Iona mo te Ika Lasi

KILO atu ki te tagata i te tai. Ko fepaki a ia mo se fakalavelave lasi, i ne? A te ika tenā ka fai o folo ne ia tou tagata! E iloa ne koe me ko oi a te tagata tenei? Tena igoa ko Iona. Ke onoono aka tatou me ne oko atu pefea a ia ki te fakalavelave lasi tenei.

A Iona se pelofeta a Ieova. E seki leva mai tua o te matega o te pelofeta ko Elisaia telā ne fai atu ei a Ieova ki a Iona: ‘Fano ki te fa‵kai lasi ko Nineva. Ko oko eiloa i te ma‵sei o tino i ei, kae e manako au ke faipati koe ki a latou e uiga ki ei.’

Kae ne seki manako a Iona ke fano a ia. Tela la, ne sopo a ia ki se vaka e fano keatea ki te suā koga e ‵mao mai Nineva. Ne seki fiafia a Ieova ki a Iona me ne tele keatea a ia. Tela la, ne fai ne Ia ke poko se matagi lasi. Ona ko te lasi o te matagi, toeitiiti eiloa ko apulu te vaka. Ne ma‵taku ‵ki a kauvaka, kae ne ‵tagi atu latou ki olotou atua mō se fesoasoani.

Fakamuli loa ne fai atu a Iona ki a latou: ‘Au e tapuaki ki a Ieova, te Atua telā ne faite ne ia a te lagi mo te lalolagi. Kae ko tele kea‵tea au mai te faiga o te mea telā ne fai mai ei a Ieova ke fai ne au.’ Tela la, ne fesili atu a kauvaka: ‘Ne a mea e ‵tau o fai ne matou ki a koe ke fakagata aka ei a te matagi?’

‘‵Pei au ki te tai, kae ka toe manino te tai,’ ko muna a Iona. Ne seki ma‵nako a kauvaka o fai a te mea tenā, kae i te taimi ne momea aka ei a te masei o te matagi ne ‵pei ei ne latou a Iona ki lalo i te tai. I konā foki eiloa, ne gata ei a te matagi, kae ne toe manino te tai.

I te taimi ne goto ifo ei a Iona i te tai, ne folo a ia ne te ika lasi. Kae ne seki mate a ia. Ne nofo a ia i te tinae o te ika tenā i ao mo po e tolu. Ne salamō a Iona me ne seki fakalogo a ia ki a Ieova kae fano ki Nineva. Tela la, e iloa ne koe me se a te mea ne fai ne ia?

Ne ‵talo atu a Iona ki a Ieova mō se fesoasoani. Telā ne fai ei ne Ieova ke luaki mai ne te ika a Iona ki uta. Mai konā ne fano ei a Iona ki Nineva. E tonu, e akoako mai ne te mea tenei a te tāua ke fai ne tatou so se mea telā e fai mai ne Ieova, i ne?