“Ko Fakapilipili Mai ei a Ia ki a Koutou”

“Ka ko [te Atua] foki e se ‵mao mai i a tatou takitokotasi.”​—⁠GALUEGA 17:⁠27.

E MATA, kai kilo atu koe ki te lagi telā ko ‵fonu i fetu i se po sē kaumanā, kae ofo malosi koe i ei? E fai ne te uke o fetu mo te lasi o te vanimonimo ke ofo malosi tatou. A te lalolagi se tamā mea fua māfai e fakatusa ki mea katoa kolā ne faite. E mata, e fakauiga i ei me i te Atua, “te Aliki tokotasi” ko tō maluga katoa ke saga mai ki manakoga o tino io me ko tō ‵mao ke maina tatou i ana uiga?​—⁠Salamo 83:⁠18.

² E fakatalitonu mai ne te Tusi Tapu me e tāua ‵ki a tino i te kilokiloga a Ieova. A te ‵tonuga loa, e fakamalosi mai a te Muna a te Atua ke ‵sala atu tatou ki a ia, penei: “Ka ko ia foki e se ‵mao mai i a tatou takitokotasi.” (Galuega 17:27; 1 Nofoaiga Tupu 28:⁠9) E tonu, kafai e gasue‵sue tatou o fakapili‵pili atu ki te Atua, ka saga tonu mai foki a ia ki ‵tou taumafaiga. I se auala fea? E tuku mai ne pati i te ‵tou tusi siki fakavae mō te 2003 a te tali fakamafanafana tenei: “Ko fakapilipili mai ei a ia ki a koutou.” (Iakopo 4:⁠8) Ke na sautala nei tatou ki nisi fakamanuiaga ‵gali kolā e tuku mai ne Ieova ki tino kolā e fakapili‵pili atu ki a ia.

Se Meaalofa Fakapito Mai i a Ieova

³ Muamua la, e isi eiloa se meaalofa fakapito ne tausi ne Ieova mō ana tino. E se mafai eiloa o maua te meaalofa tenei mai te malosi, te maumea, mo a‵koga katoa i te olaga nei. Se meaalofa fakapito eiloa mai i a Ieova telā e tuku atu fua ne ia ki tino kolā e fakapili‵pili atu ki a ia. Se a la te meaalofa tenā? E tali mai a te Muna a te Atua, penei: “E tonu, akai atu . . . ke maua ne koe te atamai. ‵Sala malosi ki te poto, e pelā manafai e ‵sala koe ki siliva io me ko se koloa tāua. Kafai e fai ne koe te mea tenā, kae ka iloa foki ei ne koe te uiga o te mataku ki te Aliki, kae ka manuia eiloa koe i tau taulotoga e uiga ki te Atua. Ko te Aliki e aumai ne ia te poto.” (Faataoto 2:​3-6) Mafaufau aka la me e mafai ne tino sē ‵lei katoatoa o maua ne latou te iloaga “e uiga ki te Atua”! A te meaalofa tenā​—⁠ko te iloaga telā e maua i te Muna a te Atua​—⁠e faka‵tusa eiloa ki “koloa tāua.” Kaia?

⁴ A te pogai e tasi, me e tāua ‵ki eiloa a te iloaga e uiga ki te Atua. A te fakamanuiaga tāua e tasi mai i ei ko te fakamoemoega ki te ola se-gata-mai. (Ioane 17:⁠3) Kae e fai ne te iloaga tenei ke momea aka te ‵lei o ‵tou olaga i te vaitaimi nei. Ona ko ‵tou suke‵suke ki te Muna a te Atua, ne mafai ei o iloa ne tatou a tali ki nisi fesili tāua e pelā mo te: Ko oi te igoa o te Atua? (Salamo 83:18) Se a te tulaga tonu o tino ‵mate? (Failauga 9:​5, 10) Se a te fuafuaga a te Atua ki te lalolagi mo tino? (Isaia 45:18) Ko iloa foki ne tatou me i ‵te ‵toe auala ‵lei ke ola ei ko te faka‵logo ki polopolokiga aogā mai te Tusi Tapu. (Isaia 30:​20, 21; 48:​17, 18) Tela la, e maua ne tatou a fakatakitakiga ‵gali kolā e fesoasoani mai ke fakafesagai atu tatou ki fakalavelave o te olaga nei kae ke ola tatou i se olaga telā e maua i ei a te fiafia tonu mo te lotomalie. Kae sili fakafia atu i ei, e fai ne te ‵tou suke‵suke ki te Muna a te Atua ke iloa ne tatou a uiga ‵gali o Ieova kae ke fakapili‵pili atu foki ki a ia. Se a foki la te suā mea e sili atu tena tāua i lō te va fealofani pili mo Ieova telā e fakavae ki te iloaga “e uiga ki te Atua”?

⁵ E isi aka foki se pogai e fai ei a te iloaga e uiga ki te Atua e pelā me se “koloa tāua.” E faigata o maua atu i te lalolagi nei e pelā mo te ukega o koloa. Mai te toko ono piliona o tino i te lalolagi nei, ko oti ne maua aka ne te toko ono miliona o tino kolā e tapuaki atu ki a Ieova io me kāti ko te toko 1 mai te toko 1,000 o tino, a te iloaga “e uiga ki te Atua.” Ko te mea ke tai fakamaina atu te auala e fai ei a te iloaga e uiga ki te munatonu i te Muna a te Atua e pelā me se koloa tāua telā e faigata o maua, ke mafau‵fau ki se fesili e tasi mai te Tusi Tapu: Se a te mea e tupu ki tino māfai ko ‵mate? E iloa ne tatou mai te Tusi Tapu me e mate te tino kae e seai se mea e iloa ne tino ‵mate. (Esekielu 18:⁠4) Kae ne talia ne te ukega o lotu i te lalolagi a te akoakoga ‵se me e isi se mea i loto i te tino telā e tumau i te ola māfai ko mate se tino. A te akoakoga tenā ko fai mo fai se akoakoga fakavae i Lotu Kelisiano ‵Se. E akoako atu foki ne lotu konei ko te lotu Iutaia, Islam, Hinitu, Jainism, Puta, Sikhism, Shinto, mo te lotu Taoism a te akoakoga tenā. Mafaufau la​—⁠ne fakaloi‵loi a te fia piliona o tino ke tali‵tonu ki te akoakoga ‵se tenei!

⁶ Kaia ne seki maua ei ne tino e tokouke a te iloaga “e uiga ki te Atua”? Me e se mafai o malamalama katoatoa se tino i te uiga o te Muna a te Atua e aunoa mo Tena fesoasoani. Ke masaua me i te iloaga tenei se meaalofa. E tuku atu fua ne Ieova a te iloaga tenā ki tino kolā e loto fia‵fia o suke‵suke ki tena Muna i te fakamaoni mo te loto maulalo. Kāti e se ‵poto a vaegā tino konā “i mea faka-te-lalolagi.” (1 Kolinito 1:26) Kāti e fai a nisi tino e tokouke mai i a latou e pelā me ne “tino e seki a‵koga” i te kilokiloga a te lalolagi. (Galuega 4:13) Kae e se se mea e fai i ei. E taui mai eiloa ne Ieova tatou i te tukumaiga o te iloaga “e uiga ki te Atua” ona ko uiga ‵gali kolā e maua ne ia i ‵tou loto.

⁷ Ke mafaufau ki se fakaakoakoga. Ko oti ne fai ne nisi tino lauiloa i lotu Kelisiano ‵Se a fakamatalaga fakaopoopo e uiga ki te Tusi Tapu. Kāti e fakamatala mai i ei ne latou a tala fakasolopito, ko uiga o pati Epelu mo pati Eleni, mo nisi mea aka foki. E mata, ne maua eiloa ne tino lauiloa konei mai olotou mea ne tauloto a te iloaga tonu “e uiga ki te Atua”? E mata, e malamalama ‵lei latou i te matua o te Tusi Tapu, ko te faka‵maluga o te pulega a Ieova e auala i tena Malo faka-te-lagi? E mata, e iloa ne latou me i a Ieova te Atua e se se vaega o te Tolutasi? E maina ‵lei tatou i mea konā. Kaia? Ko oti ne tuku mai ne Ieova ki a tatou a muna ‵tonu faka-te-agaga kolā e seki mafai o maua ne “tino ‵poto mo tino ne akoakogina.” (Mataio 11:25) Ko tafaga la te gali me e fakamanuia eiloa ne Ieova a tino kolā e fakapili‵pili atu ki a ia!

‘E Puipui ne Ieova Latou Katoa Kolā e A‵lofa ki a Ia’

⁸ E maua ne tino kolā e fakapili‵pili atu ki a Ieova se isi fakamanuiaga​—⁠ko tena puipuiga. Ne tusi mai a te faisalamo ko Tavita telā ne fepaki mo fakalavelave e uke, penei: “E pili faeloa a [Ieova] ki a latou kolā e ka‵laga atu ki a ia, kolā e ka‵laga ki ei mo te loto fakamaoni. E tuku ne ia ki a latou kolā e ma‵taku ki a ia a mea katoa kolā e ma‵nako latou ki ei; e lagona ne ia olotou ‵tagi, kae faka‵sao ne ia latou. E puipui ne ia latou katoa kolā e a‵lofa ki a ia, kae ka fakamalaia ne ia a tino amio ma‵sei.” (Salamo 145:​18-20) E tonu, e pili atu eiloa a Ieova ki a latou kolā e a‵lofa ki a ia. Tenā te pogai e gasuesue fakavave ei a ia o tali olotou fakamolemole.

⁹ Kaia e ‵tau ei o maua ne tatou te puipuiga a te Atua? I tafa o te fakafesagai atu o Kelisiano ‵tonu ki te olaga i “taimi faiga‵ta i aso fakaoti,” e saga tonu atu eiloa a te Fili sili o Ieova, ko Satani te Tiapolo ki a latou. (2 Timoteo 3:⁠1) Ko taumafai malosi nei a te fili tenā “ke kai ne ia” tatou. (1 Petelu 5:⁠8) E fakasauā, e fakaosooso kae tofotofo ne Satani a tatou. E mataonoono foki a ia ki vāivāiga o te mafaufau mo te loto kolā e mafai o fakaaogā ne ia ke takitaki ‵se ei a tino. E isi faeloa se mea e taumafai a ia ki ei: ke fakavāivāi ne ia te ‵tou fakatuanaki kae ke fakamasei foki ne ia tatou i te feitu faka-te-agaga. (Fakaasiga 12:​12, 17) Ona ko te mea e ‵tau o ‵teke atu tatou ki te ‵tou fili sili, se mea fakamalosi loto ke iloa atu me “e puipui ne [Ieova] latou katoa kolā e a‵lofa ki a ia,” i ne?

¹⁰ E puipui la pefea ne Ieova ana tino? E se fai pelā me ka tuku mai ne te folafolaga e uiga ki tena puipuiga a te saolotoga mai fakalavelave o te olaga masei tenei, io me fai ne ia ne vavega mō tatou. E tiga eiloa te feitu tenā, e tuku mai ne Ieova a te puipuiga faka-te-foitino ki ana tino e pelā me se potukau. E fakauiga i ei me ka se toe talia eiloa ne ia a te Tiapolo ke fakaseai katoatoa ne ia a tino tapuaki ‵tonu i te lalolagi nei! (2 Petelu 2:⁠9) E sili atu i mea katoa, ka puipui eiloa ne Ieova tatou i te feitu faka-te-agaga. E tuku mai ne ia a mea kolā e manakogina ke kufaki i tofotofoga kae ke puipui foki i ei te ‵tou va fealofani mo ia. Faitalia a mea katoa kolā e tupu, a te ‵toe puipuiga tāua eiloa ko te puipuiga faka-te-agaga. Kaia? Kafai e tumau eiloa te va fealofani o tatou mo Ieova ka seai lele eiloa se mea e mafai o fakamasei ei tatou ki te se-gata-mai, e aofia foki i ei te mate.​—⁠Mataio 10:⁠28.

¹¹ Ko oti ne tuku mai ne Ieova a fakatokaga e uke ke puipui ei a tino kolā e fakapili‵pili atu ki a ia i te feitu faka-te-agaga. E tuku mai ne ia i tena Muna, ko te Tusi Tapu, a te poto ke mafai o manumalo tatou i tofotofoga kese‵kese. (Iakopo 1:​2-5) Kafai e fakaaogā ne tatou a fakatakitakiga kolā e maua atu i te Tusi Tapu ka maua i ei se puipuiga. E se gata i ei, e tuku mai ne Ieova “te Agaga Tapu ki tino kolā e fakamolemole atu ki a ia.” (Luka 11:13) A te agaga tenā ko te ‵toe ‵mana malosi eiloa i te lagi mo te lalolagi, telā e mafai o fesoasoani mai ke manumalo tatou i te ‵teke atu ki tofotofoga io me ko fakaosoosoga kolā e fe‵paki mo tatou. E auala i a Keliso, e tuku mai ne Ieova a “meaalofa.” (Efeso 4:⁠8) A meaalofa konā ko tāgata ata‵mai i te feitu faka-te-agaga kolā e fakaata mai ne latou a te alofa o Ieova i te fesoasoani atu ki olotou taina tapuaki.​—⁠Iakopo 5:​14, 15.

¹² E tuku mai foki ne Ieova se isi mea ke puipui ei tatou: ko mea‵kai faka-te-agaga i te taimi tonu. (Mataio 24:45) E tuku mai ne Ieova a mea kolā e ma‵nako tatou ki ei i te taimi tonu e auala i tusi kolā ne ‵lomi, e aofia i ei ko Te Faleleoleo Maluga mo te Awake!, e pelā foki mo fakatasiga, tamā fono, mo fono ‵lasi. E mata, e masaua ne koe se taimi ne lagona ei ne koe i se fakatasiga Kelisiano, se tamā fono, io me se fono lasi se manatu telā ne otia malosi ei tou loto kae ne fakamalosi io me ne fakamafanafana atu ki a koe? E mata, kai faitau koe ki se mataupu i ‵tou mekesini kae fai aka me e fetaui tonu eiloa te mataupu tenā mo koe?

¹³ E tasi te meatau malosi telā e fakaaogā ne Satani ko faka‵tukaga, kae e pokotia foki tatou i ei. E iloa ‵lei ne ia me i te loto māfatia mo se taimi leva ‵ki e mafai o fakavāivāi mai ki a tatou. (Faataoto 24:10) Ona ko taumafaiga a Satani ke fakamalosi aka i a tatou a mafaufauga sē ‵lei, e ‵tau o maua ne tatou se fesoasoani. Ko oti ne ‵lomi aka i loto i Te Faleleoleo Maluga mo te Awake! a mataupu kolā e mafai o fesoasoani mai ke manumalo i faka‵tukaga. Ne fai mai se tuagane Kelisiano e tokotasi e uiga ki se vaegā mataupu penā i ana pati konei: “E faitau faeloa au ki te tala tenā i aso katoa, kae e tagi faeloa au i ei. E tausi eiloa ne au te mekesini tenā i tafa o toku moega ko te mea ke maua vave i so se taimi e loto vāivāi ei au. E lagona ne au te puipuiga a Ieova e auala i vaegā mataupu penei.”a E a, e loto fia‵fia tatou ki a Ieova mo te tukumaiga ne ia o meakai faka-te-agaga i te taimi tonu? Ke masaua la, me e fakamaoni mai i ana fakatokaga mō te ‵tou ‵lei i te feitu faka-te-agaga me e pili mai a ia kae e puipui ne ia tatou ki ona lima a‵lofa.

Te Auala e Fanatu ei ki te Tino Telā e ‘Tali Mai ne Ia a Talosaga’

¹⁴ E mata, ko oti ne lavea ne koe me e faigata o olo atu a tino ga‵lue ki se tino telā ko maua ne ia se tofi maluga? Kae pefea la a Ieova, te Atua? E mata, ko tō ‵mao katoa a ia ke saga mai ki talosaga a tino? E se tāitāi eiloa! A te faiga o ‵talo se fakamanuiaga e tasi ne tuku mai ne Ieova ki tino kolā e pili atu ki a ia. A te saolotoga ke faipati atu i so se taimi ki te tino telā e “tali mai eiloa . . . ki talosaga,” se meaalofa gali ‵ki eiloa. (Salamo 65:⁠2) Kaia?

¹⁵ E pelā me se fakaakoakoga: E ‵tau o saga atu a te pule o se kamupane lasi ki tiute e uke. E filifili aka ne ia a tiute kolā e ‵tau o saga tonu a ia ki ei mo tiute kolā e mafai o tuku atu ki se tino. I se auala tai ‵pau, e mafai foki ne te Pule o te lagi mo te lalolagi o filifili aka a tiute kolā e ‵tau o saga atu a ia ki ei mo tiute kolā e ‵tau o tuku atu ki nisi tino. Ke mafaufau ki tiute katoa kolā ne tuku atu ne Ieova ki tena Tama fagasele ko Iesu. Ko oti ne tuku atu ki te Tama a “te pule ke fai ne ia te fakamasinoga.” (Ioane 5:27) E “pule” atu foki a ia ki te kau agelu. (1 Petelu 3:22) Ko oti foki ne tuku atu a te malosi o te agaga tapu o Ieova ki a Iesu ke mafai ne ia o takitaki ana soko i te lalolagi. (Ioane 15:26; 16:⁠7) Tela la, ko mafai ei o fai atu a Iesu, penei: “Ko oti ne tuku mai ki a au a te pule kātoa i te lagi mo te lalolagi.” (Mataio 28:18) I te suā feitu, ko oti ne filifili aka ne Ieova ke saga katoatoa mai a ia ki ‵tou talo. Tenā loa te pogai ne fakatonu mai ei te Tusi Tapu ke ‵talo atu tatou ki a Ieova, e auala i te igoa o Iesu.​—⁠Salamo 69:13; Ioane 14:​6, 13.

¹⁶ E mata, e fakalogo mai eiloa a Ieova ki ‵tou ‵talo? Moi se alofa te Atua penei e se fakamalosi mai foki eiloa a ia ki a tatou ke “‵talo i taimi katoa” io me tuku atu ki a ia a mea e manava‵se tatou ki ei. (Loma 12:12; Salamo 55:22; 1 Petelu 5:⁠7) Ne tali‵tonu katoatoa a tavini fakamaoni kolā ne ola i aso ne tusi ei te Tusi Tapu me e fakalogologo mai eiloa a Ieova ki ‵tou ‵talo. (1 Ioane 5:14) Telā ne fai mai ei a te faisalamo ko Tavita, penei: “Ka lagona ne [Ieova] toku leo.” (Salamo 55:17) E maua foki ne tatou a pogai e uke ke tali‵tonu me i a Ieova e pili mai ki a tatou kae toka o fakalogologo mai ki mea e manavase tatou ki ei.

E Taui ne Ieova Ana Tavini

¹⁷ E se mafai eiloa o fakamakosu aka a te tulaga o Ieova, e pelā me ko te Pule o te Lagi mo te Lalolagi, ne mea kolā e fai io me e se fai ne tino. Kae ui ei, e loto fakafetai eiloa a Ieova. A te ‵tonuga loa, e fakatāua malosi ne Ieova a te tavini atu mo te fakamaoni o ana tino mo ana agelu ‵poto. (Salamo 147:11) Kae tenei foki eiloa te suā mea aogā ne maua ne tino kolā e fakapili‵pili ki a Ieova: E tuku atu ne ia te taui ki ana tavini.​—⁠Epelu 11:⁠6.

¹⁸ E fakaasi faka‵lei mai i te Tusi Tapu me e fakatāua malosi eiloa ne Ieova a taumafaiga o ana tino tapuaki. E pelā me se fakaakoakoga, e fai‵tau tatou, penei: “Kafai e avatu ne koe ne mea ki tino ma‵tiva, e pelā eiloa me se mea e tuku atu ne koe ki te Aliki, tela la, e toe taui mai ne te Aliki ki a koe e ‵tusa eiloa mo tou aga‵lei.” (Faataoto 19:17) E lavea atu a te alofa fakamagalo o Ieova ki tino ma‵tiva i Tulafono kolā ne tuku atu ki a Mose. (Levitiko 14:21; 19:15) Ka pefea a lagonaga o Ieova māfai e fakaakoako atu tatou ki tena alofa fakamagalo i ‵tou faifaiga ki tino ma‵tiva? Kafai e tuku atu ne tatou a mea ki tino ma‵tiva e aunoa mo te fakamoemoega ke maua se taui mai i ei e kilo mai a Ieova ki te mea tenei e pelā me e kaitalafu a Ia i a tatou. E folafola mai a te Atua me ka ‵togi mai ne ia te kaitalafu tenā e auala i fakamanuiaga. (Faataoto 10:22; Mataio 6:⁠3, 4; Luka 14:​12-14) E tonu, kafai e fakaasi atu ne tatou a te alofa ki se taina talitonu e otia i ei a te loto o Ieova. Ko oko eiloa te ‵tou fia‵fia ke iloa atu me se mafai o puli i te ‵tou Tamana i te lagi a ‵tou faifaiga a‵lofa!​—⁠Mataio 5:⁠7.

¹⁹ Kae sili atu i ei e fakatāua malosi ne Ieova a mea kolā e fai ne tatou mō tena Malo. Kafai e fakapili‵pili atu tatou ki a Ieova, ko fia fakamāumāu ‵tou taimi, malosi, mo ‵tou kope ke fai so se mea e mafai ne tatou o fai i te talaiatuga o tena Malo mo te faiga o soko. (Mataio 28:​19, 20) I nisi taimi, kāti e mafau‵fau tatou me e foliki fua ‵tou tusaga e mafai o fai. Kāti ka fai foki ne ‵tou loto sē ‵lei katoatoa ke fakalotolotolua tatou me e fiafia mai a Ieova ki ‵tou taumafaiga me ikai. (1 Ioane 3:​19, 20) Kae e se mafai o puli i a Ieova so se galuega ‵lei telā ne māfua tonu mai te loto alofa o te tino, faitalia me pefea te foliki. (Mataio 12:​41-44) E fakatalitonu mai a te Tusi Tapu ki a tatou, penei: “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia.” (Epelu 6:10) E tonu, e masaua faeloa kae taui mai foki ne Ieova a tamā mea fo‵liki ne fai ne tatou ke ‵lago atu i ei ki tena Malo. I tafa o fakamanuiaga e uke i te feitu faka-te-agaga kolā e maua nei ne tatou, e ‵tau foki o fakamoe‵moe tatou ki te olaga fiafia i te lalolagi fou telā ka ‵fola mai ei ne Ieova ana lima mo te kaimalie kae ka fakataunu ei ne ia a manakoga amio‵tonu katoa o tino kolā e pili atu ki a ia!​—⁠Salamo 145:16; 2 Petelu 3:⁠13.

²⁰ I te 2003, ke na fesili ifo tatou ki a tatou eiloa me e mata, e tumau eiloa tatou i te fakapili‵pili atu ki te ‵tou Tamana i te lagi? Kafai e fai penā, e mautinoa eiloa me ka fakataunu eiloa ne ia tena folafolaga. E se gata i ei, e iloa ne tatou i “te Atua . . . e se mafai o loi.” (Tito 1:⁠2) Kafai e fakapilipili atu koe ki a ia, ka fakapilipili mai ei a ia ki a koe. (Iakopo 4:⁠8) Kae se a te ikuga? Ka maua i ei a fakamanuiaga e uke i aso nei mo te fakamoemoega ke fakapili‵pili atu ki a Ieova ki te se-gata-mai!

[Fakamatalaga mai lalo]

Koi Masaua ne Koe?

• Se a te meaalofa e tuku atu ne Ieova ki tino kolā e fakapili‵pili atu ki a ia?

• Ne a fakatokaga ne fai ne Ieova mō te puipuiga o ana tino i te feitu faka-te-agaga?

• Kaia e fai ei a te saolotoga ke faipati atu ki a Ieova i so se taimi i te faiga o ‵talo e pelā me se meaalofa gali ‵ki?

• E fakaasi mai pefea ne te Tusi Tapu me fakatāua ne Ieova a te tavini atu mo te fakamaoni o ana tino mo ana agelu ‵poto?

[Fesili mo te Sukesukega]

1, 2. (a) Kafai ko ‵kilo atu tatou ki te lagi e ‵fonu i fetu, ne a fesili e mafai o ‵sae aka e uiga ki te Atua? (e) E fakatalitonu mai pefea ne te Tusi Tapu me e tāua ‵ki a tino i te kilokiloga a Ieova?

3. Se a te meaalofa e tuku atu ne Ieova ki tino kolā e fakapili‵pili atu ki a ia?

4, 5. Kaia e mafai ei o fakatusa a te iloaga “e uiga ki te Atua” ki “koloa tāua”? Ke fakamatala mai.

6, 7. (a) Ko oi a tino kolā e mafai fua o maua ne latou a te iloaga “e uiga ki te Atua”? (e) Se a te fakaakoakoga e fakaasi mai ei me ko oti ne fakamanuia ne Ieova tatou ki te iloaga telā e seki maua ne “tino ‵poto mo tino ne akoakogina”?

8, 9. (a) Ne fakamatala mai pefea ne Tavita a te suā fakamanuiaga telā ka maua ne tino kolā e fakapili‵pili atu ki a Ieova? (e) Kaia e ‵tau ei o maua ne Kelisiano ‵tonu a te puipuiga a te Atua?

10. (a) E puipui pefea ne Ieova ana tino? (e) Se a te ‵toe puipuiga tāua, kae kaia?

11. Ne a fakatokaga ne fai ne Ieova ke puipui ei ana tino i te feitu faka-te-agaga?

12, 13. (a) Se a te auala e tuku mai ei ne Ieova a mea‵kai faka-te-agaga i te taimi tonu? (e) Ne a ou lagonaga ki te fakatokaga a Ieova mō te ‵tou ‵lei i te feitu faka-te-agaga?

14, 15. (a) Se a te fakamanuiaga e tuku atu ne Ieova ki tino kolā e fakapili‵pili atu ki a ia? (e) Kaia e fai ei a te saolotoga ke fai‵pati atu tatou ki a Ieova, i so se taimi, i te faiga o ‵talo e pelā me se meaalofa gali ‵ki?

16. Kaia e ‵tau ei o tali‵tonu katoatoa tatou me e fakalogologo mai eiloa a Ieova ki ‵tou ‵talo?

17, 18. (a) E pefea a lagonaga o Ieova ki te tavini atu mo te fakamaoni o ana tino mo ana agelu ‵poto? (e) Ke fakamatala mai a te auala e fakaasi mai i te Faataoto 19:17 me e se mafai o puli i a Ieova ‵tou galuega a‵lofa.

19. (a) Kaia e ‵tau ei o tali‵tonu tatou me e fakatāua ‵ki ne Ieova a mea e fai ne tatou i te galuega talai mo te faiga o soko? (e) E taui mai pefea ne Ieova ‵tou galuega ‵lei i te ‵lago atu ki tena Malo?

20. I te 2003, e mafai pefea o masaua faeloa ne tatou a te tusi siki fakavae mō te tausaga, kae se a la te ikuga?

[Ata i te itulau e 15]

Ko oti ne fakamanuia ne Ieova tatou ki te iloaga e uiga ki muna‵tonu faka-te-agaga