Fāfine Kolā e Fakafiafia ne Latou te Loto o Ieova

“Ke taui atu ne te Aliki ki a koe e ‵tusa mo au galuega alofa ne fai. Ke maua ne koe se taui katoatoa mai te Aliki te Atua o Isalaelu.”​​—⁠LUTA 2:​12.

ONA ko te ma‵taku ki te Atua ne ‵teke atu ei a fāfine e tokolua ki te Tupu. Ona ko te fakatuanaki, ne fakamalosi aka ei se fafine talitāgata ke puipui ne ia a sipāi Isalaelu e tokolua, faitalia me ne tu atu tena ola i se tulaga fakamataku. Mai te faiga o faka‵tauga ‵lei mo te loto maulalo ne mafai ei o fakasao ne se fafine a ola o tino e tokouke kae puipui foki a te tino telā ne fakaeke ne Ieova mai te tatino. Ona ko te fakatuanaki ki a Ieova te Atua fakatasi mo te uiga talimālō, ne fakamalosi atu i ei ki se fafine ko mate tena avaga ke tuku atu a toe meakai ne maua ne ia ki te pelofeta a te Atua. Konei a nāi fakaakoakoga e maua atu i te Tusi Tapu e uiga ki fāfine kolā ne fakafiafia ne latou te loto o Ieova.

² E fakaasi mai ne faifaiga mo fakamanuiaga a Ieova ki luga i a latou konei me e se fiafia fua a ia ki se tino me i a ia se fafine io me se tagata kae sili atu tena fiafia ki uiga faka-te-agaga o te tino. I te lalolagi i aso nei, telā e ‵fonu i mea faka-te-foitino, se mea faigata ke ‵saga tonu atu ki ‵tou manakoga faka-te-agaga. Kae e mafai eiloa o faka‵lei aka te fakalavelave tenā, e pelā mo te mea ne fakaasi mai ne te fia miliona o fāfine kolā e ma‵taku ki te Atua kae fakatokouke foki ne latou a tino o te Atua i aso nei. E fakaakoako atu a fāfine Kelisiano konā ki te fakatuanaki, te poto, te uiga talimālō mo nisi uiga ‵gali kolā ne fakaasi mai ne fāfine kolā e ma‵taku ki te Atua i te Tusi Tapu. E tonu, e ma‵nako foki a tāgata Kelisiano o fakaakoako ki uiga ‵gali kolā ne fakaasi mai ne fāfine konā i aso mua. Ko te mea ke mafai o fai tatou penā, ke na suke‵suke faka‵lei nei tatou ki tala i te Tusi Tapu e uiga ki fāfine kolā ne fakamatala mai i te kamataga.​—⁠Loma 15:4; Iakopo 4:⁠8.

Fāfine Kolā ne ‵Teke Atu ki te Tupu

³ Ne taumafai a tino e tokouke kolā ne fakasala ona ko te tatino o fai olotou fakamasakoga, i te fono fakamasino i Nuremberg, Siamani mai tua o te Taua i te Lua a te lalolagi me ne faka‵logo fua latou ki fakatonuga. Ke faka‵tusa aka la ne tatou a tino konei mo fāfine Isalaelu e tokolua ko Sepola mo Pua kolā ne fakafanau sāle ne laua a fāfine, kae ne ‵nofo atu i Aikupito i taimi o se Tupu fakasāua e tokotasi. Ona ko te manavase ki te gasolo aka o tokouke a tino Epelu, ne fakatonu atu a te Tupu ki fāfine konei ke tamate ne laua a so se tamaliki tagata Epelu telā e fanau mai. Ne ‵saga atu pefea a fāfine konei ki te fakatonuga masei tenā? “Ne seki faka‵logo ei laua ki te fakatonuga a te tupu, kae ne faka‵sao eiloa ne laua a tama‵liki tāgata.” Kaia ne seki ma‵taku ei a fāfine konei ki fakatonuga a tāgata? Me ne “ma‵taku ki te Atua” a fāfine tokolua konei.​—⁠Esoto 1:​15, 17; Kenese 9:⁠6.

⁴ E tonu, ne fakalago‵lago a fāfine konei ki a Ieova, kae ne fai a ia e pelā me se “talita” ki a laua, me ne puipui ne ia laua mai te kaitaua o te Falao. (2 Samuelu 22:31; Esoto 1:​18-​20) Kae ne seki gata fua i konā a fakamanuiaga a Ieova. Ne fakamanuia ne ia a Sepola mo Pua mai te faiga ke isi ne lā kāiga. Ne amanaia foki a ia ki a laua mai te faiga ke tusi a lā igoa i tena Muna ko te mea ke fai‵tau ki ei a tupulaga fakamuli, kae ne puli atu i ei a te igoa o te Tupu.​—⁠Esoto 1:21; 1 Samuelu 2:​30e; Faataoto 10:⁠7.

⁵ E mata, e isi ne fāfine e pelā mo Sepola mo Pua i aso nei? Ao, e isi! I tausaga taki tasi e lau i afe a fāfine kolā e folafola atu ne latou a te fekau fakaola tino i te Tusi Tapu i fenua kolā e fakatapu i ei ne “te fakatonuga a te tupu” a te galuega, kae fai ei ke tu atu te lotou saolotoga mo olotou ola i se tulaga fakamataku. (Epelu 11:23; Galuega 5:​28, 29) Ona ko te lotou a‵lofa ki te Atua e pelā foki mo olotou tuakoi, e se talia eiloa ne vaegā fāfine penei so se tino ke taofi aka ei latou mai te fakaasiatuga o te tala ‵lei o te Malo o te Atua ki nisi tino. Tela la, ne fepaki ei a nisi fāfine Kelisiano mo ‵tekemaiga mo fakasauāga. (Maleko 12:​30, 31; 13:​9-​13) E pelā mo Sepola mo Pua, e iloa ne Ieova a faifaiga a fāfine ‵lei kae loto ‵toa konā, kae ka fakaasi atu ne ia tena alofa ki a latou mai te faiga ke tusi olotou igoa i tena “tusi o te ola” māfai e tumau eiloa latou i te fakamaoni ke oko ki te gataga.​—⁠Filipi 4:3; Mataio 24:⁠13.

Ko Fakafiafia ne se Fafine Tali Tāgata Mua a te Loto o Ieova

⁶ Ne nofo atu se fafine tali tāgata e igoa ki a Lahapa i te fa‵kai o Kanana ko Ieliko i te 1473 T.L.M. Se mea mautinoa me ne logo faeloa a Lahapa i tala o mea ‵tupu. I te taimi ne olo atu ei a sipāi e tokolua mai Isalaelu o ‵muni i tena fale, ne fakamatala atu ne ia ki a laua a tala o mea ne ‵tupu ki te faka‵saoga fakavavega o te kau Isalaelu mai Aikupito, faitalia me ne ‵tupu a mea konā i te 40 tausaga ko ‵teka! Ne iloa foki ne ia a tala e uiga ki te manumalo o Isalaelu i tupu o Amoli ko Sekono mo Oko. Kae ke mafaufau la ki te aogā o mea ne iloa ne ia ki a ia. Ne fai atu a ia ki sipāi, penei: “E iloa ne au i te fenua tenei ko oti ne tuku atu ne te Aliki mō koutou. . . . A te Aliki [Ieova] te otou Atua, ko te Atua i te lagi mo te lalolagi.” (Iosua 2:​1, 9-11) E tonu, ne gasuesue a Lahapa o fai te mea e ‵tau o fai ona ko mea kolā ne iloa ne ia e uiga ki a Ieova mo ana faifaiga ne fai ki te kau Isalaelu kae ne fai i ei ke lasi tena fakatuanaki ki a ia.​—⁠Loma 10:10.

⁷ Ne fakamalosi aka ne te fakatuanaki o Lahapa ke gasuesue a ia. Ne “talimalo” faka‵lei ne ia a sipāi Isalaelu kae ne fakalogo foki a ia ki fakatonuga kolā ne iku atu i ei ki tena fakasaoga i te taimi ne taua atu ei a Isalaelu ki Ieliko. (Epelu 11:31; Iosua 2:​18-21) E seai se fakalotolotolua me ne fiafia eiloa a Ieova ki te fakatuanaki o Lahapa, me ne fakamalosi atu a ia ki te soko Kelisiano ko Iakopo ke tusi foki tena igoa i tafa o Apelaamo, te taugasoa o te Atua, ke fai pelā me se fakaakoakoga ke tau‵tali ki ei a Kelisiano. Ne tusi mai a Iakopo, penei: “E penā foki eiloa te takuamiotonugina o Lahapa. A ia ko te fafine tali tāgata ne takuamiotonugina i ana galuega, i te tali‵leiga ne ia a avefekau a tino Iutaia, kae fesoasoani atu ki a latou ke olo i te suā auala.”​—⁠Iakopo 2:25.

⁸ Ne taui atu ne Ieova a Lahapa i auala kese‵kese. I te auala e tasi, ne faka‵sao fakavavega ne ia a tena ola fakatasi mo tino katoa kolā ne faka‵lafi i tena fale​—⁠kolā ko “ana kāiga.” Kae ne talia foki ne ia a tino konei ke “‵nofo eiloa i Isalaelu” kae ke fai pelā me ne tino o te fenua. (Iosua 2:​13; 6:​22-​25; Levitiko 19:​33, 34) Kae ne seki gata fua i konā. Ne fai foki ne Ieova ke fai a Lahapa e pelā me se tupuga fafine o Iesu Keliso. Ma‵faga o fakaasiga gali o te alofa tumau ki te fafine telā ne fai muamua mo fai se tino ifo ki tupu i Kanana!a​—⁠Salamo 130:​3, 4.

⁹ E pelā mo Lahapa, ko oti ne tiakina ne nisi fāfine Kelisiano i aso o te kau apositolo ke oko mai ki aso nei a olotou olaga matagā ko te mea ke fakafiafia atu ei ki te Atua. (1 Kolinito 6:​9-​11) E seai se fakalotolotolua me ne ‵tupu aka a nisi o latou i se olaga telā e ‵pau mo te olaga i Kanana, telā ne ‵fonu i amioga fina lalolagi kae ‵kilo atu a tino ki ei e pelā me se mea ‵lei. Kae ne ‵fuli ne latou olotou olaga ona ko te fakatuanaki telā e fakavae ki te iloaga tonu mai te Tusi Tapu. (Loma 10:17) Tela la, e mafai o fai atu me “e se ma foki a te Atua manafai e taku a ia ne latou ko te lotou Atua.” (Epelu 11:16) Ma‵faga o fakaaloaloga maluga!

Ne Fakamanuiagina Ona ko Ana Faka‵tauga ‵Lei

¹⁰ E tokouke a fāfine i aso mua ne fakaasi atu ne latou i se auala tu ‵kese a te faiga o faka‵tauga ‵lei, kae ne fai ei latou e pelā me ne mea tāua ki tino o Ieova. Se tokotasi mai i ei ko Apikaila, te avaga a te tagata Isalaelu maumea telā e uke ana manafa ko Napalu. Ona ko ana faka‵tauga ‵lei ne faka‵sao ei ne Apikaila a ola o tino e tokouke kae puipui foki ne ia a Tavita, telā ne fai fakamuli mo tupu o Isalaelu, mai te tatino. E mafai o fai‵tau tatou ki te tala o Apikaila i te 1 Samuelu mataupu e 25.

¹¹ I te kamataga o te tala, ne ‵nofo atu a Tavita mo ana tagata mo tausi mamoe a Napalu, kae fesoasoani atu o tausi ana mamoe i ao mo po e aunoa mo se ‵togi ona ko te lotou a‵lofa ki te olotou taina Isalaelu ko Napalu. I te taimi ko tai oti ei a mea‵kai a Tavita, ne uga atu ne ia ana tagata e tokosefulu o fakamolemole atu ki a Napalu ke maua mai ne olotou meakai. Ne maua ne Napalu te avanoaga ke fakaasi atu tena loto fakafetai ki a Tavita kae ke fakaaloalo atu ki a ia e pelā me ko te tino ne fakaekegina ne Ieova. Kae ne seki fakaasi atu ne Napalu tena loto fakafetai. Ona ko tena kaitaua, ne taku fakamasei ne ia a Tavita kae ‵tuli keatea ne ia a tagata konā e aunoa mo ne meakai. I te taimi ne logo ei a Tavita i te mea tenei, ne fakamaopoopo ne ia ana tāgata e toko 400 kae olo atu o taui atu te masei tenā. I te logoga a Apikaila i te faiga sē ‵lei a tena avaga ne fai, ne gasuesue fakavave a ia kae avatu ne ia i se auala poto a meakai ki a Tavita. Fakamuli ifo, ne fanatu ei tou fafine ki a Tavita.​—⁠Fuaiupu e 2-20.

¹² I te taimi ne fakafetaui atu ei a Apikaila ki a Tavita, ne fakaasi atu ne tena fakamolemole telā ne fai mo te loto maulalo a tena amanaia malosi ki te tino telā ne fakaekegina ne Ieova. Ne fai atu tou fafine, penei: “A te Aliki ka fai ne ia koe mo tupu, pelā foki a tino i tou gafa, me i a koe e taua i ana taua,” kae ne toe fai atu foki tou fafine me ka filifili aka ne Ieova a Tavita ke fai mo takitaki o Isalaelu. (Fuaiupu 28-30) I te taimi foki eiloa tenā, ne fakaasi atu ne Apikaila a te lasi o tena loto toa mai te fai atu ki a Tavita me kafai e se taofi tena kaitaua ka iku atu a ia ki te tatino. (Fuaiupu e 26, 31) Ne ‵noga ifo te kaitaua o Tavita ona ko te loto maulalo o Apikaila, tena amanaia tonu mo tena mafaufau faka‵lei. Ne tali atu a tou tagata, penei: “Ke vikia te Aliki te Atua o Isalaelu, telā ne uga mai ne ia koe i te aso nei! Au e fakafetai ki te Atua e ‵tusa mo tou alofa mai, e pelā foki mo te mea ne fai ne koe i te aso nei o taofi ne koe a au mai te fai o te agasala ko te tatino.”​—⁠Fuaiupu e 32, 33.

¹³ I tena fokiatuga ki te fale, ne loto toa a Apikaila o ‵sala atu ki tena avaga e uiga ki tena meaalofa ne avatu ki a Tavita. I te taimi ne maua atu ei ne tou fafine a ia, “ko oko eiloa i tena konā.” Telā ne faitali ei a ia ke ‵lei tena konā. Ne a mea ne fai ne Napalu? Ne poi masei a tou tagata telā ne faka‵mate ei tena foitino. E sefulu aso mai tua ne mate ei a ia i lima o te Atua. I te logoga a Tavita me ko mate a Napalu, ne avatu ei tena fekau ke avaga laua mo Apikaila, telā e amanaia kae āva malosi a ia ki ei. Ne talia ne Apikaila te fekau a Tavita.​—⁠Fuaiupu e 34-42.

E Mafai o Fai Koe e Pelā mo Apikaila?

¹⁴ E mata, e isi ne uiga o Apikaila e mafai ne koutou​—⁠tāgata e pelā foki mo fāfine​—⁠o fakaakoako malosi ki ei? Kāti e manako koe ke maua a faka‵tauga ‵lei māfai ko sae aka se fakalavelave lasi. Io me kāti e manako koe o faipati atu i se auala filemu kae āva māfai e kaitāua malosi a tino i ou tafa. Kafai e penā loa, kaia e se ‵talo atu ei ki a Ieova mō te mea tenā? Ko oti ne tauto mai a ia me ka tuku mai ne ia a te poto, te atamai, mo te mafaufau faka‵lei ki tino katoa kolā e “‵talo mō te fakatuanaki.”​—⁠Iakopo 1:​5, 6; Faataoto 2:​1-6, 10, 11.

¹⁵ E tāua ‵ki a vaegā uiga ‵gali penā ki se fafine telā e avaga ki se tagata sē talitonu telā e se fia saga malosi io me fakatāua ne ia a fakatakitakiga i te Tusi Tapu. Kāti a ia se tagata inu malosi. Kāti ka mafai o ‵fuli a uiga o vaegā tāgata penā. E tokouke a tino ko oti ne fai penā​—⁠ona ko uiga agamalū, te āva mo te ‵lei o amioga a olotou avaga.​—⁠1 Petelu 3:​1, 2, 4.

¹⁶ Faitalia me ne a fakalavelave faiga‵ta e fepaki mo koe i te fale, ke masaua me e toka faeloa a Ieova o fesoasoani atu ki a koe. (1 Petelu 3:12) Tela la, taumafai o fakamalosi a koe eiloa i te feitu faka-te-agaga. ‵Talo atu ke maua te poto mo te loto ‵lei. E tonu, ke fakapilipili atu ki a Ieova mai te sukesuke faeloa ki te Tusi Tapu, ‵talo, te mafaufau ‵loto mo te ‵kau fakatasi faeloa mo taina Kelisiano. Ne seki taofi aka ne kilokiloga faka-te-foitino o te avaga a Apikaila a tena alofa ki te Atua mo ana faifaiga ki tena tavini fakaekegina. Ne gasuesue a ia e ‵tusa mo fakatakitakiga amio‵tonu. Ke oko foki eiloa ki kāiga kolā e fai a tāgata a‵vaga i ei e pelā me ne tavini a te Atua, e iloa aka ne te avaga fafine Kelisiano me e ‵tau o tumau a ia i te galue malosi ke fakatumau tena malosi i te feitu faka-te-agaga. E tonu, e panaki tonu mo tena avaga a te tiute ke tausi atu ki a ia i te feitu faka-te-agaga mo te feitu faka-te-foitino, kae e ‵tau eiloa o galue a ia ‘ko te mea ke katoatoa tena fakaolataga.’​—⁠Filipi 2:12; 1 Timoteo 5:⁠8.

Ne Maua ne ia “te Taui Fakapelofeta”

¹⁷ E fakaasi mai i te auala telā ne tausi ei ne Ieova te fafine ko mate tena avaga i aso o te pelofeta ko Elia a tena amanaia malosi ki tino kolā e ‵lago malosi atu ki te tapuakiga tonu mai te tukuatuga o latou eiloa ke fai tena galuega e pelā foki mo olotou kope. Ona ko te oge telā ne poko i aso o Elia, ne fia‵kai malosi a tino e tokouke e aofia i ei te fafine telā ko mate tena avaga mo tena tamaliki tagata i Salefata. I te taimi eiloa telā ko fakaotioti ei a lā meakai kae oko atu se tino fou ki te lā fale​—⁠ko te pelofeta ko Elia. Ne fai atu ne ia se fakamolemole faigata. E tiga eiloa ne iloa ‵lei ne ia te fakalavelave ko oko atu ki te fafine tenā, ne fakamolemole atu tou tagata ki se “tamā puta falaoa” mai i mū sinu mo mū falaoa a laua e toe mā ia. Kae ne toe fai atu a ia, penei: “Me konei a muna a te Aliki, te Atua o Isalaelu: ‘A te falaoa i loto i te pōla tenā ka se mafai o palele, penā foki te sinu olive tenā i loto i te tiā, ke oko eiloa ki te aso telā e faka‵to ei ne au a te vaiua.’ ”​​—⁠1 Tupu 17:​8-​14.

¹⁸ Ne a au mea kāti ne mafai o fai ki se vaegā fakamolemole penā? E se taumate ne iloa ne te fafine Salefata me i a Elia se pelofeta a Ieova telā ne “fano eiloa te fafine tenā o fai te mea telā ne fai atu ne Elia.” Ne a mea ne fai ne Ieova ona ko faifaiga a tou fafine? Ne tuku atu faeloa ne ia i se auala fakavavega a meakai ki te fafine mo tena tamaliki tagata e pelā foki mo Elia i te taimi o te oge. (1 Tupu 17:​15, 16) E tonu, ne tuku atu ne Ieova ki te fafine i Salefata a “te taui fakapelofeta” faitalia me se se tino Isalaelu a ia. (Mataio 10:41) Ne tavae foki ne te Tama a te Atua a te fafine tenei i te taimi ne taku atu ei ne ia a tou fafine e pelā me se fakaakoakoga ki tino sē fakamaoni o tena fenua, ko Nasaleta.​—⁠Luka 4:​24-​26.

¹⁹ E tokouke a fāfine Kelisiano i aso nei e fakaasi atu ne latou a uiga o te fafine Salefata telā ko mate tena avaga. E pelā mo nisi tuagane Kelisiano e tokouke​—⁠kolā e ma‵tiva kae ‵tau o tausi atu ki olotou kāiga​—⁠e lotoma‵lie ke talimālō faka‵lei ne latou a toeaina asiasi mo olotou avaga i vaiaso katoa. E ‵kai fakatasi a nisi o latou mo taina mo tuagane kolā e ga‵lue tumau i te taviniga, e fesoasoani atu ki tino ma‵tiva io me tuku atu ne latou olotou kope ke ‵lago atu ei ki te galuega o te Malo. (Luka 21:⁠4) E mata, e lavea mai ne Ieova a olotou faifaiga konā? Ao! “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mo ia e auala i otou galuega a‵lofa kolā ne fai mo otou taina kelisiano, kae koi fai nei eiloa ne koutou.”​—⁠Epelu 6:⁠10.

²⁰ Ne maua ne nisi fāfine kolā e ma‵taku ki te Atua i aso o te kau apositolo a te tauliaga ke tavini atu ki a Iesu mo ana apositolo. I te suā mataupu ka sautala tatou ki te auala ne fakafiafia atu ei ne fāfine konei a te loto o Ieova, e pelā foki mo fakaakoakoga ‵gali a fāfine i aso nei kolā e tavini atu ki a Ieova mo te loto kātoa faitalia a fakalavelave faiga‵ta e fepaki mo latou.

[Fakamatalaga mai lalo]

Ke Toe Fakafoki Aka

• Ne fakafiafia atu pefea ne fāfine konei a te loto o Ieova?

• Sepola mo Pua

• Lahapa

• Apikaila

• Te fafine Salefata ko mate tena avaga

• E mafai pefea o fesoasoani mai a te mafaufau ‵loto ki fakaakoakoga a fāfine konei ki a tatou taki tokotasi? Ke fakamatala mai.

[Fesili mo te Sukesukega]

1, 2. Ne a mea aogā e mafai o maua māfai e suke‵suke faka‵lei tatou ki fakaakoakoga i te Tusi Tapu e uiga ki fāfine kolā ne fakafiafia ne latou te loto o Ieova?

3, 4. (a) Kaia ne ‵teke atu ei a Sepola mo Pua ki te Tupu i te taimi ne fakatonu atu ei ke tamate so se tamaliki tagata Isalaelu telā e fanau mai? (e) Ne taui atu pefea ne Ieova a fāfine fakafanafanau ona ko te lā loto ‵toa mo te ma‵taku ki te Atua?

5. E fakaasi atu pefea ne fāfine Kelisiano e tokouke i aso nei a te uiga e pelā mo Sepola mo Pua, kae ka taui atu pefea ne Ieova a latou?

6, 7. (a) Ne a mea ne iloa ne Lahapa e uiga ki a Ieova mo ana tino, kae ne pokotia pefea a ia ona ko te iloaga tenā? (e) E fakaaloalo pefea ne te Muna a te Atua a Lahapa?

8. Ne fakamanuia atu pefea ne Ieova a Lahapa ona ko tena fakatuanaki mo tena fakalogo?

9. E fakamalosi atu pefea a faifaiga a Ieova ki a Lahapa mo nisi fāfine Kelisiano i aso o te kau apositolo ki nisi fāfine i aso nei?

10, 11. Ne a faifaiga ne aofia i ei a Napalu mo Tavita ne fakamalosi atu ei ki a Apikaila ke gasuesue o fai se faiga aogā?

12, 13. (a) Ne fakamaoni mai pefea ne Apikaila a tena poto mo tena fakamaoni ki a Ieova mo tena tino ne fakaeke? (e) Ne a mea ne fai ne Apikaila i te fokiatuga ki te fale, kae ne a mea ne iku atu ki a ia?

14. Ne a uiga o Apikaila e ma‵nako malosi tatou ke fakaakoako atu ki ei?

15. Ko vaegā fakanofonofoga fea e tāua ei ki Kelisiano fāfine ke fakaasi atu a uiga o Apikaila?

16. Faitalia a fakanofonofoga e maua ne ia i te fale, e fakaasi atu pefea ne se tuagane Kelisiano me e fakatāua ne ia te la va fealofani mo Ieova i lo so se isi mea aka?

17, 18. (a) Se a te tofotofoga faigata o te fakatuanaki ne fepaki mo se fafine Salefata telā ko mate tena avaga? (e) Ne tali atu pefea a te fafine ko mate tena avaga ki te fakamolemole a Elia, kae ne taui atu pefea ne Ieova tou fafine?

19. I auala fea e fakaasi atu ei ne fāfine Kelisiano i aso nei a uiga o te fafine Salefata telā ko mate tena avaga, kae e pefea a lagonaga o Ieova ki vaegā tino penā?

20. Ne a mea ka sautala ki ei i te suā mataupu?

[Ata i te itulau e 9]

E tavini atu a fāfine fakamaoni e tokouke ki te Atua faitalia te “fakatonuga a te tupu”

[Ata i te itulau e 10]

Kaia e fai ei a Lahapa e pelā me se fakaakoakoga ‵lei o te tino telā e malosi tena fakatuanaki?

[Ata i te itulau e 10]

Ne a uiga o Apikaila e fia fakaakoako koe ki ei?

[Ata i te itulau e 12]

E fakaasi atu ne fāfine Kelisiano e tokouke i aso nei a te uiga o te fafine Salefata telā ko mate tena avaga