Te Tausiga o te ‵Tou Iloga Faka-kelisiano

“Muna a te Atua . . . ‘koutou ko aku molimau.’”​—ISAIA 43:​8, 10.

1. Ne a vaegā tino e talia ne Ieova ke fakapili‵pili atu ki a ia?

KAFAI e nofo atu koe i se Kingdom Hall, onoono faka‵lei ki tino i ou tafa. Ko oi la e lavea atu ne koe i te koga tapuaki tenā? Kāti ka lavea atu ne koe i ei a talavou kolā e ‵saga tonu o fakalogo‵logo ke maua ne latou te poto mai te Tusi Tapu. (Salamo 148:​12, 13) Kāti ka lavea foki ne koe i ei a ulu o kāiga kolā e taumafai malosi o fakafiafia te Atua, a koi ola eiloa latou i te lalolagi telā ko masei ‵ki i ei te tulaga o te olaga faka-te-kāiga. Kāti ka lavea foki ne koe a tino ma‵tua, kolā e tu ‵mautakitaki i te ola e ‵tusa mo te lotou tukuatuga ki a Ieova faitalia te tulaga faigata o te olaga matua. (Faataoto 16:31) E a‵lofa malosi a tino katoa konei ki a Ieova. Kae konā la a tino e talia ne ia ke fai taugasoa mo ia. “E se mafai ne se tino o vau ki a au,” ko pati a te Tama a te Atua, “seiloga ne māfua tona vau mai te Tamana telā ne uga mai ne ia au.”​—Ioane 6:​37, 44, 65.

2, 3. Kaia e faigata ei ke fakatumau te ‵tou iloga e pelā me ne Kelisiano?

² E a, e se fia aofia tatou i tino kolā e talia ne Ieova kae maua foki ne tatou ana fakamanuiaga? Kae ke fakatumau ne tatou te ‵tou iloga e pelā me ne Kelisiano i “taimi faiga‵ta” konei e se se mea faigofie. (2 Timoteo 3:1) E lavea atu te ‵tonu o te mea tenei i talavou kolā ne puti aka i loto i kāiga Kelisiano. “E ui eiloa ne kau atu faeloa au ki fakatasiga faka-Kelisiano,” ko pati a se talavou, “e seai ne oku fakamoemoega faka-te-agaga mautinoa, kae ne seai foki eiloa soku manakoga tonu o tavini atu ki a Ieova.”

³ Kae ko nisi o latou, e ui eiloa e ma‵nako o tavini fakamaoni atu ki a Ieova, e mafai o takitaki‵segina ne taugasoa ma‵sei, fakamalosiga mai te lalolagi mo te lotou tulaga agasala. Kafai ko tofotofogina tatou, kāti ka fai i ei ke matafitafi te ‵tou iloga faka-Kelisiano. E pelā mo tino e tokouke i aso nei e ‵kilo atu ki tulaga o mea tau amioga i te Tusi Tapu me ko sē aogā mō te lalolagi i aso nei. (1 Petelu 4:4) E mafau‵fau a nisi tino me e se tāua malosi ke tapuaki atu ki te Atua i te auala telā e manako a ia ki ei. (Ioane 4:24) I tena tusi ki te kau Efeso, ne faipati atu a Paulo i ei e uiga ki te “agaga” o te lalolagi io me ko tena malosi. (Efeso 2:2) E fakamalosi aka ne te agaga tenā a tino ke talia ne latou te kilokiloga a te tokoukega o tino kolā e se iloa ne latou a Ieova.

4. Ne faka‵mafa mai pefea ne Iesu a te manakoga ke tausi faka‵lei te ‵tou iloga e pelā me ne Kelisiano?

⁴ Kae e pelā me ne tavini tukugina atu a Ieova, e iloa ne tatou me se mea fakamataku ki a tatou taki tokotasi​—talavou io me ko tino ma‵tua​—ke galo i a tatou te ‵tou iloga e pelā me ne Kelisiano. A te mauaga o te kilokiloga tonu e uiga ki te iloga faka-Kelisiano e fakavae eiloa ki luga i tulaga amio‵tonu o Ieova mo mea kolā e manako a ia ke fai ne tatou. E mafai o maua ne tatou te mea tenā, me i a tatou ne faite ne ia ki ona foliga. (Kenese 1:26; Mika 6:8) E fakatusa ne te Tusi Tapu a te ‵tou iloga faka-Kelisiano ki ‵tou gatu, kolā e lavea ne tino katoa. E uiga loa ki ‵tou taimi nei, ne fai mai a Iesu: “Faka‵logo mai! Au e vau pelā mo se tino kaisoa! Amutia a ia telā e ala faeloa kae tausi faka‵lei ona gatu, ko te mea ke mo a e fano sāle fuafua, ko masiasi ei a ia i mua o tino manafai e oko mai au!”a (Fakaasiga 16:15) E se ma‵nako tatou o tapale keatea a ‵tou uiga mo ‵tou tulaga faka-Kelisiano i mea tau amioga ko te mea ke takitaki ‵se tatou ne te lalolagi a Satani. Kafai e tupu te mea tenā ka seai i ei ne ‵tou “gatu.” A te mea tenā se mea fakafanoanoa kae fakamasiasi ‵ki eiloa.

5, 6. Kaia e tāua ei te fakatumauga o te malosi faka-te-agaga?

⁵ A te mauaga o se iloga faka-Kelisiano malosi ‵lei e pokotia malosi i ei te auala e ola ei te tino. E pefea la? Kafai e galo i se tino tapuaki ki a Ieova a tena iloga, e mafai o sē saga tonu atu, ko seai foki ne ana fakamoemoega mautinoa. E polopoloki fakafia mai a te Tusi Tapu ke fakaeteete i uiga fakalotolotolua penā. E polopoloki mai te soko ko Iakopo: “so se tino e fakalotolotolua, e ‵pau eiloa a ia mo se peau o te moana, e ave sāle kae fepeipeiaki ne te matagi. Ko te vaegā tino penā, ke sē ‵tau eiloa mo ia o mafaufau pelā me ka maua ne ia se mea e tasi mai i te Aliki, i te mea i a ia e fakalotolotolua, kae sē toka tona mafaufau i ana faifaiga katoa.”​—Iakopo 1:​6-8; Efeso 4:14; Epelu 13:9.

⁶ E puipui pefea ne tatou te ‵tou iloga faka-Kelisiano? Ne a mea e fesoasoani mai ke iloa faeloa ne tatou te ‵tou tauliaga lasi ‵ki ke fai pelā me ne tino tapuaki a te ‵Toe Tino Maluga? Ke na onoono aka ki auala konei.

Ke Faka‵mautakitaki Tou Iloga Faka-Kelisiano

7. Kaia e ‵lei ei ke fakamolemole atu ki a Ieova ke sukesuke aka ne ia tatou?

⁷ Ke fakamautinoa aka faeloa tou fesokotakiga mo Ieova. A te ‵toe kope tāua e maua ne se Kelisiano ko tena fesokotakiga totino mo te Atua. (Salamo 25:14; Faataoto 3:32) Kafai ko kamata o fakalotolotolua tatou e uiga ki ‵tou iloga faka-Kelisiano, e ‵tau o iloilo faka‵lei aka te ‵lei mo te ‵poko o te fesokotakiga tenā. Ne fakamolemole atu te faisalamo: “Te Aliki, sukesuke mai kae tofotofo mai toku loto; fakamasino mai oku manakoga mo oku mafaufauga.” (Salamo 26:2) Kaia e tāua ei te vaegā sukesukega tenā? Me e se fakatuagagina a ‵tou sukesukega e uiga ki te ‵loto o ‵tou lagonaga mo manakoga totino. Ko Ieova fua e mafai o iloa ne ia a mea i ‵tou ‵kano loto​—ko ‵tou manakoga, mafaufauga mo lagonaga.​—Ielemia 17:​9, 10.

8. (a) E aogā pefea ki a tatou māfai ko tofotofo tatou ne Ieova? (e) Ne fesoasoani atu pefea ki a koe ke gasolo ki mua e pelā me se Kelisiano?

⁸ Mai te fakamolemole atu ki a Ieova ke sukesuke aka tatou, e ‵kami ne tatou a ia ke tofotofo aka ne ia tatou. E mafai o talia ne ia ke ‵tupu a nisi mea kolā e fakaasi mai i ei a ‵tou lagonaga ‵tonu mo mea i loto i ‵tou ‵kano loto. (Epelu 4:​12, 13; Iakopo 1:​22-25) E ‵tau o talia ne tatou a vaegā tofotofoga penā, me e tuku mai i ei se avanoaga ke fakaasi atu ne tatou te ‵poko o ‵tou fakamaoni ki a Ieova. Ko mafai ei o iloa ne tatou me e mata, e “‵lei kae katoatoa foki [tatou], ke seai se mea e tasi e ma‵tiva ei [tatou].” (Iakopo 1:​2-4) Kae, e mata, e mafai o ga‵solo tatou ki mua i te feitu faka-te-agaga.​—Efeso 4:​22-24.

9. Kaia e ‵tau ei o fakatalitonu ne tatou ki a tatou eiloa a te ‵tonu o mea kolā e akoako mai ne te Tusi Tapu ki a tatou? Fakamatala mai.

⁹ Ke fakatalitonu atu ki a koe te munatonu mai te Tusi Tapu. E mafai o vāivāi te ‵tou kilokiloga ki te ‵tou iloga e pelā me ne tavini a Ieova māfai e se fakavae tonu ki luga i te iloaga mai te Tusi Tapu. (Filipi 1:​9, 10) E ‵tau mo Kelisiano katoa​—talavou io me ko tino ma‵tua​—o tali‵tonu tonu me i mea kolā e tali‵tonu latou ki ei ko te munatonu eiloa telā e maua i te Tusi Tapu. Ne fakamalosi atu a Paulo ki taina tali‵tonu: “E ‵tau o iloa ne koutou te kesekesega o te masei mo te ‵lei, kae puke ‵mautakitaki ki te mea ‵lei.” (1 Tesalonia 5:21) E ‵tau o iloa ne talavou Kelisiano i loto i kāiga kolā e ma‵taku ki te Atua, me e se mafai o fakalagolago fua latou ki luga i talitonuga o olotou mātua. Ne fakamalosi atu te tamana o Solomona ko Tavita ki a ia “ke iloa io me talitonu koe ki te Atua o tou tamana, kae tavini atu ki a ia mo tou loto kātoa.” (1 Nofoaiga Tupu 28:9) Ne seki lava fua i te maimoa atu o Solomona ki te auala ne ati aka ei ne tena tamana a tena fakatuanaki ki a Ieova. Ne ‵tau eiloa o iloa faka‵lei ne ia a Ieova mō tena ‵lei eiloa, kae ne fai eiloa a ia penā. Ne fakamolemole atu a ia ki te Atua: “Tuku mai ki a au a te poto mo te atamai ke mafai ne au o takitaki latou.”​—2 Nofoaiga Tupu 1:10.

10. Kaia e se masei ei ke ‵sili atu a fesili kolā e fai atu mo te lagonaga tonu?

¹⁰ E fakavae te malosi o te fakatuanaki ki au mea e iloa. “A te fakatuanaki e maua mai i te lagona io me ko mea e lagona,” ko pati a Paulo. (Loma 10:17) Se a te uiga o ana pati konā? E fakauiga a ia me mai te ‵kai faeloa ki te Muna a te Atua, e ati aka i ei te ‵tou fakatuanaki mo te ‵tou loto tali‵tonu ki a Ieova, ana fuafuaga mo tena fakapotopotoga. Mai te fakamaoni o ‵sili atu a fesili e uiga ki mea e fia iloa ne koe i te Tusi Tapu e mafai o maua mai i ei a tali fakamalie loto. E se gata i ei, e maua ne tatou i te Loma 12:2 a te fautuaga a Paulo: “Ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” E mafai pefea o fai ne tatou te mea tenā? Mai te mauaga o te “iloa tonu o te mea tonu.” (Tito 1:1) E fesoasoani mai a te agaga o Ieova ke mafai o malamalama tatou i ei, ke oko ki mataupu faiga‵ta. (1 Kolinito 2:​11, 12) E ‵tau o ‵talo tatou mō te fesoasoani o te Atua māfai e se malamalama tatou i se mea. (Salamo 119:​10, 11, 27) E manako Ieova ke malamalama tatou i tena Muna, ke tali‵tonu kae faka‵logo foki ki ei. E talia ne ia a fesili kolā e fai atu ki a ia mo te lagonaga tonu.

Taumafai Malosi o Fakafiafia te Atua

11. (a) Se a te manakoga masani e fai i ei ke ‵to atu tatou ki se malei? (e) E ati aka pefea ne tatou a te loto malosi o ‵teke atu a fakamalosiga mai taugasoa?

¹¹ Ke fakafiafia atu ki te Atua, kae sē ko tino. Se mea masani ke fakamautinoa aka te ‵tou iloga mai te fai mo fai se vaega o se potukau. E ma‵nako a tino katoa ki taugasoa, kae e fia‵fia tatou māfai e isi ne tino e fiafai taugasoa ki a tatou. I te taimi koi talavou ei​—ke oko foki ki te taimi ko matua ei​—e mafai o ma‵losi ‵ki a fakamalosiga mai taugasoa, ke fakaakoako io me fakafiafia atu ki nisi tino. Kae e se fia ‵saga faeloa mai a ‵tou taugasoa ki mea e ‵lei ei tatou. I nisi taimi, e manako fua ki se tino ke kau mo ia i te faiga o se mea masei. (Faataoto 1:​11-19) Kafai ko tō atu se Kelisiano ki se fakamalosiga masei penā, e masani sāle o ‵funa ne ia tena iloga. (Salamo 26:4) “Ke sē amio fakatasi koutou mo te lalolagi nei,” ko pati polopoloki a te apositolo ko Paulo. (Loma 12:2) E tuku mai ne Ieova te malosi i loto telā e manakogina ke ‵teke atu ei ki fakaosoosoga mai tua ke tautali atu i ei.​—Epelu 13:6.

12. Se a te fakatakitakiga mo te fakaakoakoga e mafai o fakamalosi mai ke fakatumau te ‵tou tulaga māfai ko tofotofogina te ‵tou fakamaoni ki te Atua?

¹² Kafai ko fakamatakutaku mai a fakamalosiga mai tua ki te ‵tou iloga faka-Kelisiano, e ‵tau o masaua ne tatou me e tāua fakafia atu te ‵tou tumau i te fakamaoni ki te Atua i lō te kilokiloga masani a te tokoukega o tino. E fai a pati i te Esoto 23:2 e pelā me se puipuiga: “Sa tautali i te tokoukega kolā e fai mea ‵se.” I te taimi ne fakalotolotolua ei a tino Isalaelu e uiga ki te mafai ne Ieova o fakataunu ana fuafuaga, ne ita fitifiti a Kalepo ma tautali atu i te tokoukega o tino. Ne mautinoa i a ia me e fakatuagagina a folafolaga a te Atua, kae ne maua ne ia se taui lasi ona ko tena tulaga tenā. (Numela 13:30; Iosua 14:​6-​11) E mata, e fiafia foki koe o ‵teke atu a fakaosoosoga mai talitonuga o te tokoukega o tino ko te mea ke puipui ei tou fesokotakiga mo te Atua?

13. Kaia e fai ei mo fai se mea poto ke fakailoa atu te ‵tou iloga e pelā me ne Kelisiano?

¹³ Fakailoa atu tou iloga faka-Kelisiano. A te tugāpati me i te puipuiga ‵lei ko te saga fakavave atu ki ei, se mea tonu māfai e ma‵nako tatou o puipui te ‵tou iloga faka-Kelisiano. I te taimi ne ‵teke atu ei ki a latou ona ko te faiga o te loto o Ieova i aso o Esela, ne fai mai ei a tino Isalaelu fakamaoni: “A matou ko tavini a te Atua o te lagi mo te lalolagi.” (Esela 5:11) Kafai e pokotia tatou i faifaiga mo fakamaseiga a tino ma‵sei, e mafai o ‵mate tatou i te ma‵taku. A te taumafai o fakafiafia atu ki tino katoa, ka fakavāivāi mai eiloa ki te ‵tou malosi e uiga ki te ‵tou iloga. Tela la, ke mo a ma ma‵taku koutou. Se mea ‵lei ke fakaasi manino atu ki nisi tino i a koe se Molimau a Ieova. I se auala āva kae mautinoa, e mafai o fakamatala atu ne koe a mea kolā e fakatāua ne koe, ou talitonuga mo tou tulaga e pelā me se Kelisiano. Fakailoa atu ki nisi tino me ko oti ne fakaiku aka ne koe ke tausi atu ki tulaga ma‵luga o Ieova i mea tau amioga. Ke fakamaina atu foki me e se mafai o gutugutulua koe ki tou tulaga fakamaoni e pelā me se Kelisiano. Ke fakaasi atu me e fakamatamata loa koe ki ou tulaga ‵ma i mea tau amioga. (Salamo 64:10) A tou tulaga tu ‵kese e pelā me se Kelisiano e fakamalosi atu ki a koe, e puipui ei koe, kae e fai foki i ei ke fia ‵sala atu a nisi tino ki a Ieova mo ana tino.

14. E mata, e ‵tau o loto vāi‵vāi tatou i pati fakatauemu mo ‵tekemaiga? Fakamatala mai.

¹⁴ E tonu, e mafai o fakatauemu io me ‵teke atu a nisi tino ki a koe. (Iuta 18) Kafai e se fia amanaia atu a nisi tino ki au fakamatalaga e uiga ki mea kolā e fakatāua ne koe, ke mo a eiloa ma loto vāivāi koe. (Esekielu 3:​7, 8) Faitalia te uke o au taumafaiga, e se mafai eiloa o tali‵tonu ki a koe a tino kolā e se ma‵nako ke tali‵tonu latou. Ke masaua a Falao. E seai ne mala io me se vavega​—ke oko foki eiloa ki te mate o tena ulumatua​—ne mafai o fakatalitonu atu ki a Falao me ne sui ne Mose a Ieova. Tela la, ke sē talia ne koe te mataku ki tino ke fakavāivāi atu ki a koe. A te talitonu mo te fakatuanaki ki te Atua e fesoasoani mai ke sē taka‵vale tatou i te ma‵taku.​—Faataoto 3:​5, 6; 29:25.

Tauloto Mai Mea ne ‵Tupu, ke Fakatoka ei mō Aso Mai Mua

15, 16. (a) Se a te ‵tou tauliaga faka-te-agaga? (e) E maua pefea ne tatou a mea aogā mai te fakaaogāga o te Muna a te Atua ke mafaufau ‵loto e uiga ki te ‵tou tauliaga faka-te-agaga?

¹⁵ Ke fakatāua tou tauliaga faka-te-agaga. Mai te fakaaogāga o te Muna a te Atua, ka maua ne Kelisiano a mea aogā mai te mafaufau ‵loto ki te lotou tauliaga lasi ‵ki faka-te-agaga. E aofia i te lotou tauliaga a te munatonu mai te Muna a Ieova, te fakamoemoega mō te ola se-gata-mai, mo te lotou tulaga taulia ke sui ne latou a te Atua i te folafolaatuga o te tala ‵lei. E mata, e lavea ne koe tou tulaga totino i loto i ana Molimau, ko te potukau taulia o tino kolā ko oti ne filifili ne ia ke fai ne latou te galuega fakaola tino ko te talaiatuga o te Malo? Ke masaua me ko Ieova eiloa telā ne fai mai: “Koutou ko aku molimau.”​—Isaia 43:10.

¹⁶ E mafai o fesili ifo koe ki a koe eiloa: ‘E pefea te tāua o te tauliaga faka-te-agaga tenei ki a au? E mata, e lava tena tāua ke fai te loto o te Atua mo fai te ‵toe mea tāua i toku olaga? E mata, e lava te malosi o toku loto fakafetai ke fakamalosi ei au o ‵teke atu a fakaosoosoga kolā e mafai o galo ei te mea tenā?’ E mafai foki ne ‵tou tauliaga faka-te-agaga o faka‵goto ki loto i a tatou se talitonuga mautinoa e uiga ki se puipuiga ‵lei i te feitu faka-te-agaga telā e maua fua i loto i te fakapotopotoga a Ieova. (Salamo 91:​1, 2) A te mafaufau faeloa ki tala e uiga ki te fakapotopotoga a Ieova i aso nei e fakamasaua mai i ei ki a tatou me e seai se tino io me se mea e mafai o fakaseai katoatoa ne ia a tino o Ieova mai te lalolagi nei.​—Isaia 54:17; Ielemia 1:19.

17. Ne a nisi mea e manakogina i tafa o te fakalagolago fua ki te ‵tou tauliaga faka-te-agaga?

¹⁷ E tonu, e se mafai o fakalagolago katoatoa tatou ki ‵tou tauliaga faka-te-agaga. E ‵tau mo tatou taki tokotasi o ati aka se fesokotakiga ‵pili mo te Atua. Ne tusi atu a Paulo ki Kelisiano i Filipi mai tua o ana galuega e uke ne fai, ke fakamalosi aka ei te lotou fakatuanaki: “Tenei la e taugasoa pele, e pelā mo te otou faka‵logo mai ki a au i aso ne fakatasi ei tatou, se mea e ‵tau ‵ki ke faka‵logo mai koutou ki a au, ka koi galo au mai i a koutou. Ga‵lue mo te mataku mo te polepole, ko te mea ke katoatoa te otou fakaolataga.” (Filipi 2:12) E se mafai o fakalago‵lago tatou ki se isi tino e uiga ki te ‵tou fakaolataga.

18. E fakamalosi aka pefea ne galuega faka-Kelisiano a ‵tou kilokiloga ki te ‵tou iloga faka-Kelisiano?

¹⁸ Ke galue malosi faeloa i galuega faka-Kelisiano. Ko oti ne iloa aka me i te “galue malosi e lasi tena tusaga i te faiga o te iloga o te tino.” Ko oti ne tuku atu ki Kelisiano i aso nei a te tiute ke fai te galuega tāua ko te talaiatuga o te tala ‵lei o te Malo o te Atua telā ko oti ne fakatu aka. E fai mai a Paulo: “Au se apositolo mo tino o fenua fakaa‵tea, kae fakamatamata faeloa au ki taku galuega.” (Loma 11:13) E fai ne te ‵tou galuega talai ke ‵tu ‵kese tatou mai te lalolagi, kae ko te ‵tou ‵kau atu ki ei se vaega lasi eiloa o te ‵tou iloga faka-Kelisiano. A te aofia malosi o tatou i nisi galuega faka-Kelisiano, e pelā mo fakatasiga faka-Kelisiano, te faitega o koga tapuaki, te fesoasoani atu ki tino fakaa‵lofa mo nisi mea aka penā, e mafai o faka‵loto aka ei te ‵tou kilokiloga ki te ‵tou iloga e pelā me ne Kelisiano.​—Kalatia 6:​9, 10; Epelu 10:​23, 24.

Se Iloga Manino, e Maua i ei a Fakamanuiaga Mautinoa

19, 20. (a) Ne a mea aogā ko oti ne maua ne koe mai te fai e pelā me se Kelisiano? (e) Ne a mea e tuku mai i ei se fakavae mō te ‵tou iloga tonu?

¹⁹ Ke mafaufau malie aka ki mea aogā mo avanoaga e uke ko maua nei ne tatou ona ko ‵tou fai e pelā me ne Kelisiano ‵tonu. E maua ne tatou te tauliaga totino ke iloa tatou ne Ieova. E fai mai te pelofeta ko Malaki: “Ka ko latou kolā e ma‵taku ki te Aliki ne sau‵tala i a latou eiloa, ka ko te Aliki ne lagona ne ia olotou pati. E isi se tusi i ona mua telā e tusi i ei a igoa o tino kolā e ma‵taku kae āva ki te Aliki.” (Malaki 3:16) E mafai o kilo mai a te Atua ki a tatou e pelā me ko ana taugasoa. (Iakopo 2:23) E malamalama ‵lei tatou i te pogai e ola ei tatou mo fakamoemoega mautinoa ke kausaki atu ki ei. Kae ko oti foki ne fakailoa mai ki a tatou a te fakamoemoega ke ola ki te se-gata-mai i aso mai mua.​—Salamo 37:9.

²⁰ Ke masaua me e fakalagolago a tou iloga tonu mo tou aogā totino ki te fua a te Atua, kae e se ki te kilokiloga a tino ki a koe. E mafai o fua aka a tatou ne nisi tino ki olotou fua sē ‵lei katoatoa. Kae ko te alofa o te Atua mo tena amanaia tonu mai e tuku mai i ei se fakavae ke fua aka ei te ‵tou aogā​—e o ia a tatou. (Mataio 10:​29-31) E se gata i ei, a ‵tou a‵lofa ki te Atua ka maua ei ne tatou te ‵toe kilokiloga lasi eiloa e uiga ki te ‵tou iloga mo te manino ‵lei o te auala e ola ei tatou. “Ko te tino telā e alofa ki te Atua, e iloa a ia ne te Atua.”​—1 Kolinito 8:3.

[Fakamatalaga mai lalo]

Koi Masaua ne Koe?

• Kaia e tāua ei ke puipui ne Kelisiano te lotou iloga faka-te-agaga?

• E fakatumautakitaki pefea ne tatou a ‵tou iloga faka-Kelisiano?

• Kafai e ‵tau o filifili aka te tino e ‵tau o fakafiafia ne tatou, ne a mea e fesoasoani mai ke fai ne tatou se filifiliga tonu?

• E mafai pefea ne se iloga malosi ‵lei o fai ke maua ne tatou se tulaga ‵lei i aso mai mua e pelā me ne Kelisiano?