“Ko Oi La Te Tavini Fakamaoni Kae Poto?”

1, 2. Ko te auala fea e fagai ei tatou ne Iesu i aso nei, kae kaia e tāua ei ke iloa ne tatou a te fakatokaga tenā?

“TAINA, e se mafai ne au o lau a te uke o mataupu ne tuku mai ne koutou kolā e maua i ei a mea e manakogina ne au māfai e manako malosi au ki ei.” Tenā te auala ne fakaasi atu ei ne se tuagane a tena loto fakafetai i tena tusi ki taina kolā e ga‵lue i ‵tou laumua. E ‵pau ou lagonaga mo tou fafine? E penā te tokoukega o tatou. E mata, e ‵tau o ‵poi tatou i ei? Ikai.

² A mea‵kai faka-te-agaga kolā e maua ne tatou i te taimi tonu se fakamaoniga i a Iesu, te Ulu o te fakapotopotoga, e tausi eiloa ki tena feagaiga ke fagai mai tatou. E auala i a ai e fai ei ne ia te mea tenā? I te tukumaiga o te fakailoga o tena fakatasi mai, ne fai mai a Iesu me ka fakaaoga ne ia a “te tavini fakamaoni kae poto” ke tuku mai a “meakai i te taimi tonu” ki ana nisi tavini.a (Faitau te Mataio 24:45-47.) A te tavini fakamaoni ko te auala telā e fakaaoga ne Iesu ke fagai mai i ei ana soko ‵tonu i te taimi tenei o te gataga. Se mea tāua ke iloa ne tatou a te tavini fakamaoni. E fakalagolago eiloa ‵tou ma‵losi faka-te-agaga mo ‵tou fesokotakiga mo ‵tou Atua ki te fakatokaga tenei.​—Mata. 4:4; Ioa. 17:3.

3. Ne a mea ne ‵sae mai i ‵tou lōmiga e uiga ki te tala fakatusa o te tavini fakamaoni?

³ E malamalama pefea tatou i te tala fakatusa a Iesu e uiga ki te tavini fakamaoni? I taimi ko ‵teka, ne ‵sae mai i loto i ‵tou lōmiga a mea konei: I te Penitekoso 33 T.A., ne ‵tofi ne Iesu a te tavini fakamaoni ke pule ki luga i ana nisi tavini. Talu mai te taimi tenā, ne sui ne Kelisiano fakaekegina katoa i te lalolagi a te tavini e pelā me se potukau i so se taimi. A nisi tavini ne fakasino atu loa ki te kau fakaekegina foki konā e pelā me ne tino taki tokotasi. I te 1919, ne ‵tofi ne Iesu a te tavini fakamaoni ke “pule i ana kope katoa”​—ko mea katoa o tena Malo i te lalolagi. E ui i ei, a te sukesuke faka‵lei kae mafaufau ‵loto e auala i te faiga o talo e fakaasi mai i ei me e manakogina ke faka‵tonu aka a ‵tou malamalama i pati a Iesu e uiga ki te tavini fakamaoni kae poto. (Faata. 4:18) Ke suke‵suke aka tatou ki te tala fakatusa mo te auala e aofia tatou i ei, faitalia me maua ne tatou a te fakamoemoega i te lagi io me ko te lalolagi.

NE FAKATAUNU ANAFEA A TE TALA FAKATUSA?

4-6. Kaia e mafai ei o fakaiku aka ne tatou i te tala fakatusa a Iesu e uiga ki te tavini fakamaoni ne kamata o fakataunu mai tua fua o te 1914?

⁴ E fakaasi mai i te ‵kanotonu o te tala fakatusa e uiga ki te tavini fakamaoni kae poto me ne seki kamata o fakataunu i te Penitekoso 33 T.A., kae i te taimi tenei o te gataga. Ke onoono aka tatou me ne takitaki pefea tatou ne Tusitusiga Tapu ke oko atu ki te fakaikuga tenei.

⁵ A te tala fakatusa ki te tavini fakamaoni se vaega o te valoaga a Iesu e uiga ki “te fakailoga o [tena] fakatasi mai mo te gataga o te olaga tenei.” (Mata. 24:3) A te vaega muamua o te valoaga telā ne tusi i te Mataio 24:4-22, e lua ana fakataunuga​—muamua la, i tausaga mai te 33 T.A. ki te 70 T.A., kae ko te lua, i se auala e lasi ‵ki atu i ‵tou aso nei. E mata, e fakauiga i ei i pati a Iesu e uiga ki te tavini fakamaoni ka lua foki ana fakataunuga? Ikai.

⁶ Kamata mai i pati a Iesu i te Mataio 24:29, ne saga tonu atu eiloa a Iesu ki mea ‵tupu kolā ka ‵tupu i ‵tou aso nei. (Faitau te Mataio 24:30, 42, 44.) I te faipati ki mea ka ‵tupu i te taimi o te fakalavelave lasi, ne fai mai a ia i tino “ka lavea ne latou a te Tama a te tagata e vau i kaumana o te lagi.” Kae i ana pati ki a latou kolā e ola i aso fakaoti, ne fakamalosi ne ia ke matapula‵pula, penei: “E se iloa ne koutou a te aso e vau ei te otou Aliki” kae ko “te Tama a te tagata e vau i te itula telā e seki fakamoemoe koutou ki ei.”b I te tulaga tenei​—i te taimi ne faipati ei a ia e uiga ki mea ‵tupu kolā ka ‵tupu i aso fakaoti​—ne taku mai ne Iesu a te tala fakatusa o te tavini fakamaoni. Tela la, kāti ko fakaiku aka ne tatou i ana pati e uiga ki te tavini fakamaoni ne kamata o fakataunu mai tua fua o aso fakaoti kolā ne kamata i te 1914. E fetaui ‵lei te vaegā fakaikuga tenā. Kaia?

7. Se a te fesili tāua ne sae aka i te kamataga o te ‵tau e ‵kati ei a saito, kae kaia?

⁷ Mafaufau malie aka e uiga ki te fesili: “Ko oi la te tavini fakamaoni kae poto?” I te senitenali muamua, e faigata eiloa o isi se pogai ke ‵sili atu se vaega fesili penā. E pelā mo te mea ne matea ne tatou i te mataupu mai mua atu, ne mafai ne te kau apositolo o fai a vavega kae fakaoko atu foki a meaalofa fakavavega e fakatalitonu atu i ei i te Atua e ‵lago atu ki a latou. (Galu. 5:12) Tela la, kaia e fia fesili ei se tino me ko oi la ne ‵tofi ne Keliso ke fai mo takitaki? Kae i te 1914, ne ‵kese ‵ki eiloa a fakanofoga. Ne kamata a te ‵tau e ‵kati ei a saito i te tausaga tenā. Ko oko mai te taimi ke ‵vae ei a mouku ma‵sei mai saito. (Mata. 13:36-43) I taimi ne kamata ei a te ‵tau e ‵kati ei a saito, ne sae aka se fesili tāua: Ona ko te tokouke o Kelisiano fakaloi‵loi e fai mai i a latou ne soko ‵tonu o Iesu, e mafai pefea o iloa a saito, ko Kelisiano fakaekegina? E maua te tali i te tala fakatusa e uiga ki te tavini fakamaoni. A soko fakaekegina o Keliso ko latou kolā e fagai faka‵lei i te feitu faka-te-agaga.

KO OI TE TAVINI FAKAMAONI KAE POTO?

8. Kaia e ‵lei ei ke aofia a Kelisiano fakaekegina i te tavini fakamaoni?

⁸ E ‵tau o aofia i te tavini fakamaoni a Kelisiano fakaekegina i te lalolagi. Ne taku a tino penā me “ne faitaulaga kolā ka fai mo tupu” kae ne fakatonu atu ki ei ke “‘folafola atu . . . ki fenua katoa a galuega fakaofoofogia’ a te tino telā ne kalaga ne ia [latou] mai te pouliga ki tena mainaga fakaofoofogia.” (1 Pe. 2:9) Se mea ‵lei i sui o “faitaulaga kolā ka fai mo tupu” e akoako ne latou a te munatonu ki taina mo tuagane.​—Mala. 2:7; Faka. 12:17.

9. E mata, e aofia a Kelisiano fakaekegina katoa i te tavini fakamaoni? Fakamatala mai.

⁹ E mata, e tino fakaekegina katoa i te lalolagi e aofia i te tavini fakamaoni? Ikai. A te tonuga loa, e se ko tino fakaekegina katoa e maua ne latou a te tiute i te fakasoaga o mea‵kai faka-te-agaga ki taina tali‵tonu i te lalolagi kātoa. E aofia i saito ko taina fakaekegina kolā e tavini atu e pelā me ne tavini fesoasoani io me ne toeaina i olotou fakapotopotoga. E akoako latou mai fale ki fale mo olotou fakapotopotoga, kae ‵lago atu mo te alofa fakamaoni ki fakatonuga mai te laumua. Kae seai se vaega o latou i te fakasoaga o mea‵kai faka-te-agaga ki te kautaina i te lalolagi kātoa. E aofia foki i tino fakaekegina ko tuagane loto mau‵lalo, kolā e se taumafai lele ke fai latou mo faiakoga i loto i te fakapotopotoga.​—1 Koli. 11:3; 14:34.

10. Ko oi te tavini fakamaoni kae poto?

¹⁰ Kae ko oi la te tavini fakamaoni kae poto? I te tautali i te fakaakoakoga a Iesu i te fagaiga o tino e tokouke e auala i nāi tino fua, a te tavini tenā e aofia i ei se potukau foliki o taina fakaekegina kolā e aofia tonu i te fakatokaga mo te fakasoaga o mea‵kai faka-te-agaga i te taimi e fakatasi mai ei a Keliso. I aso fakaoti konei, a taina fakaekegina kolā e aofia i te tavini fakamaoni ne ga‵lue tasi eiloa i te laumua. I te fia sefulu tausaga fakamuli nei, ne iloa aka te tavini tenā e pelā me ko te Potukau Pule o Molimau a Ieova. Onoono la, i te pati “tavini” i te tala fakatusa a Iesu e fakasino fua ki se mea e tasi, e fakaasi mai i ei i te tavini tenei se potukau o tino kese‵kese. A ikuga e fai ne te Potukau Pule e fai fakatasi.

KO OI A NISI TAVINI?

11, 12. (a) Ne a tofiga e lua ne tuku atu ki te tavini fakamaoni kae poto? (e) Ko te taimi fea ne ‵tofi ei ne Iesu a te tavini fakamaoni ke pule ki ana nisi tavini, kae ko oi ne fili ne ia?

¹¹ E tāua ke iloa ne tatou i te tala fakatusa a Iesu, me e lua a tofiga kese‵kese ne tuku atu ki te tavini fakamaoni kae poto. Te mea muamua, ke pule atu ki nisi tavini; te lua, ke pule atu ki kope katoa o te matai. Ona ko te tala fakatusa e fakataunu fua i te taimi tenei o te gataga, a tofiga e lua konā e ‵tau o fai mai tua o te fakatasi mai o Iesu  i tena malosi fakatupu telā ne kamata i te 1914.

¹² Ko te taimi fea ne ‵tofi ei ne Iesu a te tavini fakamaoni ke pule atu ki ana nisi tavini? Ke tali aka te fesili tenā, e manakogina ke toe ‵foki tatou ki te 1914​—te kamataga o te ‵tau e ‵kati ei a saito. E pelā mo te mea ne tauloto muamua ne tatou, e uke a potukau i te taimi tenā ne fai mai i a latou ne Kelisiano. Ko te potukau fea la ne filifili ne Iesu kae ‵tofi aka i ei a te tavini fakamaoni? Ne tali aka a te fesili tenā mai tua o te taimi ne o‵mai ei a ia mo tena Tamana o āsi a te faletapu, io me ko te fakatokaga faka-te-agaga mō te faiga o te tapuakiga, mai te 1914 ki te kamatamataga o te 1919.c (Mala. 3:1) Ne fia‵fia eiloa lāua ki se potukau foliki o Tino A‵koga ki te Tusi Tapu kolā ne fakaasi atu i olotou loto e nofo loa i a Ieova mo tena Muna. E tonu, e manakogina ke faka‵ma latou, kae ne talia eiloa ne latou mo te loto maulalo a te vaitaimi toetoe ne tofotofo kae faka‵ma ei latou. (Mala. 3:2-4) A Tino A‵koga ki te Tusi Tapu kae fakamaoni konā ne Kelisiano tonu. I te 1919, se taimi e toe fakamalosi aka ei a te feitu faka-te-agaga, ne filifili ne Iesu a taina fakaekegina kae fakatuagagina mai i a latou ke aofia i te tavini fakamaoni kae poto kae ‵tofi aka latou ke pule i luga i nisi tavini.

13. Ko oi ne aofia i nisi tavini, kae kaia?

¹³ Kae ko oi la a nisi tavini? A te tali faigofie, ko latou kolā e fagaigina. I te kamataga o aso fakaoti, a nisi tavini ko tino fakaekegina katoa. Fakamuli ifo, ko aofia i nisi tavini a te vaitino tokouke o nisi mamoe. A nisi mamoe nei ko te vaega lasi eiloa o te “lafu mamoe e tasi” mai lalo i te takitakiga a Keliso. (Ioa. 10:16) E maua eiloa ne potukau e lua konei a mea aoga mai mea‵kai faka-te-agaga kolā e fakasoa mai ne te tavini fakamaoni i te taimi tonu. Kae e a sui o te Potukau Pule kolā e fai i aso nei e pelā me ko te tavini fakamaoni kae poto? E manakogina foki ke fagai a taina konā i te feitu faka-te-agaga. Tela la, e loto mau‵lalo eiloa latou o fakaasi mai me e pelā me ne tino taki tokotasi, e aofia latou i nisi tavini e pelā eiloa mo nisi soko ‵tonu katoa o Iesu.

14. (a) Se a te tiute ko panaki mo te tavini fakamaoni, kae se a te mea e aofia i ei? (e) Se a te faka‵pulaga ne tuku atu ne Iesu ki te tavini fakamaoni kae poto? (Onoono ki te pokisi “Kafai e Fai Ifo te Tavini Masei Tenā . . . ”)

¹⁴ Ne tuku atu ne Iesu se tiute ‵mafa ki te tavini fakamaoni kae poto. I taimi o te Tusi Tapu, a te tavini fakatuagagina io me se situati, ko te pule o te fale. (Luka 12:42) Tela la, ko panaki mo te tavini fakamaoni kae poto a te tiute ki te tausiga o te kaukāiga o te fakatuanaki. E aofia i te tiute tenā a te onoonoga ki kope faka-te-foitino, te galuega talai, polokalame o fono o te fenua mo fono o te atufenua, mo te faitega o tusi faka-te-Tusi Tapu ke fakaaoga i te galuega talai mo sukesukega totino mo te fakapotopotoga. E fakalago‵lago eiloa a nisi tavini ki mea‵kai faka-te-agaga katoa kolā e fakasoa mai ne te tavini telā aofia i ei se potukau o tino kese‵kese.

NE ‵TOFI KE PULE I KOPE KATOA A TE MATAI​—MAFEA?

15, 16. Ko te taimi fea e ‵tofi ei ne Iesu a te tavini fakamaoni ke pule i ana kope katoa?

¹⁵ Ko te taimi fea e ‵tofi ei ne Iesu a te tavini i te lua o taimi​—“ke pule i ana kope katoa”? Muna a Iesu: “E fiafia eiloa te tavini tenā māfai e oko mai tena Matai kae lavea ne ia me e fai eiloa ne ia a te mea tenā! Au e fai ‵tonu atu ki a koutou: Ka ‵tofi eiloa ne ia te tavini tenā ke pule i ana kope katoa.” (Mata. 24:46, 47) Onoono la me ne ‵tofi ne Iesu a te tavini i te lua o taimi mai tua o tena okomaiga kae maua atu i te tavini tenā “e fai eiloa ne ia,” a te fakasoaga o mea‵kai faka-te-agaga mo te fakamaoni. Tela la, ka isi se manavaga i te va o taimi e lua konei ne ‵tofi ei ne Iesu a te tavini. Ko te mea ke malama‵lama tatou i te auala mo te taimi e ‵tofi ei ne Iesu a te tavini ke pule i ana kope katoa, e ‵tau o iloa ne tatou a mea e lua: ko te taimi e oko mai ei a ia mo mea kolā e aofia i ana kope.

¹⁶ Ko te taimi fea e oko mai ei a Iesu? E maua te tali i te tala kātoa. Masaua i te faipatiga i fuaiupu mai mua atu e uiga ki te “vau” o Iesu, e fakasino atu eiloa ki te taimi e vau ei a ia o folafola kae fakaoko mai a te fakamasinoga i te gataga o te olaga tenei.d (Mata. 24:30, 42, 44) Tela la, a te “oko mai,” io me ko te “vau” o Iesu, telā ne taku mai i te tala fakatusa o te tavini fakamaoni e tupu eiloa i te taimi o te fakalavelave lasi.

17. Ne a mea e aofia i kope o Iesu?

¹⁷ Ne a mea e aofia i “kope katoa” o Iesu? Ne seki fakaaoga ne Iesu a te pati “katoa,” ke fakatapula ana kope ki mea fua i te lalolagi. A te tonuga loa, e lasi ‵ki te pulega a Iesu i te lagi. Ana muna: “Ko oti ne tuku mai ki a au a te pule i mea katoa i te lagi mo te lalolagi.” (Mata. 28:18; Efe. 1:20-23) E aofia nei i ana kope a te Malo faka-Mesia, telā ne fai mō ia talu mai te 1914 kae telā ka pule fakatasi ei a ia mo ana soko fakaekegina.​—Faka. 11:15.

18. Kaia e fiafia ei a Iesu o ‵tofi aka a te tavini ke pule i ana kope katoa?

¹⁸ I te ‵kilo atu ki mea konā, se a te mea e fakaiku aka ne tatou? Kafai e vau a Iesu o fai te fakamasinoga i te taimi o te fakalavelave lasi, ka maua aka ne ia a te tavini fakamaoni e alofa eiloa o fakasoa atu a mea‵kai faka-te-agaga i te taimi tonu ki nisi tavini. Mai konā, ka fiafia eiloa a Iesu o ‵tofi aka a te tavini i te lua o taimi—ke pule ki ana kope katoa. A latou kolā e aofia i te tavini fakamaoni ka maua ne latou a te tofiga tenei māfai ko maua te lotou taui i te lagi, ko fai mo pulelagolago fakatasi mo Keliso.

19. E mata, e lasi atu te taui e maua ne te tavini fakamaoni i te lagi i lō nisi tino fakaekegina? Fakamatala mai.

¹⁹ E mata, e lasi atu te taui e maua ne te tavini fakamaoni i te lagi i lō te ‵toega o te kau fakaekegina? Ikai. A te tautoga e uiga ki te taui telā ka maua ne se potukau foliki e maua foki ne nisi tino. Pelā me se fakaakoakoga, mafaufau ki pati a Iesu ki ana apositolo fakamaoni e toko 11 i te po mai mua o tena mate. (Faitau te Luka 22:28-30.) Ne tauto atu a Iesu ki te potukau foliki o tāgata tenā i te taui ‵lei tenā e faka‵tali mai ki a latou ona ko te lotou fakamaoni. Ka ‵nofo fakatasi latou mo ia i tena tulaga pule. Kae i tausaga fakamuli ifo, ne fakaasi mai ne ia i tino katoa o te 144,000 ka saga‵saga i nofogaaliki kae pule fakatasi mo ia. (Faka. 1:1; 3:21) E tai ‵pau mo te mea telā ne fai mai i te Mataio 24:47, ne tauto mai a ia i te potukau o tāgata​—ko taina fakaekegina kolā ne aofia i te tavini fakamaoni—ka ‵tofi ke pule i ana kope katoa. A te tonuga loa, ko tino katoa o te 144,000 ka ‵kau fakatasi i tena pulega lasi i te lagi.—Faka. 20:4, 6.

20. Kaia ne ‵tofi ei ne Iesu a te tavini fakamaoni, kae se a la tau fakaikuga?

²⁰ E auala i te tavini fakamaoni kae poto, e tautali eiloa a Iesu i te fakaakoakoga ne fai ne ia i te senitenali muamua​—te fagaiga o tino e tokouke e auala i nāi tino. Ne ‵tofi ne Iesu a te tavini fakamaoni tenā ke fakamautinoa aka me e maua eiloa ne ana soko ‵tonu​—faitalia me ne tino fakaekegina io me ko nisi mamoe​—a mea‵kai faka-te-agaga i te taimi tonu i aso fakaoti. Ke na fakaiku aka ne tatou ke fakaasi atu ‵tou loto fakafetai mai te ‵lago atu mo te fakamaoni ki taina fakaekegina kolā e aofia i te tavini fakamaoni kae poto tenā.​—Epe. 13:7, 17.