“A Ia ko te Motou Atua!”

E fakavae a fakamatalaga i mataupu mo sukesukega e lua konei ki te tusi ko te Draw Close to Jehovah, telā ne ‵tala mai i fono ‵lasi kolā ne fai i te lalolagi kātoa i te 2002/2003.​​—⁠Ke onoono ki te mataupu ko te “Ne Maua ne Au te Mea ne ‵Sala Malosi Au ki ei,” i te itulau e 30.

“A ia ko te motou Atua. Ne tali‵tonu matou ki a ia, kae ne fakaola eiloa ne ia matou. A ia ko te Aliki [Ieova]!”​—⁠ISAIA 25:⁠9.

NE TAKU ne Ieova, te Atua o te lagi mo te lalolagi a Apelaamo me ko “Toku taugasoa.” (Isaia 41:⁠8) Ke mafaufau ki se tino e penei mo tatou e fai taugasoa mo te Aliki Sili o te lagi mo te lalolagi! Kāti ka mafaufau aka koe, penei, ‘E mata, e mafai foki o maua ne au se tulaga penā?’

² E fakamaoni mai i te Tusi Tapu me e mafai o maua ne tatou se fesokotakiga ‵pili mo te Atua. Ne maua ne Apelaamo se fesokotakiga ‵pili penā me ‘ne fakatuanaki a ia ki a Ieova.’ (Iakopo 2:23) I aso foki konei, e faitaugasoa ‘a Ieova ki tino amio‵tonu.’ (Faataoto 3:32) E fakamalosi mai te Iakopo 4:8 ki a tatou, penei: “Fakapili‵pili atu koutou ki te Atua, ko fakapilipili mai ei a ia ki a koutou.” E tonu, kafai e gasue‵sue tatou o fakapili‵pili atu ki a Ieova, ka saga tonu mai eiloa a ia. Ka fakapilipili mai eiloa a ia ki a tatou. Kae e mata, e fakauiga i ei me e ‵tau o gasue‵sue muamua tatou​—⁠tino sē ‵lei katoatoa? Ikai. E mafai o fai taugasoa tatou mo Ieova ona ko faifaiga tāua e lua kolā ko oti ne fai ne ia.​—⁠Salamo 25:⁠14.

³ Muamua la, ne fai ne Ieova se fakatokaga ke ‘tuku atu ne Iesu tena ola mō tino e tokouke.’ (Mataio 20:28) Ona ko te taulaga togiola tenā ko mafai ei ne tatou o fakapili‵pili atu ki te Atua. E fai mai te Tusi Tapu, penei: “A tatou e a‵lofa me i te Atua ne mua o alofa mai ki a tatou.” (1 Ioane 4:19) E tonu, ona ko “te Atua ne mua o alofa mai ki a tatou,” ko maua ei ne tatou se fakavae ke faitaugasoa mo ia. Te lua o mea, ko oti ne fakaasi mai ne Ieova a ia ki a tatou. Kafai e faitaugasoa tatou mo se tino, e ‵tau o iloa tonu ne tatou a te tino tenā, e ‵tau foki o fia‵fia kae fakatāua ne tatou ana uiga. Ke mafaufau ki te uiga o te mea tenā. Kāti moi fai a te Atua se atua telā e sē fia fakaasi mai a ia ki a tatou io me sē manako ke iloa ne tatou a ia, e sē mafai eiloa o fakapili‵pili atu tatou ki a ia. Kae i lō te fai penā, e manako a Ieova ke iloa ne tatou a ia. (Isaia 45:19) E fakamatala mai ne Ieova a ia eiloa i tena Muna, ko te Tusi Tapu, i tugāpati kolā e mafai o malama‵lama tatou i ei​—⁠ke fakamaoni aka ei tena alofa mō tatou mo tena manakoga ke iloa ne tatou a ia kae ke a‵lofa atu ki a ia e pelā me ko te ‵tou Tamana faka-te-lagi.

⁴ Kai lavea aka eiloa ne koe se tamā tamaliki e tusi atu ki tena tamana kae fai atu mo te fiafia mo te fakamatamata ki ana taugasoa, penei: “Telā toku pāpā”? E ‵tau foki o maua ne tino tapuaki ki te Atua a lagonaga konā e uiga ki a Ieova. Ne ‵valo mai i te Tusi Tapu a te taimi telā ka ka‵laga atu ei a tino fakamaoni, penei: “A ia ko te motou Atua!” (Isaia 25:​8, 9) Ko te uke o mea e iloa ne tatou i uiga o Ieova, ko te lasi foki o te ‵tou tali‵tonu me ko maua ne tatou te ‵toe Tamana mo te ‵toe Taugasoa pili eiloa. E tonu, kafai e malama‵lama tatou i uiga o Ieova, ka fia fakapili‵pili atu foki ei tatou ki a ia. Tela la, ke na sukesuke nei tatou ki auala e fakaasi mai ei i te Tusi Tapu a uiga fakavae o Ieova​—⁠ko tena malosi, tena fakamaoni, tena poto mo tena alofa. Ka sau‵tala tatou i te mataupu tenei ki ona uiga muamua e tolu.

‘Ko Oko Eiloa i te Maluga te ‵Mana o Ieova’

⁵ “A te ‵mana o Ieova ko oko eiloa i te maluga.” (Iopu 37:23) E fai mai te Ielemia 10:​6, penei: “Te aliki e seai se tino e ‵pau mo koe; a koe e malosi, ka ko tou igoa foki e ‵mana kae takutakua.” E sē pelā mo nisi mea aka ne faite, e seai se tapulā o te malosi o Ieova. Ona ko te pogai tenā, ko taku ei a ia e pelā me ko te Atua “Malosi Katoatoa.” (Fakaasiga 15:⁠3) E fakaaogā ne Ieova a tena malosi tenā ke faite a mea, ke lepe a mea, ke puipui kae ke faka‵fou foki a mea. Ke mafaufau ki mea e lua konei​—⁠tena malosi ‵mana mo tena malosi ke puipui a mea.

⁶ Kafai e tu atu koe i tua i te la, se a te mea e lagona ne koe ki tou foitino? Ko te ‵vela o te la. A te tonuga loa, ko lagona ne koe a te malosi ‵mana o Ieova. E pefea te malosi o te la? I te kogaloto eiloa o te la, e nofo a tena ‵vela ki te 15 miliona tikulī. Kafai e tuku atu ne koe se tamā vaega o te la, telā e ‵pau tena lasi mo te mata o se nila ki te lalolagi, ka sē mafai eiloa o fakapilipili atu koe ki ei i se mao e 90 maila kae sē mate! I sekone taki tasi, e tuku mai ne te la a te malosi telā e ‵pau mo te ‵pamaiga o pōmu fakaniukelea e fia selau miliona. Kae e tumau eiloa a te lalolagi i tena malaga fakatamilomilo i te ‵mao tonu mai te mea telā e fai pelā me se ogaumu ‵ka ulaula. Kafai ko tō pili atu ki ei, ka ‵miti katoa ne ia a vai mai te lalolagi, kae kafai ko tō ‵mao ka liu poloka a vai katoa i ei. Ka seai eiloa se mea e mafai o ola māfai e tō pili io me tō ‵mao a te lalolagi mai i ei.

⁷ E tiga eiloa e fakalagolago atu a ola o tino katoa ki te malosi o te la, e manatu ma‵ma a tino e tokouke ki tena aogā. Tela la, e sē iloa ne latou a mea tāua kolā e akoako mai ne te la. E fai mai te Salamo 74:16 e uiga ki a Ieova, penei: “Ne faka‵tu foki ne koe te la mo te masina ki la tulaga.” E tonu e tavae atu te la ki a Ieova, “telā ne faite ne ia te lagi, te lalolagi.” (Salamo 146:⁠6) E se gata i ei, a te la se mea fua e tasi mai i mea e uke kolā ne faite ke iloa ei ne tatou a te fakaofoofogia o te malosi o Ieova. Ko te uke o ‵tou mea e iloa e uiga ki te malosi ‵mana o Ieova i te faitega o mea, ko te lasi foki o te ‵tou ofo i ei.

⁸ E fakaaogā foki ne Ieova tena malosi fakaofoofogia ke puipui kae tausi atu ki ana tavini. E fakaaogā ne te Tusi Tapu a nisi tugāpati fakaotia loto ke fakaasi mai ei a folafolaga a Ieova e uiga ki tena puipuiga atafai. Ke mafau‵fau ki te Isaia 40:11. Ne fakatusa ne Ieova a ia i konā ki se tausi mamoe kae ko ana tino ki mamoe. E fai‵tau tatou, penei: “Ka tausi ne ia tena lafu e pelā me se tausi mamoe; ka fakamaopoopo mai ne ia a tamā mamoe kae tauave i ona lima; ka takitaki ne ia a mātua o mamoe mo te filemu.” E mafai o fakaataata ne koe a mea kolā ne fakamatala mai i te fuaiupu tenā?

⁹ E seai eiloa se isi manu e vāivāi pelā mo te mamoe. E ‵tau o maua ne te tausi mamoe i aso ne tusi ei te Tusi Tapu a te loto malosi ke puipui ei ana mamoe mai luko, ulosa mo leona. (1 Samuelu 17:​34-36; Ioane 10:​10-13) Kae e isi ne taimi e ‵tau ei o puipui kae atafai faka‵lei atu ki mamoe. E pelā mo se mamoe telā ne fanau i tua o te lulu mamoe, ka puipui pefea ne te tausi mamoe a te tamā mamoe telā koi vāivāi ‵ki? Ka sapasapai ne ia te tamā mamoe tenā i ne nai aso, i ona “lima”​—⁠kae pulupulu ne ia i loto i tena gatu. E mafai pefea o nofo atu se tamā mamoe i “lima” o te tausi mamoe? Kāti ka fanatu te tamā mamoe ki te tausi mamoe kae fakapateletele atu ki tena vae. Ko punou ifo ei te tausi mamoe o sau aka te tamā mamoe kae sapasapai i ona lima. Ma‵faga la o fakatusaga gali ko iloa ne tatou e uiga ki te loto fiafia o te Tausi Mamoe Sili o puipui kae atafai mai ki ana tavini!

¹⁰ E uke atu a mea ko oti ne fai ne Ieova i lō te tauto mai fua ke puipui ne ia tatou. I aso ne tusi ei te Tusi Tapu, ne fakaasi mai ne ia i auala fakaofoofogia me mafai ne ia o “fakaola a tino amio atua mai i olotou tofotofoga.” (2 Petelu 2:⁠9) Kae pefea la i aso nei? E iloa ne tatou me e se fakaaogā ne ia tena malosi ke puipui ei tatou mai fakalavelave katoa. Kae tuku mai ne ia se mea telā e sili atu tena tāua​—⁠ko te puipuiga i te feitu faka-te-agaga. E puipui ne te ‵tou Atua alofa a tatou mai fakalavelave faka-te-agaga e auala i te tukumaiga o mea kolā e ‵tau o maua ne tatou ke mafai o kufaki i tofotofoga kae ke puipui ei ‵tou va fealofani mo ia. E pelā mo te mea e fakaasi mai i te Luka 11:​13, penei: “Kafai koutou e ma‵sei, kae e iloa ne koutou o tuku atu a mea ‵lei ki otou tama‵liki, e se sili atu la te otou Tamana i te lagi, i te fia tuku atu o te Agaga Tapu ki tino kolā e fakamolemole atu ki a ia?” Ka maua ne tatou mai te malosi tenā a uiga kolā e ‵tau o maua ke fakafesagai atu ei ki ‵tou fakalavelave. (2 Kolinito 4:⁠7) E galue faeloa a Ieova ke puipui ne ia ‵tou ola e sē mō ne nai tausaga fua kae ki te se-gata-mai. Ona ko te mea tenā, ka ‵kilo atu tatou ki so se logo‵maega e fepaki mo tatou e pelā me ne “puapuagā sē tumau.” (2 Kolinito 4:17) E mata, ka sē fia fakapili‵pili atu eiloa tatou ki te Atua telā e fakaaogā ne ia tena malosi ke puipui ei tatou?

‘E Fiafia Ieova ki te Mea Tonu’

¹¹ E fai faeloa ne Ieova te mea tonu i taimi katoa e aunoa mo te fakailoga tino. A te fakamaoni o te Atua e sē se mea masei kae fakamataku telā e fai ei ke faka‵mao keatea tatou mai i ei, kae se uiga gali telā e fai ei ke fakapili‵pili atu tatou ki a Ieova. E fakamatala faka‵lei mai i te Tusi Tapu a te vaega gali o te uiga tenei. Ke mafau‵fau nei tatou ki auala e tolu e fakaasi mai ei ne Ieova tena fakamaoni.

¹² Muamua la, ona ko te fai mea tonu o Ieova e fakaasi atu ei ne ia tena fakamaoni mo tena alofa fakamaoni ki ana tavini. Ne matea muamua ne te faisalamo ko Tavita a te vaega tenei o te fakamaoni o Ieova. Mai mea kolā ne ‵tupu ki a ia e pelā foki mo tena sukesuke ki auala o te Atua, se a te mea ne fakaiku aka ne Tavita? Ne fai mai a ia, penei: “Me i te Aliki e fiafia ki te mea tonu, e se mafai foki o tuku tiaki ne ia ona tino fakamaoni. E puipui faeloa ne ia a latou.” (Salamo 37:28) Ma‵faga o fakamaoniga fakamafanafana loto! E sē mafai lele eiloa o tuku tiaki ne te Atua ana tino kolā e fakamaoni ki a ia i se taimi toetoe. Tela la, e mafai o fakatuaga tatou ki a ia ke maua se va fakataugasoa mo ia e pelā foki mo tena alofa atafai. E ‵tau eiloa o tali‵tonu tatou ki tena fakamaoni!​—⁠Faataoto 2:​7, 8.

¹³ A te lua o mea, e aogā a te fakamaoni o te Atua ki tino fakaa‵lofa. Ne lavea atu te atafai o Ieova ki vaegā tino penā, i Tulafono kolā ne tuku ne ia ki te kau Isalaelu, e pelā mo te fakatokaga ke tausi faka‵lei ki tama‵liki e seai ne olotou mātua mo fāfine ko ‵mate olotou avaga. (Teutelonome 24:​17-21) Ne fai a Ieova mo fai te lotou Famasino mo te lotou ‵Puiga me e matea ne ia te faigata o te olaga ki vaegā kāiga penā. (Teutelonome 10:​17, 18) Ne polopoloki atu a ia ki tino Isalaelu me kafai e fai fakamasei ne latou a fāfine mo tama‵liki fakaa‵lofa konā, ka lagona eiloa ne ia olotou ‵tagi. Ne fai atu a ia, penei i te Esoto 22:​22-24: “Ka ko au ka ita.” E tiga eiloa e sē aofia a te kaitaua i uiga fakavae o te Atua, e fakamalosi aka a ia ne te amiotonu ke kaitaua ki faifaiga sē fakamaoni penā maise eiloa māfai ko fai atu ki tino fakaa‵lofa.​—⁠Salamo 103:⁠6.

¹⁴ A te tolu o mea, e fakamaoni mai i te Teutelonome 10:17 me “e galo i a [Ieova] te loto fakapito, kae sē talia foki ne ia a tino fai meaalofa fakakolekole.” E ‵kese mai tino e tokouke kolā e isi se lotou malosi pule, e sē fia saga atu a Ieova ki te maumea faka-te-foitino o te tino io me kilo atu ki foliga o te tino i tua. E sē fai fapito ana mea. Tenei a te fakamaoniga tonu e tasi o tena sē fakailoga tino: E sē filifili aka fua ne ia ne nai tino takutakua ke fai pelā me ko ana tino tapuaki ‵tonu kolā e fakamoe‵moe ke ola ki te se-gata-mai. I lo te fai penā, e fai mai te Galuega 10:​34, 35, penei: “I te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.” E ‵tala atu te avanoaga tenei ki so se tino faitalia tena tulaga, tena lanu io me ko tena fenua. E mata, e sē tenā loa te ‵toe fakamaoni tonu? E tonu, ka fia fakapili‵pili atu tatou ki a Ieova māfai e malamalama ‵lei tatou i tena fakamaoni!

‘Tapa! Ko Oko Eiloa te ‵Poko o te Poto o te Atua’

¹⁵ Ne fakamalosi atu ki te apositolo ko Paulo ke fai ne ia a pati i te Loma 11:​33, penei: ‘Tapa! Ko oko eiloa te ‵poko o te poto o te Atua!’ E tonu, kafai e mafau‵fau faeloa tatou ki vaega kese‵kese o te poto o Ieova, ka ofo malosi eiloa tatou. Ka fakamatala atu pefea ne tatou te uiga tenei? Ona ko te poto ka maua kae ka ga‵lue fakatasi a te iloaga, te atamai mo te malamalama. Mai te lauefa o tena iloaga mo te ‵poko o tena malamalama, e fai faeloa ne Ieova a toe ikuga ‵lei kae fakataunu ne ia i toe auala ‵lei.

¹⁶ Ne a nisi fakamaoniga o te lasi o te poto o Ieova? E fai mai te Salamo 104:​24, penei: “Te Aliki, ko oko eiloa te uke o mea ne fai ne koe! Ko oko foki eiloa i te poto o tau faitega o mea katoa konā! A te lalolagi ko ‵fonu i au mea ola.” E tonu, ko te uke o ‵tou mea e iloa e uiga ki mea ne fai ne Ieova, ko te lasi foki o te ‵tou ofo i tena poto. Ke mafau‵fau ki te uke o mea ko oti ne tauloto ne saienitisi mai mea kolā ne faite ne Ieova! E isi foki ne mea kolā e fai ne tino ke fakaakoako atu ei latou ki mea ne faite ne Ieova.

¹⁷ Kāti ko oti ne kilo atu koe mo te ofo ki te gali o se pogāleveleve o te naleau. E tonu, e ofo tatou i te auala ne faite ei. Kae e sili atu te ma‵losi o leveleve konā i te fiti mo filo kolā e faite ki ei se gatu tau. Se a te uiga tonu o te mea tenā? Ke mafaufau ki se pogāleveleve ko fakalasi aka ke ‵pau mo te lasi o se tili telā e fakaaogā i vaka faiika. E malosi ‵ki te pogāleveleve tenā kae mafai o taofi aka ne ia se vakalele telā e eva i te vanimonimo! E tonu, ne faite ne Ieova a mea konā ‘i tena poto.’

¹⁸ E maua ne tatou a te ‵toe fakamaoniga sili o te poto o Ieova i tena Muna, ko te Tusi Tapu. E fakaasi ‵tonu mai ne pati fakatonutonu aogā i ei a te ‵toe auala ‵lei ke ola i te olaga nei. (Isaia 48:17) Kae e lavea atu foki ne tatou a te lasi o te poto o Ieova i te auala telā ne tusi ei te Tusi Tapu. E pefea la? Ona ko tena poto, ne filifili aka ne Ieova a tino ke tusi ne latou tena Muna. Moi ne fakaaogā ne ia a agelu ke tusi ne latou tena Muna, e mata, e ‵pau eiloa te aogā o te Tusi Tapu? E tonu, kāti ka fakamatala mai ne te kau agelu a Ieova mai te lotou kilokiloga maluga kae fakaasi mai foki ne latou te auala e tapuaki atu ei latou ki a ia. Kae, e mata, e mafai o malama‵lama tatou i te kilokiloga a tino faka-te-agaga ‵lei katoatoa kolā e sili atu te ma‵luga o te lotou iloaga, atamai mo te lotou malosi i a tatou?​—⁠Epelu 2:​6, 7.

¹⁹ A te fakaaogāga o tāgata ke tusi ne latou te Tusi Tapu e fai ei ke gali kae aogā malosi te Tusi Tapu. A tāgata kolā ne tusi ne latou te Tusi Tapu ne tino eiloa e penei mo tatou. E ‵pau eiloa a olotou tofotofoga mo tatou ona ko ‵tou tulaga sē ‵lei katoatoa. I nisi taimi, e tusi eiloa ne latou olotou lagonaga mo fakalavelave kolā ne fe‵paki mo latou. (2 Kolinito 12:​7-10) Tela la, ne tusi ne latou a pati kolā e sē mafai o tusi ne te kau agelu. Ke mafau‵fau ki pati ne tusi ne Tavita i te Salamo 51. E pelā mo te fakamatalaga mai luga i te Salamo tenā i te Tusi Paia, Samoa, ne ‵fatu ne Tavita a te salamo tenei mai tua o te agasala matagā telā ne fai ne ia. Ne fakaasi faka‵lei atu ne ia a mea i tena ‵kano loto, tena mafatia kae fakamolemole atu mō te fakamagaloga a te Atua. E fai mai te fuaiupu e 2 mo te 3, penei: “‵Fulu keatea aku amioga ma‵sei katoa, kae faka‵ma mai au i aku agasala! Ko iloa ne au aku mea ‵se; e iloa faeloa foki ne au aku agasala.” Ke toe onoono ki te fuaiupu e 5: “Ne amio masei au talu taku fanaumaiga; ne agasala foki au talu mai taku fanaumaiga.” Kae toe fai mai te fuaiupu e 17, penei: “Te Atua, a taku taulaga ko te loto maulalo; e se ‵teke eiloa ne koe te tino loto maulalo kae loto salamō.” E a, e lagona ne koe te logo‵mae o te tino ne tusi ne ia te salamo tenei? Ko oi aka foki i tafa o tino sē ‵lei katoatoa e mafai o fakaasi mai ne ia a vaegā lagonaga penā?

²⁰ Mai te fakaaogāga o tagata sē ‵lei katoatoa penā, ne tuku mai ne Ieova a mea kolā e ma‵nako tatou ki ei​—⁠se fakamatalaga “mai te Atua” e uiga ki tino. (2 Timoteo 3:16) E tonu ne takitaki a tino tusitala konā ne te agaga tapu. Tela la, ne fakamau ne latou ki lalo a te poto o Ieova, kae sē ko te lotou poto. E fakatuaga katoatoa a te poto tenā. E sē tāitāi eiloa o oko atu ‵tou poto ki te pogai ne fakamalosi mai ei a te Atua mo te alofa penei: “Tali‵tonu ki te Aliki mo tou loto katoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto 3:​5, 6) Mai te faka‵logo ki te fakatakitakiga poto tenā, ka fakapili‵pili atu ei tatou ki te ‵tou Atua telā e katoatoa tena poto.

²¹ A te ‵toe uiga sili kae tāua o Ieova ko te alofa. Ka sautala tatou ki te auala ne fakaasi atu ei ne Ieova tena alofa i te suā mataupu.

Koi Masaua ne Koe?

• Ne a mea ko oti ne fai ne Ieova ke mafai ei ne tatou o maua se va fakataugasoa mo ia?

• Ne a nisi fakaakoakoga o te malosi ‵mana o Ieova mo tena malosi ke puipui a mea?

• I te auala fea e fakaasi atu ei ne Ieova tena fakamaoni?

• E lavea atu pefea te poto o Ieova mai mea kolā ne faite ne ia pelā foki mo te Tusi Tapu?

[Fesili mo te Sukesukega]

1, 2. (a) Ne kilo atu pefea a Ieova ki a Apelaamo kae e mafai o pefea ‵tou lagonaga ki ei? (e) E fakamautinoa mai pefea ne te Tusi Tapu me e mafai o maua ne tatou se fesokotakiga ‵pili mo te Atua?

3. Ne a faifaiga e lua ko oti ne fai ne Ieova ke mafai ei o fai taugasoa tatou mo ia?

4. Ne a lagonaga e maua ne tatou e uiga ki a Ieova māfai ko gasolo o iloa ‵lei ne tatou ana uiga?

5. Kaia e fetaui ‵lei ei ke taku atu me ko Ieova fua ko te Atua “Malosi Katoatoa,” kae i te auala fea e fakaaogā ei ne ia tena malosi?

6, 7. E pefea te malosi o te la, kae ne a muna‵tonu tāua e fakatalitonu mai i ei?

8, 9. (a) Ne a tugāpati fakaotia loto e fakaasi mai i ei te fiafia o Ieova ke puipui kae atafai ki ana tino tapuaki? (e) Ne puipui pefea ne te tausi mamoe i aso mua ana mamoe, kae se a te mea ko iloa ne tatou mai i ei e uiga ki te Tausi Mamoe Sili?

10. Se a te puipuiga e tuku mai ne Ieova i aso nei, kae kaia e tāua ei te puipuiga tenā?

11, 12. (a) Kaia e fia fakapili‵pili atu ei tatou ki a Ieova ona ko tena fakamaoni? (e) Se a te mea ne fakaiku aka ne Tavita e uiga ki fakamaoni o Ieova, kae fakamafanafana mai pefea ne pati konā a tatou?

13. E lavea atu pefea ne tatou i Tulafono kolā ne tuku ki te kau Isalaelu a te saga tonu atu o Ieova ki tino fakaa‵lofa?

14. Se a te fakamaoniga tonu o te sē fakailoga tino o Ieova?

15. Se a te poto, kae e fakaasi mai pefea ne Ieova te mea tenā?

16, 17. E fakamaoni mai pefea ne mea kolā ne faite ne Ieova a te lasi o tena poto? Ke taku mai se fakaakoakoga.

18. E lavea pefea ne tatou a te poto o Ieova i te fakaaogāga ne ia a tino ke tusi ne latou tena Muna, ko te Tusi Tapu?

19. Se a te fakaakoakoga e fakaasi mai ei me i te fakaaogāga o tāgata ke tusi ne latou te Tusi Tapu e fai ei ke gali kae aogā malosi te Tusi Tapu?

20, 21. (a) Kaia e mafai ei o fai atu me e maua i te Tusi Tapu a te poto o Ieova faitalia me ne fakaaogā ne ia a tāgata ke tusi ne latou? (e) Se a te mea ka sau‵tala tatou ki ei i te suā mataupu?

[Ata i te itulau e 20]

E pelā mo se tausi mamoe telā e sapasapai ne ia te tamā mamoe i ona lima e tausi faka‵lei ne Ieova Ana mamoe

[Ata i te itulau e 23]

E mafai o lavea atu a te poto o Ieova i te auala ne tusi ei te Tusi Tapu