E Fia Ola Koe ki te Se-Gata-Mai?

“AU E se mataku i te mate,” ko pati a se lomatua i Tiapani. “Kae e fanoanoa fua au me ka mavae matou mo pulalakau konei.” Ne malamalama se tuagane Kelisiano telā ne āsi atu ki tena fale i ana pati konā, me ne gali ‵ki eiloa tena fatoaga. E fia‵fia malosi a tino e tokouke kolā e fai mai me e se ma‵taku latou i te mate, ki mea fakaofoofogina i olotou tafa kae kāti e ma‵nako ke tumau eiloa latou i te ola ki te se-gata-mai.

Ola ki te se-gata-mai? Kāti e se fia ‵saga atu a tino e tokouke ki te manatu tenā. Kāti ka fai mai foki a nisi tino me e se fia ola latou ki te se-gata-mai. Kaia e fai ei penā a nisi tino?

Te Ola Se-Gata-Mai​—⁠e Faka‵fiu?

E mafau‵fau a nisi tino me e faka‵fiu te ola ki te se-gata-mai. Kāti ka fakasino atu latou ki te olaga faka‵fiu o tino kolā ko litaea kae kolā e se uke olotou mea e fai kae na ko te saga‵saga fua o onoono i te televise. Kafai e penā eiloa ou lagonaga, ke mafaufau ki pati a se tagata poto i mea o te lagi ko Robert Jastrow i te taimi ne fesili atu ei ki a ia me e mata, a te ola ki te se-gata-mai se fakamanuiaga io me se fakamalaiaga. Ne tali mai a Jastrow: “Se fakamanuiaga eiloa ki tino kolā e fia iloa ne latou a mea e uke kae ma‵nako faeloa o tauloto. A te manatu me ka tauloto faeloa latou ki mea ‵fou se fakamafanafanaga gali eiloa mō tino penā. Kae ki tino kolā e mafaufau me ko lava eiloa olotou mea e iloa, kae ko oti foki ne pono olotou mafaufau, se matugā fakamalaiaga lasi eiloa tenā mō latou. Ka sē iloa ne latou me ka fakaaogā pefea olotou taimi.”

E fakalagolago a te fia ola io me ko te sē fia ola o koe ki te se-gata-mai ki tau kilokiloga. Kafai e ‘fia iloa ne koe a mea e uke kae manako faeloa o tauloto,’ ke mafaufau la ki mea e mafai o fai ne koe e pelā mo meataulima, ‵fatu pese mo lakau ta‵ta, ‵lomi ata, faiga o fatoaga io me ko so se mea aogā telā e fiafia koe ki ei. E tuku mai ne te ola se-gata-mai i te lalolagi se avanoaga gali ke fakalauefa aka ei tou atamai i vaegā poto valevale.

Me ko mafai o fakaasi atu kae fakaasi mai foki te alofa ki te se-gata-mai e fai ei a te ola ki te se-gata-mai e pelā me se mea fakafiafia. Ne faite tatou mo te manakoga ke fakaasi atu te alofa, kae e ola ‵lei foki tatou māfai e alofagina tatou. A te fakatau fakaasiatuga o te alofa ka maua i ei te fiafia tonu telā e se mafai eiloa o gata. A te ola ki te se-gata-mai se avanoaga gali ke fakaasi atu a te alofa ki nisi tino kae maise eiloa ki te Atua. “Ko te tino telā e alofa ki te Atua,” ko pati a te apositolo ko Paulo, “e iloa a ia ne te Atua.” (1 Kolinito 8:⁠3) Ma‵faga o tauliaga gali​—⁠ke iloa ne tatou a te Pule Sili o te lagi mo te lalolagi kae ke iloa foki ne ia tatou! E se gata i ei, e seai se gataga o ‵tou mea e mafai o tauloto e uiga ki te ‵tou Mafuaga alofa. E mafai la pefea o faka‵fiu kae sē aogā te ola se-gata-mai?

Te Ola​—⁠E Toetoe Kae Tāua

E mafau‵fau nisi tino me ona ko te toetoe o te olaga ko fai ei te ola e pelā me se mea tāua ‵ki. E mafai o fakatusa ne latou a te ola ki te aulo telā e mauagatā. E fai mai latou me moi maua te aulo i so se koga, ka foliki ‵ki tena malosi. E tiga te feitu tenā, e tumau eiloa tena gali. Kae e penā foki eiloa te ola.

E mafai o faka‵pau ne tatou a te mauaga o te ola se-gata-mai ki te lasi o te ea. Ka ma‵nako malosi a kauvaka o se vaka uku telā ko sē mafai o fanaka ki luga, ki te ea. Kafai ko oti ne ‵to aka latou ki luga, e mata, ka sē loto fakafetai latou ki te ea telā ko toe ma‵nava latou ki ei? Ka loto fakafetai eiloa latou!

E pelā mo kauvaka konā, e mafai foki o ‵sao tatou, mo te fakamoemoega telā e sili atu tena aogā ko te ola se-gata-mai. “Me i te taui o te agasala ko te mate,” ko pati a te apositolo ko Paulo, “ka ko te meaalofa faivasaga a te Atua; ko te ola se gata mai i a Keliso Iesu te ‵tou Aliki.” (Loma 6:23) E auala i te taulaga togiola a Iesu, ka fakaseai ne te Atua a te tulaga sē ‵lei katoatoa i tino mo te mate kae ka tuku atu ne ia ki tino faka‵logo katoa te meaalofa ko te ola se-gata-mai. E pefea te lasi o te ‵tou loto fakafetai mō te fakatokaga alofa tenei!

Kae Pefea la a ‵Tou Tino Pele?

Kāti ka mafau‵fau a nisi tino: ‘Kae pefea la a oku tino pele? Ka sē fiafia eiloa au ki te ola se-gata-mai māfai e se ‵nofo atu latou i ei.’ Kāti ko oti ne maua ne koe te poto mai te Tusi Tapu me e mafai eiloa o ola a tino ki te se-gata-mai i te lalolagi palataiso. (Luka 23:43; Ioane 3:16; 17:⁠3) Se mea masani ke manako koe ki tino o tou kāiga tonu mo nisi taugasoa pele ke maua foki ne latou te fiafia telā e fakamoemoe koe ke maua i te lalolagi fou kae amiotonu telā ne folafola mai ne te Atua.​—⁠2 Petelu 3:13.

Kae pefea la māfai e se fia ola ki te se-gata-mai ou taugasoa io me ko ou tino pele? Ke sē fakavāivāi atu te mea tenā ki a koe. Tumau i te tauloto ki te iloaga tonu mai te Tusi Tapu kae ola e ‵tusa mo mea konā. Ne tusi mai te apositolo ko Paulo: “E iloa pefea ne koe, e te fafine Kelisiano, me ka sē fakaolagina tau avaga e alatu i a koe? Io me e iloa pefea ne koe e te tagata Kelisiano, me ka sē fakaolagina tau avaga e alatu i a koe?” (1 Kolinito 7:​16, Today’s English Version) E mafai o ‵fuli a tino. E pelā mo se tagata telā ne ‵teke atu faeloa ki Kelisiano kae ne ‵fuli fakamuli a ia kae ko fai nei e pelā me se toeaina i te fakapotopotoga Kelisiano e tasi. Ana muna: “E lasi toku fakafetai me ne tu ‵mautakitaki a toku kāiga foliki i te fakamaoni o tau‵tali ki fakatakitakiga i te Tusi Tapu i taimi ne ‵teke malosi atu ei au ki a latou.”

E amanaia tonu a te Atua ki ‵tou ola mo ou tino pele katoa. E tonu, “me sē manako a [Ieova] ke malaia se tino, tenā te pogai e fakatuai ei a ia o fakataunu ana folafolaga, ko te mea ke lava se taimi e salamo ei a tino.” (2 Petelu 3:⁠9) E manako a Ieova te Atua ke ola koe pelā foki mo ou tino pele ki te se-gata-mai. E sili atu tena alofa i lō te alofa o tino sē ‵lei katoatoa. (Isaia 49:15) Tela la, kaia e se ati aka ei ne koe se va fealofani ‵lei mo te Atua? Ko mafai ei ne koe o fesoasoani atu ki ou tino pele ke fai foki penā. E ui eiloa e se fakamoe‵moe nei latou ke ola ki te se-gata-mai, e mafai o ‵fuli olotou kilokiloga māfai e lavea ne latou a koe e ola e ‵tusa mo te iloaga tonu i te Tusi Tapu.

Kae pefea la ou tino pele kolā ko oti ne ‵mate? E fakaasi mai i te Tusi Tapu a te fakamoemoega gali o te toetu mō te fia miliona o tino kolā ko oti ne ‵mate​—⁠ka toe ‵fagu aka latou mai te mate kae ka ola i te lalolagi Palataiso. Ne folafola mai a Iesu Keliso: ‘E oko mai eiloa te taimi kae ka ulu mai ei a latou katoa kolā e i loto i tanuga ki tua.’ (Ioane 5:​28, 29) Ke oko foki eiloa ki tino kolā ne ‵mate e aunoa mo se iloa e uiga ki te Atua ka toe ola mai, me e fai mai te Tusi Tapu: “Me i tino ‵lei mo tino sē ‵lei, ka faka‵tu mai katoa mai te mate.” (Galuega 24:15) Ma‵faga o mea fakafiafia ke toe fetaui mo tino konā!

Te Ola Se-Gata-Mai​—Se Fakamoemoega Fakafiafia

Kafai e fiafia kae lotomalie koe i te olaga nei faitalia a fakalavelave e ‵tupu i te lalolagi nei, e mautinoa eiloa me ka fiafia koe ki te ola se-gata-mai i te lalolagi palataiso. I te taimi ne fai atu ei ne se Molimau a Ieova a fakamanuiaga kolā ka maua māfai ko ola ki te se-gata-mai, ne fai mai ei se fafine penei: “E se manako au o ola ki te se-gata-mai. Ko lava eiloa te olaga tenei ki a au i se 70 ki te 80 tausaga.” Ne ‵sili atu se toeaina telā ne nofo atu i konā ki a ia: “Kai mafaufau aka loa koe ki lagonaga o au tama‵liki māfai ko mate koe?” Ne tagi tou fafine i te taimi ne mafaufau ei a ia ki te fanoanoa telā ka maua ne ana tama māfai ko galo te lotou mātua. “Fatoā iloa nei ne au i au se tino manatu fakapito,” ko ana pati, “kae ko lavea nei ne au me i te ola se-gata-mai e se se fakamoemoega mō koe aka eiloa kae e aofia i ei te ola mō nisi tino.”

E mafau‵fau a nisi tino me e se fia ‵saga atu a nisi tino me e ola latou io me e ‵mate. Kae, e se penā loa a te Tino telā ne tuku mai ne ia te ola, telā e fai mai penei: “I a au, te Aliki Sili, ko te Atua Ola . . . e se fiafia ke lavea ne au se tino agasala ke mate. E sili atu toku fiafia ke lavea ne au me ko sē toe agasala kae ke ola.” (Esekielu 33:11) Ona ko te saga tonu atu o te Atua ki ola o tino amio ma‵sei, e mautinoa eiloa me ka saga tonu atu eiloa a ia ki tino kolā e a‵lofa ki a ia.

Ne talitonu katoatoa a te tupu o Isalaelu mua ko Tavita ki te alofa atafai o Ieova. Ne fai mai a ia: “E mafai ne toku tamana mo toku mātua o tiakina au, ka ko te Aliki ka tausi ne ia a au.” (Salamo 27:10) Kāti ne iloa ‵lei ne Tavita te a‵lofa o ana mātua ki a ia. Kae kafai e tiakina a ia ne ana mātua​—⁠ko toe tino ‵pili ki a ia​—⁠e iloa ne ia me ka sē tiakina eiloa a ia ne te Atua. Ona ko tena alofa mo tena amanaia ki a tatou, e tuku mai ne Ieova a te ola se-gata-mai mo se va fakataugasoa mo ia telā e se mafai o gata. (Iakopo 2:23) E mata, e se ‵tau o talia ne tatou mo te loto fakafetai a meaalofa ‵gali konei?