Fesili Mai te Kau Fai‵tau

E mata, e mafai o pokotia te vā fakataugasoa o se tino mo Ieova mai te tafao i tafaoga fakasauā i komupiuta?

“Ka sukesuke ne te Aliki a tino ‵lei mo tino amio ma‵sei,” ko pati a te tupu ko Tavita i Isalaelu i aso mua, “a tena loto katoatoa e se fiafia io me takalialia ‵ki ki tino ofa tulafono io me amio fakasauā.” (Salamo 11:⁠5) A te pati Epelu mua telā ne ‵fuli ki te “takalialia” e mafai o fakauiga ki se tino telā ko oti ne fai mo fai “sou fili.” Telā la, so se tino telā e fiafia ki amioga fakasauā e fai ne ia a ia eiloa mo fai se fili o te Atua. A te fesili la telā e ‵tau o mafau‵fau tatou ki ei, tenei: E mata, e mafai o fai a nisi tafaoga i komupiuta ke ‵toki i ei te fiafia ki faifaiga fakasauā i loto i a koe?

E fakamalosi aka i tafaoga i komupiuta a te fakaaogāga o meatau. E masani o akoako atu i ei ki te tino tafao a mea e uiga ki taua. E fai mai te mekesini ko The Economist: “E fakalagolago malosi eiloa a te kautau o Amelika ki tafaoga i komupiuta ke akoako ei latou. A nisi tafaoga kolā e fakaaogā ne latou, ne ‵togi mai fua i sitoa.”

E tonu, e se fakalogo‵mae tonu atu a tino kolā e ta‵fao i tafaoga i komupiuta, ki tino. Kae se a te mea e fakaasi mai i vaegā fakafiafiaga penei e uiga ki mea kolā e mafai o oko atu ki olotou loto? (Mataio 5:​21, 22; Luka 6:45) Se a tau faka‵tau ki se tino telā e fiafia o ‵suki, fana, ta fakamasei kae tamate ne ia a tino i loto i tafaoga i komupiuta? Kae pefea la māfai e fakamāumau ne te tino tenei a itula e uke ke fakamalie aka ei ana manakoga fakasauā, kae ko kamata o umiti ki vaegā tafaoga penā? Kāti ko leva ne fakaiku aka ne koe, me e fakamalosi aka ne ia a te fiafia ki faifaiga fakasauā, e pelā eiloa mo se tino telā e onoono ki ata ma‵sei e fakamalosi aka ne ia a uiga finalalolagi i a ia.​—⁠Mataio 5:​27-29.

E pefea te lasi o te takalialia o Ieova ki se tino telā e fiafia ki faifaiga fakasauā? E fai mai a Tavita me i a Ieova e “takalialia ‵ki” eiloa ki te tino tenā. Ne fakaasi atu ne Ieova a te lasi o tena takalialia ki tino fakasauā i aso o Noa. Ne fai atu a Ieova ki a Noa: “Ko tonu i a au me ka ‵solo faka‵ma a tino ola katoa. Ka ‵ta fakapalele ne au latou, me i te lalolagi ko ‵fonu i olotou amioga fakasauā.” (Kenese 6:13) Ne fakaseai ne te Atua tonu se lalolagi kātoa o tino ona ko te lotou fia‵fia ki faifaiga fakasauā. Ne faka‵sao fua ne ia a Noa mo tena kāiga​—⁠ko tino e tokovalu kolā ne seki fia‵fia ki faifaiga fakasauā.​—⁠2 Petelu 2:⁠5.

A tino kolā e fiafai taugasoa mo Ieova e “tuki ne latou olotou pelu ke fai mo mea fakamalū laukele ka ko olotou tao ke fai mo naifi ‵vele vao.” I lō te tauloto ke fia‵fia ki faifaiga fakasauā, e se ‘tauloto eiloa latou ki mea e uiga ki taua.’ (Isaia 2:⁠4) Ke tumau i te faiga e pelā me se taugasoa o Ieova i lō te fai mo fai sena fili, e ‵tau mo tatou o “‵fuli keatea mai te masei, kae fai te mea ‵lei.” E ‵tau mo tatou o “salasala te filemu kae taofi ‵mau ki ei.”​—⁠1 Petelu 3:⁠11.

Kae pefea lā māfai ko oti ne ta‵fao sāle tatou i tafaoga fakasauā i vitiō? Ko tena uiga e ‵tau o na fakaiku aka ne tatou ke fakafiafia atu ki a Ieova mai te se toe fai a mea kolā e takalialia a ia ki ei. E ‵tau eiloa o ‵talo tatou mō te fesoasoani o te agaga tapu o te Atua ke fakagata aka te uiga fakamasei tenā i a tatou. E mafai o fakagata ne tatou te uiga tenā, māfai e talia ne tatou a uiga e pelā mo te filemu, te ‵lei mo te loto pulea ke takitaki ei ‵tou olaga.​—⁠Luka 11:13; Kalatia 5:​22, 23.