Se a te Vaegā Akoakoga e Mafai o Manuia Koe i ei?

KAI logo‵fio aka eiloa koe ne taotaomaki ne fakalavelave e pelā mo koe māfai ko malemu i loto i se ava ‵miti? Mafaufau la ki te lasi o te logo‵mae telā e maua māfai ko fai ne koe se mea ‵se i te fakafesagai atu ki se fakalavelave e tasi io me e uke atu! E seai eiloa se tino e fanau mai mo te atamai ke faka‵lei ne ia a fakalavelave katoa mo te manuia, mai te faiga o fakaikuga ‵lei i taimi katoa. Tenā eiloa te pogai e manakogina ei a akoakoga. E maua ne koe i fea a akoakoga ke mafai ei ne koe o fakafesagai atu ki fakalavelave o te olaga?

E fakatāua malosi ne tino e tokouke, tama‵liki mo tino ma‵tua, a akoakoga ma‵luga. E fai mai foki a nisi tino ‵poto me e “tali‵tonu katoatoa latou me e se mafai eiloa o maua ne koe se galuega [‵lei] e aunoa mo se tikulī mai i se kolisi.” Kae e uke foki a manakoga o te tino telā e se mafai o fakama‵lie aka ne mea faka-te-foitino. E pelā mo akoakoga ma‵luga, e mata, e fesoasoani atu ke fai koe mo fai se mātua, se avaga, io me se taugasoa ‵lei? E tonu, a tino kolā e tavaegina ona ko olotou poto e mafai o maua ne latou a uiga sē ‵lei, e se manuia olotou olaga faka-te-kāiga, io me e iku atu fua ki te lotou faka‵mate.

E ‵kilo atu a nisi tino ki lotu mō se fakatakitakiga, se vaega o akoakoga, kae e fanoa‵noa latou ona ko te mea e se maua ne latou se fesoasoani aogā ke fakafesagai atu ei ki fakalavelave faiga‵ta o te olaga. Mafaufau la ki a Emiliaa mai Mekisiko, telā ne fai mai penei: “Ko 15 tausaga ko ‵teka atu nei, ne maua ei ne au se lagonaga me ko se toe mafai o ‵nofo fakatasi maua mo taku avaga. E kinau faeloa maua i taimi katoa. E se mafai ne au o fakagata tena inu kava. E masani o tiaki ne au a mā tama‵liki fo‵liki i te fale kae fano au o ‵sala taku avaga. Ne māfatia valevale eiloa au. I nisi taimi, ne fanatu au ki te lotu ke ‵sala atu ki se mea telā e mafai o fesoasoani mai ke maua ei se faka‵leiga ki ei. E tiga eiloa ne fakaaogā sāle te Tusi Tapu, ne seki lagona aka eiloa ne au ne pati fakatonutonu kolā e fakasino ‵tonu ki toku fakalavelave; e seai foki se tino ne vau o fai mai a mea kolā e ‵tau o fai ne au. Ne seki lotomalie au i te nofo atu i te lotu i se taimi tai leva kae fakafoki‵foki atu faeloa a nisi ‵talo.” E fanoa‵noa a nisi tino ona ko te lavea atu o te ‵mao keatea o olotou takitaki lotu mai te faiga o se fakaakoakoga ‵lei i olotou olaga. Ne iku atu i ei ki te ‵galo atu o te loto tali‵tonu i tino e tokouke ki lotu e pelā me ko te pogai o akoakoga kolā e ma‵nako latou ki ei ke manuia ei te olaga.

Telā la, e mafai o fesili ifo koe, ‘Se a la te vaegā akoakoga telā e ‵tau o maua ne au ko te mea ke manuia ei toku olaga?’ E mata, e maua i te Lotu Kelisiano tonu a te tali ki te fesili tāua tenei? Ka sau‵tala tatou ki te mea tenei i te suā mataupu.

[Fakamatalaga mai lalo]