Ke ‵Pau ‵Tou Kilokiloga ki Tino mo te Kilokiloga a Ieova

“A te tagata e kilo ki te gali o te feitu ki tua, ka ko au e kilo ki te loto o te tino.” ​—⁠1 Samuelu 16:⁠7.

I TE 11 o senetenali T.L.M. ne uga atu ei ne Ieova a te pelofeta ko Samuelu ke fai ne ia se galuega ‵funa. Ne fakatonu atu a ia ki te pelofeta tenā ke fanatu ki te fale o Iese kae ke fakasopo ne ia se tamaliki tagata e tokotasi a ia mo fai te tupu o Isalaelu i aso mai mua. I te taimi muamua ne kilo atu ei a Samuelu ki te tamaliki matua eiloa a Iese, ko Eliapo, ne talitonu katoatoa a ia me ne filifili ne te Atua te tamaliki tenā. Kae ne fai atu a Ieova, penei: “Sa saga ki tena loa mo tena gali. Se ko ia tenā; e se ‵pau taku filifiliga mo te filifiliga a te tagata. A te tagata e kilo ki te gali o te feitu ki tua, ka ko au e kilo ki te loto o te tino.” (1 Samuelu 16:​6, 7) Ne seki ‵pau te kilokiloga a Samuelu mo te kilokiloga a Ieova ki a Eliapo.a

² Se mea faigofie fua ke ‵se te kilokiloga a tino ki nisi tino! E se gata i ei, e mafai o takitaki‵segina tatou ne nisi tino kolā e foliga ‵gali mai i tua kae tagailā e ‵fonu olotou loto i mea ma‵sei. I te suā feitu, kāti ka ita faeloa tatou ki se tino ‵lei ona ko te mea e se fia‵fia tatou ki ana uiga.

³ E mafai o ‵sae aka ne fakalavelave māfai e fakamasino ne tatou a nisi tino​—⁠ke oko foki eiloa ki tino kolā e masani ‵lei tatou. Kāti ne kinau koe mo se taugasoa Kelisiano. E mata, e manako koe ke toe faka‵lei aka te va fakataugasoa o koulua? Se a te mea ka fesoasoani atu ki a koe ke fai penā?

⁴ Kati e ‵lei ke kilo atu muamua koe ki uiga ‵lei o tou taina io me ko tou tuagane faka-Kelisiano tenā, i ne? Kae e ‵tau o fai penā, fakatasi mo te mafaufau ‵mafa ki pati a Iesu, penei: “E se mafai ne se tino o vau ki a au, seiloga ke māfua tona vau mai te Tamana telā ne uga mai ne ia au.” (Ioane 6:​44) Ka oti ko fesili ifo ei koe, penei: ‘Kaia ne fai ei ne Ieova a te tino tenei ke fiafia ki Tena Tama? Ne a uiga ‵lei ne fakaasi atu ne te tino tenei? E mata, ne fakaseaogā fua ne au ana uiga konā? Kaia ne fai ei māua pelā me ne taugasoa i te taimi muamua? Se a te mea ne fai ei ke fia fai taugasoa au ki te tino tenei?’ Kāti ka faigata ki a koe ke mafaufau ki uiga ‵lei o te tino tenā, maise eiloa māfai ne nofo koe mo tou loto kaitaua ki a ia mō se taimi tai mata leva. Kae e tiga eiloa te faigata, e ‵tau eiloa o fai penā ko te mea ke faka‵lei aka ei te va o koulua. Ko te mea ke fakaataata i ‵tou mafaufau a mea kolā e ‵tau o fai, ke onoono tatou ki uiga ‵lei o tāgata e tokolua kolā ne lauiloa me ne fai ne laua a mea ‵se. A laua konei ko te pelofeta ko Iona mo te apositolo ko Petelu.

Te Tala Kātoa o Iona

⁵ Ne tavini atu a Iona e pelā me se pelofeta i te feitu ki matū o Isalaelu i te taimi ne pule mai ei te Tupu ko Ielopoamo te tokolua, te tama a Ieoasa. (2 Tupu 14:​23-​25) I te aso e tasi, ne fakatonu atu a Ieova ki a Iona ke tiakina ne ia Isalaelu kae ke fanatu ki Nineva, te laumua o te kautau malosi ko Asulia. Se a tena galuega? Ke fakailoa atu ki tino i ei me ka fakamasei te lotou fa‵kai. (Iona 1:​1, 2) I lō te fakalogo ki te fakatonuga a Ieova, ne tele keatea a Iona! Ne sopo atu a ia ki te suā vaka telā e fano ki Tasesa, se fenua ‵mao mai Nineva.​​—⁠Iona 1:⁠3.

⁶ Se a te mea e masaua faeloa ne koe māfai e mafaufau koe ki te tala o Iona? E mata, e mafaufau koe ki a ia e pelā me se pelofeta sē fakalogo? Kāti tenā te mea e fakaiku aka ne tino kolā e fai‵tau kae se mafaufau faka‵lei ki te tala kātoa. Kae, e mata, ne filifili aka ne te Atua a Iona ke fai mo fai se pelofeta ona ko tena sē fakalogo? Ikai! E se taumate, e isi ne nisi uiga ‵lei o Iona kolā e fiafia te Atua ki ei. Ke mafaufau ki te tala e uiga ki te taimi ne fai ei a ia pelā me se pelofeta.

⁷ Ne galue malosi a Iona mo te fakamaoni i Isalaelu, se fenua telā e se fia‵fia malosi a tino i ei ki tena talaiga. Ne fakamatala mai ne te pelofeta ko Amosa telā ne ola i taimi o Iona, a te kau Isalaelu e pelā me ne tino mau‵mea kae finafinau ki fakafiafiaga.b E uke ‵ki a mea ma‵sei ne ‵tupu i te fenua tenā, kae ne seki fia ‵saga atu eiloa a te kau Isalaelu ki mea ma‵sei katoa konā. (Amosa 3:​13-​15; 4:4; 6:​4-6) Kae ui ei, ne fakamaoni eiloa a Iona i te faiga ne ia o tena galuega ko te talai atu ki a latou i aso katoa. Kafai koe se tino talai o te tala ‵lei, e malamalama ‵lei koe i te faigata ke talai atu ki tino kolā e fia‵fia ki olotou olaga kae se fia ‵saga lele eiloa ki te tala ‵lei. E tiga eiloa e isi ne vāivāiga o Iona, ke mo a ma manatu ma‵ma tatou ki ana uiga ‵lei, ko te fakamaoni mo te loto kufaki i te taimi ne talai atu ei a ia ki tino Isalaelu sē fakamaoni.

⁸ E sili atu te ‵mafa o te galuega ne ‵tau o fai i Nineva. E ‵tau mo Iona o sasale i se 500 maila ke oko atu ki te fa‵kai tenā​—⁠se malaga faigata ‵ki eiloa telā kāti e ‵tau o fai i se masina e tasi. E ‵tau mo Iona o talai ki tino Asulia kolā ne lauiloa i te fakasauā tino māfai e oko atu a ia ki konā. Ne lauiloa latou i faifaiga fakasauā i olotou taua. Ne fakamata‵mata foki latou ki olotou faifaiga fakasauā konā. E se tioa eiloa o taku a Nineva e pelā me se “fa‵kai ta tino”!​​—⁠Nauma 3:​1, 7.

⁹ Ona ko te sē fia fakalogo o Iona ki te fakatonuga a Ieova, ne sopo atu a ia ki te suā vaka telā e fanatu ki se koga telā e mao ‵ki mai Nineva. Kae ui ei, ne seki gata te loto talitonu o Ieova ki tena tavini, kae ne seki ‵sala aka ki se isi tino ke sui ne ia a Iona. I lō te fai penā, ne gasuesue a Ieova o fai ne ia a Iona ke iloa ne ia te tāua o tena galuega e ‵tau o fai. Ne fai ei ne te Atua ke poko te matagi malosi i te tai. Ne fepeipeiaki valevale ne galu a te vaka telā ne sopo i ei a Iona. Toeitiiti kae ‵mate atu a tino fakaa‵lofa i luga i te vaka ona ko te sē fakalogo o Iona! (Iona 1:⁠4) Ne a mea ne fai ne Iona? Ona ko te mea ne seki manako a ia ke ‵mate a kauvaka, ne fai atu a Iona ki a latou, penei: “‵Pei au ki te tai kae ka malū te moana.” (Iona 1:​12) Ne seki ai eiloa se fakamoemoega o Iona me ka fakasao a ia ne Ieova i te taimi ne ‵pei ei a ia ne kauvaka ki te tai. (Iona 1:​15) Kae ui ei, ne lotomalie eiloa a Iona ke mate a ia kae ke ‵sao a kauvaka. Ne fakaasi faka‵lei mai ne Iona i konei a te loto toa, te loto maulalo mo te alofa, i ne?

¹⁰ Fakamuli ifo, ne fakasao ne Ieova a Iona. E mata, ne taofi aka ne te Atua a Iona mai te tavini atu ki a ia ona ko ana faifaiga konā? Ikai, ne toe uga atu ne Ieova a te pelofeta tenā ke talai atu ki tino i Nineva ona ko tena loto fakamagalo mo tena alofa ki a ia. I te taimi ne oko atu ei a Iona ki Nineva, ne fakaasi atu ne ia mo te loto toa ki tino i konā me ko lavea mai ne te Atua a olotou mea ma‵sei katoa kae ka fakamasei te lotou fakai i te 40 aso mai tua o tena talaiga. (Iona 1:2; 3:⁠4) I te taimi ne ‵logo ei a tino Nineva i te fekau a Iona, ne sala‵mo latou kae ne ‵sao latou i ei.

¹¹ Ne seki fiafia a Iona ki te mea tenā. E auala i se fakaakoakoga aogā ne fesoasoani atu a Ieova mo te loto kufaki ke iloa ne Iona me e se kilo atu fua a Ia ki foliga o te tino kae iloilo faka‵lei ne ia tena loto. (Iona 4:​5-​11) Ona ko te tala kātoa telā ne tusi ne Iona e uiga ki a ia, ko iloa ei ne tatou me ne aogā eiloa te fakaakoakoga tenā ki a ia. E fakamaoni mai foki i ei a tena loto maulalo ona ko tena loto malie ke fakaasi mai ne ia ana mea ‵se katoa, faitalia me ne masiasi a ia i ei. E ‵tau o loto toa se tino o fakaasi atu ana mea ‵se!

¹² I te fia selau tausaga mai tua ifo i ei, ne fai ne Iesu se fakatusaga ‵lei e uiga ki se mea telā ne tupu i te olaga o Iona. Ne fai mai a ia, penei: “A Iona ne nofo i te tinae o te ika i ao mo po e tolu, ka penā foki te Tama a te Tagata, ka tolu ao, tolu po i lalo i te laukele.” (Mataio 12:40) Kafai ko fakatu aka a Iona, ka iloa ei ne ia me ne fakatusa ne Iesu a te taimi ne nofo ei a Iona te pelofeta i te koga pouli tagataga i te tinae o te ika ki te taimi ne nofo ei a Ia i te tanuga. Ka fia‵fia eiloa tatou ki se vaegā Atua telā e se mafai o ‵fiu i ana tavini māfai ko fai ne latou a mea ‵se, i ne? Ne tusi mai te faisalamo, penei: “E pelā mo te alofa o te tamana ki ana tama‵liki, e penā foki te alofa o te Aliki ki tino kolā e āva ki a ia. E iloa ne ia a te mea ne faite ki ei tatou, e manatua foki ne ia i a tatou ne pefu.” (Salamo 103:​13, 14) E mafai o fai ne “pefu” konei​​—⁠e aofia i ei a tino se ‵lei katoatoa i aso nei​—⁠a mea aogā e uke mai te fesoasoani o te agaga tapu o te Atua!

Te Kilokiloga ‵Lei ki a Petelu

¹³ Ke onoono faka‵lei nei tatou ki te lua o fakaakoakoga, ko te fakaakoakoga a te apositolo ko Petelu. Kafai e fesili atu se tino ke fakamatala mai ne koe a uiga o Petelu, e mata, ka mafaufau koe ki a ia e pelā me pati ‵pole kae fakamatamata? E tonu ne fakaasi atu ne Petelu a uiga konā i nisi taimi. E a, ne filifili ne Iesu a Petelu e pelā me se tokotasi o ana apositolo e toko 12 ona ko tena pati ‵pole mo te fakamatamata? (Luka 6:​12-​14) Ikai! Ne seki saga a Iesu ki ana vāivāiga konā, kae ne lavea ne ia a uiga ‵lei o Petelu.

¹⁴ I nisi taimi ne fai a Petelu mo fai te sui o te kau apositolo. Kāti e ma‵natu aka a tino me e se lava tena loto maulalo. Kae, e mata, e tonu eiloa te manatu tenā? Ne fai mai nisi tino me kāti e matua atu a Petelu i nisi apositolo​—⁠kāti ne matua atu foki a ia i a Iesu. Kafai e tonu te manatu tenā ko maina faka‵lei i ei tatou i te pogai e oso vave atu sāle ei a Petelu o faipati. (Mataio 16:22) Kae e isi foki se isi pogai e ‵tau o mafau‵fau tatou ki ei. Ne malosi ‵ki a Petelu i te feitu faka-te-agaga. Ne silisili atu sāle a ia ke maua ne ia te iloaga tonu. Kae ne aogā ‵ki a fesili konā ki a tatou. Ne tali faka‵lei ne Iesu a nisi fesili a Petelu kae e maua atu ne tatou a mea aogā katoa konā i te Tusi Tapu. Ne faipati a Iesu e uiga ki te “tavini fakamaoni kae poto” ona ko te fesili a Petelu. (Luka 12:​41-​44) Kae ke mafaufau foki ki te fesili tenei a Petelu: “Ko tuku ne matou omotou mea katoa, kae tau‵tali atu i a koe. E a, e isi la se mea e maua ne matou?” Ona ko te fesili tenā, ne fai mai ei ne Iesu se folafolaga fakamalosi loto, penei: “So se tino e tiakina ne ia ona fale, taina, tuagane, te tamana mo te mātua, fanau mo manafa ona ko toku igoa; e sili atu i te uke o ana mea e maua fakamuli, kae tuku atu foki ki a ia te ola se-gata-mai.”​​—⁠Mataio 15:15; 18:​21, 22; 19:​27-​29.

¹⁵ E isi foki se isi uiga gali o Petelu​​—⁠ko tena fakamaoni. I te taimi ne tiaki ei ne te kau soko a Iesu, ona ko te sē malamalama i se akoakoga e tasi, ne sui ne Petelu ana apositolo e toko 12 mai te fai atu, penei: “Te Aliki, ko oi te tino ka olo matou ki ei? A muna o te ola se-gata-mai, e nofo mo koe.” (Ioane 6:​66-​68) Ko tafaga la te fakamafanafana atu o pati konā ki a Iesu! Fakamuli ifo, i te taimi ne puke fakapagota ei ne tāgata ma‵sei te lotou Pule, ne ‵tele keatea a te tokoukega o ana apositolo. Kae ne tautali ‵mao atu eiloa a Petelu ki te vaitino ke oko eiloa ki te titi o te fale o te faitaulaga pule. Ne fanatu a Petelu ki konā ona ko tena loto toa kae se ko te mataku. I te taimi koi fakamasino ei a Iesu, ne saga‵saga fakatasi a Petelu mo nisi tāgata Iutaia o fakavelavela i tafa o te afi. Ne lavea a ia ne te tavini e tokotasi a te faitaulaga pule, kae ‵losi atu me i a ia se tokotasi ne ‵nofo tasi mo Iesu. E tonu, ne fakafiti ne Petelu tena Pule, kae e se ‵tau o puli i a tatou me ne oko atu a Petelu ki te tulaga fakamataku tenā ona ko tena fakamaoni mo tena manavase ki a Iesu, kae ne seki lava te loto malosi o nisi apositolo ke fai penā.​​—⁠Ioane 18:​15-​27.

¹⁶ E sili fakafia atu te uke o uiga ‵lei o Petelu i lō ana vāivāiga. Kae penā foki eiloa a Iona. Ko tai ‵kese nei ‵tou kilokiloga ki uiga o Iona mo Petelu i lō ‵tou kilokiloga mua ki a laua. Tela la, ke na taumafai faeloa tatou o ‵kilo atu ki uiga ‵lei o ‵tou taina mo tuagane faka-te-agaga i te vaitaimi nei. Kafai e fai penā ka maua i ei ne tatou se va fealofani ‵lei. Kaia e ‵tau ei o ‵kilo atu faeloa ki uiga ‵lei o ‵tou taina mo tuagane?

Ke na Fakagalue Aka te Akoakoga Tenei i Aso Nei

¹⁷ E tavini fakatasi atu a tāgata, fāfine mo tama‵liki mai matakāiga kese‵kese i aso nei, ki a Ieova, faitalia olotou tulaga i mea tau tupe mo akoakoga. (Fakaasiga 7:​9, 10) E se tioa eiloa o uke a vaegā tino kese‵kese e lavea ne tatou i te fakapotopotoga! Kāti e mafai o ‵sae aka a kinauga i nisi taimi māfai e ga‵lue tasi faeloa tatou i te tavini atu ki te Atua.​​—⁠Loma 12:10; Filipi 2:⁠3.

¹⁸ E ui eiloa e lavea ne tatou a vāivāiga o ‵tou taina, e se ‵saga malosi atu tatou ki mea konā. E taumafai tatou o fakaakoako atu ki a Ieova, e pelā mo pati a te faisalamo, penei: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?” (Salamo 130:⁠3) I lō te ‵saga tonu atu ki uiga o tino kolā e mafai o māfua mai ei a mavaevaega, e ‵tau o “salasala ne tatou a mea e tupu ei te filemu, mo mea e fakatau putiputi ake ei tatou.” (Loma 14:19) Ke taumafai o faka‵pau ‵tou kilokiloga ki nisi tino mo te kilokiloga a Ieova, mai te ‵kilo atu faeloa ki olotou uiga ‵lei kae e se ko olotou vāivāiga. Kafai e fai ne tatou te mea tenei, ka mafai ei o “fakatau fakamagalo” ne tatou a nisi tino.​​—⁠Kolose 3:​13.

¹⁹ Kae pefea la māfai e isi se mea ‵se a se tino telā ko se māfai o fakapuli ne koe? (Salamo 4:⁠4) E mata, ko oti ne tupu se mea penei i te va o koulua mo se taina talitonu? Kaia e se na faka‵lei aka ei te fakalavelave tenā? (Kenese 32:​13-​15) Muamua la, ke ‵talo atu ki a Ieova, ke takitaki ne ia te faiga tenā. Ka oti, ke mafaufau ki uiga ‵lei o te tino tenā, ko fanatu ei koe ki a ia o faipati i te “loto malalo mo te poto.” (Iakopo 3:​13) Fai atu ki ei me e manako koe ke faka‵lei aka te va o koulua. Ke masaua a pati polopoloki mai te Atua, penei: “E ‵tau ke vave o faka‵logo, kae ke fakatuatuai o fai‵pati, ke se vave foki o kaitaua.” (Iakopo 1:​19) E fakauiga a te fakatakitakiga ke “se vave foki o kaitaua” ki faifaiga mo pati kolā e mafai o fai ne te suā tino ke kaitaua koe. Kafai e tupu te mea tenā, ke fakamolemole atu ki a Ieova ke maua ne koe te loto pulea. (Kalatia 5:​22, 23) Tuku atu te avanoa ki tou taina ke faipati muamua kae ke fakalogologo faka‵lei a koe. Ke se oso fakavave atu koe faitalia me sē fiafia koe ki ana pati katoa konā. Kāti e ‵se tena kilokiloga, kae e se ‵tau o ita tatou me tenā eiloa tena kilokiloga i te vaitaimi tenei. Taumafai ke maina koe i tena fakalavelave. Kāti ka maina koe i te pogai e kaitaua atu ei tou taina ki a koe.​​—⁠Faataoto 18:⁠17.

²⁰ Kafai ko ‵tau o faipati koe, ke ata faipati atu ki a ia. (Kolose 4:⁠6) Ke fakaasi atu ki a ia ana uiga ‵lei kolā e fiafia koe ki ei. Ke fakatoese atu e uiga ki mea kolā ne fai ne koe ke tupu ei te fakalavelave tenā. Kafai ne iku mo te manuia au taumafaiga kolā ne fai mo te loto malalo, ke fakafetai atu ki a Ieova. Kafai e se ‵lei te fakalavelave tenā, ke tumau i te fakamolemole atu ki a Ieova mo tena fakatakitakiga kae ke ‵sala ne koe a nisi avanoaga ke maua mai ei te filemu.​​—⁠Loma 12:⁠18.

²¹ E alofa eiloa a Ieova ki ana tavini katoa. E fiafia malosi foki a ia ke fakaaogā ne ia tatou katoa i tena galuega faitalia ‵tou tulaga sē ‵lei katoatoa. Kafai ko maina tatou i tena kilokiloga ki nisi tino, ka momea aka foki ei te lasi o te ‵tou a‵lofa ki ‵tou taina mo tuagane. Kafai ko gasolo ifo eiloa te ‵tou a‵lofa ki se taina talitonu, e mafai o toe fakamalosi aka te alofa tenā. Ka maua ne tatou a fakamanuiaga ‵gali māfai e taumafai malosi tatou o fakaasi atu a te fiafia ki nisi tino ko te mea ke ‵pau ‵tou kilokiloga mo te kilokiloga a Ieova ki a latou!

[Fakamatalaga mai lalo]

Ka Tali Mai Pefea ne Koe?

• E kilo atu pefea a Ieova ki vāivāiga o ana tavini fakamaoni?

• Ne a uiga ‵lei o Iona mo Petelu?

• Se a te kilokiloga ki ou taina Kelisiano e ‵tau o ‵piki ‵mau koe ki ei?

[Fesili mo te Sukesukega]

1, 2. Kaia ne ‵kese ei te kilokiloga a Ieova mo te kilokiloga a Samuelu ki a Eliapo, kae se a te mea ko iloa ne tatou mai i ei?

3, 4. (a) Kafai e sae aka se fakalavelave i te va o se avā Kelisiano, se a te mea e ‵tau o fai ne laua? (e) Ne a fesili e ‵tau o ‵sili ifo ne tatou māfai e isi se kinauga i te va o tatou mo se taina talitonu?

5. Se a te galuega ne fakatonu atu ne Ieova ke fai ne Iona, kae ne a mea ne fai ne Iona i ei?

6. Kaia ne filifili ei ne Ieova a Iona ke fano ki Nineva?

7. Ko vaegā fakanofonofoga fea ne tavini atu ei a Iona ki a Ieova i Isalaelu, kae e ‵fuli aka pefea ne te mea tenei tau kilokiloga ki a Iona?

8. Ne a tofotofoga faiga‵ta ne mafai o oko atu ki so se pelofeta Isalaelu i Nineva?

9. Ne a uiga ne fakaasi atu ne Iona i te taimi ne ma‵taku ei a kauvaka i te matagi malosi?

10. Se a te mea ne tupu i te taimi ne toe uga atu ei ne Ieova a Iona ke fai tena galuega?

11. Se a te mea e fakaasi mai ei me ne aogā ki a Iona se fakaakoakoga tāua e tasi?

12. (a) E iloa pefea ne tatou me e ‵pau te kilokiloga a Iesu mo Ieova ki tino? (e) Se a te kilokiloga e ‵tau o maua ne tatou ki tino kolā e talai atu ki ei a te tala ‵lei? (Ke onoono ki te pokisi i te itulau e 14.)

13. Ne a uiga o Petelu e mafai o masaua vave ne tatou, kae kaia ne filifili ei ne Iesu a ia ke fai mo fai se apositolo?

14. (a) Ne a pogai ne oso vave atu sāle ei a Petelu o faipati? (e) Kaia e ‵tau ei o loto fakafetai tatou ki te uke o fesili a Petelu ne silisili atu sāle?

15. Kaia e mafai ei o fai atu me i a Petelu se tino fakamaoni?

16. Ne a pogai tāua ne mafau‵fau ei tatou ki uiga ‵lei o Iona mo Petelu?

17, 18. (a) Kaia e mafai ei o ‵sae aka ne kinauga i va o Kelisiano? (e) Ne a fakatakitakiga mai te Tusi Tapu e aogā ke faka‵lei aka ei a fakalavelave i te va o tatou mo ‵tou taina?

19. Ke taku mai a mea aogā kolā e mafai o fai ne se Kelisiano ke faka‵lei aka ei a kinauga.

20. Ne a nisi mea e mafai o fai ke faka‵lei aka ei a fakalavelave?

21. Ne fesoasoani atu pefea te sautalaga tenei ke ‵pau ‵tou kilokiloga mo te kilokiloga a Ieova ki nisi tino?

[Pokisi i te itulau e 14]]

Ke Mafaufau ki te Kilokiloga a te Atua ki Nisi Tino

I te taimi e mafaufau ‵loto ei koe ki te tala o Iona, e mata, e lavea ne koe te tāua ke ‵fuli tau kilokiloga ki tino kolā e talai atu sāle ne koe a te tala ‵lei ki ei? Kāti e ‵pau latou mo te kau Isalaelu kolā ne lotoma‵lie eiloa ki olotou olaga kae se fia ‵saga tonu mai ki te tala ‵lei, io me ‵teke ‵tonu atu ki te fekau a te Atua. Kae se a te kilokiloga a Ieova te Atua ki a latou? E mafai foki eiloa o ‵sala atu a nisi tino lauiloa i aso nei ki a Ieova, e pelā mo te tupu o Nineva telā ne salamō ona ko te talaiga a Iona.​—⁠Iona 3:​6, 7.

[Ata i te itulau e 11]

E mata, e ‵pau tau kilokiloga mo te kilokiloga a Ieova ki nisi tino?

[Ata i te itulau e 12]

Ne faipati Iesu e uiga ki se mea telā ne tupu i te olaga o Iona ke fakamalosi ei tatou