te Kau Fai‵tau” (i Te Faleleoleo Maluga) mo “Te Kilokiloga a te Tusi Tapu” (i te Awake!). Kafai ko oti, ko fakamatala mai ei ne laua a mea kolā ne fakatoka ne laua, telā ne iku atu faeloa ki sau‵talaga ‵gali faka-te-kāiga. Ne fakamasani penā a tama‵liki ki te faiga o sukesukega ‵loto mo te fakamatalaga foki o mea kolā ne suke‵suke laua ki ei. E mata, ‘e tauloto koe ki te tulafono a Ieova’ fakatasi mo au tama‵liki? Ka se fai fua ne te mea tenei ke momea aka te ‵lei o tou atamai i te akoako atu kae ka fesoasoani atu foki ki au tama‵liki ke fai pelā me ne faiakoga apo.

Ke “Fai” te Tulafono

Ne fai foki ne Esela a mea kolā ne tauloto ne ia. I te taimi ne nofo atu ei i Papelonia, ne ‵lei tena olaga. E tiga eiloa te feitu tenā, i te taimi ne iloa ei ne ia me e mafai o fesoasoani atu a ia ki ana tino, ne tiakina ne ia a mea ‵gali i Papelonia kae fanatu ki te fenua ‵mao ko Ielusalema telā e uke a fakalavelave, mea faiga‵ta, mo mea fakama‵taku i ei. E manino i ei, me e se gata fua i te mauaga ne Esela a te iloaga faka-te-Tusi Tapu kae ne toka foki a ia o fai a mea kolā ne tauloto ne ia.​—⁠1 Timoteo 3:​13.

Fakamuli loa, a koi nofo atu i Ielusalema, ne toe fakaasi atu ne Esela me ne fai ne ia a mea kolā ne tauloto a ia ki ei kae akoako atu foki. Ne fakamaoni mai a te ‵tonu o te mea tenei i te taimi ne logo ei a ia i tāgata Isalaelu ko a‵vaga ki fāfine mai fenua fakaa‵tea. E fai mai a te tala i te Tusi Tapu me ne ‘saesae ne ia ona gatu i te fanoanoa, ne unu foki ne ia ona laulu mo tena talafa, kae sagasaga ifo ki lalo mo te fanoanoa lasi kae tagi fanoanoa ke oko eiloa ki te afiafi.’ Ko se maua ne ia o ‘kilo ona mata [ki a Ieova] me ko oko eiloa i te mā.’​—⁠Esela 9:​1-6.

Ko oko eiloa te aogā o tena taulotoga ki tulafono a te Atua! Ne maina ‵lei a Esela i ikuga ma‵sei ka oko atu ona ko te sē faka‵logo o tino. E se tokouke a tino Iutaia kolā ne toe ‵foki atu. Kafai e a‵vaga latou ki tino mai nisi fenua, kāti ka sē ‵tu ‵kese ei latou mai atufenua fapaupau i olotou tafa kae ne faigofie ei o fakaseai atu a te tapuakiga ‵mā i te lalolagi katoa!

Se mea fakafiafia, me ne gasue‵sue a te kau Isalaelu o faka‵lei aka olotou faifaiga, ona ko te toaga mo te loto finafinau o Esela. Ne tiakina ne latou olotou avaga mai fenua fakaa‵tea. Ne faka‵tonu faka‵lei aka a mea katoa i loto i se tolu masina. Ne aogā ‵ki a te fakamaoni o Esela ki tulafono a te Atua i te faiga ke momea aka te magoi o tena akoako atu.

Kae penā foki eiloa i aso nei. Ne fai mai se tamana Kelisiano e tokotasi, penei: “E se fakaakoako a tama‵liki ki otou pati, e fakaakoako ki otou faiga!” E aogā foki eiloa a te fakaakoakoga tenā ki te fakapotopotoga Kelisiano. E fakamoe‵moe eiloa a toeaina kolā e fai pelā me ne fakaakoakoga ‵lei ke ‵saga tonu atu a te fakapotopotoga ki olotou akoakoga.

“Akoako Atu . . . a Tulafono mo Fakatonuga ki Tino Isalaelu”

Kae e isi eiloa se suā pogai ne magoi ei a te akoako atu o Esela. Ne seki akoako atu ne ia ana mafaufauga eiloa, kae ne akoako atu ne ia a “tulafono mo fakatonuga” a Ieova. Tenā eiloa tena tiute e pelā me ko te faitaulaga. (Malaki 2:⁠7) Ne akoako atu foki ne ia a te fai mea tonu kae ne tuku mai ne ia se fakaakoakoga ‵lei i mea kolā ne akoako atu ne ia mai te tumau i te faiga o mea ‵tonu i se auala ‵lei e tusa eiloa mo tulafono konā. Kafai e fakaasi atu ne tino kolā e fai pelā me ne takitaki a te fakamaoni, ka tu ‵mautakitaki a tino i ei kae ka maua mai ei a ikuga ‵lei. (Faataoto 29:⁠4) I se auala tai ‵pau ka ‵mautakitaki i te feitu faka-te-agaga a toeaina, mātua, mo tino talai o te Malo kolā ko masani ‵lei mo te Tusi Tapu māfai ko akoako atu ne latou a tulafono a Ieova mo tena fakamaoni, ki te fakapotopotoga, ki olotou kāiga, mo tino fia‵fia.

Ka loto malie eiloa koe me ka magoi eiloa tau akoako atu māfai e tautali katoatoa atu koe ki te fakaakoakoga a te tagata fakamaoni, ko Esela, i ne? Tela la, ke na fakatoka tou loto, tauloto ki tulafono a Ieova, fai ne koe a mea konā, kae akoako atu foki a tulafono mo fakatonuga a Ieova.​—⁠Esela 7:​10.

[Fakamatalaga mai lalo]

[Pokisi/Ata i te itulau e 32]

KAIA NE MAGOI EI TE AUALA NE AKOAKO ATU I EI A ESELA?

1. Ne fakatoka faka‵lei ne ia tena loto

2. Ne tauloto a ia ki Tulafono a Ieova

3. Ne fai a ia mo fai se fakaakoakoga ‵lei mai te faiga o mea kolā ne tauloto ne ia

4. Ne sukesuke malosi a ia ko te mea ke mafai o akoako atu ne ia a te Tusi Tapu