“Te Aliki, Akoako Mai Matou ke Iloa o ‵Talo”

“Fai mai ei se tokotasi mai ona soko ki a ia penei: ‘Te Aliki, akoako mai matou ke iloa o ‵talo.’”​—LUKA 11:1.

1. Kaia ne fakamolemole ei se soko o Iesu ke akoako atu latou ke iloa o ‵talo?

I TE taimi e tasi i te 32 T.A., ne kilokilo atu se soko o Iesu ki a Ia i te taimi ne ‵talo ei. Ne seki lagona ne ia a pati a Iesu ne fai ki tena Tamana, me kāti ne ‵talo lēmū atu a ia. Kae i te otiga o te ‵talo a Iesu, ne fai atu te soko ki a ia: “Te Aliki, akoako mai matou ke iloa o ‵talo.” (Luka 11:1) Kaia ne fai atu ei te fakamolemole tenei? Ne masani sāle o fai ne tino Iutaia a ‵talo mo tapuakiga i olotou olaga. E maua atu i te Tusi Tapu i te ‵gana Epelu a ‵talo e uke i te tusi ko Salamo mo nisi tusi aka. Tela la, ne seki fakamolemole atu a te soko tenā ke akoako a ia ki se mea telā e se iloa ne ia io me seki fai aka loa ne ia. E mautinoa eiloa me ne masani a ia mo ‵talo masani a takitaki lotu Iutaia. Kae i te taimi ne ‵talo ei a Iesu, e se taumate ne lavea ne ia te lasi o te ‵kese o ‵talo fia lavea a faiakaoga lutaia mo te auala ne ‵talo atu ei a Iesu.​—Mataio 6:​5-8.

2. (a) Se a te mea e fakaasi mai me ne seki manako Iesu ke fai ne tatou a te ‵talo fakaakoako pelā me se mea tauloto? (e) Kaia e fia iloa ei ne tatou o ‵talo?

² I se 18 masina mai mua atu i ei, i tena Lauga i te Mauga, ne tuku atu ne Iesu se ‵talo fakaakoako ki ana soko ke fakavae ki ei olotou ‵talo. (Mataio 6:​9-​13) Kāti ne seki nofo atu a te soko tenei i te taimi tenā, telā ne toe taku atu ei ne Iesu mo te alofa a manatu tāua i te ‵talo fakaakoako tenā. Se manatu tāua me ne seki toe fai atu ne ia a pati takitasi kolā ne fai i te ‵talo muamua, e fakaasi mai i ei me ne seki tuku mai ne ia te ‵talo tenā ke fai pelā me se mea tauloto. (Luka 11:​1-4) E pelā mo te soko telā e sē taku mai tena igoa, e ma‵nako foki tatou ke iloa o ‵talo ko te mea ke fakapili‵pili atu ei ki a Ieova. Telā la, ke na iloilo aka ne tatou a te ‵talo fakaakoako kātoa e ‵tusa mo te mau a te apositolo ko Mataio. E aofia i ei a fakamolemole e fitu, e tolu e uiga ki fuafuaga a te Atua, kae e fa e uiga ki ‵tou manakoga faka-te-foitino mo te faka-te-agaga. I te mataupu tenei, ka sau‵tala tatou ki fakamolemole muamua e tolu.

Se Atua Alofa

3, 4. Se a te uiga o te taku ne tatou a Ieova me ko “te motou Tamana”?

³ I te kamataga o te ‵talo, ne fakaasi mai ne Iesu me e ‵tau o fakaasi atu ne tatou i ei se fesokotakiga pili kae fakaaloalogina mo Ieova. Mai te faipati muamua atu mō te ‵lei o ana soko kolā ne ‵nofo fakatasi mo ia i luga i te mauga, ne fai atu Iesu ke fai‵pati atu ki a Ieova penei: “Te motou Tamana telā i te lagi.” (Mataio 6:9) E ‵tusa mo pati a se tino poto e tokotasi, faitalia me ne faipati a Iesu i te ‵gana Epelu lauiloa io me i te ‵gana Alamaika, a te pati ne fakaaogā ne ia ki te “Tamana” e ‵pau eiloa mo ‘pati a se tamaliki foliki’ telā e ‵pili ‵ki tena va mo tena tamana. A te fai atu i a Ieova ko “te motou Tamana” e fakaasi mai i ei se fesokotakiga telā e fakatuagagina.

⁴ A te fai atu penei “te motou Tamana,” e fakaasi atu foki i ei me i a tatou ne vaega o te kau kāiga lasi o tāgata mo fāfine kolā e ‵kilo atu ki a Ieova e pelā me ko te Mafuaga o te ola. (Isaia 64:8; Galuega 17:​24, 28) Ko oti ne fai a Kelisiano fakaekegina e pelā me ne “tamapuke a te Atua,” kae e mafai o ka‵laga atu latou “Tamana! toku Tamana!” (Loma 8:​14, 15) Ko lau i miliona a tino ko fai nei mo fai olotou taugasoa fakamaoni. Ko oti ne tuku atu ne tino konei olotou ola ki a Ieova e auala i te papatiso ki te vai. Ko mafai foki ne ‘nisi mamoe’ konei o olo atu ki a Ieova i te igoa o Iesu kae taku a Ia ko “te motou Tamana.” (Ioane 10:16; 14:6) E mafai o olo atu faeloa tatou ki te ‵tou Tamana i te lagi e auala i ‵talo, o fakafetai ki a ia mō tena aga‵lei ki a tatou, kae ke fakaasi atu foki a mea kolā e manavase tatou ki ei mo te loto talitonu me ka saga mai eiloa mo te atafai ki a tatou.​—Filipi 4:​6, 7; 1 Petelu 5:​6, 7.

Te Alofa ki te Igoa o Ieova

5. Se a te fakamolemole muamua i te ‵talo fakaakoako, kae kaia e tāua ei?

⁵ A te fakamolemole muamua e fakaasi tonu mai i ei a te mea telā e ‵tau o fakamuamua. E fai mai penei: “Ke tapu tou igoa.” (Mataio 6:9) E tonu, e ‵tau o fakamuamua ne tatou a te fakatapuga o te igoa o Ieova ona ko te ‵tou a‵lofa ki a ia mo te ‵tou takalia‵lia ki fakamaseiga katoa kolā ko oti ne fai ki tena igoa. A te ‵teke atu o Satani mo te fakakolekolega o te tauavaga muamua ke sē faka‵logo ki a Ieova te Atua ne fakamasei ei Tena igoa mai te tukuatuga o manatu fakalotolotolua e uiga ki te pulega a te Atua i te lagi mo te lalolagi. (Kenese 3:​1-6) E se gata i ei, talu mai te ‵tekeatuga tenā, ko oti ne fakamasiasigina a te igoa o Ieova e auala i faifaiga mo akoakoga ‵se a tino kolā e fai mai me sui ne latou a ia.

6. Ne a mea ka sē fai ne tatou māfai e ‵talo atu ke fakatapu te igoa o Ieova?

⁶ A ‵tou ‵talo ke fakatapu te igoa o Ieova e fakaasi atu ei te ‵tou tulaga i te kinauga e uiga ki te pulega i te lagi mo te lalolagi​—ko te ‵lago katoatoa atu ki te pulega a Ieova. E manako Ieova ke ‵nofo a tino mo agelu i te lagi mo te lalolagi kolā e fia‵fia tonu o faka‵logo ki tena pulega amiotonu ona ko te lotou a‵lofa ki a ia mo mea katoa kolā e aofia i tena igoa. (1 Nofoaiga Tupu 29:​10-​13; Salamo 8:1; 148:13) Ka fesoasoani mai a te ‵tou a‵lofa ki a Ieova ke sē fai ne tatou se mea telā ka fakamasiasi ei tena igoa tapu. (Esekielu 36:​20, 21; Loma 2:​21-​24) Ona ko te fakalagolago o te tokagamalie o te lagi mo te lalolagi mo tino i ei ki te fakatapuga o te igoa o Ieova mo te faka‵logo ki tena pulega, a ‵tou ‵talo kolā e fai atu “ke tapu tou igoa” se fakaasiga o ‵tou loto tali‵tonu me ka fakataunu eiloa a fuafuaga a Ieova mō ana vikiga.​—Esekielu 38:23.

Te Malo Telā e ‵Talo Tatou ki ei

7, 8. (a) Se a te Malo telā ne akoako mai ne Iesu ke ‵talo atu tatou ki ei? (e) Ne a mea e tauloto ne tatou e uiga ki te Malo tenei i tusi ko Tanielu mo Fakaasiga?

⁷ A te lua o fakamolemole i te ‵talo fakaakoako ko te: “Ke oko mai tou Malo.” (Mataio 6:10) E tai fetaui eiloa a te avā fakamolemole konei. A te mea faigaluega a Ieova ke fakatapu ei tena igoa ‵malu ko te Malo faka-Mesia, ko tena malo faka-te-lagi, telā ko tena Tama ko Iesu Keliso ko tena Tupu filifilia i ei. (Salamo 2:​1-9) E fakaasi mai i te valoaga a Tanielu me i te Malo faka-Mesia ko “te fatu” telā ne tō mai luga i se “mauga.” (Tanielu 2:​34, 35, 44, 45) E fakauiga loa a te mauga ki te pulega a Ieova i te lagi mo te lalolagi, tela la, a te fatu o te Malo se fakaasiga fou o te pulega a Ieova i te lagi mo te lalolagi kātoa. I te valoaga tenā, ne fai ei te fatu mo fai se ‘mauga lasi telā ne aofia i ei te lalolagi kātoa,’ e fakaasi mai ei me e sui ne te Malo faka-Mesia a te pulega kātoa a te Atua.

⁸ E ‵kau fakatasi mo Keliso i te Malo tenei ko te 144,000 o nisi tino, “mai te tokoukega o tino” ke pule fakatasi mo ia e pelā me ne tupu mo faitaulaga. (Fakaasiga 5:​9, 10; 14:​1-4; 20:6) Ne fakasino atu a Tanielu ki tino konei e pelā me “ko tino o te Atua Maluga” kolā ka maua fakatasi ne latou mo te lotou ulu ko Keliso a te “malosi mo te takutakua o malo katoa i te lalolagi . . . A te malosi faka-tupu o latou ka se toe gata mai, ka ko takitaki katoa i te lalolagi ka tavini kae faka‵logo ki a ia.” (Tanielu 7:​13, 14, 18, 27) Tenei eiloa te malo faka-te-lagi ne akoako ne Iesu ana soko ke ‵talo atu ki ei.

Kaia Koi ‵Tau ei o ‵Talo mō te Malo ke Oko Mai?

9. Kaia e ‵tau ei o ‵talo atu ke oko mai te Malo o te Atua?

⁹ I tena ‵talo fakaakoako, ne akoako mai a Keliso ke ‵talo tatou ke oko mai a te Malo o te Atua. E fakaasi mai i valoaga faka-te-Tusi Tapu kolā ko oti ne fakataunu me ne fakatu aka te Malo faka-Mesia i te lagi i te 1914.a E mata, koi ‵tau eiloa o ‵talo tatou ke “oko mai” a te Malo tenā? Ao. Me fai mai te valoaga a Tanielu i te Malo faka-Mesia telā e sui ne te fatu ka fakatau‵fai mo malo fakapolitiki o tāgata, kolā e fakaata mai i te matugā tupua lasi. Ka tō ifo a te fatu tenā ki te tupua, telā ka liu lefu i ei. E fai mai te valoaga a Tanielu: “Ka se toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.”​—Tanielu 2:44.

10. Kaia e fakamoe‵moe ei tatou ki te oko mai o te Malo o te Atua?

¹⁰ E fakamoe‵moe eiloa tatou ke lavea atu a te saga atu o te Malo o te Atua ki te fakanofonofoga masei a Satani me e fakauiga i ei ki te fakatapuga o te igoa ‵malu o Ieova mo te fakaseaiga o tino ‵teke katoa ki te pulega a te Atua. E ‵talo atu tatou mo te loto kātoa: “Ke oko mai tou Malo,” kae pelā mo te apositolo ko Ioane, e fai atu tatou: “Te Aliki Iesu, na vau!” (Fakaasiga 22:20) E tonu, ke na vau a Iesu o fakatapu a te igoa o Ieova mo te taku‵leiga o tena pulega, ko te mea ke taunu tonu a pati a te fai salamo: “Ko te mea ke iloa ne latou me ko koe fua te Aliki e tokotasi. Ko te pule tafasili i te lalolagi kātoa.”​—Salamo 83:18.

“Ke Fai te Mea e Loto Koe ki ei”

11, 12. (a) Se a te mea e fakamolemole atu tatou ki ei māfai e ‵talo tatou ke fai te loto o te Atua “i lalo nei, e pelā mo te faiga i te lagi”? (e) Ne a foki a mea e fakauiga ki ei a ‵tou ‵talo ke fai te loto o Ieova?

¹¹ Ne toe akoako ne Iesu ana soko ke ‵talo atu: “Ke fai te mea e loto koe ki ei i lalo nei, e pelā mo te faiga i te lagi.” (Mataio 6:10) Ne iai te lagi mo te lalolagi ona ko te loto o Ieova. E ka‵laga atu a tino ma‵losi ‵ki faka-te-lagi: “Te motou Aliki mo te motou Atua! E ‵tau eiloa o maua ne koe a te ‵malu, te vikiga, mo te ‵mana. Me ne faite ne koe a mea katoa, kae mai i tou loto foki, ne faite ei ne koe a mea ke tino mai kae ke ola foki.” (Fakaasiga 4:11) E isi eiloa ne fuafuaga a Ieova mō “mea i te lagi mo mea i te lalolagi.” (Efeso 1:​8-10) Mai te ‵talo atu ke fai te loto o te Atua, ko fakamolemole atu eiloa tatou ki a Ieova ke fakataunu ana fuafuaga. Telā la, e fakaasi atu ne tatou me ko oko eiloa i te fia lavea ne tatou te fakataunuga o te loto o te Atua i te lagi mo te lalolagi kātoa.

¹² Mai te ‵talo tenei e fakaasi atu foki i ei te ‵tou loto finafinau ke fakafetaui aka a ‵tou olaga mo te loto o Ieova. Ne fai mai Iesu: “A taku meakai, ko te fai ne au a te loto o ia telā ne uga mai ne ia au, kae o fakapalele foki a te galuega ne tuku mai ne ia ki a au ke fai.” (Ioane 4:34) E pelā mo Iesu, e fia‵fia tatou Kelisiano tukugina atu o fai te loto o te Atua. E fakamalosigina tatou ne te a‵lofa ki a Ieova mo tena Tama ke pulea ‵tou olaga “ne te loto o te Atua, kae sē ko manakoga faka te foitino.” (1 Petelu 4:​1, 2; 2 Kolinito 5:​14, 15) E taumafai malosi eiloa tatou ke ‵kalo keatea mai te faiga o mea kolā e iloa ne tatou me sē fetaui mo te loto o Ieova. (1 Tesalonia 4:​3-5) Mai te fakaaogā tonu o ‵tou taimi ke faitau ki te Tusi Tapu mo te faiga o sukesukega totino, e taumafai eiloa tatou o “salasala ake, me se a te mea e loto ki ei te Aliki,” telā e aofia i ei te ‵kau atu faeloa ki te talaiatuga o te “Tala ‵Lei tenei e uiga ki te Malo.”​—Efeso 5:​15-​17; Mataio 24:14.

Te Loto o Ieova i te Lagi

13. Ne fakataunu pefea te loto o te Atua kae seki tāitāi o ‵teke atu a Satani?

¹³ Ko leva ne fai te loto o Ieova i te lagi kae seki tāitāi o ‵teke atu tena tamaliki faka-te-agaga e tokotasi, kae fai ei mo fai a Satani. E fakaasi mai i te tusi ko Faataoto a te ulumatua a te Atua e pelā me ko te faiga o te poto ke liu tino. E fakaasi mai i ei, me i te fia kiliona o tausaga ko teka, a te Fuatasi a te Atua ne ‘fiafia faeloa i ona mua i taimi katoa,’ o fai te loto o tena Tamana. Fakamuli ifo, ne fai a ia mo fai te “tagata poto i te fakatutu” a Ieova i te faitega o mea katoa “i te lagi mo mea i te lalolagi, ko mea e matea mo mea sē matea.” (Faataoto 8:​22-​31; Kolose 1:​15-​17) Ne fakaaogā ne Ieova a Iesu e pelā me ko tena Muna io me ko te Tukumuna.​—Ioane 1:​1-3.

14. Ne a mea e tauloto ne tatou i te Salamo 103 e uiga ki te auala ne fakataunu ei ne agelu a te loto o Ieova i te lagi?

¹⁴ E fakaasi mai ne te faisalamo me e sili atu a te pulega a Ieova ki luga i ana mea katoa kae e faka‵logo a te kau agelu ki ana akoakoga mo fakatonuga. E fai‵tau tatou penei: “E fakatu ne te Aliki a tena nofogaaliki i te lagi; a ia ko te tupu o mea katoa. Tavae atu ki te Aliki, koutou agelu ma‵losi mo te ‵mana, kolā e faka‵logo ki ana fakatonuga mo ana muna. Tavae atu ki te Aliki, koutou mea ma‵losi katoa i te lagi, mo koutou foki tavini kolā e fai tena loto! Tavae atu ki te Aliki, ana mea ola katoa i so se koga e pule ei a ia. Toku agaga, tavae atu ki te Aliki!”​—Salamo 103:​19-​22.

15. Ne pokotia pefea a te faiga o te loto o te Atua i te lagi i te mauaga ne Iesu a te pulega e pelā me ko te tupu o te Malo?

¹⁵ Mai tua o tena tekeatuga, ne mafai eiloa o nofo a Satani i te lagi, e pelā mo te mea e fakaasi mai i te tusi ko Iopu. (Iopu 1:​6-​12; 2:​1-7) Kae ne ‵valo mai i te tusi ko Fakaasiga me ka oko mai te taimi ka ‵pei keatea ei a Satani mo ana temoni mai te lagi. E maina ‵lei me ne oko mai te taimi tenā mai tua malie o te fakasopoga o Iesu Keliso mo fai te tupu o te Malo i te 1914. Talu mai te taimi tenā, ne seki toe ai eiloa se koga mō tino ‵teke konā i te lagi. Ko ‵nofo pili fua nei latou ki te lalolagi. (Fakaasiga 12:​7-​12) Ko sē toe taku fakamaseigina a te pulega a Ieova i te lagi, kae e lagona atu fua i ei a vikiga o “te Tamā Mamoe,” ko Keliso Iesu i te ‵viki atu mo te faka‵logo ki a Ieova. (Fakaasiga 4:​9-​11) Ko fakataunu eiloa a te loto o Ieova i te lagi.

Te Loto o Ieova mō te Lalolagi

16. E faka‵se pefea ne te ‵talo fakaakoako a akoakoga a Kelisiano ‵se e uiga ki te fakamoemoega mō tino katoa?

¹⁶ E sē amanaia a Lotu Kelisiano ‵Se ki te fuafuaga a te Atua mō te lalolagi, me e fai mai latou i tino ‵lei katoa e olo ki te lagi. Kae ne akoako mai a Iesu ke ‵talo atu tatou: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:10) Kae e mata, e tonu me ko fai tonu nei a te loto o Ieova i te lalolagi telā e ‵fonu i fakasauāga, faifaiga sē fakamaoni, masaki mo te mate? Ikai loa! Tela la, e ‵tau mo tatou o ‵talo mo te loto kātoa ke na fai te loto o te Atua i te lalolagi, e ‵tusa mo te folafolaga a te apositolo ko Petelu: “Ka ko te Atua, ko oti ne folafola mai ne ia te lagi fou [te Malo faka-Mesia telā e pule ne Keliso] mo te lalolagi fou [se pulega amiotonu o tino], e nofo i ei a te amiotonu, kae tenei eiloa e fakatalitali tatou ki ei.”​—2 Petelu 3:13.

17. Se a te fuafuaga a Ieova mō te lalolagi?

¹⁷ E isi eiloa se fuafuaga a te Atua mō te lalolagi. Ne fakamalosi ne ia te pelofeta ko Isaia ke tusi mai: “Ko te Aliki ne faite ne ia a lagi - ko ia ko te Atua e tokotasi! Ne faite ne ia a te lalolagi, kae fakamautakitaki ne ia ke tumau ki te se gata mai. Ne seki faite ne ia ke fai mo koga sē aogā, kae ke fai mo koga e ‵nofo ei a tino. Ko ia ne fai ake penei, ‘Ko au ko te Aliki, e seai ake foki se atua i oku tafa.’” (Isaia 45:18) Ne tuku atu ne te Atua te tauavaga muamua ki se fatoaga e pelā me se palataiso, kae fakatonu atu ki a laua: “Fakatokouke otou tama‵liki ko te mea ko otou fanau ke ‵nofo i te lalolagi kae pule i ei.” (Kenese 1:​27, 28; 2:​15) E manino ‵lei me i te fuafuaga a te Māfuaga ko te lalolagi ke nofoaki ne tino ‵lei katoatoa kolā e fia‵fia o faka‵logo ki te pulega a Ieova kae ke ola ki te se-gata-mai i te Palataiso telā ne folafola mai ne Keliso.​—Salamo 37:​11, 29; Luka 23:43.

18, 19. (a) Se a te mea e ‵tau o fai muamua a koi tuai o fakataunu te loto o te Atua i te lalolagi? (e) Ne a nisi vaega o te ‵talo fakaakoako a Iesu ka sautala ki ei i te suā mataupu?

¹⁸ E se mafai eiloa o fakataunu katoatoa a te fuafuaga a Ieova mō te lalolagi i te taimi koi ‵fonu ei te lalolagi i tagata mo fafine kolā e ‵teke ki tena pulega. I te fakaaogāga o agelu ma‵losi mai lalo i te takitakiga a Keliso, ka fakaseai ei ne te Atua a “latou kolā e fakamasei ne latou te lalolagi!” Ka fakaseai atu ki te se-gata-mai a te fakanofonofoga masei a Satani, ko ana lotu ‵se, mea fakapolitiki sōnafai, faifaiga fakapisinisi kaima‵nako kae kai‵soa, mo kautau ofa mea. (Fakaasiga 11:18; 18:21; 19:​1, 2, 11-​18) Ka taku‵leigina i ei te pulega a Ieova mo te fakatapuga o tena igoa. E ‵talo atu tatou mō mea katoa konei i te fai atu: “Te motou Tamana telā i te lagi: ke tapu tou igoa, ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.”​—Mataio 6:​9, 10.

¹⁹ I tena ‵talo fakaakoako, ne fakaasi mai ne Iesu me e mafai foki o ‵talo atu tatou mō ‵tou manakoga totino. Ka sautala tatou ki vaega konei o ana akoakoga e uiga ki te ‵talo i te suā mataupu.

[Fakamatalaga mai lalo]

Ke Toe Onoono ki ei

• Kaia e ‵tau ei o taku ne tatou a Ieova me ko “‵tou Tamana”?

• Kaia e tāua ‵ki ei ke ‵talo tatou ke fakatapu te igoa o Ieova?

• Kaia e ‵talo ei tatou ke na oko mai te Malo o te Atua?

• Se a te mea e fakauiga ki ei māfai e ‵talo tatou ke fai te loto o te Atua i lalo nei e pelā foki mo te lagi?

[Ata i te itulau e 15]

Ne ‵kese mao eiloa a ‵talo a Iesu mo ‵talo fia lavea a te kau Falesaio

[Ata i te itulau e 16]

E ‵talo atu a Kelisiano ke oko mai te Malo o te Atua, ke tapu tena igoa, kae ke fai tena loto