Ke Maua a Mea Aogā Mai i te ‵Toe Akoakoga ‵Lei!

E FAKASINO atu te Tusi Tapu ki a Ieova te Atua e pelā me ko te Tino telā ne faite ne ia a mea katoa, e aofia i ei a tino. (Kenese 1:​27; Fakaasiga 4:​11) E pelā me ko te ‵Toe Faiakoga Sili, ne akoako ne ia te tauavaga muamua, ko Atamu mo Eva, kae ne fakatoka ne ia laua mō te lā olaga i te fatoaga gali i Etena. Ko tena fuafuaga eiloa ke tumau a ia i te akoako mo te tausi atu ki a laua ki te se-gata-mai. (Kenese 1:​28, 29; 2:​15-​17; Isaia 30:​20, 21) Mafaufau la ki te tulaga tenā!

Kae se mea fakafanoanoa me ne fakasēaogā ne te tauavaga muamua te tulaga kātoa tenā. Ne iku atu ei te lā sē faka‵logo ki te gasoloifoga o te malosi mo amioga ‵lei a tino. (Kenese 3:​17-​19; Loma 5:​12) E fai mai te Tusi Tapu e uiga ki tino kolā ne ola mai tua malie ifo o te kamataga o te olaga o tino: ‘Ne matea ne Ieova te amio ma‵sei o tino katoa i te lalolagi, mo te lai‵lai o olotou mafaufauga.’​​—⁠Kenese 6:⁠5.

Ko tai kātoa nei te 4,500 tausaga talu mai te taimi ne fakaiku aka ei ne Ieova me ko lai‵lai faeloa a mafaufauga o te tagata, kae ko sili atu nei te matagā o te tulaga o tino i lō aso mua. E tokouke eiloa a tino e ‵loi e aunoa mo se ‵mā, e kai‵soa, io me e fakasauā atu ki nisi tino. E momea aka faeloa te uke o fakalavelave i aso katoa, kae e gasolo ifo faeloa te amanaia o tino ki nisi tino. E a, e se ‵tu atu nei i se tulaga fakamataku a fesokotakiga totino, e aofia ei a tulaga i loto i kāiga? Kae e se ‵tau o ‵losi atu ki te Atua mō tulaga i aso nei, io me e se ‵tau foki o mafau‵fau tatou me ko se fia saga mai a ia ki fakalavelave i aso nei. E saga atu faeloa a Ieova ki te ‵lei o te olaga o tino, kae e toka a ia o akoako atu a latou kolā e ‵kilo atu ki a ia mō fakatakitakiga ke maua ei se olaga fiafia. I se 2,000 tausaga ko ‵teka, ne uga mai ei ne ia tena Tama, ko Iesu Keliso, ki te lalolagi ke fakaasi mai i ei Tena fiafia o akoako a tino kolā e ma‵nako ke maua ne latou se olaga manuia. Ne tuku mai ne Iesu se fakaakoakoga ‵lei katoatoa mō akoakoga me ne akoako eiloa a ia ne te ‵Toe Faiakoga Sili i te fia tiliona o tausaga.

Te Lotu Kelisiano Tonu​​—⁠Se Akoakoga

Ne fakatu ne Iesu Keliso te Lotu Kelisiano tonu, se vaegā olaga telā ne fakavae ki te alofa. Ne ‵tau o fetaui ‵lei a mafaufauga mo faifaiga katoa a tino i te Lotu Kelisiano mo te loto o te Atua, ke avatu ei a tavaega mo te tulaga fakaaloalo ki tena igoa. (Mataio 22:​37-​39; Epelu 10:⁠7) Ne ‵lago atu eiloa tena Tamana, ko Ieova, ki akoakoga a Iesu e uiga ki te vaegā olaga tenei. E fai‵tau tatou i te Ioane 8:​29 e uiga ki te fesoasoani ne maua ne Iesu mai te Atua: “Ka ko ia telā ne uga mai ne ia au, e ‵nofo tasi maua; me i te Tamana ne seki tuku mai ne ia au ke nofo tokotasi, me fai sāle eiloa ne au a mea kolā e fiafia a ia ki ei.” E tonu, ne ‵lago kae takitaki eiloa a Iesu ne tena Tamana i tena taviniga kātoa. Ne seki mafai o fakafesagai atu a soko muamua o Iesu ki mea faiga‵ta o te olaga e aunoa mo ne fakatakitakiga. Ne akoako ne Ieova a latou e auala i tena Tama. A te lotou tau‵tali atu ki akoakoga mo fakaakoakoga a Iesu ne fai ei latou mo fai ne tino tai ‵lei atu. E penā foki loa ana soko i aso nei.​​—⁠Ke onoono ki te pokisi “Fakamalosiga Mai i a Iesu mo Ana Akoakoga,” i te itulau e 6.

A te feitu manino e ‵kese ei te Lotu Kelisiano tonu me e aofia i ei a akoakoga kolā e oko ‵tonu atu ki te mafaufau mo te loto ko te mea ke ‵fuli ei a uiga o tino. (Efeso 4:​23, 24) Ke onoono ki se fakaakoakoga fua e tasi, mafaufau ki te mea ne akoako atu ne Iesu e uiga ki te fakamaoni o te tino ki tena avaga: “Ko oti foki ne lagona ne koutou me ne fai mai penei, ‘Sa mulilua.’ Kae fai atu au ki a koutou: so se tino e onoono atu ki se fafine kae manako ki ei tena loto, ko mulilua a ia i te loto.” (Mataio 5:​27, 28) Mai pati konei, ne akoako atu ei ne Iesu ki ana soko me e ‵tau o fakatumau te ‵mā o te loto me e mafai eiloa o iku atu a mafaufauga mo manakoga ma‵sei ki te faiga o agasala matagā, faitalia eiloa me e seki fai a agasala konā. E mata, e tonu eiloa me e mafai o iku atu a mafaufauga ma‵sei ki amioga kolā e se fiafia ki ei te Atua kae fakalogo‵mae atu ki nisi tino?

Telā la, e tuku mai i te Tusi Tapu a pati fakatonutonu konei: “Ke se amio fakatasi koutou mo te lalolagi nei, ka ke ‵fuli koutou i te fakafouga otou mafaufau, ko te mea ke fakatalitonu ne koutou me se a te loto o te Atua, te mea ‵lei, te mea e logomalie mo te gali.” (Loma 12:⁠2) Kāti ka fesili mai koe, ‘E mata, e mafai eiloa o fakafou te mafaufau e auala i akoakoga?’ A te fakafouga o te mafaufau e aofia i ei a te fakamalosiakaga i se auala ‵kese mai te faka‵fonuga ki fakatakitakiga mo akoakoga kolā e tuku mai i te Muna a te Atua. E mafai eiloa o fai te mea tenei mai te taliaga o akoakoga kolā e tuku mai ne te Atua e auala i tena Muna.

Ke Maua te Malosi o ‵Fuli

“Me i te muna a te Atua e ola kae galue mo te ‵mana.” (Epelu 4:​12) E aogā eiloa nei tena ‵mana ki tino taki tokotasi, telā e fakamaoni mai i ei me e se mafai o gata tena aogā. E mafai o tuku atu ne ia ki se tino te malosi ke ‵fuli ei ana amioga, kae puke ‵mau ki te Lotu Kelisiano tonu, kae fai ei mo fai se tino e ‵lei atu. E fakaasi mai i tala mai lalo nei a te tāua o akoakoga a te Tusi Tapu.

Ne fai mai a Emilia, telā ne taku mai i te mataupu muamua: “Ne seki lava fua i toku taumafai tokotasi o faka‵lei aka te tulaga i toku kāiga. I te taimi ne kamata ei au o suke‵suke ki te Tusi Tapu fakatasi mo Molimau a Ieova, ne iloa aka ei ne au me e isi se fakamoemoega kae ne kamata ei o ‵fuli taku kilokiloga. Ne iloa ne au o tai onosai aka kae ke mo a ma kaitaua. Fakamuli ifo, ne kau mai foki taku avaga ki te akoga. Ne seki faigofie ki a ia ke taofi aka tena inu kava, kae ne mafai eiloa o tiakina ne ia. Ne fai ei ke gali te kamataga o te mā olaga faka-te-kāiga. Nei la, ko fai maua mo Kelisiano fia‵fia kae ko akoako foki ne maua mā tama‵liki ki akoakoga ‵lei mai te Tusi Tapu.”​​—⁠Teutelonome 6:⁠7.

A akoakoga kolā e tuku mai i te Lotu Kelisiano tonu e mafai o fakasaoloto ei se tino mai i se olaga matagā kae masei. Ne iloa ne Manuelua te ‵tonu o te mea tenei. I te taimi ko 13 ei ana tausaga, ne tele keatea a ia mai tena kāiga kae kamata o ‵pusi maluana. Fakamuli ifo, kae ne fakaaogā foki ne ia a heroin. Ne aofia a ia i faifaiga fakatauavaga mo tāgata mo fāfine ko te mea ke mafai o maua i ei ana tupe mo se koga mo ana moe. Ne maua foki ne Manuelu ana tupe mai te ‵tāga o tino kae kaisoa olotou mea. Toeitiiti ko taimi katoa e nofo ei tou tagata mai lalo i te malosi o vailakau tapu. Ne ‵pei atu faeloa a ia ki te falepuipui ona ko ana amioga fakasauā. I te taimi e tasi, ne nofo atu a ia i te falepuipui i tausaga e fa, kae i konā foki eiloa ne kamata ei o aofia a ia i te fakatauatuga o meatau. Mai tua o tena fakaipoipoga, ne gasolo aka faeloa o masei atu te olaga o Manuelu. E fai mai a ia: “Ne iku atu eiloa ki te ‵nofo atu o maua i se fale telā ne fai muamua mo fai se pā moa. Koi masaua eiloa ne au te faiga ne taku avaga te kuka i luga i puliki. Ne masei ‵ki eiloa te mā olaga telā ne fakamalosi atu ei oku kāiga ‵tonu ki taku avaga ke na tiakina ne ia au.”

Se a te mea ne ‵fuli ei tena olaga? E tali mai a Manuelu: “Ne vau se taugasoa ki te mā fale o faipati mai e uiga ki te Tusi Tapu. Ne talia ne au tena āsiga ko te mea ke fakaasi atu fua ne au me e seai se Atua telā e fia saga mai ki tino. Ne mafaufau au me i toku olaga e fakamaoni atu ei te manatu tenā. Ne ofo malosi eiloa au me ne onosai kae āva mai te Molimau, telā ne talia ei ne au ke kau atu ki fakatasiga i te Kingdom Hall. E tiga eiloa e iloa ne nisi tino i konā toku olaga, ne fakatalofa mai latou mo te fia‵fia tonu. Ne fai ne latou au e pelā eiloa me se tokotasi o latou. Ne lasi ‵ki eiloa te fakamafanafanaga ne maua mai i te mea tenei. Ne otia toku loto telā ne fai ei taku fakaikuga ke se toe fakaaogā a vailakau tapu ko te mea ke ‵sala atu ki se galuega ‵lei. I te fa o masina mai tua o te kamataga o taku akoga faka-te-Tusi Tapu, ne talia ei ke kau atu au ki te galuega talai, kae i te fa o masina mai tua ifo i ei, ne papatiso ei au e pelā me se tokotasi o Molimau a Ieova.”

Se a te aogā o te Lotu Kelisiano tonu ki a Manuelu mo tena kāiga? “E aunoa mo akoakoga i te Tusi Tapu, e mautinoa eiloa me ko leva eiloa au ne mate i te fia o tausaga ko ‵teka. A te vaegā olaga telā ne akoako mai ne Iesu, ne mafai ei o toe nofo faka‵lei ei au mo toku kāiga. E se toe ‵tau o maua ne mā tama‵liki e tokolua a te vaegā olaga telā ne maua ne au e pelā me se talavou. Ko oko eiloa i toku fakamatamata mo toku loto fakafetai ki a Ieova mō te fesokotakiga ‵lei telā ko maua nei ne au mo taku avaga. Ko oti ne fakamālō mai a oku nisi taugasoa mua kae ne fai mai me e mafau‵fau latou i te auala ko fanatu au i ei nei, ko te ‵toe auala ‵lei eiloa.”

I te olaga faka-Kelisiano, e olo tasi faeloa a amioga ‵mā mo te ‵mā i te feitu faka-te-foitino. Ne kamata o malamalama i te mea tenā a Ioane, telā ne nofo atu i se koga mativa i Afelika ki Saute. E fakamatala mai tou tagata: “I nisi taimi, e se koukou te mā tamaliki fafine i se vaiaso kātoa, kae e seai se tino i a māua e fia saga ki ei.” E iloa ne tena avaga a te matagā o foliga o te lotou fale. Kae ona ko akoakoga faka-Kelisiano, ne ‵fuli ei a mea katoa. Ne seki toe kau atu a Ioane ki se potukau kai‵soa motokā kae ne kamata o saga malosi atu ki tena kāiga. “Ne tauloto ne matou me e pelā me ne Kelisiano, e ‵tau o tausi ‵tou foitino mo ‵tou gatu ke ‵ma. E ‵gali ‵ki a pati i te 1 Petelu 1:​16, kolā e fakamalosi mai ke tapu tatou me i a Ieova te Atua e tapu. Nei la, ko taumafai foki matou o fai te motou fale telā e sē na lo ko ‵lei ke ‵mā.”

E Mafai o Maua ne Koe a te ‵Toe Akoakoga ‵Lei

E se konā fua a tala kolā ne taku atu mai luga. Ona ko akoakoga kolā e fakavae ki te Tusi Tapu, ko oti ne iloa ne te fia afe o tino se olaga telā e ‵lei atu. Ona ko te lotou fakamaoni mo te ga‵lue malosi, e fakatāua malosi ne olotou pule a latou. Ko oti ne fai latou mo fai ne tuakoi mo taugasoa ‵lei, mai te lotou amanaia ki nisi tino. E fakaiku aka ne latou ke ‵teke atu ki manakoga faka-te-foitino kae matagā, ko te mea ke tausi faka‵lei atu ei ki te lotou malosi i te feitu faka-te-foitino, feitu tau te mafaufau, mo olotou lagonaga. I lō te fakamāumau olotou tupe ki mea sē aogā, ko fakaaogā nei ne latou ki mea e aogā ki a latou mo olotou kāiga. (1 Kolinito 6:​9-​11; Kolose 3:​18-​23) E aunoa mo te fakalotolotolua, a te ikuga o te fakagalue aka o mea kolā ne taku mai ne Ieova i te Tusi Tapu e fakaasi mai i ei me i te ola e ‵tusa mo te Lotu Kelisiano tonu ko te ‵toe auala ‵lei eiloa, me e tuku mai i ei a akoakoga tafasili i te ‵lei. E fai mai te Tusi Tapu e uiga ki se tino telā e ola e ‵tusa mo tulafono a te Atua: “E manuia foki i mea katoa e fai ne [ia].”​​—⁠Salamo 1:⁠3.

E fakamalosi loto ke iloa atu me i te Atua Malosi Katoatoa, ko Ieova, e loto fiafia o akoako ne ia tatou. E fai mai a ia e uiga ki a ia eiloa: “Au ko te Aliki [ko Ieova] te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei.” (Isaia 48:17) E tonu, ko oti ne fakaasi mai ne Ieova te olaga ‵lei e auala i fakaakoakoga mo akoakoga a tena Tama, ko Iesu Keliso. Ne ‵kese ‵ki te olaga o tino e tokouke kolā ne iloa ne latou a ia i tena nofoga i te lalolagi ona ko ana akoakoga, kae e penā foki a nisi tino e tokouke kolā e ola e ‵tusa mo ana akoakoga i aso nei. Kaia e se fakaaogā ei ne koe a taimi ke tauloto ki mea e uke atu e uiga ki akoakoga konei? Ka fia‵fia eiloa a Molimau a Ieova i tou fa‵kai o fesoasoani atu ke maua ne koe a vaegā akoakoga tāua penā.

[Fakamatalaga mai lalo]

[Posiki/Ata i te itulau e 6]

Fakamalosiga Mai i a Iesu mo Ana Akoakoga

Ona ko tena tulaga e pelā me ko te pule o tino ao lafoga, ne maumea ei a Sakaio mai te ‵taemaiga o tupe kae kaisoa foki ne ia a tupe mai tino o te fenua. Kae ne ‵fuli tena olaga mai te tautali atu ki akoakoga a Iesu.​​—⁠Luka 19:​1-​10.

Ne fakagata ne Saulo mai Taso tena fakasauā atu ki Kelisiano kae ne ‵fuli atu ki te Lotu Kelisiano, telā ne fai ei mo fai te apositolo ko Paulo.​​—⁠Galuega 22:​6-​21; Filipi 3:​4-9.

Ne aofia muamua a nisi Kelisiano i Kolinito i ‘amioga ma‵sei, ifo ki tupua, mulilua, amio fakasotoma, ‵faomea, amioga o te kaimanako, konā, fatufatu tino, mo te ofa tulafono.’ Kae ona ko te fakamasani ki te Lotu Kelisiano tonu, ne ‘faka‵ma ei latou, fakatapu, kae takuamiotonugina e alatu i te igoa o te Aliki ko Iesu Keliso.’​​—⁠1 Kolinito 6:​9-​11.

[Ata i te itulau e 7]

E mafai o fakaasi atu ne te Tusi Tapu a te auala ke manuia ei koe