Kelisiano​—Ke Fakamata‵mata i a Koutou ne Kelisiano!

“Ko te tino telā e fakamatamata, e ‵tau o fakamatamata i a Ieova.”​—1 KOLINITO 1:​31, NW.

1. Se a te mea masani ko lavea atu e uiga ki te kilokiloga a tino ki lotu?

“TE TULAGA o te sē fia ‵saga atu o tino ki te Atua.” Ne fakaaogā ne se tino poto i mea tau lotu fakamuli nei a te tugāpati tenā ke fakamatala i ei te uiga masani i tino e tokouke e uiga ki olotou talitonuga. E penei tena fakamatalaga: “A te ‵toe tulaga maluga o lotu i aso nei e se fakauiga eiloa ki lotu​—kae ko te uiga telā e ‵tau o fakamatala atu penei: ko ‘te sē fia ‵saga atu o tino ki te Atua.’” Ke fakamaea mai a te uiga o te tulaga tenā ne fai mai a ia me “ko te sē fia amanaia malosi atu o tino ki olotou lotu.” Ana muna me e tokouke a tino e “tali‵tonu ki te Atua . . . kae e se fia ‵saga malosi atu ki a ia.”

2. (a) Kaia e se ofo ei tatou i te se fia ‵saga mai o tino ki mea faka-te-agaga? (e) Se a te mea e fakamataku ei ki Kelisiano ‵tonu a te sē fia ‵saga atu ki mea faka-te-agaga?

² A te tulaga tenei e se se mea fou ki tino kolā e sukesuke faeloa ki te Tusi Tapu. (Luka 18:8) E uiga eiloa ki te kilokiloga masani a tino ki lotu, ko leva ne iloa ne latou me ka tupu te mea tenā. Ko leva ne takitaki ‵se kae fakafanoanoa atu ne lotu ‵se a tino i se taimi leva ‵ki. (Fakaasiga 17:​15, 16) Kae ki Kelisiano ‵tonu, a te agaga tenei fakatasi mo te sē lava o te loto finafinau kolā ko salalau valevale, se tulaga fakamataku eiloa. E se ‵tau eiloa o manatu ma‵ma tatou e uiga ki te ‵tou fakatuanaki mo te ‵tou loto finafinau i te tavini atu ki te Atua mo te munatonu mai te Tusi Tapu. Ne polopoloki mai a Iesu ke fakaeteete i ana pati ki Kelisiano i Laotikaia i te senitenali muamua: “E iloa foki ne au i a koe e se ‵moko e se ‵vela. Au e loto ke matuā ‵moko koe io me matuā ‵vela. Kae . . . ko koe e mafanafana.”​—Fakaasiga 3:​15-18.

Ke Iloa Tonu me ko oi Tatou

3. Ne a feitu o te lotou iloga e ‵tau o fakamata‵mata a Kelisiano e uiga ki ei?

³ Ke ‵teke atu ki te manatu ma‵ma ki mea faka-te-agaga, e ‵tau o malamalama ‵lei a Kelisiano me ko oi latou, kae e ‵tau o fia‵fia ‵tonu latou ki te lotou iloga tenā. E pelā me ne tavini a Ieova mo soko o Keliso, e maua ne tatou i te Tusi Tapu a fakamatalaga e uiga ki te ‵tou iloga tenā. A tatou ko “molimau” a Ieova, ne “tino faigaluega” a te Atua kolā e ga‵lue malosi o folafola atu te “Tala ‵Lei” ki nisi tino. (Isaia 43:10; 1 Kolinito 3:9; Mataio 24:14) A tatou ne tino kolā e “fakatau a‵lofa.” (Ioane 13:34) A Kelisiano ‵tonu ko tino taki tokotasi kolā “ko oti ne akoako ke iloa ne latou o tami ki te kese‵kesega o te ‵lei mo te masei.” (Epelu 5:14) A tatou ne mea e “fakamaina” atu ki te lalolagi. (Filipi 2:15) E taumafai tatou ke “‵lei [‵tou] amio i mua o tino pouliuli.”​—1 Petelu 2:12; 2 Petelu 3:​11, 14.

4. E iloa pefea ne se tino tapuaki ki a Ieova a mea kolā e se ‵tau o fai ne ia?

⁴ E iloa foki ne tino tapuaki ‵tonu a Ieova a mea kolā e se ‵tau o ‵kau latou ki ei. “E se ne tino o te lalolagi latou,” e pelā eiloa mo te lotou takitaki ko Iesu Keliso, e se se tino o te lalolagi. (Ioane 17:16) E tumau latou i te ‵vae keatea mai “tino io me ko atufenua pouliuli” kolā e “‵nofo foki olotou mafaufau i te pouliga. E seai foki se lotou vaega o te ola ne tuku mai ne te Atua.” (Efeso 4:​17, 18) Ona ko te mea tenā, e ‵teke atu a soko o Iesu ki te “olaga masei mo te kaimanako, ka ke ola i te loto pulea, te mea tonu, mo te olaga faka Atua i te lalolagi nei.”​—Tito 2:12.

5. Se a te uiga o te fakamalosiga ki a tatou ke “fakamatamata i a Ieova”?

⁵ A te ‵tou iloa ‵lei e uiga ki te ‵tou iloga mo ‵tou fesokotakiga mo te Pule o te Lagi mo te Lalolagi e fakamalosi mai eiloa ki a tatou ke “fakamatamata i a Ieova.” (1 Kolinito 1:​31, NW) Se a te vaegā fakamatamata tenā? E pelā me ne Kelisiano ‵tonu, e fakamata‵mata eiloa tatou i a Ieova ko te ‵tou Atua. E tau‵tali tatou ki te fakamalosiga tenei: “Kafai se tino e fia fakamatamata, e ‵tau o fakamatamata me e iloa ne ia a au, kae malamalama foki i oku uiga, me i toku alofa e tumau, kae e fai foki ne au a te mea tonu mo te fakamasinoga tonu konā a mea e fiafia au ki ei. Ko au, te Aliki, tenā ne faipati atu.” (Ielemia 9:24) E “fakamatamata” tatou ona ko te tauliaga ke iloa ne tatou te Atua kae ke fakaaogā tatou ne ia ke fesoasoani atu ei ki nisi tino.

Te Mea Faigata

6. Kaia e faigata ei ki nisi tino ke fakatumau se kilokiloga manino ki te lotou iloga e pelā me ne Kelisiano?

⁶ E tonu, e se se mea faigofie i taimi katoa ke fakatumautakitaki te ‵tou iloga e pelā me ne Kelisiano. Ne fai mai se tamataene telā ne puti aka e pelā me se Kelisiano, a mea ne ‵tupu ki a ia i te taimi ne gasolo ei a ia o vāivāi i te feitu faka-te-agaga: “I nisi taimi ne ‵numi au i te pogai ne fai ei au e pelā me se Molimau a Ieova. Ne nofo atu au i loto i te munatonu talu mai taku folikiga. I nisi taimi e mafaufau au me i taku lotu se lotu fua pelā mo nisi lotu masani.” Kāti ko oti ne talia ne nisi tino ke sui te lotou iloga ne fakafiafiaga o te lalolagi, tala fakasalalau mo te kilokiloga masani ki te olaga telā e se fetaui mo mea e fiafia ki ei te Atua. (Efeso 2:​2, 3) Kāti ko oti ne fakalotolotolua a nisi Kelisiano i nisi taimi kae toe fuafua aka latou olotou fakamoemoega mo mea kolā e tāua atu ki a latou.

7. (a) Se a te vaegā sukesukega totino telā e ‵lei mō tavini a te Atua? (e) E māfua mai i fea a mea fakama‵taku?

⁷ E mata, se mea masei ke iloilo faeloa ne koe a koe eiloa? Ikai. Kāti e masaua ne koe me ne fakamalosi atu te apositolo ko Paulo ki Kelisiano ke tumau i te sukesuke ifo ki a latou eiloa: “Ke sukesuke ifo faka‵lei koutou ki a koutou eiloa, me mata e ‵mautakitaki koutou i te otou fakatuanaki. Ke fai se tofotofoga mō koutou.” (2 Kolinito 13:5) Ne fakamalosi mai te apositolo i konei ke taumafai malosi a Kelisiano o ‵sala ke matea ne latou so se vāivāiga faka-te-agaga telā e sae aka, kae fai a mea kolā e mafai o fai ke faka‵lei aka te mea tenā. Ke tofotofo aka ne se Kelisiano me tumau eiloa tena fakatuanaki, e ‵tau o fakamautinoa aka me e fetaui ‵lei ana pati mo ana faifaiga mo mea kolā e talitonu a ia ki ei. Kae, kafai e se fai faka‵lei, e mafai o fai a sukesukega kolā e ‵sala atu ei tatou ki te ‵tou “iloga” io me e ‵sala atu ki ne fakamatalaga mai tua o te ‵tou va mo Ieova io me ko te fakapotopotoga Kelisiano, ka sē aogā eiloa te mea tenā kae e mafai o iku atu eiloa ki te mate i te feitu faka-te-agaga.a E se ma‵nako eiloa tatou ke ‘kasa te ‵tou fakatuanaki’!​—1 Timoteo 1:19.

E se ‵Sao Tatou Mai Mea Faiga‵ta

8, 9. (a) Ne fakaasi atu pefea ne Mose ana manatu fakalotolotolua ki a ia eiloa? (e) Ne saga atu pefea a Ieova ki lagonaga o Mose konā? (i) E pokotia pefea koe i fakatalitonuga a Ieova?

⁸ E mata, e ‵tau o mafau‵fau a Kelisiano kolā e fakalotolotolua i nisi taimi me ko seai se lotou aogā? Ikai! E tonu, e ‵tau o fakamafanafana atu ki a latou me i vaegā lagonaga penā e se ne mea fou. Ne fe‵paki foki a molimau fakamaoni a te Atua i aso mua mo tulaga konā. Ke mafaufau ki a Mose, telā ne fakaasi mai ne ia se fakatuanaki, fakamaoni mo se taviniga tafasili i te lasi. I te taimi ne tuku atu ei se galuega lasi ke fai ne ia, ne fai fakavave atu a Mose: “Au se tagata fua e seai se aogā.” (Esoto 3:11) Kāti ne fai a nisi vaega o te olaga o Mose ke fai atu ei me e se ‵kafi ne ia: Ne vau a ia mai se fenua telā ne fai pelā me ne pologa. Ne ‵teke atu ki a ia a tino Isalaelu. Ne seki apo foki a ia i te faipati atu faka‵lei. (Esoto 1:​13, 14; 2:​11-​14; 4:​10) Ne fai a ia mo fai se tino tausi mamoe, se galuega telā e ‵kilo fakatakalia‵lia ki ei a tino Aikupito. (Kenese 46:34) E se tioa eiloa o mafaufau a ia me e se mafai ne ia o faka‵sao a tino o te Atua mai te ‵nofo pologa!

⁹ Ne fakatalitonu atu a te Atua ki a Mose mai te faiatuga o folafolaga ‵lasi e lua: “Au e fakatasi atu ki a koe. Kafai ko takitaki mai ne koe a tino Isalaelu keatea mai Aikupito, ka tapuaki koe ki a au i luga i te mauga tenei; ko fai ei te mea tenā mo fakamaoniga i a koe ne uga ne au.” (Esoto 3:12) Ne fai atu a te Atua ki tena tavini tenā me ka fakatasi atu faeloa a Ia. E se gata i ei, ne fai atu foki a Ieova me ka faka‵sao eiloa ne ia ana tino. I te fia senitenali fakamuli ifo, ne tuku mai faeloa ne te Atua a folafolaga penā. E pelā mo ana pati ne fai atu ki tino Isalaelu e auala i a Mose, mai mua faeloa o ulu atu latou ki te Fenua o te Folafolaga: “Ke ma‵losi otou loto kae sā ma‵taku. . . . A te otou Atua, telā ko te Aliki, e fakatasi atu eiloa ki a koutou. E se mafai eiloa o tiaki ne ia koutou.” (Teutelonome 31:6) Ne fakamautinoa atu foki ne Ieova ki a Iosua: “E seai eiloa se malo e mafai ne ia o fakatakavale koe i aso koi ola ei koe. Au e fakatasi atu ki a koe, . . . ka sē tiakina eiloa ne au a koe.” (Iosua 1:5) Kae tenei tena folafolaga ki Kelisiano: “E se tiakina lele eiloa ne au koutou, e se tuku tiaki lele eiloa ne au a koutou.” (Epelu 13:5) A te mauaga o se fesoasoani lasi penei e ‵tau ei o fakamata‵mata tatou i a tatou ne Kelisiano!

10, 11. Ne fesoasoani atu pefea ki te tino Levi ko Asafo ke toe maua ne ia se kilokiloga tonu e uiga ki te tāua o tena taviniga ki a Ieova?

¹⁰ Kāti se lima selau tausaga mai tua o Mose, ne fakaasi ‵tonu mai foki ei ne te tino Levi fakamaoni ko Asafo i ana pati a tena fakalotolotolua e uiga ki te aogā o te tausiga o se tulaga amiotonu. I ana taumafaiga ke tavini atu ki te Atua i loto i tofotofoga mo fakaosoosoga, ne lavea atu ei ne Asafo a te gasolo aka o manuia kae ma‵losi atu a pulega a nisi tino kolā ne fakatauemu atu ki te Atua. Ne pokotia pefea a Asafo i ei? Ne fai ‵tonu mai a ia, “Toku fakatuanaki toe itiiti eiloa ko seai; a toku talitonu foki ko tai galo atu eiloa. I a au ne loto masei ki tino fia‵sili i te mateaga ne au te solosolo ‵lei o tino amio ma‵sei.” Ne kamata o fakalotolotolua a ia e uiga ki te aogā o te fai e pelā me se tino tapuaki ki a Ieova. “E a, e se aogā a te tausi o toku olaga ke ‵ma, mai te agasala?” ko mafaufauga o Asafo. “Ko oti ne fakapuapuagatia au ne koe i aso katoa.”​—Salamo 73:​2, 3, 13, 14.

¹¹ Ne saga atu pefea a Asafo ki ana lagonaga fakamatakutaku konei? E mata, ne seki fia saga atu a ia ki ei? Ikai. Ne fakaasi atu ana lagonaga konā i tena ‵talo ki te Atua, e pelā mo te mea e fakaasi mai i te mataupu e 73 o te Salamo. Ne mafuli a te kilokiloga a Asafo i te taimi ne āsi atu ei a ia ki te faletapu. I tena nofoatuga i konā, iloa aka ei ne ia me i te tavini katoatoa atu ki te Atua ko te toe mea ‵lei eiloa ke fai ne se tino. I te taimi ne fakafou aka ei tena fiafia faka-te-agaga, malamalama ei a ia me e takalialia a Ieova ki mea ma‵sei kae ka fakasala eiloa ne ia a tino amio matagā i tena taimi tonu. (Salamo 73:​17-19) Mai konā eiloa, ne toe fakamalosi aka ei ne Asafo tena kilokiloga ki tena iloga e pelā me se tavini taulia a Ieova. Ne fai atu a ia ki te Atua: “Ka ko au e fakapilipili faeloa ki a koe, kae ne taofi ‵mau ne koe toku lima. Ne takitaki atu au ne koe ki tau fakatonuga, kae fakamuli ko talia ei au ne koe mo te fakaaloalo.” (Salamo 73:​23, 24) Ne fiafia kae ne toe fakamatamata ei a Asafo i tena Atua.​—Salamo 34:2.

Ne Malamalama ‵Lei Latou i te Lotou Iloga

12, 13. Tuku mai ne fakaakoakoga e uiga ki tino i te Tusi Tapu kolā ne fakamata‵mata ona ko te lotou fesokotakiga mo te Atua.

¹² A te auala e tasi ke fakamalosi aka ei te ‵tou iloga e pelā me ne Kelisiano ko te sukesuke mo te fakaakoako atu ki te fakatuanaki o tino tapuaki fakamaoni, kolā ne fia‵fia faeloa i te lotou fesokotakiga mo te Atua faitalia a fakalavelave e uke. Ke mafaufau ki a Iosefa, te tama a Iakopo. I te taimi koi foliki i ei, ne fakatau atu a ia i se auala matagā e pelā me se pologa kae avatu ki Aikupito, e fia selau maila te ‵mao mai tena tamana telā ne mataku ki te Atua mo tena kāiga. I Aikupito, e seai se isi tino ne mafai o tuku atu ki a Iosefa ne fakatakitakiga amioatua, kae ne fepaki a ia mo tulaga faiga‵ta kolā ne tofotofo aka ei tena tulaga i mea tau amioga mo tena fakalagolago ki te Atua. Kae ne taumafai malosi a ia ke toe fakamalosi aka tena kilokiloga ki tena iloga e pelā me se tavini a te Atua, kae ne tumau a ia i te fakamaoni i te faiga o te mea telā e iloa ne ia me ko te mea tonu. Ne fakamatamata eiloa a ia i tena fai mo fai se tino tapuaki a Ieova i se koga fakamataku penā, kae ne seki mā a ia o fakaasi atu ana lagonaga ‵tonu.​—Kenese 39:​7-10.

¹³ I te valu senitenali mai tua ifo, ne seki puli i se tamaliki fafine Isalaelu telā ne fai pelā me se pologa ki te pule o te kautau a Sulia ko Naamanu a tena iloga e pelā me se tino tapuaki a Ieova. I te taimi ne maua ei ne ia se avanoaga, ne molimau atu eiloa a ia mo te loto toa e uiga ki a Ieova mai te fakaasiatuga o te pelofeta a te Atua tonu ko Elisaia. (2 Tupu 5:​1-19) I te fia tausaga mai tua ifo i ei, ne toe fakafou aka ne te tupu foliki ko Iosia a faifaiga o te tapuakiga, fakafou te faletapu kae toe takitaki atu te fenua ki a Ieova, faitalia te masei o te tulaga o te fenua i te taimi tenā. Ne fakamatamata a ia e uiga ki tena fakatuanaki mo tena tapuakiga. (2 Nofoaiga Tupu, mataupu e 34, 35) Ne seki puli lele eiloa i a Tanielu mo ana taugasoa Epelu e tokotolu i Papelonia a te lotou iloga e pelā me ne tavini a Ieova, kae ne tumau eiloa latou i te fakamaoni faitalia a tofotofoga mo fakaosoosoga ne fe‵paki mo latou. E manino ‵lei, me ne fakamata‵mata eiloa latou i te lotou fai pelā me ne tavini a Ieova.​—Tanielu 1:​8-20.

Ke Fakamatamata i Tou Iloga Faka-Kelisiano

14, 15. Ne a mea e aofia i te fakamatamata ona ko te ‵tou iloga faka-Kelisiano?

¹⁴ Ne manuia eiloa a tavini a te Atua konei me ne ati aka ne latou se lagonaga fakamatamata i loto i a latou e uiga ki te lotou tulaga i mua o te Atua. Kae pefea la tatou i aso nei? Ne a mea e aofia i te ‵tou fakamata‵mata e uiga ki te ‵tou iloga faka-Kelisiano?

¹⁵ Muamua la, e aofia i ei te mauaga o se loto fakafetai ‵loto i tou aofia i tino kolā e fakaigoa ki te igoa o Ieova, kae kolā e maua ne latou ana fakamanuiaga mo tena taliaga. E iloa ‵lei ne Ieova ana tino. Ne tusi mai te apositolo ko Paulo, telā ne ola i te vaitaimi ne ‵numi valevale ei a tino i mea tau lotu, penei: “E iloa ne te Aliki a latou kolā e a ia.” (2 Timoteo 2:19; Numela 16:5) E fakamatamata a Ieova i tino “kolā e a ia.” E folafola mai a ia: “So se tino e fakapakia ne ia se tino i a koutou, ko fakapakia ne ia te mea tafasili i te tāua i toku loto.” (Sakalia 2:8) E manino ‵lei me e alofa tonu a Ieova ki a tatou. E ‵tau foki o fakavae a te ‵tou fesokotakiga mo ia ki te lasi o te ‵tou a‵lofa mō ia. Ne toe fai mai a Paulo: “Ko te tino telā e alofa ki te Atua, e iloa a ia ne te Atua.”​—1 Kolinito 8:3.

16, 17. Kaia e ‵tau ei o fakamata‵mata a Kelisiano, talavou mo tino ma‵tua, i te lotou tauliaga faka-te-agaga?

¹⁶ E ‵tau mo talavou kolā ne puti aka e pelā me ne Molimau a Ieova, o sukesuke ifo ki a latou eiloa me e mata, a te lotou iloga e pelā me ne Kelisiano e gasolo o malosi atu ona ko te lotou fesokotakiga mo te Atua. E se ‵tau o fakalagolago fua latou ki te fakatuanaki o olotou mātua. E uiga ki tavini taki tokotasi o te Atua, ne tusi mai a Paulo: “Ko te Atua fua e fakamasino ne ia me ko ia e iloa ne ia me e ‵lei me e masei.” Kae ne toe fai mai a Paulo: “Ko ‵tau i a tatou takitokotasi o avatu se tala o ia ki te Atua.” (Loma 14:​4, 12) E mautinoa eiloa, me i te tautali atu fua i te lotu a ‵tou mātua e se fakatumau i ei se fesokotakiga leva mo Ieova.

¹⁷ Talu mai te kamataga, ne fakasolo mai i ei a molimau a Ieova e tokouke. E kamata mai eiloa i te tagata fakamaoni ko Apelu​—kāti ko te 6,000 tausaga ko ‵teka​—ki te “vaitino tokouke” o Molimau i aso nei ke oko atu eiloa ki tino tapuaki ki a Ieova e tokouke kolā ka maua ne latou te ola se-gata-mai i aso mai mua. (Fakaasiga 7:9; Epelu 11:4) A tatou ko toe tino fakaoti eiloa i te fakasologa o tino tapuaki fakamaoni konei. Ma‵faga o tauliaga gali faka-te-agaga ko maua ne tatou!

18. E faka‵kese pefea tatou ne mea kolā e fakatāua ne tatou mo ‵tou tulaga mai te lalolagi?

¹⁸ E aofia foki i ‵tou iloga e pelā me ne Kelisiano a mea kolā e fakatāua ne tatou, amioga, tulaga mo uiga kolā e iloga ei i a tatou ne Kelisiano. Tenā loa te “Ala Tonu,” ko te auala tonu fua e tasi ki te ola mo te fakafiafia atu ki te Atua. (Galuega 9:2; Efeso 4:​22-24) Kelisiano, “e ‵tau o iloa ne koutou te kesekesega o te masei mo te ‵lei, kae puke ‵mautakitaki ki te mea ‵lei”! (1 Tesalonia 5:21) E malamalama ‵lei tatou i te lasi o te ‵kese o te tapuakiga tonu faka-Kelisiano mo te lalolagi telā e ‵vae keatea mai te Atua. E seai se avanoaga e tuku mai ne Ieova ko te mea ke ‵numi a tino i te tapuakiga tonu mo tapuakiga ‵se. E auala i tena pelofeta ko Malaki, ne folafola mai a ia: “Ka toe kilokilo a mata o oku tino ki te mea ka tupu ki tino amio ‵tonu mo te mea ka tupu ki tino ma‵sei; pelā foki ki te tino e tavini mai ki a au mo te tino e se fia tavini mai ki a au.”​—Malaki 3:18.

19. Se a te mea e se mafai o tupu ki Kelisiano ‵tonu?

¹⁹ Me tāua ‵ki ke fakamata‵mata tatou i a Ieova i te lalolagi ‵numi valevale tenei, se a la te mea ka fesoasoani mai ke fakatumau ne tatou te fakamatamata tenā i te ‵tou Atua kae ke malosi ‵lei foki te ‵tou iloga faka-Kelisiano? Ka maua ne tatou a manatu fesoasoani i te suā mataupu. I te taimi e mafaufau ei ki ei, e mafai o fakamautinoa aka ne koe a te mea tenei: A Kelisiano ‵Tonu e se mafai o “sē fia ‵saga atu ki te Atua.”

[Fakamatalaga mai lalo]

Koi Masaua ne Koe?

• E “fakamatamata” pefea a Kelisiano i a Ieova?

• Ne a au mea ne tauloto mai fakaakoakoga a Mose mo Asafo?

• Ko oi a tino i te Tusi Tapu ne fakamata‵mata i te lotou taviniga ki te Atua?

• Ne a mea e aofia i te fakamatamata ona ko te ‵tou iloga e pelā me ne Kelisiano?