‘Sā Ma‵taku io me Pole‵pole’

“Sā fakatalave io me ma‵taku. . . . Ka fakatasi atu te Aliki ki a koutou!”​—⁠2 NOFOAIGA TUPU 20:⁠17.

AMIOGA takafia‵toa! E fakamāfua aka ne pati konei a te mataku, te sē tokagamalie mo te manavase valevale i tino. E fai i ei ke ma‵taku, māfatia kae ke kaitāua foki a tino i te taimi e tasi. Ne pati kolā e tali‵tonu a tino e tokouke me ka fai mo fai se mala ki luga i tino katoa. Ona ko te iku vale o taumafaiga a nisi fenua ke fakagata a amioga takafia‵toa i te fia o tausaga ko ‵teka, e fai i ei ke malama‵lama tatou i te pogai ko ma‵taku i ei a tino.

² Kae ui ei, e isi eiloa se fakamoemoega mō tatou. E maua ne Molimau a Ieova kolā e talai atu nei i fenua e 234 i te lalolagi kātoa se kilokiloga mautinoa. I lō te ma‵taku me e sē mafai o fakagata aka a amioga takafia‵toa, e tali‵tonu katoatoa latou me ka fai penā i se taimi pili mai mua nei. E mata, e ‵tau o maua ne tatou te kilokiloga tenā? Ko oi te tino e mafai o fakaseai katoatoa ne ia a amioga konei, kae pefea foki la? Ona ko te pokotia o tatou katoa i amioga fakasauā, se mea ‵tau ke iloilo faka‵lei ne tatou a te pogai e ‵tau ei o maua se kilokiloga mautinoa.

³ E uke a pogai kese‵kese e ma‵taku kae pole‵pole ei a tino i aso nei. Ke mafaufau ki tino e tokouke kolā ko sē mafai o tausi ki a latou eiloa ona ko te olaga matua, tino e pokotia ne masaki ko sē mafai o faka‵lei, mo kāiga kolā e sē lava olotou tupe ke tausi ei te olaga. Ke mafaufau foki la ki te ‵numi ona ko te sē mautinoa me ka iku atu ki fea te olaga! E foliga mai me i te ‵mate fakapoi ona ko fakalavelave ‵tupu fakafuasei, e oko mai ki a tatou i so se koga kae e fakagata ne ia a mea kolā e pele i ‵tou loto. A te vaegā mataku mo te manavase tenei fakatasi mo ‵tou fakalavelave totino, e fai ei ke iloa tonu ne tatou me ko ‵nofo atu tatou i aso kolā ne fakamatala mai ne Paulo, penei: “Ke masaua a te mea nei! Ka isi ne taimi faiga‵ta i aso fakaoti. Ko tino ka ma‵natu fakapito, . . . e sē kaima‵lie, e sē loto a‵lofa, e gutu fatufatu, e faka‵tupu taua, e mata kaitaua, e ita ki te ‵lei.”​​—⁠2 Timoteo 3:​1-3.

⁴ E ui eiloa e fakaasi mai i konei se ata sē ‵lei o mea kolā e ‵tupu, kae e fakasino atu foki ki se fakamoemoega gali. Ke masaua me ka oko mai a taimi faiga‵ta i “aso fakaoti” o te olaga masei a Satani tenei. E fakauiga i ei me ko pili mai te fakatapūga kae ka sui i ei te olaga masei tenei ne te pulega ‵lei katoatoa a te Malo o te Atua, telā ne fakaakoako ne Iesu ana soko ke ‵talo ki ei. (Mataio 6:​9, 10) E fai mai te pelofeta ko Tanielu me i te Malo tenā ko te malo faka-te-lagi a te Atua, telā ‘ka sē toe mafai o takavale ka fakatakavale ne ia a malo katoa konā, kae ka tumau ki te se-gata-mai.’​—⁠Tanielu 2:⁠44.

Te ‵Kese o te sē ‵Kau Atu o Kelisiano ki se Feitu mo Tino Amio Takafia‵toa

⁵ E lau i afe a tino ne ‵mate ona ko amioga takafia‵toa i te fia o tausaga ko ‵teka. Ne gasolo o fakaeteete malosi a tino i te lalolagi kātoa i te fakamataku o te amioga tenei talu mai te fakalavelave telā ne tupu i Niu Ioki mo Washington, D.C., i a Setema 11, 2001. Ona ko te pokotia o tino katoa i te lalolagi i amioga takafia‵toa, ne ‵kau fakavave a fenua e uke i te lalolagi ke taua atu ki ei. E ‵tusa mo lipoti i nusipepa, e fakaasi mai i ei me i a Tesema 4, 2001, “ne loto tasi a minisita mai fenua kese‵kese e 55 i Eulopa, Amelika ki Mātū mo fenua i te kogāloto o Asia ki se fakatokaga” ke fakataunu ei olotou taumafaiga. Ne tavae atu se ofisa maluga o te U.S. ki te faifaiga tenā e pelā me “se malosi fou” ke taua atu ki amioga takafia‵toa. Ne ‵kau fakavave atu a tino e lau i miliona ki te mea telā e taku ne The New York Times Magazine ki te “kamataga o se matugā taua lasi ‵ki.” E ‵nofo fakatalitali nei a tino ki te taimi e iloa ei me pefea te manuia o olotou taumafaiga. A te taua atu ki amioga takafia‵toa e fakatupu aka ei te mataku mo te manavase i tino e tokouke, kae sē penā loa a tino kolā e tali‵tonu ki a Ieova.

⁶ E lauiloa malosi a Molimau a Ieova ona ko te lotou sē ‵kau atu ki se feitu i faifaiga fakapolitiki. E tiga eiloa e talia ne te tokoukega o tino te tulaga tenei i taimi kolā e maua ei te filemu, kae kafai ko ‵tupu ne fakalavelave ‵lasi ko gasolo ei o sē lava te kufaki. E fakamalosi aka ne te ma‵taku mo te ‵numi o tino i taua penā, a te loto fenua. Kāti e fai foki i ei ke faigata o malamalama a tino e tokouke i te pogai e sē ‵lago atu ei a nisi tino ki gasuesuega a te fenua. E tonu, e iloa ‵lei ne Kelisiano ‵tonu me e ‵tau o faka‵logo latou ki te fakatonuga a Iesu ke ‘sē ‵kau latou ki te lalolagi.’ (Ioane 15:19; 17:​14-​16; 18:36; Iakopo 4:⁠4) E fakaasi mai i ei me e sē ‵tau o ‵kau atu latou ki mea fakapolitiki io me ko kinauga masani o te olaga. Ne fakaasi mai ne Iesu se fakaakoakoga ‵lei i te feitu tenā. Ona ko te katoatoa o tena poto mo tena fai mea mafai, ne mafai fua ne ia o faka‵lei aka a olaga o tino i ana aso. Kae ne ‵kalo keatea a ia mai te kau atu ki faifaiga fakapolitiki. I te kamataga o tena galuega, ne ‵teke malosi atu a ia ki te pulega telā ne ofo atu ne Satani ke pule a ia ki malo katoa o te lalolagi. Fakamuli ifo, ne ‵teke atu a ia ki taumafaiga a tino ke kau atu ki mea fakapolitiki.​​—⁠Mataio 4:​8-​10; Ioane 6:​14, 15.

⁷ A te sē ‵kau atu o Molimau a Ieova ki se feitu e sē fakauiga i ei me e ‵lago io me e sē fia ‵saga atu latou ki faifaiga fakasauā. Kafai e fai latou penā, ka fe‵paki ei olotou faifaiga mo olotou pati i a latou ko tavini a “te Atua o te alofa mo te filemu.” (2 Kolinito 13:11) Ko oti ne iloa ne latou a lagonaga o Ieova e uiga ki amioga fakasauā. Ne tusi mai a te faisalamo, penei: “Ka sukesuke ne te Aliki a tino ‵lei mo tino amio ma‵sei; a tena loto katoatoa e se fiafia ki tino ofa tulafono.” (Salamo 11:⁠5) E maina foki latou i pati a Iesu ne fai ki te apositolo ko Petelu, penei: “Tuku tau pelu ki tena sifi; me ko latou katoa kolā e fakaaogā te pelu, e ‵mate foki i te pelu.”​​—⁠Mataio 26:⁠52.

⁸ E tiga eiloa, e fakaasi mai ne tala mua me e fakaaogā sāle ne Kelisiano ‵loi a “te pelu,” e sē penā loa a Molimau a Ieova. E ‵kalo keatea latou mai faifaiga katoa penā. E faka‵logo mo te fakamaoni a Molimau ki te fakatonuga i te Loma 13:​1, 2, penei: “A tino katoa e ‵tau o faka‵logo ki pule o te malo [takitaki o malo], i te mea ne aumai katoa mai i te Atua te lotou tulaga pule. A tino pule katoa konei e ‵tu nei, ne faka‵tu katoa ne te Atua. Tela la, ko te tino telā e ‵teke ki pule e ‵teke foki ki te mea ne filifili ne te Atua, ka ko latou foki kolā e ‵teke, ka i luga i a latou te fakamasinoga.”

⁹ Ona ko te matagā o amioga takafia‵toa, e mata, e sē ‵tau o fesoasoani atu a Molimau a Ieova ke taua atu ki ei? E tonu, e ‵tau o fai penā, kae tenā loa te mea e fai ne latou. Muamua la, e ‵kalo keatea latou mai te faiga o amioga konā. Te lua o mea, e akoako ne latou a tino ki fakatakitakiga faka-Kelisiano kae kafai ko tau‵tali ki ei ko sē fai ei ne latou a amioga fakasauā.a I te tausaga ko teka ne fakamāumāu ne Molimau a Ieova a itula e 1,202,381,302 ke fesoasoani atu ei ki tino ke iloa ne latou te auala faka-Kelisiano tenei. Ne seki māumāu eiloa a taimi konei me ne iku atu i ei ki te papatisoga o tino e toko 265,469 ke fai pelā me ne Molimau a Ieova kae fakaasi atu ei ki tino katoa te lotou ‵teke katoatoa atu ki faifaiga fakasauā.

¹⁰ E se gata i ei, e iloa foki ne Molimau a Ieova me e sē mafai o fakaseai katoatoa ne latou a amioga ma‵sei mai te lalolagi. Tenā loa te pogai e tali‵tonu katoatoa ei latou ki te tino telā e mafai ne ia o fai penā​​—⁠ko Ieova te Atua. (Salamo 83:18) Faitalia olotou taumafaiga katoa, e sē mafai ne tino o fakaseai katoatoa a amioga fakasauā. Ne faka‵pula mai ne te tino telā ne tusi ne ia se vaega o te Tusi Tapu e uiga ki ‵tou aso nei, ko “aso fakaoti,” penei: “Tino ma‵sei mo te fakaloiloi tino, ka kamata eiloa latou mai te masei o fakasolo o na ma‵sei atu, i te fakaloiloi ki nisi tino, kae toe pa‵kia foki eiloa latou i olotou loi.” (2 Timoteo 3:​1, 13) Mai te kilokiloga tenei e se mafai eiloa o manuia a taumafaiga a tāgata ke manumalo latou i te taua atu ki amioga ma‵sei. I te suā feitu, e mafai o fakalago‵lago tatou ki a Ieova ke fakaseai katoatoa ne ia a amioga fakasauā ki te se-gata-mai.​—⁠Salamo 37:​1, 2, 9-​11; Faataoto 24:​19, 20; Isaia 60:⁠18.

Ke Loto ‵Toa Faitalia a Taua ka Oko Mai

¹¹ Ona ko te takalialia o te Atua o te filemu ki amioga fakasauā, e mafai o malama‵lama tatou i te pogai e gasuesue ei a ia ke fakaseai te tino e māfua mai i ei a fakasauāga, ko Satani te Tiapolo. E tonu, ko oti ne fakamasiasi ne Ia a Satani ona ko tena takavale i te agelu sili ko Mikaele​—⁠ko te Tupu telā ne fatoā fakasopo aka ne te Atua, ko Keliso Iesu. E fai mai a te Tusi Tapu, penei: “Ne tau te taua i te lagi. Ko Mikaele mo ana agelu ne taua mo te talako mo ana agelu. Kae ne takavale te talako, kae ne sē toe talia a ia mo ana agelu ke toe ‵nofo i te lagi. Ne ‵tuli keatea te talako lasi! Ko ia ko te gata taumua eiloa telā e igoa ki te Tiapolo io me ko Satani, telā ne fakaloiloi ne ia te lalolagi kātoa. Ne ‵pei ifo a ia fakatasi mo ana agelu ki te lalolagi.”​​—⁠Fakasiga 12:​7-9.

¹² E fetaui ‵lei a valoaga i te Tusi Tapu mo mea kolā e ‵tupu i te lalolagi nei kae fakasino atu katoa a mea konā ki te tausaga e 1914 me ko te taimi telā ne fai ei te taua tenā i te lagi. Talu mai te taimi tenā, ne gasolo aka eiloa o ma‵sei atu a mea e ‵tupu i te lalolagi. E fakaasi mai i te Fakaasiga 12:12 a te pogai ko fai ei penā, penei: “Tela la, ke fiafia te lagi, pelā foki mo tino katoa e ‵nofo i ei, kae kalofa eiloa i te lalolagi mo te tai! I te Tiapolo ko oti ne fanaifo ki a koulua, ka ko oko eiloa i te kaitaua, me e iloa ne ia ko sē leva ona aso i te lalolagi.”

¹³ E manino eiloa, me ko fakaoko ‵tonu eiloa ne te Tiapolo a tena kaitaua ki tino tapuaki fakaekegina a te Atua mo olotou taugasoa ko ‘nisi mamoe’. (Ioane 10:16; Fakaasiga 12:17) Ka oko atu a te ‵tekeatuga tenei ki te ‵toe tulaga fakaoti māfai ko taua ‵tonu atu a Satani ki tino katoa kolā e ‵lago ki te Malo o te Atua kae tali‵tonu katoatoa ki ei. E taku a te taua tenei i te Esekielu mataupu e 38 e pelā me ko te taua a “Koka . . . i te fenua o Makoku.”

¹⁴ Talu mai te taimi ne ‵pei ifo ei a Satani mai te lagi, ko oti ne maua ne nisi tino o te Atua i nisi taimi a te puipuiga mai osomaiga a Satani e auala i taumafaiga a nisi malo fakapolitiki, kolā e fakamatala mai i te Fakaasiga 12:​15, 16. E ‵kese mai i ei, e fai mai te Tusi Tapu me i te osoatuga fakaoti a Satani ka seai eiloa ne tino ka olo atu o fesoasoani ki tino kolā e tali‵tonu katoatoa ki a Ieova. E mata, e ‵tau mo Kelisiano o ma‵taku ona ko te mea tenei? Ikai!

¹⁵ Ka ‵lago atu a te Atua ki ana tino e pelā eiloa mo tena ‵lago atu ki tena fenua i aso o te tupu ko Iosefatu. E fai‵tau tatou, penei: “Tou ‵Malu te Tupu, mo tino katoa o Iuta mo Ielusalema. A te Aliki ne fai mai ke mo a koutou e loto vai‵vai io me ma‵taku o fakasaga tau atu ki te kautau lasi tenā. Ko te Atua e taua, sē ko koutou. . . . A koutou e sē ‵tau o taua i te taua tenei. ‵Tu fua i otou tulaga, ko faka‵tali ei; ka matea ne koutou te Aliki ka avatu ne ia te manumalo ki a koutou. Tino Iuta mo Ielusalema, sa fakatalave io me ma‵taku. Olo ki te taua, kae ka fakatasi atu te Aliki ki a koutou!”​​—⁠2 Nofoaiga Tupu 20:​15-​17.

¹⁶ Ne fakatalitonu atu ki tino Iuta me e sē manakogina ke taua atu latou. I se auala foki penā, kafai ko oso mai a Koka mai Makoku ki tino o te Atua, ka sē fakaaogā eiloa ne latou a meatau ke taua atu. I lō te fai penā, ka ‘‵tu fua latou i olotou tulaga ko faka‵tali i ei ke avatu ne Ieova te manumalo’ ki a latou. E tonu, e sē fakauiga i ei me ka seai eiloa ne mea e ‵tau o fai māfai ko ‵tu atu tatou, e pelā eiloa mo tino o te Atua i aso o Iosefatu ne seki ‵tu fua latou e aunoa mo ne olotou mea ne fai. E fai‵tau tatou, penei: “Ne ifo te Tupu ko Iosefatu ki lalo i te laukele, pelā foki mo tino katoa, tapuaki atu ei latou ki te Aliki. . . . I te otiga o tena faipatiga ki te fenua, ne fai atu ei te fakatonuga a te tupu ki nisi o te kau tā‵tā lakau ke ‵pei olotou gatu ‵loa kolā e ‵pei sale i aso ‵lasi, kae olo atu i mua o te kautau, kae usu te pese penei: ‘Tavae atu te Aliki! A tena alofa e tumau!’ ” (2 Nofoaiga Tupu 20:​18-21) E tonu, ne tumau eiloa a tino i te ‵viki atu ki a Ieova faitalia te taua tonu mai o te fili. E tuku mai i ei se fakaakoakoga gali ke tau‵tali atu ki ei a Molimau a Ieova māfai ko oso atu a Koka ki a latou.

¹⁷ Ke oko mai ki aso nei, penā foki loa mo te taimi e kamata ei te taua a Koka, ka tumau eiloa a Molimau a Ieova i te ‵lago atu ki te Malo o te Atua. Ka maua faeloa ne latou a te malosi mo te puipuiga mai te ‵kau fakatasi mo te toko 94,600 fakapotopotoga i te lalolagi kātoa. (Isaia 26:20) Tenei eiloa te taimi ke ‵viki atu ei ki a Ieova mo te loto toa! Ka sē ‵foki eiloa latou ki tua i te ma‵taku faitalia me e fakamoe‵moe latou ki te taua telā ka fai ne Koka. Ka fakamalosi aka ei latou ke ‵viki atu faeloa ki a Ieova.​​—⁠Salamo 146:⁠2.

¹⁸ Ko oti ne fakaasi atu ne te fia afe o talavou i te lalolagi kātoa kolā ko ga‵lue tumau i te taviniga, a te kilokiloga mautinoa tenei. Ke faka‵mafa aka te tāua ke filifili aka ki te vaegā olaga tenā, ko oti ne ‵tala mai a te tamā pepa ko te Talavou​—⁠Ne a Otou Fakamoemoega mō Aso Mai Mua? i te fono lasi telā ne fai i te 2002. E loto fakafetai a Kelisiano katoa, talavou mo tino ma‵tua ki vaegā fakamasauaga penā.​​—⁠Salamo 119:​14, 24, 99, 119, 129, 146.

¹⁹ E se ‵tau o ma‵taku a Kelisiano faitalia te tulaga o fakalavelave i te lalolagi i aso nei. E mautinoa i a latou me ko pili fua o fakaseai katoatoa ne te Malo o Ieova a amioga fakasauā katoa. E fakamafanafana atu foki ki a latou a te iloaga me ka toe faka‵tu a tino kolā ne ‵mate ona ko amioga fakasauā. E ui eiloa, ka maua ne tino konei a te avanoaga muamua ke iloa ne latou a Ieova, e mafai ne nisi tino o tumau faeloa i te faiga o te lotou taviniga ki a ia.​​—⁠Galuega 24:⁠15.

²⁰ E pelā me ne Kelisiano ‵tonu, e malama‵lama tatou i te pogai e tumau ei a Kelisiano i te sē ‵kau atu ki se feitu kae tu ‵mautakitaki foki i ei. E ma‵nako tatou ke puke ‵mautakitaki ki te fakamoemoega gali ke ‵tu fua i ‵tou tulaga ko faka‵tali i ei ki a Ieova ke aumai te manumalo ki a tatou. Ka fakamalosi aka ‵tou fakatuanaki ne te suā mataupu me e fai i ei ke iloa ne tatou a valoaga i te Tusi Tapu kolā ko fakataunu e auala i mea ‵tupu i te vaitaimi nei.

[Fakamatalaga mai lalo]

E Mafai o Fakamatala Mai ne Koe?

• Kaia e sē maua ei ne tino e tokouke i aso nei se kilokiloga mautinoa?

• Kaia e maua ei ne Molimau a Ieova se kilokiloga mautinoa mō aso mai mua?

• Ne a mea ko oti ne fai ne Ieova e uiga ki te tino ne māfua mai i ei a fakasauāga katoa?

• Kaia e sē ‵tau ei o ma‵taku tatou ki te osomaiga a Koka?

[Fesili mo te Sukesukega]

1. E pokotia pefea a tino i amioga takafia‵toa, kae kaia e malama‵lama ei tatou i te pogai e ma‵taku ei latou?

2. E ‵saga atu pefea a Molimau a Ieova ki amioga takafia‵toa, kae ne a fesili e ‵sae mai i ei?

3. Ne a pogai e ma‵taku ei a tino, kae ne a mea ko oti ne ‵valo mai e uiga ki ‵tou taimi nei?

4. Se a te fakamoemoega e fakasino atu ki ei a te ata sē ‵lei telā e tuku mai i te 2 Timoteo 3:​1-3?

5. Ne a mea ko oti ne fai ne nisi malo ke ‵taua atu ki amioga takafia‵toa?

6. (a) Kaia e faigata ei ke talia ne nisi tino a te tulaga o Kelisiano ke sē ‵kau atu ki se feitu telā e tau‵tali ki ei a Molimau a Ieova? (e) Ne a fakaakoakoga e uiga ki mea fakapolitiki ne fakaasi mai ne Iesu ki ana soko?

7, 8. (a) Se a te mea e sē fakauiga ki ei te sē ‵kau atu o Molimau a Ieova ki se feitu, kae kaia? (e) E fakaasi mai pefea ne te Loma 13:​1, 2 me sē ‵tau o ‵kau atu ki faifaiga fakasauā kolā e fai ki malo?

9. Ne a auala e lua e taua atu ei a Molimau a Ieova ki amioga takafia‵toa?

10. Ne a fakamoe‵moega ke fakaseai atu ei a amioga fakasauā i te lalolagi i aso nei?

11. Ne a mea ko oti ne fai ne Ieova ke fakaseai ei a amioga fakasauā?

12, 13. (a) Kaia e tāua ei te tausaga ko te 1914? (e) Se a te mea e fakaasi mai i te valoaga a Esekielu e uiga ki tino kolā e ‵lago atu ki te Malo o te Atua?

14. Ne a puipuiga ko oti ne maua ne Molimau a Ieova i aso ko ‵teka, kae e mata, ka tumau eiloa penā?

15, 16. (a) Kaia e maua ei ne Kelisiano i aso nei te loto tali‵tonu ona ko pati a Ieova ne fai ki ana tino i aso o Iosefatu? (e) Se a te fakaakoakoga ne fakaasi mai ne Iosefatu mo ana tino, ki tavini a te Atua i aso nei?

17, 18. (a) Se a te kilokiloga mautinoa e maua ne Molimau a Ieova i aso nei e uiga ki te taua a Koka? (e) Se a te fakamasauāga ne fatoā maua ne talavou Kelisiano?

19, 20. (a) Kaia e sē ‵tau ei mo Kelisiano o ma‵taku io me pole‵pole? (e) Ne a mea ka fakaasi mai i te suā mataupu?

[Ata i te itulau e 23]

Ne tuku mai ne Iesu se fakaakoakoga ‵lei ki Kelisiano ke sē ‵kau ki se feitu

[Ata i te itulau e 26]

E fia‵fia a talavou Molimau e tokouke ke ga‵lue tumau i te taviniga

[Ata i te itulau e 26]

Talavou​—Ne a Otou Fakamoemoega mō Aso Mai Mua?

[Te Fakamatalaga o Ata i te itulau e 22]

UN PHOTO 186226/M. Grafman