E Mata, e Mafai o Saoloto te Lalolagi Mai Amioga Fakasaua?
E mata, e pokotia koe io me ko tino i tou kāiga i amioga fakasaua? E mata, e isi se pogai e mataku ei koe māfai ko pokotia koe i ei? Ko oti ne fai a amioga fakasaua e pelā me se “masaki telā ko ‵pisi valevale i te lalolagi kātoa.” Ke na onoono aka nei ki nisi fakaakoakoga.
AMIOGA FAKASAUA I KĀIGA MO FAIFAIGA FAKATAUAVAGA: “E tokotasi mai se tokotolu o fafine ko oti ne pokotia i amioga fakasaua mo faifaiga fakatauavaga kāti mai se tino telā pili ‵ki ki a ia,” ko te lipoti mai te Malo Soko. Se mea fakafanoanoa, “me i te lalolagi kātoa, e fakatautau pelā me nofo ki se tokotasi mai se tokolima o fafine ka pokotia i faifaiga pukemalō io me ko taumafaiga ke pukemalō.”
AMIOGA FAKASAUA I AUALA: E lipoti mai me ko silia atu mo te 30,000 o potukau fakasaua ko salalau atu nei i Amelika. I Latina Amelika, e nofo ki te 1 mai se 3 o tino e lipoti faeloa me e pokotia ona ko amioga fakasaua.
TATINO: E tuku taumate pelā me toeitiiti ko kātoa se āfa miliona o tino ne tamate i se tausaga fakamuli nei, ko silia atu mo te aofaki o tino kolā ne tamate i taua. A Afelika ki Saute mo Amelika ki te kogāloto ko toe koga kolā e lasi ei te aofaki o tino kolā ne tamate, e silia mo te fakafa taimi māfai e fakatusa ki te aofaki o tino i te lalolagi. E silia atu mo te 100,000 o tino ne tamate i Latina Amelika i se tausaga e tasi, kae e silia atu mo te 50,000 i Pasili fua. E mata, e mafai o isi se faka‵leiga ki amioga fakasaua konei?
E MATA, E MAFAI O FAKAGATA AKA A AMIOGA FAKASAUA?
Kaia ko salalau valevale atu i ei a amioga fakasaua? E uke a pogai kolā ko oti ne fakamaoni aka, e aofia i ei a mea konei: te lasi o te manavase telā e māfua mai i te kese‵kesega o koga ne ‵tupu mai ei a tino e pelā foki mo tulaga i mea tau tupe, ‵kilo fakatakalialia atu ki olaga o nisi tino, te fakaaoga ‵se o te kava mo vailakau tapu, te tuku faka‵sau atu o tama‵liki ki amioga fakasaua e fai ne tino ma‵tua, mo te manatu me e seai se fakasalaga ki tino kolā e amio fakasaua.
E manino ‵lei, me ko oti ne fai a taumafaiga ke fakamu‵tana aka a amioga fakasaua i nisi feitu o te lalolagi. I te fa‵kai o São Paulo, Pasili, ne lavea atu i te lipoti a te fanaifo ki te 80 pasene o te tatino i te sefulu tausaga ko ‵teka. Kae koi lauiloa eiloa a vaegā amioga fakasaua katoa i te fa‵kai tenā, kae ko te aofaki o tino kolā ne tamate e nofo ki te 10 tino mai te 100,000 o tino i te fa‵kai. Tela la, se a te mea ka fai ke fakagata katoatoa atu i ei a amioga fakasaua?
A te faka‵leiga katoatoa ki amioga fakasaua e aofia i ei a tino—olotou kilokiloga mo amioga. Ke ‵fuli a tino amio fakasaua, e ‵tau o sui ne te alofa, te āva mo te atafai ki nisi tino a uiga e pelā mo te fakamatamata, fia sili, kaimanako mo te kaiu.
Se a te mea e mafai o fakamalosi ne ia se tino ke fai ne ia a ‵fuliga ‵lasi konā? Mafaufau la ki te mea telā e akoako mai i te Tusi Tapu:
“Tenei eiloa te uiga o te alofa ki te Atua, ko te faka‵logo ki ana fakatonuga.”a—1 Ioane 5:3.
“A te āva ki te Aliki ko te takalialia ki te masei.”—Faataoto 8:13.
A te alofa ki te Atua mo te āva io me mataku ma fakafanoanoa ne tatou a ia ne fakamalosiga tāua ‵ki me e mafai o fesoasoani mai ke ‵fuli a olaga o tino kolā e amio fakasaua—e se i se auala fakavave, kae ki te taimi telā e ‵fuli katoatoa i ei olotou uiga totino. E mata, e mafai eiloa o tupu te mea tenei?
Mafaufau la ki a Alex,b telā ne nofo atu i te falepuipui i Pasili mō se 19 tausaga ona ko amioga fakasaua. Ne fai a ia mo fai se Molimau a Ieova i te tausaga e 2000, mai tua o te sukesukega mo Molimau ki te Tusi Tapu. E mata, ne ‵fuli eiloa ana amioga fakasaua? E tonu, ne salamō eiloa a Alex ona ko mea ma‵sei katoa kolā ne fai ne ia. Ne fai mai a ia, “Kae, ko kamata nei au o alofa ki te Atua ona ko tena fakamagaloga. Ne fesoasoani mai a te loto fakafetai mo te alofa ki a Ieova ke ‵fuli aku faifaiga.”
A César, telā e nofo foki i Pasili, ne fakaaoga ne ia a meatau ke kaisoa. Tenā eiloa te vaegā olaga ne ola ei a ia mō se 15 tausaga. Se a te mea ne fai ei ke ‵fuli a ia? A koi nofo atu a ia i te falepuipui, ne fesokotaki a ia mo Molimau a Ieova, kae ne sukesuke foki a ia ki te Tusi Tapu. E fakamatala mai a César, penei: “Fatoā maua ne au se fakamoemoega tonu i te olaga. Ne kamata o tauloto au ke alofa ki te Atua. Ne kamata foki au o mataku ki a ia—ko te mataku ke mo a ma toe foki au o fai a te mea masei kae fai ei ke fanoanoa a Ieova. Ne manako au o fakaasi atu te loto fakafetai mō tena atafai. Tela la, ne fakamalosi aka au ne te alofa mo te mataku ke ‵fuli toku olaga.”
Ke tauloto ki te auala e mafai ei koe o ola i se lalolagi telā e saoloto mai i amioga fakasauā
Se a te mea ko lavea ne tatou e uiga ki tala konei? E isi se malosi o te Tusi Tapu ke ‵fuli ne ia a olaga o tino i se auala lasi ‵ki—te ‵fuliga o te auala e mafau‵fau ei latou. (Efeso 4:23) Ne toe fai mai a Alex, telā ne taku atu muamua, penei: “A mea kolā ne tauloto ne au mai te Tusi Tapu e fai eiloa e pelā me se vai ‵ma telā e ‵ligi mai ki luga i a au, kae faka‵ma malielie ne ia oku mafaufauga ma‵sei. Konei a mea kolā ne seki mafaufau au me ka mafai o tapale keatea mai i a au.” Ao kafai e faka‵fonu ‵tou mafaufau ki te fekau ‵ma mai te Tusi Tapu, e mafai eiloa o tapale io me ‵fulu faka‵ma ne ia te masei i loto i a tatou. A te Muna a te Atua e isi sena malosi o faka‵ma a mea. (Efeso 5:26) A ko te ikuga, a tino ma‵sei kae kaima‵nako e mafai eiloa o ‵fuli olotou olaga, mai te fai pelā me ne tino atafai kae filemu. (Loma 12:18) E maua ne latou a te filemu i olotou olaga mai te fakagalue aka ne latou a fakatakitakiga i te Tusi Tapu.—Isaia 48:18.
Ko silia atu nei mo te valu miliona o Molimau a Ieova i fenua e 240 ko oti ne iloa ne latou a te kī ki fakaseaiga katoatoa o amioga fakasaua. A tino mai telega mo itukāiga katoa ko oti ne kamata o tauloto ke a‵lofa kae ma‵taku ki te Atua kae ke alofa foki te suā tino ki te suā tino, kae ola i se olaga filemu e pelā me se kaukāiga i te lalolagi kātoa. (1 Petelu 4:8) Ko fakamaoni nei ne latou me e mafai eiloa o saoloto te lalolagi mai amioga fakasaua.
KO PILI MAI TE LALOLAGI TELĀ E SAOLOTO MAI AMIOGA FAKASAUA!
E folafola mai te Tusi Tapu me ko pili o faka‵ma ne te Atua a te lalolagi amio fakasaua tenei. E fakatalitali eiloa a te lalolagi amio fakasaua i aso nei ki te “aso o te fakamasinoga” a te Atua telā “ka fakaseai atu ei a tino sē amioatua.” (2 Petelu 3:5-7) Ka seai ne tino amio fakasaua ke fakalogo‵mae ne latou a nisi tino. E mafai pefea o fakamautinoa aka ne tatou me i te Atua e manako o fakaseai atu ne ia a amioga fakasaua?
A te Atua e se “fiafia ki tino ofa tulafono,” ko pati a te Tusi Tapu. (Salamo 11:5) A te ‵tou Mafuaga e fiafia ki te filemu mo te fai mea tonu. (Salamo 33:5; 37:28) Tenā te pogai ka se toe talia ne ia a tino amio fakasaua ki te se-gata-mai.
Ao, ko pili mai nei te lalolagi o te filemu. (Salamo 37:11; 72:14) Kaia e se tauloto ne koe a mea e uke atu e uiga ki te auala e mafai ei o ola koe i se lalolagi telā e saoloto mai i amioga fakasaua?