“Te Atua ko te Alofa Eiloa a ia”

“Ko te tino e sē alofa e sē iloa ne ia a te Atua, me i te Atua ko te alofa eiloa a ia.”​—⁠1 IOANE 4:⁠8.

E ‵GALI ‵ki, e ‵lei katoatoa kae tumau a uiga katoa o Ieova. Kae ko te ‵toe uiga sili eiloa o Ieova mai ana uiga katoa ko te alofa. E seai aka foki se isi mea i tafa o tena alofa e fai ei ke fakapili‵pili atu tatou ki a Ieova. Se mea fakafiafia me i tena alofa ko tena toe uiga sili eiloa. E iloa pefea ne tatou te mea tenā?

² E isi se mea telā e fakaasi mai i te Tusi Tapu e uiga ki te alofa o Ieova telā e sē fakaaogā ki ana nisi uiga aka. E sē fai mai te Tusi Tapu me i te Atua ko te malosi io me i te Atua ko te fakamaoni io me i te Atua ko te poto. E maua ne ia a uiga katoa e tolu konei kae ne māfua mai foki i a ia. Kae isi se mea e ‵loto atu e uiga ki te alofa telā e fakaasi mai i te 1 Ioane 4:​8, penei: “Te Atua ko te alofa eiloa a ia.” E tonu, e ‵fonu te Atua i te alofa kae tenā loa te ‵kanotonu o ia. Kāti ka mafau‵fau ifo tatou, penei: E fai ne Ieova ana fuafuaga ona ko tena malosi. E takitaki a ia ne tena fakamaoni mo tena poto. Kae fakamalosi aka a ia ne tena alofa ke fakataunu i ei ana fuafuaga katoa. Kae e lavea atu faeloa tena alofa i te auala e fakagalue ei ne ia ana nisi uiga.

³ E masani sāle o fai atu me i a Ieova ko te alofa eiloa. Tela la, kafai e fia iloa ne tatou a mea e uiga ki te alofa, e ‵tau o sukesuke tatou ki mea e uiga ki a Ieova. Ke na iloilo aka ne tatou a nisi vaega o te alofa sili o Ieova.

Te ‵Toe Fakaasiga Sili o te Alofa

⁴ Ko oti ne fakaasi mai ne Ieova i auala e uke a tena alofa, kae tasi eiloa te mea telā e tu ‵kese ei tena alofa mai nisi mea aka. Se a te mea tenā? Ko te ugamaiga ne ia o tena Tama ke logo‵mae kae ke mate mō tatou. E mafai o fai ‵tonu atu tatou me tenei eiloa te ‵toe fakaasiga sili o te alofa talu mai te kamataga. Kaia e mafai ei o fai atu tatou penā?

⁵ Ne taku ne te Tusi Tapu a Iesu ko “te uluaki o mea katoa ne faite.” (Kolose 1:15) Ke mafaufau la​—⁠ko leva ne ola a te Tama a Ieova a koi tuai o faite te lagi mo te lalolagi. E pefea la te leva ne ‵nofo tasi ei te Tamana mo tena Tama? E fakatautau aka ne saienitisi me ko ‵tusa mo te 13 piliona tausaga te leva ne faite ei te lagi mo te lalolagi. Kae kafai e tonu te mea tenei, e sē tāitāi eiloa o ‵pau te leva tenā mo te vaitaimi ne ola ei te Tama a Ieova! Ne a ana mea ne fai i te vaitaimi leva katoa telā ne ola ei a ia? Ne galue eiloa a te Tama mo te fiafia mō tena Tamana e pelā me se “tagata poto i te fakatutu.” (Faataoto 8:30; Ioane 1:⁠3) Ne ga‵lue fakatasi a Ieova mo tena Tama ke faite a nisi mea katoa. Ko tafaga la te fia‵fia o laua i te vaitaimi tenā! Ko oi foki la te tino i a tatou e mafai o malamalama i te malosi o te fesokotakiga telā ne maua ne laua i se vaitaimi leva ‵ki penā? E tonu, e ‵kau fakatasi faeloa a Ieova te Atua mo tena Tama ona ko te malosi o te alofa i te la va.

⁶ E tiga eiloa te feitu tenā, ne uga mai ne Ieova a tena Tama ki te lalolagi nei ke fanau mai e pelā me se pepe. Ko tena uiga, ne ‵tau o taofi aka ne Ieova tena fesokotakiga mo tena Tama pele i te lagi mō se fia sefulu tausaga. Ne kilokilo ifo a ia mo te fiafia lasi mai te lagi i te taimi ne tupu aka ei a Iesu ke fai pelā me se tagata ‵lei katoatoa. Kāti ko 30 a tausaga o Iesu kae papatiso ei a ia. I te taimi tenā ne faipati ifo ei a tena Tamana mai te lagi, penei: “Tenei eiloa taku Tama fagasele e fiafia au ki ei.” (Mataio 3:17) E se taumate ne fiafia malosi eiloa tena Tamana i te kilo atu ki te fakamaoni o Iesu o fakataunu a mea katoa kolā ko oti ne ‵valo mai mo mea katoa kolā ne ‵tau o fai ne ia!​—⁠Ioane 5:36; 17:⁠4.

⁷ Kae pefea la a lagonaga o Ieova i a Nisani 14, 33 T.A. i te taimi ne fakalata kae puke fakapagota ei a Iesu ne tino kolā ne kaitāua ki ei? I te taimi ne fakatauemu atu ki a Iesu, puapuaki kae laupāpā? I te taimi ne ‵kini ei a ia kae ‵pasa valevale tena tua? I te taimi ne tuki ei ana lima mo vae ki te pou kae tuku ke tautau i ei ke fakatauemu atu a tino ki a ia? Ne a lagonaga ne oko ki tena Tamana i te taimi ne tagi atu ei tena pele ki a ia ona ko te logo‵mae? E pefea a lagonaga o Ieova i te taimi ne ‵futi ei te toe manava o Iesu, kae ka sē ola eiloa a Ia mō te taimi muamua talu mai te faitega o mea?​—⁠Mataio 26:​14-​16, 46, 47, 56, 59, 67; 27:​26, 38-​44, 46; Ioane 19:⁠1.

⁸ Me isi ne lagonaga o Ieova, e sē mafai o fakamatala fakamaea atu ne tatou a te logo‵mae telā ne oko atu ki a ia i te taimi ne puapuagā ei tena Tama. Kae e mafai o fakamatala atu te pogai ne talia ei ne ia ke tupu te mea tenei. Kaia ne talia ei ne te Tamana ke logo‵mae a ia? Ne fakaasi mai ne Ieova te mea gali tenā mō tatou i te Ioane 3:16​—⁠se fuaiupu telā e tāua kae fai pelā me ko te fakatoetoega o tusi Evagelia katoa. E fai mai, penei: “Me ne penā eiloa o alofa mai te Atua ki te lalolagi, ne tuku mai ei ne ia tena Tama e tokotasi, ko te mea ke sē malaia so se tino e fakatuanaki ki a ia, kae ke maua ne ia te ola se gata mai.” Tela la, ne fai ne te Atua te mea tenei ona ko te: alofa. E seai foki eiloa se isi alofa e sili atu i te alofa tenei.

Fakamaoniga me Alofa Mai Eiloa a Ieova ki a Tatou

⁹ Kae ui i ei, e isi se fesili tāua telā e sae aka: E mata, e alofa mai eiloa a Ieova ki a tatou taki tokotasi? Kāti e lotoma‵lie a nisi tino me e alofa eiloa a Ieova ki tino katoa e pelā mo te mea e fakaasi mai i te 1 Ioane 3:16. Kae mafau‵fau ifo latou me ‘e sē alofa mai te Atua ki a au eiloa.’ A te tonuga loa, e manako malosi a Satani te Tiapolo ke tali‵tonu tatou me e sē alofa kae sē fakatāua ne Ieova a tatou. I te suā feitu, e tiga eiloa e mafau‵fau tatou me e sē alofagina io me e sē tāua tatou, e fakamaoni mai ne Ieova me e tāua ‵ki ki a ia ana tavini fakamaoni taki tokotasi.

¹⁰ Ke mafau‵fau ki pati a Iesu ne tusi i te Mataio 10:​29-31. I te fakaasiatuga o te tāua o ana soko, ne fai atu a Iesu, penei: “E mafai ne koutou o ‵togi mai se avā manu eva fo‵liki [ko “sparrow,” NW] ki se sene; e seai foki se manu i a latou e to ki te one e se iloa ne te Tamana. E penā foki koutou, e faitaugina katoa otou lauulu. Tela la, sa manava‵se koutou, i te mea e sili atu eiloa koutou i manu eva konā!” Ke mafau‵fau ki uiga o pati konā ki tino kolā ne fakalogo‵logo ki a Iesu i aso o te kau apositolo.

¹¹ I aso o Iesu, a te sparrow ko te ‵toe manu kaina ‵togi māmā eiloa i manu katoa. E mafai o ‵togi ne koe ne manu e lua ki se tupe siliva e tasi. Kae ne toe fai mai a Iesu i te Luka 12:​6, 7, me kafai e fakamāumāu ne koe ne tupe siliva e lua e sē maua ne koe a manu e fa kae e lima. A te suā manu telā ne fakaopoopo mai, e fai fua pelā me e seai sena aogā. Kāti e sē tāua a manu penā i mafaufauga o tāgata, kae se a te kilokiloga a te Atua ki ei? Ne fai mai Iesu, penei: “E seai foki se manu i a latou [e aofia i ei te manu telā ne fakaopoopo mai] e to ki te one e se iloa ne te Tamana.” Nei la, kāti ko kamata o malama‵lama tatou i te manatu ne faka‵mafa ne Iesu. Kafai e fakatāua malosi ne Ieova a manu takitasi konā, e pefea la te tāua o te tino ki a ia! E pelā mo pati a Iesu, e iloa ne Ieova a mea likiliki e uiga ki a tatou. Ke oko foki eiloa ki ‵tou lauulu, e iloa ‵lei ne ia te aofaki!

¹² Kāti ka fai mai a nisi tino me e fakalasi‵lasi aka fua ne Iesu ana pati. Ke mafaufau la ki te toe‵tuga. E ‵tau o iloa ‵lei ne Ieova a tatou taki tokotasi ko te mea ke mafai o toe faite ne ia tatou! E fakatāua malosi ne ia tatou me iloa ‵lei ne ia a mea likiliki e uiga ki a tatou e aofia i ei ko sela i loto i ‵tou foitino, tausaga ne ola ei tatou penā foki loa mo mea ne ‵tupu ki a tatou. A te iloa ‵lei ne ia o te aofaki o lauulu i te ulu o te tino telā e nofo ki te 100,000, se mea foliki fua māfai e fakatusa ki nisi mea aka. Ko tafaga la te ‵gali o pati a Iesu me fakamaoni mai ei me alofa mai eiloa a Ieova ki a tatou taki tokotasi!

¹³ E isi foki se suā mea e fakaasi mai i te Tusi Tapu ke fakamaoni mai ei te alofa o Ieova. E kilo mai a ia ki ‵tou uiga ‵lei kae fakatāua ne ia. Ke mafau‵fau ki te tupu ‵lei ko Iosefatu. I te taimi ne fai ei ne te tupu se mea valea, ne fai atu te pelofeta a Ieova, penei: “A te mea ne fai ne koe, ko ala ei o kaitaua te Aliki ki a koe.” Ma‵faga o fakamasauaga ‵lei ke mafaufau faka‵lei ki ei! Kae ne seki gata fua i konā te fekau a Ieova. Ne toe fai mai a ia, penei: “Kae e ui i te mea tenā, kae e isi eiloa se ‵lei i a koe.” (2 Nofoaiga Tupu 19:​1-3) Tela la, ne seki fai ne te amiotonu o te kaitaua o Ieova, ke ‵kivi ana mata ki mea “‵lei” e uiga ki a Iosefatu. Ko oko eiloa i te fakamalosi loto ke iloa atu me kilo faeloa a Ieova ki mea ‵lei i loto i a tatou faitalia ‵tou tulaga sē ‵lei katoatoa?

Se Atua “Loto Fakamagalo”

¹⁴ Kafai ko agasala tatou, a te fanoanoa, te mā mo te loto mafatia telā e mafai o oko ki a tatou e fai ei ke mafau‵fau ifo tatou me ko sē aogā te ‵tou tavini atu ki a Ieova. Kae masaua la me ia Ieova e “loto fakamagalo.” (Salamo 86:⁠5) E tonu, kafai e sala‵mo tatou ki ‵tou agasala kae taumafai malosi ke sē toe fai te mea tenā, ka mafai ei o aogā ki a tatou a te loto fakamagalo o Ieova. Ke mafau‵fau ki te auala e fakamatala mai ei ne te Tusi Tapu a te vaega tenei o te alofa o Ieova.

¹⁵ Ne fakaaogā ne te faisalamo ko Tavita se tugāpati manino ke fakamatala mai ei te loto fakamagalo o Ieova, penei: “E pelā mo te ‵mao o te saegālā mai te togālā, e penā foki te faka‵mao ne ia o‵tou agasala mai i a tatou.” (Salamo 103:12) E pefea te ‵mao o te saegālā mai te togālā? Kafai e mafau‵fau ki ei, a te feitu ki saegālā ko te toe koga ‵mao eiloa mai te feitu ki togālā; e sē mafai eiloa o fetaui a mata konā. E fai mai se tagata telā ne akoga faka‵lei e uiga ki te tugāpati tenā e pelā me ko “te ‵toe koga ‵mao eiloa telā e mafai o fakaataata i ‵tou mafaufau.” E fakaasi mai ne pati a Tavita me kafai ko fakamagalo ne Ieova tatou, e faka‵mao keatea ne ia ‵tou agasala mai i a ia.

¹⁶ Kai taumafai aka loa koe o ‵solo keatea se lailaiga i luga i se gatu ‵kena? Kāti e mafai eiloa o lavea atu ne koe te lailaiga tenā faitalia au taumafaiga ke ‵solo keatea. Ke mafaufau ki te auala ne fakamatala mai ei ne Ieova tena loto fakamagalo: “E ui eiloa e fai otou agasala e pelā me se gatu ‵kula, kae nei ka faka‵ma ne au koutou ke ‵ma pelā me se kiona. E ui eiloa e fai pelā me se laugatu ‵kula tamī, kae ka ‵fulu ne au koutou ke ‵kena pelā me ne vulu.” (Isaia 1:18 Tusi Paia, Samoa) A te lanu ‵kula se lanu telā e fakaaogā sāle ke faka‵lanu ei a laugatu.a E sē mafai lele eiloa ne tatou o ‵solo keatea a te lailaiga o te agasala. Kae e mafai eiloa ne Ieova o ‵solo keatea a agasala kolā e fai pelā me se laugatu ‵kula kae faka‵kena ne ia ke pelā me se kiona io me ko vulu. Tela la, kafai ko fakamagalo ne Ieova ‵tou agasala, e sē ‵tau o mafau‵fau tatou me tauave ne tatou a te lailaiga o te agasala tenā i ‵tou olaga kātoa.

¹⁷ Ne fai atu a Hesekia ki a Ieova i tena pese fakaotia loto telā ne ‵fatu i te taimi ne ‵lei ei tena masaki fakamataku, penei: “Ko oti ne ‵pei keatea ne koe aku agasala ki ou tua.” (Isaia 38:​17, Tusi Paia, Samoa) E fakaasi mai i konei a Ieova e pelā me puke atu ki agasala a tino fai mea ‵se kolā ko sala‵mo kae ‵pei atu ki ona tua telā ko sē toe mafai ei o lavea ne Ia io me masaua ne ia. E ‵tusa mo nisi tusitusiga, e mafai o fakamatala atu a te manatu tenā e pelā me: “Ko fai ne koe [aku agasala] e pelā eiloa me seki fai ne au.” Ko oko eiloa i te fakamafanafana mai a te mea tenā, i ne?

¹⁸ I tena folafolaga me ka toe faka‵fou a mea, ne fakamatala mai ne te pelofeta ko Mika a tena loto talitonu e uiga ki te loto fakamagalo o Ieova ki tino sala‵mo, penei: “Te Aliki, e seai se Atua e pelā mo koe; e fakamagalo ne koe a agasala a ou tino kolā ne ola mai. . . . Kae ‵pei ne koe olotou agasala katoa ki te moana ‵poko.” (Mika 7:​18, 19, Tusi Paia, Samoa) Ke mafau‵fau ki te uiga o pati konā ki tino kolā ne ola i te taimi ne tusi ei te Tusi Tapu. E mata, e mafai o toe maua mai se mea telā ko oti ne ‵pei atu ki te “moana ‵poko”? Tela la, e fakaasi faka‵lei mai i pati a Mika me kafai ko fakamagalo ne Ieova ‵tou agasala ko fakaseai katoatoa eiloa ne ia a agasala konā.

‘Te Alofa Atafai o te ‵Tou Atua’

¹⁹ A te alofa atafai se vaega foki e tasi o te alofa o Ieova. Se a te alofa atafai? E maua foki i te Tusi Tapu a nisi pati Epelu mo pati Eleni kolā e fakauiga katoa ki te alofa atafai. E pelā mo te pati Epelu ko te ra·chamʹ, telā e fakauiga ne Ieova ki a ia eiloa, e fetaui mo te pati ko te “moegatama” kae mafai foki o fakauiga ki te “alofa” o te mātua.

²⁰ E fakaaogā ne te Tusi Tapu a lagonaga o te mātua ki tena pepe ke akoako mai ei ke iloa ne tatou a te alofa atafai o Ieova. E fai mai te Isaia 49:​15, penei: “E mafai ne se fafine o puli tena pepe, kae sē alofa ki te tamaliki i tena moegatama? E tonu, e mafai o fakapuli ne ia tena tamaliki, ka ko au e sē mafai o fakapuli ne au koutou.” (The Amplified Bible) Se mea faigata ‵ki ke fakaataata i ‵tou mafaufau se mātua telā e sē fia tausi kae atafai atu ki tena tama. E tonu, e vāivāi ‵ki a te tamaliki kae e manakogina ke saga tonu atu a te mātua ki ei i te ao mo te po. Kae se mea fakafanoanoa ke iloa atu me ko sē fia ‵saga atu a mātua ki olotou tama‵liki i “taimi faiga‵ta” konei. (2 Timoteo 3:​1, 3) Kae ne folafola mai a Ieova, penei: “Ka ko au e sē mafai o fakapuli ne au koutou.” E sili atu a te ‵nau o te alofa atafai o Ieova ki ana tavini i lō te ‵toe alofa maluga telā e maua sāle ne tatou​—⁠ko te alofa atafai o te mātua ki tena tamaliki.

²¹ E pelā me se mātua alofa, e fakaasi atu pefea ne Ieova a te ‵nau o tena alofa atafai? E mafai o laveagofie ne tatou a tena uiga tenei i ana faifaiga ki tino Isalaelu i aso mua. Ke mafau‵fau ki te taimi ne ‵nofo ei a te fia miliona o te kau Isalaelu i Aikupito kae ola puapuagātia i ei. (Esoto 1:​11, 14) Ona ko te lotou puapuagā ne ‵tagi atu ei latou ki a Ieova. Ne saga atu pefea a te Atua alofa atafai ki a latou?

²² Ne otia masei a te loto o Ieova. Ne fai mai a ia, penei: “Ko oti ne lavea ne au te fakapologa fi‵ta o tino Isalaelu ne tino Aikupito; ko oti ne lagona ne au te lotou ‵tagi ke faka‵sao latou mai te fakapologa ne tagata Aikupito. E iloa ne au olotou puapuagā katoa.” (Esoto 3:⁠7) E sē kilo atu fua a Ieova ki puapuagā kolā fe‵paki mo latou io me ko te lotou ‵tagi, kae lagona foki ne ia te lotou logo‵mae. E alofa ‵tonu eiloa a Ieova. Kae e fetaui eiloa a te faifaiga tenā mo te alofa atafai. Kae ne seki lagona fua ne Ieova te logo‵mae o ana tino kae ne gasuesue a ia mō latou. E fai mai te Isaia 63:​9, penei: “Ne faka‵sao ne ia latou i tena alofa mo tena atafai.” “Ne fakaaogā ne ia tena ‵mana mo tena malosi” ke faka‵sao te kau Isalaelu mai Aikupito. (Teutelonome 4:34) Fakamuli ifo, ne fagai fakavavega kae tausi ne ia latou ke oko atu ki te lotou fenua ola ‵lei.

²³ E sē fakaasi atu fua ne Ieova a tena alofa atafai ki ana tino e pelā me se potukau. E saga tonu mai a te ‵tou Atua alofa ki a tatou taki tokotasi. E iloa ‵lei ne ia a puapuagā kolā e mafai o oko mai ki a tatou. Ne fai mai te faisalamo, penei: “A te Aliki, e onoono faeloa ki tino amio‵tonu kae talia foki olotou fakatagi; Te Aliki e nofo pili ki a latou kolā e loto vāivāi, e fakasao foki ne ia a latou kolā ko seai ne olotou fakamoemoega.” (Salamo 34:​15, 18) E fesoasoani mai pefea a Ieova ki a tatou taki tokotasi? E sē ave keatea fua ne ia a te māfuaga o logo‵maega. Kae ko oti ne fai ne ia a fakatokaga e uke mō tino kolā e ka‵laga atu ki a ia mō se fesoasoani. E maua atu i tena Muna a fakatakitakiga aogā kolā e tāua ‵ki. E tuku mai ne ia i te fakapotopotoga a ovasia faka-te-agaga kolā e taumafai o fakaakoako atu ki tena alofa atafai mai te fesoasoani atu ki nisi tino. (Iakopo 5:​14, 15) E pelā me ko te tino telā e ‘tali atu ki talosaga’ e tuku atu ne Ieova a tena “Agaga Tapu ki tino kolā e fakamolemole atu ki a ia.” (Salamo 65:2; Luka 11:13) A fakatokaga katoa konei ko te fakaasiga o te “alofa ‵nau o te ‵tou Atua.”​—⁠Luka 1:⁠78.

²⁴ E mata, e sē se mea fakafiafia ke mafaufau ‵loto tatou ki te alofa atafai o te ‵tou Tamana faka-te-lagi? I te mataupu muamua, ne fakamasaua mai ei ki a tatou me ko oti ne fakaasi ne Ieova tena malosi, tena fakamaoni mo tena poto i se auala alofa ke maua ne tatou a mea ‵lei mai i ei. Kae i te mataupu tenei, ko lavea atu ne tatou me ko oti ne fakaasi mai ne Ieova a tena alofa ki tino katoa​—⁠penā foki mo tatou taki tokotasi​—⁠i auala fakaofoofogia e uke. Tela la, se mea ‵lei ke ‵sili ifo tatou, penei, ‘E saga atu au pefea ki te alofa atafai o Ieova?’ Ke na ‵saga atu ki ei mai te fakaasiatuga o te alofa ki a ia mo tou loto, mafaufau, foitino mo tou malosi kātoa. (Maleko 12:​29, 30) Ke na fakaasi atu ne koe i tou olaga kātoa i aso takitasi a te fia fakapilipili atu o koe ki a Ieova. Kae ka fakapilipili atu eiloa a Ieova, te Atua alofa atafai ki a koe ke oko eiloa ki te sē-gata-mai!​—⁠Iakopo 4:⁠8.

[Fakamatalaga mai lalo]

Koi Masaua ne Koe?

• E iloa pefea ne tatou me i te alofa ko te uiga sili eiloa o Ieova?

• Kaia e iloa ei ne tatou me i te ‵toe fakaasiga sili eiloa o te alofa ko te ugamaiga ne Ieova a tena Tama ki a tatou?

• E fakamaoni mai pefea ne Ieova a tena alofa mō tatou taki tokotasi?

• Ne a fakamatalaga ‵gali i te Tusi Tapu e fakaasi mai ei te loto fakamagalo o Ieova?

[Fesili mo te Sukesukega]

1-3. (a) Se a te fakamatalaga e fakaasi mai i te Tusi Tapu ki te uiga o Ieova ko te alofa, kae se a te mea e tu ‵kese i ei? (e) Kaia e fai mai ei te Tusi Tapu me i te “Atua ko te alofa eiloa a ia”?

4, 5. (a) Se a te ‵toe fakaasiga sili o te alofa talu mai te kamataga? (e) Kaia e mafai ei o fai atu tatou me e ‵kau fakatasi a Ieova mo tena Tama ona ko te malosi o te alofa i a laua?

6. Ne fakaasi atu pefea ne Ieova ana lagonaga ki Tena Tama i te taimi ne papatiso i ei?

7, 8. (a) Ne a mea ne ‵tau o kufaki i ei a Iesu i a Nisani 14, 33 T.A., kae ne pokotia pefea tena Tamana faka-te-lagi i ei? (e) Kaia ne talia ei ne Ieova ke logo‵mae tena Tama kae ke mate foki?

9. Se a te mea e manako a Satani ke tali‵tonu tatou ki ei e uiga ki te kilokiloga a Ieova ki a tatou, kae se a te mea e fakamaoni mai ne Ieova?

10, 11. E fakaasi mai pefea ne te tala fakatusa a Iesu e uiga ki te sparrow a te tāua o tatou i te kilokiloga a Ieova?

12. E iloa pefea ne tatou me ‵tonu a pati a Iesu i te taimi ne faipati ei a ia ki te aofaki o lauulu i te ulu?

13. E fakaasi mai pefea ne te tala o Iosefatu me kilo atu a Ieova ki mea ‵lei i a tatou faitalia ‵tou tulaga sē ‵lei katoatoa?

14. Kafai e fai ne tatou se agasala, ne a lagonaga e mafai o oko mai ki a tatou, kae e mafai pefea o aogā ki a tatou a te alofa fakamagalo o Ieova?

15. E pefea te ‵mao o te koga e tuku ei ne Ieova ‵tou agasala?

16. Kafai ko fakamagalo ne Ieova ‵tou agasala, kaia e tali‵tonu ei tatou me ka kilo mai a ia ki a tatou e pelā me ko ‵ma?

17. I te auala fea e ‵pei ei ne Ieova ‵tou agasala ki ona tua?

18. Ne fakamatala mai pefea ne te pelofeta ko Mika, me kafai ko fakamagalo ne Ieova ‵tou agasala ko fakaseai katoatoa eiloa ne ia?

19, 20. (a) Se a te uiga o te pati Epelu telā ne ‵fuli ki te “alofa”? (e) E fakaaogā pefea ne te Tusi Tapu a lagonaga o te mātua ki tena pepe ke akoako mai ki a tatou a te alofa atafai o Ieova?

21, 22. Ne a mea ne oko atu ki te kau Isalaelu i Aikupito i aso mua, kae ne saga atu pefea a Ieova ki te lotou ‵tagi?

23. (a) E fakamaoni mai pefea ne te faisalamo a te saga tonu mai o Ieova ki a tatou taki tokotasi? (e) I auala fea e fesoasoani mai ei a Ieova ki a tatou?

24. Ka saga atu pefea koe ki te alofa o Ieova?

[Ata i te itulau e 25]

‘Ne tuku mai ne te Atua tena Tama e tokotasi’

[Ata i te itulau e 26]

“E sili atu eiloa koutou i manu eva konā”

[Te Fakamatalaga]

© J. Heidecker/VIREO

[Ata i te itulau e 28]

Ko mafai o iloa ne tatou a te alofa ‵nau o Ieova mai lagonaga o te mātua ki tena pepe