Te Kāiga o Iesu​—Ko oi Latou?

I KOGA e uke i te lalolagi kātoa i te masina o Tesema, e masani o lavea atu i ei a ata o te pepe ko Iesu i lima atafai o tena mātua ko Malia mo tena tamana fai ko Iosefa. E fakafia‵fia sāle atu a vaegā ata faka-te-kāiga penā ki tino ke oko foki ki a latou kolā e se ne Kelisiano. Ona ko te mea e fakavae ‵tonu a ata konā ki a Iesu, ne a mea e fakaasi mai i te Tusi Tapu e uiga ki te kāiga o Iesu?

E fakaofoofogia eiloa te kāiga ne vau i ei a Iesu. Ne fanau a ia ne te taupou ko Malia, fai ei a ia mo fai se tino i te kaukāiga o tino katoa. E ‵tusa mo te fakaasiga i te Tusi Tapu, ne tuku atu tena ola i te lagi ki te moegatama o Malia e auala i te agaga tapu. (Luka 1:​30-35) A koi tuai o fakailoa atu a te vavega tenā, kae ko oti ne ‵sai feagaiga a Malia mo Iosefa, telā ka fai mo fai te tamana fai o Iesu.

Mai tua o te fanaumaiga o Iesu, ne toe fai foki a nisi tama‵liki a Iosefa mo Malia, ko āfa taina mo āfa tuagane o Iesu. E fakamaoni mai a te mea tenā i fesili a tino Nasaleta e uiga ki a Iesu: “E se ko ia tenā ko te tama a te kamuta? E se ko Malia tona mātua? E se ko ia tenā ko te taina o Iakopo, Iosefa, Simona, mo Iuta? A ona tuagane konei katoa eiloa e ‵nofo mo tatou i konei.” (Mataio 1:25; 13:​55, 56; Maleko 6:⁠3) Ona ko te mea tenā, e mafai o fakaiku aka ne tatou me i kāiga ‵tonu o Iesu e aofia i ei ko ana mātua ana taina e toko fa mo ana tuagane e tokolua.

Kae e se tali‵tonu a nisi tino i aso nei me i taina mo tuagane o Iesu ko tama foki a Iosefa mo Malia. Kaia? E fai mai te New Catholic Encyclopedia, me “Ne akoako mai ne te Lotu i aso mua i a Malia ne tumau eiloa e pelā me se taupou. Tela la, ona ko te mea tenei, e mautinoa eiloa me seai ne ana nisi tama‵liki.” E fai mai foki te tusi tenā me i pati ko te “taina” mo te “tuagane” e mafai o fakauiga ki se “isi tino io me ko nisi tino kolā e ‵lotu tasi, e masani ‵lei” io me ki nisi kāiga e pelā mo tuātina.

E mata, e tonu te mea tenā? E ‵teke atu eiloa a nisi faifeau Katolika ki te akoakoga mua tenā, kae e ‵lago atu ki te manatu me e isi eiloa ne taina mo tuagane faka-te-foitino o Iesu. Ne tusi mai a John P. Meier, ko te pelesitene mua o te Catholic Bible Association of America, penei: “I te Feagaiga Fou, kafai e fakaaogā a te pati Eleni telā e fakauiga ki te ‘taina’ ke fakamatala atu ei te auala e kāiga ei se tino mo te suā tino, e fakauiga fua i ei ki taina ‵tonu io me ki āfa taina kae sē ki se isi mea.”a E tonu, e fakaasi mai i te Tusi Tapu me e isi ne taina mo tuagane o Iesu kolā ko tama a Iosefa mo Malia.

E fakaasi mai foki i tusi Evagelia a nisi kāiga o Iesu, kae ka onoono nei tatou me ne a mea e mafai o tauloto ne tatou mai i a latou.

[Fakamatalaga mai lalo]