Te Uiga o te ‵Talo a te Aliki mō Koe

A TE ‵talo a te Aliki telā ne akoako mai ne Iesu Keliso i tena Lauga i te Mauga, e maua i te Tusi Tapu i te Mataio mataupu e 6, fuaiupu e 9 ki te 13. Mai mua malie faeloa o tuku atu ne ia te ‵talo tenei, ne fai atu Iesu: “Kafai e ‵talo koutou, sa fakaukeuke io me fakafoki‵foki otou pati, ke pelā mo te amioga a tino o fenua fakaatea, me fai mai te lotou manatu me ko te uke o muna, ko te talia tenā o te ‵talo.”​—Mataio 6:7.

E mautinoa eiloa me ne seki manako a Iesu ke fakafoki‵foki faeloa a pati katoa i te ‵Talo tenā. E tonu, ne toe fai atu ne ia te ‵talo tenei ki nisi tino fakamuli ifo. (Luka 11:​2-4) Kae ne ‵kese malie a pati ne fai ne ia mō te ‵talo tenā i Evagelia a Mataio mo Luka. E se gata i ei, ne seki ‵pau ‵gisi eiloa a pati ne fakaaogā ne Iesu mo ana soko i olotou ‵talo kolā ne fai fakamuli mo te ‵talo fakaakoako tenā.

Kaia la ne tusi ei te ‵Talo a te Aliki i te Tusi Tapu? E auala i te ‵talo fakaakoako tenei, e akoako mai ne Iesu a te auala e talia ei ne te Atua a ‵tou ‵talo. I te ‵talo foki loa tenei, e maua ne tatou i ei a tali ki nisi fesili fakavae o te olaga. Ke na onoono nei tatou ki vaega takitasi o te ‵Talo a te Aliki tenei.

Ko oi te Igoa o te Atua?

“Te motou Tamana telā i te lagi: Ke tapu tou igoa.” (Mataio 6:9) E fesoasoani mai a pati kamata o te ‵talo fakaakoako tenei ke fakapili‵pili atu tatou ki te Atua mai te fai‵pati atu ki a ia e pelā me ko “te motou Tamana.” E pelā me se tamaliki telā e solopu faeloa ki ana mātua a‵lofa kae loto malamalama, e mafai foki o fai‵pati atu tatou ki te ‵tou Tamana i te lagi mo te loto tali‵tonu me ka fia fakalogologo mai a ia ki a tatou. Ne usu mai a te Tupu ko Tavita, “Me tali mai eiloa koe ki talosaga. E olo atu ki a koe a tino katoa.”​—Salamo 65:2.

Ne fakatonu mai a Iesu ke ‵talo atu tatou ke faka‵malu io me ke tapu a te igoa o te Atua. Kae ko oi la te igoa o te Atua? E tali mai te Tusi Tapu i pati konei: “Ko te mea ke iloa ne latou i a koe ko Ieova, ko te pule tafasili i te lalolagi kātoa.” (Salamo 83:​18, Tusi Paia, Samoa) Kai lavea aka eiloa ne koe te igoa ko Ieova?

A te tonuga loa, e sili atu i te 7,000 taimi e sae mai ei a te igoa ko Ieova i kopi mua o te Tusi Tapu. Kae ko oti ne fakaaogā ‵se ne nisi tino ‵fuli tusi te saolotoga ke tapale keatea ne latou a te igoa tenā mai olotou Tusi Tapu. Tela la, se mea ‵tau ke ‵talo atu tatou mō te igoa o te ‵tou Mafuaga ke faka‵malu aka io me ke tapu. (Esekielu 36:23) A te auala e tasi ke fakalogo ki te ‵talo tenā ko te fakaaogāga o te igoa ko Ieova māfai e ‵talo atu tatou ki te Atua.

Ne tupu aka se fafine e igoa ki a Patricia i te lotu Katolika kae ne iloa ‵lei ne ia a te ‵Talo a te Aliki. Ne a ana mea ne fai i te fakaasiatuga ne se Molimau a Ieova a te igoa o te Atua i te Tusi Tapu ki a ia? “Au ne seki talitonu ki ei!” ko ana pati. “Kae ne puke mai ne au taku Tusi Tapu eiloa, kae ne lavea atu foki ne au a te igoa tenā i ei. Ne fakaasi mai ei ne te Molimau tenā a te Mataio 6:​9, 10 kae fakamatala mai me e fetaui ‵lei a te igoa o Ieova mo te ‵Talo a te Aliki. Ne fiafia malosi eiloa au kae fakamolemole atu ke fai ne ia taku akoga faka-te-Tusi Tapu.”

Ke Fai te Loto o te Atua i te Lalolagi

“Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:10) E fakataunu pefea a te vaega tenei o te ‵talo fakaakoako a Iesu? E mafau‵fau a tino e tokouke me i te lagi ko te koga telā e maua i ei te filemu mo te tokagamalie. E faipati a te Tusi Tapu ki te lagi e pelā me ko te koga maluga e nofo ei a Ieova telā e ‘katoatoa tena ‵malu mo tena gali.’ (Isaia 63:15) E se tioa eiloa o ‵talo atu tatou ke fai te loto o te Atua i te lalolagi “e pelā mo te faiga i te lagi”! Kae e mata, ka fakataunu eiloa te mea tenei?

Ne ‵valo mai a te pelofeta a Ieova ko Tanielu: “Ka fakatu ne te Atua o te lagi a te malo telā ka sē toe gata mai. Ka sē toe mafai o takavale a te malo tenā. Ka fakatakavale ne ia a malo katoa konā, kae ka tumau ki te se gata mai.” (Tanielu 2:44) Ko pili fua nei o gasuesue a te Malo faka-te-lagi tenei o fakaoko mai a te filemu ki te lalolagi kātoa mai lalo i se pulega amiotonu.​—2 Petelu 3:13.

A te ‵talo atu mō te Malo o te Atua ke na oko mai kae ke fai tena loto i te lalolagi se fakaasiga tenā o te fakatuanaki telā e se mafai o iku atu ki te fanoanoa. Ne tusi mai a te apositolo Kelisiano ko Ioane: “Ne lagona ne au a te leo lasi e faipati mai penei mai te nofogaaliki: ‘Ko ‵nofo nei mo tino te fale o te Atua! Ka ‵nofo fakatasi a ia mo latou, kae ka fai latou mo ona tino. A te Atua ka fakatasi eiloa mo latou kae ka fai a ia mo olotou Atua. Ka sē toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.’ ” Kae ne toe fai mai a Ioane: “Ne fai mai te tino telā e nofo i te nofogaaliki, . . . ‘Tusi a mea konei, i muna konei e ‵tonu kae aogā.’ ”​—Fakaasiga 21:​3-5.

Te ‵Talo mō ‵Tou Manakoga Faka-te-Foitino

Ne fakaasi mai ne Iesu i ana pati ne fai i tena ‵talo fakaakoako me e ‵tau o fetaui a mea kolā e ‵talo atu tatou ki ei mo te igoa o te Atua mo te faiga o tena loto. Kae e faka‵soko atu eiloa a te ‵talo tenā ki manakoga totino kolā e fakaasi atu i se auala ‵tau ki a Ieova.

Te mea muamua ko te: “Tuku mai omotou meakai e ‵tau mo te aso nei.” (Mataio 6:11) A te mea tenei e se se fakamolemole ko te mea ke maumea koe. Ne fakamalosi mai a Iesu ke ‵talo atu tatou ke maua a “meakai e ‵tau mo te aso.” (Luka 11:3) E ‵tusa mo te ‵talo a te Aliki e ‵tau o ‵talo tatou mo te loto talitonu me ka tuku mai ne te Atua a mea e manakogina i aso takitasi māfai e a‵lofa kae faka‵logo tatou ki a ia.

A te sōna manavase ki fakalavelave i mea tau tupe e mafai o fai ne ia ke fakata‵mala tatou e uiga ki ‵tou manakoga faka-te-agaga kae ke se fai ne tatou a fakatonuga a te Atua. Kae kafai e fakamuamua ne tatou te tapuakiga ki te Atua i ‵tou olaga, e mautinoa eiloa me ka talia a ‵tou fakatagi ke maua a mea faka-te-foitino e pelā mo meakai mo gatu. Ne fai mai Iesu: “Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.” (Mataio 6:​26-33) E se se mea faigofie ke ‵sala atu ki te amiotonu o te Atua, ona ko ‵tou tulaga agasala kae ma‵nako tatou ki se fakamagaloga. (Loma 5:12) E aofia foki a te mea tenā i te ‵Talo a te Aliki.

‵Tou ‵Talo mo te Fakamagaloga o Agasala

“Fakamagalo mai omotou agasala e pelā mo matou e fakamagalo atu ki tino kolā e agasala mai ki a matou.” (Mataio 6:​12; Luka 11:4) E mata, ka fakamagalo eiloa ne Ieova te Atua a ‵tou agasala?

E ui eiloa ne fai ne te Tupu ko Tavita i Isalaelu mua a agasala matagā, ne salamo tonu a ia kae ‵talo atu mo te loto talitonu: “A koe e ‵lei kae loto fakamagalo ki a matou, kae ‵fonu foki koe i te alofa tumau ki tino katoa kolā e ‵talo atu ki a koe.” (Salamo 86:5) Ma‵faga o fakamafanafanaga gali! E toka faeloa a te ‵tou Tamana i te lagi o “fakamagalo” a agasala a tino kolā e ka‵laga atu ki a ia mo te loto salamo tonu. E pelā eiloa me se kaitalafu telā ko oti ne ‵tina katoatoa, e fakamagalo katoatoa foki penā ne Ieova te Atua a ‵tou agasala.

Kae e isi se fakanofoga ne fai mai ne Iesu: Ke maua ne koe te fakamagaloga a te Atua, e ‵tau o fakamagalo ne koe a nisi tino. (Mataio 6:​14, 15) E ui eiloa ne sōnafai atu a taugasoa e tokotolu o Iopu ki a ia, ne fakamagalo ne ia latou kae ‵talo atu foki mō latou. (Iopu 42:10) Kafai e fakamagalo ne tatou a tino kolā e agasala mai ki a tatou, ka fakafiafia ne tatou a te Atua kae ka maua ne tatou a mea aogā mai tena alofa fakamagalo.

E ‵tau o fakamalosi mai a te loto fiafia o te Atua o fakalogologo ki ‵tou fakatagi ke ‵sala atu ki tena taliaga. Kae e mafai eiloa o fai tatou penā faitalia te ‵tou tulaga sē ‵lei katoatoa. (Mataio 26:41) E mafai foki ne Ieova o fesoasoani mai ki a tatou e pelā eiloa mo te fakamolemole tāua telā ne fakaasi mai ne Iesu i te fakaotiga o te ‵talo fakaakoako.

Te ‵Talo ke Sasale i te Auala Amiotonu

“Kae sa takitakigina matou ki se tofotofoga, kae faka‵sao mai matou mai te masei.” (Mataio 6:13) E se tuku tiaki tatou ne Ieova ki tofotofoga io me e fai ne ia ke ‵to atu tatou ki te agasala. E fai mai tena Muna: “I te Atua e se mafai o fakaosoosogina ne te masei, kae sē fakaosooso foki ne ia tino ki te masei.” (Iakopo 1:13) E talia ne te Atua ke fakaosoosogina tatou, kae e mafai o faka‵sao ne ia tatou mai te toe Tino Fakaosooso Sili​—ko “te tino masei” telā ko Satani te Tiapolo.

Ne fakamalosi atu te apositolo ko Petelu ki ana taina Kelisiano: “Ke toka kae matapula‵pula foki koutou! Me i te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia.” (1 Petelu 5:8) A te tonuga loa, ne taumafai a Satani o fakaosooso a te tino ‵lei katoatoa ko Iesu Keliso! Se a te fakamoemoega o te Tiapolo? Ke ‵taki keatea ne ia a Iesu mai te tapuakiga tonu ki a Ieova te Atua. (Mataio 4:​1-11) Kafai e taumafai malosi koe o tavini atu ki te Atua, e taumafai foki a Satani ke folo ne ia koe!

E auala i te lalolagi telā ko nofo mai lalo i tena pulega, e mafai o fakaosooso tatou ne te Tiapolo ke aofia i amioga kolā e se fiafia ki ei te Atua. (1 Ioane 5:19) Tela la, se mea tāua ke ‵sala atu faeloa ki te fesoasoani o te Atua, maise eiloa māfai ko fe‵paki tatou mo tofotofoga kolā e fui gata. Kae kafai e tapuaki atu tatou ki a Ieova e tusa mo tena Muna, ko te Tusi Tapu, ka faka‵sao ne ia tatou kae fesoasoani mai foki ke ‵teke atu ki te Tiapolo. E fai mai te Tusi Tapu me “i te Atua e tausi tena folafolaga, kae se mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga.”​—1 Kolinito 10:13.

E Tāua ‵ki te Fakatuanaki ki te Atua

Ma‵faga o fakamafanafanaga gali ke iloa atu me e saga tonu mai a ‵tou Tamana faka-te-lagi ki a tatou taki tokotasi! Ne fakaaogā foki ne ia tena Tama ko Iesu Keliso ke akoako mai ki a tatou ke iloa o ‵talo. E tonu, e fai ne te mea tenei ke fia fakafiafia atu tatou ki a Ieova te Atua. E mafai pefea o fai tatou penā?

E fai mai te Tusi Tapu: “E seai se tino e mafai ne ia o fakafiafia te Atua e aunoa mo te fakatuanaki. So se tino e vau ki te Atua e ‵tau mo ia o fakatuanaki me iai te Atua, kae tuku atu foki ne ia te taui ‵lei ki tino kolā e salasala ki a ia.” (Epelu 11:6) E mafai pefea o maua te vaegā fakatuanaki penā? “A te fakatuanaki e maua mai i te lagona io me ko mea kolā e lagona,” ko pati i te Tusi Tapu. (Loma 10:17) E fia‵fia a Molimau a Ieova o fai‵pati e uiga ki te Tusi Tapu ki so se tino telā e loto fiafia o tavini atu ki te Atua i te fakatuanaki tonu.

E fakamoe‵moe pelā me i te sautalaga tenei e uiga ki te ‵Talo a te Aliki e faka‵loto aka ei tou loto fakafetai ki te uiga o te ‵talo tenā. Mai te mauaga o te iloaga ‵loto e uiga ki a Ieova mo tena taui mō “tino kolā e salasala ki a ia,” ka fakamalosi aka i ei tou fakatuanaki ki te Atua. Ke na tauloto malosi nei koe e uiga ki a ia mo ana fuafuaga ko te mea ke maua ne koe se va fealofani pili mo tou Tamana i te lagi ke oko atu eiloa ki te se-gata-mai.​—Ioane 17:3.

[Ko manatu tāua i te itulau e 5]

“Te motou Tamana telā i te lagi: ke tapu tou igoa, ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi. Tuku mai omotou meakai e ‵tau mo te aso nei; fakamagalo mai omotou agasala e pelā mo matou e fakamagalo atu ki tino kolā e agasala mai ki a matou; kae sa takitakigina matou ki se tofotofoga, kae faka‵sao mai matou mai te masei.”​—Mataio 6:​9-13

[Ata i te itulau e 7]

E fakamalie ne Ieova a manakoga o tino kolā e a‵lofa ki a ia

[Ata i te itulau e 7]

E fesoasoani mai foki a te Atua ke ‵teke atu te Tiapolo

[Ata i te itulau e 7]

E pelā mo Iopu, kafai e fakamagalo ne tatou a tino kolā e agasala mai ki a tatou, ka aogā eiloa ki a tatou te alofa fakamagalo o te Atua