Ko ‵Pāsi ‘te Tavini Fakamaoni’!

“Ko oko nei ki te taimi e kamata ei te Fakamasinoga.”​—1 PETELU 4:17.

1. Se a te mea ne maua ne Iesu i te taimi ne fakamasino ei ne ia te “tavini”?

ITE Penitekoso i te 33 T.A., ne fili aka ne Iesu se “tavini” ke tuku atu ne ia a meakai i te taimi tonu ki ana “isi tavini.” I te 1914, ne faū ei a Iesu mo fai te Tupu, kae ko te taimi foki tenā ke fakamasino aka ei te “tavini” tenā. Ne maua aka ne ia me ne tumau eiloa a te tokoukega o te “tavini” tenā i te “fakamaoni kae poto.” Tela la, ne fili ei ne ia a te tavini tenā “ke pule i ana mea katoa.” (Mataio 24:​45-47) Kae, ne isi foki se tavini masei, telā e se fakamaoni kae sē poto foki.

“Se Tavini sē Fakamaoni”

2, 3. Ne vau i fea te “tavini sē fakamaoni” tenei kae ne fai pefea a ia ke penā?

² Ne faipati a Iesu e uiga ki te tavini sē fakamaoni mai tua eiloa o te faipatiatuga e uiga ki “te tavini fakamaoni kae poto.” Ne fai atu a ia: “Kae kafai a ia se tavini sē fakamaoni, e fai ake ana pati penei, ‘E se taitai nei o oko mai a toku pule.’ Tela, kamata ei a ia o ‵kini a nisi tavini, kae ‵kai kae inu fakatasi mo tino kolā e inu eiloa ke ko‵na. A te pule o te tavini tenā, e vau eiloa i te aso ne seki fakamoemoe a ia ki ei, mo te itula foki telā e se iloa ne ia; e ‵kati likiliki a ia ne tona pule, kae fakasala fakatasi mo tino faitogafiti, i te koga telā e iai te fakatautagiga mo te gaī o nifo.” (Mataio 24:​48-51) A te tugāpati “se tavini sē fakamaoni” e fai ei ke ‵saga tonu atu tatou ki pati a Iesu ne fai muamua mai e uiga ki te tavini fakamaoni kae poto. E tonu, ne fai muamua a te “tavini sē fakamaoni” pelā me se vaega o te tavini fakamaoni.a E pefea la?

³ Mai mua o te 1914, ne fakamoe‵moe malosi a tino e tokouke o te tavini fakamaoni me ka fetaui latou mo te lotou Avaga fakatusa i te lagi i te tausaga eiloa tenā, kae ne seki taunu te lotou fakamoemoega. Ona ko te mea tenei mo nisi mea aka, ne loto vāivāi a tino e tokouke kae ne kaitāua malosi a nāi tino i ei. Ne ‵saga atu a nisi o latou konei o ‘‵kini’ olotou taina e auala i olotou pati kae inu fakatasi foki mo “tino kolā e inu eiloa ke ko‵na,” ko potukau o Lotu Kelisiano ‵se.​—Isaia 28:​1-3; 32:6.

4. Ne saga atu pefea a Iesu ki te “tavini sē fakamaoni” mo tino katoa kolā ne fakaasi atu ne latou a uiga penā?

⁴ Ne fai a tino kolā ne fai muamua mo fai ne Kelisiano e pelā me ko te “tavini sē fakamaoni,” kae ne fakasala fakamasei ne Iesu a latou. E pefea la? Ne seki talia ne ia a latou, kae ne galo atu ei te lotou fakamoemoega ki te lagi. Kae ne seki fakaseai fakavave atu latou i te taimi tenā. Ne ‵tau o fa‵ki muamua latou i te fakatau‵tagi mo te gaī o nifo “i te pouliga” i tua o te fakapotopotoga Kelisiano. (Mataio 8:12) Talu mai aso konā, ne toe fakaasi atu foki ne nāi tino fakaekegina a uiga ma‵sei penā, kae ‵kau atu ei ki te “tavini sē fakamaoni” tenā. Ne tau‵tali atu foki a nisi tino o ‘nisi mamoe’ ki te lotou sē fakamaoni. (Ioane 10:16) Ne iku atu katoa a fili penā o Keliso ki te koga faka-te-agaga ‘pouli i tua’ tenā.

5. Ne saga atu pefea te tavini fakamaoni kae poto kae ne ‵kese pefea mo te “tavini sē fakamaoni”?

⁵ E se gata i ei, ne ‵pau eiloa te fakamasinoga o te tavini fakamaoni kae poto mo te “tavini sē fakamaoni.” I lō te kaitāua, ne fakatonutonu aka ne latou olotou olaga. (2 Kolinito 13:11) Ne fakamalosi aka ei te lotou a‵lofa ki a Ieova mo olotou taina. Ona ko te mea tenā, ne fai ei latou mo fai ne “pou mo te lagolago o te munatonu” i “aso fakaoti” kae fakama‵taku konei.​—1  Timoteo 3:​15; 2 Timoteo 3:1.

Tamafine ‵Poto mo Tamafine Va‵lea

6. (a) Ne fakamatala mai pefea ne Iesu a te poto o tena tavini fakamaoni? (e) Se a te fekau ne folafola atu ne Kelisiano fakaekegina?

⁶ Mai tua o tena faipatiatuga e uiga ki te “tavini sē fakamaoni,” ne tuku mai ei ne Iesu a tala fakatusa e lua ke fakaasi mai me ka isi ne Kelisiano fakaekegina fakamaoni kae ‵poto a ko nisi ka sē fai penā.b E uiga ki te poto, ana muna: “E fakatusa a te Malo o te lagi ki tamafine e tinoagafulu kolā ne olo atu mo olotou moli, o fakafetaui ki te tamatane fatoa fakaipoipo. E va‵lea te suā tokolima, kae ‵poto te suā tokolima. A tamafine va‵lea ne olo fua mo moli, kae e seai ne olotou kalasini fakaleoleo ne ave. Ka ko tamafine ‵poto ne olo mo olotou moli, kae ne ave foki olotou kalasini fakaleoleo.” (Mataio 25:​1-4) E fakamasaua mai ki a tatou a te toko sefulu tamafine konei, a Kelisiano fakaekegina katoa mai mua o te 1914. Ne tali‵tonu latou me i te tagata fatoa fakaipoipo, ko Iesu Keliso, ko pili fua o sae mai. Tela la, ne “olo atu” latou o fakafetaui ki a ia, mai te talai atu mo te loto ‵toa me ka oti atu a “te taimi e fakataunu ei aso o fenua fakaatea” i te 1914.​—Luka 21:24.

7. Anafea kae kaia ne ‘‵moe atu ei’ a Kelisiano fakaekegina i se auala fakatusa?

⁷ Ne seki ‵se eiloa a latou i ei. Ne oti atu eiloa a taimi o fenua fakaatea i te 1914, kae ne kamata ei o pule mai a te Malo o te Atua mai lalo i a Iesu Keliso. Kae ne tupu te mea tenā i se auala sē matea i te lagi. Ne kamata o logo‵mae a tino i te lalolagi ona ko mea kolā ko leva ne ‵valo mai. (Fakaasiga 12:​10, 12) Ne oko mai i ei a te taimi o te fakamasinoga. Ona ko te sē malamalama ‵lei i ei, ne leake a Kelisiano fakaekegina me ko “tuai mai te tagata fatoa fakaipoipo.” Ona ko te ‵numi mo te ‵teke atu o te lalolagi, ne gasolo ifo ei te lotou galuega kae toeitiiti ko fakagata te lotou galuega talai. E pelā mo taupou i te tala fakatusa ne ‘matuletule ei latou, ‵moe atu eiloa’ i te feitu faka-te-agaga, e pelā eiloa mo mea ne ‵tupu ki Kelisiano sē fakamaoni i te ‵mateatuga o apositolo a Iesu.​—Mataio 25:5; Fakaasiga 11:​7, 8; 12:17.

8. Se a te mea ne iku atu ki te kalaga: “Ko oko mai te tagata fatoa fakaipoipo!” kae ne a mea ne ‵tau o fai ne Kelisiano fakaekegina i te taimi tenā?

⁸ Kae ne tupu se mea seki fakamoemoegina i te 1919. E faitau tatou, penei: “Ko oko ki te valuapo, ne pa mai te kalaga, ‘Ko oko mai te tagata fatoa fakaipoipo! O‵mai o fakafetaui ki ei!’ Ne ala ake te tinoagafulu tamafine konei, kae fakatoka olotou moli o fa‵ka.” (Mataio 25:​6, 7) I te ‵toe taimi faigatā eiloa, kae pa mai te kalaga ke fakatoka! I te 1918, ne fanatu a Iesu, ko “taku ave fekau” ki te faletapu faka-te-agaga a Ieova ke iloilo kae ke faka‵ma ne ia te fakapotopotoga a te Atua. (Malaki 3:1) Tenā te taimi ko ‵tau ei mo Kelisiano fakaekegina o fakafetaui atu ki ei i te titi o te faletapu tenā i te lalolagi nei. Tenā eiloa te lotou taimi ke ‘maina atu pelā mo te la.’​—Isaia 60:1; Filipi 2:​14, 15.

9, 10. I te 1919, kaia ne “‵poto” ei a nisi Kelisiano kae “va‵lea” a nisi o latou?

⁹ Kae malie mua! I te tala fakatusa, ne isi se fakalavelave ne tupu ki nisi tamafine. Ne toe fai mai a Iesu: “Ne akai atu a tamafine va‵lea ki tamafine ‵poto, ‘Fakamolemole, aumai mua ne otou kalasini mo utu omotou moli ka ‵masa.’ ” (Mataio 25:8) Kafai e seai ne kalasini ka sē ‵ka a moli. Telā la, e fakamasaua mai i kalasini o moli konā a te munatonu i te Muna a te Atua mo tena agaga tapu, kolā e fakamalosi atu ki tino tapuaki ‵tonu ke fai pelā me ne moli. (Salamo 119:130; Tanielu 5:​14) Mai mua o te 1919, ne ‵sala malosi atu a Kelisiano fakaekegina ‵poto ke iloa ne latou te loto o te Atua ke fai ne latou, faitalia te lotou tulaga vāivāi sē tumau. Tela la, i te taimi ne oko mai ei te kalaga ke sulu atu te mainaga, ne toka ‵lei latou.​—2 Timoteo 4:2; Epelu 10:​24, 25.

¹⁰ Kae ne seki toka a nisi tino fakaekegina o talia a mea faiga‵ta e uke​—faitalia te lotou ma‵nako malosi ke fetaui latou mo te Tagata fatoa fakaipoipo. Tela la, i te taimi ko ‵tau ei o ga‵lue malosi i te talaiatuga o te tala ‵lei, ne seki toka latou. (Mataio 24:14) Ne taumafai foki latou o faka‵lave olotou taugasoa loto finafinau mai te fakamolemole atu ke tuku mai ne olotou kalasini. E ‵tusa mo te tala fakatusa a Iesu, ne ‵saga atu pefea a tamafine ‵poto ki a latou? Ne fai atu latou: “Ikai, e se mafai me sē lava mo kalasini mō tatou; kae sili ke olo koutou o ‵togi ne otou kalasini i te sitoa.” (Mataio 25:9) E penā foki i te 1919, ne ita a Kelisiano fakaekegina fakamaoni o fai so se mea telā ka fakafoliki ei te lotou malosi o fakamaina atu te mainaga. Ne ‵pāsi ei latou i te fakamasinoga tenā.

11. Ne a mea ne ‵tupu ki tamafine va‵lea?

¹¹ Ne fakaoti ne Iesu ana pati: “Ka koi ‵galo atu eiloa [a tamafine va‵lea], kae oko mai te tagata fatoa fakaipoipo. A tamafine ‵poto ne ulu fakatasi mo te tagata ki te ‵kaiga o te fakaipoipoga, ‵pono ei te mataloa. E se leva, kae oko mai a tamafine va‵lea, kae ka‵laga atu, ‘Te aliki, te aliki! ‵Tala mai ake te mataloa ke ulu atu a matou ki loto!’ Ne tali mai a te tagata fatoa fakaipoipo, ‘Au e fai atu ki a koutou, e se iloa eiloa ne au a koutou.’ ” (Mataio 25:​10-12) E tonu, ne seki toka a nisi tino i te taimi ne oko mai ei te Tagata fatoa fakaipoipo. Tela la, ne seki ‵pāsi latou i te āsiga tenā kae galo atu ei te lotou avanoaga ke ‵kau atu ki te ‵kaiga o te fakaipoipoga i te lagi. Ma‵faga o tulaga fakamataku!

Te Tala Fakatusa e Uiga ki Taleni

12. (a) Se a te tala fakatusa ne fakaaogā ne Iesu ke fakamatala atu ei a te fakamaoni? (e) Ko oi te tagata telā ne “fano tena malaga”?

¹² I te otiga ne fai te tala fakatusa e uiga ki te poto, ne fai ne Iesu se tala fakatusa e uiga ki te fakamaoni. Ana muna: “E pelā mo te tagata ne fai o fano tena malaga, kalaga atu ei ki ana tavini kae tuku ki a latou ana mea ke tausi. Ne tuku atu ne ia ki a latou takitokotasi e faka‵tau ki te mea e mafai ne te tino o tausi. E sefulu afe tala ki te suā tino, ka ko te suā tino e fa afe tala, kae ki te suā tino e lua afe tala. Oti, fano ei tena malaga.” (Mataio 25:​14, 15) A te tagata i te tala fakatusa telā ne “fano tena malaga” ko Iesu i te taimi ne fanaka ei a ia ki te lagi i te 33 T.A. Kae koi tuai o fanaka a ia, ne tuku ne ia “ana mea” ki ana soko fakamaoni. E pefea la?

13. Ne fakatoka pefea ne Iesu a galuega uke e ‵tau o fai kae ne fakatonu atu pefea ne ia ke fakagalue aka ne ana “tavini” a mea konā?

¹³ I tena galuega i te lalolagi, ne fakatoka ne Iesu te faiga o te galuega ko te talaiatuga o te tala ‵lei o te Malo ki te fenua kātoa o Isalaelu. (Mataio 9:​35-​38) Mai mua o “fano tena malaga,” ne tuku atu ne ia te galuega tenā ki ana soko fakamaoni, i ana muna: “Tela la, olo atu koutou ki fenua katoa ke fai a tino i ei mo oku soko; papatiso foki latou i te igoa o te Tamana, te Tama mo te Agaga Tapu. Akoako atu foki latou ke faka‵logo ki mea katoa kolā ne fakatonu atu ne au ki a koutou.” (Mataio 28:​18-​20) Mai i ana pati konā, ne tuku atu ne Iesu te fakatonuga ki ana “tavini” ke fakagalue a mea konā ‘e ‵tusa mo te mea e mafai ne te tino o fai’, ke oko ki tena foki mai.

14. Kaia e se fakamoemoe ei ke ‵pau te mea e fai ne tino katoa?

¹⁴ E fakasino atu te tugāpati tenā, me e se ‵pau a avanoaga mo fakanofonofoga o Kelisiano katoa i aso o te kau apositolo. Ne maua ne nisi tino, e pelā mo Paulo mo Timoteo, o fai a mea e uke atu i te talai mo te akoako atu. Kāti ne seki mafai ne nisi tino o fai a mea e uke ona ko olotou fakanofonofoga. E pelā mo nisi Kelisiano, ne pologa, ne fakamasaki‵saki, ko tō ma‵tua io me isi ne tiute i te kāiga e ‵tau o ‵saga atu ki ei. Kae e tonu foki me ne seki maua ne soko katoa a tauliaga i te fakapotopotoga. Ne seki akoako atu a fāfine mo nisi tāgata fakaekegina i te fakapotopotoga. (1 Kolinito 14:34; 1 Timoteo 3:1; Iakopo 3:1) Kae faitalia olotou tulaga totino, a soko fakaekegina katoa o Keliso​—tāgata mo fāfine​—ne fakatonugina ke ga‵lue i te pisinisi, mai te fakaaogā faka‵lei o olotou avanoaga mo fakanofonofoga i te galuega faka-Kelisiano. E penā foki olotou taugasoa i aso nei.

Ko Kamata te Taimi o te Asiga!

15, 16. (a) Ko te taimi fea ka āsi ei ana mea katoa? (e) Ne a avanoaga ‵fou ke fai te galuega ne tuku atu ki tavini fakamaoni?

¹⁵ E faka‵soko mai te tala fakatusa: “Ko leva eiloa te galoga o te pule foki mai ei, fakamasino ei ne ia ana tupe ne tuku ki ana tavini.” (Mataio 25:19) I te 1914​​—se taimi leva ‵ki talu mai te 33 T.A.​—ne kamata ei o fakatasi mai a Iesu Keliso i tena ‵malu fakatupu. I te tolu mo te afa tausaga mai tua ifo i ei, i te 1918, ne fanatu ei a ia ki te faletapu faka-te-agaga o te Atua kae ne fakataunu i ei a pati a Petelu konei: “Ko oko nei ki te taimi e kamata ei te Fakamasinoga.” (1 Petelu 4:17; Malaki 3:1) Ko te taimi ke āsi ei ana mea.

¹⁶ Ne a mea ne fai ne tavini, ko taina fakaekegina o Iesu, ki “mea” a te Tupu? Talu mai te 33 T.A. o vau ki mua, e aofia i ei a tausaga mai mua o te 1914, ne ga‵lue malosi a tino e tokouke i te ‘galuega’ a Iesu. (Mataio 25:16) Ke oko foki eiloa ki te taimi o te taua muamua a te lalolagi, ne fakaasi mai ne latou a te lasi o te lotou ma‵nako o tavini atu ki te lotou Matai. Tenā loa te taimi ke tuku atu ei ki tavini fakamaoni a avanoaga ‵fou i te faiga o te pisinisi. Ko oko atu nei ki te taimi o te gataga o te olaga tenei. E ‵tau o folafola atu te tala ‵lei ki te lalolagi kātoa. Ko ‵tau nei o ‵kati a saito me “ko ma‵tua saito i te lalolagi.” (Fakaasiga 14:​6, 7, 14-​16) E ‵tau o ‵sala atu ki tino fakaoti o te potukau pelā me ne saito kae fakamaopoopo mai a te “vaitino tokouke” o nisi mamoe.​—Fakaasiga 7:9; Mataio 13:​24-​30.

17. Ne ulu atu pefea a Kelisiano fakaekegina fakamaoni ki ‘te fiafia o te lotou matai’?

¹⁷ A te taimi ‵kati saito se taimi fakafiafia. (Salamo 126:6) E fetaui ‵lei eiloa te mea tenā, me i te 1919, ne tuku atu ne Iesu ki ana taina fakaekegina fakamaoni a galuega e uke atu, i ana pati: “A koe se tavini ‵lei kae fakamaoni. Ne fakamaoni koe i te tausiga o mea fo‵liki, nei ko tuku atu ne au koe ke pule i mea e uke; ulu mai la ki loto ke fia‵fia tasi taua!” (Mataio 25:​21, 23) E faigata ke fakaataata i ‵tou mafaufau a te fiafia o te Matai i te taimi ne fakasopo ei mo fai te tupu i te Malo o te Atua. (Salamo 45:​1, 2, 6, 7) E maua foki ne te tavini fakamaoni, telā ko sui o te Tupu a te fiafia tenā ke fakauke ne latou ana mea i te lalolagi. (2 Kolinito 5:20) E lavea atu te lotou fia‵fia i pati fakapelofeta a Isaia 61:10: “Ko fiafia [au] ona ko te mea ne fai ne te Aliki. . . . Ne fakapei a ia ne te Atua ki te fakaolataga mo te manumalo.”

18. Kaia ne seki ‵pāsi ei a nisi tino i te āsiga, kae se a te ikuga ne maua i ei?

¹⁸ E fakafanoanoa me ne seki ‵pāsi a nisi tino i te āsiga tenā. E faitau tatou: “Ne vau foki ki loto a te tavini telā ne tuku atu ki ei a te lua afe tala, ana muna, ‘Toku pule, e iloa ne au i a koe se tagata faigata. E ‵kati ne koe a saito kolā e seki ‵toki ne koe, kae tau foki ne koe a fuaga o lakau e seki ‵toki ne koe. Tela la, ne tanu ne au a tau tupe o ‵funa i a au ne mataku i a koe. Tenei la tau tupe ne tuku mai.’ ” (Mataio 25:​24, 25) E penā foki a nisi Kelisiano kolā ne seki ‵saga atu ki te faiga o te ‘galuega.’ Ne seki fakaasi atu ne latou mo te loto finafinau te lotou fakamoemoega ki nisi tino mai mua o te 1914, kae ne seki ma‵nako foki o fai penā i te 1919. Ne saga atu pefea a Iesu ki te lotou sē ava? Ne fakaseai ne ia olotou tauliaga katoa. Ne ‘apa latou ki tua i te pouliga, ki te koga telā e iai te fakatautagiga mo te gaī o nifo.’​—Mataio 25:​28, 30.

E Tumau te Āsiga

19. I te auala fea e tumau ei te faiga o te āsiga, kae ne a mea ne fakaiku aka ne Kelisiano fakaekegina ke fai?

¹⁹ E tonu, ne seki tapuaki atu a te tokoukega o tino kolā ne fai fakamuli mo fai ne tavini fakaekegina a Keliso i te taimi o te gataga ki a Ieova i te kamataga o te āsiga a Iesu i te 1918. E mata, ne seki āsi atu ki a latou? Ikai. Ne kamata fua a te āsiga i te 1918/1919 i te taimi ne pāsi ei a te tavini fakamaoni kae poto e pelā me se potukau. Ne tumau eiloa a Kelisiano mai lalo i te āsiga tenā ke oko ki taimi ko oti ne fakamau ‵tu ei lotou tulaga. (Fakaasiga 7:​1-3) Ona ko te mea tenei, ne fakaiku aka ne taina fakaekegina o Keliso ke tumau latou i te fakamaoni i te faiga o te ‘galuega.’ Ne fakaiku aka ke maua faeloa ne latou te poto mai te faiga ke lava faeloa a kalasini ko te mea ke maina faka‵lei atu te mainaga. E iloa ne latou me kafai ko oti a galuega fakamaoni a tino taki tokotasi i te lalolagi nei, ka ave ei ne Iesu latou ki tena koga nofo i te lagi.​—Mataio 24:13; Ioane 14:​2-4; 1 Kolinito 15:​50, 51.

20. (a) Ne a mea e fakaiku aka ne nisi mamoe ke fai? (e) Se a te mea e iloa ‵lei ne Kelisiano fakaekegina?

²⁰ Ko oti ne tau‵tali atu a te vaitino tokouke o nisi mamoe ki olotou taina fakaekegina. E iloa ne latou me uke atu olotou mea e ‵tau o fai ona ko te lotou iloa e uiga ki fuafuaga a te Atua. (Esekielu 3:​17-21) Tela la, mai te fesoasoani o te Muna a Ieova mo tena agaga tapu, e tausi foki ne latou ke lava olotou kalasini e auala i te faiga o sukesukega mo te ‵kau fakatasi i fakatasiga. Kae e fakamaina atu ne latou te lotou mainaga mai te ‵kau atu ki te galuega talai mo te akoako atu mo te faiga o te ‘pisinisi’ fakatasi mo olotou taina fakaekegina. Kae e iloa ‵lei ne Kelisiano fakaekegina me ne tuku atu a taleni konā ki a latou. E fakamasinogina a latou e ‵tusa mo te auala e fakagalue aka ei a mea a te Aliki i te lalolagi. E ui eiloa e mu‵tana fua te lotou aofaki, e se mafai o tuku atu te tiute tenā ki te vaitino tokouke. Ona ko te mea tenei, e tumau eiloa a te tavini fakamaoni kae poto i te faiga o te takitakiga i te galuega a te Tupu, mo te loto fakafetai ki te fesoasoani o te vaitino tokouke. E matea ne te vaitino tokouke a te tiute o olotou taina fakaekegina kae e lagona ne latou te tauliaga gali ke ga‵lue mai lalo o te lotou tausiga.

21. Se a te fakamalosiga e aogā ki Kelisiano katoa mai mua o te 1919 ke oko mai ki ‵tou aso nei?

²¹ E ui eiloa e fakamaina mai i tala fakatusa e lua konei a mea ne ‵tupu kāti i te 1919, e aogā ‵ki a akoakoga konei ki Kelisiano ‵tonu katoa i aso fakaoti konei. I te auala tenei, e ui eiloa ne fakauiga muamua a fakamalosiga ne fai ne Iesu i te fakaotiga o te tala fakatusa e uiga ki tamafine e toko sefulu ki Kelisiano fakaekegina mai mua o te 1919, e aogā eiloa a te tala tenā ki Kelisiano taki tokotasi katoa. Ke na ‵saga tonu atu tatou ki pati a Iesu: “Ke matapula‵pula koutou, me se iloa ne koutou tona aso mo tona taimi.”​—Mataio 25:13.

[Fakamatalaga mai lalo]

E Mafai o Fakamatala Mai ne Koe?

• Ne āsi atu anafea a Iesu ki ana soko, kae ne a mea ne maua ne ia?

• Kaia ne maua ei ne nisi Kelisiano fakaekegina a te uiga o te “tavini sē fakamaoni” tenā?

• E fakaasi atu pefea ne tatou me ‵poto tatou i te feitu faka-te-agaga?

• I te fakaakoako atu ki taina fakaekegina fakamaoni o Iesu, e tumau pefea tatou i te ‘faiga o te galuega’?

[Pokisi i te itulau e 26]

NE VAU ANAFEA A IESU?

I te Mataio mataupu e 24 mo te 25, e fai mai i ei me i a Iesu ka “vau” i auala kese‵kese. E se “vau” tonu a ia. I lō te fai penā, e “vau” a ia māfai ko saga tonu atu o fakamasino a tino io me ko ana soko. Tela la, i te 1914 ne “vau” a ia ke kamata tena fakatasimaiga e pelā me ko te Tupu faūgina. (Mataio 16:28; 17:1; Galuega 1:​11) I te 1918, ne “vau” a ia e pelā me se avefekau o te feagaiga kae fakamasino ei ne ia a tino kolā e fai mai me tapuaki atu latou ki a Ieova. (Malaki 3:​1-3; 1 Petelu 4:​17) I Amaketo, ka “vau” ei a ia o fakaoko atu te fakamasinoga ki fili o Ieova.​—Fakaasiga 19:​11-16.

A tena vauga (io me ko tena okomaiga) telā e faipati ki ei i te Mataio 24:​29-​44 mo te 25:​31-​46 ko tena vau i te “fakasauaga lasi.” (Fakaasiga 7:14) I te sua feitu, a tena okomaiga telā e fakasino atu ki ei i te Mataio 24:45 ki te 25:30 e fakasino atu ki te fakamasinoga o soko ‵loi mai i te 1918 o fano ki mua. Kāti e se se manatu ‵lei ke fai atu, me i te taui o te tavini fakamaoni, te fakamasinoga o tamafine va‵lea mo te tavini paie telā ne ‵funa ne ia a tupe a tena Matai, ka fai katoa i te taimi e “vau” ei a Iesu i te fakasauaga lasi. E mafai o fakauiga i ei me e tokouke a tavini fakaekegina ka maua atu i te taimi tenā e se fakamaoni kae ‵tau o sui latou. Kae e fai mai te Fakaasiga 7:3 me i tavini fakaekegina katoa o Keliso ko ‵tau o oti ne “fakamailoga” i te taimi tenā.

[Ata i te itulau e 24]

Ne seki maua ne te “tavini sē fakamaoni” a fakamanuiaga i te 1919

[Ata i te itulau e 25]

Ne toka a tamafine ‵poto i te okomaiga o te tagata fatoā fakaipoipo