Mea e Manakogina ke Maua ei te Fiafia

A IEOVA, te “Atua fiafia,” mo Iesu Keliso “te Aliki fiafia kae ko te Pule foki eiloa e tokotasi,” e iloa ‵lei ne laua a mea kolā e manakogina ke fia‵fia ei tatou. (1 Timoteo 1:11; 6:​15, NW) Tela la, e se ‵poi tatou me i te kī ki te mauaga o te fiafia e maua eiloa i loto i te Muna a te Atua ko te Tusi Tapu.​—Fakaasiga 1:3; 22:7.

I tena Lauga i te Mauga, ne fakamatala mai ne Iesu a mea kolā e manakogina ke fia‵fia ei tatou. Ana muna: “Ke fia‵fia a latou” kolā (1) e iloa ne latou olotou manakoga faka-te-agaga, (2) e fanoa‵noa, (3) e loto mau‵lalo, (4) e fia‵kai kae fia inu ki te amiotonu, (5) e a‵lofa fakamagalo, (6) e loto ‵ma, (7) e uiga filemu, (8) e fakasauāgina i te amiotonu, mo te (9) e muna maseigina kae fakasauāgina ona ko ia.​—Mataio 5:​3-11, NW.a

E Mata, e ‵Tonu a Pati a Iesu?

E se manakogina a fakamatalaga e uke e uiga ki te ‵tonu o pati a Iesu. Ko oi ka faka‵se ne ia te manatu me e sili atu te fiafia o te tino loto ‵lei telā e loto maulalo, e alofa, kae filemu i lō te tino mataitaita, fai taua kae sē alofa?

Kae kāti ka mafau‵fau tatou me e mafai pefea o fia‵fia a tino kolā e fia‵kai kae fiainu ki te amiotonu io me kolā e fanoa‵noa. E maua ne tino taki tokotasi penei se kilokiloga tonu e uiga ki tulaga o te lalolagi. A latou e “fanoanoa kae mafatia ona ko amioga mataga katoa kolā e fai” i ‵tou aso nei. (Esekielu 9:4) E se fakafiafia atu eiloa a mea konā ki a latou. Kae kafai ko iloa ne latou a fuafuaga a te Atua ke tuku mai a tulaga amio‵tonu ki te lalolagi mo te fakamasinoga tonu ki tino loto mafatia, ko sē lausia ei te lotou fia‵fia.​—Isaia 11:4.

Ona ko te lasi o te lotou amanaia ki te amiotonu ko fanoa‵noa ei a tino taki tokotasi ona ko te sē mafai ne latou o fai faeloa a te mea tonu. Tela la, ko iloa ei ne latou te lasi o te lotou manakoga ki mea faka-te-agaga. E loto fia‵fia a tino penā o ‵kilo atu ki te Atua mō se takitakiga me iloa ne latou me ko ia fua tokotasi e mafai o fesoasoani atu ke manumalo latou i olotou vāivāiga.​—Faataoto 16:​3, 9; 20:24.

E iloa ne tino kolā e fanoa‵noa, e fia‵kai kae fiainu ki te amiotonu, kae iloa foki ne latou olotou manakoga ki mea faka-te-agaga a te tāua ke maua se va fealofani o latou mo te Mafuaga. A te mauaga o se va fealofani ‵lei mo tino e maua i ei te fiafia, kae sili atu la māfai e ‵lei te va o tatou mo te Atua. E tonu, a tino kolā e mafau‵fau ‵mafa ki mea ‵tonu, kae kolā e loto fiafia o talia a fakatakitakiga mai te Atua, ka maua eiloa ne latou te fiafia tonu.

Kae kāti ka faigata o talitonu tonu koe me i te tino telā e fakasauāgina kae muna maseigina e mafai o fiafia. Kae e ‵tau o tonu te mea tenā, me ne fai mai a Iesu me ka penā loa. Tela la, e mafai pefea o malamalama tatou i ana pati?

E Fakasauāgina Kae Fiafia ​—E Tupu Pefea te Mea Tenā?

Ke masaua la me ne seki fai mai a Iesu me ka iku atu te muna maseigina mo fakasauāga ki te fiafia. Ana muna: “Ke fia‵fia a latou kolā e fakasauāgina i te amiotonu . . . e muna maseigina kae fakasauāgina . . . ona ko au.” (Mataio 5:​10, 11) Tela la, e fiafia fua se tino māfai ne muna maseigina ona ko ia se soko o Keliso kae ola e ‵tusa mo fakatakitakiga amio‵tonu kolā ne akoako mai ne Iesu.

E fakaasi mai te mea tenei i mea kolā ne ‵tupu ki Kelisiano i aso mua. A te kau o te Sanetulini, te fono maluga o te kau Iutaia ne “‵kini ne latou, kae fakatonu atu ke sē toe fai‵pati eiloa ki te igoa o Iesu” a te kau apositolo “oti, fakasaoloto atu ei ke olo.” Ne a mea ne fai ne te kau apositolo? “Ne olo keatea mai te Fono Maluga mo te fiafia lasi, me ko taku‵leia latou ne te Atua ona ko te fakamaseigina mō te igoa o Iesu. Kae i aso katoa, e se mafai eiloa o gata te lotou akoako atu kae lauga atu ki tino e uiga ki a Iesu te Keliso, i loto i te Fale Tapu io me i loto i fale o tino.”​—Galuega 5:​40-​42; 13:​50-​52.

Ne toe fakamaina mai ne te apositolo ko Petelu e uiga ki te sokoga o te muna maseigina mo te fiafia. Ana muna: “[‘Ke fia‵fia,’ NW] koutou manafai e muna maseigina koutou ona ko koutou e tau‵tali i a Iesu; ko te uiga o te mea nei i te Agaga ‵malu, telā ko te Agaga o te Atua, ko nofo i luga i a koutou.” (1 Petelu 4:14) E tonu, a te logo‵mae e pelā me se Kelisiano ona ko te faiga o te mea tonu, faitalia te sē ‵lei a vaegā logo‵maega penā, ka maua i ei te fiafia telā e māfua mai i te iloa atu me ko maua ne koe te agaga tapu o te Atua. E fetaui pefea a te agaga o te Atua mo te fiafia?

Galuega Faka-te-Foitino io me ko Fuataga o te Agaga?

E oko atu fua a te agaga tapu o te Atua ki tino kolā e faka‵logo ki te Atua e pelā me ko te pule. (Galuega 5:32) E se tuku atu ne Ieova tena agaga ki tino kolā e fai faeloa ne latou a “manako faka te foitino.” A mea konā ko te “sulaitetapu, amio masei, mo faiga masei; ifo ki tupua, fai vailakau, fai fili, fai taua, loto masei, loto ita, manatu fakapito, finau valea, mo te fia fakamavaevae; kaisano, konā, fiafiaga o te konā, mo nisi mea katoa penei.” (Kalatia 5:​19-​21) E tonu, ko lavea ‵tonu atu ne tatou i aso nei a galuega e uke o “te manako faka te foitino.” Kae ko latou kolā e fai faeloa ne latou a amioga konā e se maua ne latou te fiafia tumau. I lō te mauaga o te fiafia tumau, e fakamasei fua ne mea konā a tou fesokotakiga ‵lei mo ou kāiga, taugasoa, mo tino kolā e masani mo koe. E se gata i ei, e fai mai te Muna a te Atua me i tino kolā ‘e fai ne latou a mea konā ka sē ulu atu ki te malo o te Atua.’

E ‵kese mai i ei, e tuku atu ne te Atua a tena agaga ki tino kolā e fakagalue ne latou a “fua o te Agaga.” E aofia i uiga konei ko te “alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.” (Kalatia 5:​22, 23) Kafai e fakaasi atu ne tatou a uiga konei, ko faite eiloa ne tatou se tulaga telā ka maua ei se fesokotakiga filemu mo nisi tino e pelā foki mo te Atua, telā ka iku atu ei ki te mauaga o te fiafia tonu. (Ke onoono ki te pokisi.) Kae sili mai i ei, e fakafiafia ne tatou a Ieova mai te fakaasiatuga o te alofa, te mataalofa, te ‵lei mo nisi uiga aka o te Atua kae ka fia‵fia foki tatou ki te fakamoemoega ke ola ki te se-gata-mai i te lalolagi fou kae amiotonu a te Atua.

Te Fiafia se Filifiliga e ‵Tau o Fai

I te taimi ne sukesuke ei a Wolfgang mo Brigitte, se tauavaga e ‵nofo i Siamani, ki te Tusi Tapu mo te loto finafinau, ne maua ne laua a kope e uke kolā ne mafau‵fau a tino me ka maua mai i ei te fiafia. Koi fo‵liki fua laua kae ma‵losi foki. Ne ‵pei faeloa laua ki gatu ‵togi ‵mafa, ne ‵nofo laua i se fale gali telā ko oti ne teu fakagaligali kae ne olaola ‵lei foki te la pisinisi. Ne fakamāumāu ne laua a taimi e uke o ‵sala atu ki nisi kope faka-te-foitino, kae ne seki maua ne laua mai i ei te fiafia tonu. Fakamuli ifo, ne fai ne Wolfgang mo Brigitte se filifiliga tāua. Ne kamata o fakaavanoa ne laua a taimi e uke atu o ‵sala ki mea tāua faka-te-agaga mo auala e fakapili‵pili atu ei ki a Ieova. Ne iku atu te la filifiliga ki te ‵fuliga o la kilokiloga, telā ne iku atu i ei ki te fakafaigofie aka o te lā olaga kae tavini atu e pelā me ne paenia io me ne tino talai tumau o te Malo. Nei la, ko ga‵lue laua faka-volenitia i te ofisa lagolago o Molimau a Ieova i Siamani. E se gata i ei, ko tauloto foki laua ki se ‵gana Asia e tasi ko te mea ke fesoasoani atu ei ki tino mai fenua fakaatea ke maua foki ne latou te munatonu i loto i te Muna a te Atua, ko te Tusi Tapu.

E mata, ne maua ne te tauavaga tenei te fiafia tonu? Muna a Wolfgang: “Talu mai te taimi ne kamata ei o ‵saga atu māua ki mea faka-te-agaga, ne lasi atu te fiafia mo te lotomalie ne maua ne māua i ei. A te tavini atu ki a Ieova mo te loto kātoa ne fakamalosi aka foki i ei te ma fakaipoipoga. Ne fia‵fia muamua māua ki te ma fakaipoipoga, kae ne kese‵kese a tiute mo mea ne fia‵fia māua ki ei. Nei la, ko ‵kau fakatasi māua i te kausaki atu ki se fakamoemoega loa e tasi.”

Ne a Mea e Aofia i te Mauāga o te Fiafia?

Ke fakatoetoe aka: ‵Kalo keatea mai “manako faka te foitino,” kae ke ati aka a “fua o te agaga [o te Atua].” Ke maua te fiafia, e ‵tau o taumafai se tino ke maua se va fealofani pili o laua mo te Atua. A te tino telā e taumafai malosi ke maua ne ia te mea tenei ka fetaui ‵lei mo fakamatalaga a Iesu e uiga ki te tino fiafia.

Tela la, ke sē fakaiku fakavave aka ne koe me e se mafai eiloa o maua ne koe te fiafia tonu. E tonu, kāti e se malosi ‵lei koe nei io me e isi ne fakalavelave e fe‵paki mo koe i tau fakaipoipoga. Kāti ko sē mafai o maua ne koe ne tama‵liki, io me ko taumafai malosi koe ke maua se galuega ‵lei. Kāti ko sē ‵fonu faeloa tau pausi tupe e pelā mo aso mua. E ui i ei, ke sē loto vāivāi; e seai se pogai ke fanoanoa ei koe! Ka faka‵lei aka ne te pulega a te Malo o te Atua a fakalavelave katoa konei mo te fia selau o nisi fakalavelave. E tonu, ko pili fua o fakataunu ne Ieova te Atua ana folafolaga kolā e fakaasi mai ne te faisalamo: “A tau pule e se gata mai, a koe foki ko te tupu e se gata mai. . . . E tuku ne koe ki ei a mea e lava mō latou, kae fakamalie ne koe olotou manako.” (Salamo 145:​13, 16) E pelā mo te mea e fakamaoni aka ne te fia miliona o tavini a Ieova i te lalolagi kātoa, a te masaua faeloa o te folafolaga mautinoa a Ieova tenei ka fesoasoani atu eiloa ke maua ne koe te fiafia tonu i aso nei.​—Fakaasiga 21:3.

[Fakamatalaga mai lalo]

[Pokisi/Ata i te itulau e 6]

Mea Kolā e Fesoasoani Mai ke Maua i ei te Fiafia

Te Alofa e fakamalosi aka i ei a nisi tino ke a‵lofa mai foki.

Te Fiafia e tuku mai i ei a te malosi ke fakafesagai atu ki fakalavelave.

Te Filemu e fesoasoani mai ke maua faeloa ne koe se fesokotakiga ‵lei mo nisi tino.

Te Kufaki e fesoasoani mai ke tumau i te fiafia faitalia a tofotofoga.

Te Mataalofa e fai ei ke fia fai taugasoa a nisi tino ki a koe.

Te Aga‵lei e fai ke loto fia‵fia a nisi tino o fesoasoani atu ki a koe i te taimi e manakogina ei.

Te Fakatuanaki e fakamaoni mai i ei me maua ne koe te takitakiga alofa a te Atua.

Te Loto Maulalo e fai ei ke tokagamalie tou loto, tou mafaufau mo tou foitino.

Te Loto Pulea e fai i ei ke sē uke au mea ‵se e fai.

[Ata i te itulau e 7]

Ke maua te fiafia, e ‵tau o fakamalie ne koe ou manakoga faka-te-agaga