E Atafai a Ieova ki a Koe
“Fakaeke katoa ki luga i a ia [te Atua] a mea e manava‵se ei koutou, me e atafai atu eiloa ki a koutou.”—1 PETELU 5:7.
E ‵KESE ‵mao eiloa a Ieova mo Satani. So se tino telā e fakapilipili atu ki a Ieova e mafai fua o takalialia ki ei te Tiapolo. E fakaasi mai te ‵kesega tenei i se tusi lauiloa e tasi. E fai mai a te Encyclopædia Britannica (1970), e uiga ki faifaiga a Satani kolā e fakamatala mai i te tusi o Iopu i te Tusi Tapu, penei: ‘A te mea telā e fai ne Satani ko te fanofano sāle fua i te lalolagi nei o salasala ki faifaiga io me ko tino ke ‵losi atu ki olotou amioga ma‵sei; telā e ‵kese ‵ki ana faifaiga mo mea kolā e “onoono” te Aliki ki ei me e fakamalosi aka ne ia a mea katoa kolā e ‵lei (II Nofo. xvi, 9). E se talitonu a Satani me e mafai o tumau a tino i te faiga o mea ‵lei kae ne taliagina ke tofotofo ne ia latou mai lalo o te pulega a te Atua mo tapulā kolā ne tuku mai ne ia.’ E tonu, ko se faka‵tau eiloa i te ‵kese!—Iopu 1:6-12; 2:1-7.
2 A te pati “Tiapolo” ne māfua mai i se pati Eleni telā e fakauiga ki se “tino fai tala loi,” “se tino gutu fatufatu.” E fakaasi mai ne te tusi o Iopu me ne ‵losi atu a Satani me ne tavini atu fua a te tavini fakamaoni a Ieova ko Iopu ki a Ia ona ko mea kolā e maua sāle ne ia, penei: “E mata e tapuaki atu eiloa a Iopu ki a koe manafai e seai sena ‵lei e maua i tena tapuaki atu ki a koe?” (Iopu 1:9) E fakaasi mai ne te tusi o Iopu me faitalia eiloa ana tofotofoga mo fakalavelave, ne momea aka faeloa te pili atu o Iopu ki a Ieova. (Iopu 10:9, 12; 12:9, 10; 19:25; 27:5; 28:28) Mai tua o ana fakalavelave faiga‵ta, ne fai atu a ia ki te Atua, penei: “Ne iloa ne au a koe i tala a tino, kae nei ko lavea eiloa ne au a koe ki oku mata.”—Iopu 42:5.
3 E mata, ko oti ne fakagata ne Satani tena ‵losi sāle atu ki tavini fakamaoni a te Atua talu mai i aso o Iopu? Ikai. E fakaasi mai ne te tusi ko Fakaasiga me i te taimi tenei o te gataga, e tumau eiloa a Satani i te ‵losi atu ki taina fakaekegina o Keliso kae e mautinoa eiloa me e fai foki penā ki olotou taugasoa fakamaoni. (2 Timoteo 3:12; Fakaasiga 12:10, 17) Tela la, a te ‵toe mea tāua e ‵tau o fai ne tatou, e pelā me ne Kelisiano, ko te faka‵logo ki ‵tou Atua atafai, ko Ieova, mai te tavini atu ki a ia ona ko te alofa kae ke fakamaoni atu ei a te ‵se o ‵losiga a Satani. Kafai e fai tatou penā, ka fai ei ne tatou ke fiafia te loto o Ieova.—Faataoto 27:11.
E Taumafai Faeloa Ieova o Fesoasoani Mai ki a Tatou
4 E fanofano sāle a te Tiapolo i te lalolagi nei, ke taumafai o ‵po kae kai ne ia se tino. (Iopu 1:7, 9; 1 Petelu 5:8) E ‵kese mai i ei, e taumafai faeloa Ieova o fesoasoani atu ki tino kolā e ma‵nako ki tena malosi. Ne fai atu a te pelofeta ko Hanani ki te Tupu ko Asa, penei: “A te Aliki e onoono faka‵lei eiloa ki te lalolagi; e ave ne ia a te malosi ki tino kolā e fakamaoni ki a ia.” (2 Nofoaiga Tupu 16:9) Ko oko eiloa i te ‵kese o te kilokiloga fakatakalialia a Satani mo te alofa atafai o Ieova!
5 E se mataonoono a Ieova ki ‵tou tamā mea ‵se katoa. Ne tusi mai te faisalamo, penei: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?” (Salamo 130:3) A te tali tonu ki ei: e seai eiloa se tino e mafai o sao. (Failauga 7:20) Kafai e fakapili‵pili atu tatou ki a Ieova mo ‵tou loto kātoa, ka onoono mai a ia ki a tatou, ke se taku fakamasei ei tatou, kae ke iloilo aka ne ia ‵tou taumafaiga kae tali mai ‵tou ‵talo mō se fesoasoani mo tena fakamagaloga. Ne tusi mai te apositolo ko Petelu, penei: “Me i te Aliki e sagatonu eiloa ona mata ki tino amio‵tonu, kae fakalogo faeloa ki olotou ‵talo; kae saga fakaa‵tea mai tino kolā e fai ne latou te masei.”—1 Petelu 3:12.
6 Ne seki ‵lei katoatoa a Tavita kae ne fai ne ia se agasala telā ne ‵tau ei o fakasala a ia. (2 Samuelu 12:7-9) Kae ne fakaasi katoatoa atu ne ia a mea i tena loto ki a Ieova kae ne fakapilipili atu ki a ia e auala i ‵talo. (Salamo 51:1-12) E tiga eiloa ne fepaki a Tavita mo ikuga sē ‵lei o tena agasala, ne lagona ne Ieova tena ‵talo kae ne fakamagalo foki ne ia tena agasala. (2 Samuelu 12:10-14) E ‵tau o fai te mea tenei mo fai se fakamafanafanaga mo se fakailoaga foki ke fakaeteete tatou. Se mea fakamafanafana ke iloa atu me e loto fiafia a Ieova o fakamagalo ‵tou agasala māfai e salamō tonu tatou, kae e ‵tau o mafaufau ‵mafa tatou ki ikuga sē ‵lei o ‵tou agasala. (Kalatia 6:7-9) Kafai e ma‵nako tatou o fakapili‵pili atu ki a Ieova, e ‵tau o faka‵mao tatou mai so se mea telā e fakafanoanoa atu ki a ia.—Salamo 97:10.
E ‵Taki Atu ne Ieova Ana Tino ki a Ia
7 Ne tusi mai a Tavita i se tusi e tasi o ana salamo, penei: “E tiga eiloa tou ‵mao ki luga, e tausi eiloa ne koe a latou kolā e loto ma‵lalo; ka ko latou kolā e fakamata‵mata e se mafai o ‵muni mai i a koe.” (Salamo 138:6) I se auala tai ‵pau, e fai mai te suā salamo, penei: “E seai se tino e fakatusa ki ei te Aliki te ‵tou Atua. E nofo a ia i koga ma‵luga, kae punou ifo a ia ke lavea ne ia te lagi mo te lalolagi. E avake ne ia a te tino mativa mai tena olaga masei.” (Salamo 113:5-7) E tonu, e punou ifo te Atua Tafasili i te Maluga ke onoono mai ki te lalolagi, kae e lavea atu ne ia a tino “kolā e loto ma‵lalo,” ‘tino ma‵tiva,’ ko “tino katoa kolā ko oko eiloa i te fanoa‵noa kae māfatia ona ko amioga matagā kolā ne fai.” (Esekielu 9:4) E takitaki atu ne Ia a vaegā tino penā ki a ia e auala i tena Tama. A koi nofo ei a Iesu i te lalolagi nei, ne fai mai a ia, penei: “E se mafai ne se tino o vau ki a au, seiloga ne māfua tona vau mai te Tamana telā ne uga mai ne ia au . . . e seai se tino e mafai o vau ki a au, seiloga ko tuku atu ki a ia ne te Tamana.”—Ioane 6:44, 65.
8 E ‵tau o olo atu a tino katoa ki a Iesu kae ke fakatuanaki foki ki te taulaga togiola me ne fa‵nau mai latou e pelā me ne tino agasala kolā ne ‵vae keatea mai te Atua. (Ioane 3:36) E ‵tau o toe faka‵lei aka te lotou va mo te Atua. (2 Kolinito 5:20) Ne seki faka‵tali a te Atua ke akai atu a tino agasala ke tuku mai a nisi fakatokaga kolā e maua ei se va fealofani o latou mo ia. Ne tusi mai te apositolo ko Paulo, penei: “Ka ko te Atua ne fakaasi mai ne ia ki a tatou a tona alofa, i te taimi koi fai ei tatou mo tino agasala; me ne mate a Iesu mō tatou! . . . Kafai ne fai tatou mo fili o te Atua, ne faka‵lei tatou mo ia i te mate o tena Tama, kae sili eiloa nei; i a tatou ko faka‵lei mo ia, ka ola tatou i te ola o Keliso.”—Loma 5:8, 10.
9 Ne fakamautinoa mai ne te apositolo ko Ioane a te munatonu fakaofoofogia me ko faka‵lei aka ne te Atua te va o tino mo ia, i tena tusimaiga, penei: “Tenei te auala ne fakaasi mai ei a te alofa o te Atua: ne uga mai ne ia tena Tama e tokotasi ki te lalolagi, ko te mea ke maua ne tatou a te ola e alatu i a ia. Tenei te mea e taku ko te alofa: e se ko tona uiga ona ko tatou ne a‵lofa ki te Atua, ka ko ia ne alofa mai ki a tatou, uga mai ei ne ia a tena Tama ke fai mo auala e fakamagalo ei o‵tou agasala.” (1 Ioane 4:9, 10) Ko te Atua ne gasuesue muamua, kae e se ko tino. E mata, e se alofa koe ki te Atua telā ne fakaasi atu ne ia a te alofa lasi ki “tino agasala,” kae ke oko foki eiloa ki “fili”?—Ioane 3:16.
E ‵Tau o ‵Sala Atu ki a Ieova
10 E tonu, e se faimālō ne Ieova tatou ke olo atu ki a ia. E ‵tau o ‵sala atu tatou ki a ia “i te fakamoemoe ka maua ne [tatou] a ia i te salasala atu ki a ia; ka ko ia foki e se ‵mao mai i a tatou takitokotasi.” (Galuega 17:27) E ‵tau o talia ne tatou te tulaga o Ieova ke fakatonu mai ke faka‵logo tatou ki a ia. Ne tusi mai te soko ko Iakopo, penei: “Ke tuku katoatoa atu koutou ki te Atua. ‵Teke atu te Tiapolo, ko sola ei a ia keatea mai i a koutou. Fakapilipili atu koutou ki te Atua, ko fakapilipili mai ei a ia ki a koutou. Fakagata te fai mea ma‵sei e tino agasala! Fakagata te mafaufau ki mea ma‵sei e tino fia amio‵tonu.” (Iakopo 4:7, 8) E se ‵tau o fakatalave tatou ke ‵tu ‵mautakitaki i te ‵teke atu ki te Tiapolo kae ke ‵lago atu ki a Ieova.
11 E fakauiga i ei me e ‵tau o faka‵mao tatou mai te lalolagi masei a Satani. Ne tusi mai foki a Iakopo, penei: “E se iloa ne koutou i te tino e fai mo taugasoa o te lalolagi, ko te fili tenā o te Atua? Tela la, so se tino e manako a ia ke fai mo taugasoa o te lalolagi, ko fai foki ne ia a ia eiloa ke fai mo fili o te Atua.” (Iakopo 4:4) I te suā feitu, kafai e ma‵nako tatou o fai mo taugasoa o Ieova, e ‵tau o iloa foki ne tatou me ka takalialia mai te lalolagi a Satani ki a tatou.—Ioane 15:19; 1 Ioane 3:13.
12 Kafai e ‵teke mai a te lalolagi a Satani i se auala fakapito, e ‵tau o ‵talo malosi tatou ki a Ieova o akai atu ki tena fesoasoani. Ne tusi mai a Tavita telā ne maua sāle ne ia te fesoasoani o Ieova, ke fakamafanafana mai ki a tatou, penei: “E pili faeloa a ia ki a latou kolā e ka‵laga atu ki a ia, kolā e ka‵laga ki ei mo te loto fakamaoni. E tuku ne ia ki a latou kolā e ma‵taku ki a ia a mea katoa kolā e ma‵nako latou ki ei; e lagona ne ia olotou ‵tagi, kae faka‵sao ne ia latou. E puipui ne ia latou katoa kolā e a‵lofa ki a ia, kae ka fakamalaia ne ia a tino amio ma‵sei.” (Salamo 145:18-20) E fakaasi mai ne te salamo tenei me e mafai o faka‵sao tatou ne Ieova māfai ko tofotofogina tatou taki tokotasi kae ka faka‵sao ne ia ana tino e pelā me se potukau i te taimi o ‘te fakalavelave lasi.’ (Fakaasiga 7:14) Ka fakapilipili mai a Ieova ki a tatou māfai e fakapili‵pili atu foki tatou ki a ia. Ne fai mai ne te pelofeta ko Asalia, telā ne ‘oko atu te agaga o te Atua ki a ia,’ a te munatonu e uiga ki a tatou, penei: “A te Aliki [ko Ieova] e fakatasi mai ki a koutou, manafai e tumau te otou faka‵logo ki a ia. Kafai e salasala koutou ki a ia, kae ka vau a ia ki a koutou, kae kafai e fulitua koutou ki a ia, kae ka tiakina foki ne ia koutou.”—2 Nofoaiga Tupu 15:1, 2.
E ‵Tau o Talitonu me e Ola Tonu Eiloa a Ieova
13 Ne tusi mai te apositolo ko Paulo e uiga ki a Mose telā ne “tumau foki tona talitonu me ko matea eiloa ne ia te Atua telā e se mafai o matea.” (Epelu 11:27) E tonu, ne seki lavea tonu eiloa ne Mose a Ieova. (Esoto 33:20) Kae ne fai eiloa a Ieova e pelā me se tino tonu ki a ia telā ne mafaufau ei a ia me ko oti ne lavea ne ia te Atua. I se auala tai ‵pau, mai tua o ana tofotofoga faiga‵ta, ne lavea atu ne Iopu i ana mata fakatusa o te fakatuanaki, a Ieova i se auala telā e ‵kese ‵ki, e pelā me se Atua telā e talia ne ia ana tavini ke fe‵paki mo tofotofoga faiga‵ta kae e se mafai o tiakina ne ia latou. (Iopu 42:5) Ne fakaasi mai foki me ne ‘sa‵sale fakatasi mo te Atua’ a Enoka mo Noa. Ne fai laua penei mai te taumafai ke fakafiafia atu kae faka‵logo foki ki te Atua. (Kenese 5:22-24; 6:9, 22; Epelu 11:5, 7) Kafai e tali‵tonu tatou me e ola tonu eiloa a Ieova e pelā mo te kilokiloga a Enoka, Noa, Iopu, mo Mose, ka ‘masaua faeloa ne tatou te Aliki’ i ‵tou auala katoa, kae ka ‘fakaasi mai ne ia ki a tatou te auala tonu.’—Faataoto 3:5, 6.
14 Mai mua faeloa o te uluatuga o te kau Isalaelu ki te Fenua o te Folafolaga, ne polopoloki atu a Mose ki a latou, penei: “Tau‵tali atu ki te Aliki te otou Atua, ke ma‵taku koutou ki a ia, kae tausi ana fakatonuga, kae tavini atu foki ki a ia, kae ke ‵piki ‵mau atu foki koutou ki a ia.” (Teutelonome 13:4, Tusi Paia Samoa) Ne ‵tau o tau‵tali atu latou ki a Ieova, ma‵taku ki a ia, faka‵logo, kae ‵piki ‵mau ki a ia. Ne fai mai se tino poto e tokotasi i te Tusi Tapu e uiga ki te pati telā ne ‵fuli i konei ki te “‵piki ‵mau,” me “i te ‵gana Epelu e fakaasi mai i ei se fesokotakiga ‵pili ‵ki.” Ne fai mai te faisalamo, penei: “A te Aliki ko te taugasoa o tino kolā e faka‵logo ki a ia, kae faka‵mautakitaki foki ne ia tena feagaiga mo latou.” (Salamo 25:14) Ka maua ne tatou a te fesokotakiga tāua kae pili tenei mo Ieova māfai e fai a ia mo fai se tino tonu ki a tatou kae māfai foki e a‵lofa tatou ki a ia telā ka ma‵taku ei tatou o fai so se mea e fakafanoanoa atu ki a ia.—Salamo 19:9-14.
E Mata, e Lavea Atu ne Koe te Atafai o Ieova?
15 E tasi te auala faitogafiti a Satani telā e fakaaogā ne ia, ko te faiga ke puli i a tatou a te manatu me i te ‵tou Atua, ko Ieova, e tumau eiloa tena atafai ki ana tavini fakamaoni. Ne iloa ‵lei ne te Tupu o Isalaelu ko Tavita a te puipuiga a Ieova ke oko foki eiloa ki te taimi ne fepaki ei a ia mo te ‵toe taimi faigata. I te taimi ne fakaloiloi ei ne ia te Tupu o Kata ko Akisa me i a ia ko fakavalevale, ne ‵fatu ei ne ia se pese, se salamo gali ‵ki, telā ne aofia i ei a tugāpati o te fakatuanaki konei: “Ke takutaku fakatasi atu ne tatou te ‵malu o te Aliki [ko Ieova]; ke tavae foki fakatasi tatou ki tena igoa! Au ne ‵talo ki te Aliki kae ne tali mai a ia ki a au; ne fakasao ne ia au i mea katoa ne mataku au ki ei. E leoleo ne tena agelu a latou kolā e ma‵taku ki te Aliki kae faka‵sao ne ia latou mai mea faiga‵ta. Mafaufau ake la koe ki te lasi o te aga‵lei o te Aliki. Amutia latou kolā e faka‵lafi atu ki a ia. Te Aliki e nofo pili ki a latou kolā e loto vāi‵vāi, e faka‵sao foki ne ia a latou kolā ko seai ne olotou fakamoemoega. E uke a mea faiga‵ta e oko ki te tino amiotonu, kae fakaola a ia ne te Aliki mai mea katoa konā.”—Salamo 34:3, 4, 7, 8, 18, 19; 1 Samuelu 21:10-15.
16 E mata, e talitonu koe ki te malosi ke fakaola ei ne Ieova a tino? E mata, e iloa ne koe me e puipui mai ana agelu? E mata, ko oti eiloa ne matea ne koe a te ‵lei o Ieova? Se a te ‵toe taimi telā e masaua ei ne koe me ne atafai atu a Ieova ki a koe? Ke toe mafaufau aka ki ei. E mata, ko te taimi telā ne fai ne koe te ‵toe fale i te galuega talai, kae ko fi‵ta malosi koe? Kāti ne gali ‵ki tau sau‵talaga mo se tino i te fale. E mata, e masaua ne koe o fakafetai atu ki a Ieova mō te tukuatuga o te malosi e manakogina mo te fakamanuiaga foki ne ia a koe? (2 Kolinito 4:7) I te suā feitu, kāti ne faigata ki a koe ke masaua a nisi faifaiga ‵lei kolā ne fakaasi atu ne Ieova ki a koe. Kāti e ‵tau o toe mafaufau koe ki te vaiaso, te masina, te tausaga ko teka, io me e tai leva atu. Kafai tenei loa te fakalavelave, kaia e se taumafai malosi ei koe o fakapilipili atu ki a Ieova kae ke lavea atu te auala e puipui kae takitaki ne ia koe? Ne fakamalosi atu te apositolo ko Petelu ki Kelisiano, penei: “Ke loto ma‵lalo koutou mai lalo o lima ‵mafi o te Atua. . . . Fakaeke katoa ki luga i a ia a mea e manava‵se ei koutou, me e atafai atu eiloa ki a koutou.” (1 Petelu 5:6, 7) A te ‵tonuga loa, ka ofo koe i te lasi o tena atafai ki a koe!—Salamo 73:28.
Ke Tumau i te ‵Sala Atu ki a Ieova
17 A te fakatumauga o ‵tou a‵lofa ki a Ieova se mea telā e ‵tau o fai faeloa. Ne fai atu a Iesu i te ‵talo ki tena Tamana, penei: “Tenei te ola se gata mai: ke iloa ne tino i a koe ko te Atua tonu e tokotasi, kae ke iloa foki ne latou i a Iesu Keliso ne uga mai ne koe.” (Ioane 17:3) E manakogina te tumau i te taumafai ke maua ei a te iloaga e uiga ki a Ieova mo tena Tama. E ‵tau o maua ne tatou te fesoasoani o ‵talo mo te agaga tapu ke malamalama ei i “fuafuaga ‵loto a te Atua.” (1 Kolinito 2:10; Luka 11:13) E ‵tau foki o maua ne tatou a te takitakiga a “te tavini poto kae fakamaoni” ke fagai ei ‵tou mafaufau ki mea‵kai faka-te-agaga kolā ne tuku mai ne ia “i te taimi tonu.” (Mataio 24:45) E auala i te fakatokaga tenā, ne polopoloki mai ei a Ieova ke fai‵tau tatou ki tena Muna i aso katoa, ke ‵kau atu faeloa ki ‵tou fakatasiga Kelisiano, kae ke ‵kau katoatoa atu foki ki te talaiatuga o “te Tala ‵Lei tenei e uiga ki te Malo.” (Mataio 24:14) Mai te faiga penā, ka tumau faeloa tatou i te ‵sala atu ki te ‵tou Atua atafai, ko Ieova.
18 Ko fakaoti ne Satani ana mafi ke fakaoko atu ei a fakasauāga, ‵tekemaiga, mo fakamalosiga sē ‵lei mai i feitu katoa ki tino o Ieova. E taumafai a ia o fakamasei ‵tou va fealofani kae fakagata atu ‵tou tulaga ‵lei mo te Atua. E se manako a ia ke tumau tatou i te ‵sala atu ki tino loto fakamaoni kae fesoasoani atu ki a latou ke ‵lago atu ki a Ieova i te kinauga e uiga ki te pulega sili i te lagi mo te lalolagi. Kae e ‵tau o fakaiku aka me ka tumau tatou i te fakamaoni ki a Ieova, ke tali‵tonu me ka faka‵sao ne ia tatou mai te tino masei. Kafai e talia ne tatou te Muna a te Atua ke takitaki ne ia tatou kae tumau i te kau atu ki tena fakapotopotoga matea, e mafai o fakamautinoa aka ei ne tatou me e toka faeloa a ia o fesoasoani mai ki a tatou.—Isaia 41:8-13.
19 Tela la, ke na ‵tu ‵mautakitaki tatou i te ‵teke atu ki te Tiapolo mo ana auala fai togafiti, kae ‵sala atu faeloa ki te ‵tou Atua alofa, ko Ieova, telā ka fai ne ia tatou ke ‘loto ‵mau, ma‵losi, kae ke maua foki se fakavae ‵mautakitaki.’ (1 Petelu 5:8-11) Tela la, ka tumau ei tatou ‘i te alofa o te Atua, ka koi fakatali‵tali tatou ki te ‵tou Aliki ko Iesu Keliso, ke tuku atu ne ia a te ola se-gata-mai i tona alofa ‵nau.’—Iuta 21.
Ka Tali Mai Pefea ne Koe?
• Se a te uiga o te pati ko te “Tiapolo,” kae ne fetaui pefea a amioga a te Tiapolo mo te uiga tenā?
• E ‵kese pefea a Ieova mai te Tiapolo i lā kilokiloga ki tino o te lalolagi?
• Kaia e ‵tau ei o talia ne se tino a te togiola ke fakapilipili atu ei ki a Ieova?
• Se a te uiga ke “‵piki ‵mau” ki a Ieova, kae e mafai pefea o tumau tatou i te ‵sala atu ki a ia?
[Fesili mo te Sukesukega]
1. Se a te auala tāua e ‵kese ‵mao ei a Ieova mo Satani?
2, 3. (a) Se a te mea e maina tatou i ei i te uiga o te pati ko te “Tiapolo” ona ko te mea telā ne tupu ki a Iopu? (e) E fakaasi mai pefea ne te Tusi Tapu me e tumau eiloa te ‵losi atu o Satani ki tavini a Ieova i te lalolagi nei?
4, 5. (a) E ‵kese mai i a Satani, ne a mea kolā e onoono ki ei a Ieova i te lalolagi nei? (e) Kafai e fakaasi mai ne Ieova tena fiafia ki a tatou, ne a ‵tou mea e ‵tau o fai?
6. E fai pefea te mea ne tupu ki a Tavita e pelā me se fakamafanafanaga mo se fakailoaga foki ke fakaeteete tatou?
7. Ne a vaegā tino kolā e onoono ki ei a Ieova, kae e takitaki atu pefea ne ia a tino konā ki a Ia?
8, 9. (a) Kaia e ‵tau ei o olo atu tatou katoa ki a Iesu? (e) Se a te mea fakaofoofogia e uiga ki te fakatokaga o te togiola?
10, 11. (a) Ne a mea e ‵tau o fai ne tatou ke ‵sala atu ei ki a Ieova? (e) E ‵tau o pefea ‵tou kilokiloga ki te lalolagi a Satani?
12. (a) Ne a pati fakamafanafana ne tusi mai ne Tavita? (e) Se a te fakailoaga ne tuku mai ne Ieova e auala i te pelofeta ko Asalia?
13. E fakaasi atu pefea ne tatou me e fai a Ieova mo fai se tino tonu ki a tatou?
14. Se a te uiga ke “‵piki ‵mau” ki a Ieova?
15, 16. (a) E fakaasi mai pefea ne te Salamo e 34 me e atafai mai a Ieova ki a tatou? (e) Ne a ‵tou mea e ‵tau o fai māfai e puli sāle i a tatou a faifaiga ‵lei a Ieova ki a tatou?
17. Ne a mea e manakogina ke tumau tatou i te ‵sala atu ki a Ieova?
18, 19. (a) Ne a mea e ‵tau o fakaiku aka ke fai ne tatou? (e) Kafai e ‵tu ‵mautakitaki tatou i te ‵teke atu ki te Tiapolo kae ‵sala atu faeloa ki a Ieova, ka fakamanuia pefea tatou i ei?
[Ata i te itulau e 15]
Faitalia ana tofotofoga, ne malamalama a Iopu me ne atafai atu a Ieova ki a ia
[Ata i te itulau e 16]
A te faitau ki te Tusi Tapu i aso katoa, te kau atu faeloa ki fakatasiga Kelisiano, mo te kau atu mo te loto finafinau ki te galuega talai e fakamasaua mai ei ki a tatou me e atafai mai eiloa a Ieova