Amaketo​—Se Gataga Tafasili i te Masei?

AMAKETO! E mata, e fai ne te pati tenei ke mafaufau koe ki se matugā fakamaseiga lasi io me ko te ‵sunuga o te lagi mo te lalolagi ki te afi? E fakaaogā sāle ne tino e tokouke i te lalolagi nei a nisi tugāpati faka-te-Tusi Tapu i aso takitasi, e pelā mo te tugāpati ko “Amaketo.” Ko lauiloa te fakaaogāga o te tugāpati tenei ke fakamatala atu ei te fakamoemoega fakamataku telā ka fe‵paki mo tino. Ko oti ne faka‵fonu ne ata i tamunei, televise, mo vitiō a mafaufauga o tino ki mea fakama‵taku kolā ka ‵tupu i “Amaketo.” Ko oti ne ‵funa aka te uiga tonu o te pati tenā kae fakamatala ‵se atu foki. E tiga eiloa e uke a fakamatalaga e uiga ki ei, a te ukega o mea konā e se fetaui mo mea kolā e akoako mai i te Tusi Tapu​​—⁠ko te koga e maua i ei te pati tenā​​—⁠e uiga ki Amaketo.

Ona ko te mea e ‵soko tasi ne te Tusi Tapu a Amaketo mo te “gataga o te lalolagi,” e mata, e se lotomalie koe me e tāua ‵ki ke malamalama faka‵lei i te uiga o te pati tenā? (Mataio 24:⁠3) Kae e mata, e se se mea ‵lei ke ‵saga atu ki te māfuaga sili o te munatonu, ko te Muna a te Atua, ke maua ei a tali ki te uiga o Amaketo mo tena uiga mō koe mo tou kāiga?

Ka fakaasi mai ne se vaegā sukesukega penā me i lō te aumaiga o se gataga tafasili i te masei, ka kamata mai i Amaketo se olaga fiafia mō tino kolā e fia ola mo te manuia i te lalolagi fou kae amiotonu. Ka fakamanuiagina koe māfai ko maua ne koe se malamalama manino e uiga ki te munatonu faka-te-Tusi Tapu tāua tenei mai te sukesuke ki te uiga tonu o Amaketo i te suā mataupu.

[Pokisi/Ata i te itulau e 3]

SE A TAU FAKA‵TAU KI TE UIGA O AMAKETO?

• Se fakamaseiga e auala i meatau fakaniukelea

• Se fakamaseiga o te laukele e auala i fakalavelave ‵tupu fakafuasei

• Ko te fepakiga o mea i te lagi mo te lalolagi

• Ko te fakamaseiga o tino amio ma‵sei ne te Atua